సన్(డే) స్ట్రోక్

[k3vv3]

సన్(డే) స్ట్రోక్
కె.కె.భాగ్యశ్రీ
 “ఆదివారం వస్తోందంటే ఒంట్లో ఏదో అయిపోతోంది నాన్నా…’’ వానకి తడిసిన కుక్కపిల్లలా సోఫాలో దగ్గరగా ముడుచుక్కూర్చున్న మహిమ అంది ఏడుపుగొంతుతో.
“అవున్నాన్నా… నాకూ అదోలా ఉంది. గుండె గుభిల్లుమంటోంది.’’ బావురుమనడం ఒక్కటే మిగిలింది మనోజ్ కి.
“ నిండా ఇరవైఏళ్లు లేకుండా మీరే ఇలా అయిపోతున్నారంటే పాతికేళ్లుగా ఈ ఆదివారాన్ని ‘వరం’ గా పొంది నేనెన్ని ఇక్కట్లు పడుతున్నానో మీరే అలోచించండి.’’ కొడుకు, కూతురు చూపించిన భావాలన్నింటినీ ఏకకాలంలో మూకుమ్మడిగా తన ముఖ కవళికల్లోనూ, దీనంగా ధ్వనిస్తున్న స్వరంలోనూ ప్రకటిస్తూ అన్నాడు సౌమిత్రి.
“ నాకు అంత ప్రాబ్లం లేదు డాడీ… కంబైండ్ స్టడీస్ అని చెప్పి ఏఫ్రెండ్ దగ్గరకో చెక్కేస్తా… పాపం మీ ఇద్దరి సంగతి తలచుకుంటేనే…’’ జాలి తన ముఖంలో ప్రస్ఫుటింపజేశాడు మనోజ్.
“ హలో… అంతలేదు బాబూ! మధ్యాహ్నంవేళకి నువ్వు ఎస్కేప్ అయినా రాత్రికి మాత్రం దొరికిపోవడం ఖాయం. అంతకన్నా వేడివేడిగా మధ్యాహ్నమే నయం కదూ!’’ మహిమ అంది అంత బాధలోనూ హేళనగా నవ్వుతూ.
“మీరు పిల్లలు కాబట్టి జంప్ అయిపోయినా ఎస్క్యూజ్ ఉంటుంది. నాకలాకాదే!’’ లబోదిబోమన్నాడు సౌమిత్రి.
“మందుల కంపెనీలు వాళ్లు తయారుచేసిన డ్రగ్స్ ని ఎలకలమీద, కుందేళ్ల మీద ప్రయోగిస్తే అవెలా తట్టుకుంటాయో అనుకునేవాడిని. కాని, ఇప్పుడు వాటికన్నా అన్యాయం అయిపోయింది కదా మనబతుకూ!’’ ఆక్రోశించాడు మనోజ్.
“సర్లెండి… ప్రతిఆదివారం వచ్చేముందు మనింట్లో ఈ చర్చ సాగడం పరిపాటే కాని, తప్పించుకునే మార్గం ఆలోచించండి నాన్నా…’’ దిగులుగా అంది మహిమ.
“ అదే సాధ్యమైతే… ఇన్నాళ్లపాటు ఎదురుచూడ్డం దేనికి? మీదాకా రానివ్వకుండా ఎప్పుడో క్యాన్సిల్ చేసి ఉండేవాడిని…’’ తన నిస్సహాయతని వ్యక్తపరిచాడు సౌమిత్రి.
తండ్రీ పిల్లలూ ఎంతగా బద్దలు కొట్టుకున్న ఆదివారం రాబోయే ఉపద్రవాన్ని ఎలా అడ్డుకోవాలో తట్టలేదు. వాళ్లు ఇంతగా అల్లాడిపోతున్నారంటే… అందుకు కారణం… ఆదివారంనాడు తన చండప్రచండ ప్రతాపంతో విజృంభించే సూర్యభగవానుడు వీరిని తాపానికి గురిచేశాడనుకునేరు. ఎంతమాత్రం కాదు… తినబోతూ రుచెందుకు! మీరే అవలోకించండి.
