[k3vv3]

నల్లమల నిధి రహస్యం పార్ట్ - 28



"సంజయ్! సంజయ్!” అంటూ అరుస్తూ ఏడుస్తూ ఉంది సీత. ఒక కొడుకు ప్రమాదాన్ని వెతుక్కుంటూ అడవుల్లోకి వెళ్ళిపోయాడు. ఇంకో కొడుకు ఏదో ప్రమాదంలో చిక్కుకుపోయాడు.
 
"భగవంతుడా! నా బిడ్డలు.." అంటూ సొమ్మసిల్లి పడిపోయింది సీత. ఒక నిమిషం తరువాత ఆడుకుంటూ ఆడుకుంటూ వచ్చిన మల్లి, సీతను చూసి "అమ్మమ్మా! అమ్మమ్మా! లే.." అంటూ లేపడానికి ప్రయత్నం చేసి, సీత లేవకపోయేసరికి పరుగున వెళ్లి, వాళ్ళ అమ్మని తీసుకువచ్చింది. కమల సీత పరిస్థితి చూసి, మొహంపై నీళ్లు జల్లి, పైకి లేపి కూర్చోబెట్టింది.
 
"ఏమైంది అమ్మా! ఇలా పడిపోయారే? వంట్లో బాగోలేదా? హాస్పిటల్ కి వెళ్దామా? మీ అబ్బాయికి ఫోన్ చేయమంటారా?" అంటూ అడుగుతోంది కమల.
 
 
 
" ఎవరికి చేస్తావమ్మా కమలా! ఒక కొడుకేమో ఆ నీచుడ్ని వెతికి పట్టుకునేందుకు అడవుల్లోకి వెళ్ళి పోయాడు. ఇక్కడికి వస్తున్న నా చిన్న కొడుకు నాతో ఫోన్ మాట్లాడుతూ కారు నడుపుతూ ఉండగా కారుకి ఏదో ప్రమాదం జరిగినట్టు శబ్దం వినిపించిందమ్మా! " అంటూ బోరుమని ఏడుస్తోంది సీత.
 
"అయ్యో! మీరు ఏడవకండి అమ్మా! ఏమీ కాదు. ఉండండి.." అంటూ గబగబా వెళ్లి గ్లూకోస్ కలిపి తెచ్చి, సీతకు బలవంతంగా తాగించింది. సీత కొద్దిగా కోలుకుని సంజయ్ కి ఫోన్ చేసింది. ఫోన్ రింగ్ అవుతోంది. సీత గుండె వేగంగా కొట్టుకుంటోంది.
 
"ఫోన్ తియ్యి నాన్నా! సంజయ్.. "అంటూ వెక్కి వెక్కి ఏడుస్తోంది సీత. ఒక్కో రింగ్ కీ సీత గుండె ఆగి, ఆగి కొట్టుకుంటోంది.
 
ఆమె మొర దేముడు ఆలకించినట్టు ఫోన్ లిఫ్ట్ చేసి, "హలో." అంటూ ఒక గొంతు వినిపించింది.
 
సీతకి కన్నీరు రెట్టింపు అయింది.
 
ఆ దేవునికి మనసులోనే వేల వేల నమస్కారాలు తెలుపుకుంది ఆ తల్లి మనసు.
 
"హలో! అమ్మా! హలో.. వినిపిస్తోందా?" అంటూ రెట్టించిన గొంతు విని "చిన్నాడా! నా బంగారు తండ్రీ! నీకేం కాలేదుగా నాన్నా?" అంటున్న ఆ తల్లి గొంతులోని దుఃఖాన్ని అర్థం చేసుకున్న సంజయ్ " అమ్మా. నాకేమి కాలేదు. కార్ కంట్రోల్ తప్పి లారీని గుద్దేయబోయి. నేను టర్న్ తిప్పేసరికి చెట్టును గుద్దేయబోయాను. కానీ ఏదో మాయ చేసినట్టు ఒక్క క్షణంలో బ్రేక్ షార్ప్ గా పడి, తప్పించుకున్నాం" అంటూ చెప్పాడు.
 
" మరి.. ఆ శబ్దం వినే సరికి నీకు ఏమైందో అని.." అంటూ ఆ మాట ఇంక పూర్తి చేయలేక గొంతు పూడుకుపోయింది పాపం ఆ తల్లికి.
 
"అమ్మా! నేను బాగానే ఉన్నాను. మేము మళ్లీ స్టార్ట్ అవుతున్నాం. అన్నయ్య కి ఫోన్ చేస్తూనే ఉన్నాను. వాడి ఫోన్ కలవట్లేదు. వాడు ఇంటికి రాగానే కాళ్ళు చేతులు కట్టేసైనా సరే! ఇంట్లోనే ఉండేలా చేయి. వాడికి రేపు సూర్య గ్రహణం చాలా ప్రమాదకరం. అదంతా నేను వచ్చాక చెప్తాను. అవును గానీ అమ్మా.. వాడి చేతికి నేను కట్టిన రక్ష ఉంది కదా?" అని అడిగాడు సంజయ్.
 
"ఉంది నాన్నా! కానీ ఇప్పుడు దాని గురించి ఎందుకు అడుగుతున్నావు?" అని అడిగింది సీత.
 
"అమ్మా! ఐతే ఇంక కంగారు పడకు. ఆ రక్ష ఉన్నంతవరకూ వాడికి ఏమీ కాదు. నేను సాయంత్రానికల్లా ఇంట్లో ఉంటాను. రేపటి గ్రహణంలోగా నేను వచ్చేస్తాను కాబట్టి, వాడి మీద ఈగని కూడా వాలనివ్వను. నేను వస్తున్నా అమ్మా!" అంటూ ఫోన్ పెట్టేసి, తన పయనం మొదలుపెట్టాడు సంజయ్.
 
అతని మాటలు ఆ తల్లికి ధైర్యాన్ని ఇస్తే అతనే ప్రాణంగా బ్రతుకుతున్న అంజలి మాత్రం తన సంజయ్ కి ఏమవుతుందో అన్న భయంతో బిగుసుకుపోయింది.
అంజలి తల్లి మాత్రం "మనము అసలు శ్రీశైలం చేరుతామా? లేక దారిలోనే కైలాసానికి పోతామా? పోయి పోయి ఇతన్ని కార్ నడపమన్నాను చూడు. దేముడా!"అనుకుంటోంది మనసులో.
 
***
 
ఒక కొడుకు క్షేమంగా ఉన్నాడు అని తెలిసిన ఆ తల్లి కొద్దిగా కోలుకుని దేవుని పటం చూస్తూ "మల్లన్నా! నా బిడ్డలని చల్లగా చూడు స్వామి. చిన్నోడు క్షేమంగా ఇంటికి రావాలి.పెద్దోడికి ఆ సింగా నుంచి ప్రమాదం తప్పాలి." అంటూ మొక్కుకుంటోంది. కమల, ఆమెకు ధైర్యం చెపుతూ సాయంగా కూర్చుంది.
 
***
 
సింగాని వెతుకుతూ దట్టమైన అడవిలోకి వెళ్ళిపోయాడు అజయ్.
 
ఆ అడవి అంతా చూస్తూ ఉంటే అజయ్ కి తన గత జన్మ జ్ఞాపకాలన్నీ.. గత జన్మలో యుద్ధంలో జరిగిన దారుణమైన ఘటనలు ఒక్కొక్కటిగా కళ్ళముందు కదలాడుతున్నాయి.
ఆదివాసి వీరుల, వీరోచిత యుద్ధం.. నరేంద్రుని సేనల కుతంత్రం..ఆనాటి మారణహోమానికి రక్తసిక్తమైన ఆ పచ్చని అరణ్యం, అన్నీ తనకి ఇప్పుడే జరుగుతుందా అన్నట్టుగా. తను చూస్తోంది అంతా నిజమా.. భ్రమా అన్నట్టుగా ఒక విధమైన ఉద్వేగంతో ఉన్న అజయ్ నోటి నుండి. "ఉంగిలియర్! ఉఫిచిట్ హులెకర్! అంగలియా కోచత్! టీజెలక్సవ్.." అంటూ ఆ గత జన్మలో తన మాతృ భాష అయిన ఒకనాటి శక్తి కోయల భాష మాట్లాడుతూ ఉగిపోతున్నాడు.
 
అజయ్ కళ్ళు నీలంగా మారాయి. ఒక్కసారిగా వాతావరణం అంతా భయంకరంగా మారిపోయింది. నల్లటి మబ్బులు ఆకాశాన్ని కప్పేసాయి. ఈదురు గాలులతో ఆ అరణ్యం అత్యంత భయానకంగా మారిపోయింది. దానికి తోడు నక్కల ఏడుపు ఇంకా భయంకరంగా వినిపిస్తోంది. ఉద్వేగంతో ఉగిపోతున్న అజయ్ వెనకనే నీడగా నిలబడి వికృతంగా నవ్వుతోంది సింగా ని ఆవహించిన దుష్టాత్మ.
 
***సశేషం***

[k3vv3]

Good morning K3VV3 ji నాకు భారతీయ ఉజ్వల వైజ్ఞానిక పరంపర పుస్తకం అందుబాటులో ఉంటే కావాలి సార్ సురేష్ సోనీ ది తెలుగు లో ఉన్నది 

ఈ పుస్తకం నాకు అందుబాటులో లేదు సత్య గారు

సరిత్ గారిని అడగండి, ఉండవచ్చు!

[k3vv3]

నల్లమల నిధి రహస్యం పార్ట్ - 29



 
ఉద్రేకంతో ఊగిపోతున్న అజయ్ వెనకనే నీడగా నిలబడి వికృతంగా నవ్వుతోంది సింగాని ఆవహించిన దుష్టాత్మ.
 
అజయ్ తన వెనక ఉన్నది సింగానే అనుకుని ఒక్కసారిగా పిడికిలి బిగించి, వెనక్కి తిరిగి సింగా మొహంపై ఒక్క గుద్దు గుద్దాడు. మాములు మనిషి అయ్యుంటే ఆ ఫోర్స్ కి చచ్చిపోయేవాడు. కానీ ఇప్పుడు సింగా లాంటి నీచుడి వంట్లో ఇంకా నీచమైన నరేంద్రుని ఆత్మ ఆవహించి ఉండడం వల్లవాడికి ఏమీ కాలేదు.
 
వాడు ఇంకా వికృతంగా నవ్వుతూ గాలిలోకి ఎగిరిపోయి గిరగిరా తిరుగుతూ వికృతంగా నవ్వుతున్నాడు. ఆ నవ్వు ఎలా ఉంది అంటే ఓ మాదిరి గుండె ధైర్యం కలవారికి అక్కడే గుండె ఆగిపోతుంది. అంత వికృతంగా, అత్యంత పాశవికంగా ఉంది ఆ నవ్వు.
 
"ఫగ్గబ్జ్ గ్బజ్జా, హుఖబిక్ జక్కమన్గగ్ హిజంగ్గు (పిరికి వెధవ! ధైర్యం ఉంటే నేరుగా నాతో తలపడరా!)” అన్నాడు అజయ్. తను ఇప్పుడు మార్తాండగా తనని తాను పూర్తిగా నమ్ముతూ! సింగా ఒక్కసారిగా నేల మీదకి దూకి, నేరుగా అజయ్ మీదకు దూసుకు వచ్చి, అజయ్ పీక పట్టుకోబోయి, గాలిలో ఎగిరి పడ్డాడు.
 
అంతలోనే తేరుకొని, "అయ్యారే! సిద్ధాంతి తెలివైన వాడురా! ముందే బంధనాలన్నీ బిగించేసాడు. ఐనా ఇంకెంతలే! రేపటి సూర్యగ్రహణం ఒక ఘడియ పాటు అన్ని శక్తుల్ని నిర్వీర్యం చేసేస్తుంది. అప్పుడు నా పగ తీర్చుకుంటా. నిన్ను మృత్యుదేవతకి కానుకిచ్చి , మళ్లీ నా వీర విహారం ఆరంభించెద!" అంటూ వికటాట్టహాసం చేస్తూ గాలిలో ఎగిరి మాయమైపోయింది.
 
ఇదే జరుగుతుంది అని ముందే ఊహించిన మరియా అక్కడే మౌనంగా అదంతా చూస్తూ ఉండిపోయింది.
 
మార్తండగా తనని తాను ఊహించుకుంటున్న అజయ్ కి, తనకు నీడలా కావలికాస్తూ ఉన్న మరియా కనిపించింది.
 
"మరియా! ఓ నా ప్రాణమా!" అంటూ మరియా వైపుగా అడుగులు వేస్తున్నాడు అజయ్.
 
"ఆగు మామా! నీవు నన్ను తాకలేవు. నేను ఇప్పుడు ఆత్మను. నీకిచ్చిన మాట కోసం జన్మలుగా ఎదురుచూశాను. ఏ ఒక్కరినీ ఆ నిధిని తాకనివ్వలేదు. నీ మిత్రునికి నువ్వు మాటిచ్చావు. నువ్వు నా దగ్గర మాట తీసుకున్నావు. ఆనాటి నుండి ఈనాటి వరకూ నేను ఇచ్చిన మాట నిలబెట్టుకుంటూ నీ రాకకై వేచి ఉండి, విధి విధించిన వింత పయనంలో కల్లోల కడలిలోని నావలా, ఎడారి మంటల గ్రీష్మాన్ని గుండెల్లో దాచుకున్న ఆయువు లేని ఆకారాన్నయి నిలుచున్నా! ఏనాటికైనా నువ్వు తిరిగొస్తావని, మన ప్రేమ నిండిన ప్రణయ గీతికనే పాటలుగా పాడుకుంటూ..నీ అనురాగపు మాధుర్యంలోని మధురానుభూతులను కావ్యంగా మలుచుకుంటూ..ఆత్మనై మిగిలున్నా!
పున్నమి చంద్రుని సాక్షిగా, పచ్చని ప్రకృతి సాక్షిగా, సెలయేరుల సాక్షిగా ఈ అడవితల్లి నీడలో ఒక్కటైన మన జంట, పది కాలాలు పచ్చగా ఉండాలి అన్న మన గూడెం పెద్దల దీవెనలు ఫలించలేదు మామా! విధి వక్ర దృష్టి . మన జంటపై పడి, మనము విడిపోయాము. రెండు దేహాలు, ఒకటే ప్రాణం అనుకున్నాము మనము, మరణం కూడా మనల్ని విడదీయలేదు అనుకున్నాము. కానీ జాలి లేని విధి మరణం రూపంలో మనల్ని వేరు చేసింది.
 
