[Greenwood]

Update 57


Raat ke kareeb gyarah baj chuke the.
Bengaluru ki sadkon par gaadiyon ki awaazein dheere-dheere kam ho rahi thi, lekin Flat 303 ke andar waqt jaise ek hi jagah ruk gaya tha.
Dining table par Jheel ka letter pada tha.
Uske paas chocolates ka dabba, flowers ka bouquet aur ice cream ka packet rakha tha. Reyansh ne ghar aate waqt kitne pyaar se yeh sab khareeda tha. Usne socha tha, Jheel darwaaza kholegi, use dekhkar muskuraayegi aur phir shayad usse poochhegi ki itni saari cheezein laane ki kya zaroorat thi.
Woh uske sawaal par apna wahi confident jawaab deta.
Tumhare liye hai. Ab sawaal mat karo.
Lekin aaj darwaaza khula toh tha, magar Jheel ke liye nahi.
Woh ja chuki thi.
Aur apne peeche ek aisa letter chhod gayi thi jiske har lafz ne Reyansh ko andar tak hila diya tha.
Reyansh dining chair par baitha tha. Uski nazrein letter par tiki hui thi.
Woh use pehle bhi kai baar padh chuka tha.
Phir bhi usne use dobara utha liya.
Jaise shayad agli baar padhne par lafz badal jaayenge.
Jaise shayad kisi line ke beech use koi aisi baat mil jaaye jo abhi tak uski samajh mein nahi aayi.
Lekin letter wahi tha.
Jheel ja chuki thi.
Aur uska number band nahi, balki invalid aa raha tha.
Reyansh ne apna phone uthaya.
Contacts mein Jheel ka naam khola.
Kuch seconds tak screen dekhta raha.
Phir call button daba diya.
The number you have dialed is invalid.
Usne call kaat di.
Dobara milaya.
Wahi jawaab.
Reyansh ne phone table par rakh diya aur dono haathon se apna chehra dhak liya.
"Yeh kya kar diya tumne, Jheel?"
Uski awaaz khaali kamre mein do pal tak ruki, phir khamoshi mein kho gayi.
Kisi ne jawaab nahi diya.
Usne kabhi nahi socha tha ki ek din woh kisi aise insaan ko call karega jisse woh kal tak apne din ka sabse khoobsurat hissa maanta tha, aur saamne se uske wajood ka koi nishaan bhi nahi milega.
Uske dimaag mein letter ki ek line baar-baar ghoom rahi thi.
Tum apni pehli zindagi ko kabhi poori tarah bhula nahi sakoge.
Reyansh ne aankhein band kar li.
"Maine toh tumse kuch chhupaya nahi tha..."
Woh khud se bol raha tha.
"Jab tumhe bataya, tab bhi darr tha ki kahin tum door na ho jao. Lekin tumne toh kaha tha ki tum samajhti ho."
Usne saamne rakhe bouquet ki taraf dekha.
Phool ab bhi taaze the.
Bas jin haathon mein dene ke liye khareede the, woh haath ab uske paas nahi the.
Reyansh ne bouquet uthaya aur kuch pal tak use dekhta raha. Phir use wapas table par rakh diya.
Uska mann hua ki sab kuch hata de.
Chocolates, flowers, ice cream, letter.
Har woh cheez jo uske saamne Jheel ki yaad lekar aa rahi thi.
Lekin usne kuch nahi kiya.
Woh bas kursi par baitha raha.
Us raat usne dinner nahi kiya.
Ice cream freezer mein rakh di, chocolates ka dabba band kar diya aur bedroom mein chala gaya.
Bed par letne ke baad bhi uski nazrein chhat par tiki rahi.
Uska phone paas hi pada tha.
Har kuch minute baad woh use uthata, screen dekhta aur phir rakh deta.
Koi message nahi tha.
Koi missed call nahi.
Kuch bhi nahi.
Raat ke kareeb do baje usne phone silent karke side mein rakh diya.
Lekin neend usse ab bhi door thi.
Usne karwat badli.
Aankhein band ki.
Phir khol di.
Aur aakhirkaar, thak kar apna haath aankhon par rakh liya.
Us ghar mein sab kuch apni jagah par tha. Bas Reyansh ki zindagi mein ek jagah khaali ho gayi thi.


