A wedding ceremony in village

[Logan555]

KABRISTAAN ME



Wo saaya apne asli roop me us aghori ke saamne tha.
Aghori: Ajay star ye kis tarah ka naam hai. Bhala Star bhi kisi ka upnaam hota hai.
Ajay: Ye mujhe nahi pata ki mera ye naam kyu pada par ye mera naam hai ye mujhe yaad hai.
Aghori: Mai is shamshaan me kai varsho se yaha rehne wali har aatma ko mehsoos kar sakta hu par kabhi tumhari maujoodgi ka mujhe ehsaas nahi hua kis kabra me dafan the tum.
Ajay: Wo badi si chattan jo is kabristaan ke aakhiri kone me rakhi thi mai usi me kaid tha.
Aghori: Wo chattan jo us raat bijli se do khand me vibhajit ho gai.
Ajay: Ha wahi chattan.
Aghori: Bhala koi aatma kisi chattan me kaise kaid ho sakti hai aur tumhe kaid kisne kara aur kyu.
Ajay: Ye mujhe yaad nahi ki mai waha kaise kaid hua kisne kaid kara mujhe. Aisa lagta hai jaise meri yaado par bhi kisine koi bhari chattan rakh di lakh koshish ke bawjood bhi mujhe kuchh yaad nahi aa pa raha.
Aghori: Khair tum us ladki ke peeche kyu pade the kya yaha dekhkar mohit ho gae the uspar.
Ajay: Nahi baat sirf mohit hone ki nahi hai baat isse kuchh alag hai mai use janta hu.



Aghori: Abhi tumne kaha ki tumhe kuchh yaad nahi phir tum use kaise jante ho.
Ajay: Kuchh cheeze yaado se pare hoti hai abhi aapne kaha ki aap yaha rehne wali aatmao ko mehsoos kar sakte hai uske sath wo pyar wo apnepan wo muhobbat ka rishta mai mehsoos kar sakta hu.
Aghori: Wo yaha ki hai hi nahi bahar ki hai to tum use kaise pyar kar sakte ho.
Ajay: Mai is janam ki baat nahi kar raha pichhle janam ki baat kar raha hu.
Aghori: Ek taraf tumhe kuchh yaad nahi aur doosri taraf tumhe ye yaad hai tum use pichhle janam se pyar karte ho. Waah
Ajay: Hmm sunne me ajeeb hai par yahi sach ha mujhe pehle ka kuchh yaad nahi par mujhe ye yaad hai ki mera naam Ajay Star tha mujhe ye yaad hai ki us ladki ka naam pichhle janam me Manjari tha aur iske alawa bus ek naam mere zehen me ghoomta rehta hai.
Aghori: Kaunsa naam
Ajay: Abhay, Abhay Raichand
Aghori: Abhay Raichand kaun hai ye Abhay Raichand.



Ajay: Mai nahi janta mai kuchh nahi janta mai jitna uske baare me yaad karne ki koshish karta hu utna mai dard se tadap uthta hu. Bus mujhe itna yaad hai ki Abhay Raichand hi wo wajah tha jiske karan mai aur manjari pichhle janam me alag hue aur ab wo phir se wapas aa gaya hai. Azaad hone ke baad maine uski mansik tarango ko aarti ki taraf badte hue mehsoos kara tha aur maine unhe rokne ki har sambhav koshish bhi ki thi par apki wajah meri har koshish bekar ho gai apki wajah se mai apni manjari ko us Abhay Raichand se na bacha saka.
Aghori: Meri wajah se maine kya kara.
Ajay: Apka ye rudraksh isne mujhe apne andar kaid kar liya aue jab wo Abhay meri aankho ke saamne meri manjari ko le ja raha tha mai kuchh na kar saka.
Aghori: Le gaya kaha le gaya kab abhi kuchh der pehle to hum use sahi salamat chhod kar aae the.



Aur Ajay Aghori ko kuchh der pehle ghate us kutto wale pure ghatnakram ko batata chala gaya jise sunkar aghori ka muh khula ka khula reh gaya. Aur use afsos bhi ho raha tha ki kyu usne aarti ko waha akela chhoda. Kash wo aarti ko haweli tak chhod ata to aisa na hota. Iske alawa Ajay ne us Abhay ka jaisa varnan kara tha wo samajh se pare tha kyuki jo kuchh Ajay ne bataya wo ek aam insaan ke liye namumkin tha. Aue Abhay jaise kisi asadharan vyakti ke baare me aghori ne yaha kabhi nahi suna tha. Par Aghori bhi ek mahan tantrik tha jisne yaha baithe Raj ka accident mehsoos kar liya tha to Abhay Raichand ko dhoondna uske liye kya badi baat thi. Aur isse us saae Ajay ki sachhai bhi saamne aa jaegi. Isliye Aghori ne apni tantra shakti se Abhay ka pata lagane ka socha. Aghori ne zameen me ek tantra ghera banaya aur Ajay ko usme khada hone ko kaha.