“భగవాన్… ఎలాగైనా ఈ గండంనుంచి మమ్మల్ని గట్టెక్కించు తండ్రీ…’’ ఆకాశం పక్క చూస్తూ మొరపెట్టుకున్నారు ముగ్గురూ ముక్తకంఠంతో.
“ఏమిటీ… ఏదో ప్రార్ధనలు చేస్తున్నట్లున్నారు?’’ అప్పుడే రైతు బజార్ నుంచి తాజా కూరగాయలను మోసుకుని ఇంట్లోకి ప్రవేశించిన శ్యామల అంది అనుమానంగా వీళ్ళనే చూస్తూ.
“హబ్బే! ఏంలేదు శ్యామూ… మొన్న సెమిస్టర్ లో మనూగాడిది ఓ సబ్జెక్ట్ ఉండిపోయింది కదా! అది కాస్తా ప్యాసైపోతే నడిచి ఏడుకొండలూ ఎక్కుతానని మొక్కుకుంటున్నా…’’ గభాలున కవర్ చేశాడు సౌమిత్రి.
“అంతేనా! నాకు వ్యతిరేకంగా ఏదన్నా కుట్ర పన్నుతున్నారేమోననీ…’’ ఫాన్ దగ్గర కూలబడి నుదుటపట్టిన చమటలను చీరకొంగుతో తుడుచుకుంది శ్యామల.
“ఎంతమాటన్నావు శ్యామూ… నువ్విలా సందేహించాక నేను బతికిఉండడం వేస్ట్…’’ ఆవేదనగా తల పట్టుకున్నాడు సౌమిత్రి నాటకీయంగా.
“ చేసిన ఓవర్ యాక్షన్ చాలుగాని, మీరు పిల్లలు కలిసి తెచ్చిన కూరగాయలను శుభ్రంగా కడిగి ఫ్రిజ్ లో పెట్టండి. అలాగే ఆసరుకులు కూడా సర్దేయండి…’’ పురమాయించేసి బాత్ రూమ్ లోకి వెళ్లింది శ్యామల.
సౌమిత్రి , సంతానం ఆ సంచీలకేసి బితుగ్గా చూశారు. మరునాడు జరగబోయే యుధ్ధానికి తమమీదకు సన్నధ్ధమై వస్తున్న శత్రుసైన్యంలా కనిపించాయి ఆ చేతిసంచీలు. నవనవలాడుతున్న ఆకూరగాయలు తమమీదకి ఎక్కుపెట్టిన అస్త్రశస్త్రాల్లాగా అనిపించాయి. సంచీనిండా కిటకిటలాడుతున్న ఆ వంటసరుకులు పేలడానికి సిధ్ధంగా ఉన్న అణుబాంబుల్లా దర్శనమిచ్చాయి.
శ్యామల బయటకొస్తే ‘’ ఇంకా సర్దడం పూర్తికాలేదా?’’ అంటూ తమమీద విర్చుకుపడుతుందన్న భయంతో తండ్రీపిల్లలూ కలిసి గబగబ వాటిని సర్దేశారు.
వారందరూ ఆదివారమంటే అంతగా భీతిల్లుతున్నారంటే దానికో ఫ్లాష్ బ్యాక్ ఉంది. బీభత్సమైన ఆగతంలోకి గుండ్రాలు తిప్పుకుంటూ వెళ్తే యుధ్ధంలో తనను రక్షించిన ముద్దుల భార్య కైకేయికి దశరధుడిచ్చిన వరంలాంటి వరం ఒకటి మనకు తారసపడుతుంది.
-------------------- ------------------------------ -----------------
“మీశ్యామల నాకు బాగా నచ్చేసిందండీ… కట్నకానుకల మీద నాకు మోజులేదు. మావాళ్లకి నేనెంతచెప్తే అంత! మంచిరోజు చూసి ముహూర్తాలు పెట్టించండి.’’ నాజూగ్గా తీగలాఉన్న శ్యామల మీదనుంచి చూపు తిప్పుకోలేకపోతున్నాడు సౌమిత్రి.
