Romance Safeed libaas

[Chillpum]

Raasta bhool gaye hain kya sahib" Aawaz sunkar main palta

Vo ek chhote se kad ki ladki thi, mushkil se 5 foot, rang sawla aur aam si shakal soorat. Dekhne mein usmein koi bhi khaas baat nahi thi jo ek ladke ko pasand aaye. Usne ek safed rang ki salwar kameez pehen rakhi thi.

Mujhe apni taraf aise dekhte paya toh has padi.

"Maine yahin rehti hoon, vo vahan par mera ghar hai" Haath se usne pahad ke dhalan par bane ek ghar ki taraf ishara kiya "Aksar shehar se log aate hain aur yahan rasta bhool jaya karte hain. Guest house jana hai na aapne?"

"Haan par yahan sab raaste ek jaise hi lag rahe hain. Samajh hi nahi aata ke kaun se pahad par chadhun aur kis se neeche utar jaoon" Maine bhi hasi mein uska saath dete hue kaha.

Main Delhi se sarkari kaam se aaya tha. Peshe se main ek photographer hoon aur kayi din se afwah sunne mein aa rahi thi ke yahan jungle mein ek 10 foot ka cobra dekha gaya hai. Itna bada cobra ho sakta hai is baat par yakeen karna hi zara mushkil tha par jab baar baar kai logon ne aisa kaha toh magazine walo ne mujhe yahan bhej diya tha ke main aakar pata karun aur agar aisa saanp hai toh uski tasveeren nikalun.

Uttarkashi tak meri trip kaafi aasan rahi. Delhi se main apni gaadi mein aaya tha jo maine Uttarkashi chhod di thi kyunki ahan se us gaon tak jahan saanp dekha gaya tha, ka rasta paidal tha. Koi sadak nahi thi, bas ek track thi jispar paidal hi chalna tha. Mujhe bataya gaya tha ke vahan par ek sarkari guest house bhi hai kyunki kuchh sarkari officers vahan aksar chhuttiyan manane aaya karte the.