Subah saat baje alarm baja.
Pehle roz ki tarah Reyansh ne haath badhakar use band kar diya.
Aankhein kholne ki koshish ki, lekin palkein bhaari thi.
Usne dobara aankhein band kar li.
Saat bajkar das minute.
Phone phir vibrate hua.
Office ka reminder screen par chamak raha tha.

9:30 AM | Brand Review Meeting
Reyansh ne notification dekha aur phone bed par gira diya.
"Bas paanch minute..."
Woh aadat ke mutabik bol gaya.
Lekin paanch minute baad bhi woh wahi pada tha.
Aakhirkaar usne uthkar baithne ki koshish ki. Baal bikhre hue the, chehre par thakaan saaf thi aur aankhon mein woh chamak nahi thi jo aam taur par subah-subah bhi uske chehre par rehti thi.


Woh bathroom gaya.
Mirror ke saamne khada hua toh kuch seconds tak apne reflection ko dekhta raha.
Phir nal kholkar chehre par paani maara.
Do baar.
Teen baar.
Usne towel se chehra ponchha aur khud ko dekhte hue halki si muskurahat laane ki koshish ki.
"Come on, Reyansh. Get up."
Uski awaaz mein pehle jaisi shararat nahi thi.
Woh taiyaar hone laga.
Shirt pehni, baal set kiye aur ghadi baandhi. Phir bedroom se nikal kar dining area mein aaya.
Table saaf nahi hui thi.
Letter ab bhi wahin pada tha.
Reyansh kuch pal use dekhta raha.
Phir usne nazrein hata li.
Kitchen mein jaakar paani piya. Fridge khola, andar rakhi ice cream dekhi aur bina kuch nikale fridge band kar diya.
Uska pet khaali tha, lekin bhookh nahi thi.
Phone uthakar cab book karne ke liye app khola. Phir use yaad aaya ki use office ke liye kuch documents bhi lene hain.
Woh bedroom mein wapas gaya.
Laptop bag uthaya aur darwaaze ki taraf badha.
Lekin ghar se nikalne se pehle uski nazar ek baar phir dining table par padi.
Usne ek lambi saans li aur darwaaza band kar diya.
Aaj pehli baar use apne hi ghar se nikalte waqt aisa laga jaise woh kisi aisi jagah se door ja raha ho jahan lautkar aane ka koi matlab nahi bacha.


Subah kareeb aath baje Shalu Flat 303 pahunchi.
Usne bell bajayi.
Koi jawaab nahi.
Usne dobara bell bajayi.
Phir use yaad aaya ki Reyansh aam taur par is waqt office nikalne ki taiyaari mein hota hai.
Usne apna phone nikala aur use message karne hi wali thi ki darwaaza khul gaya.
Reyansh saamne tha.
"Good morning, sir."
"Morning, Shalu."
Shalu ne uske chehre ki taraf dekha.
"Tabiyat theek hai?"
Reyansh ne chaabi uthate hue jawaab diya, "Haan. Kyun?"
"Aise hi. Aap thode thake hue lag rahe ho."
"Neend poori nahi hui."
"Kal der se soye the?"
Reyansh ek pal ke liye ruka.
"Haath mein kaam tha."
Shalu ne use dekha, lekin kuch aur nahi poochha.
"Achha, aap jao. Main ghar dekh lungi."
Reyansh ne sir hilaya.
"Dining table par kuch cheezein rakhi hain. Unhe abhi rehne dena."
Shalu ki nazar uske kandhe ke paar dining area ki taraf gayi.
Woh samajh gayi ki Reyansh kis cheez ki baat kar raha hai.
"Ji."
Reyansh ne darwaaza band karne se pehle kaha, "Aur haan, aaj lunch banane ki zaroorat nahi. Kuch khaane ka mann hua toh office mein kha lunga."
"Par aapne subah bhi kuch nahi khaya."
Reyansh ne uski taraf dekha.
"Tumhe kaise pata?"
"Kitchen mein kuch bana hi nahi tha. Aur aapki chai bhi waise hi rakhi thi."
Reyansh kuch seconds chup raha.
Phir halki si muskurahat ke saath bola, "Tumhari observation skills din-ba-din badh rahi hain."
Shalu ne bhi halki si smile ki.
"Practice kar rahi hoon."
"Achha hai. Bas meri attendance mat lagane lag jaana."
"Aap time par office pahunch jao, phir attendance ki zaroorat hi nahi padegi."
Reyansh ke honton par is baar sach mein ek chhoti si muskurahat aayi.
"Very funny."
"Thank you, sir."
Woh darwaaze se bahar nikal gaya.
Shalu kuch pal wahin khadi rahi.
Phir usne darwaaza band kiya aur dheere-dheere kitchen ki taraf badh gayi.
Uska mann kaam shuru karne ka nahi ho raha tha.
Kal shaam jab woh ghar aayi thi, tab usne Jheel ka letter dekh liya tha. Usne poora letter padha tha. Isi liye jab Reyansh ghar lauta, toh woh kitchen mein chupchaap khadi thi.
Woh Reyansh ko kuch kehna chahti thi.
Lekin kya?
Woh Jheel ke jaane ki wajah nahi jaanti thi. Use bas letter mein likhi baatein pata thi.
Aur use yeh bhi pata tha ki Reyansh ne woh letter padhne ke baad kis tarah usse baar-baar phone karne ki koshish ki thi.
Shalu ne dining table ki taraf dekha.
Letter ab bhi wahin pada tha.
Usne use chhoone ki koshish nahi ki.
Bas table ke doosre hisse par rakha ek khaali cup uthaya aur sink mein rakh diya.
Phir apna kaam shuru kar diya.
Kuch dard aise hote hain jinmein madad karne ka mann toh hota hai, lekin samajh nahi aata ki shuruaat kahan se ki jaaye.
Shalu ke liye yeh unhi mein se ek tha

