[Celebrorn]

Chapter 49

Agle kuch ghante Shreya Rishabh ke side se bilkul nahi hati. Use hospital mein baithe baithe 36 ghanton se jyada ho chuke they, par use aisa lag raha tha ki kahin woh yahan se hili toh Rohit ko fir se na kho de.

Beech beech mein kabhi Rishabh hosh mein aa jaata aur kabhi Rohit. Dono ka baat karne ka tareeka bilkul alag hota, bilkul jaise woh dono pehle they. Shreya ko un dono se baat karke jo kuch pata chala tha usse aisa lag raha tha jaise woh apni kuch kuch memories kho chuke they, aur shareer ke andar kahin koi jagah thi, shayad Rishabh ke dimaag mein... jahan woh ek doosre se baat kar sakte they.

Jab kabhi kamre mein nurse ya doctor aate, Shreya unke saamne normal hone ki acting karti. Woh nahi chahti thi ki woh Rohit / Rishabh waali baat ko jyada kare... kahin doctors use pagal na samajh le... ya usse bhi bura... kahin woh Rohit ko usse na chheen le.

Filhaal Rishabh hosh mein tha. Is waqt woh pehle se thoda jyada recovered aur fresh lag raha tha.

Rishabh - Ma'am... aap kafi tired lag rahi hain... aap kuch der ghar chali jaiye na...

Shreya - Nahi nahi... main theek hoon... Rohit kya kar raha hai andar... tum usse yahan se baat kar sakte ho kya?

Rishabh - Nahi Ma'am... main jab hosh mein hota hoon toh usse baat nahi kar sakta. Theek hai woh... kafi jyada shock tha uske liye bhi... yeh janna ki woh... woh... ab nahi raha...

Rishabh ki baat jakar Shreya ko ekdam se chubhi. Woh yahan tha toh.... toh Rishabh kaise keh sakta tha ki woh "ab nahi raha".

Rishabh ne Shreya ka utra hua chehra dekhte hue kaha - I mean... usko aisa laga... ki bas... uski body... Woh toh yahin hai abhi... I am sorry agar aapko bura laga ho toh...

Shreya - Nahi nahi... tumne kuch galat nahi kaha.

Rishabh - Ma'am... woh... aapne mere mummy ko call kiya kya?

Shreya ekdam hadbadate hue boli - Haan... main call milaya tha... par woh mil nahi raha tha...

Yeh bilkul jhooth tha. Usne koi call nahi milaya tha. Agar woh Rishabh ki mummy ko call kar deti, aur woh log yahan aa jaate, toh woh yahan kis adhikaar se ruk paati? Woh log apne bete ko paa lete aur Shreya apne bete ko kho deti. Uski mamta use yeh jhooth bolne par majboor kar rahi thi.

Rishabh - Oh acha...

Shreya - Koi nahi... main try karti rahungi... par main hoon na yahan.... tumhe fiqr karne ki zaroorat nahi hai...

Rishabh - Thank you Ma'am...

Shreya - Thank you ki zaroorat nahi hai.... thank you toh shayad mujhe tumhe kehna chahiye... tumhari wajah se... tumhare shareer mein... mera Rohit zinda hai...

Rishabh - Par shayad is shareer mein uske bhi toh parts hain.... isliye shayad...

Shreya - Haan shayad...

Ekdam se Shreya ko aisa laga jaise uska dimaag ghoom raha ho aur woh chakkar kha kar gir jayegi.

Rishabh - Ma'am! Aap apni halat dekheyi please... aapko thode rest ki zaroorat hai... 

Shreya - Nahi... main theek hoon....

Rishabh - Please Ma'am... Kuch der pehle Rohit bhi yehi kar raha tha... aap thodi der ke liye ghar ho aaiye...

Shreya ne shayad 4-5 dino se apne kapde nahi badle they aur uske poore shareer mein se badboo aane lagi thi. Uska shareer kafi kamzor sa mehsoos ho raha tha, aur dimaag jaise khaali sa ho chuka ho. Shayad Rishabh aur Rohit theek keh rahe they, par agar jab woh wapas aayi aur Rohit yahan nahi hua toh?

Shreya - Rishabh.... mujhe waada karo... Rohit ko kahin nahi jaane doge... use apne saath rakhoge...

Rishabh - Ma'am....

Rishabh ko samajh nahi aa raha tha woh yeh waada kaise kar de. Use toh khud ab tak samajh nahi aaya tha ki yeh sab kaise possible tha. Par Shreya ki badi si aankhen use ek maa se yeh waada karne par mazboor kar rahi.

Rishabh - Ji Ma'am...

Shreya - Main bas 2-3 ghante mein wapas aati hoon.... kuch khane ka bhi bana kar le aayungi...

Rishabh - Ma'am... suniye...