ఊపిరి ఆగే క్షణం లో నీ ఆత్మ లోనే నా ఆత్మ కూడా కలిసి, పరమాత్మలో లీనం ఆయిపోవాలి అనిపించింది. కానీ నీకిచ్చిన మాట నాకు ఆ వరాన్ని కూడా దూరం చేసింది. నువ్వు లేకుండా ఒక్క క్షణం కూడా బ్రతకలేని నేను.. నువ్వు లేకుండా నీ కోసమే ఎదురుచూస్తూ వందల సంవత్సరాల నుండి ఎదురు చూస్తూనే ఉన్నాను.
 
నీరాక నాకు విముక్తిని కల్పించనుంది. ఆత్మ రూపం నుండి పరమాత్మలోకి కలిసిపోయే సమయం వచ్చింది" అంటున్న మరియా మాటలకూ అడ్డువస్తూ
 
" నేనూ నీ దగ్గరికి వచ్చేస్తా ప్రియా! నన్ను వదిలి వెళ్ళకు" అంటూ భోరున విలపిస్తున్నాడు అజయ్.
 
" వద్దు మామా! నేను వెళ్లాల్సిన సమయం వచ్చింది. కానీ నా బాధ్యత పూర్తిచేసుకునే వెళ్తాను. ముందు నేను చెప్పబోయేది పూర్తిగా విను" అంటూ అజయ్ ని ఊరడిస్తూ, మరియా మాట్లాడడం ప్రారంభించింది.
 
***
 
సంజయ్ కారు వేగంగా పోనిస్తున్నాడు. అప్పటికే సంజయ్ డ్రైవింగ్ చూసి, అంజలి వాళ్ళ అమ్మ ప్రాణాలు అరచేతిలో పెట్టుకుని, దేవుడిని ప్రార్థిస్తూ కూర్చుంది. అంజలి,సంజయ్ కి ధైర్యం చెప్తోంది. సంజయ్ మాత్రం కార్ చాలా స్పీడ్ గా నడుపుతున్నాడు. అతని ధ్యాస అంతా తన అన్న మీదనే. అతనికి ఎప్పుడెప్పుడు తన అన్నని చూస్తానా.. ఎలా అతన్ని కాపాడతానా.. అనే ఆలోచనలు! అది గమనించిన అంజలి, సంజయ్ కి ధైర్యం చెబుతూ ఉంది.
 
అంజలి తల్లి మాత్రం "పోయి పోయి, ఇతన్ని డ్రైవ్ చేసి పెట్టమని అడిగాను. ఈ స్పీడేంటో? శ్రీశైలం తీసుకెడతాడో? డైరెక్ట్ గా శివుడి దగ్గరే నిలబెట్టేస్తాడో? ఓరి నాయనో! పూర్వ జన్మలో గుర్రాలెక్కి, యుద్ధాలు చేసేవాడేమో! ఓరి దేముడా.. నువ్వే దిక్కు మల్లన్నా! మమ్మల్ని కాపాడు స్వామి.." అంటూ మనసులోనే మొక్కుకుంటోంది. మరి ఆవిడకి పూర్తిగా తెలియదు కదా సంజయ్ దేని గురించి భయపడుతున్నాడు అనేది! ఆవిడ భయంలో ఆవిడ ఉంది పాపం. అంజలికి మాత్రం రేపు అజయ్ ని కాపాడే ప్రయత్నంలో తన సంజయ్ కి ఏమవుతుందో అన్న భయం వెంటాడుతూ ఉన్నా పైకి మాత్రం గంభీరంగా ఉండి, సంజయ్ ని కాచుకుంటోంది.
 
***
 
సీత మనసు మాత్రం కీడుని శంకిస్తూ ఉంది. ఆమె కుడి కన్ను విపరీతంగా అదురుతోంది. 'మా పెళ్లి విషయంలో జోక్యం చేసుకుని, కయ్యానికి కాలు దువ్విన ఆ సింగాతో అజయ్ కి విరోధం రావడం విధి నిర్ణయమా? ఇన్నేళ్ల తరువాత కూడా పాత పగను మనసులో పెట్టుకుని, నా కొడుకు జీవితంలోకి, ఆ సింగా కావాలనే వచ్చాడా? కాదు! అజయ్ నా కొడుకు అని సింగా కి ఎలా తెలుస్తుంది? కాదు. నా కొడుకు అని తెలిసి ఉండదు. ఇదంతా యాదృచ్చికంగానే జరిగి ఉంటుంది' అనుకుంటూ పరి పరి విధాలుగా ఆలోచిస్తూ కలవరపడిపోతోంది సీత. ఆమెకు ఉన్న ఒకే ఒక్క ధైర్యం ఆ మల్లన్న స్వామే! ఆయన్నే స్మరించుకుంటూ తన కొడుకులిద్దరూ క్షేమంగా ఇంటికి చేరాలని తపిస్తోంది ఆ తల్లి హృదయం.
 
***సశేషం***

[k3vv3]

రేపు అప్డేట్ ఇస్తాను

[k3vv3]

రేపు అప్డేట్ ఇస్తాను

[k3vv3]

ఇంటర్నెట్ సమస్య వల్ల ఆలస్యం అయింది

నల్లమల నిధి రహస్యం పార్ట్ - 30

 
నేను వెళ్లాల్సిన సమయం వచ్చింది. కానీ నా బాధ్యత పూర్తి చేసుకునే వెళ్తాను. ముందు నేను చెప్పబోయేది పూర్తిగా విను!" అంటూ అజయ్ ని ఊరడిస్తూ మరియా మాట్లాడడం ప్రారంభించింది.
 
"మామా! ఆనాటి మన ప్రేమ కన్నా, నిన్ను నమ్మి, నీ సాయం కోరిన మహారాజుకి నువ్వు ఇచ్చిన మాటే విలువైనది. నీకు గుర్తు ఉందో లేదో కానీ, నువ్వు నీచుడైన నరేంద్రుడిని చంపిన క్షణంలో,నువ్వు మాట్లాడిన మాటలు ఇంకా నా చెవులలో ప్రతిధ్వనిస్తూనే ఉన్నాయి.
 
"మిత్రమా! నీ చావుకి బదులు తీర్చుకున్నాను. కానీ నా ఊపిరి కూడా ఆగిపోతోంది. నిధిని నీ రాజ్యానికి చేర్చినా, ఆ నీచుల పాలు ఐపోతుంది. నువ్వే తిరిగి రావాలి. నువ్వొచ్చే నాడే నేనొస్తా! మళ్ళీ పుట్టొస్తా!" అన్న నీ మాటలు, నువ్వు మహారాజుకి చేసిన వాగ్దానమే నిన్ను మళ్ళీ పుట్టించింది. నువ్వు పుట్టినట్టే, మన మహారాజు ప్రతాపరుద్రుల వారు కూడా మళ్ళీ పుట్టారు.నీతో పాటే పుట్టిన, నీ కవల తమ్ముడు ఎవరనుకుంటున్నావ్? నువ్వు ఎవరికోసమైతే ప్రాణాలు పణంగా పెట్టి పోరాడి బదులు తీర్చుకున్నావో, ఆ మహారాజే నీ తమ్ముడు సంజయ్!" అంటున్న మరియా వైపు ఆశ్చర్యంతో కూడిన ఆనందంతో చూస్తూ ఉద్వేగానికి లోనయ్యాడు అజయ్.
 
"ఏంటి మరియా? నువ్వు చెప్తుంది నేను నమ్మలేకపోతున్నాను. నా తమ్ముడు సంజయ్, పూర్వజన్మలో ఆ మహారాజా? అయ్యో! ఎంత తప్పు చేసాను. ఆయన్ని నేను, నాకన్నా చిన్నవాడేగా, తమ్ముడే కదా అని ఎన్నో సార్లు ఆయనపై ఆధిపత్యం చూపించేవాడ్ని" అంటూ అజయ్ కుమిలి పోతుంటే, మరియా " జరగబోయే ప్రమాదం గురించి తెలిస్తే, ఇంకేమైపోతావ్ మామా!? " అంది. ఆ మాట విన్న అజయ్ సూటిగా మరియా కళ్ళలోకి చూసాడు. ఆమె మొహంలో బాధ, భయమే చెప్తోంది, రాబోయే ఉపద్రవం తీవ్రత.
 
మరియా, అజయ్ నే చూస్తూ "మామా! రేపు సూర్య గ్రహణం. దానికి ఒక ప్రత్యేకత ఉంది. ఐదు వందల సంవత్సరాలకు ఒకసారి వచ్చే గ్రహ కూటమి, రేపు రానుంది. ఇది మీ అన్నదమ్ములు ఇద్దరి జాతకంలోనూ కీడును కలిగిస్తుంది. ఇద్దరిలో ఎవరికైనా, ఏమైనా కావొచ్చు. లేదా ఇద్దరికీ హాని కలగవచ్చు! ఈ ఘడియ కోసమే ఆ నరేంద్రుడి దుష్టాత్మ మీరు పుట్టినరోజు నుండీ మీ 25 వ పుట్టినరోజు వరకూ మిమ్మల్ని ఏమీ చేయలేకుండా, రేపటి గ్రహణం రోజు కోసం ఎదురు చూస్తోంది. మీ 25వ పుట్టినరోజు రాత్రి నుండీ, కేవలం నీ మీద మాత్రమే దాడి చేస్తూ, నిన్ను హింసించాలని ప్రయత్నం చేస్తూ వచ్చేది. నీకన్నా రెండు నిముషాలే తేడాతో పుట్టిన నీ తమ్ముడిని మాత్రం ఏమీ చేసేది కాదు. నువ్వు మరల జన్మించి ఉండి ఉంటే, ఎక్కడ ఉన్నా క్షేమంగా ఉండాలి, నా చెంతకు త్వరగా రావాలి అని నేను నిరంతరం ఆ ఇష్టకామేశ్వరి అమ్మవారిని ప్రార్ధించడం వల్ల, నీ జాతక ప్రభావం వలన, వాడు నీ మీద దాడి చేయాలని ప్రయత్నం చేసినప్పుడల్లా, నీవే వాడిని ఎదుర్కొనే వాడివి. కానీ అది నీకు గుర్తు ఉండేది కాదు. వాడికి 25 వ ఏట నీ జాతకంలో పొంచి ఉన్న మృత్యు గండం, ఇప్పుడు అనుకూలంగా మారింది. వాడు మీ రక్త సంబంధీకులలో ఒకరిని తన ఒక వాహకంగా మార్చుకుని, రేపటి గ్రహణ ఘడియలలో నిన్ను వధించి, ఆ వాహకంలోనే అమరుడై జీవిస్తూ, నిధిని కైవసం చేసుకుని, ఈ లోకాన్ని ఏలాలి అని పధకం రూపొందించాడు.
 
నేను చనిపోతూ వాడికి పెట్టిన శాపాన్నే, వాడు వరంగా మార్చుకోబోతున్నాడు మామా! అదే జరిగితే, ఈ ప్రపంచాన్నే తన చెప్పుచేతల్లో పెట్టుకోగలడు, ఆ నిధిని సొంతం చేసుకుని. మన మహారాజు ఆ నిధిని దేశం కోసం, దేశ ప్రజల భవిష్యత్తు కోసం ఉపయోగించాలని కోరాడు. ఆ కోరికతోనే, మళ్ళీ పుట్టాడు. ఆయనికి ఇదంతా గుర్తు లేకపోవచ్చు. కానీ ఆయన నీ తమ్ముడిగా మళ్ళీ పుట్టడానికి కారణం మాత్రం, ఆయన ఆశయమే. దేశం కోసమే మళ్ళీ పుట్టాడు ఆయన!అలాంటి మనిషిని, నీ నాశనం కోసం, తన వాహకంగా ఎంచుకున్నాడు ఆ నరేంద్రుడు. కానీ, మీ తమ్ముని వంటిపై ఉన్న రక్ష ఆ నీచుడ్ని మీ తమ్ముడిని తాకనివ్వక పోవడంతో, వేరొక వాహకాన్ని ఎంచుకున్నాడు. ఆ వేరొక వాహకమే, ఈ సింగా!" అంటూ మరియా చెప్తూ ఉంది.
 
"నువ్వు ఏమి చెప్తున్నావ్ మరియా? సింగా నాకు రక్త సంబంధీకుడు ఎలా అవుతాడు? " అంటూ అడిగాడు అజయ్.
 
"ఆవును మామా! సింగా ఈ జన్మలో నీకు రక్త సంబంధీకుడే." అంటూ మరియా సింగా గురించిన నిజం చెప్పనారంభించింది.
 
***
 
కారుని వాయువేగంలో నడుపుతూ, ఇంటికి చేరే సరికి మధ్యాహ్నం అయిపోయింది సంజయ్ వాళ్ళకి.ఇంటి ముందు కారు ఆగగానే, సీత పరుగున వెళ్ళింది.సంజయ్ ని చూస్తూనే, ఏడుస్తూ వెళ్లి గట్టిగా పట్టేసుకుని, "వచ్చేసావా చిన్నోడా! " అంటూ భోరుమంది సీత.
 