శ్యామల తండ్రి ముఖం చింకిచాటంతైంది. ఇన్నేళ్లూ చెప్పులరిగేలా తిరిగిన తన శ్రమకి తగిన ఫలితం సౌమిత్రి రూపంలో తనను వెతుక్కుంటూ వచ్చిందన్నసంబరం అతడిఅంగాంగాలా వెల్లివిరుస్తోంది.
“కాని, బాబూ!’’ శ్యామల తల్లి సంశయంగా ఏదో చెప్పబోయింది.
శ్యామలతండ్రి ఆమెమాటలకి అడ్డుతగులుతూ…”అబ్బబ్బ…ఇంకా కానీలు, అర్ధణాలూ ఏమిటే? శుభస్యశీఘ్రం. ఆలస్యం అమృతంవిషం…’’ అంటూ ఏవేవో చెబుతూ ఆమెను మాట్లాడకుండా చేసిన సంగతి శ్యామల నచ్చిన మైకంలో ఉన్న సౌమిత్రి గమనించనేలేదు.
అలా గమనించకపోవడం వలన జీవితంలో తానెంత పెద్దప్రమాదంలో పడనున్నాడో పసిగట్టే అవకాశం మిస్సైన మిస్సైల్లా తప్పిపోయింది.
ఆనాటి అత్తగారి “కానీ, బాబూ’ అన్న అర్ధోక్తికి అర్ధం పెళ్లైన తరువాత కాని బోధపడలేదుఅతగాడికి.
శ్యామలకి వంటల్లో ప్రయోగాలు చేయడమన్నా, కొత్తవంటలు కనిపెట్టి, వాటిని అందరిచేతా తినిపించడమన్నా మహా మోజు అన్న సంగతి తెలిసింది సౌమిత్రికి.
“పోనీలే… చాలామంది పెళ్లాలు వంటచేయకుండా మొగుడిని ఏడిపించుకు తింటారు. శ్యామలలా వంటపట్ల ఆసక్తి ఉన్న వాళ్లెవరు ఉన్నారీరోజుల్లో! ఎంచక్కా హోటల్ కెళ్లి డబ్బు తగలేసే అగత్యం లేకుండా అన్ని రకాల వంటలను ఇంట్లోనే రుచిచూడచ్చు…’’ స్వతహాగా భోజన ప్రియుడైన సౌమిత్రి ఆత్రంగా లొట్టలేశాడు.
కాని, అదెంత కష్టమో, అనుభవం మీద కాని తెలిసిరాలేదతడికి. శ్యామల చేసే సరికొత్తవంటలను తినలేకా, ఆమె పాకశాస్త్రంలో చేసే కొంగ్రొత్త ప్రయోగాలను భరించలేకా అల్లడిపోయింది సౌమిత్రి బక్కప్రాణం. శ్యామలలో పొంగిపొరలే ఉత్సాహానికి ఆనకట్ట వేయలేక అల్లాడాడు సౌమిత్రి బల్లినోటికి చిక్కిన పురుగులా.

[k3vv3]

“మీ అమ్మాయికీ పిచ్చుందని నాకు ముందే ఎందుకు చెప్పలేదత్తయ్యా?’’ కడివెడు కన్నీళ్ళను ఆపకుండా కారుస్తూ వాపోయాడు సౌమిత్రి అత్తగారి సమక్షంలో.
“నేను చెబుదామనే అనుకున్నా నాయనా… ఏదీ…మీ మామగారు నోరు తెరవనిస్తేనా! పెళ్లైన తరువాత నయానో, భయానో నువ్వే నచ్చ చెప్పుకుంటావని నోరుమూసుకుని ఊరుకున్నా. ‘’ చావుకబురు చల్లగా చెవినేసింది అత్తగారు.
