Thriller गुनाहों का देवता

[Jay Thakur]

Kismat Ka Khel — Jay Ki Nayi Zindagi
Ek emotional drama, dhokhe, dard aur Naye Jeevan ki kahani...

Chapter 1: Apno Ka Dhoka

Raat ke kareeb 11 baje ka waqt tha. Aasmaan mein kaale baadal chhaye hue the aur halki-halki baarish ho rahi thi.

Mein Jay..



ek 18 saal ka ladka, apne kamre ki khidki ke paas baitha apne mummy-papa ki tasveer dekh raha tha. 



Meri aankhon mein aansu the. Kuch hi din pehle ek bhayanak car accident mein mene apne maa-baap ko kho diya tha.

Mere liye duniya wahi khatam ho gayi thi.

Mere papa ek successful businessman the. Unhone mere liye ek bada ghar, zameen, bank balance aur kai properties chhodi thi. Mein unka iklauta beta aur unki saari property ka asli waaris tha.

Me khudki ke pass beth kar mere maa papa ko yaad kar rha tha..

Yaad karte karte me kab so gyaa mujhe pata hi nhi chala..





Meri nind subhah ke 10:30 baje khuli..

Mene dekha koi nokar mujhe jagane nhi aaya tha..

Meri coffee mere bed ke pass available nhi thi..

Mene aawaj di..

Jay: "Shanti Kaki, Shanki Kaki, meri coffee le aaiye"

Lakin udhar se koi response nhi aaya, shanti kaki humari nokrani thi..

Me utha bistar se fresh wagera hua, aur apna lower change karke, apne ak pocket me mobile rakha aur dusre pocket me credit card aur id cards kaa wallet rakha, uske baad me niche gyaa..

Mera irada bhahar jakar kuchh khane kaa tha..

Jab me apne room se bahar jaa rha tha to mujhe kya pata tha ki jis ghar mein me apne bachpan se raha tha, wahi ghar ab mere liye ajnabi banne wala tha.

Mere papa ke bade bhai, Mahendra Tau, kuch dino se ghar mein hi reh rahe the.

Shuru mein unhone mere sath bade pyaar se baat ki.

Lekin unka asli chehra tab saamne aaya jab property ke saare important documents unke haath mein aa gaye.

Scene 1: Tau Ka Asli Chehra

Mein jese hi hall mein aaya. Mahendra tau sofa par baithe wishkey  pee rahe the. 



Unke paas kuch legal papers pade the.

Mene dheere se kaha..

Jay: Ghar me koi nokar najar nhi aa rha hai, aaj koi aaya nhi hai kyaa?

Mahendra: Mene unn sab ko chutti de di hai..

Jay: "Kyun Tau ji"

Mahendra: " Mujhe tumharey papa ke nokar pasand nhi aaye to, mene unhen nikari se nikal diya"

Jay: To kyaa unki jagah koi dusre nokar rakhe hai apne, kyunki mujhe aaj taiyar hokar, tiffin lekar papa ke office jaana hai. Unke kuch important kaam pending hain. mujhe unka wo kaam kaaj dekhna hai, Aapke paas unki files hain kya?"

Mahendra ne wishkey kaa glass table par rakha aur mujhe ghurte hue dekha.

Mahendra: "Kaun sa office? Aur kaun sa kaam?"

Jay: "Papa ka business, Tau ji. Mujhe dheere-dheere sab sambhalna padega na ab."

Mahendra zor se hans pada.

Mahendra: "Business sambhalega tu? Abhi teri umar hi kya hai? Atharah saal ka bachcha hai tu!"

Mene nazrein jhuka li.

Jay: "Main seekh jaunga, Tau ji, aur wese bhi aap apna kaam kaaj chodkar yaha kab tak rahenge, mujhe khud ye sab sambhalna hoga."

Mahendra achanak apni jagah se khade ho gaye.

Mahendra: "Sun, Jay! Ab tak jo hona tha, ho chuka. Tere maa-baap nahi rahe. Ab is ghar aur property ki zimmedari main sambhalunga. Aaj aur uss wakt se ye saare property aur tere baap kaa banaya business mera hai"

Mene hairani se unki taraf dekha.

Jay: "Lekin Tau ji, ye sab papa ka hai… aur papa ke baad—"

Mahendra (beech mein tokte hue): "Bas! Mujhe kanoon mat sikha. Saare documents mere paas hain. Ab is ghar mein meri chalegi. ye ghar ab mera hai"

Mene tau kaa irada bhaap liya lakin mujhe iss ghar me ruk kar property ke documents apne hath me lene the, taki me apna hak court me maang saku..

Iss liye me unke paas gya aur haath jodkar bola..

Jay: "Tau ji, main aapse kuch nahi maang raha. Bas mujhe apne ghar mein rehne dijiye. Mummy-papa ke jaane ke baad mere paas is ghar ke alawa kuchh nahi hai."

Lekin Mahendra Tau ka dil patthar ban chuka tha. unke man me property hatiyane ki lalsa charam per thi, aur wo mujhe raste se hatana chahte the..

Hum dono ak dusre ke samne khade the..

Mahendra: "Mujhe emotional drama mat dikha. Nikal ja yahan se, aur sun ak bhi cheej ko hath mat lagana! 

Yaha ab tera kuchh bhi nhi hai..

Ab ye ghar aur tere baap kaa business sab mera hai"

Me kuch pal tak unhe dekhta raha. mujhe yakeen hi nahi ho raha tha ki jis insaan ko me bachpan se apna tau samajhta aaya tha, wahi aaj mujhe ghar se nikaal raha tha.

Wo bhi uss ghar se jise mere papa ne apni mehnat se kharida tha, apne dam per..

Jay: "Tau ji… aap sach mein mujhe ghar se nikaal rahe hain?"

Mahendra: "Maine jo kaha, woh suna nahi? NIKAL!"

Me andar se gusse se bhar gyaa..kintu me tau ji kaa apman nhi karna chahta thaa..

Mere pita unki kaafi ijjat karte the.. me unke samne khada tha..

Me:" Tau, wese to iss property aur business per apka koi adhikar nhi hai, ye sab mere pita ne apne dam per khada kiya hai"



Mahendra: " Mujhse jaban ladata hai battmiz"

Mahendra mujhe thappad marne ke liye aage bada..

Lakin jese hi usne apna hath uthaya wese hi mene uska hath pakad liya....

Me: " Tau apni had me raho, agar tum ye property hajam karna chahte ho to ye tumhe mubarak ho.

Mujhe mera saman lene do aur jane do yaha se"

Tau: " Tu iss ghar se kuchh nhi le jayega"

Me: " Mere College ki marksheet aur baki identity ke documents mujhe le jane dijiye"

Mahendra: "Tu yaha se kuchh nhi le jayega, aur tune jo mere sath abhi itni battmizi se baat ki hai, uska hisab abhi hoga..

Ranka, Surya, Prakash, Hamza.. Kaha mar gaye.."

Tau ki aawaj per 4 log dodte huye andar aaye..

Ranka: Ji sahab..

Mahendra: Ji sahab ke bachche maaro iss maderchod ko..

Tau ke itna bolte ho, wo teeno mere uper tut pade..

Mene bhi uska mukable kiya, ladai kuch 20 minutes tak chali lakin wo charo mujh per bhari pade.

...........

[Jay Thakur]

Chapter 2 : Haveli Ke Bahar — Mahendra Ka Asli Chehra


Unn charo ne mujhe uthakar berahmi se haveli ke bahar fenk diya. Mera sharir zameen se takraya aur kuch pal ke liye meri saansein tham-si gayin. Kapdon par gili mitti lag chuki thi aur sharir mein jagah-jagah dard ho raha tha, lekin meri aankhon mein ab bhi gussa aur aatmasamman baaki tha.



Maine dheere-dheere khud ko sambhala aur uthne ki koshish ki.

Ranka, Surya, Prakash aur Hamza mere charon taraf ghera banakar khade the. Unke chehron par akad thi. Wo mujhe aise dekh rahe the, jaise main koi insaan nahi, balki unke pairon tale kuchla jaane wala koi kamzor insaan hoon.

Mahendra wahi khada sab dekh rha tha.

 Uske chehre par ghamand bhari muskurahat thi. Wo mere saamne aakar ruka aur apni moochhon par taav dete hue bola.

Mahendra: "Tera baap saalon tak humse door raha aur humein aankhein dikhata raha. Ab use pata chalega ki humse akadane ka kya anjaam hota hai!"

Maine dard ke bawajood uski aankhon mein aankhein daalkar dekha.

Main: "Tau, mere pita tumhari izzat karte the. Unhone mujhe ya Maa ko kabhi aisi koi baat nahi batayi, jisse hamare mann mein tumhare liye nafrat paida ho. Unhone toh hamesha yahi sikhaya ki badon ki izzat karni chahiye."

Meri baat sunkar Mahendra zor se hans pada. Uski hansi mein apnapan nahi, balki saalon se daba hua zehar tha.

Mahendra: "Izzat? Ha ha ha! Tujhe lagta hai ki tera baap bahut shareef aur mahaan aadmi tha? Usne tujhe kuch nahi bataya, hai na?"

Wo ek kadam aage badha aur meri taraf ungli uthakar bola.

Mahendra: "Tujhe ye bhi nahi bataya ki kaise mere Maa-Baap ne use uske Maa-Baap ke marne ke baad ghar se bahar fenk diya tha? Bilkul waise hi, jaise aaj maine tujhe is haveli se bahar fenk diya hai!"

Ye sunkar main kuch pal ke liye khamosh reh gaya.

Mere mann mein ek saath kai sawaal uthne lage. Mere pita ne kabhi apne bachpan ke baare mein kuch kyun nahi bataya tha? Unke saath aisa kya hua tha, jiski mujhe aur Maa ko kabhi bhanak tak nahi lagi?

Mahendra mere chehre par ubharte sawaalon ko dekhkar muskuraya. Shayad use ehsaas ho gaya tha ki uski baaton ne mere mann mein halchal macha di hai.

Mahendra: "Khair, tera baap bhi bada seedha banne ka naatak karta tha. Lekin aakhirkaar wo bhi meri chikni-chupdi baaton mein aa hi gaya."

Usne apne blazer ki baazu theek ki aur bade itminaan se bola.

Mahendra: "Aur apni is poori property ka legal owner mujhe bana gaya, bachche!"

Mere pairon tale jaise zameen khisak gayi.

Main: "Kya...?"

Mere munh se bas itna hi nikla.

Mahendra ke chehre par jeet ka bhaav aur gehra ho gaya.

Mahendra: "Haan! Ye haveli, ye zameen-jaydaad—sab par mera haq hai. Tere baap ne khud mujhe iska legal owner banaya tha. Ab tu yahan kis baat ka haq jata raha hai?"

Maine apni saanson ko sambhala. Mere andar gussa ubal raha tha, lekin main bina kisi saboot ke uski baat ko sach bhi nahi maan sakta tha.

Main: "Agar Pita ji ne tumhe legal owner banaya tha, toh phir tum mujhse itna dar kyun rahe ho, Tau? Tumhe mujhe samjha kar bhej dena chahiye tha. Mere saath maarpeet karwane ki kya zaroorat thi?"

Meri baat sunkar Mahendra ki muskurahat gayab ho gayi.

Wo mere bilkul kareeb aakar dheemi, magar sakht awaaz mein bola.

Mahendra: "Apni zubaan sambhalkar baat kar! Tu abhi is bunglow ke bahar khada hai aur aage bhi bahar hi rahega. Yahan tere baap ki koi nishaani nahi bachi, jis par tu apna haq jata sake."

Usne palatkar apne aadmiyon ki taraf dekha.

Mahendra: "Aur tum chaaron! Ise achhe se samjha do ki dobara is haveli ke darwaze par dikhai dene ki himmat na kare!"

Ranka: "Ji, sahab!"

Chaaron ek baar phir meri taraf badhne lage.

Maine ek nazar bunglow ke us vishal darwaze par daali, jiske andar kabhi mere pita ka bhi jeevan beeta tha. Aaj usi darwaze se mujhe beizzat karke bahar fenk diya gaya tha.

Mere pita ki khamoshi, Mahendra ke daave aur is property ka rahasya—sab kuch ab ek-doosre se judta hua lag raha tha. Lekin mere paas na koi document tha, na koi gawah aur na hi un sawaalon ke jawaab, jo mere mann mein toofaan macha rahe the.

Maine dheere-dheere apni mutthiyan bheenchin aur Mahendra ki taraf dekha.

Main: "Tau, aaj tumne mujhe is haveli se bahar fenk diya hai. Lekin yaad rakhna,ye property meri hai, mere pita ki aakhri nishaani aur me apna haq ak din jarur lunga."

Mahendra ne tiraskaar se munh pher liya.

Mahendra: "Chhod do ise marne ke liye, chalo andar, ab bahut hua"

Mahendra ne ye apne aadmiyon se kaha..