Aghori: Tum yaha khade ho jao.
Ajay: Kyu kya aap phir kaid karna chahte hai.
Aghori: Nahi jaisa tum bata rahe ho mai us Abhay ko dekhna chahta hu uska pata lagana chahta hu taki hume Aarti ka pata chal sake. Is ghere ke andar mai tunhari kuchh pal pehle ki yaado ko tatolunga aur dekhunga jaisa tum keh rahe ho wo sach hai ki nahi. Agar tum jhoot bol rahe ho to dubara is ghere se bahar nahi aa paoge aur agar tum sach bol rahe ho to tumhari yaado me wo Abhay bhi maujood hoga aur ek baar tumhari yaado ke zariye mai us Abhay tak pahuch gaya to wo Aarti ko kaha le gaya hai uaka pata bhi kar lunga. Aur aarti milne ke baad hi ye faisla karenge ki wo tumhari Manjari hai ki nahi. Bolo hai himmat is ghere me khade hone ki.
Ajay: Mai sach bol raha hu aur sabit karne ke liye mujhe kisi ghere me khade hone ki zarurat nahi par agar baat Manjari ko dhoondne ki hai mai kuchh bhi karne ko tayaar hu.

Ajay us ghere me khada ho gaya aur Aghori ne Ajay par bhabhoot phekte hue kuchh mantra padna shuru kar diya. Aghori Ajay ki yaado ko tatolne laga jab wo aarti ko jungle me chhod kar aya tha aur aarti par kutto ne hamla kara aur Ajay ne beech me akar aarti ko bachaya par aarti ne dar ke maare use hi rudraksh me kaid kar diya. Yaha tak to sab theek tha par jaise hi un yaado me wo us mukaam par pahucha jaha Abhay Raichand aya tha Aghori ko tez jhatka laga ki ladkhada kar zameen par gir pada. Aghori ka dimaag us jhatke se ghoom gaya kuchh pal to use utha bhi nahi gaya jab wo thoda normal hua aur wapas khada hua tab usne Ajay ko us ghere se bahar nikala. Abhay ko dekhne ke halke se prayaas ne uska ye haal kara to use dhoonda to uske bus ke bahar ki baat hai. Par is jhatke ne use itna yakeen dila diya ki Ajay jo keh raha hai wo sach hai. Aur Abhay Raichand naam ka ye shaksha koi mamooli shaksha nahi hai aur Aarti usike paas hai. Aur us dhoondne aur aarti ko bachane ke liye use kuchh gairmamooli karna hoga jiske liye use kisi asadharan shaksha ki zarurat hogi.

Aghori: Ye Abhay Raichand jo koi bhi hai meri pahuch se bahar hai is dhoondne aur ise kabu karne ke liye tumhe mujhse bhi behtar tantrik chahiye aur akele to usse bhidne ka sochna bhi mat. Wo koi sadharan shaksha nahi hai.
Ajay: Bhala aisa tantrik mujhe kaha milega.
Aghori: In junglo ke doosre chhor par un aadivasiyo ke kabeele me. Wo aadvaasi tantra vidya ke mahan gyata hai maine khud tantra gyaan unhise seekha hai. Par aam janmanas unse darne laga tha isliye un aadivasiyo ne pran liya ki wo kabhi aam logo ke chhetra me nahi aaenge aur na yaha se koi waha jata hai. Is mamle me wo hi tumhari madad kar sakte hai. Mai khud tumhare sath chalta par maine is kanya ke sath ye saadhna puri karne ka sankalp kara hai isliye mai nahi ja sakta isljye tumhe hi waha jana hoga.
Ajay: Theek hai mai abhi waha jata hu.
Aghori: Thehro unke chhetra me pravesh itna bhi asaan nahi hoga khaskar ek aatma ka. Wo tumhe ek pal me tantra jaal me phasa lenge.
Ajay: Phir mai kya karu.
Aghori: Tum ye khandit bajrangi rudraksh le jao, ye mujhe us kabeele ke sabse bade tantrik aur mere guru Osaka ne diya tha. Ye rudraksha unhe dikha dena wo sab samajh jaenge aur tumhari madad bhi karenge.



Ajay: Aapka bahut bahut shukriya.
Aghori: Ek baat ka khayal aur rakhna.
Ajay: Kya
Aghori: Surya ke prakash me unke chhetra me pravesh mat karna warna surya aur tantra ke sammilit prabhav se tum bhasm bhi ho sakte ho isliye waha raat me pravesh karna.
Ajay: Par abhi to suryoday hone wala hai iska matlab mujhe raat tak intezaar karna hoga.
Aghori: Iske alawa tumhare paas koi doosra raasta bhi nahi hai. Agar tum bhasm ho gae to us kanya ko kaise bachaoge. Aur bina aadivasiyo ki madad ke tum us Abhay ka saamna nahi lar paoge. Isliye kisi ped par baith kar raat hone ka intezaar karo aur suryast ke baad unke chhetra me pravesh karna.
Ajay: Theek hai mai suryast tak ka intezaar karunga. Chalta hu Madad ke liye shukriya.
Aghori ko dhanyawaad kar Ajay waha se nikal gaya aur us shiv mandir ke paas hi ek peepal ke ped par baith kar suryast hone ka intezaar karne laga.