“ఏం నచ్చచెప్పడమో ఏంటో! మీ అమ్మాయి చేసిపెట్టే అడ్దమైన గడ్డీ తినలేక కడుపు కకావికలైపోతోదంటే నమ్మండి. నాలుకమీద బ్రహ్మజెముడు ముళ్లు మొలిచాయి. ఇంకా కొన్నాళ్ళిదే కంటిన్యూ అయితే నేను కైలాసానికి పోవడం ఖాయం…మీరు నామీద ఇంత కక్ష కడతారనుకోలేదు. అమ్మాయి కుందనపుబొమ్మలా ఉందనుకుని మురిసిపోయానే కాని, ఇలాంటి పాడుహాబీలు ఉన్నాయని కనుక్కోలేకపోయాను…’’ ఉసూరుమని ఏడ్చాడు అంతమగాడూ కూడా.
అత్తగారు కదిలిపోయింది. ఎంతైనా నలుగురు పిల్లల్ని కన్నతల్లి. పరాయమ్మ బిడ్డడైనా …అలా చిన్నపిల్లాడిలా పొగిలిపొగిలి ఏడుస్తూ ఉంటే కన్నపేగు కదలదూ!
“ఏంటయ్యా సౌమిత్రీ… ఆ ఏడుపు! కొత్తవంటలైతే బాగా చేయలేదు గానీ, రోజూ మనం ఇంట్లో చేసుకునే పప్పులు, పచ్చళ్ళు, కూరలు బాగానే వండుతుంది… ఎటొచ్చీ… దాన్ని నువ్వు కొత్తవంటల జోలికి పోకుండా చేయగలిచావనుకో! నీ బతుక్కేం ఢోకా లేదు…’’ అంటూ ఊరడించింది అతడిని.
“బతికించారు…అవే నాపాలిట పంచభక్ష్య పరమాన్నాలనుకుని సరిపెట్టుకుంటాను. ఇంతకీ ఈ వంటల్లో ప్రయోగాల పిచ్చి ఎలా మానిపించాలో కాస్త దారి చూపించండి.’’ వేడుకున్నాడు ఆకొత్తల్లుడు.
“రౌతు కొద్దీ గుర్రం అన్నారు పెద్దలు. కొత్తపెళ్లాం కదాని నెత్తికెక్కించుకోకుండా కాస్త భయభక్తులలవాటు చేయి. దెబ్బకి దెయ్యం వదులుతుందంతారు. నువ్వు అమ్మాయి పట్ల కాస్త కఠినంగా ఉన్నావనుకో… అదే దారిలోకి వస్తుంది…’’ తారకమంత్రం ఉపదేశించింది అత్తగారు.
ఎవరైనా అల్లుడిని కొంగున ముడేసుకోమని కూతురికి సుద్దులు చెబుతారు. కాని, అందుకు విరుధ్ధంగా అత్తగారు కూతురిని దారిలో పెట్టమని చెబుతోందంటే శ్యామలలో ఈపిచ్చి వాళ్లనెంతగా బాధించిందో అర్ధమైంది సౌమిత్రికి.
అత్తగారు చెప్పినట్లే శ్యామల అలా కొత్త ప్రయోగాలు చేయబోయినప్పుడల్లా కళ్లెర్రచేసి రుద్రతాండవం ఆడబోయాడు. కాని, కట్టలు తెంచుకున్న శ్యామల కన్నీటి ప్రవాహం అతడి తాండవాన్ని క్షణాలమీద ఆపుచేసింది.
“ నేనేమంత తప్పుపని చేశానని అలా రంకెలేస్తున్నారూ! రకరకాల వంటలు తయారుచేసి మొగుడి కడుపు నింపాలనుకోవడం తప్పా! ఎవరైనా భార్యకి వంటచేయదం రాదని ఏడుస్తారు… మీరేంటో నాకు వంటొచ్చని గోలపెడుతున్నారు…’’ జిర్రున ముక్కుచీదింది శ్యామల.
అర్ధాంగి కళ్లలో గంగాయమునలు ఉప్పొంగడంతో కుదేలైపోయాడు సౌమిత్రి. ఏరికోరి పెళ్లిచేసుకున్న ఆ అన్నులమిన్నను అలా తల్లడిల్లేలా చేయడం మగనిగా తనకు తగనిపని అని నలిగిపోయాడు లోలోనే.