అంజలి ఆమెను ఊరడిస్తూ, " మేము వచ్చేసాముగా ఆంటీ! ఇంక అంతా సంజయ్ చూసుకుంటాడు. మీరు ఏడవకండి." అంటూ ధైర్యం చెబుతూ లోపలికి తీసుకు వెళ్ళింది.
 
సంజయ్ మాత్రం, తనకి ఎక్కువ సమయం లేకపోవడం వల్ల, అక్కడనుండే " అమ్మా! నువ్వు కంగారు పడకు. నేను ఒక ముఖ్యమైన పని మీద వెళ్తున్నాను. నువ్వు ధైర్యంగా ఉండు " అని చెప్పి అంజలితో "అమ్మని నేను వచ్చే వరకూ జాగ్రత్తగా చూసుకో" అని చెప్పి, సిద్ధాంతి గారు చెప్పిన పని పూర్తి చేసేందుకు బయలుదేరాడు. సంజయ్ వెళ్తున్న వైపే చూస్తూ ఉండిపోయింది అంజలి. ఆమె కంట వస్తున్న కన్నీటిని బలవంతంగా అదుపు చేసుకుంటూ..
సశేషం

[k3vv3]

నల్లమల నిధి రహస్యం పార్ట్ - 31



సిద్ధాంతి గారు చెప్పినట్టుగానే, ఆ ఖడ్గమును సంపాదించడం కోసం, నల్లమల అడవులలో కొలువై ఉన్న మహిమాన్వితమైన ఇష్టకామేశ్వరి అమ్మవారి గుడికి బయలుదేరాడు సంజయ్. అప్పటికే టైం రెండు అయిపోయింది. మూడింటి తరువాత, ఎవరినీ అడవిలోకి వెళ్లడానికి పర్మిషన్ ఇవ్వరు. సంజయ్ కార్ ని స్పీడ్ గా నడిపి, నంది సర్కిల్ కి చేరుకున్నాడు.
 
 
కార్ పక్కకి పార్క్ చేసుకుని, జీప్ మాట్లాడుకోడానికి వెడితే, ఎవ్వరూ ‘మేము రాము. ఇంక గంట తరువాత ఎవరిని లోపలికి అనుమతించరు, మీరు రేపు వెళ్ళండి’ అన్నారు. కానీ ఒక జీప్ అతను మాత్రం, సంజయ్ దగ్గరికి వచ్చి, "మిమ్మల్ని నేను తీసుకుపోతా! రండి, ఫారెస్ట్ ఆఫీసర్స్ ని నేను మేనేజ్ చేస్తాను " అంటూ నమ్మించి, జీప్ ఎక్కించుకున్నాడు. కొంత దూరం వెళ్లేసరికి ఫారెస్ట్ డిపార్ట్మెంట్ చెక్ పోస్ట్ వచ్చింది.
 
" మీరు కూర్చోండి. నేను వెళ్లి పర్మిషన్ తీసుకుని వస్తా!" అంటూ వెళ్ళాడు ఆ జీప్ నడిపే వ్యక్తి. సంజయ్ ఉన్న కంగారులో, అక్కడ ఏమి జరుగుతోందో గమనించలేదు.

ఆ జీప్ అతను వెళ్లి, "అయ్యా! అమ్మవారి గుడి కాడికి పోవాల! పర్మిషన్ ఇయ్యుండ్రి " అన్నాడు.
 
" ఇవాళ టైం అయిపోయింది. లోపలికి ఇంక అనుమతించం. రేపు రండి" అన్నారు అక్కడ ఆఫీసర్స్.

అంతే! ఆ జీప్ నడిపే వ్యక్తి, అక్కడ ఉన్న ఇద్దరు ఫారెస్ట్ ఆఫీసర్స్ పీకల్ని చెరో చేత్తో గట్టిగా పట్టుకుని, గాలిలో పైకి లేపి, " అయ్యారే. ఈ నరేంద్రుని మాటకే ఎదురు చెప్తారా? వాడు పోవాలి. అడవిలోనే పోవాలి. మీకభ్యన్తరమా? " అంటూ గొంతు వికృతంగా మార్చి, ఆ ఇద్దరి ప్రాణాలు గాలిలో కలిపేసాడు.
 
మళ్ళీ వచ్చి జీప్ స్టార్ట్ చేసి, "పర్మిషన్ ఇచ్చిన్రు. " అంటూ వేగంగా అడవిలోకి పోనిచ్చాడు జీప్ ని. కొంత దూరం వెళ్ళాక జీప్ అడవిలోకి తిరిగాక, కొంత దూరం తీసుకెళ్లి జీప్ ఆపేసి, "ఇక్కడ నుండి నడుస్తూ పోవాలి. నువ్వు వచ్చే వరకూ నేను ఈడనే ఉంటా" అని చెప్పాడు ఆ జీప్ నడిపిన వ్యక్తి.

"చాలా థాంక్స్ అన్నా! " అంటూ అడవిలో ముందుకు సాగాడు సంజయ్.
 
 
"జన్మలు మారినా, నన్ను నమ్ముతూనే ఉంటావా ప్రతాప!" అంటూ వికృతంగా నవ్వాడు జీప్ వాడిలా సంజయ్ ని అడవిలోకి తీసుకువచ్చిన సింగా. కాదు..కాదు! సింగాలోని నరేంద్రుడు.
 
సంజయ్ అడవి మార్గంలో, దారులు చూపించే బోర్డుల సాయంతో ముందుకు వెడుతున్నాడు. అతని వెనకనే ఎవరో వస్తున్నట్టు అనిపించి వెనక్కి తిరిగి చూసాడు. అక్కడ ఎవరూ లేరు. మళ్ళీ నడక ప్రారంభించాడు. "రేపు ఉదయం ఏడింటికి ప్రారంభం అయ్యే సూర్యగ్రహణం లోపు ఖడ్గాన్ని సంపాదించాలి "అనుకుంటూ నడకలో వేగం పెంచాడు సంజయ్. అతన్ని నీడలా అదృశ్యంగా వెంటాడుతున్నాడు నరేంద్రుడు.
 
"వెళ్ళు మహారాజా! నువ్వు ఖడ్గాన్ని వెలికి తీయి. నాకు కావాల్సింది కూడా అదే" అనుకుంటూ సంజయ్ ని అనుసరిస్తూ గాలిలో ఎగురుతున్నాడు సింగాని ఆవహించి ఉన్న నరేంద్రుడు.
 
***
 
" అవును మావా! ఆ సింగా, ఈ జన్మలో నీకు రక్త సంబంధీకుడే. నీకు జన్మనిచ్చిన నీ తల్లి సీతకి స్వయానా బాబయ్య కొడుకు. నీకు మేనమామ అవుతాడు. అందుకే, ఆ నరేంద్రుని దుష్టాత్మ అతన్ని వాహకంగా మార్చుకుంది. ఆనాడు చనిపోయే క్షణం ముందు, నా నోటి నుంచి అలాంటి శాపం రావడానికి కారణం లేకపోలేదు. ఆ అమ్మవారే నా నోటి నుండి అలా పలికించింది.
 
వాడికి అంతం ఉంది. అది కూడా మళ్ళీ పుట్టిన నీ చేతిలోనే అని నా నోటి నుండీ అమ్మవారు పలికించుటకు కారణం, ఆ నీచుడి ఆత్మ, ప్రళయంగా మార కూడదు అనే!" అంటున్న మరియా వైపు ఆశ్చర్యంగా చూసాడు అజయ్.
 
" అర్ధం కాలేదా మావా! ఈ సృష్టిలో ఏదీ ఊరికే జరగదు మావా! అన్నిటికి కార్యాకారణ సంబంధం ఉంటుంది. ఆ నరేంద్రుని అంతం, మళ్ళీ పుట్టిన నీ చేతిలోనే, అని నేను శపించడం కూడా విధి లిఖితం. అందులో ఉన్న అంతరార్థం మానవమాత్రులకు అర్ధం కాదు. నిధి కోసం ఎందరో అమాయకులను బలి చేసిన ఆ క్రూరుడు, చివరికి ఆ నిధిని సొంతం చేసుకోకుండానే చనిపోయాడు. చనిపోయే క్షణంలో వాడు తీరని పగతో, నిధి మీద తీరని వ్యామోహంతో ఉన్నాడు. పగతో చనిపోయిన వాడు ప్రేతాత్మ గా మారతాడు. అలాంటి వాడి ఆత్మకు అంతం ఉండదు. అది సృష్టించే వినాశనానికి హద్దే ఉండదు. అందుకే, వాడి ఊపిరి పూర్తిగా ఆగక ముందే, వాడికి అంతం, నీ పుట్టుకతో ముడిపెట్టి, నా నోటితో చెప్పించింది ఆ జగన్మాత!" అంటూ చెప్తున్న మరియా మాటలు అజయ్ ని ఆలోచింపజేస్తున్నాయి.
 
 
"రేపటి సూర్యగ్రహణం మొదలు అయ్యేలోగా, మనము ఇష్టకామేశ్వరి అమ్మవారి గుడికి చేరుకోవాలి. అక్కడ అమ్మవారి గుడి లోపల నుంచి సొరంగ మార్గం గుండా లోపలికి వెళితే, అక్కడ ఒక శిల్పం ఉంటుంది. ఆ శిల్పం చేతిలో ఉన్న దివ్య ఖడ్గం మనకు చాలా అవసరం. దానితో మాత్రమే ఆ సింగాని ఆవహించి ఉన్న ఆ దుష్ఠుడ్ని నాశనం చేయగలం. మనము బయలుదేరాలి మావా!" అంటున్న మరియా వైపు చూస్తూ.
 
"వెళ్దాం మరియా! నేనూ వాడిని అంతం చేసి తీరుతాను. నిధిని మహారాజుకి అందించి, నా వాగ్దానాన్ని నిలబెట్టుకుని, నీతో వచ్చేస్తాను." అంటున్న అజయ్ ని వారించింది మరియా.
 
"అలా అనద్దు మావా! నేనూ ఆత్మని, నీవు మనిషివి. మన మధ్య ప్రేమ సృష్టికి విరుద్ధం!" అంటూ అజయ్ కి దూరంగా జరిగింది మరియా.
 
"సృష్టి ప్రేమతోనే మొదలైంది మరియా! మన ప్రేమ విధి ముందు ఓడిపోయింది అనుకుంటున్నావేమో, అది ఎప్పుడూ గెలుస్తూనే ఉంది. దానికి నిదర్శనం, నీ. దర్శనం.
మరణం విడదీసిన ప్రేమ. మరణమే కలిపే ప్రేమ. మన ప్రేమ అమర ప్రేమ. " అంటూ మరియాకి దగ్గరగా జరిగి, ఆమెను దగ్గరికి తీసుకోవాలని ప్రయత్నం చేసి, గాలి లాంటి ఆమెను తనలో కలుపుకోలేక, చిన్నబోయాడు.
 
"ఇదే జరుగుతుంది మావా! ఇక మన పయనం ఇదే అవుతుంది. అందుకే చెబుతున్నా. నే వెళ్ళక తప్పదు. నువ్వు నిలవక తప్పదు. " అంటున్న మరియా కళ్ళలోకి సూటిగా చూస్తూ
 
"ఈ హృదయంలో నీ ప్రేమే నిలిచి ఉంటుంది.
ఈ కన్నుల్లో నీ రూపం కదలాడుతూనే ఉంటుంది.
నన్ను నీలో, నిన్ను నాలో కలిపేది మరణమే అయితే,
నా పునర్జన్మకి కారణమైన నా వాగ్దానాన్ని నెరవేర్చిన మరు క్షణం, నా ఊపిరి నీ ఆత్మకు నేను ఇస్తున్న కానుక అవుతుంది. ఇది ఆ కొండదేవరపై ఆన!
నేను ప్రేమించే నీ ఆన! నా ప్రపంచమైన ఈ నల్లమలపై ఆన!" అంటూ ప్రేమోన్మాదంతో, ఒక భగ్న ప్రేమికుడిగా ఆన చేసిన అజయ్ కి ఆ నిమిషం, తన ప్రేయసితో కలిసి జీవించిన గత జన్మ లోని మధుర క్షణాల వలన కలిగిన భావోద్రేగం, ఈ జన్మలో తానొక తల్లికి బిడ్డని అనే విజ్ఞతను చెరిపేసింది. ఇప్పుడు తన లక్ష్యం వైపుగా అడుగులు వేయనారంభించాడు అజయ్, మరియా తో కలిసి.
 
***
 
ఆ ఇద్దరు అన్నదమ్ముల క్షేమం కోరి, ఆయుష్ హోమం చేస్తున్న సిద్ధాంతి గారి దివ్య దృష్టికి అజయ్, తన పునర్జన్మకు కారణమైన వాగ్దానాన్ని నిలబెట్టుకుని, అది నెరవేరిన మరు క్షణం, మరియా కోసం చనిపోవడానికి సిద్ధపడుతున్నాడు అని అర్ధం అయింది.
 
"అమ్మా, జగన్మాతా! ఏమి నీ లీల? ఆ తల్లికి గర్భశోకం తప్పదా?" అనుకుంటూ ఉండిపోయారు.సిద్ధాంతి గారు.
 సశేషం

[k3vv3]

నల్లమల నిధి రహస్యం పార్ట్ - 32
 
ఆ అడవిలో, పరుగు లాంటి నడకతో వేగంగా నడుస్తూ వెళ్తున్న సంజయ్ కి, తాను ఇదివరకు ఎప్పుడో, ఈ అడవి ప్రాంతంలో తిరిగినట్టుగా అనిపించసాగింది. వేగంగా నడుస్తూ, మధ్య మధ్యలో ఇంకా వేగంగా పరిగెడుతూ, ఆగి ఆగి రొప్పుతూ, ఆ అడవి మార్గంలో వెడుతూ ఉన్న అతనికి ఓపిక అంతా సన్నగిల్లుతోంది.
 