Office ke reception par pahunchte hi Reyansh ne apna usual confident expression laane ki koshish ki.
Usne security desk par entry ki, lift mein gaya aur apne floor par utar gaya.
"Good morning, sir!"
Ek junior employee ne use dekhkar greet kiya.
"Morning."
Reyansh apni desk tak pahunch gaya. Laptop khola aur emails check karne laga.
Kuch hi minute baad Neha ek file lekar uske paas aayi.
"Good morning, Mr. Senior Brand Manager."
Reyansh ne screen se nazar nahi hatayi.
"Good morning, Ms. Employee of the Month."
Neha ne file uski desk par rakhi.
"Employee of the Month toh nahi, lekin aapki meeting ka data ready hai."
"Excellent. Mujhe pata tha tum mujhe disappoint nahi karogi."
"Sir, aap mujhe kaam ke liye appreciate kar rahe ho ya apna kaam mujh par daal rahe ho?"
"Depends. Tumhari file kitni achhi hai."
Neha hans padi.
"File achhi hai. Aapki kismat bhi achhi hai ki maine time par bana di."
Reyansh ne file kholi.
"Isliye toh tumhe team mein rakha hai."
Neha ne uske chehre ko gaur se dekha.
Uski smile dekhne mein normal thi, lekin uski aankhon mein kuch kami thi.
"Waise, aap theek ho?"
Reyansh ne file se nazar uthayi.
"Sab mujhe aaj yahi kyun poochh rahe hain?"
"Matlab?"
"Subah Shalu ne poochha. Ab tum poochh rahi ho. Kya mere chehre par koi notice chipka hua hai?"
Neha ne apni hansi rokne ki koshish ki.
"Notice toh nahi, lekin aapke chehre par aaj usual confidence ka attendance short hai."
Reyansh ne chair par peeche hote hue kaha, "Mera confidence late aayega. Traffic mein phansa hai."
Neha muskuraayi.
"Achha. Jab aa jaaye toh use meeting room mein bhej dena."
"Sure. Aur tum apna kaam karo."
Neha ne file ki taraf ishara kiya.
"Isi liye toh aayi thi."
Woh wapas apni desk ki taraf chali gayi.
Reyansh kuch pal uske jaane ki taraf dekhta raha.
Phir usne file kholi aur kaam mein lag gaya.
Meeting shuru hui.
Numbers, campaign performance, upcoming launch aur client feedback par discussion chalta raha. Reyansh ne har sawaal ka jawaab diya. Jahan zaroorat thi, decisions liye aur team ko instructions diye.
Bahar se dekho toh koi nahi keh sakta tha ki uske andar kuch theek nahi chal raha.
Lekin meeting ke beech ek pal aisa aaya jab client presentation ke ek slide par uski nazar ruk gayi.
Slide par ek line thi:
Some connections change the way we see everything.
Woh line campaign ke concept ka hissa thi.
Lekin Reyansh ko use padhte hi Jheel ki yaad aa gayi.
Usne turant nazar hata li.
"Reyansh?"
Neha ki awaaz se woh wapas present mein aaya.
"Haan?"
"Client is point par aapki opinion maang rahe hain."
Reyansh ne screen ki taraf dekha.
"Right. We should keep the message simple. Emotional, but not over-explained. Audience ko feel hona chahiye, samajhne ke liye unhe instructions nahi chahiye."
Client ne sir hilaya.
"Agreed."
Meeting aage badh gayi.
Lekin Reyansh ke dimaag mein woh line reh gayi.
Some connections change the way we see everything.
Usne socha, shayad yeh sach tha.
Kuch log zindagi mein aate hain aur sab kuch pehle jaisa nahi rehne dete.
Aur phir jab woh chale jaate hain, toh unke baad bhi kuch pehle jaisa nahi hota.