Main bina peeche hate un chaaron ko dekhta raha. Mera sharir dard se toot raha tha, lekin mere mann mein ab ek hi sawaal goonj raha tha—

Aakhir mere pita ne apne hi bhai par itna bharosa kyun kiya tha? Aur us bharose ki asli wajah kya thi?

Me janat hun mere pita sidhe aur bhawuk the..

Kintu phir bhi itni badi galti wo kese kar sakte hai..

.............

[Jay Thakur]

Mahendra aur wo chaaron mujhe wahin bahar chhodkar haveli ke andar jaa chuke the. Kuch der tak main khamoshi se wahin khada raha. Mere sharir mein ab bhi maarpeet ka dard tha, lekin usse kahin zyada dard mere dil mein ho raha tha.


Maine dheere se apni nazrein uthayin aur saamne khade us aalishaan bungalow ko dekhne laga.

Wahi bungalow, jiske aangan mein maine apna bachpan bitaya tha. Wahi deewarein, wahi bada darwaza aur wahi aangan, jahan kabhi mere Maa-Baap ke saath meri duniya basa karti thi.

Aaj sab kuch wahi tha, bas mere Maa-Baap mere saath nahi the.

Bungalow ko dekhte hi meri aankhon ke saamne bachpan ki yaadein ek-ek karke taaza hone lagin.

Mujhe yaad aaya, kaise bachpan mein main apne pita ki ungli pakadkar isi aangan mein ghooma karta tha. Jab bhi main gir jaata, wo mujhe apni baahon mein utha lete aur pyaar se kehte—

Pita ji: "Mera beta toh bahut bahadur hai. Girne se nahi darte, girkar dobara uthna seekhte hain."

Unki baat yaad aate hi mere chehre par halki-si muskurahat aa gayi, lekin agle hi pal meri aankhein nam ho gayin.

Phir mujhe Maa ka chehra yaad aaya. Kaise wo subah-subah mujhe apne haathon se khana khilati thi, meri chhoti-chhoti zidd poori karti thi aur jab main shararat karta, toh daantne ka naatak karke khud hi hans padti thi.

Mere liye toh wahi bungalow mera ghar tha. Wahi aangan meri duniya aur wahi log meri poori zindagi the.

Lekin aaj usi ghar ke darwaze par mujhe ek ajnabi ki tarah beizzat karke bahar nikaal diya gaya tha.

Maine darwaze ki taraf dekha, jaise abhi Pita ji bahar aayenge, mere kandhe par haath rakhenge aur kahenge ki fikar mat kar, beta, main hoon na.

Lekin darwaza band tha.

Na Pita ji the, na Maa, aur na hi koi aisa insaan jo mujhe apna samajhkar apne paas bula leta.

Mere gale mein kuch atak-sa gaya. Maine apni nam aankhon ko ponchha aur ek lambi saans li.

Main (man hi man): "Pita ji, aapne toh hamesha mujhe sikhaya tha ki apne parivaar par bharosa karna chahiye. Lekin aaj aapke hi parivaar ne mujhe is ghar se bahar nikaal diya. Aapne kabhi mujhe is sab ke baare mein kyun nahi bataya?"

Maine ek baar phir bungalow ko dekha.

Ab mere mann mein sirf dukh nahi tha. Mahendra ki kahi baaton ne mere andar kai sawaal khade kar diye the. Kya sach mein mere pita ne apni saari property Mahendra ke naam kar di thi? Aur agar aisa tha, toh aakhir unhone aisa kyun kiya?

Main un sawaalon ke jawaab jaane bina wahan se jaana nahi chahta tha.

Kuch der baad maine apne aansu ponchhe, apne kapdon par lagi dhool saaf ki aur aakhri baar us bungalow ko dekha.

Main (man hi man): "Maa-Papa, main nahi jaanta ki sach kya hai. Lekin main aap dono ki yaadon ko yun hi mitti mein nahi milne doonga. Mujhe sach ka pata lagana hi hoga."

Itna sochkar main wahan se jaane ke liye mud gaya. Mere kadam bhaari the, lekin mann mein ek naya iraada janm le chuka tha.

Ab ye sirf ek ghar ka sawaal nahi tha.

Ye mere Maa-Baap ki yaadon, mere ateet aur us sach ki talaash thi, jise mujhse saalon tak chhupakar rakha gaya tha.

............

[Jay Thakur]

Chapter 3 : Baarish, Dard Aur Zindagi Ki Pehli Majboori

Mera poora sharir dard se toot raha tha. Mahendra aur uske aadmiyon ki maar ab apna asar dikha rahi thi. Har kadam par sharir mein ek nayi tees uthti, lekin mere paas rukne ka koi sahara nahi tha.

Upar se bahut tez baarish ho rahi thi. Aasman se girti paani ki moti-moti boondein mere chehre aur badan par pad rahi thi. Mere kapde poori tarah bheeg chuke the aur sharir ki choton par paani padne se jalan aur badh gayi thi.

Main dard se karahte hue, ladkhadate kadmon se colony ke bahar nikla.

Kisi tarah sadak tak pahuncha toh dekha ki colony ke bahar ka market aaj lagbhag 95% band tha. Baarish ki wajah se sadkein sunsaan padi thi. Kuch ek dukaanon ke shutter aadhe khule the, lekin wahan bhi koi khaas halchal nahi thi.

Mujhe apne ghaav saaf karwane aur dard kam karne ke liye dawa ki zaroorat thi.

Main idhar-udhar nazrein daudata hua ek medical store tak pahuncha. Dukaan ke andar ghuste hi maine counter ka sahara liya aur kuch pal ke liye wahin khada hokar apni saansein sambhalne laga.

Main: "Uncle, kuch aisi medicine de dijiye, jisse mere ghaav saaf ho jaayein aur dard bhi thoda kam ho sake."

Medical store wale ne mere bheege kapdon aur choton ko dekha. Usne bina zyada sawaal kiye kuch dawa aur ghaav saaf karne ka samaan nikala aur counter par rakh diya.

Medical Store Wale: "Ye lijiye. Lekin chot zyada lag rahi hai. Ek baar doctor ko bhi dikha dijiyega."

Main: "Ji, theek hai."

Maine counter par rakhi dawaon ko dekha aur phir payment karne ke liye apna mobile nikala.

Mere jeb me laga kapda water proof the aur ye lower specially papa ne order per mere liye banwaye the..

Bahar kitna bhi pani ho, jeb me rakha saman surakshit rahta hai..

Mere haath bheegne aur dard ki wajah se theek se kaam nahi kar rahe the. Maine badi mushkil se payment app khola aur paise transfer karne ki koshish ki.

Kuch seconds baad screen par message aaya—

Payment Failed!

Maine socha, shayad network ki wajah se payment nahi hui hogi. Baarish mein network ki dikkat ho sakti thi, isliye maine dobara apna account check kiya.

Lekin account ka balance dekhte hi mere hosh ud gaye.

Available Balance: ₹0.00

Main kuch pal tak mobile ki screen ko dekhta raha. Mujhe apni aankhon par yakeen nahi ho raha tha.

Main (man hi man): "Ye kaise ho sakta hai? Mere account mein toh paise the!"

Maine transaction history check ki. Lekin us waqt mere dimaag mein ak din pahle ki ek baat achanak bijli ki tarah kaundhi.

Tau Mahendra ne mujhse ek blank cheque par sign karwaye the.

Us waqt maine un par bharosa karke bina kuch soche-samjhe sign kar diye the. 

Aakhir wo mere pita ke bhai the. Maine kabhi socha bhi nahi tha ki wo mere saath aisa kuch kar sakte hain.

Lekin ab saari baatein ek-ek karke samajh aane lagi thi.

Main (man hi man): "Saale Mahendra! Tune mujhe barbaad karne mein koi kasar nahi chhodi. Blank cheque par sign karwakar mere saare paise bhi nikaal liye!"

Mera gussa saatvein aasman par tha, lekin us waqt main kar bhi kya sakta tha?

Main wahin khada khud ko kosne laga.

Main (man hi man): "Kya bewakoofi ki maine! Pita ji ne zindagi bhar jin rishton ki izzat karna sikhaya, maine bhi unhi par aankh band karke bharosa kar liya. Ek baar bhi nahi socha ki blank cheque par sign karna kitni badi galti ho sakti hai!"

Maine ek lambi saans li aur apna wallet nikaala. Mujhe laga shayad credit card se payment ho jaayegi.

Wallet kholkar dekha toh usmein Papa ka credit card tha, jo mere istemaal ke liye linked tha.

Maine card nikaala aur counter par rakh diya.

Main: "Uncle, is card se payment karke dekhiye."

Medical store wale ne card machine mein lagaya. Kuch pal baad usne screen dekhi aur meri taraf card badha diya.

Medical Store Wale: "Sorry, dost. Ye card decline ho raha hai."

Maine hairani se uski taraf dekha.

Phir achanak yaad aaya ki Papa ke jaane ke baad unka account aur usse linked services block ho chuki thi. Shayad isi wajah se ye card bhi ab kisi kaam ka nahi raha tha.

Ab mere paas koi doosra raasta nahi tha.

Maine apne wallet ko check kiya usme mujhe apne id card's ke beech 100 rupaye ka ek note mila.

Bas, mere paas kul jama punji wahi thi—₹100.

Maine note nikaalkar counter par rakh diya.

Main: "Uncle, in sau rupayon mein jo zaroori dawa aur ghaav par lagane ke liye cream aa sakti hai, woh de dijiye."

Medical store wale ne kuch pal mujhe dekha. Phir usne dawaon mein se kuch cheezein alag ki aur unki keemat sau rupaye ke andar rakhi.

Maine paise diye aur dawaon ka packet utha liya.

Jab main un sau rupayon ko kharch kar raha tha, tab mujhe ek baat ka zara bhi ehsaas nahi hua tha ki maine subah se kuch khaya tak nahi tha.

Pet mein bhookh thi, lekin dard aur pareshani ke beech uska ehsaas jaise kahin dab gaya tha.

Mujhe ye bhi yaad nahi aaya ki wahi sau rupaye shayad kisi chhoti si dukaan se kuch khane ke liye kaam aa sakte the.

Us waqt mere liye bas itna zaroori tha ki kisi tarah apne ghaav saaf kar sakoon aur dard ko thoda kam kar sakoon.

Mene wahi medical wale se pani mangalsutra aur pain killer wagera kha lo..

Fir dawai ka packet haath mein lekar main medical store se bahar nikla.

Baarish ab bhi utni hi tez ho rahi thi. samne mujhe ak shade najar aaya jaha bethne ki jagah thi..

Main uss shade ki chhat ke neeche kuch pal ruka, ghav saaf kiye aur phir sadak ki taraf dekhne laga.

Jeb mein ab ek rupaya bhi nahi tha. Bank account khaali, credit card band aur sar par na ghar ki chhat thi, na kisi apne ka sahara.

Subah tak main ek aise ghar ka beta tha, jahan paison aur suvidhaon ki kami nahi thi.

Aur ab shaam hone se pehle hi main sadak par khada tha—bheega hua, zakhmi aur bilkul khaali haath.

Maine apne haath mein pakde dawaon ke packet ko dekha aur aankhein band kar li.

Main (man hi man): "Papa, aapke jaane ke baad sab kuch itni jaldi kaise badal gaya? Jis duniya ko main apna samajhta tha, aaj usi duniya mein mere paas dawa kharidne ke baad khane tak ke paise nahi bache."

Meri aankhon mein aansu aa gaye. Baarish ki boondein un aansuon ke saath milkar mere chehre se behne lagin.

Lekin main jaanta tha ki ab mujhe khud hi apne liye khada hona padega.

Kyunki aaj mere paas na paisa tha, na ghar aur na hi koi aisa insaan, jiske saamne main apna dard bayaan kar sakoon.

Aaj pehli baar mujhe samajh aaya ki insaan ko todne ke liye hamesha uske sharir par vaar karna 
zaroori nahi hota. Kabhi-kabhi usse uska bharosa, uski jama-punji aur uske apne log chheen lena hi kaafi hota hai.

......

[Hotgiri]

Awasome story, please add gif hot wale

[Jay Thakur]

Awasome story, please add gif hot wale

Gif add honge sahi time per, Abhi plot likh rha hun..

[Jay Thakur]

Chapter 3 : Apno Ki Asliyat — Jab Har Darwaza Band Ho Gaya

Baarish ab bhi bahut tez ho rahi thi. Main shade me beth kar bahar khada bheegi sadak ko dekh raha tha. Mere sharir ka dard badhta ja raha tha, lekin usse kahin zyada takleef mujhe is baat ki thi ki aaj mere paas koi apna nahi tha.

Mere paas na rehne ki jagah thi, na khaane ke paise aur na hi koi aisa insaan, jiske saamne main apna dard bayaan kar sakoon.

Tabhi mere dimaag mein ek khayal aaya.

Main (man hi man): "Papa ke bhai ne toh apna asli rang dikha hi diya. Lekin Papa ke aur bhi toh rishtedaar the. Unke dost the, jaan-pehchaan wale the. Papa ne kitne logon ki madad ki thi. Kya unmein se koi bhi meri madad nahi karega?"

