నేటి బాంధవ్యాలు - ఆఖరిబాగం

[k3vv3]

తీర్థప్రసాదాలను తీసుకొని ముందు లావణ్య, శార్వరీలు వెనకాల ప్రణవి, దీప్తి ఆలయం నుండి బయటికి వచ్చారు. ముందున్న మండపంలో కూర్చొని ఐదు నిముషాలు ధ్యానంతో కళ్ళు మూసుకున్నాడు.



ముందుగా కళ్ళు తెరిచిన ప్రణవి లావణ్యను సమీపించి కూర్చుంది. ఆమె ప్రక్కన దీప్తి. లావణ్య కళ్ళుతెరిచి తన ఎదురుగా కూర్చొని వున్న ప్రణవిని చూచింది. శార్వరీ దీప్తి ప్రక్కన జరిగి కూర్చుంది.



"వదినా!.. బాగున్నావా!"
"వున్నాను.. కానీ మనస్సు బాగాలేదు. దానికి కారణం ఏమిటో నీకు తెలుసు."
అవునన్నట్లు సాలోచనగా లావణ్య తలాడించింది. 



"లావణ్యా!.. నాకు ఒక కోరిక వుంది. దాన్ని నీవే తీర్చగలవు"
"ఆ కోరిక.. దీప్తి.. ఈశ్వర్‍ల వివాహమేగా!" చిరునవ్వుతో అడిగింది లావణ్య.



"అవును వదినా!" దీనంగా చెప్పింది ప్రణవి.
లావణ్య, శార్వరీ దీప్తి ముఖాల్లోకి చూచి "ఇరువురూ వెళ్ళి నవగ్రహాలను ప్రదక్షిణలు చేసిరండి" చెప్పింది లావణ్య.



ఆ ఇరువురూ వెంటనే లేచి నిలబడ్డారు.
"రా శారూ!" అంది దీప్తి.
"పద వదినా!"
ఇరువురూ నవగ్రహ మండపం వైపు నడిచారు.
"వదినా! నీ కోర్కె విషయంలో నాకు మీ అన్నయ్యకు పరిపుర్ణ సమ్మతం. కానీ!.."



"ఈశ్వర్‍కు ఇష్టం లేదా వదినా!.."
"వాడు మా మాటను మీరడు!"
"మరి నీ సందేహం ఏమిటి?"
"నా సందేహం మా అన్నయ్య విషయంలో! ఆయన దీప్తి, ఈశ్వర్ వివాహానికి అంగీకరిస్తాడంటావా!"



"అంగీకరించడు. దీప్తిని తన స్నేహితుడు పరంజ్యోతి కొడుకు డాక్టర్ దివాకర్‍కు ఇచ్చి వివాహం చేయాలనేది వారి నిర్ణయం. త్వరలో వారు దీప్తిని చూచి అన్ని విషయాలూ మాట్లాడుకొనే దానికి వస్తారట. ఈ విషయాన్ని మీ అన్నయ్యే నాకు చెప్పాడు. వాళ్ళు నా ఇంటికి రాకూడదు. దీప్తిని చూడకూడదు" తన నిశ్చితాభిప్రాయాన్ని గంభీరంగా చెప్పింది ప్రణవి. 



"అన్నయ్య నిర్ణయం అలావుంటే నీవు ఎలా ఆపగలవు వదినా!" ఆశ్చర్యంతో అడిగింది లావణ్య.



"వదినా!.. ఆపాలి.. దానికి నాకు నీ సహాయం కావాలి!"
"అంటే?"
"రేపు వారు రాబోతున్నారనగా ముందురోజు రాత్రి దీప్తిని నేను నీ ఇంటికి కోడలిగా పంపుతాను. దీప్తి నీ ఇంట్లో కాలుపెట్టిన క్షణం నుంచి.. అది ఈశ్వర్ భార్య. నీ కోడలుగా నీ యింట్లోనే వుంటుంది. వారిరువురికీ వివాహం జరిపించే బాధ్యత నీవు మా అన్నయ్య తీసుకోవాలి" దీనంగా చెప్పింది ప్రణవి.