Dopahar ke kareeb ek baje Reyansh apni desk par baitha tha jab phone vibrate hua.
Arshad Calling...
Reyansh ne call receive ki.
"Bol, berozgaar aadmi."
Doosri taraf se turant jawaab aaya, "Berozgaar nahi hoon. Main creative freedom ka maalik hoon."
"Achha? Toh creative freedom mein lunch bhi free milta hai?"
"Nahi, uske liye bank balance chahiye. Waise tu bata, zinda hai?"
"Filhaal."
Arshad ki awaaz ka andaaz badla.
"Filhaal matlab?"
Reyansh ne saamne rakhi file band kar di.
"Kuch nahi. Bas thoda tired hoon."
"Kal raat soya nahi kya?"
"Neend nahi aayi."
"Office ka kaam?"
Reyansh kuch pal chup raha.
Phir bola, "Nahi."
Arshad ne bhi kuch seconds tak jawaab nahi diya.
"Jheel?"
Reyansh ki ungli phone ke kinare par ruk gayi.

"Haan."
Arshad ki awaaz ab pehle se dheemi thi.
"Kya hua?"
Reyansh ne aankhein band ki.
"Chali gayi."
"Matlab?"
"Matlab, Arshad, woh chali gayi. Apne flat se bhi. Meri zindagi se bhi, shayad."
Doosri taraf khamoshi chha gayi.
Arshad ne turant koi joke nahi maara.
"Tu theek hai?"
Reyansh ke honton par ek thaki hui muskurahat aayi.
"Sab yahi kyun poochh rahe hain?"
"Kyunki tu jab theek nahi hota, tab bhi bolta hai ki tu theek hai."
Reyansh ne desk par ungliyon se halki tapping ki.
"Usne letter chhoda hai."
"Letter mein kya likha hai?"
Reyansh ne kuch pal socha.
Phir bola, "Usne likha hai ki main apni pehli zindagi ko kabhi bhula nahi sakta. Ki woh meri zindagi mein doosri aurat bankar nahi reh sakti."
Arshad ne dheere se saans li.
"Usne aisa kaha?"
"Haan."
"Tu usse kya kehta tha?"
"Main usse kuch chhupana nahi chahta tha. Maine use sab bataya tha jo batana zaroori tha. Maine kabhi usse yeh nahi kaha ki woh kisi aur ki jagah le."
Reyansh ki awaaz aakhri jumle par bhaari ho gayi.
"Phir bhi woh chali gayi."
Arshad kuch pal chup raha.
"Rey..."
"Hmm?"
"Main abhi tujhe koi lecture nahi dunga. Na yeh bolunga ki sab theek ho jaayega, na yeh ki tu use bhool ja."
Reyansh chupchaap sunta raha.
"Bas itna bolunga ki abhi jo kuch usne letter mein likha hai, usi ko apne baare mein final sach mat bana lena. Tu hurt hai. Tujhe waqt chahiye. Baaki baatein baad mein."
Reyansh ne aankhein khol di.
"Tu kabse itni samajhdaar baatein karne laga?"
"Jabse meri girlfriend ne mujhe samjha diya ki har baat ka joke nahi banana chahiye."
Reyansh ke chehre par halki si smile aayi.
"Toh tu sudhar gaya?"
"Nahi. Bas kuch situations mein acting kar leta hoon."
Reyansh hans diya.
Bahut zor se nahi.
Bas ek chhoti si hansi.
Lekin pichhli raat ke baad woh pehli baar tha jab uske chehre par kuch pal ke liye sachchi muskurahat aayi thi.
Arshad ne bhi uski hansi sunkar rahat ki saans li.
"Achha sun, shaam ko milte hain?"
Reyansh ne apni diary kholi.
"Aaj mushkil hai. Kaam hai."
"Kaam ya akela rehna hai?"
Reyansh ne jawaab dene mein waqt liya.
"Shayad dono."
Arshad ne use force nahi kiya.
"Theek hai. Lekin phone uthana. Main message karunga."
"Tu message nahi karega. Tu paanch reels bhejega."
"Quality content ko reels kehte hain, dost."
"Achha, content creator. Ab mujhe kaam karne de."
"Kar le. Aur haan..."
"Haan?"
"Khud ko us letter ke lafzon mein mat naapna."
Reyansh chup raha.
Arshad ne call end kar di.
Reyansh ne phone desk par rakh diya.
Kuch der tak woh screen ko dekhta raha.
Phir usne apna laptop khola aur kaam par wapas lag gaya.
Arshad ki baat se uska dard khatam nahi hua tha.
Lekin kam se kam ab use yeh toh mehsoos hua ki woh apni takleef ke saath bilkul akela nahi tha.


