தற்போதைய செய்திகள்

[johnypowas]

நான் ஒரு சைக்கோ...தனி ஆளாக வீடு புகுந்து 3 பேரையும் தீர்த்துக்கட்டினேன் - கைதானவர் பரபரப்பு வாக்குமூலம்

நெல்லை,

 முன்னாள் மேயர் உமா மகேஸ்வரி உள்பட 3 பேர் கொலை செய்யப்பட்ட வழக்கில் போலீசார் தீவிர விசாரணை நடத்தி தி.மு.க. பெண் பிரமுகர் சீனியம்மாளின் மகன் கார்த்திகேயன் (39) என்பவரை கைது செய்தனர். இவர் ஒரு சைக்கோ கொலைகாரனை போல போலீசாரிடம் சொன்னதையே திரும்ப திரும்ப சொல்லி வருகிறான். இடையிடையே நான் ஒரு ‘சைக்கோ’ என்றும் கூறுகிறாராம்.


கொலையில் யார் யாரெல்லாம் ஈடுபட்டார்கள் என்ற கேள்விக்கு 3 பேரையும் நான் ஒருவனே தன்னந்தனியாக கொலை செய்தேன் என்றும் கூறி வருகிறாராம். அப்படியானால் எப்படி கொலை செய்தாய் என்று நடித்து காட்டு என்று போலீசார் கார்த்திகேயனை ஒரு காரில் சம்பவ இடத்துக்கு அழைத்து சென்றனர். 

அப்போது கார்த்திகேயன் வாக்குமூலமாக கூறியதாவது:-

 தி.மு.க.வில் பெரிய சக்தியாக வளரவேண்டிய எனது தாயார், மேயர் உமா மகேஸ்வரி வருகையால் செல்லாக்காசாகி விட்டார். இதனால் எனக்கு சிறு வயது முதலே உமா மகேஸ்வரியை தீர்த்து கட்ட வேண்டும் என்ற வெறி ஏற்பட்டது. யாருக்கும் தெரியாமல் எப்படி இந்த கொலையை நடத்துவது என்று சிந்தித்து பார்த்தேன். 

ஜூலை 23ந்தேதி அனைத்து போலீசாரும், மாஞ்சோலை தோட்ட தொழிலாளர் நினைவு அஞ்சலி செலுத்தும் நிகழ்ச்சியில் பாதுகாப்பு பணியில் இருப்பார்கள் என்று தெரிந்து அன்றைய தினத்தை தேர்ந்தெடுத்து நெல்லைக்கு வந்தேன். முதலில் எனது காரில் உமா மகேஸ்வரியின் வீட்டருகே சுற்றி சுற்றி வந்து வேறு யாரும் உள்ளார்களா என்று பார்த்தேன்.

 வேறு யாரும் உள்ளே இல்லை என்று தெரிந்தது. இதைத் தொடர்ந்து எனது காரை என்.ஜி.ஓ. ‘பி’ காலனி விலக்கு அருகே உள்ள ஒரு கிறிஸ்தவ சர்ச் அருகே நிறுத்திவிட்டு அங்கிருந்து உமா மகேஸ்வரி வீட்டுக்கு நடந்து வந்தேன். என்னை பார்த்ததும் உமா மகேஸ்வரியின் கணவர் முருக சங்கரன் என்ன வி‌ஷயம் என்று கேட்டார். 

எனது அம்மா உங்களிடம் பேசி விட்டு வர சொன்னார் என்றதும் அவர் கதவை திறந்தார். நான் உள்ளே சென்று ஷோபாவில் அமர்ந்து அவரிடம் பேசினேன். அப்போது உங்களால் தான் என் அம்மாவின் அரசியல் வாழ்வு முடிந்து விட்டது என ஆவேசமாக கூறி திட்டினேன். 

அப்போது வீட்டுக்குள் இருந்து உமா மகேஸ்வரி வந்து ‘இப்படி பேசக்கூடாது வெளியே போ’ என்றார். ஏற்கனவே ஆத்திரத்தில் இருந்த நான் மறைத்து வைத்திருந்த கத்தியை எடுத்து உமா மகேஸ்வரியை குத்தினேன். அவர் ரத்த வெள்ளத்தில் கீழே விழுந்தார். அப்போது முருக சங்கரன் கத்தியபடி என்னை பிடிக்க முயன்றார். அவரையும் கத்தியால் குத்தினேன். இதனால் அவர் உயிர் பிழைக்க படுக்கை அறைக்குள் புகுந்து கதவை மூட முயன்றார். 