Mujhe yaad aane laga ki Papa ne apni zindagi mein kitne logon ka saath diya tha. Kisi ko paison ki zaroorat hoti toh madad kar dete, kisi ke bachchon ki fees bhar dete, toh kabhi kisi rishtedaar ki pareshani mein bina kahe khade ho jaate.

Mere Papa ke liye paisa sirf apni suvidhaon ke liye nahi tha. Wo apne parivaar aur apne logon par dil kholkar kharch karte the.

Aur unhi apno mein meri chaaron muh boli bhuaayein bhi shamil thi. jo mere papa ke dost ki bahne thi..aur jinka papa ke sath bhai bahan saa gahra rishta tha..

Mene ak ak karke un Chaaro muh boli Bhuaon Ko Phone milane kaa man banaya..

Maine apna mobile nikala. kuchh der hawa me bethne se hath kuchh had tak sukh gye the, mobile me thoda behtar thang se pakad paa rha tha..

Maine sabse pehle apni badi bhua, Shahnaz Begum, ko call lagaya.

Shahnaz bhua mere papa ke dost ke parivaar ki sabse badi beti thi. Papa unki bahut izzat karte the. Jab bhi unhe paison ki zaroorat hoti, Papa bina zyada sawaal kiye unki madad kar dete.

Mujhe laga ki wo kam se kam meri baat toh zaroor sunengi.

Phone bajta raha.

Ek baar...

Do baar...

Paanch baar...

Lekin kisi ne phone nahi uthaya.

Maine call kaatkar dobara lagaya.

Is baar bhi koi jawaab nahi aaya.

Main (man hi man): "Shayad bhua kisi kaam mein hongi. Itni baar call dekhkar baad mein toh phone kar hi lengi."

Maine khud ko tasalli di aur doosri bhua, Nasreen Begum, ko phone lagaya.

Nasreen bhua milansaar thi. Papa jab bhi unke ghar jaate, unke liye kuch na kuch lekar zaroor jaate the. Unki zarooraton mein bhi Papa ne kai baar madad ki thi.

Maine socha, shayad wo meri baat samajhengi.

Lekin unhone bhi phone nahi uthaya.

Ab maine teesri bhua, Parveen Begum, ko call kiya.

Parveen bhua apne maamlon mein kaafi practical thi. Papa unki bhi aarthik madad karte rahe the.

Call ring hoti rahi, magar udhar se koi jawaab nahi aaya.

Aakhir mein maine chhoti bhua, Yasmeen Begum, ko phone lagaya.

Mere mann mein ab bhi ek chhoti-si ummeed thi. Wo shayad meri awaaz sunkar hi samajh jaayengi ki main kitni badi pareshani mein hoon.

Lekin unhone bhi call nahi uthaya.

Main kuch der tak mobile ki screen dekhta raha.

Chaaron bhuaon ko kai baar phone karne ke baad bhi kisi ne mujhse baat karna zaroori nahi samjha.

Mere mann mein sawaal uthne lage.

Kya unhe pata chal gaya tha ki Mahendra ne mujhe ghar se nikaal diya hai?

Kya unhe lagta tha ki main unse paise maangne ke liye phone kar raha hoon?

Ya phir unhone bhi mujhe akela chhodne ka faisla kar liya tha?

Mujhe kuch samajh nahi aa raha tha.

Maine ek baar phir Shahnaz bhua ko phone lagaya.

Is baar call uth gayi.

Main: "Hello, bhua..."

Doosri taraf kuch pal khamoshi rahi.

Shahnaz Bhua: "Ab kya hai?"

Unki awaaz sunkar main ek pal ke liye ruk gaya. Mujhe ummeed thi ki wo poochengi ki main kaisa hoon, itni baar phone kyun kar raha hoon, lekin unke lehje mein sirf chidchidapan tha.

Main: "Bhua, main hoon. Mujhe aapse kuch zaroori baat karni thi."

Shahnaz Bhua: "Dekh, mujhe kisi tarah ke jhagde mein nahi padna. Jo bhi hua hai, tum log apne beech suljhao."

Main: "Lekin bhua, meri baat toh sun lijiye. Mere saath bahut bura hua hai. Tau ne mujhe ghar se nikaal diya hai aur—"

Shahnaz Bhua (beech mein tokte hue): "Toh hum kya karein? Tumhare Tau bahut khatarnak aadmi hai. Hum tumhari madad karke apno ko jokhim me nhi daal saktey."

Mujhe unki baat sunkar aisa laga, jaise kisi ne mere andar bachi hui aakhri ummeed ko bhi kuchal diya ho.

Main: "Bhua, main aapse koi paisa nahi maang raha. Bas aapse baat karna chahta hoon. Aakhir papa apko apni sagi bahan ki tarah mante the"

Shahnaz Bhua: "Bas! Ab dobara phone mat karna. Aur humse door hi rehna."

Itna kehkar unhone phone kaat diya.

Main kuch pal mobile ko apne kaan se lagaye khada raha, jaise mujhe yakeen hi nahi ho raha tha ki unhone sach mein phone kaat diya hai.

Maine apni aankhein band ki aur ek lambi saans li.

Lekin mujhe abhi bhi baaki teen bhuaon se baat karni thi.

2. Nasreen Bhua Ka Jawaab

Maine Nasreen bhua ko dobara phone lagaya.

Is baar unhone kuch der baad call utha li.

Main: "Bhua, salam. Main aapse kuch zaroori baat karna chahta hoon."

Nasreen Bhua: "Mujhe sab pata chal gaya hai. Tumhare Tau aur tumhare beech jo bhi hua hai, usmein humein mat ghaseeto."

Main: "Lekin bhua, aapko poori baat pata bhi hai? mujhe mere ghar se nikal diya gya hai"

Nasreen Bhua: "Ghar? Ab wo tumhara ghar nahi hai. Jab tumhare Tau se baat ho chuki hai, toh baar-baar dusron ko phone karne ka kya matlab hai?"

Main: "Bhua, Papa ne aap sabke liye kitna kuch kiya tha. Jab bhi aapko zaroorat padi, unhone kabhi mana nahi kiya. Aaj main pareshani mein hoon toh kya aap meri baat bhi nahi sunengi?"

Meri awaaz bharra gayi thi.

Kuch pal ke liye doosri taraf khamoshi rahi. Mujhe laga shayad meri baat ka un par asar hua hai.

Lekin agle hi pal unka jawaab aaya.

Nasreen Bhua: "Tumhare Papa ne jo kiya, wo unki marzi thi. Humne unse zabardasti toh nahi maanga tha. Ab un baaton ko lekar hum par koi zimmedari mat daalo."

Mere paas kehne ke liye kuch nahi bacha.

Nasreen Bhua: "Aur haan, dobara phone mat karna. Humein apni zindagi mein aur koi pareshani nahi chahiye."

Call kat gayi.

Main baarish mein khada reh gaya.

Papa ne jin logon ki madad ko apna farz samjha tha, unke liye wo madad ab sirf ek purani baat thi.

3. Parveen Bhua Ka Jawaab

Maine Parveen bhua ko phone kiya.

Is baar unhone call jaldi utha li.

Parveen Bhua: "Haan, bolo. Kya chahiye?"

Unke sawaal ne hi mujhe bata diya ki wo mere phone karne ka kya matlab nikaal rahi thi.

Main: "Bhua, mujhe aapse koi cheez nahi chahiye. Main bas bahut badi mushkil mein hoon. Mujhe samajh nahi aa raha ki main kahan jaaun."

Parveen Bhua: "Dekho, seedhi baat karti hoon. Tumhare Tau ke paas property ke kaagaz hain. Agar unhone tumhe ghar se nikaala hai, toh unki koi wajah hogi."

Main: "Lekin bhua, bina meri baat sune aap kaise maan sakti hain ki Tau sahi hain? Aapko pata bhi hai ki unhone mere saath kya kiya?"

Parveen Bhua: "Mujhe is sab mein nahi padna. Main apne ghar-parivaar mein shaanti chahti hoon. Tum apna maamla khud dekho."

Main: "Toh aap meri madad bhi nahi karengi?"

Parveen Bhua: "Maine kaha na, mujhe is maamle se door rakho. humara tumse koi khun kaa rishta nhi hai jo tum itna hak jata rhe ho Aur mere ak baat kaan khol kar suno Jay, aage se phone mat karna."

Unhone bhi call kaat diya.

Mere haath mein mobile tha, lekin ab use pakadne ki bhi himmat nahi ho rahi thi.

Main apne hi rishton ke saamne khud ko itna akela kabhi mehsoos nahi kiya tha.

4. Yasmeen Bhua Ka Aakhri Jawaab

Ab sirf Yasmeen bhua bachi thi.

Wo mere papa ke dost ko chhoti bahan thi aur meri chhoti bhua thi. Bachpan mein jab bhi wo hamare ghar aati thi, main unke saath waqt bitaya karta tha. Mujhe yaad tha ki Papa unke liye bhi kitni baar paise bhejte the.

Maine unhe phone lagaya.

Kaafi der tak ring hoti rahi.

Phir achanak call uth gayi.

Main: "Bhua..."

Yasmeen Bhua: "Haan, bolo."

Main: "Bhua, main bahut pareshani mein hoon. Aaj Tau ne mujhe ghar se nikaal diya. Mere paas paise bhi nahi hain aur—"

Yasmeen Bhua: "Tumhe kya lagta hai, sirf tumhare paas hi pareshani hai? Hamari bhi apni zindagi hai."

Main: "Bhua, main aapse kuch maang nahi raha. Bas chahta hoon ki koi meri baat sun le. Main subah se bhooka hoon, baarish mein bheeg raha hoon aur mere paas jaane ke liye koi jagah nahi hai."

Meri awaaz ab kaanp rahi thi.

Mujhe laga, shayad meri haalat sunkar unka dil pighal jaayega.

Lekin unhone jo kaha, usne mujhe andar tak tod diya.

Yasmeen Bhua: "Dekho, mujhe tumse koi baat nahi karni. Tum apne Tau ke saath apna maamla suljhao. Aur aage se humein phone mat karna."

Main: "Bhua, main aapka bhatija hoon..."

Yasmeen Bhua: "Maine sun liya. tum mere muh bole bhatije ho, Ab dobara call mat karna aur humse door raho."

Call kat gayi.

Main kuch der tak wahi betha raha.

Mere chaaron bhuaon mein se kisi ne bhi meri baat sunne tak ki zaroorat nahi samjhi thi.

Kisi ne nahi poochha ki mujhe kitni chot lagi hai.

Kisi ne nahi poochha ki maine kuch khaya hai ya nahi.

Aur kisi ne ye bhi nahi kaha ki beta, ghabrao mat, hum hain na.

Chaaron ka jawaab ek hi tha—dobara call mat karna aur humse door rehna.

Maine apna mobile neeche kar liya. Meri aankhon mein aansu aa gaye, lekin main unhe ponchhne ki bhi koshish nahi kar raha tha.

.........

[Kasif]

Very nice story

[Jay Thakur]

Chapter 4: Bharose Ka Aakhri Rishta — Jab Majboori Jeet Gayi

Baarish ab bhi lagataar ho rahi thi. Main abhi bhi shade ke neeche baitha hua tha. Mere kapde ab tak geele the, sharir mein dard tha aur pet subah se khaali tha. Haath mein dawai thi, lekin dimaag mein bas ek hi sawaal ghoom raha tha—Aakhir main madad maangne kiske paas jaaun?

Maine apne mobile contacts mein Papa ke kuch purane jaan-pehchaan walon ke naam dekhne laga. Lekin tabhi mere dimaag mein ek shakhs ka khayal aaya.

Raza Ahmad Khan.

Raza uncle Papa ke sirf dost nahi the, balki dono ke beech sage bhaiyon jaisa rishta tha. Dono ne saalon tak ek-doosre ka saath diya tha. Raza uncle ki chaar behne—Shahnaz Begum, Nasreen Begum, Parveen Begum aur Yasmeen Begum—bhi mere Papa ke bahut kareeb thi. Unhi chaaron ko main apni muh boli bhua maanta tha. Jinhone aaj mujhse muh mod liya tha..

Papa ne kai baar Raza uncle ki aarthik madad ki thi. Jab unke business mein mushkil waqt aaya tha, tab bhi Papa unke saath khade rahe the. Unki company mein bhi Papa ne apni taraf se laakhon rupaye invest kiye the, taaki unka kaam aage badh sake.

Mujhe yaad tha ki Papa aksar unke baare mein kaha karte the—

Papa: "Jay, zindagi mein dost bahut milenge, lekin Raza jaisa dost milna mushkil hai. Usne mere saath har bure waqt mein kandhe se kandha milakar khada rehna seekha hai. Main bhi uske liye kabhi peeche nahi hatunga."

Papa ki ye baat yaad aate hi mere andar ek nayi ummeed jagi.

Main (man hi man): "Haan, main Raza uncle ko phone kyun nahi karta? Wo toh Papa ko apna saga bhai maante the. Unhone Papa ke saath itne saal bitaye hain. Wo mujhe is haalat mein zaroor samjhenge."