ముందు రోజు రాత్రంతా నిద్రలేకపోవడం, పొద్దున్నుంచి ఏమీ తినకపోవడం వల్ల, అలుపెరగని ప్రయాణం వల్ల, అతన్ని నిస్సత్తువ ఆవరిస్తోంది. అయినా, తన అన్నకోసం ఓపిక కూడగట్టుకుని, ఒక్కో అడుగు వేస్తూ, నడుస్తూ ఉన్న సంజయ్ కి గొంతు తడి ఆరిపోతోంది. ఆకలితో కడుపులోని పేగులు మెలితిరిగి పోతున్నాయి. ఇంకా ఒక ఫర్లాంగు దూరం ఉంది అనగా, సంజయ్ కళ్ళు తిరిగి పడిపోయాడు. సంజయ్ నే నీడలా వెంబడిస్తూ వచ్చిన నరేంద్రుని దుష్టాత్మ వికృతంగా నవ్వసాగింది.
 
" అయ్యారే.. మహారాజా! అయిపోయిందా నీ ఓపికా? లే! లేచి వెళ్ళు. ఆ ఖడ్గం నాకూ అవసరమే. అది నువ్వు బయటకు తేవాలి, నేనూ దాన్ని నీ నుండి సొంతం చేసుకుని, నా అంతాన్నే అంతం చేసి, నాకు ఏనాడో సొంతం కావాల్సిన నిధిని సొంతం చేసుకుని, నా తీరని కోరిక తీర్చుకుంటా!
 
నాకిక అంతం ఉండదు. ఈ వాహకం నుండి ఇంకో వాహకంలోకి, మరో వాహకంలోకి మారుతూ, ఆత్మని అయినా హాయిగా మళ్ళీ మళ్ళీ కొత్త రూపాలను పొందుతూ, ఈ నిధితో ఈ ప్రపంచంలోని అన్నీ విలాసాలను అనుభవిస్తూ, అపర కుబేరుడనయి వెలిగిపోతాను" అంటూ వికృతంగా నవ్వుతూ, తన దుష్టశక్తితో వర్షం కురిపించసాగాడు. ఆ వర్షపు నీరు, సంజయ్ ని స్పృహలోకి వచ్చేలా చేసింది.
 
స్పృహలోకి రాగానే, కళ్ళు మసక మసకగా అవుతున్నా మళ్ళీ తన పయనం ప్రారంభించాడు సంజయ్.
 
తను చనిపోయినా పర్వాలేదు. ఎలాగైనా ఖడ్గాన్ని సంపాదించి, తన అన్నకు ఇచ్చి, సిద్ధాంతి గారు చెప్పిన విషయాలు అన్నీ చెప్పి, అన్నను కాపాడుకోవాలని ఒక తమ్ముడిగా, తన శక్తికి మించి, తన ప్రాణాలను పణం పెట్టి ఆ అడవిలో, విధికి ఎదురీదుతున్నాడు సంజయ్.
 
***
 
సీత మనసంతా గందరగోళంగా ఉంది.
అంజలి, అంజలి వాళ్ళ అమ్మా, సీతకు ధైర్యం చెప్పి, కొద్దిగా అన్నం తినిపించగలిగారు. సంజయ్, అజయ్ లను తలుచుకుంటూ సీత, వాళ్ళిద్దరి క్షేమం కోసం మల్లన్న స్వామిని వేడుకుంటూ ఉంది.
 
"కంగారు పడకండి ఆంటీ! సంజయ్ వెళ్లాడు కదా! వాళ్ళ అన్నయ్యతోనే తిరిగివస్తాడు చూడండి. మీరు బాధపడకండి" అంటున్న అంజలితో
 
" అజయ్ వెతుక్కుంటూ వెళ్లిన సింగా, స్వయానా నా బాబాయి కొడుకు. నాకు తమ్ముడు, వీళ్ళకి మేనమామ.
నీకు తెలీదు అంజలీ! నేను ప్రేమ వివాహాం చేసుకున్నాను అని! మా తండ్రి మమల్ని ఇంట్లోకి రానివ్వకపోతే, మేము ఇదే ఊరిలో విడిగా ఉండేవాళ్ళం. మా వల్ల మా నాన్న పరువు పోయింది అంటూ ఈ సింగా, నన్ను నా భర్తని చాలా సార్లు చంపాలని ప్రయత్నం చేసేవాడు. మా నాన్న చనిపోయిన తరువాత, ఆయన ఆస్తిని, ఇంటిని స్వాధీనం చేసుకుని, చాలా అరాచకాలకు పాల్పడేవాడు.
 
నా భర్త వాడిని ఎదుర్కొనే క్రమంలో, మాకు విజయనగరం ట్రాన్స్ఫర్ అయిపోయింది. అలా చేయించింది కూడా సింగానే. ఊరు విడిచి వెళ్లిపోతున్నప్పుడు కూడా మమ్మల్ని అవమానకరంగా మాట్లాడాడు. ఇక ఈ జన్మలో సింగాతో మాకిక సంబంధం ఉండదు అనుకున్నాను. కానీ విధి మళ్ళీ మమ్మల్ని ఇక్కడికి లాక్కొచ్చింది. ఎవరి మొహం జీవితంలో చూడకూడదు అనుకున్నానో, వాడితో, నా కొడుకుకి వైరం వచ్చింది. వాడు చాలా క్రూరుడు అంజలీ! ఏ జన్మలో ఏమి పాపం చేసానో తెలియదు. 'నా' అన్నవారిని మింగేసింది ఈ అడవి" అంటూ, ఒక తండ్రిని కోల్పోయిన కూతురిగా, భర్తను పోగొట్టుకున్న భార్యగా, ఇప్పుడు బిడ్డలకి కూడా ఆ అడవిలో ఏం జరగబోతోందో అనే బాధతో ఒక తల్లిగా ఆమె పడుతున్న వేదన చూసి అంజలికి, అంజలి తల్లికి కూడా కళ్ళు చెమ్మగిల్లాయి.
 
***
 
మరియాతో కలిసి, అమ్మవారి గుడికి బయలుదేరిన అజయ్, ఒక్కసారిగా పడుతున్న వర్షంలో తడిసి ముద్దయిపోతున్నాడు.
 
"ఇదేంటి? ఇప్పటి వరకూ లేని వాన, ఇప్పుడు మొదలైంది.." అని అజయ్ అంటూ ఉండగా.
" మావా! ఇది సహజంగా కురుస్తున్న వర్షం కాదు. ఇది ఆ దుష్టుడి పని" అంది మరియా.
 
"వాడి పనా! కానీ ఎందుకు?" అన్నాడు అజయ్.
మరియా ఒక్క నిమషం కళ్ళు మూసుకుంది. ఆమె ముఖంలో హావభావాలు మారిపోతున్నాయి. మూసి ఉన్న ఆమె కనురెప్పల మాటుగా, అటు, ఇటు తిరుగుతున్న ఆమె కను గుడ్లు, ఆమెలోని కలవరాన్ని తెలియజేస్తున్నాయి.
 
ఆమె తన ఆత్మ శక్తితో ఏమి చూస్తోందో తెలియని అజయ్ కి ఆందోళన పెరిగిపోతోంది.
 
ఒక్కసారిగా కళ్ళు తెరిచిన మరియా.
 
"మావా! నీ తమ్ముడు సంజయ్ ప్రమాదంలో ఉన్నాడు. అతను ఇప్పుడు నీకోసమే, ఆ ఖడ్గాన్ని సంపాదించాలని అమ్మవారి గుడికి చేరుకోబోతున్నాడు. కానీ." అంటూ ఇంకా ఏదో చెప్పబోయి, ఆగిపోయింది మరియా.
 
" హా! చెప్పు మరియా.. కానీ ఏంటి? " అంటున్న అజయ్ తో.
 
" మావా! మాట్లాడేందుకు సమయం లేదు. ఆ గుడి ఇక్కడికి చాలా దూరం. ఆలస్యం చేయకుండా అక్కడికి చేరుకోవాలి. లేకుంటే నీ తమ్ముడి ప్రాణానికే ప్రమాదం. నేను నీలో ఆవహిస్తాను. ఆ తాయత్తు నన్ను ఏమీ చేయదు. నేను అమ్మవారి ఉపాసకురాలిని కదా! " అంటూ అజయ్ ని పూర్తిగా మాట్లాడనివ్వకుండా, అజయ్ శరీరంలోకి మరియా ఆవహించింది.
 
ఒక్కసారిగా అజయ్ గాలిలోకి ఎగిరి, అమ్మవారి గుడి వైపుగా పయనమయ్యాడు.
సశేషం

[k3vv3]

నల్లమల నిధి రహస్యం పార్ట్ - 33
 " మావా! మాట్లాడేందుకు సమయం లేదు. ఆ గుడి ఇక్కడికి చాలా దూరం. ఆలస్యం చేయకుండా అక్కడికి చేరుకోవాలి! లేకుంటే నీ తమ్ముడి ప్రాణానికే ప్రమాదం.
నేను నీలోకి అవహిస్తాను. ఆ తాయత్తు నన్ను ఏమీ చేయదు. నేను అమ్మవారి ఉపాసకురాలిని కదా! " అంటూ అజయ్ ని పూర్తిగా మాట్లాడనివ్వకుండా, అజయ్ శరీరంలోకి మరియా ఆవహించింది. ఒక్కసారిగా అజయ్ గాలిలోకి ఎగిరి, తను అమ్మవారి గుడి వైపుగా పయనమయ్యాడు.
 
సంజయ్ ఒక్కో అడుగూ భారంగా వేస్తూ, చివరికి అమ్మవారి గుడికి చేరుకొని, అక్కడే కుప్పకూలిపోయాడు.
అక్కడ ఉన్న ఆదివాసులు, పూజారి గారు వచ్చి, "ఎవరు బాబూ నువ్వు? ఇక్కడికి ఈ సమయంలో ఎలా రాగలిగావు? ఈ సమయంలో అధికారులు ఎవరినీ ఇక్కడ ఉండనివ్వరు కదా! ఎలా వచ్చావు?" అంటూ, ఒక్కొక్కరు ఒక్కో ప్రశ్న వేస్తున్నారు.
 
సంజయ్ ఒక్క మాట కూడా మాట్లాడకుండా వారి వైపు దీనంగా చూస్తూ, ఆయాసంతో రొప్పుతున్నాడు. పూజారి గారు వెంటనే లోపలికి వెళ్లి, అమ్మవారికి అభిషేకం చేసిన పాలు తీసుకు వచ్చి, సంజయ్ చేత తాగించారు. అవి తాగిన సంజయ్, కొద్దిగా ఊపిరి తీసుకుని, కాస్త తేట పడి, ఆ పూజారి గారి వైపు కృతజ్ఞతగా చూస్తూ, రెండు చేతులు జోడించి,
 
" అయ్యా! నేను మా అన్నయ్యని కాపాడుకోవడం కోసం ఇక్కడికి వచ్చాను. అధికారుల అనుమతి తీసుకునే జీప్ అతను నన్ను లోపలికి తీసుకువచ్చాడు" అంటూ సంజయ్ తనకి కావాల్సిన ఖడ్గం గురించి పూజారి గారిని అడిగే లోపే, ఒక్కసారిగా అక్కడ ఉన్న పొదల నుండి అజయ్ పరిగెట్టుకుంటూ రావడం చూసి అందరూ ఒక్కసారి భయపడ్డారు.
 
 
సంజయ్ మాత్రం, " అతనే మా అన్నయ్య" అంటూ వెళ్లి అజయ్ ని గట్టిగా హత్తుకుని,
 
" అన్నయ్యా! నీకోసం అమ్మ కంగారు పడిపోతోంది.
నీకోసం, నీ క్షేమం కోసమే నేను వచ్చాను" అంటూ ఏడ్చేస్తున్నాడు.
 
అజయ్ కి 'సంజయ్ ఈ జన్మలో తన తమ్ముడు' అన్న దానికన్నా, క్రిందటి జన్మలో తన మహారాజు, మిత్రుడు అనే భావన, అతనితో సంజయ్ ని "మిత్రమా." అని పిలిచేలా చేసింది.
 
" మిత్రమా. ఏంటిరా? నేను సంజుని." అంటూ తన అన్న కళ్ళలోకి చూస్తున్న సంజయ్ ని
 
" అదే.. అదే.. నువ్వు ఇక్కడికి రావడం ఏంటి?"అంటూ ఉండగా పూజారి గారు అక్కడ ఉన్న అదిమవాసులందరినీ
 
" మీరంతా వెళ్లి, మీ పనులు చూసుకోండి. ఆ వచ్చిన వారెవరో, ఏ పని మీద ఈ సమయంలో వచ్చారో, తెలుసుకుని పంపుతాను" అంటూ అందరినీ అక్కడనుండి పంపించి,
 
తను సంజయ్ వాళ్ళ దగ్గరికి వచ్చి,
"బాబూ! మీరిద్దరూ ఇక్కడ ఎక్కువ సేపు ఉండకూడదు. మీరు ఏదో పని మీదే వచ్చినట్టు ఉన్నారు" అంటున్న ఆయన అజయ్ కి పక్కనే నిలబడి ఉన్న గాలి లాంటి ఆకారం గల మరియాను చూసి, " అర్ధం అయింది! మీరెవరో నాకు అర్ధం అయింది. మార్తాండ, ప్రతాప రుద్రులు! దేశం కోసం మళ్ళీ పుట్టిన కారణ జన్ములు! మీ ఇరువురి రాక కోసం, ఎన్నో ఏళ్లుగా నిధిని కావలి కాస్తూ ఉన్న ఆ దీనురాలికి విముక్తి కలుగనుంది" అంటున్న ఆయన మాటలు సంజయ్ కి ఆశ్చర్యం కలిగించాయి.
 