అంతే… అతడి పిలక శ్యామలచేతికి చిక్కింది. ఆమె ప్రయోగాలదాడికి అతడి జిహ్వ, తద్వారా కుక్షి బలైపోసాగాయి. ఏదో సినిమాలో చూపించినట్లుగా హిప్నాటిస్ట్ దగ్గరకి తీసుకెళ్లి ఆమెకున్న ఈ వెర్రిని వదల్చాలని కూడా ప్రయత్నించాడు సౌమిత్రి.
కాని, శ్యామల దగ్గర ఆపప్పులేమీ ఉడకలేదు. పైగా ఆమె వంటలపిచ్చికి ఆహిప్నాటిస్ట్ బెదిరిపోయి, ఇంకాసేపు ఆమెనక్కడే ఉంచితే ఆవంటలన్నీ చేసి తనచేత తినిపిస్తుందేమోనని భయపడి అక్కడనుంచి వెళ్లగొట్టినంత పనిచేసి ఊపిరి పీల్చుకున్నాడు.
ఈ ప్రయత్నం కూడా బెడిసికొట్టాక శ్యామల ఏకఛత్రాధిపత్యానికి అడ్డూ ఆపూ లేకుండాపోయింది. సొరకాయతో స్వీటు, కాకరకాయతో కూటు, పుచ్చకాయ పులుసు,బెండకాయ బండపచ్చడి, బీరకాయతో బూరెలు, నువ్వులతో నూడిల్స్, కొరివికారంతో కుల్ఫీ…ఇలా కావేవీ వంటకనర్హం అన్నట్లుగా రోజుకో వెరైటీ చేసి పతిదేముడికి నైవేద్యంగా సమర్పిస్తోంది శ్యామల.
ఎంత దేముడైనా ఇలాంటి పిచ్చిపిచ్చి వంటలన్నీ అరిగించుకునేందుకు జీర్ణశక్తికావద్దూ! ఖాండవదహనం చేయడానికి అతడేమీ అగ్నిదేముడు కాదుకదా! సౌమిత్రి కడుపు ఖరాబై, కకావికలై అతడు ఆసుపత్రి పాలయ్యాడు. భర్తకా స్థితి కలగడానికి తానే అని తెలిసినా తన అభిరుచిని విడిచిపెట్టేందుకు ఎంతమాత్రం సిధ్ధంగా లేదు శ్యామల.
సౌమిత్రి నానా ప్రయత్నాలూ చేసి , చివరికి అర్ధాంగిని నుండి ఆదివార ‘వరాన్ని’ పొందాడు. ఈ ఆదివార ‘వర’ విశేషం ఏంటయ్యా అంటే… శ్యామల వారం లోఆరురోజులపాటు ఏప్రయోగాల జోలికీ పోకుండా కేవలం సాదాసీదా వంటకాలు మాత్రమే చేసి అతడి అరోగ్యం చెదిరి, చెడిపోకుండా చూసుకోవాలనీ, తన పాకశాస్త్ర ప్రయోగాలని కేవలం ఆదివారానికి మాత్రమే పరిమితం చేసుకోవాలనీ పోరాడి పోరాడి విజయం సాధించాడు సౌమిత్రి.
ఇప్పుడింకో కొత్తబెడద మొదలైంది. ఆదివారంనాడు సౌమిత్రి మాత్రమే కాక, ఇంటికొచ్చే చుట్టాలు- స్నేహితులు కూడ శ్యామల ప్రయోగాల బారిన పడసాగారు. దానితో ఇంటికొచ్చే చుట్టపక్కాల సంఖ్య గణనీయంగా తగ్గిపోయింది. ‘ అమ్మో! సౌమిత్రి ఇంటికా! మేం చచ్చినా రాం బాబూ!’’ అనే వాళ్లు ఎక్కువైపోయారు.
ఒకవిధంగా ఇది తనమంచికే అనుకున్నా, అర్ధాంగి చేతిమహాత్మ్యం అతడిని అల్లకల్లోలానికి గురిచేసింది.