Maine bina der kiye unka number nikala aur call laga di.

Phone ki ghanti bajne lagi.

Ek baar...

Do baar...

Teesri baar ghanti bajte hi call uth gayi.

Raza Ahmad Khan: "Assalaamualaikum, Jay beta?"

Unki awaaz sunkar mujhe pehli baar laga ki shayad ab sab theek ho sakta hai.

Main: "Walaikum assalam, Raza uncle."

Raza Ahmad Khan: "Haan beta, bolo. Kya hua? Is waqt phone kaise kiya?"

Meri awaaz bharra gayi. Maine khud ko sambhalte hue kaha—

Main: "Uncle, main bahut badi pareshani mein hoon. Tau Mahendra ne mujhe ghar se nikaal diya hai. Unke aadmiyon ne mere saath maarpeet bhi ki. Main abhi market mein ek medical store ke paas hoon. Baarish ho rahi hai aur mere paas na rehne ki jagah hai, na paise."

Doosri taraf kuch pal ke liye khamoshi chha gayi.

Mujhe laga, shayad wo meri baat sunkar pareshaan ho gaye hain.

Main: "Uncle, mujhe samajh nahi aa raha ki main kya karun. Maine aapki behnon, apni chaaron muh boli bhuaon ko bhi phone kiya tha, lekin unhone bhi mujhse baat karne se mana kar diya. Aap toh Papa ke sabse kareebi dost rahe hain. Aap hi bataiye, main ab kiske paas jaaun?"

Meri baat sunkar Raza uncle ne ek gehri saans li.

Raza Ahmad Khan: "Jay beta, teri haalat sunkar mujhe bahut bura lag raha hai. Lekin..."

Wo beech mein hi ruk gaye.

Unke lehje mein aayi tabdeeli ko main mehsoos kar sakta tha.

Main: "Lekin kya, uncle?"

Raza Ahmad Khan: "Jay, main chahkar bhi teri koi madad nahi kar sakta."

Mujhe laga jaise maine kuch galat sun liya ho.

Main: "Kya matlab, uncle? Main aapse paise nahi maang raha. Mujhe bas kuch waqt ke liye sahara chahiye. Main aapke ghar aa sakta hoon. Jab tak main apne pairon par khada nahi ho jaata, tab tak..."

Raza Ahmad Khan (beech mein tokte hue): "Jay, meri baat samajhne ki koshish kar. Mere khud ke laakhon rupaye company mein phase pade hain. Wo paise tere Papa ne mujhe business ke liye diye the. Unhi paison se maine apna kaam badhaya tha."

Main chupchaap unki baat sunta raha.

Raza Ahmad Khan: "Agar main is waqt teri madad karta hoon, toh Mahendra se mera bhi jhagda ho sakta hai. Meri company par asar padega. Jo kuch maine saalon ki mehnat se khada kiya hai, wo sab khatam ho sakta hai. Main apna sab kuch daav par nahi laga sakta, Jay."

Mere haath mein pakda mobile dheere-dheere neeche hone laga.

Main: "Uncle, main aapko kisi jhagde mein nahi daal raha. Main toh bas aapse apnapan maang raha hoon. Papa aapko apna saga bhai maante the. Unhone aap par bharosa karke apni kamai ka ek bada hissa aapke business mein lagaya tha."

Meri awaaz mein dard tha.

Main: "Aaj Papa nahi hain. Main unka beta hoon. Mujhe laga tha ki aap kam se kam meri baat sunenge. Aap mujhe kuch din apne paas rakh lenge, toh main apni zindagi dobara sambhalne ki koshish kar sakta hoon."

Doosri taraf phir khamoshi chha gayi.

Kuch pal baad Raza uncle bole—

Raza Ahmad Khan: "Jay, main teri majboori samajhta hoon. Lekin meri bhi majboori hai. Main apni family ko khatre mein nahi daal sakta. Mahendra se mera koi seedha jhagda nahi hai. Main uske maamle mein padkar apna business barbaad nahi kar sakta."

Maine aankhein band kar li.

Main: "Toh aap bhi meri madad nahi karenge, uncle?"

Is baar meri awaaz bahut dheemi thi.

Raza Ahmad Khan: "Jay beta, mujhe maaf kar de. Main chahkar bhi tere liye kuch nahi kar sakta."

Maine aakhri baar unse ek sawaal poochha.

Main: "Uncle, agar aaj Papa zinda hote aur aap is haalat mein hote, toh kya wo bhi aapko yahi jawaab dete?"

Meri baat sunkar wo kuch nahi bole.

Main kuch der tak phone kaan se lagaye raha. Shayad mujhe ummeed thi ki wo apni baat badal denge. Shayad wo kahenge ki beta, tu yahin aa ja, baaki sab baad mein dekh lenge.

Lekin aisa kuch nahi hua.

Raza Ahmad Khan: "Jay, mujhe jaana hoga. Apna khayal rakhna."

Aur call kat gayi.

 Aakhri Ummeed Bhi Toot Gayi

Main mobile ko dekhta reh gaya.

Baarish ki awaaz pehle se zyada tez mehsoos hone lagi thi. Sadak par gaadiyan guzar rahi thi, log apne-apne gharon ki taraf ja rahe the. Lekin mere liye jaise duniya wahin ruk gayi thi.

Maine apne mobile mein Papa ki tasveer kholi.

Tasveer mein Papa muskura rahe the. Unke chehre par wahi sukoon tha, jo mujhe bachpan se yaad tha.

Main (man hi man): "Papa, aapne jinhe apna saga bhai maana, aaj unhone bhi mujhe akela chhod diya. Aapne unki madad ki, unke business mein paise lagaye, un par bharosa kiya. Lekin aaj jab aapka beta unke saamne madad ke liye khada hai, toh unhe apna business yaad aa raha hai."

Meri aankhon se aansu nikal aaye.

Main (man hi man): "Kya paisa insaan ke liye rishton se bhi bada ho jaata hai? Kya saalon ka apnapan itna kamzor hota hai ki mushkil waqt aate hi khatam ho jaata hai?"

Maine apni peeth deewar se tika di.

Ab mujhe kisi se koi shikayat karne ka mann nahi tha. Main bas thodi der khamosh rehna chahta tha.

Lekin us khamoshi mein bhi ek sach baar-baar mere dimaag mein goonj raha tha—

Mahendra ne mujhe mere ghar se nikala tha, lekin mere apno ne,  jinhe mere papa apna samjhte the unhone mujhe apne dilon se nikaal diya tha.

.......

[Jay Thakur]

Chapter 4: Apno Ki Asliyat — Jab Har Darwaza Band Ho Gaya


Baarish ab bhi bahut tez ho rahi thi. Main abhi bhi shade ke neeche baitha hua tha. Mere sharir ka dard badhta ja raha tha, lekin usse kahin zyada takleef mujhe is baat ki thi ki aaj mere paas koi apna nahi tha.

Maine apni zindagi mein kabhi nahi socha tha ki ek din aisa bhi aayega, jab mujhe apne hi rishtedaaron ke saamne madad ke liye haath failana padega.

Lekin aaj haalaat mere haath se nikal chuke the.

Papa ke dost Raza Ahmad Khan se bhi baat ho chuki thi. Wo bhi apni company aur parivaar ka hawala dekar meri madad karne se mana kar chuke the.

Maine kuch der tak apne mobile ki screen ko dekha. Mann mein ek baar phir khayal aaya ki kyun na Maa ke mayke walon se madad maangi jaaye?

Mujhe pata tha ki Maa ne Papa se apni marzi se shaadi ki thi aur isi wajah se unke mayke walon se hamare rishte achhe nahi the. Lekin phir bhi, aakhir wo Maa ke apne bhai-behen the. Main unka bhanja tha.

Main (man hi man): "Ek baar aur koshish kar leta hoon. Kya pata Mama ya Mosi mein se kisi ka dil pighal jaaye. Main unse koi daulat nahi maang raha. Bas thoda sa sahara chahiye, taaki apni zindagi dobara shuru kar sakoon."

Maine apne aansu ponchhe, mobile ko mazbooti se pakda aur sabse pehle apne bade Mama ko phone lagaya.

1. Bade Mama Ka Jawaab

Kaafi der tak phone bajta raha. Aakhirkaar call uth gayi.

Bade Mama: "Haan, kaun bol raha hai?"

Unki awaaz sunkar mujhe ek pal ke liye ajeeb laga. Shayad unhone mera number pehchana nahi tha.

Main: "Mama, main Jay bol raha hoon. Maa ka beta."

Doosri taraf kuch pal khamoshi rahi.

Bade Mama: "Achha, bolo. Kya baat hai?"

Maine apni haalat samjhane ki koshish ki.

Main: "Mama, main bahut badi mushkil mein hoon. Tau Mahendra ne mujhe ghar se nikaal diya hai. Unke aadmiyon ne mere saath maarpeet bhi ki. Ab mere paas na rehne ki jagah hai aur na hi paise bache hain."

Bade Mama: "Toh hum kya kar sakte hain?"

Unka ye sawaal sunkar main kuch pal chup ho gaya.

Mujhe ummeed thi ki wo kam se kam meri haalat ke baare mein poochhenge, lekin unki awaaz mein kisi tarah ki chinta nahi thi.

Main: "Mama, main aapse bas thode samay ke liye sahara maang raha hoon. Main aapke ghar rehkar apne pairon par khada hone ki koshish karunga. Jaise hi mujhe koi kaam mil jaayega, main apna intezaam kar loonga."

Bade Mama: "Jay, tumhari Maa ne jab apni marzi se shaadi ki thi, tab unhone hamari baat nahi maani. Ab itne saalon baad tumhe hamari yaad kaise aa gayi?"

Maine apni aankhein band kar li.

Main: "Mama, Maa ne jo bhi kiya, wo unka faisla tha. Lekin maine toh aap logon ka kabhi kuch nahi bigaada. Main toh aapka bhanja hoon."

Bade Mama: "Lekin tum usi ke bete ho. Humne pehle hi faisla kar liya tha ki hum uske maamle mein nahi padenge. Ab tum bhi humein is sab mein mat ghaseeto."

Main: "Mama, main Maa ki taraf se maafi maangta hoon. Mujhe nahi pata ki unke aur aap logon ke beech kya hua tha, lekin is waqt mujhe sach mein aapki zaroorat hai."

Meri awaaz bharra gayi thi.

Kuch pal ke liye doosri taraf khamoshi rahi. Maine socha, shayad meri baat unke dil tak pahunch gayi hai.

Lekin phir unka jawaab aaya.

Bade Mama: "Is baare mein aur koi baat nahi hogi. Dobara phone mat karna."

Aur unhone call kaat diya.

Main mobile ko dekhta reh gaya.

Jis rishte se maine bahut kam ummeed rakhi thi, usi rishte se bhi mujhe wahi jawaab mila tha.

...........

[Jay Thakur]

 2. Chhote Mama Ka Inkaar

Maine kuch der tak khud ko sambhala. Phir chhote Mama ko phone lagaya.

Mujhe pata tha ki wo bade Mama se zyada baat nahi karte the, lekin phir bhi mann mein ek chhoti-si ummeed thi.

Chhote Mama: "Haan, bolo."

Main: "Mama, mujhe aapse zaroori baat karni hai. Main bahut badi musibat mein hoon."

Chhote Mama: "Kaisi musibat?"

Maine unhe poori baat samjhayi. Bataya ki Tau ne mujhe ghar se nikaal diya hai, mere bank account mein paise nahi bache aur main baarish mein bheegta hua idhar-udhar bhatak raha hoon.

Lekin meri baat poori hone se pehle hi unhone kaha—

Chhote Mama: "Dekho, mujhe tumhare ghar ke maamle mein nahi padna. Aur tumhari Maa ne jo faisla liya tha, uska nateeja ab tum log bhugto."

Main: "Mama, Maa ne jo bhi kiya, usmein mera kya kasoor hai? Main toh us waqt paida bhi nahi hua tha."

Chhote Mama: "Mujhe koi behas nahi karni. Mere apne kharche hain, meri apni zimmedariyan hain. Main tumhe apne ghar nahi bula sakta."

Main: "Maine aapse paise bhi nahi maange, Mama. Main toh bas kuch din ke liye rehne ki jagah maang raha hoon. Main aapko koi pareshani nahi doonga."

Chhote Mama: "Bas, ab aur nahi. Mujhe dobara phone mat karna."

Call kat gayi.

Main apne mobile ko dekhta raha. Mujhe samajh nahi aa raha tha ki aakhir apne hi khoon ke rishte itne begaane kaise ho sakte hain.

...........

[Jay Thakur]

3. Badi Mosi Ka Tiraskaar

Ab maine apni badi Mosi ko phone lagaya.

Maa ke saath unke rishte pehle se hi kharaab the. Phir bhi mujhe laga ki shayad wo apni behen ke bete ke liye thoda sa apnapan dikha dein.

Phone uth gaya.

Badi Mosi: "Haan, kya baat hai?"

