అదృశ్య మందిరం - శంభల రాజ్యం – 10

[k3vv3]

"ఇచట మీరు విశ్రాంతి తీసుకోవలసిందిగా అనిరుద్ధుల వారి విన్నపం. రేపు సభనందు మిమ్మల్ని అందరికీ పరిచయం చేసిన పిమ్మట వారు మీతో ఏకాంతంగా చర్చిస్తారు. కూలంకషంగా అన్ని విషయాలు అప్పుడు మీకే తెలుస్తాయి. అంతవరకు అలసటకు గురైన మీ మనసుకు ప్రశాంతతనివ్వండి", అని ఆ వేగు అక్కడి నుండి నిష్క్రమించాడు.
 
మంత్రి ఫాలనేత్రుడు, సేనాధిపతి రుద్రసముద్భవలు వారి నుండి సెలవు తీసుకుని అక్కడి నుండి వెళ్లిపోయారు.
 
అతిథి గృహం నుండి బయటకు చూస్తే ఎంతో విశాలమైన శంభల రాజ్యం కళ్ళకు దేదీప్యమానంగా కనిపించింది. శంభల రాజ్యాన్ని చూస్తూ సిద్ధపురుషుడు అభిజిత్, అంకిత, సంజయ్ లతో ఇలా చెప్పాడు.
 
 
“శంభల నగరంలో ప్రాకారాలున్నట్టే శంభల రాజ్యంలో కూడా ప్రాకారాలున్నాయి. కానీ అవి సందర్శించటానికి శంభల రాజ్యాధిపతి అయిన అనిరుద్ధుల వారి ఆజ్ఞ కావాలి. యుద్ధ సేనాధిపతికి సముచితంగా అనిపించాలి. శంభల రాజ్యంలోనివి యుద్ధ ప్రాకారాలు. అంటే ఇక్కడ యుద్ధంలో ప్రయోగించే అనేకానేక వ్యూహాలు, అస్త్రాలు, ఆయుధాలు, సైన్యం ఇలా ఒక వేరే ప్రపంచమే ఉంటుందిక్కడ. ఇక్కడ నేర్పేది యుద్ధ విద్య. ఇక్కడి వారు బ్రతికేది రక్షించటానికే. రక్షించేది బ్రతికించటానికే. యుద్ధ నీతి తెలుసు. రీతి తెలుసు. వాటిని అతిక్రమిస్తే సంహారం ఇంకా బాగా తెలుసు.
 
ఇక్కడి ప్రతి కన్నూ మిమ్మల్ని  ఒక కంట గమనిస్తూనే ఉంటుంది. ఇక్కడ ఆలోచనలే శత్రువులు. వ్యక్తులు కాదు. చెడుకి, మంచికి వ్యత్యాసం వచ్చేది మన ఆలోచనలోనే. అది చెడ్డ పనైనా, మంచి పనైనా పడే కష్టం ఒక్కటే. అంతరంగంలో స్వచ్ఛత కోల్పోయినప్పుడు ఎంత గొప్ప పనైనా వృథాగా మిగిలిపోతుంది. అందుకే ఇక్కడ మీకిచ్చే శిక్షణకు మీరు అన్ని విధాలా అర్హులా కాదా అని మంత్రి, సేనాధిపతి మిమ్మల్ని పరీక్షించారు. భూలోక వాసులను ఘోర కలి నుండి కాపాడటం చిన్న విషయం కాదు. ఎన్నో యుద్ధ విద్యలలో ప్రవేశం ఉండాలి, ఎంతో వ్యూహ రచన కావాలి. అవన్నీ మీకందివ్వటానికి మీకొక గొప్ప ఆశయం కావాలి. మీలో పవిత్రత నిండి ఉండాలి.
 
 
మరీ ముఖ్యంగా, అవి కడదాకా మీలో అలాగే ఉండాలి”, అని చిన్నగా నవ్వుతూ సిద్ధపురుషుడు  అభిజిత్ కళ్ళలోకి చూసాడు.
 
తను ఎవరికైతే చెప్పాలనుకున్నాడో వారికి విషయం బోధపడేలా ఉంటుంది ఆయన చిరునవ్వు. అదొక అస్త్రం అంతే. ఆ నవ్వు ఒక బాణం లాంటిది. చాలా అరుదుగా సంధించే ఆ చిరునవ్వు మనకు గుచ్చుకుందా. అంతే. జ్ఞానం వెల్లివిరుస్తుంది. కార్యాచరణ కళ్లముందుంటుంది. సిద్ధపురుషుడి ద్వారా పెల్లుబికే దైవీ శక్తి అది.