"వదినా!.. నీవు!.." ఆగిపోయింది లావణ్య.



"కొత్త సమస్యను సృష్టించి.. మీరు మోయలేని భారాన్ని మీ తలపై పెడుతున్నాననేగా నీవు అనాలనుకొన్నది. ఈ కారణంగా మీ అన్నయ్య రెచ్చిపోతాడని పగ శతృత్వాలు పెరుగుతాయనేగా నీ సందేహం!"



"అవును వదినా!"



"దీప్తి మేజర్ వదినా!.. చిన్నపిల్ల కాదు. తనకు నచ్చినవాడిని వివాహం చేసుకొనే హక్కు, అర్హతా ఇప్పుడు దీప్తికి వున్నాయి. మీ అన్నయ్య నన్ను నోటికి వచ్చినట్లు తిట్టబోతాడు. నేను ఆయన మాటలను లెక్కపెట్టబోను. నాకు కావలసిందల్లా మన దీప్తి ఆనందంగా వుండడమే!.. ఒక తల్లిగా నా బిడ్డ విషయంలో నాకు అలాంటి కోరిక వుండటం న్యాయమా.. అన్యాయమా లావణ్యా!" దీనంగా అడిగింది ప్రణవి.



లావణ్య కొన్ని క్షణాలు కళ్ళు మూసుకొని మౌనంగా వుండిపోయింది.
"వదినా!.." లావణ్య భుజంపై తట్టింది ప్రణవి.
లావణ్య కళ్ళు తెరిచి నవ్వింది.



"వదినా!.. దీప్తి నా యింటి కోడలే అవుతుంది. అన్నయ్యలో నాలో ప్రవహించే రక్తం ఒకటేగా!.. పగను, విరోధాన్ని పెంచుకోవాలనే పట్టుదల వాడికి వుంటే.. నాకు ప్రేమ బంధుత్వాన్ని పెంచుకోవాలనే పట్టుదల వుంది. దీప్తిని గురించి నీవు దిగులుపడకు. అది నా యింటి నా కోడలు" అంది లావణ్య.



"ఎంతోకాలం తర్వాత కలసుకొని మనం అరమరికలు లేకుండా మాట్లాడుకున్నాము వదినా! నా నిర్ణయాన్ని నీవు అంగీకరించావు. నాకు చాలా సంతోషంగా వుంది" ప్రీతిగా ప్రణవి లావణ్య చేతులు పట్టుకొంది.



ఆలయంలో ప్రవేశించిన మాధవయ్యను చూచింది లావణ్య. "లే వదినా! ఇక మనం వెళ్దాం. అక్కడి మాటలు ఇక్కడ, ఇక్కడి మాటలు అక్కడా గోరంతలను కొండంతలు చేసి చెప్పే మాధవయ్య నారదుడు ఆలయంలోకి వచ్చాడు" అంది లావణ్య.



ఇరువురూ లేచారు. దీప్తి శార్వరీ వారిని సమీపించారు. నలుగురూ గుడి నుండి బయటికి నడిచారు.
ప్రజాపతి ఊర్లో లేని కారణంగా నిర్భయంగా ప్రణవి దీప్తితో రైల్వేస్టేషన్లో కలుసుకున్నారు. హరికృష్ణ, లావణ్య, ఈశ్వర్, శార్వరీలు దీప్తి ప్రణవీలను స్టేషన్‍లో కలుసుకొన్నారు. హౌరా ఎక్స్ ప్రెస్‍లో వారు చెన్నైకి బయలుదేరారు. కంపార్టుమెంటులో ఎక్కిన వారందరికీ వీడ్కోలు చెప్పి ఆనందంగా ప్రణవి ఇంటికి వెళ్ళిపోయింది.
====================================================================
ఇంకా వుంది..