Main: "Mosi, main Jay bol raha hoon. Main bahut pareshani mein hoon. Mujhe aapki madad chahiye."

Badi Mosi: "Ab kya hua?"

Maine unhe apni haalat batai. Lekin meri baat sunkar unka lehja aur sakht ho gaya.

Badi Mosi: "Tumhari Maa ne apni marzi se apna parivaar chhoda tha. Ab tum humse kis rishte ki ummeed lekar phone kar rahe ho?"

Main: "Mosi, aap meri Maa se naraaz ho sakti hain, lekin main toh aapka bhanja hoon. Maine aapka kya bigaada hai?"

Badi Mosi: "Mujhe purani baatein yaad mat dilao. Main tumhari koi madad nahi kar sakti. Apna maamla khud dekho aur aage se phone mat karna."

Main: "Mosi, meri baat toh poori sun lijiye..."

Lekin tab tak call kat chuki thi.

Main kuch der tak mobile ko dekhta raha. Mere paas kehne ke liye bahut kuch tha, lekin sunne wala koi nahi tha.

........

[Jay Thakur]

4. Chhoti Mosi Ka Aakhri Jawaab

Ab sirf chhoti Mosi bachi thi.

Maine unhe phone lagaya. Is baar call uthte hi maine bina der kiye apni haalat batani shuru kar di.

Main: "Mosi, please meri baat poori sun lena. Main bahut mushkil mein hoon. Mere paas na rehne ki jagah hai, na paise. Main subah se kuch kha bhi nahi paaya hoon."

Doosri taraf kuch pal ki khamoshi rahi.

Mujhe laga, shayad wo meri baat samajhne ki koshish kar rahi hain.

Lekin phir unka jawaab aaya.

Chhoti Mosi: "Tumhari Maa ko jab apne bhai-behen ki zaroorat thi, tab unhone apni marzi ko sabse upar rakha. Ab humse ummeed mat rakho."

Main: "Mosi, main aapse koi hisaab nahi maang raha. Main bas apna samajhkar phone kar raha hoon. Mujhe nahi pata ki Maa aur aap logon ke beech kya hua tha. Lekin main aapka bhanja hoon."

Chhoti Mosi: "Toh ab apne aap hi apni pareshani suljhao. Mujhe is maamle mein mat ghaseeto."

Main: "Mosi..."

Chhoti Mosi: "Dobara phone mat karna."

Call kat gayi.

Main kuch der tak wahi baitha raha.

Mere chaaron Mama-Mosiyon mein se kisi ne bhi meri baat sunne tak ki zaroorat nahi samjhi thi.

Kisi ne nahi poochha ki mujhe kitni chot lagi hai.

Kisi ne nahi poochha ki maine kuch khaya hai ya nahi.

Aur kisi ne ye bhi nahi kaha ki beta, ghabrao mat, hum hain na.

...........

[Jay Thakur]

Chapter 5: Aakhri Teen Ummeedein — Ek Anjaan Raaste Ka Safar

Aaj ek hi din mein maine apne rishton ki asli sachchai dekh li thi.

Tau Mahendra ne mujhe ghar se nikaal diya tha. Chaaron muh boli bhuaon ne mujhse door rehne ko keh diya tha. Maa ke mayke walon ne bhi madad karne se inkaar kar diya tha. Aur Papa ke sabse kareebi dost Raza Ahmad Khan bhi apni majboori ka hawala dekar peeche hat gaye the.

Maine apna mobile nikala aur uski screen par nazar daali.

Main (man hi man): "Ab aakhir kiske paas jaaun? Kaun hai jo is waqt meri baat sunega? Kya meri zindagi mein koi ek insaan bhi nahi bacha, jise main apna keh sakoon?"

Kuch der tak main khamosh raha. Phir achanak mere dimaag mein teen chehre ubharne lage.

Mere do jigri dost aur Papa ke ek purane wafadaar naukar.

Riyadh, Amarjeet aur Jamil Chacha.

Mere paas ab bas yahi teen aakhri ummeedein bachi thi.

1. Riyadh — Mera Jigri Dost

Sabse pehle mujhe Riyadh ki yaad aayi.

Riyadh mera bahut kareebi dost tha. Humne saath mein kai achhe aur bure waqt dekhe the. Main jaanta tha ki wo meri baat zaroor sunega. Agar uske bas mein hua, toh wo meri madad karne se peeche nahi hatega.

Maine turant uska number milaya.

Phone ki ghanti bajne lagi.

Ek baar...

Do baar...

Teesri baar call uth gayi.

Riyadh: "Haan bhai, bol! Kahan hai tu? Teri awaaz aisi kyun lag rahi hai?"

Uski awaaz sunte hi mere andar daba hua dard jaise bahar aane ko bechain ho gaya.

Main: "Bhai, main bahut buri tarah phans gaya hoon."

Riyadh: "Kya hua? Aaram se bata. Koi dikkat ho gayi hai kya?"

Maine use subah se lekar ab tak ki saari baat bata di. Mahendra ke saath hui behas, uske aadmiyon ki maarpeet, bungalow se nikaale jaane aur mere bank account ke khaali ho jaane tak—sab kuch.

Riyadh kuch der tak khamoshi se meri baat sunta raha.

Phir uski awaaz mein gussa saaf sunai dene laga.

Riyadh: "Bhai, ye Mahendra Tau apne aap ko samajhta kya hai? Tere saath aisa kaise kar sakta hai? Tu fikar mat kar, main hoon na!"

Uske ye shabd sunkar mujhe pehli baar laga ki shayad main abhi poori tarah akela nahi hua hoon.

Main: "Bhai, mujhe abhi samajh nahi aa raha ki main kahan jaaun. Mere paas paise nahi hain, rehne ki jagah nahi hai. Sharir mein itna dard hai ki theek se chala bhi nahi ja raha."

Riyadh: "Tu mere paas aa ja. Hum kuch na kuch intezaam kar lenge."

Mere chehre par halki-si ummeed aayi.

Main: "Sach mein, bhai?"

Riyadh: "Haan, bilkul. Tu mera dost hai. Main tujhe aise kaise chhod sakta hoon?"

Lekin kuch hi pal baad uski awaaz badal gayi.

Riyadh: "Ek minute ruk, main Ammi se baat karta hoon. Unhe bata deta hoon ki tu kuch din hamare yahan rahega."

Usne phone par mujhe hold par rakha.

Main shade ke neeche khada baarish ko dekhta raha. Dil mein pehli baar ek chhoti-si rahat mehsoos hui. Mujhe laga ki ab kam se kam aaj ki raat guzaarne ke liye ek chhat toh mil jaayegi.

Lekin kuch der baad Riyadh call per wapas aaya.

Riyadh: "Bhai..."

Uski awaaz mein ab pehle jaisa bharosa nahi tha.

Main: "Kya hua?"

Riyadh: "Ammi keh rahi hain ki abhi tujhe yahan nahi bula sakte."

Main kuch pal chup raha.

Main: "Kyun? Kya hua, bhai?"

Riyadh: "Unhe darr hai ki Mahendra Tau tere chakkar mein hamare ghar tak aa sakte hain. Unka kehna hai ki hum kisi ke parivaar ke jhagde mein nahi pad sakte. Tu samajhne ki koshish kar."

Maine apne honthon ko bheench liya.

Main: "Riyadh, main tere ghar koi jhagda karne nahi aa raha. Mujhe bas kuch din ka sahara chahiye. Main kisi ko pareshan nahi karunga."

Riyadh: "Bhai, main samajhta hoon. Main khud chahta hoon ki tu yahan aa jaaye. Lekin Ammi bilkul nahi maan rahi hain. Main unke khilaaf jaakar tujhe nahi bula sakta."

Uski baat sunkar mere andar kuch toot gaya.

Mujhe Riyadh se shikayat nahi thi. Main jaanta tha ki wo meri madad karna chahta tha. Lekin uski chahat aur uske haalaat ke beech uski Ammi ka faisla khada tha.

Main: "Theek hai, bhai. Tu pareshan mat ho. Main kuch na kuch kar loonga."

Riyadh: "Bhai, bura mat maanna. Agar koi aur tareeka mila, toh main tujhe bataunga."

Main: "Haan, theek hai."

Maine phone kaat diya. mene usse kuchh paise bhi nhi mange, kyun ki meri ummeed jawab de rhi thi..

Riyadh mera dost tha. Usne mera saath chhodna nahi chaha tha, lekin wo bhi mere liye apne ghar ke darwaze nahi khol saka.

Maine ek gehri saans li aur doosre dost ka number dhoondhne laga.

 2. Amarjeet — Doosri Aakhri Ummeed

Amarjeet mera ek aur azeez dost tha.

Uske saath bhi mera rishta sirf dosti tak simit nahi tha. Hum ek-doosre ki pareshani samajhte the aur mushkil waqt mein ek-doosre ke liye khade hone ki baat karte the.

Maine uska number milaya.

Amarjeet: "Oye Jay! Kya haal hai, veere?"

Uski awaaz mein wahi apnapan tha, jo mujhe hamesha achha lagta tha.

Lekin meri awaaz sunkar wo turant gambhir ho gaya.

Amarjeet: "Oye, tu theek toh hai? Awaaz kyun kaanp rahi hai teri?"

Main: "Yaar, kuch bhi theek nahi hai."

Maine use bhi apni poori kahani suna di. Jaise-jaise main batata gaya, meri awaaz bhaari hoti gayi.

Amarjeet: "Ki? Mahendra ne tenu ghar ton bahar kadd ditta? Te tere naal maarpeet vi karwayi?"

Main: "Haan, yaar. Ab samajh nahi aa raha ki kya karun. Sabse madad maang li, lekin kisi ne saath nahi diya."

Amarjeet kuch pal ke liye khamosh ho gaya.

Phir usne kaha—

Amarjeet: "Veere, tu tension na lai. Main haan na tere naal. Tu mere ghar aa ja. Baaki gallan baad vich dekhange."

Uski baat sunkar mere dil ko thoda sukoon mila.

Main: "Yaar, main tere ghar aa sakta hoon? Main sach mein bahut buri haalat mein hoon."

Amarjeet: "Bilkul aa sakda ae. Tu mera veer ae. Main tenu aise thodi chhad sakda haan!"

Uski awaaz mein sachcha apnapan tha.

Mujhe laga ki shayad meri mushkilein ab thodi kam ho jaayengi.

Lekin phir Amarjeet ne kaha ki wo apni Mummy se baat karke mujhe bataata hai.

Main phir se intezaar karne laga.

Kuch der baad uska phone aaya.

Amarjeet: "Jay veere..."

Main: "Haan, bol."

Amarjeet: "Yaar, Mummy nahi maan rahi hain."

Mere chehre par aayi halki-si muskurahat dheere-dheere gayab ho gayi.

Main: "Kya matlab?"

Amarjeet: "Mummy keh rahi hain ki tere Tau se panga lena theek nahi hoga. Unhe darr hai ki tere yahan rehne se hamare ghar mein bhi koi dikkat aa sakti hai. Main unhe samjha raha hoon, par wo sun nahi rahi."

Main: "Yaar, main toh bas kuch din tere paas rehna chahta hoon. Main tere ghar mein koi dikkat nahi hone doonga."

Amarjeet: "Main jaanta hoon, veere. Main khud chahta hoon ki tu mere paas aa jaaye. Par Mummy ne saaf mana kar diya hai."

Uski awaaz dheemi ho gayi.

Amarjeet: "Tu bura mat maanna. Main tere naal haan, par ghar mein rehne ke maamle mein main kuch nahi kar paa raha."

Maine aankhein band kar li.

Main: "Theek hai, yaar. Tu fikar mat kar. Main dekh loonga."

Amarjeet: "Jay, je kise cheez di lod hove, mainu dassin. Main apni tarafon jo ho sakega, karanga."

Main: "Haan, bhai. Shukriya."

Call kat gayi.

Maine mobile apni jeb mein rakh liya.

Mere dono dost meri madad karna chahte the. Dono ne meri baat samjhi thi, dono ko meri haalat ka dukh tha. Lekin unke gharon mein mere liye jagah nahi thi.

Ab mere paas na koi rishtedaar bacha tha, na koi dost jiske ghar main jaakar raat guzaar sakoon.

Lekin tabhi mere dimaag mein teesra naam ubhra.

Jamil Chacha.

 3. Jamil Chacha — Papa Ke Purane Wafadaar Naukar

Jamil Chacha mere Papa ke bahut purane naukar the.

Wo saalon tak Papa ke saath rahe the. Unhone hamare parivaar ko kareeb se dekha tha aur mere bachpan ki kai yaadon ka hissa bhi the.

Papa un par bahut bharosa karte the. Wo unhe sirf ek naukar nahi, balki apne ghar ka wafadaar insaan maante the.

Mujhe yaad aaya ki Papa ne ek baar Jamil Chacha ko das acre zameen unke naam par dilwayi thi. Ye zameen hamare shehar se lagbhag 150 kilometer door ek gaon mein thi.

Us waqt main Papa ke saath wahan picnic manane do baar gaya tha.