"అన్నయ్యా! అయన చెప్పిన వారిలో నువ్వు మార్తాండ అని నాకు ముందే తెలుసు" అంటున్న సంజయ్ వైపు చూస్తూ.
 
“ఏమంటున్నావ్? నీకు ఎలా తెలిసింది? " అంటున్న అజయ్ కి తను తెలుసుకున్నది అంతా చెప్పనారంభించాడు సంజయ్.
 
" అన్నయ్యా! నీకు గుర్తు ఉందో లేదో, మన 25 వ పుట్టినరోజు రాత్రి, ఒక ఆకారం నీ మీద దాడి చేస్తూ ఉండగా, అప్పుడే మెలుకువ వచ్చిన నేను, దాన్ని ఎదుర్కోబోతే, అది నా పీక పట్టుకుని, గాలిలోకి లేపింది. ఉన్నపళంగా నిద్రలోనే పైకి లేచిన నీ కళ్ళు నీలి రంగులోకి మారిపోయాయి. ఏదో వింత భాష మాట్లాడుతోన్న ఆ ఆకారంతో, నువ్వు అలాగే మాట్లాడుతూ, దాన్ని ఎదుర్కున్నావు. అది నా పీక వదిలేసింది. అప్పుడు కింద పడ్డ నేను, మరునాడు ఉదయం పైకి లేచాను. నిన్ను అదే అడిగితే, హారర్ సినిమాలు చూసి, పిచ్చి కలేదో కనుంటావ్! అంటూ నే చెప్పేది పట్టించుకోలేదు నువ్వు. నేను కలే అనుకుని వదిలేసాను.
 
మళ్ళీ నువ్వు ఇక్కడికి రాకముందు, వైజాగ్ లో ఉండగా అలాంటి అనుభవమే అమ్మకూ ఎదురైంది. నేను వచ్చేసరికి అమ్మ భయం చూసి అడిగితే, అమ్మ అంతా చెప్పింది.
 
ఆ రోజే నేను, అమ్మ చెప్పినట్టుగా, నీ జాతకం మన రామచంద్ర సిద్ధాంతి గారికి చూపించి, నిన్ను కాపాడుకునేందుకు ప్రయత్నం మొదలుపెట్టాను. ఆ ప్రయత్నంలో, నీ గత జన్మ గురించి తెలుసుకున్నాను. నిన్ను కాపాడుకోవడం కోసమే, ఆ దివ్య ఖడ్గాన్ని సంపాదించేందుకే, నేను ఇక్కడికి వచ్చాను. నీ చేతికి, ఆ రోజు కట్టిన తాయత్తు ఆయన ఇచ్చినదే. నువ్వు చాలా ప్రమాదంలో ఉన్నావు అన్నయ్యా! రేపు గ్రహణం చాలా ప్రమాదకరం నీకు. నీ మీద దాడి చేసిన ఆ ఆకారం, నిన్ను రేపటి సూర్యగ్రహణం ఘడియలలో వధించి, తన పగ తీర్చుకోవాలని చూస్తోంది. ఆ ఆకారం పేరు నరేంద్రుడు" అన్నాడు అజయ్.
 
షాక్ అయి చూసాడు సంజయ్, ఆ మాట విని.
 
" అన్నయ్యా! నీకు ఎలా తెలుసు? అంటే.." ఆశ్చర్యంగా చూస్తున్నాడు సంజయ్, అజయ్ వైపు.
 
" అవును! నీ అనుమానం సరైనదే! నాకు నా గతజన్మ అంతా గుర్తు ఉంది. అంతే కాదు. నువ్వు ఈ జన్మలో నా తమ్ముడివే. కానీ గత జన్మలో నువ్వు నా మహారాజువి. ప్రతాపరుద్ర మహారాజువి. కాకతీయ మహా సామ్రాజ్యపు ఆఖరి మహారాజువి" అంటూ అజయ్ చెప్తూ ఉండగానే..
 
 
" చూడండి బాబూ! మీరిద్దరూ రేపు సూర్యగ్రహణం లోగా ఆ దివ్య ఖడ్గాన్ని సంపాదించి, ఆ నీచుడి ఆత్మను నాశనం చేయాలి. లేకపోతే, ఆ ఒక్క ఘడియ చాలు. ప్రపంచ వినాశనానికి! ఆ ప్రళయాన్ని ఆపాలి అంటే, సాహసవంతమైన మార్గంలోనే, గుండె ధైర్యంతో ముందుకుసాగండి. ఆ ఖడ్గమును సాధించి, తిరిగి రండి. విజయోస్తు!" అంటూ సొరంగ మార్గంలో తీసుకోవలసిన జాగ్రత్తలను రాసి ఉంచిన తాళపత్ర గ్రంధాన్ని వారి చేతికి అందించాడు పూజారి గారు.
 
ఇప్పటి వరకూ, సంజయ్ ద్వారా తను ఆ దివ్య ఖడ్గాన్ని సొంతం చేసుకుని, తన అంతాన్నే, అంతం చేసేయాలని కలలు కన్న ఆ నరేంద్రుని దుష్టాత్మ, ఊహించని రీతిలో అజయ్ అక్కడికి రావడం చూసి, తన పన్నాగం విఫలం అయిందే అని కోపంతో రగిలిపోతూ, వికృతంగా నవ్వుతూ.
విధ్వంసం సృష్టిస్తున్నాడు. ఒక్కసారిగా వాతావరణం మారిపోయి, భీకరమైన వర్షం కురువనారంభించింది.
అది చూసి, పూజారి గారు ఆ అన్నా తమ్ముళ్లతో
 
" మీరు బయలుదేరండి. వాడిని అంతం చేసే ఆయుధాన్ని తీసుకురండి. వాడిని మీ దాకా రానివ్వకుండా మరియా పవిత్ర ఆత్మ ఆపుతుంది" అని చెబుతూ ఉండగా
 
మరియా ఆ నరేంద్రుని దుష్టాత్మతో పోరాటం మొదలుపెట్టింది.ఆ యుద్ధం అజయ్ కి, పూజారి గారికి మాత్రమే కనిపిస్తోంది. సంజయ్ కి అక్కడ తను చూడలేనంత వెలుగు కనిపిస్తోంది. ఇక వారు కాలయాపన చేయకుండా ఆ దివ్య ఖడ్గమును సంపాదించేందుకు సొరంగ మార్గం గుండా పయనం ప్రారంభించారు.
 
ఆ దుష్టాత్మకి, మరియాకి భీకరమైన యుద్ధం జరుగుతోంది. ఉరుములు, పిడుగులతో కుండపోత వర్షం కురుస్తోంది. ఇంతలో..
సశేషం
 *ఈ భాగం చదివిన పాఠకమిత్రులు వారి అభిప్రాయాలను, రేటింగులు, లైకులు లేదా వ్యాఖ్యల ద్వార తెలియజేయమని మనవి

[k3vv3]

Just came across this story accidentally and feeling bad that I had not come across it early. What a story and what I can say about the narration and story telling, very gripping and exhilarating read. Started with 1st episode and finished to the latest episode. Not sure why people are missing it might because it is not with the usually story section.

Thank you to the writing for giving a beautiful gripping and exciting story, if this story might have appeared in a swathi or other telugu maganize would have lakhs of viewers.

Thank you Bhavabhuti garu for your highly encouraging and supporting comments

[k3vv3]

నల్లమల నిధి రహస్యం పార్ట్ – 34
 
ఆ అన్నాతమ్ములు ఇద్దరూ దివ్య ఖడ్గమును సంపాదించేందుకు సొరంగ మార్గం గుండా పయనం ప్రారంభించారు. ఆ దుష్టాత్మకి, మరియాకి భీకరమైన యుద్ధం జరుగుతోంది. ఉరుములు, పిడుగులతో కుండపోత వర్షం కురుస్తోంది.
 
ఇంతలో సెక్యూరిటీ సూర్యం "ఇన్స్పెక్టర్ అజయ్, సింగాని వెతుకుతూ అడవిలోకి ఒక్కరే వెళ్లిపోయారు" అంటూ పై అధికారులకు ఇచ్చిన ఇన్ఫర్మేషన్ వల్ల, అలెర్ట్ అయిన సెక్యూరిటీ అధికారి యంత్రాంగం అప్పటికే, అజయ్ కోసం నల్లమల అడవుల్లో గాలింపు చర్యలు చేపట్టారు. ఆ దారిలోనే, చనిపోయి ఉన్న ఫారెస్ట్ అధికారుల భౌతిక దేహాలను గవర్నమెంట్ ఆసుపత్రికి తరలించారు. అక్కడ ఉన్న సీసీటీవీ పుటేజ్ ఆధారంగా, ‘వాళ్ళని చంపింది సింగానే’ అనే ఒక ప్రాథమిక నిర్ధారణకు వచ్చారు. వాయువేగంలో అప్పటికే ఆ వార్త మీడియాకి చేరిపోయింది. 'నల్లమల అడవుల్లో ఏదో జరిగిపోతోంది' అంటూ ఎప్పటినించో ప్రోగ్రామ్స్ చేస్తూ ఉన్న పీకే ఛానల్ వాళ్లు కూడా దొరికిందే సందు అంటూ రంగంలోకి దిగిపోయారు.
 
"ఇన్స్పెక్టర్ అజయ్ ధైర్యసాహసాలు! అడవిలోకి పారిపోయిన నేరస్తుడు సింగా! పట్టుకునేందుకు ఒక్కడే ధైర్యంగా వెళ్లిన ఇన్స్పెక్టర్ అజయ్.. జీప్ నడుపుకుంటూ అడవిలోకి వెళ్లేదారిలో సింగాను అడ్డుకున్న ఫారెస్ట్ అధికారులు!
 
వాళ్ళని గొంతు నులిమేసి హత్య చేసిన సింగా! సీసీటీవీ ఫుటేజ్ ఆధారంగా నేరస్తుడు సింగాను, హంతకుడిగా గుర్తించిన సెక్యూరిటీ అధికారి అధికారులు! గంటలు గడిచిపోతున్నా తెలియని అజయ్, సింగాల ఆచూకీ.. సింగా, అజయ్ ల అన్వేషణలో సెక్యూరిటీ అధికారి యంత్రాంగం" అంటూ టీవీ లో బ్రేకింగ్ న్యూస్ గా చూపించేస్తున్నారు.
 
లైవ్ ఇచ్చేందుకు నల్లమల చేరుకున్నారు పీకే ఛానల్ వారి నల్లమల అడవులపై ప్రోగ్రామ్స్ చేసే టీం, కెమెరామెన్ గంగతో, ప్రతినిధి రాంబాబు గారు. ఇక అక్కడ నుండీ, నల్లమలలో కురుస్తున్న జడివాన, పిడుగుల ప్రభావానికి, లైవ్ ఇవ్వాలి అనుకున్న వారికి నెట్వర్క్ సహకరించకపోవడం వల్ల, వారి ప్రయత్నం వారు చేసుకుంటూ, వర్షం ఎప్పుడు తగ్గుతుందా.. అన్నట్టుగా చూస్తూ, అదే రికార్డు చేస్తూ.. లైవ్ ఇవ్వడం కోసం, సిగ్నల్ కోసం ట్రై చేస్తున్నారు.
 
***
 
ఆ భీకరమైన వర్షానికి, ఉరుములకి, అక్కడ పడుతున్న పిడుగులకి, ఆ సెక్యూరిటీ అధికారి వారికే హడలెత్తిపోతోంది. కానీ ఎన్నో రిస్కీ ఆపరేషన్స్ చేసి ఉన్న వారికి, ఆ పరిస్థితిని ఎదుర్కోవడం ఎలాగో తెలుసు కాబట్టి, అజయ్ ని, సింగాని గాలిస్తూ, వారి గాలింపు చర్యలు ముమ్మరం చేసారు.
 
***
 
మరియా, ఆ నరేంద్రుని దుష్టాత్మతో యుద్ధం చేస్తూనే ఉంది. పూజారి గారు అమ్మవారి ముందు పద్మాసనం వేసుకుని కూర్చుని, ధర్మాన్ని గెలిపించమని ప్రార్ధిస్తూ, దేవీ ఖడ్గమాలా స్తోత్రం పారాయణం చేస్తున్నారు. సొరంగ మార్గంలోకి నీళ్లు చేరిపోయే లాగా భీకరంగా వర్షం కురుస్తున్నా కూడా, మరియా తను నరేంద్రుడిని ఎదురుకుంటూనే, ఆ మార్గంలోకి నీటి ప్రవాహం చేరకుండా, తన శక్తితో అడ్డుకుంటూ ఉంది. చీకటి పడుతున్న కొద్దీ ఆ భీకరమైన దుష్టాత్మ రెట్టించిన కోపోద్రేకంతో విరుచుకుపడుతోంది.
 
ఆ గాలి, భీభత్సానికి అమాయక గిరిజన ప్రజలు బెంబేలెత్తిపోతూ అమ్మవారి గుడికి చేరిపోయారు. వారి గుడిసెలు, ఆ వాన భీభత్సానికి చెల్లాచెదురైపోయాయి. వారంతా, తల దాచుకునేందుకు అమ్మవారి గుడికి చేరుకున్నారు. ఆశ్చర్యం ఏమిటి అంటే, అంత వాన కురుస్తున్నా , గుడిలోకి మాత్రం నీరు చేరడం లేదు. చిన్న షెడ్ లా ఉన్నదైనా ఆ గుడికి మాత్రం ఏమీ కాలేదు. అది ఆ గిరిజనులకు ఆశ్చర్యం కలిగించినా, అది అమ్మవారి అనుగ్రహంవల్ల మరియాకి కలిగిన ఆత్మశక్తి ప్రభావం అని పూజారి గారికి మాత్రమే తెలుసు.
 