పిల్లలు పుట్టనంతవరకూ సౌమిత్రికి మాత్రమే ఈ మహద్భాగ్యం దక్కింది. ఆతరువాత అతడి అదృష్టంలో పాలుపంచుకునేందుకు మహిమ, మనోజ్ లు పుట్టారు. శ్యామల లోని ఈ విశిష్టప్రతిభ కారణంగా వాళ్లకి పరిమితమైన స్నేహితులు మాత్రమే ఏర్పడ్డారు. వాళ్లు పొరబాటున కూడా ఆదివారంనాడు వీళ్లఇంటి వైపుకి తొంగిచూడరు.
మండువేసవిలో అంతకన్నా తీవ్రంగా మండే ఆదిత్యుడి తీవ్రతకి వడదెబ్బ తగిలి ఎవరన్నా ఠారుమనడం సహజం. కాని, ప్రతి భానువారం ఇలా భా(ర్యా)మామణి దెబ్బకి డస్సిపోవడం ఆతండ్రీ పిల్లలకే చెల్లింది.
“ఈ సన్ డే స్ట్రోక్’’ ని తప్పించుకునే మార్గమేలేదా?’’ ఎన్నోసార్లు వాపోయినా వీళ్ళకి సమాధానం దొరకలేదు.
మరికొన్ని రోజులకి మహిమకి పెళ్లికుదిరింది. శ్యామల గురించి ఎంత చెప్పినా వినకుండా మహిమను చేసుకునేందుకు శ్యామల అన్నకొడుకు ‘ కమల్’ ముందుకొచ్చాడు.
“నాకు వరకట్నాలు గట్రా ఏమీ వద్దు…కాని, నీ కూతురిని చేసుకోవాలంటే నాదో కండిషన్ అత్తా!’’ కమల్ చెప్పాడు ముహూర్తాలు పెట్టుకునే ముందు.
కట్నం వద్దనే అల్లుడు దొరికినందుకు పొంగిపోతూనే ‘’చెప్పరా’’ అందు శ్యామల ఆనందంతో ఉబ్బితబ్బిబ్బవుతూ.

[k3vv3]

“ఏంలేదత్తయ్యా… నాకు వరకట్నం కింద ‘ నీ అభిరుచిని’ ధారపోయాలి. అంటే జీవితంలో ఇంకెప్పుడూ నువ్వు వంటల్లో ప్రయోగాలు చేయకూడదు’’ అత్త గురించి ఇంట్లో అందరూ చెప్పిన మీదట, తెలివిగా వ్యవహరించి ఆమెచేత ఆపని మానిపించగలననే అనుకున్నాడు కమల్. కాని, శ్యామల ససేమిరా అంది.
“ఒరేయ్… నీకు మహిమ నచ్చో…లేకపోతే ఈ అత్తమీద అభిమానం ఉండడంచేతనో ఈపెళ్లి చేసుకుంటే చేసుకో ... అంతేగాని, నా హాబీకి, నీపెళ్లికి లింకెట్టకు… నేను ఎవరికోసమూ నా హబీకి నీళ్లొదిలేది లేదు.’’’ ఖచ్చితంగా చెప్పేసింది శ్యామల.
కథ అడ్డం తిరగడంతో హతాశుడైన కమల్, ఏ ఆర్భాటమూ లేకుండా మహిమను గుళ్ళో పెళ్లి చేసుకుని అమెరికా పారిపోయాడు. కొన్నాళ్ళకి మనోజ్ కి ఖరగ్ పూర్ ఐఐటిలో సీటు రావడంతో అతను కూడా జంపైపోయాడు.