Mujhe wahan ka raasta poori tarah yaad nahi tha, lekin us jagah ki kuch tasveerein mere dimaag mein ab bhi basi hui thi—gaon ki taraf jaati sadak, kheton ke beech ka raasta aur Jamil Chacha ka ghar.

Sabse badi baat ye thi ki Tau Mahendra ko is zameen ke baare mein pata nahi tha.

Na hi use maloom tha ki Jamil Chacha wahan rehte hain.

Aur shehar se itni door hone ke kaaran, Mahendra ke liye aasaani se wahan pahunchkar mujhe dhoondhna bhi mushkil hota.

Lekin ek badi pareshani thi.

Mere paas Jamil Chacha ka phone number nahi tha.

Maine apne mobile ke contacts mein unka naam dhoondha. Purane messages dekhe. Papa ke kuch purane contacts mein bhi nazar daali.

Lekin unka number kahin nahi mila.

Maine niraash hokar mobile neeche kar liya.

Main (man hi man): "Jamil Chacha, aapka number hota toh main abhi aapko phone kar leta. Pata nahi aap ab bhi usi gaon mein rehte hain ya kahin aur chale gaye. Lekin mere paas ab aapke siwa koi aur raasta bhi toh nahi hai."

Maine apne dimaag par zor diya aur us gaon ki jagah yaad karne ki koshish ki, jahan main Papa ke saath gaya tha.

Mujhe yaad aaya ki Papa gaadi se mujhe lekar gaye the. Raaste mein humne ek bade mod se gaon ki taraf rukh kiya tha. Aage kuch door tak kheton ke beech se sadak guzarti thi.

Uske baad ek chhota-sa gaon aata tha.

Wahin Jamil Chacha ki zameen thi.

Mujhe raaste ki har baat yaad nahi thi, lekin itna zaroor yaad tha ki agar main us taraf pahunch gaya, toh shayad logon se poochhkar unka ghar dhoondh sakta tha.

Main (man hi man): "Papa ne unhe das acre zameen dilwayi thi. Wo itne saal hamare saath rahe. Unhone Papa ka achha-bura waqt dekha hai. Shayad wo hi ek aise insaan hain, jo mujhe dekhkar darwaza band nahi karenge."

Maine ek baar phir apne bheege kapdon aur dard se bhare sharir ki taraf dekha.

Mujhe pata tha ki 150 kilometer ka safar aasaan nahi hoga.

Wo bhi paidal. yaa kisi se lift lena...

Wo bhi is tez baarish mein.

Lekin mere paas koi doosra raasta nahi tha.

..........

[Jay Thakur]

4. Ek Faisla — Shehar Chhodne Ka

Meri ak aadat thi ki me normally life me hone wale bade fer badal yaa ghatna ko apne mobile ke notepad me likhta tha..

Uss din bhi mene shade chodne se pahle, ak ak ghatna ko bariki se usme likha, uske baad mobile ko jeb me rakha aur Main shade ke neeche se bahar nikla.

Baarish ki boondein mere chehre par padne lagi. Maine apni jeb mein rakha mobile check kiya aur use sambhaal kar rakh liya.

Mere paas kuch dawaayein thi, ek khaali hota hua mobile aur zindagi mein aage badhne ki ek chhoti-si ummeed.

Maine shehar ki taraf aakhri baar dekha.

Isi shehar mein mera bachpan beeta tha. Isi shehar mein mera ghar tha. Isi shehar mein mere Papa ne apni zindagi ke saalon ki mehnat se sab kuch khada kiya tha.

Lekin aaj isi shehar mein mere liye koi jagah nahi bachi thi.

Maine apne mann mein ek faisla kiya.

Main (man hi man): "Ab main yahan nahi rukunga. Jamil Chacha tak pahunchna hi hoga. Chahe raaste mein kitni bhi mushkilein kyun na aayein, mujhe un tak pahunchna hai."

Maine apne kadam gaon ki taraf badha diye.

Shuruaat mein main dheere-dheere chal raha tha. Sharir ka dard har kadam par mehsoos ho raha tha. Kabhi kisi chot mein tez jalan uthti, toh kabhi pair ladkhada jaate.

Baarish ki wajah se sadak par paani jama tha. Gaadiyan tez raftaar se guzar rahi thi aur unke tyre se uchhalta paani mere kapdon ko aur bhigo deta.

Main kabhi sadak ke kinaare chalta, kabhi kisi dukaan ki chhat ke neeche kuch pal rukkar saans leta aur phir dobara chal padta.

Mujhe bhookh lagi thi.

Bahut tez bhookh.

Lekin mere paas ab khana kharidne ke paise nahi the.

Medical store par jo sau rupaye the, wo dawaon par kharch ho chuke the. Bank account khaali tha aur credit card bhi kisi kaam ka nahi raha tha.

Main apne aap ko bas ek hi baat samjha raha tha—

Main (man hi man): "Bas Jamil Chacha tak pahunchna hai. Ek baar unke paas pahunch gaya, toh shayad mujhe kuch din ka sahara mil jaayega. Uske baad main apni zindagi dobara sambhal loonga."

Raaste mein kai baar mere mann mein khayal aaya ki kisi gaadi se lift maang loon. Lekin baarish aur andhere mein koi bhi gaadi mere liye nahi ruki.

Kuch log apni gaadiyon mein baithe mujhe dekhkar aage nikal jaate. Kuch ko shayad meri haalat dikhti bhi nahi thi.

Main chalta raha.

Mujhe nahi pata tha ki is safar mein kitna waqt lagega, raaste mein kya mushkilein aayengi aur Jamil Chacha mujhe mil bhi paayenge ya nahi.

Lekin ab mere paas ummeed karne ke liye sirf wahi ek naam bacha tha.

Jamil Chacha.

Papa ne unhe das acre zameen dilwayi thi. Shayad Papa ne kabhi socha bhi nahi hoga ki ek din unka beta usi zameen ke paas panah dhoondhne ke liye is tarah niklega.

Maine apni bheegi aankhon se aage jaati sadak ko dekha aur kadam badha diye.

Shehar ki roshni dheere-dheere peeche chhoot rahi thi.

Aur main, zindagi mein pehli baar, bina paise, bina sahare aur bina kisi pakke thikaane ke, tez baarish mein 150 kilometer door ek anjaan manzil ki taraf paidal chal pada.

Mujhe nahi pata tha ki Jamil Chacha tak pahunchkar meri zindagi badlegi ya nahi. Lekin itna zaroor jaanta tha ki agar maine abhi chalna band kar diya, toh mere paas khone ke liye bacha hua aakhri sahara bhi khatam ho jaayega.

..........

[Jay Thakur]

Chapter 5: Aakhri Ummeed — Anjaan Raaste Par Aghori Baba Se Mulaqat


Baarish ab bhi rukne ka naam nahi le rahi thi.

Main sadak ke kinaare ladkhadate kadmon se aage badh raha tha. Mere kapde poori tarah bheeg chuke the aur sharir mein hone wala dard ab bardasht se bahar hota ja raha tha. Mahendra aur uske aadmiyon ki maar ka asar ab saaf mehsoos hone laga tha.

Mera sir bhaari ho raha tha. Aankhon ke saamne kabhi-kabhi dhundhla-sa chha jaata aur pairon mein itni kamzori mehsoos hoti ki lagta, abhi zameen par gir padunga.

Lekin main rukna nahi chahta tha.

Mujhe bas Jamil Chacha ke gaon tak pahunchna tha. Mere paas na paise the, na koi saadhan aur na hi koi aisa insaan jo mujhe lene aa sakta tha.

Main (man hi man): "Bas thoda aur chalna hai, Jay. Himmat mat haar. Jamil Chacha mil gaye toh shayad sab kuch sambhalne ka koi raasta nikal aaye."

Main apne aap ko samjhata hua aage badh raha tha ki tabhi sadak ke ek sunsaan hisse mein meri takkar kisi insaan se ho gayi.

"Dhyaan se, beta!"

Ek bhaari aur kuch ajeeb-si awaaz mere kaanon mein padi.

Main ladkhadakar peeche hua aur saamne dekha.

Mere saamne ek buzurg baba khade the.

Unke lambe, uljhe hue baal the. Gale mein kai tarah ki rudraksh ki malaayein latak rahi thi. Unke maathe par bhasm lagi thi aur sharir par saadhaaran, purane kapde the. Unka roop aam sadhuon se alag tha. Unhe dekhkar koi bhi unhe aghori sadhu samajh sakta tha.

Baarish ke beech unki aankhein ajeeb tarah se sthir thi. Wo mujhe gaur se dekh rahe the, jaise mere chehre ke peeche chhupe kisi dard ko padhne ki koshish kar rahe hon.

Main pehle hi itna thaka hua tha ki unse takrane ke baad mujhe apna santulan banaye rakhna bhi mushkil lag raha tha.

Main: "Maaf kijiye, Baba. Dhyaan nahi raha."

Main unke paas se nikalne ke liye aage badhne laga.

Lekin tabhi unki awaaz dobara sunai di.

Aghori Baba: "Ruk, beta!"

Main ruk gaya aur palatkar unki taraf dekha.

Baba ki nazar ab bhi mujh par tiki hui thi. Unhone kuch pal tak mujhe dekha, phir gambhir awaaz mein kaha—

Aghori Baba: "Tujhe aaj ki raat khud ko zinda rakhna hai."

Main unki baat sunkar uljhan mein pad gaya.

Main: "Ji... kya kaha aapne?"

Baba ne apni aankhein sikodkar meri taraf dekha.

Aghori Baba: "Aaj ki raat bahut bhaari hai, beta. Agar tune khud ko sambhaal kar nahi rakha, toh tera ye shareer toh zinda rahega... lekin teri aatma tera shareer chhod degi."

Unke shabd sunkar main kuch pal ke liye khamosh reh gaya.

Baarish ki boondein mere chehre par gir rahi thi. Mere kaan unki baat sun rahe the, lekin mera thaka hua dimaag uska matlab samajhne ki haalat mein nahi tha.

Main pehle hi apni zindagi ki sabse buri ghadi se guzar raha tha.

Ghar chhoot gaya tha. Apno ne saath chhod diya tha. Jeb khaali thi. Sharir dard se toot raha tha aur ab mujhe bukhar bhi chadhne laga tha.

Mere maathe par paseena aur baarish ka paani ek saath beh raha tha. Haath-pair thande pad rahe the, lekin andar se badan aag ki tarah tap raha tha.

Maine baba ki taraf dekha.

Main: "Baba, main aapki baat samjha nahi. Aap kehna kya chahte hain?"

Baba ne turant koi jawaab nahi diya.

Wo bas mujhe dekhte rahe.

Unke chehre par na muskurahat thi, na ghabrahat. Unki aankhon mein ek aisi gambhirta thi, jise main us waqt samajh nahi pa raha tha.

Aghori Baba: "Har baat ko samajhne ke liye dimaag nahi, beta... kabhi-kabhi waqt chahiye hota hai."

Main unki baat sunkar aur ulajh gaya.

Mujhe laga shayad wo koi sadhu hain, jo apne tareeke se baat kar rahe hain. Mere paas na unki baat samajhne ki taakat thi, na hi wahan rukkar unse aur sawaal karne ka mann.

Mujhe bas aage badhna tha.

Main: "Theek hai, Baba. Mujhe jaana hai."

Maine palatkar chalna shuru kar diya.

Peeche se unki awaaz ek baar phir aayi—

Aghori Baba: "Yaad rakhna, beta! Aaj ki raat haar mat maanna. Tera sabse bada dushman wo nahi hai, jo tujhe barbaad karna chahta hai... balki wo pal hai, jab tu khud apni himmat haar jaayega!"

Main kuch pal ke liye ruka.

Unke shabd mere kaanon mein goonj rahe the, lekin main unka matlab poori tarah samajh nahi paaya.

Maine peeche mudkar dekha.

Baba ab bhi wahin khade the, gale mein malaayein pehne, baarish ke beech mujhe dekh rahe the.

Main kuch kahe bina dobara aage badh gaya.

Mera sharir ab pehle se bhi zyada bhaari lag raha tha. Har kadam par pair ladkhada rahe the. Sar mein tez dard tha aur bukhar badhta hua mehsoos ho raha tha.

Main (man hi man): "Pata nahi Baba kya keh rahe the. Meri zindagi mein pehle hi itni pareshaniyan hain. Ab in baaton ko sochne ki taakat bhi nahi bachi."

Maine apne kadam tez karne ki koshish ki, lekin sharir saath nahi de raha tha.

Kuch door chalne ke baad maine ek baar phir peeche mudkar dekha.

Sadak ke us hisse par baarish ka paani beh raha tha. Door tak mujhe koi nazar nahi aaya.

Main ye bhi nahi keh sakta tha ki Baba wahan se chale gaye the ya baarish aur andhere ke beech meri nazron se ojhal ho gaye the.

Maine apna sir jhatka aur aage badh gaya.

Mujhe abhi bhi 150 kilometer door Jamil Chacha ke gaon tak pahunchna tha.