Shaam ke saat baje Reyansh office se nikla.
Aaj usne overtime karne ka bahaana nahi banaya. Kaam jitna ho sakta tha, usne khatam kar diya tha.
Ghar pahunchkar usne darwaaza khola.
Andar aate hi uski nazar dining table par gayi.
Shalu apna kaam khatam karke ja chuki thi. Ghar saaf tha. Kitchen mein bartan apni jagah par the.
Lekin letter ab bhi table par pada tha.
Shalu ne use chhua nahi tha.
Reyansh ne laptop bag sofa par rakha aur table ke paas aakar khada ho gaya.
Usne letter uthaya.
Ek baar phir padha.
Phir use fold karke table par rakh diya.
Uske baad woh kitchen mein gaya, fridge se paani ki bottle nikali aur seedha sofa par aakar baith gaya.
TV ka remote saamne pada tha.
Usne TV chala diya.
Screen par koi comedy show chal raha tha. Audience hans rahi thi. Host jokes maar raha tha.
Reyansh ne kuch minute dekha.
Phir TV band kar diya.
Ghar phir khamosh ho gaya.
Usne phone uthaya aur contacts mein Jheel ka naam khola.
Call karne ka mann hua.
Lekin number invalid aane ka jawaab use pehle se pata tha.
Usne phone lock kar diya.
Phir WhatsApp khola.
Jheel ki chat ab bhi wahi thi.
Unki purani baatein.


Uske messages.
Jheel ki chhoti-chhoti replies.
Ek jagah uski nazar ek message par ruk gayi.
Tum meri favourite ho.
Reyansh ne screen ko kuch der dekha.
Phir phone neeche kar liya.
"Favourite..."
Uske honton se lafz bahut dheere nikla.
"Phir chhodkar kyun chali gayi?"
Koi jawaab nahi tha.
Usne phone sofa par rakh diya aur apna sir peeche tika liya.
Aankhein band karte hi use Jheel ki hansi yaad aayi.
Uska chai ka cup pakadne ka tareeka.
Dinner ke waqt uska chhoti-chhoti baaton par hansna.
Woh pal jab usne kaha tha ki woh uske saath apni tarah reh sakti hai.
Reyansh ne aankhein khol di.
Usne khud ko yaad dilaya ki use kal office jaana hai. Kaam karna hai. Logon se milna hai.
Zindagi ko aage chalna hai.
Lekin dil ko samjhana itna aasaan nahi tha.
Usne phone uthaya aur Arshad ka chat khola.
Ek message type kiya:
Bhai, tu free hai?
Woh kuch seconds tak message ko dekhta raha.
Phir send kar diya.
Kuch hi pal baad reply aaya.
Arshad: Haan. Kya hua?
Reyansh ne likha:
Bas baat karni thi.
Arshad ka jawaab turant aaya.
Arshad: Call kar.
Reyansh ne call button daba diya.
Aur is baar jab Arshad ne phone uthaya, toh Reyansh ne apne dard ko mazaak mein chhupane ki koshish nahi ki.
Woh bolta raha.
Arshad sunta raha.
Kabhi beech mein kuch poochhta, kabhi chup ho jaata.
Raat dheere-dheere aage badhti rahi.
Aur Reyansh ke ghar mein, Jheel ke jaane ke baad pehli baar, khamoshi ke beech ek dost ki awaaz thi.