కనీసం పిల్లలైనా ఈ చిత్రహింస నుంచి తప్పించుకున్నారని ఆనందపడ్డాడు సౌమిత్రి. ఇప్పుడు అతనొక్కడే శ్యామల కి ఎరగా మారిపోయాడు. దానితో శ్యామల మరీ చెలరేగిపోయింది. ప్రాణనాధుని ప్రాణాలతో చెడుగుడాడేయడం మొదలెట్టింది. ఇలా సాగిపోతూ ఉండగా…
సౌమిత్రి రిటైరైపోయాక చుట్టాలందరూ కలిసి మొత్తం దేశాన్ని చుట్టిరావాలని సంకల్పించారు. అరవైలో పడ్డాక ఇక ఆధ్యాత్మిక చింతన తప్పనిసరి అన్న అభిప్రాయానికొచ్చిన సౌమిత్రి సతీసమేతంగా వాళ్లతో వెళ్లడానికి సిధ్ధపడ్డాడు. వెళ్లేముందే శ్యామలని ఘాటుగా హెచ్చరించాడు.
“నువ్వక్కడ వంటలతో ప్రయోగాలు చేసి అందరి ప్రాణాలతోనూ ఆడుకుని నాపరువు తీయద్దు. బుధ్ధిగా వంటవాడు వండిపెట్టినదేదో తిని హాయిగా ఉండు…’’ అంటూ హితోపదేశం చేశాడు.
అలాగేనని తల తాటిటెంకలా ఊపినా యాత్రాసమయంలో పోకలు పోయబడి పచ్చగా కనువిందు చేస్తున్న కాయగూరలను, పెద్దమోతాదులో రాశులు పోసిన వంటదినుసులని కళ్లారాగాంచి ఉద్రేకంతో ఊగిపోయిన శ్యామల తన వెనుకటి గుణాన్ని వెలికితీసింది.
మొత్తం యాత్రాబృందంలో అందరినీ తన వంటలపిచ్చితో హడలెత్తించింది. సౌమిత్రికి మాత్రం ‘ ఆదివారం’ అన్న సడలింపు ఉందిగాని, మిగతావాళ్లకి లేదుగా. సౌమిత్రి ఎంత వారిస్తున్నా వినక వాళ్ళందరినీ దినదినమూ తన ప్రయోగాలతో హడలెత్తించింది. తమ బృందంతో తీసుకెళ్లిన వంటవాళ్ళని పక్కకినెట్టి తనే నడుం బిగించి, విల్లంబులు చేతబట్టి సమరరంగాన దూకిన సత్యభామలా…కుడిఫీ(వంటవాళ్ళు వాడే పెద్దసైజు అట్లకాడ) అందుకొని అందరి కడుపులనీ కుదిపేసింది. ఆమె చేసిపెట్టే సరికొత్త వంటకాలు తినలేక అందరికీ వాంతులు, విరోచనాలు పట్టుకున్నాయి. దేశమంతా చుట్టిరావాలన్న సంకల్పంతో బయలుదేరిన కొందరు శ్యామల ధాటికి తట్టుకోలేక యాత్రను అర్ధాంతరంగా వదిలేసి ఇళ్లకి నిష్క్రమించారు.
“ఒరేయ్ అబ్బాయ్! ఎలా వేగుతున్నావురా దీనితో… నాకే గనుక ఇలాంటిపెళ్ళాం దొరికితే ఏనాడో విడాకులిచ్చి పారేద్దును…’’ మామయ్య వరసయ్యే ఓ పెద్దాయన గోడుగోడున విలపించాడు .
ఆయన మాటలతో సౌమిత్రి మెరుపులాంటి ఆలోచన ఒకటొచ్చింది. ఇన్నిరోజులుగా శ్యామల ఆవేశాన్ని తగ్గించడానికి ఎన్నో పధకాలు రచించాడు. కాని, ఏఒక్కటీ ఫలించలేదు.విరక్తితో జీవితాన్నీడుస్తున్న అతడికి కనీసం ఈ ప్లానైనా వర్కౌట్ అవుతుందేమోనన్న చిన్ని ఆశ అతడికి బతుకుమీద తీపి కలిగేలా చేసింది.
యాత్రాబృందమంతా కాశీ చేరింది.అందరూ గంగానదిలో పుణ్యస్నానాలు ఆచరించి ఆకాశీవిశ్వేశ్వరుని దర్శించునే సంరభంలో తలమునకలై ఉన్నారు.