Mujhe nahi pata tha ki us raat mere saath kya hone wala hai. Baba ki baat ka kya matlab tha, ye bhi samajh nahi aaya tha.

Lekin unke aakhri shabd mere kaanon mein baar-baar goonj rahe the—

"Aaj ki raat haar mat maanna, beta!"

Aur main apne dard, bukhar aur tootti hui himmat ke saath baarish mein aage badhta raha.

...........

[Jay Thakur]

Chapter 6: Raat Ke Teen Baje — Ek Aatma, Do Shareer

Raat ke kareeb 3 baj chuke the.

Tez baarish ab bhi rukne ka naam nahi le rahi thi. Sadak par door-door tak andhera tha. Kabhi-kabhi kisi gaadi ki roshni andhere ko cheer kar nikal jaati, aur phir wahi sannata chha jaata.

Main lagataar chalta ja raha tha.

Mere pairon mein ab jaan nahi bachi thi. Sharir par lagi choton ka dard badhta ja raha tha. Bukhaar ki wajah se meri aankhon ke saamne sab kuch dhundhla hone laga tha. Pet khaali tha, kapde baarish se poori tarah bheeg chuke the, aur har saans lena bhi mushkil hota ja raha tha.

Maine khud se kaha—

“Bas thoda aur, Jay… thoda aur chal le. Jamil Chacha ke paas pahunch gaya, toh shayad sab theek ho jaayega.”

Lekin mera sharir ab mera saath dene ko taiyaar nahi tha.

Main sadak ke kinaare ladkhadaya. Sambhalne ki koshish ki, par mere pair jaise zameen mein dhans gaye hon. Maine saamne se aati ek gaadi ki roshni dekhi.

Uske baad…

Achanak ek tez takkar hui.

Ek pal ke liye mujhe laga jaise kisi ne mere poore sharir ko hawa mein uchhaal diya ho. Phir sab kuch andhera ho gaya.

Na dard ka ehsaas raha, na baarish ki thandak, na hi apni saanson ki aawaaz.

Bas ek gehra sannata.

Jab Maine Khud Ko Sadak Par Dekha

Pata nahi kitni der baad, jab maine dobara aankhein kholi, toh mere saamne ka nazara dekhkar main sunn reh gaya.

Main sadak par khada tha.

Lekin… mera sharir mujhse kuch door sadak par pada hua tha!

Maine neeche dekha. Mere haath-pair the, main chal bhi raha tha, lekin phir meri nazar apne hi sharir par padi—bheegi hui shirt, khoon se sane kapde aur aankhein band.

“Yeh… yeh mera sharir hai?”

Meri aawaaz mere hi kaanon tak pahunchi, lekin mujhe samajh nahi aaya ki main bol kaise raha tha.

Main ghabrakar apne sharir ke paas gaya. Use hilaane ki koshish ki, lekin mere haath us tak pahunchkar bhi jaise kuch chhoo nahi paa rahe the.

“Utho, Jay! Utho!”

Maine khud ko jhanjhodna chaha.

“Yeh mazaak hai na? Main yahin hoon! Mujhe sunai nahi de raha tum logon ko?”

Sadak par kuch log jama ho chuke the. Ek aadmi ne apni gaadi kinaare roki hui thi. Doosra phone par ambulance ko call kar raha tha.

“Bhai, jaldi bhejiye! Ek aadmi ka accident ho gaya hai. Haalat bahut kharaab lag rahi hai!”

Ek aur aadmi mere paas jhukkar meri nabz dekhne laga.

Main cheekha, “Main zinda hoon! Mujhe bachao!”

Lekin kisi ne meri taraf dekha tak nahi.

Tabhi mere andar ek anjaana darr paida hua.

Kya main mar chuka hoon?

Nahi… yeh kaise ho sakta tha?

Abhi toh mujhe Jamil Chacha tak pahunchna tha. Abhi toh mujhe apne Papa ke saath hui na-insaafi ka sach jaanana tha. Abhi toh mujhe Tau Mahendra se apne har sawaal ka jawaab lena tha.

Meri kahaani toh abhi shuru bhi nahi hui thi!

 Doosra Haadsa

Main apne hi sharir ke paas khada tha, tabhi achanak sadak ke doosri taraf se ek tez aawaaz aayi.

Ek motorcycle phisalkar sadak par gir gayi thi.

Us par savaar aadmi kuch door jaakar gira. Uski bike sadak par ghisatti hui kinaare ja lagi.

Logon mein se kuch uski taraf bhaage.

“Arey, idhar bhi accident ho gaya!”

Main bhi us taraf dekhne laga.

Woh aadmi sadak par pada tha. Uski aankhein band thi aur uske aas-paas bhi log jama hone lage the.

Phir maine kuch aisa dekha, jiski kalpana tak maine kabhi nahi ki thi.

Us aadmi ke sharir se ek dhundhli-si aakriti alag hone lagi.

Bilkul waise hi, jaise main apne sharir se alag khada tha.

Woh uski aatma thi.

Main apni jagah jam gaya.

Woh aakriti kuch pal apne hi sharir ke upar mandraati rahi. Phir usne jaise kisi anjaani taakat ke kheenchne par meri taraf rukh kiya.

“Yeh kya ho raha hai?” maine ghabrakar kaha.

Woh meri taraf badhne lagi.

Maine peeche hatne ki koshish ki, lekin mere pair jaise wahin jam gaye the.

Agla pal itna achanak tha ki mujhe kuch samajhne ka mauka hi nahi mila.

Woh aatma seedhe meri taraf aayi aur mere sharir mein sama gayi.

Ek tez jhatka laga.

Mere aas-paas ki duniya ghoomne lagi. Sadak, baarish, gaadiyon ki roshni, logon ki cheekh-pukaar—sab kuch ek saath dhundhla padne laga.

Mujhe aisa mehsoos hua, jaise mere andar koi doosri maujoodgi aa gayi ho. Main use samajh paata, usse sawaal karta, uske baare mein kuch jaan paata—isse pehle hi meri chetna tootne lagi.

Meri nazar aakhri baar apne sharir par padi.

Log ab bhi mujhe bachane ki koshish kar rahe the. Door se ambulance ka siren sunai dene laga tha.

Main kuch kehna chahta tha.

Apni maa ko yaad karna chahta tha.

Papa ka chehra ek baar phir dekhna chahta tha.

Lekin mere paas ab waqt nahi bacha tha.

Sab kuch andhere mein doob gaya.

Aur main…

Duniya ki nazron se ojhal ho gaya.

Us raat sadak par sirf ek accident nahi hua tha.

Kisi anjaani taakat ne do zindagiyon ke beech ki lakeer mita di thi.

Aur ab sawaal yeh tha—

Kya Jay ki kahaani khatam ho gayi thi… ya kisi doosri aatma ke saath uski zindagi ka ek naya, khaufnaak adhyaay shuru hone wala tha?

.........

[Jay Thakur]

Chapter 7: Teen Din Baad — Jay Ke Sharir Mein Bhavik Singh Chouhan


Teen din beet chuke the.

Us raat sadak par hue haadse ke baad Jay ko ambulance se govt hospital laaya gaya tha. Doctors ne uska ilaaj shuru kar diya tha. Uske sharir par pehle se hi gehri chotein thi, aur accident ne uski haalat aur bhi naazuk kar di thi.

Pichhle teen din se Jay ka sharir hospital ke bed par bejaan-sa pada tha. Machines ki halki awaazein, doctors ki aati-jaati kadmein aur nurses ki duty—bas yahi uske aas-paas ki duniya thi.

Lekin aaj, teesre din, kuch badalne wala tha.

Hospital ke ek kamre mein Jay ke sharir ki ungliyon mein halki-si harkat hui.

Phir uski palkein dheere-dheere hilne lagi.

Aur aakhirkaar…

Jay ke sharir ki aankhein khul gayin.

Lekin un aankhon ke peeche ab Jay nahi tha.

Wahan jaag chuka tha Bhavik Singh Chouhan.

Ek Nayi Aankh, Ek Anjaan Duniya

Bhavik Singh Chouhan—29 saal ka ek yuva, jisne apni zindagi mein bahut kuch dekha tha.

Zindagi ne use aasaan raaste kabhi nahi diye the. Usne mushkil paristhitiyon ka saamna kiya tha, kai baar haara tha, kai baar sambhla tha, aur apni mehnat se ek chhoti-si jagah banate hue shehar mein bas gaya tha.

Woh ek banker tha. Ek shaadi-shuda aadmi, jiski apni zindagi, apni zimmedariyan aur apni pareshaniyan thi.

Uski duniya mein bhi sab kuch theek nahi chal raha tha. 

Lekin abhi, jab usne aankhein kholi, toh use apni pichhli zindagi ka koi sawaal yaad nahi aaya.

Uske saamne sabse pehla sawaal tha—

“Main kahan hoon?”

Uski aankhon ke saamne sab kuch dhundhla tha. Safed chhat, tez roshni, paas mein rakhi machines aur saamne khadi ek nurse.

Bhavik ne palkein jhapkaayin. Usne apna sir halka-sa hilaane ki koshish ki, lekin poore sharir mein dard ki ek lehar daud gayi.

“Ahh…”

Uske munh se halki-si karaah nikli.

Nurse ka dhyaan turant uski taraf gaya.

“Patient ko hosh aa raha hai!”

Woh jaldi se uske kareeb aayi aur uski aankhon mein dekhne lagi.

“Sir, aap meri awaaz sun paa rahe hain? Aapko meri baat samajh aa rahi hai?”

Bhavik use dekhne ki koshish kar raha tha. Uska dimaag abhi poori tarah kaam nahi kar raha tha.

Woh bolna chahta tha, lekin gala sookha hua tha. Uske hoth mushkil se hile.

“Paani…”

Nurse ne turant use paani dene ke bajay doctor ke nirdesh ka intezaar karne ka faisla kiya, phir apni saathi nurse ki taraf mudkar boli—

“Jaldi jao, doctor sahab ko bulao! Jay naam ke patient ko hosh aa gaya hai!”

Doosri nurse turant kamre se baahar nikal gayi.

Bhavik ne yeh naam suna.

Jay?

Uske dimaag mein ek ajeeb-si uljhan paida hui.

Jay kaun hai? Mujhe Jay kyun bula rahe hain?

Usne apne haath ko uthaane ki koshish ki. Haath bhaari lag raha tha. Usne apni ungliyon ko dekha, phir apni kalai ko.

Kuch toh galat tha.

Yeh haath uske jaise nahi lag rahe the.

Usne ghabrakar apne sharir ko mehsoos karna chaha, lekin dard ne use phir se bed par tik jaane par majboor kar diya.

“Main…” usne dheere se bolne ki koshish ki, “main kahan…?”

Nurse uske paas aayi.

“Sir, aap hospital mein hain. Aapka accident hua tha. Aap abhi zyada bolne ki koshish mat kijiye. Doctor bas aate hi honge.”

Accident?

Bhavik ka dimaag aur ulajh gaya.

Use apni zindagi ke kuch dhundhle ehsaas yaad aa rahe the—kaam, ghar, zimmedariyan, apne parivaar ki fikr. 

Lekin jis jagah woh tha, uska un yaadon se koi mel nahi baith raha tha.

Usne dobara nurse ki taraf dekha.

“Jay…?” usne kamzor awaaz mein poochha.

Nurse ko laga shayad patient apna naam yaad karne ki koshish kar raha hai.

“Ji, Jay. Aapka naam Jay hai. Aap fikr mat kijiye.”

Bhavik ki aankhon mein bechaini badh gayi.

Jay nahi… mera naam Bhavik hai. Bhavik Singh Chouhan!

Lekin woh yeh baat keh nahi paa raha tha.

Uska sharir uska kehna nahi maan raha tha. Har harkat ke saath dard badh raha tha. Usne apni aankhein band kar li aur gehri saans lene ki koshish ki.

Kuch hi der mein kamre ka darwaaza khula.

Doctor tezi se andar aaye. Unke saath doosri nurse bhi thi.

Doctor ne patient ki aankhon mein roshni daalkar jaanch ki aur kuch sawaal poochhe.

“Jay, meri awaaz sun rahe ho? Tumhe pata hai tum kahan ho?”

Bhavik ne dheere se sir hilaaya.

“Achha. Tumhe yaad hai tumhare saath kya hua tha?”

Bhavik chup raha.

Uske paas is sawaal ka jawaab nahi tha.

Doctor ne nurse se kaha, “Vitals dobara check karo. Patient ko hosh aa gaya hai, lekin abhi neurological assessment karna hoga. Accident aur pehle ki choton, dono ko dhyaan mein rakhna hai.”

Doctor ki baatein Bhavik ke kaanon tak pahunch rahi thi, lekin uska dimaag ek hi baat par atka hua tha.

Woh Bhavik Singh Chouhan tha. Phir sab use Jay kyun keh rahe the?

Aur sabse bada sawaal—

Agar woh Bhavik tha, toh uska apna sharir kahan tha?

Usne dheere se apni aankhein kholi aur hospital ki safed chhat ko dekha.

