Romance Safeed libaas

[Chillpum]

Ye hai guest house" Kuchh door tak uske pichhe chalne ke baad vo mujhe ek purane bade se bungalow tak le aayi.

"Thank you" kehkar maine apna purse nikala aur use kuchh paise dene chahe. Vo dekhne mein hi kaafi gareeb si lag rahi thi aur mujhe laga ke vo shayad kuchh paiso ke liye mujhe rasta dikha rahi thi.

Mere haath mein paise dekh kar usko shayad bura laga.

"Maine ye paise ke liye nahi kiya tha"

Aur vo khoobsurat neeli si aankhen udaas ho gayi. Aisa laga jaise mere chaaro taraf ki poori qaaynat udaas ho gayi thi.

"I am sorry" Maine fauran paise vaapis apni jeb mein rakhe "Mujhe laga tha ke....."

"Koi baat nahi" Usne muskura kar meri baat kaat di.

Maine guest house mein daakhil hua. Maine andar khada dekh hi raha tha ke vahan ke buddha care taker ek kamre se bahar nikla.

"Mehra sahab?" Usne mujhe dekh kar sawaliya andaz mein mera naam pukara

"Ji haan" Maine aage badhkar usse haath milaya "Aapse phone par baat hui thi"

"Ji bilkul" Usne mera haath garam joshi se milaya "Maine aapka kamra taiyyar kar rakha hai"

Usne mere haath se mera bag liya aur ek guest house se bahar aakar ek garden ki taraf chal pada. Vo ladki bhi ham dono ke saath saath hamare pichhe chal padi.
"Tumne ghar nahi jana" Maine usko aate dekha toh puchha Usne inkaar mein gardan hila di.

"Mujhse kuchh kaha sahib" Caretaker ne aage chalte chalte mujhse puchha

"Nahi inse baat kar raha tha" Maine ladki ki taraf ishara kiya