Usi waqt, Bengaluru ke doosre hisse mein Arshad apne apartment ki balcony mein khada tha.
Phone par Reyansh se baat khatam ho chuki thi.
Usne phone neeche kiya aur kuch der sadak ki taraf dekhta raha.
Andar se Sakshi ki awaaz aayi.
"Arshad, dinner order karna hai ya nahi?"
Arshad ne palatkar dekha.
"Haan, karta hoon. Kya khaogi?"
"Jo tumhe theek lage."
Arshad ne phone par food delivery app khola.
"Pizza?"
"Nahi."
"Chinese?"
"Nahi."
"Dosa?"
"Arshad, mujhe kuch light khana hai."
Arshad ne use dekha.
"Achha, toh light mein kya options hain?"
Sakshi ne apna laptop band kiya.
"Soup aur sandwich le lete hain."
Arshad ne order kar diya.
"Done. Ab khush?"
Sakshi ne uski taraf dekha.
"Main khush ya naraaz hone ki baat nahi kar rahi."
"Toh phir?"
"Bas itna ki tum kabhi-kabhi meri baat poori sun liya karo."
Arshad ke chehre par hairaani aayi.
"Arre, maine toh tumhare kehne par hi order kiya."
"Order karne se pehle bhi toh main tumhe bata rahi thi ki mujhe kya chahiye."
"Toh maine sun liya na."
Sakshi ne gehri saans li.
"Chhodo. Ab is baat par bhi behas nahi karni."
Arshad ne haath utha diye.
"Theek hai, madam. No debate."
Sakshi ne laptop dobara khol liya.
Arshad kuch seconds use dekhta raha, phir balcony ki taraf mud gaya.
Usne socha, shayad Sakshi ka din kharaab raha hoga.
Aakhir har kisi ke bure din hote hain.
Woh is chhoti si baat ko wahi chhodkar apna phone check karne laga.
Usne Reyansh ka chat khola aur message type kiya:
Kal subah call karunga. Aur haan, breakfast kar lena.
Phir usne phone lock kar diya.
Andar Sakshi apne laptop par kaam kar rahi thi.
Woh ab bhi naraaz thi, lekin usne Arshad se kuch aur nahi kaha.
Dono ek hi ghar mein the.
Unke beech koi bada jhagda nahi hua tha.
Na kisi ne rishta khatm karne ki baat ki thi.
Na kisi ne gusse mein darwaaza patka tha.
Bas ek chhoti si baat thi, jo kuch der pehle tak aasani se sulajh sakti thi.
Lekin kabhi-kabhi rishte ek bade jhagde se nahi, balki un chhoti baaton se badalne lagte hain jinhe dono baar-baar nazarandaaz kar dete hain.
Arshad ne abhi is baat par dhyaan nahi diya.
Aur Sakshi ne bhi kuch nahi kaha.
Filhaal, dono ki zindagi apni raftaar se chal rahi thi.


Raat ke kareeb gyarah bajkar tees minute par Reyansh ki Arshad se baat khatam hui.
Usne phone charging par lagaya aur bedroom mein chala gaya.
Aaj bhi woh Jheel ko bhoola nahi tha.
Letter ka dard ab bhi tha.
Uske sawaal ab bhi wahi the.
Lekin usne aaj ek chhoti si baat samjhi thi.
Woh Jheel ko call kar sakta tha, uske messages padh sakta tha aur uske saath guzre pal yaad kar sakta tha.
Lekin woh use wapas aane ke liye majboor nahi kar sakta tha.
Usne light band ki aur bed par let gaya.
Aankhein band karne se pehle usne phone ki screen ek baar dekhi.
Koi naya message nahi tha.
Usne phone side mein rakh diya.
"Kal dekhenge..."
Woh dheere se bola.
Is baar usne apne aap se yeh vaada nahi kiya ki kal sab theek ho jaayega.
Bas itna socha ki kal ek naya din hoga.
Aur filhaal, uske liye itna soch paana bhi kaafi tha.
Bengaluru ki raat apne aakhri pehar mein thi.
Ek ghar mein Reyansh apne toote hue dil ke saath sone ki koshish kar raha tha.
Doosre ghar mein Arshad aur Sakshi apni chhoti si narazgi ke saath raat guzaar rahe the.
Aur kahin, kisi anjaan jagah par, ek aisi zindagi chal rahi thi jiske baare mein Reyansh ko kuch pata nahi tha.
Uske liye abhi sirf ek hi sach tha.
Jheel chali gayi thi.