"ఎవ్వరూ గాభరా పడకండి. అమ్మవారి అండ ఉంది మనకు. అంతా ఇక్కడే కూర్చుని ఆ జగన్మాతను ప్రార్ధించండి" అని చెప్పి, ఆయన స్తోత్ర పారాయణం చేయనారంభించారు.
***
 
సొరంగ మార్గం గుండా ముందుకు సాగిన ఆ అన్నా తమ్ముళ్లకు, చీకటితో నిండిపోయిన ఆ మార్గంలో,సెల్ ఫోన్ లైట్స్ తో కొంత దూరం వెళ్ళిన తరువాత, దారి రెండు వైపులుగా కనిపించింది. ఎటువెళ్లాలో తెలియని పరిస్థితుల్లో, పూజారి గారు ఇచ్చిన తాళ పత్ర గ్రంధాన్ని తెరిచి చూసారు. అందులో ఎడమ వైపుగా వెళ్ళమని రాసి ఉండడంతో, మళ్ళీ వారి పయనం మొదలుపెట్టారు. కొంత దూరం వెళ్లేసరికి, ఆ మార్గం కొద్దిగా విశాలంగా మారింది. అక్కడ రక రకాలైన గుర్తులు కనిపిస్తున్నాయి. రాళ్లు, ఆటవికుల ఆయుధాలు ఉన్నాయి. వాటన్నిటిని దాటుకుని వెళ్తున్న వారల్లా ఒక్కసారిగా కాళ్ళకి తీగ లాంటిది తగలడం వల్ల ముందుకు పడిపోయారు.
 
ఒక్కసారిగా అలా పడిపోవడం వల్ల ఇద్దరికీ ఆ రాళ్లు గుచ్చుకుని దెబ్బలు తగిలాయి. అయినా ఎలాగో ఓపిక తెచ్చుకుని, ఆ గ్రంథంలో చెప్పిన గుర్తులు సరి చూసుకుంటూ ఆ శిల్పాన్ని వెతుకుతూ ముందుకు వెడుతున్న వారికి కొంత దూరం వెళ్లేసరికి, ఇక ముందుకు వెళ్లేందుకు లేకుండా ఒక రాతి గోడ కనిపించింది. దానిపై జంట నాగుల ఛిహ్నం ఉంది. ఆ ద్వారాన్ని ఎలా తెరవాలో అని గ్రంధాన్ని చూస్తున్న అజయ్ కి గుండె వేగం పెరిగిపోయింది.
 
"ఏమైంది అన్నయ్యా? ఈ ద్వారం ఎలా తెరవాలి?" అని అడిగాడు సంజయ్.
 
" ఇది నాగ బంధనం! ఇది తెరవాలంటే..



రేపు చెప్తనే!
సశేషం
 
 *ఈ భాగం చదివిన పాఠకమిత్రులు వారి అభిప్రాయాలను, రేటింగులు, లైకులు లేదా వ్యాఖ్యల ద్వార తెలియజేయమని మనవి

[k3vv3]

ఈ కథనం దాదాపు చివరి కొన్ని ఘట్టాలు మిగిలాయి

బహుశ వచ్చే నెలాఖరికి పూర్తి అవ్వచ్చు!

[k3vv3]

త్వరగా చెప్పండి, నేను పద్మనాభస్వామి వారి ఆలయానికి వెళ్తాను 11వ గది తలుపులు తెరవడానికి

శ్రీ అనంత పద్మనాభ స్వామి దర్శన ప్రాప్తిరస్తు

[k3vv3]

నల్లమల నిధి రహస్యం పార్ట్ - 35

"ఏమైంది అన్నయ్యా? ఈ ద్వారం ఎలా తెరవాలి?" అని అడిగాడు సంజయ్.
 
" ఇది నాగబంధనం. ఇది తెరిచే విధానం ఈ గ్రంధంలో వివరంగా రాసి ఉంది. ఈశ్వరుడి మెడను అలంకరించే ఆభరణానికి, శివయ్య వాహనపు కుడి చెవి కుండలం తీసి, బహుకరించండి." అంటూ చదివాడు అజయ్.
 
"ఈశ్వరుని మెడను అలంకరించే ఆభరణానికి అంటే ఆ జంట నాగుల పైన ఉన్న శేష సర్పం. శివయ్య వాహనం అంటే నందీశ్వరుడు. కానీ ఇక్కడ నందీశ్వరుని విగ్రహం ఎక్కడ ఉంది?" అంటూ ఉండగా
 
" అన్నయ్యా! ఇందాక మనిద్దరం పడిపోయాం కదా. అక్కడ కొలను లాంటిది ఉంది చూడు!అక్కడ ఆ కొలను మధ్యలో నంది విగ్రహం చూసానురా! బహుశా అదే అయి ఉంటుంది. నువ్వు ఉండు. నేను తీసుకొచ్చేస్తా" అంటూ అజయ్ వారిస్తున్న వినకుండా వెనక్కి పరుగెత్తాడు సంజయ్. అజయ్ కూడా సంజయ్ ని అనుసరించ బోయాడు.
 
"అన్నయ్యా! నువ్వు ఉండు. ఆ కుండలం నేను తెస్తాను. దానితో ఆ ద్వారం ఎలా తెరవాలో చదువు" అంటూ సంజయ్ పరుగున వెనక్కి వెళ్లి, ఆ కొలనులోకి దిగిపోయాడు. లోతు తక్కువగానే ఉన్నట్టు కనిపించిన ఆ కొలను ఊబి అని తెలియడానికి సంజయ్ కి ఎంతో సేపు పట్టలేదు. అజయ్ కి కనుచుపు మేరలోనే ఉన్న ఆ కొలనులో, సంజయ్ మునిగిపోతూ కనిపించాడు.
 
 
టీవీలో బ్రేకింగ్ న్యూస్ గా అజయ్ గురించి, సింగా గురించి చెప్తూనే ఉన్నారు. అది చూసి సీత ఇంకా బెదిరిపోతోంది. బిడ్డలను కాపాడమని ఆ మల్లన్న స్వామికి మొక్కులు మొక్కేసుకుంటూ, గుండెలవిసిపోయేలా ఏడుస్తోంది. ఆమెను ఆపడం ఆ తల్లీ కూతుర్ల తరం కావడంలేదు. కమల, మల్లి కూడా సీత దగ్గరే కూర్చుని ఉన్నారు. ఎవరికీ ఆవిడని ఎలా ఓదార్చాలో తెలియక, ఏం జరుగుతుందో అని గుండెలు అరచేతిలో పట్టుకుని కూర్చున్నారు.
 
***
 
రామచంద్ర సిద్ధాంతి గారు ధర్మాన్ని గెలిపించమంటూ చండీ హోమం చేస్తూ ఉన్నారు. కానీ ఆయనికి మాత్రం అర్ధం అయిపోతోంది. ఆ ఇద్దరూ అన్నదమ్ములలో ఎవరో ఒకర్ని మాత్రమే కాపాడగలము అని.
 
మృత్యువు పొంచి ఉన్న వారి జాతకంలో మరణం అనేది ఏ రకంగా అయినా రావచ్చు అని ఆయనకు ముందే తెలుసు. పుట్టుక రెండు ప్రాణుల కలయిక. అది ఒకే విధంగా కలుగుతుంది. మరణం అనేది ఏ ప్రాణి నుండి ఏ ప్రాణికి రానుందో, ఏ జీవితం ఎవరి చేతుల్లో ఎలా అంతం కానుందో! ఒక జీవికి ఇన్ని తిండి గింజలు, ఇన్ని ఊపిరి క్షణాలు, ఇన్ని నూకలు అని బ్రహ్మ గారు లెక్కలు వేస్తూ, నుదిటిపై రాసిన రాతే బ్రహ్మరాత. అది ఒక జీవి తన ముందు జన్మలలో చేసిన పాప, పుణ్యాల ఆధారంగానే లెక్కించబడుతుంది.
 
ప్రతి జీవి పుట్టుకకు ఒక కారణం ఉంటుంది. ఆ విధంగా భూమి మీద పంచభూతాత్మకమైన శరీరంతో ఊపిరి ఉన్న మనిషిగా లేక జీవిగా, జీవించే ప్రతి ప్రాణి పుట్టుకకు ఒక పరమార్థం ఉంటుంది. ఆ పరమార్ధం తీరిన క్షణంలో ఆ జీవి ఈ లోకం మీద తన పుట్టుకకు సార్ధకత చేకూరింది అన్నాక, పరలోకానికి చేరుతుంది. ఈ జన్మ అంతా తాను చేసిన పాపపుణ్యాలను బట్టి తనకు ఉత్తమగతులు కలుగుతాయి. చెడు కర్మలకు దుర్గతులు కలుగుతాయి. అవి అనుభవించిన తరువాత, అతనికి మరుజన్మ లభిస్తూ ఉంటుంది. ఇదే అలుపెరుగని జన్మ వృత్తాంతము. ఇదంతా తనకు తెలుసు కాబట్టే రామచంద్ర సిద్ధాంతి గారి మనసు కీడుని శంకిస్తోంది.
 
ఆ ఇరువురు కవల పిల్లలుగా పుట్టుటకు ఒక కారణం ఉంది. ఇరువురిలో ఒక్కరే మిగులుటకూ ఒక కారణం ఉన్నది. ఒకరు ఈ లోకానికి రావడానికి గల కారణం పూర్తి కానుంది. ఇంకొకరి పాత్ర ఈ జగన్నాటకంలో ఇంకా పోషించవలిసి ఉంది. అన్నీ తెలిసి కూడా తన కర్తవ్యం ధర్మాన్ని గెలిపించడమే అని గుర్తెరిగి, తన దృష్టిని హోమంపై నిలిపి, ఆ జగన్మాతను వేడుకొనుచున్నారు సిద్ధాంతి గారు.
 
***
 
సంజయ్ ఊబిలోకి దిగబడడం చూసి, ఒక్క ఉదుటన తానూ ఆ ఊబిలోకి దిగబోయి, తమాయించుకుని, " కదలకుండా ఉండు సంజు! కదిలితే ఊబిలోకి ఇంకా త్వరగా కూరుకుపోతావు. నేను నిన్ను కాపాడతాను" అంటూ తన తమ్ముడ్ని బయటకు లాగేందుకు ఆ రాతి సొరంగపు మార్గం పొడవునా అల్లి ఉన్న నార చీరలను విప్పి, ఒక దానితో ఒకటి ముడి వేసి సంజయ్ కి అందేలా విసిరాడు. అది అందుకోడానికి ప్రయత్నం చేస్తూ, మరింతగా ఊబిలోకి కూరుకుపోతున్న సంజయ్ కి ఈ సారి అజయ్ విసిరిన గుడ్డతాడు అందింది. అది చేతికి గట్టిగా కట్టుకుని, ఆ ఊబిలోనే ఈదుతూ.. అతి కష్టం మీద ఆ నందీశ్వరుడు కొలువై ఉన్న గట్టులాంటి ప్రదేశానికి చేరుకున్నాడు.
పైకి ఎక్కి, చేతితో గుండెను గట్టిగా పట్టుకుని, ఊపిరి గట్టిగా పీల్చుకున్నాడు. ఎందుకో గుండెల్లో కొద్దిగా నొప్పిగా అనిపించడం మొదలైంది సంజయ్ కి. ఊపిరి ఆడడం కూడా కొద్దిగా కష్టంగా అనిపిస్తోంది.
 
అది గమనించిన అజయ్. " ఏమైంది సంజు? నువ్వు బాగానే ఉన్నావా? " అంటూ ఆర్తిగా అడిగాడు.
చేయ పైకి ఎత్తి, “అయామ్ ఓకే" అంటూ భారంగా చెప్పాడు. సంజయ్ కి అర్థం అయిపోతోంది! తనకి ఊపిరి సరిగా ఆడటం లేదు. కానీ ఎలాగైనా అన్నని కాపాడాలి అని ఒక సంకల్ప బలం అతనికి ఊపిరి తీసుకోవడానికి శక్తిని ఇస్తోంది. ఎలాగో ఓపిక అంతా కూడగట్టుకుని, ఆ నందీశ్వరుని కుడి చెవికి ఉన్న కుండలాన్ని తీసుకోగలిగాడు. అది బంగారంతో చేసిన పద్మం ఆకారంలో ఉన్న కుండలం. అది గట్టిగా పట్టుకుని మళ్ళీ ఆ ఊబిలోకి దిగాడు సంజయ్. అజయ్ ఆ తాడుని గట్టిగా లాగసాగాడు. ఒడ్డుకి చేరి, ఈ కుండలం అందించగలిగితే చాలు! అన్నయ్యకి ఆ శిల్పం దొరికేస్తుంది. ఆ క్షణం వరకూ నేను ప్రాణాలతో ఉంటే చాలు. అనుకుంటూ ఊపిరి బిగపట్టి, ఆ ఊబిలో ఈదుతున్నాడు సంజయ్.
 
అజయ్ తన శక్తిని అంతా కూడ దీసుకుని " హర హర మహాదేవ! శంభో శంకరా.." అంటూ ఆ తాడుని గట్టిగా లాగాడు. అతి కష్టం మీద ఊపిరి నిలుపుకుంటూ ఒడ్డుకు చేరాడు సంజయ్. సంజయ్ ని గుండెలకు హత్తుకుని, కన్నీరు పెట్టుకున్నాడు అజయ్.
 