Par Shreya ne uski baat nahi suni aur Rishabh ko ek baar ji bhar ke dekhne ke baad woh uth khadi hui aur hospital ke bahar jaane lagi. Beech hallway mein use Doctor mil gaye.

Shreya - Doctor Saab... main bas thodi der ke liye ghar jaa rahi hoon... abhi aati hoon...

Doctor - That's good... I think ab uski body stabilize ho rahi hai... aur woh Rishabh Rohit wali confusion khatam ho rahi hai...

Shreya - Ji... aap use kab chutti de sakte hain?

Doctor - Meri advice rahegi ki kuch din yahin hospital mein rahe... taaki hum ache se monitor kar sake...

Shreya - Nahi... main ghar par ache se care kar lungi uski... aap fiqr mat kariye...

Doctor - Uske parents? Unse baat hui?

Shreya - Haan... meri baat hui... woh abhi kahin fase hue hain... main... main filhaal sab manage kar lungi... Rishabh... woh sign kar dega papers...

Doctor - Ok... ultimately aapki aur Rishabh ki call hai.... kal tak release karne ka try karte hain...

Shreya - Thank you Doctor saab....

Shreya Doctor ko thank you bol kar hospital se bahar nikal gayi. Usne bahar se apni society ke liye auto kiya aur Auto mein kisi tarah jhoolte hue apni building tak pahuchi. Bahar Guard ne use hairani bhari nazron se dekha, par Shreya use ignore karte hue building ke andar badh gayi.

Jaise hi woh building ke andar pahuchi, neeche kuch log khade hue dikhe, un mein se Khanna ji, unki beti Naina bhi thi. Naina ne turant aage badhte hue Shreya ko hug karte hue sambhala. Uski aankhen laal padi thi, jaise woh bohot ro chuki ho.

Khanna - Shreya Ji! Kahan thi aap... hum sab log aapko dhoondh rahe they... aapka phone bhi nahi lag raha tha.

Shreya - Haan.... shayad mere phone ki battery khatam ho gayi thi...

Khanna - Par aap aise bina bataye chali gayi thi... sab log bohot pareshaan they... kahin aapko kuch....

Shreya ki kamzor thaki hui aawaz bahar nikli - Nahi... main... theek hoon...

Khanna - Naina beta... tum inhe upar lekar chalo.... hamare ghar mein...

Naina - Ji Papa...

Shreya - Nahi nahi... main apne ghar jayungi... 

Naina ekdam fir se ro padi - Aunty... uhhh.... I am sorry aunty....

Naina apne andar ek guilt ki feeling liye ghoom rahi thi. Agar us din woh Rohit ko wahan college ke bahar woh sab keh kar na chhod aayi hoti, toh shayad yeh sab nahi hota.

Shreya ko samajh nahi aa raha tha woh kya kahe. Ek taraf Rohit duniya ke liye jaa chuka tha, doosri taraf woh kisi tarah Rishabh ke andar abhi bhi zinda tha. Par abhi kisi ko bhi yeh sab kehna sahi nahi hoga.

Khanna - Naina... aap ko sambhal beta... Shreya ji ko upar lekar chalo...

Naina ne apne aansu pochte hue kaha - Haan Papa... chaliye aunty...

Shreya Naina ke saath lift mein upar jaane lagi.

Naina - Aunty woh... Tarun uncle... woh bhi kayi baar aa chuke hain... bohot pareshaan they aapke liye...

Shreya - Hmmmm....

Naina - Main unhe call karke bata deti hoon ki aap theek ho... aap unse baat kar lo ek baar...

Shreya - Baad mein call kar lena please... abhi mera mann nahi hai kisi se bhi baat karne ka...

Naina ne apna phone neeche kar liya - Haan... main samajh sakti hoon....

Woh dono Shreya ke ghar ke bahar pahuche. Naina se Shreya ki taraf pareshaan hote hue dekha.

Naina ki aankhon mein darr saaf tha - Aunty... aap sure ho ki aap akele... aap kuch... aap kuch...

Shreya - Pareshaan mat ho... main kuch galat nahi karungi... promise...

Naina - Aunty main aapke saath reh lungi... aap apne aap ko akela mat samajhna... hum sab log hain aapke liye...

Shreya ne pyaar se Naina ke gaal par haath fera - Naina... thank you beta... abhi tum jayo... main bohot thaki hui hoon...

Naina ne dheere se sar hilaya aur Shreya ne kisi tarah ghar ka darwaza khola aur andar ghusi. Andar aisa lag raha tha jaise woh apne khud ke ghar ko hi bhool gayi ho. Sab kuch ekdam bikhra hua sa alag sa lag raha tha. Hall ke beech mein Rohit ki ek photo thi, jis par ek foolo ki maala chadhi hui thi. Usne jaldi se aage badh kar maala ko uski photo se hataya aur photo ko utha kar apne seene se laga liya.

Uska Rohit kahin nahi gaya tha... yahin tha... use bas ab jaldi se uske paas wapas jaana tha.