ஆனால் நான் அவரை கீழே தள்ளி சரமாரியாக கத்தியால் குத்தினேன். அவர் பிணமாகி விட்டார் என்று தெரிந்ததும், வெளியே வந்தேன். அங்கு உமா மகேஸ்வரி உயிருக்கு போராடி கொண்டிருந்தார். இதனால் மீண்டும் அவரை ஆத்திரம் தீரும் வரை குத்தி கொலை செய்தேன். அதன் பிறகு நகைக்காக கொலை நடந்தது போல் தெரிய வேண்டும் என்று உமா மகேஸ்வரி, 

அவரது கணவர் உடலில் இருந்த அனைத்து நகைகளையும் வேகமாக இழுத்து அறுத்து எடுத்தேன். அனைத்து நகைகளையும் ஒரு பையில் போட்டு பின்னர் பீரோவை உடைத்து நகைகள்-பணம் கொள்ளை நடந்து இருப்பது போல கலைத்து போட்டேன்.அப்போது முன்பக்க காம்பவுண்டு கேட் திறக்கும் சத்தம் கேட்டது. இதனால் யார் வருகிறார்கள் என்று மறைந்து இருந்து பார்த்தேன்.

 அப்போது வேலைக்கார பெண் மாரி உள்ளே வந்து கொலை சம்பவத்தை பார்த்து வெளியே ஓட முயன்றார். மறைந்து இருந்த நான் வெளியே வந்து மாரியை தப்பவிடாமல் பிடித்தேன். அவரை வெளியே விட்டால், என்னை பற்றி தகவல்களை கூறி விடுவார் என்று பயந்து அவரையும் கொலை செய்ய முடிவு செய்து, சமையல் அறைக்கு இழுத்து சென்று அங்கிருந்த கத்தியால் அவரை குத்தினேன். 

அவர் சாகாமல் போராடியதால் பாத்திரங்களால் தலையில் வேகமாக அடித்து கொலை செய்தேன். பின்னர் கொலை செய்யப்பட்ட இடங்களில் ஏதாவது தடயம் கிடக்கிறதா என்று தேடி எடுத்து கைரேகைகளையும் அழித்தேன். கொலைக்கு பயன்படுத்திய கத்தி, நகைகள் வைத்திருந்த பைக்குள் நன்றாக கழுவி போட்டுக் கொண்டேன். எனது உடலில் உள்ள ரத்தக்கறைகளையும், குளியலறைக்கு சென்று நன்றாக கழுவினேன். பின்னர் நகை பையுடன் எதுவும் தெரியாதது போல வெளியே வந்து, எனது காருக்கு நடந்து சென்றேன்.

 அங்கிருந்து காரை எடுத்துக்கொண்டு வீட்டுக்கு சென்று விட்டேன். போகும்போது செல்போனில் மதுரையில் இருந்த எனது தாயாருக்கும் தகவல் தெரிவித்தேன். அவர்கள் பதறினார்கள். நான் காரில் தாமிரபரணி ஆற்றுப்பாலம் வழியாக சென்றபோது நகைகளையும், கத்தியையும் வைத்திருந்த பையை ஆற்றில் வீசி விட்டு சென்று விட்டேன். 

என்னை யாரும் கண்டுபிடிக்க முடியாது என்று நினைத்தேன். ஆனால் போலீசார் என்னை கண்டுபிடித்து கைது செய்து விட்டனர். இவ்வாறு அவர் வாக்குமூலத்தில் கூறியுள்ளார். இதையே திரும்ப திரும்ப அவர் அச்சு பிசகாமல் கூறி வருகிறாராம். ஆனால் போலீசார் கூலிப்படை இல்லாமல் 3 பேரை தன்னந்தனியாக ஒருவரே கொலை செய்வது சாத்தியமா? என்பதால் கார்த்திகேயனிடம் தொடர்ந்து விசாரணை நடத்தி வருகிறார்கள்.