ఊపిరి బలవంతంగా తీసుకుంటూ " అన్నయ్యా! తొందరగా ఈ కుండలాన్ని ఆ సర్పానికి అలంకరించు" అంటూ ఆ కుండలాన్ని అజయ్ కి ఇచ్చాడు. ఆ కుండలాన్ని శేష సర్పం తలపై పెట్టమన్నట్టుగా ఉన్న ఆ గ్రంధంలో ఉన్నది చూసి, అలాగే ఆ సర్పం శిరస్సుపై ఆ కుండలాన్ని తగిలించగానే వళ్ళు గగుర్పొడిచేలా ఆ సర్పం ఆటు ఇటు కదిలి అదృశ్యం అయిపోయింది. ఆ జంట నాగుల బొమ్మ జీవం పోసుకుని, రెండిటికి కదలిక వచ్చి, ఆ జంట నాగులు రెండు దివ్యమైన కాంతితో వెలిగిపోతూ.. సర.. సర.. పాకుతూ పక్కగా వెళ్లిపోయాయి.
 
భళ్ళుమని శబ్దం చేస్తూ ఆ ద్వారం తెరుచుకుంది. ఆ ద్వారం తెరుచుకుంటూనే దివ్యమైన కాంతి చిందిస్తూ దర్శనం ఇచ్చింది మహామహిమాన్వితమైన మహా శివలింగం. ఆ శివలింగాన్ని చూస్తూనే, అజయ్ సంజయ్ లు ఇద్దరూ చేతులు జోడించి, " హర హర మహాదేవ శంభో శంకరా!" అంటూ సాష్టాంగ నమస్కారాలు చేశారు. ఆ స్వామికి ఎడమ పక్కన కలశం పట్టుకుని ఒక శిల్పం, ఖడ్గాన్ని పట్టుకుని ఒక శిల్పం కనిపించింది.
 
సంజయ్ ఆ శిల్పాన్ని చూసిన వెంటనే ఆ దివ్య ఖడ్గాన్ని అందుకోడానికి వెళ్ళిపోయాడు. అజయ్ కనురెప్ప వేసేలోగా జరిగిపోయిన ఆ ఘటనకి, సంజయ్ ఆ ఖడ్గమును పట్టుకోగానే షాక్ కొట్టిన వాడిలా ఎగిరి వెళ్లి గోడకు గుద్దుకుని కిందపడి స్పృహ కోల్పోయాడు. ఊహించని ఆ ఘటనకు అజయ్ కన్నీటి సంద్రం అయ్యాడు.
సశేషం
 
 *ఈ భాగం చదివిన పాఠకమిత్రులు వారి అభిప్రాయాలను, రేటింగులు, లైకులు లేదా వ్యాఖ్యల ద్వార తెలియజేయమని మనవి

[k3vv3]

మితృలకు దీపావళి శుభాకాంక్షలు 

[k3vv3]

Yes, ఉత్తమంగా!

Thank you Captain గారు.

[k3vv3]

నల్లమల నిధి రహస్యం
పార్ట్-36
 
ఆ ద్వారం తెరుచుకునే సరికే చాలా రాత్రి అయిపోయింది. కాసేపట్లో తెలవారిపోతుంది. గ్రహణ ఘడియలు మొదలవక ముందే, ఆ ఖడ్గమును సంపాదించాలి అనే కంగారులో, సంజయ్ ఆ శిల్పాన్ని చూసిన వెంటనే ఆ దివ్య ఖడ్గాన్ని అందుకోడానికి వెళ్ళిపోయాడు. అజయ్ కనురెప్ప వేసేలోగా జరిగిపోయిన ఆ ఘటనకి, సంజయ్ ఆ ఖడ్గమును పట్టుకోగానే షాక్ కొట్టిన వాడిలా ఎగిరి వెళ్లి గోడకు గుద్దుకుని కిందపడి స్పృహ కోల్పోయాడు. ఊహించని ఆ ఘటనకి అజయ్ కన్నీటి సంద్రం అయ్యాడు. అప్పటికే చాలా ఆలస్యం అయిపోతోంది. ఇంకాసేపట్లో సూర్యోదయం అయిపోతుంది. సంజయ్ ని ఎంత లేపుతున్నా లేవడం లేదు. ఆ శిల్పాన్ని నేరుగా తాకడం వల్ల సంజయ్ ఎగిరిపడ్డాడు అని అర్ధమైన అజయ్, ఆ గ్రంధాన్ని తెరిచి చూసాడు.
 
"ఎవరైనా సరే, ఖడ్గమును పొందాలి అంటే, మహా శివలింగానికి ఎడమ పక్కగా ఉన్న శిల్పం చేతిలో ఉన్న కలశంలోని గంగాజలంతో, ఆ శివయ్యకు అభిషేకం చేసి, ఆ నీటిని కుడి పక్కగా ఉన్న ఖడ్గమును పట్టుకుని ఉన్న శిల్పంపై జల్లి, అప్పుడు మాత్రమే ఆ శిల్పాన్ని తాకవలెను. లేనిచో, ఆ శిల్పం నుండి వెలువడే విద్యుత్ఘాతానికి బలి అగుదురు. ఒకవేళ ఎవరైనా ఒక వ్యక్తి ఆ విద్యుత్ఘాతానికి బలి అయితే, ఆ జలమును తాగించిన యెడల తిరిగి కోలుకొనెదరు" అని ఆ గ్రంథంలో రాసి ఉంది. అది చదివిన వెంటనే, అజయ్ ఇంక ఆలస్యం చేయకుండా కుడి వైపు ఉన్న శిల్పం చేతిలోని కలశాన్ని తీసుకుని ఆ గంగాజలంతోనే "హర హర మహాదేవ శంభోశంకర!" అంటూ ఆర్తిగా ఆ మహాశివుని వేడుకుంటూ అభిషేకం చేసాడు. ఆ శివయ్య నుండి పడుతున్న అభిషేక జలాన్ని మళ్ళీ సేకరించి, సంజయ్ నోట్లో పోసాడు. ఆ నీరు సంజయ్ గొంతులోకి వెళ్ళగానే, అతనిలో కొద్దిగా చలనం వచ్చింది. సంజయ్ కళ్ళు తెరిచి చూసే సరికి, అతన్నే చూస్తూ ఉన్న అజయ్ కనిపించాడు.
 
" అన్నయ్యా. నాకు ఏమైంది? " అంటూ పైకి లేచిన సంజయ్ ని గట్టిగా గుండెలకు హత్తుకుని

" నీకేం కాలేదు. నీకేం కాలేదు." అంటూ కన్నీరు తుడుచుకుంటూ "ఇక మనకి ఖడ్గం దొరికింది. ఆ నీచుడ్ని అంతం చేసేద్దాం! పద. " అంటూ ఆ అభిషేక జలమును ఎడమ వైపు ఉన్న శిల్పముపై జల్లి, ఆ ఖడ్గమును తీసుకొన గానే, ఆ గుహ మొత్తం భూకంపం రావడం మొదలైంది. ఆ మహాశివునికి దండం పెట్టుకుని, ఇంక అక్కడనుండి " హర హర మహాదేవ శంభో శంకరా!" అంటూ ఆ శివయ్యను తలుచుకుంటూ మెరుపు వేగంతో బయటకు వచ్చేందుకు ఇద్దరూ పరుగు మొదలుపెట్టారు.
 
ఆ గుహ మొత్తం కంపించిపోతోంది. రాళ్లు కదిలి దొర్లుతూ వారి దారికి అడ్డం వస్తున్నాయి. వాటిని తప్పించుకుంటూ, ఆ దివ్య ఖడ్గముతో వారు బయటకు పరుగులు పెడుతూ ఉండగా, ఆ దారి మొత్తం ఇరుకుగా మారిపోతూ, ఆ దారి గుండా పరిగెడుతున్న ఆ ఇద్దరికీ చర్మం చీరుకుపోతూ, వళ్లంతా గాయాలు అయిపోతున్నాయి. అయినా వారు అలుపెరగకుండా పరిగెడుతూ, గ్రహణ ఘడియలు మొదలవక మునుపే బయటకు వచ్చేసారు. వీరు అడుగు బయట పెట్టగానే, ఆ సొరంగ మార్గం మొత్తం మూసుకు పోయింది. అప్పటికి మరియా ఆ నరేంద్రుని ఎదుర్కుంటూ ఉంది.
 
అక్కడ ఉన్న గిరిజనులంతా అజయ్, సంజయ్ ల వంక ఆశ్చర్యంగా చూస్తూ ఉన్నారు.
 
పూజారి గారు లేచి, " నాయనా మార్తాండా! ఆ దివ్య ఖడ్గముతో ఆ నీచుడు దుష్టాత్మను అంతం చేయి నాయనా. విజయోస్తు!" అంటూ గుడి గంటలు మ్రోగించసాగారు.
 
మరియాతో పోరాడుతూ ఉన్న నరేంద్రుడు, అజయ్ చేతిలో ఉన్న దివ్య ఖడ్గం వైపు చూస్తూ, వికృతంగా నవ్వుతూ, నేలమీదకి దిగాడు. వాడు అలా దిగగానే పిడుగు భూమి మీద పడిందా, ఆకాశం విరిగి పడిందా అన్నట్టు పెద్ద శబ్దం వచ్చింది. ఆ శబ్దానికి పూజారి గారు, అజయ్, సంజయ్ లు తప్ప అక్కడ ఉన్న వారంతా మూర్ఛ వచ్చి పడిపోయారు.
 
కిందకి దిగిన సింగా ఇప్పుడు పూర్తిగా నరేంద్రుని రూపంలో కనిపిస్తూ ఉన్నాడు. వాడిని ఆ రూపంలో చూసిన సంజయ్ కి ఇప్పుడు పూర్తిగా తన గత జన్మ గుర్తుకు వచ్చింది.
 
" ఓరీ మిత్రద్రోహి! నీ వల్లే కదరా నేను నా రాజ్యాన్ని కోల్పోయాను. నా వెన్నంటే ఉండి, నమ్మించి, నన్ను క్రూరంగా చంపేశావు కదరా! నిన్ను వదలను" అంటూ గాలిలో ఎగిరి వెళ్లి ఆ నరేంద్రుని గుండెలపై తన్నాడు. సంజయ్ చేతికి తాయత్తు ఉండడం వల్ల, ఆ దుష్ఠుడి ఆత్మ, నేరుగా సంజయ్ ని ఎదుర్కొలేక అతనిపైకి రాళ్లు, పదునైన చెట్టు కొమ్మలు విసురుతూ ఉన్నాడు. అవేమి సంజయ్ ను తాకనివ్వకుండా మరియా ఆత్మ శక్తి తో ఆపుతోంది. మరియా కూడా వారి వెనకనే ఉండి, ఆ దుష్ట ఆత్మ పై తన పగను తీర్చుకునేందుకు సంజయ్ కి శక్తిని ఇస్తోంది.
 
తన గత జన్మలో తనని నమ్మించి గొంతు కోసినందుకు ఆ నరేంద్రునిపై అమ్మవారి కుంకాన్ని కురిపించాడు సంజయ్. ఆ కుంకుమ శక్తికి ఆ నరేంద్రునికి వళ్ళు మొత్తం కాలిపోతున్నట్టుగా భగభగా మంటలు ఒళ్లంతా వ్యాపించాయి. తన కసి తీరేలా నరేంద్రుని హింసించసాగాడు, తనని తాను ప్రతాపరుద్రునిగా నమ్మిన సంజయ్. అది చూసి అజయ్, మరియాలు కూడా సంతోషించారు.
 
పూజారి గారు, " బాబూ! గ్రహణ ఘడియలు మొదలు కాబోతున్నాయి. వాడిని వధించండి" అంటూ వారిని హెచ్చరించాడు.
 
అజయ్ వెంటనే ఆ దివ్య ఖడ్గమును నేరుగా నరేంద్రుడు ఆవహించి ఉన్న సింగా గుండెల్లో దించాడు. అంతే! ఆ సింగా ఒళ్లంతా మంటలు వ్యాపించాయి. నరేంద్రుని దుష్టాత్మ సింగా శరీరంలో నుంచి బయటకు రావడానికి ప్రయత్నం చేసినా, అది సాధ్యం కాలేదు. ఆ దివ్య ఖడ్గపు జ్వాలలో, ఆ దుష్టాత్మ, ఆ దుష్టాత్మకు వాహకం అయిన నీచుడు సింగా, ఇద్దరూ ఆహుతి అయ్యారు.

అలా ఈ ప్రపంచాన్నే ముంచేద్దామనుకున్న ఒక దుష్టాత్మ, తన స్వార్థం కోసం చిన్న పిల్లలను క్రూరంగా హింసించే పశు ప్రవృత్తి కలిగిన సింగా.. ఇద్దరూ నశించిపోయారు. అమ్మవారి అనుగ్రహంగా ధర్మం గెలిచింది.

తనని తాను ప్రతాపరుద్రునిగా నమ్మిన సంజయ్ "మిత్రమా" అంటూ అజయ్ గా మళ్ళీ పుట్టిన మార్తాండను గుండెలకు హత్తుకున్నాడు.
 
మరియా వారిద్దరితో " మహారాజా! మీ నిధి పదిలముగా ఉన్నది. మీకు ఆ నిధిని అప్పగించి, నా కర్తవ్యం పూర్తి చేసుకొనవలెను. నేనిక పరమాత్మలో ఐక్యం కావలెను. అందుచేత, మీ ఇరువురిని నాతో తీసుకు వెడుతున్నాను" అంటూ పూజారి గారికి నమస్కరించి, ఆ ఇష్టకామేశ్వరి అమ్మవారికి కన్నీటితోనే కృతజ్ఞతలు తెలుపుకుంటూ తన ఆత్మ శక్తితో, ఆ ఇరువురు కారణ జన్ములను, నిధిని దాచి ఉంచిన నీలగిరి కొండ గుహలలోకి తీసుకువెళ్ళింది.
సశేషం

*ఈ భాగం చదివిన పాఠకమిత్రులు వారి అభిప్రాయాలను, రేటింగులు, లైకులు లేదా వ్యాఖ్యల ద్వార తెలియజేయమని మనవి

[k3vv3]

కథలు ఎక్కడో ఓ చోట ఆగాలిగా! పొడిగించికుంటూపోతే ఆసక్తి క్షీణిస్తుంది.