భార్యాసహితంగా గంగలో మునిగిన సౌమిత్రి మూడు మునకలు వేసి పైకి లేచాక “చూడు శ్యామూ… కాశీకొచ్చి, ఇలా గంగానదిలో స్నానం చేసిన తరువాత మనకిష్టమైన వాటిని గంగలో వదిలేయాలట…నీవు నాకోసం నీకిష్టమైన దానిని వదిలేయాలి మరి!’’ అన్నాడు సౌమ్యంగా.
“నాకిష్టమైనదా?’’ అనుమానంగా చూసింది శ్యామల.
“అవును…కొత్తకొత్త పదార్ధాలను తయారుచేసి వంటల్లో ప్రయోగాలు చేయడమంటే నీకిష్టం కదా! అందుకే… ఆహాబీని నువ్వు ఇక్కడ విడిచిపెట్టాలి.’’ అన్నాడు నెమ్మదిగా.
“ఇంపాజిబుల్… అయినా ఇష్టమైనదాన్ని విడిచిపెట్టడమంటే…మనకిష్టమైన కూరనో, లేకపోతే మనలో ఉన్న అరిషడ్వర్గాలనో కాని, ఇలాంటి అభిరుచులని కాదు. అయినా సాక్షాత్తూ ‘కాశీ అన్నపూర్ణే’ కొలువైఉన్న ఈ పుణ్యక్షేత్రంలో ‘అన్నపూర్ణ’లా వండివార్చే నా అభిరుచిని వదిలేయమంటారా! ఎంతమాత్రం వీలుకాదు.’’ భీష్మించింది శ్యామల.
“వీలుకాదూ!’’ హుంకరించాడు సౌమిత్రి ఈ అవకాశం చేజారిపోతే ముందెన్నడూ కుదరదేమోనన్న భయంతో.
“ముమ్మాటికీ కాదు…’’ తగ్గకుండా బదులిచ్చింది శ్యామల.
“అయితే విను…నువ్వు నీ హాబీని విడిచిపెట్టకపోతే… నాకెంతో ప్రీతిపాత్రమైన నిన్ను నేను పరిత్యజించాల్సి వస్తుంది.’’ గంభీరంగా చెప్పాడు సౌమిత్రి.
ఖంగుతింది శ్యామల. భర్త అంతమాట అంతాడని ఆమె ఊహించలేదు. ఇన్నేళ్లపాటు పూవుల్లో పెట్టుకుని చూసుకున్న తనను అక్కడ వదిలేయడానికి సిధ్ధమయ్యాడంటే తాను తన ప్రయోగాల పిచ్చితో ఇన్నాళ్లుగా అతడినెంతగా వేధించిందో ఆమెకి బోధపడింది. ఆమెకు ఆపవిత్రగంగానదీ జలాల్లో జ్ఞానోదయం అయింది.
“అయ్యో! అంతమాట అనకండీ… మీరులేకపోతే నేనెలా ఉండగలను చెప్పండి! మీరు చెప్పినట్లుగానే నా హాబీని ఈ గంగానదీ జలాల్లో కలిపేస్తున్నాను. ఇకముందు ఎవరినీ కూడా నా ప్రయోగాలతో బాధపెట్టను.’’ కన్నీళ్లతో అంది శ్యామల.
ఇప్పుడు సౌమిత్రి ముఖం చింకి చాటంత అయ్యింది.ఇన్నాళ్లూ ఈ ఆలోచన రానందుకు తనని తానే తిట్టుకుంటూ, కనీసం ఇప్పటికైనా వచ్చిందిలే… అని తనలో తానే సంతోషిస్తూ… ‘కలనిజమాయెగా…కోరిక తీరెగా’ అని కులాసాగా పాడుకుంటూ బోర విరుచుకున్నాడు.
------------------------------------- సమాప్తం -----------------------------------

[TheCaptain1983]

“ఏంలేదత్తయ్యా… నాకు వరకట్నం కింద ‘ నీ అభిరుచిని’ ధారపోయాలి. అంటే జీవితంలో 

HaHa!!! Nice Story k3vv3 garu!.

[sri7869]

కథ చాల బాగుంది