Uske liye yeh sirf ek accident ke baad hosh mein aana nahi tha.

Yeh ek aisi zindagi mein jaagna tha, jiske baare mein woh kuch nahi jaanta tha.

Bhavik Singh Chouhan jaag chuka tha—Jay ke sharir mein.

Aur abhi use yeh pata bhi nahi tha ki jis zindagi mein usne aankhein kholi hain, woh pehle se hi dard, dhokhe aur adhure sawaalon se ghiri hui hai.

[Jay Thakur]

Chapter 8: Pandrah Din Baad — Aaine Ke Saamne Ek Anjaaine Ke Saamne Ek Anjaana Chehra


Jay ka ilaaj agle pandrah din tak chalta raha.

Kabhi use hosh aata, toh kabhi woh dard aur kamzori ke kaaran dobara behosh hokar so jaata. Doctors uski haalat par lagataar nazar rakhe hue the. Uske sharir par lagi choton ko theek hone mein waqt lag raha tha.

Lekin in pandrah dinon mein ek ajeeb baat hui.

Jay ke sharir mein rehne wala Bhavik Singh Chouhan dheere-dheere samajhne laga tha ki uske saath kuch aisa hua hai, jo saamanya nahi hai.

Jab bhi use hosh aata, woh nurses aur doctors ki baatein sunta. Har koi use Jay ke naam se bulaata. Uske baare mein sawaal karta, use dawa deta aur aaraam karne ko kehta.

Shuru mein Bhavik ko laga ki shayad accident ke kaaran uski yaadasht par asar pada hai. Shayad woh kisi tarah apne hi baare mein sab kuch bhool gaya hai.

Lekin ek baat use andar hi andar pareshaan kar rahi thi.

Use apna naam yaad tha.

Apni umr yaad thi.

Apni shaadi, apna bank, apni naukri aur apni zindagi ki kai baatein bhi yaad thi.

Woh Bhavik Singh Chouhan tha—untees saal ka ek banker, jo apni zindagi mein kai mushkilon ka saamna karke shehar mein basa tha.

Phir woh Jay kaise ho sakta tha?

Aur agar woh Jay tha, toh Bhavik ki yaadein uske dimaag mein kyun thi?

Pandrahve Din Ki Subah

Pandrahve din subah ke waqt Bhavik ki aankhein khuli toh use pehle ke mukaable kuch behtar mehsoos hua.

Sharir mein ab bhi dard tha, lekin woh pehle ki tarah bilkul laachaar nahi tha.

Woh apni gardan ghuma sakta tha aur kuch der tak aankhein kholkar aas-paas dekh sakta tha.

Kamre ki khidki se halki dhoop andar aa rahi thi.

Ek nurse dawa dene aayi.

“Good morning, Jay. Aaj tabiyat kaisi hai?”

Bhavik ne uski taraf dekha.

“Ek baat poochhun?”

“Ji, poochhiye.”

“Mujhe yahan aaye kitne din ho gaye?”

Nurse ne uski file dekhi.

“Pandrah din ho gaye hain. Aapka accident kaafi serious tha. Aapko aaraam karna chahiye. Doctor sahab bhi keh rahe the ki aapki recovery dheere-dheere ho rahi hai.”

Pandrah din.

Bhavik ne man hi man hisaab lagaaya.

Pandrah din se woh kisi aur ke sharir mein tha. Pandrah din se log use kisi aur naam se bula rahe the. Aur pandrah din se woh khud apne sawaalon ke jawaab dhoondh raha tha.

Usne nurse se poochha, “Yahan koi aaina hai?”

Nurse thodi hairaan hui.

“Aaina? Aapko kya karna hai?”

“Bas… apna chehra dekhna hai.”

Nurse ne use kuch pal dekha. Phir boli, “Main lekar aati hoon. Lekin aap zyada uthne ki koshish mat kijiyega.”

Woh chali gayi.

Bhavik ki dhadkan tez hone lagi.

Aaj woh us sawaal ka jawaab jaanne wala tha, jo pandrah din se use andar hi andar kha raha tha.

Aakhir uske saath hua kya tha?

Aaina

Kuch der baad nurse ek chhota-sa aaina lekar aayi.

Usne aaina Bhavik ke haath mein de diya.

“Lijiye. Aur agar chakkar aaye toh mujhe bula lena.”

Bhavik ne aaine ko pakad liya.

Uski ungliyan halki-si kaanp rahi thi.

Pehle usne apni aankhon ko dekha.

Phir maathe ko.

Phir poore chehre ko.

Ek pal ke liye uski saans ruk gayi.

Aaine mein jo chehra tha, woh uska chehra nahi tha.

Woh ek naujawan ka chehra tha, jise usne apni zindagi mein kabhi nahi dekha tha. Chehre par choton ke nishaan the, hothon ke paas sujan thi aur aankhon ke neeche thakaan saaf nazar aa rahi thi.

Bhavik ne aaine ko thoda kareeb kiya.

Usne apne gaal ko chhua.

Aaine mein khade us anjaan naujawan ne bhi apne gaal ko chhua.

Bhavik ne apni aankhein band ki. Phir kholi.

Chehra wahi tha.

Usne aaine ko neeche kar diya aur kuch pal tak bina kuch bole baitha raha.

Phir uske munh se dheemi-si awaaz nikli—

“Yeh… main nahi hoon.”

Usne dobara aaine mein dekha.

“Main Bhavik Singh Chouhan hoon. Yeh chehra mera nahi hai. Yeh sharir mera nahi hai!”

Uski awaaz mein ghabraahat badhne lagi.

Nurse turant uske paas aayi.

“Jay, kya hua? Aap theek hain?”

Bhavik ne uski taraf dekha.

“Tum mujhe Jay kyun bulaati ho?”

Nurse ruk gayi.

“Kyunki aapka naam Jay hai. apki jeb se jo documents mile th, un sab me apka naam Jay hai”

“Nahi!” Bhavik ne kamzor lekin dridh awaaz mein kaha. “Mera naam Bhavik hai. Bhavik Singh Chouhan!”

Nurse ne uski taraf chintit nazron se dekha.

“Jay, shaant ho jaiye. Aap abhi poori tarah theek nahi hue hain.”

“Tum meri baat samajh kyun nahi rahi ho? Main tumhe bata raha hoon ki main Jay nahi hoon!”

Usne uthne ki koshish ki, lekin sharir mein dard ki wajah se woh dobara takiye par gir gaya.

Nurse ne turant doctor ko bulaane ke liye doosri nurse ko awaaz di.

Bhavik ne aaina apne seene par rakh liya aur chhat ko dekhne laga.

Uski aankhon mein ghabraahat thi, lekin us ghabraahat ke neeche ek aur ehsaas janm le raha tha.

Sach jaanne ki zid.

Woh apne aap se sawaal karne laga.

“Kya main mar gaya tha?”

“Kya mera asli sharir ab is duniya mein nahi hai?”

“Kya meri aatma kisi tarah is ladke ke sharir mein aa gayi hai?”

Use sadak ka koi spasht drishya yaad nahi aa raha tha. Use yaad nahi tha ki woh is hospital tak kaise pahuncha. Lekin apne andar maujood yaadon aur aaine mein dikh rahe chehre ke beech ka antar woh jhuthla nahi sakta tha.

Uske saath kuch bahut bura hua tha.

Kuch aisa, jiska jawaab sirf doctors ki report mein nahi milne wala tha.

Ek Faisla

Kuch der baad doctor uske kamre mein aaye. Unhone Bhavik ki jaanch ki aur usse kuch sawaal poochhe.

Bhavik ne is baar khud ko shaant rakhne ki koshish ki.

Usne doctor ko apni uljhan bataayi—ki use apna naam Bhavik Singh Chouhan yaad hai, jabki sab use Jay keh rahe hain.

Doctor ne uski baat dhyaan se suni.

“Accident ke baad kabhi-kabhi mareez ko confusion ho sakta hai. Choton, dawaon ya doosre neurological kaaranon se bhi aisa ho sakta hai. Hum aapki jaanch karenge.”

Bhavik chup raha.

Doctor ki baat ek sambhaavna thi, jawaab nahi.

Woh jaanta tha ki use abhi apne sharir ko theek hone dena hoga. Woh kamzor tha, uske paas paise nahi the, apni asli zindagi tak pahunchne ka koi spasht raasta nahi tha.

Lekin woh haar maanne wala nahi tha.

Usne aaine ko apne paas rakha aur man hi man kaha—

“Chahe mere saath jo bhi hua ho, main sach jaan kar rahoonga. Main Bhavik Singh Chouhan hoon. Mujhe apni zindagi ke baare mein pata karna hai… aur mujhe yeh bhi jaanana hai ki yeh Jay kaun hai, jiski zindagi mein main aa gaya hoon.”

Usne khidki se baahar dekha.

Shehar apni raftaar se chal raha tha. Log apne kaamon mein lage the. Kisi ko nahi pata tha ki hospital ke is kamre mein ek aadmi apni pehchaan ke liye lad raha hai.

Aur use abhi yeh bhi nahi pata tha ki Jay ki zindagi mein kitne raaz chhupe hue hain.

Bhavik ka pehla sawaal tha—woh Jay kaise bana?

Lekin jald hi use ek doosra sawaal bhi pareshaan karne wala tha—

Agar woh Jay ke sharir mein zinda tha, toh kya Jay ki aatma sach mein khatam ho chuki thi?

............

[Jay Thakur]

 Chapter 9: Jay Ki Pehchaan — Sach Ki Pehli Kadi

Bhavik Singh Chouhan samajhdar aadmi tha. aur bahut intelligent tha..

Usne apni zindagi mein kai mushkil halaat dekhe the. Woh jaanta tha ki har pareshani ka hal ghabraane se nahi, balki shaant dimaag se sochne par milta hai.

Isliye aaine mein apna anjaan chehra dekhne ke baad bhi usne koi jaldbaazi nahi ki.

Agle do din tak woh bilkul shaant raha. Doctor aur nurses jo kehte, woh uska paalan karta. Samay par dawa leta, aaraam karta aur apni sehat sudharne deta.

Lekin uska dimaag lagataar kaam kar raha tha.

“Agar main is sharir mein hoon, toh mujhe is sharir ke maalik ke baare mein jaanana hoga. Uska naam Jay hai. Lekin Jay kaun hai? Uske saath kya hua tha? Aur main aakhir iske sharir mein aaya kaise?”

Bhavik ke paas abhi in sawaalon ke jawaab nahi the.

Lekin use ek baat samajh aa gayi thi—agar woh bina soche-samjhe apni asli pehchaan ka daawa karta raha, toh log use maansik roop se pareshaan samajh sakte the.

Use pehle jaankaari jutaana thi.

Aur iske liye use kisi aur ki madad se zyada, apne dimaag ka istemaal karna tha.

Do Din Baad — Ek Chhota Sa Sawaal

Us din dopahar ko nurse Jay ke kamre mein aayi. Woh uski dawa aur zaroori jaanch karne ke liye aayi thi.

Bhavik ne use dekha aur kuch der intezaar kiya. Jab nurse apna kaam poora karke jaane lagi, toh usne awaaz di.

“Excuse me, Sister!”

Nurse ruk gayi.

“Ji, Jay? Kya hua?”

Bhavik ne apni awaaz ko saamanya rakhte hue kaha—

“Apne mere saman kaa jikra kiya tha, Main apna wo saamaan dekhna chahta tha.”

Nurse ne hairaani se uski taraf dekha.

“Saamaan?”

Bhavik: Purse wagera jo accident ke samay mere sath tha..

Nurse kuch pal sochti rahi. Phir use yaad aaya ki accident ke baad security officer aur hospital ke karmachariyon ne patient se sambandhit kuch cheezein jama karwaayi thi.

“Ek minute, Jay. Main pata karke aati hoon.”

Bhavik ne sir hila diya.

Nurse kamre se baahar chali gayi.

Bhavik ne aankhein band karke gehri saans li.

“Bas, yahin se shuruaat hogi.”

Use yaad tha ki nurse ne pehle documents ka zikr kiya tha. Shayad Jay ke paas koi pahchaan patra ho. Aadhaar card, driving licence, bank card ya koi aisa document, jisse uske baare mein kuch pata chal sake.

Agar use Jay ki pehchaan mil gayi, toh woh uski zindagi ki kahaani samajhne ki koshish kar sakta tha.

Aur agar us kahaani mein apni maujooda haalat ka koi suraag mil gaya, toh shayad woh apne saath hui is ajeeb ghatna ko bhi samajh paaye.

Jay Ka Saamaan

Kuch der baad nurse wapas aayi.

Uske haath mein ek chhota sa wallet tha aur ak mobile tha, jise hospital ki taraf se surakshit rakha gaya tha.

“Yeh lijiye, Jay. Aapka saamaan yahi hai. Aap khud dekh lijiye. Bas zyada harkat mat kijiyega.”

Bhavik ne wallet aur mobile ki taraf dekha.

Uska dil thoda tez dhadakne laga.

...........