మరో మలుపు వచ్చే భాగంలో

[k3vv3]

నల్లమల నిధి రహస్యం
పార్ట్-37
"మహారాజా! మీ నిధి పదిలముగా ఉన్నది. మీకు ఆ నిధిని అప్పగించి, నా కర్తవ్యం పూర్తి చేసుకొనవలెను. నేనిక పరమాత్మలో ఐక్యం కావలెను. అందుచేత, మీ ఇరువురిని నాతో తీసుకు వెడుతున్నాను" అంటూ పూజారి గారికి నమస్కరించి, ఆ ఇష్టకామేశ్వరి అమ్మవారికి కన్నీటితోనే కృతజ్ఞతలు తెలుపుకుంటూ తన ఆత్మ శక్తితో, ఆ ఇరువురు కారణ జన్ములను నిధిని దాచి ఉంచిన నీలగిరి కొండ గుహలలోకి తీసుకువెళ్ళింది. వారు ముగ్గురూ మెరుపు వేగంతో అక్కడికి చేరిపోయారు.
 
ఆ నీలగిరి కొండల వరకూ తన ఆత్మ శక్తి తో తీసుకు వచ్చిన మరియా, వారిని అక్కడ నుండి నడిపించుకుని తీసుకు వెడుతోంది. ఆ ప్రాంతం అంతా దట్టమైన చెట్లు, గుబురైన పొదలు, లతలు, తీగలతో నిండిపోయి ఉంది. మరియా వారిరువురిని ‘నిధి ఉన్న ప్రాంతం ఇదే’ అంటూ లోపలికి తీసుకు వెళుతోంది.
 
అజయ్ కి, సంజయ్ ని విద్యుత్ ఘాతం నుండి కాపాడడానికి తాను చేసిన త్యాగానికి ఫలితం కొద్దికొద్దిగా తెలుస్తోంది. కళ్ళు బైర్లు కమ్ముతున్నాయి. కడుపులో పేగులు మెలి తిప్పుతున్నట్టు బాధ మొదలైంది. కానీ, తన కర్తవ్యం నెరవేరే వరకు, ప్రాణాలు ఉగ్గబెట్టుకుంటూ, మరియా చూపిస్తున్న దిశగా నడవసాగాడు. వారు ఆ కొండ గుహలలోకి అడుగు పెట్టేసరికి, అజయ్ కి ఊపిరి తీసుకోవడం కూడా కష్టం కాసాగింది. కానీ అదేమీ బయట పడనివ్వకుండా, ఓపిక నటిస్తూ, నడుస్తున్నాడు అజయ్. ఎలాగో, ఆ నిధిని భద్రపరచిన స్థానానికి చేరుకున్నారు ముగ్గురూ.
 
మరియా తన ఆత్మ శక్తిని ప్రయోగించి, నిధిని దాచి ఉంచిన భోషాణాన్ని బయటకు తీసింది. ఆ క్రమంలో కొన్ని అస్థిపంజరాలు కూడా బయటపడ్డాయి. అవి ఈ జన్మలో అజయ్, సంజయ్ లకు తాత అయిన బసవయ్య, మరియు అతని పనివారివి. ఆ భోషాణాన్ని చూపిస్తూ, మరియా, సంజయ్ తో "మహారాజా! ఈ నిధి కోసమే ఆ నీచుడు పచ్చని మా బతుకులు బుగ్గిపాలు చేసాడు. ఈ నిధిని కాపాడే ప్రయత్నంలో వేల మంది ఆదివాసి వీరులు అమరులయ్యారు. నా పెనిమిటికి ఇచ్చిన మాట కోసం ఇన్ని జన్మలుగా నేను ఆత్మని అయినా కూడా, ఈ నిధికి కావలి ఉన్నాను" అని చెప్పి, అజయ్ వైపు తిరిగింది.
 
"మావా! ఆనాడు నీ ప్రాణం పోయే క్షణంలో నా దగ్గర మాట తీసుకున్నావు, నువ్వు వచ్చే వరకూ నిధికి కావలుండమని! ఆ నాడే నా ఊపిరి ఈ అనంత విశ్వంలో కలిసిపోయినా, అలసిపోని ఆకారాన్నై, అంతులేని శూన్యాన్నై, నీ రాక కోసం, జన్మలు వేచి, అలసి సొలసి ఉన్న నా ఆత్మఘోష, ఈ అరణ్యానికి మాత్రమే తెలుసు. నీ రాకతోనే నా తపస్సు ఫలించింది అనుకున్నా!
 
ఈనాటితో నా కర్తవ్యం తీరిపోయింది అని తెలుస్తున్నా.
నీ పరిష్వంగనకు సైతం నోచుకోని నేను నీలో ఎలా కలవగలను? మరు జన్మ కూడా కలుపలేని ఆగాథం మిగిల్చింది ఈ విధి. మన ప్రకృతి విరుద్ధమైన బంధంలో గాలిలా మిగిలిన నాకు తోడువై నువ్వు ఉంటాను అన్నా, ఉండనివ్వని విధి రాత, నన్ను చూసి హేళనగా నవ్వక మునుపే, పరమాత్మలో లీనం అయిపోతున్నా! మరువలేను నీ ప్రేమను! తిరిగిరాలేను నేను!" అంటూ తన పయనం మొదలు పెట్టబోయిన మరియా అజయ్ నోటిలోనుండి వస్తున్న రక్తాన్ని చూసి హతాశురాలు అయింది.
 
అంత వరకూ మౌనంగా మరియా మాటలు విన్న సంజయ్. అజయ్ ని ఆ పరిస్థితుల్లో చూసి, గుండె పగిలేలా ఏడుస్తూ " మిత్రమా! ఏమైంది నీకు.. ఈ రక్తం ఏమిటి? " అంటూ బోరున విలపించసాగాడు.
 
" మహారాజా! ఆ దివ్య ఖడ్గమును పొందదలచిన వ్యక్తి శివ లింగానికి అభిషేకం చేసి, ఆ అభిషేక జలమును తాను త్రాగి, ఆపై ఆ శిల్పంపై ఆ జలాన్ని చిలకరించి, ఖడ్గమును తీసుకొనవలెను. అభిషేకం చేసినను, ఆ అభిషేక జలాన్ని త్రాగకుండా, శిల్పంపై చిలకరించినను, ఖడ్గమును పొందవచ్చు. కానీ ఆ వ్యక్తి కొన్ని ఘడియల కంటే బ్రతకలేడు. అలా అని ఆ గ్రంధములో రాసి ఉంది. కానీ మీరు ఉన్న పరిస్థితుల్లో, ఆ నీటిని మీకు త్రాగించాను. అటుపై శిల్పం పై చిలకరించి, ఖడ్గమును తీసుకొన్నాను. మిమ్మల్ని కాపాడుకో గలిగాను . ఆ నీచుడ్ని అంతం చేయగలిగాను. నిధిని మీకు అప్పగించ గలిగాను. ఇదే నా పుట్టుకకు పరమార్ధం. మీకు నిధిని అప్పగించుట కొరకే నేను జన్మించాను. నా వాగ్దానం నేటితో నెరవేరింది. ఇక నా పయనం నా ప్రేమ కోసం జన్మలుగా వేచి ఉన్న నా ప్రేయసి కోసమే" అంటూ మరియా వైపు చూస్తూ
 
" నా ప్రేమ కోసం, నేను తీసుకున్న మాట కోసం జన్మలుగా నా కోసం ఎదురుచూసిన ఓ ప్రేమ మూర్తి! మరణం విడదీసిన మన ప్రేమను, మరణమే కలుపుతుంది. నాకోసం జన్మలు వేచి ఉన్న నీ ప్రేమకు, నా ప్రాణాన్నే కానుకగా ఇస్తాను. అని ఆన చేసాను. ఇది కూడా విధి లిఖితమే ప్రియా! నా అంతట నేనే మరణాన్ని ఆహ్వానించైనా నిను చేరుతాను అని ఆన చేసాను. కానీ, నా ఈ మరణం, నా గత జన్మలోని మిత్రునికి, ఈ జన్మలోని సహోదరునికి పునర్జన్మని ఇస్తూ, అన్నగా నా బాధ్యతను, ప్రియునిగా నా ప్రతిజ్ఞను రెండిటిని నెరవేరుస్తోంది. అని చెప్తూనే సంజయ్ వైపు తిరిగి,
 
" మిత్రమా! ఈ చరాచర సృష్టిని సృష్టించి, పాలించి, లయం చేయు , ఆ దేవాది దేవుని అనుజ్ఞ మేరకు, మీకిచ్చిన వాగ్దానం మేరకు, ఈ నిధిని మీకు అప్పగించు వరకు మాత్రమే నా పాత్రకి ప్రాణం ఉంది. ఈ జగన్నాటకంలో నా పాత్ర ముగియక తప్పదు. చివరిగా నాదొక విన్నపం. ఇచ్చిన మాటకోసం, గురు దక్షిణగా బొటనవేలు నరుక్కున్న ఏకలవ్యుని వారసులం! ఇచ్చిన మాట కోసం పుట్టుటలో ఆశ్చర్యం ఏమీ లేదు. నిజాయితీకి, స్వామిభక్తికి ప్రాణం పెట్టే మా ఆదిమవాసులు, ఆనాడు నరేంద్రునితో యుద్ధం జరిగినప్పుడు వారి ప్రాణాలు పణంగా పెట్టి పోరాడారు.

ఈనాడు ధర్మానికి, దుష్ట ఆత్మకీ జరిగిన యుద్ధంలో ఎందరో అమాయకపు గిరిజనులు తమ ఆవాసాలను సైతం కోల్పోయారు. వారికి న్యాయం చేయండి మహారాజా!. మీ ప్రాణం కాపాడాను అనే అధికారంతో కాదు, అభం శుభం తెలియని ఆ అమాయకుల కోసం అడుగుతున్నాను. ఈ నిధి ఇంకా ప్రభుత్వం ఆధీనం చేసుకోక మునుపే, వారికి కొంత సాయం అందించండి. ఈ జన్మలో నేను మీకు అన్నగా పుట్టాను. ఆ బాధ్యత తోనే నేను మీ ప్రాణం కోసం నా ప్రాణాన్ని అడ్డుపెట్టాను. నేను చనిపోతున్నాను. అందుకు నాకు బాధగా లేదు. అమ్మ గురించే నా బాధ! అమ్మని మీరు బాగా చూసుకుంటారు. నాకంటే గొప్పగా చూసుకుంటారు. అమ్మా జాగ్రత్త!" అంటూ అజయ్, సంజయ్ ఒడిలోనే కన్నుమూసాడు.
 
 
అతని ఆత్మ పూర్తిగా కోయరాజు మార్తాండగా మారింది. మరియా కన్నీటి సంద్రం అయింది.
 
"మావా! నీ ఆన ఇలా నెరవేర్చుకున్నావా? దీనిని ఏమనాలి మావా? నీ త్యాగం అనాలా? బ్రహ్మ రాత అనాలా? నా ఆత్మ రూపం నీకు కనిపించిన రోజు, ప్రేమోన్మాదంతో నువ్వు చేసిన ఆన నేను మర్చిపోలేదు.
 
"ఈ హృదయంలో నీ ప్రేమే నిలిచి ఉంటుంది.
ఈ కన్నుల్లో నీ రూపం కదలాడుతూనే ఉంటుంది.
నన్ను నీలో, నిన్ను నాలో కలిపేది మరణమే అయితే,
నా పునర్జన్మకి కారణమైన నా వాగ్దానాన్ని నెరవేర్చిన మరు క్షణం, నా ఊపిరి నీ ఆత్మకు నేను ఇస్తున్న కానుక అవుతుంది. ఇది ఆ కొండదేవర పై ఆన!
నేను ప్రేమించే నీ పై ఆన! నా ప్రపంచమైన ఈ నల్లమల పై ఆన!" అంటూ నీ మరణం నా ప్రేమకు కానుక అవుతుందని ఆన చేసావు. ఆ ఆన ఈ రూపంలో నిలబెట్టుకున్నావా?" అంటూ మార్తాండ ఆత్మను గాఢంగా కౌగిలించుకుంది మరియా. ఆ ఇద్దరి పవిత్ర ఆత్మలకీ బోరున విలపిస్తూ చేతులు జోడించి దండం పెట్టాడు సంజయ్. ఆ పవిత్ర ఆత్మలు ఒకరినొకరు గట్టిగా హత్తుకుని, పరమాత్మలో లీనం అయిపోయాయి.
 
" అయ్యో మిత్రమా! నాకోసం, నీ ప్రాణాలు పణం పెట్టావు. అన్నగా, నీ బాధ్యతగా నన్ను కాపాడి, నువ్వు మృత్యువుకి బలి అయిపోయావు. నిన్ను కాపాడటానికి వచ్చిన నన్ను కాపాడడం కోసం, నువ్వు బలి అయిపోయావు. అమ్మకి నేను ఏమని చెప్పను?" అంటూ శోకసంద్రంలో మునిగిపోయాడు సంజయ్.
సశేషం
*ఈ భాగం చదివిన పాఠకమిత్రులు వారి అభిప్రాయాలను, రేటింగులు, లైకులు లేదా వ్యాఖ్యల ద్వార తెలియజేయమని మనవి

[k3vv3]

నేను లాప్ టాప్ లోచదువుతాను, అప్డేట్ కూడా ఇక్కడనుండే

రంగులు నాకు బానే ఉన్నా మీ సూచన ప్రకారం మార్చాను.