Adultery AZTARAAB

[Greenwood]

Update 09


Bengaluru ki sadkon par gaadiyan apni raftaar pakad chuki thi. Kisi ko office pahunchne ki jaldi thi, koi traffic mein phansa apne boss ko kos raha tha, aur kuch log aise bhi the jinke chehre par subah se hi muskurahat thi.
Reyansh ki subah in teeno ka mixture thi.
Ek haath mein coffee ka mug, doosre mein phone aur saamne laptop ki screen.
Phone par Arshad ke teen messages pade the.
Arshad: Oye uth gaya kya?
Arshad: Ya phir tere moksh prapt kar liya?

Reyansh ne coffee ka sip liya
Tabhi doorbell baji.
Usne phone table par rakha aur darwaza khola.
Shalu haath mein apna bag liye khadi thi.
"Good morning, sir."
"Good morning. Aaj jaldi aa gayi?"
"Roz ke time par hi aayi hoon. Aap aaj jaldi jaag gaye, toh duniya badal gayi kya?"
Reyansh ne uski taraf dekha.
"Tumhari zubaan din-ba-din tez ho rahi hai."
"Practice kar rahi hoon."
"Kis cheez ki?"
"Zindagi mein aage badhne ki. Har jagah kaam aayegi."
Reyansh kuch pal use dekhta raha, phir muskuraya.
"Achha hai. Bas galat jagah practice mat karna."
"Jaise?"
"Jaise mere saamne salary badhane ki demand."
Shalu ne bina ek second ganwaye jawab diya, "Woh practice nahi, haq hoga."
Reyansh hans diya.
"Madam, aaj toh aap poori taiyari karke aayi hain."
"Sir, aap coffee peejiye. Main breakfast bana deti hoon."
Shalu kitchen ki taraf chali gayi.
Reyansh wapas laptop ke saamne baith gaya. Aaj office mein ek important presentation thi. Campaign ke kuch final points par client se baat honi thi, aur uske baad agle launch ki planning.
Usne calendar check kiya.
Ek meeting, doosri meeting, kuch calls.
Usne coffee ka mug uthaya.
"Zindagi bhi na, calendar ban kar reh gayi hai."
Kitchen se awaaz aayi.
"Sir, calendar mein chhutti bhi hoti hai!"
"Har calendar mein nahi."
"Toh naya calendar khareed lo!"
Reyansh ne sar hilaya.
Is ghar mein kaam karne wali ladki bhi uski baaton ka jawab dene mein peeche nahi thi.
Aur shayad isi wajah se ghar use kabhi-kabhi bilkul khaali mehsoos nahi hota tha.


Office pahunchte hi Reyansh seedha apni desk par gaya.
Neha pehle se conference room ke paas khadi thi. Haath mein laptop aur chehre par woh expression, jo aam taur par kisi important update se pehle aata hai.
"Finally, Mr. Senior Brand Manager!"
Reyansh ne ghadi dekhi.
"Main time par hoon."
"Main kab keh rahi hoon ki late ho?"
"Toh phir aise welcome kyun kar rahi ho jaise maine company satte par lagadi?"

"Client ne presentation se pehle kuch changes maange hain."
Reyansh ka chehra serious hua.
"Kya changes?"
"Campaign ke opening section mein. Unhe message thoda simpler chahiye."
"Bas? Mujhe laga company bechne ko keh diya."
Reyansh ne laptop khola.
"Chalo, dikhao."
Dono conference room mein baith gaye. Presentation ke kuch slides badle, language simplify ki aur opening ko zyada clear banaya.
Reyansh apne kaam mein focused tha. Woh har suggestion ko bina soche reject nahi karta tha, lekin kisi change ka logic samajhna uske liye zaroori tha.
Neha ne ek line screen par dikhayi.
"Yeh dekho. Isko aur simple kar sakte hain."
Reyansh ne padha.
Phir usne kuch shabd badle.
"Ab?"
Neha ne screen dekhi.
"Better."
"Thank you. Tumhari tareef ko main apni performance appraisal mein quote karunga."
"Kar lena. Main likh dungi ki employee ko ek achhi line likhne ke liye do logon ki zaroorat padti hai."
"Ek main, doosra kaun?"
"Main."
Reyansh hans pada.
Meeting achhi rahi. Client ko revised presentation pasand aayi aur agle steps clear ho gaye.
Conference room se bahar nikalte hue Neha ne kaha, "Coffee?"
"Abhi?"
. Haan, abhi!"
Dono cafeteria ki taraf chal diye.
Coffee machine ke paas khade hokar Neha ne apna cup uthaya.
"Waise, tum kabhi office ke bahar bhi kaam ke alawa kuch karte ho?"
Reyansh ne use dekha.
"Main ghar par khaana bhi khata hoon. Kabhi-kabhi."
"Impressive. Aur?"
"Netflix. Music. Doston se milna. Kabhi-kabhi bina kisi plan ke drive par nikal jaana."
"Bas?"
"Interview le rahi ho ya coffee pila rahi ho?"
Neha muskuraayi.
"Bas pooch rahi thi. Tum apni life ko bahut neatly compartments mein rakhte ho."
Reyansh ne cup hothon tak le jaate hue kaha, "Kaam ka time alag, personal life alag. Ismein galat kya hai?"
"Galat kuch nahi. Bas kabhi-kabhi lagta hai tum khool kar jeena bhool gaye ho, Jaise pahle they
Reyansh smiling.
"Subject to selection
Dono kuch der aur baat karte rahe.
Phir Neha ka phone baj gaya. Use doosri meeting ke liye jaana tha.
"See you, Reyansh."
"Good luck.
"Agli baar bill tum bharoge."
"Yeh toh pehle bata dena chahiye tha."
Neha chali gayi.
Reyansh apni desk par laut aaya.
Uske liye yeh bas office ka ek normal din tha.
Lekin kabhi-kabhi normal din bhi insaan ko apne baare mein kuch sochne par majboor kar dete hain.

Shaam ko Arshad ne Sakshi ko uske course centre ke paas se pick kiya.
Sakshi gaadi mein baithte hi boli, "Sorry, thoda late ho gaya."
Arshad ne use dekha.
"Kitna thoda?"
"Das minute."
"Das minute? Sakshi, main toh yahan apni zindagi ke agle chapter ka intezaar karte-karte buddha ho gaya."
Sakshi ne seat belt lagayi.
"Achha? Toh phir buddhe logon ki tarah chupchaap gaadi chalao."
Arshad ne seene par haath rakha.
"Yeh ladki mujhe izzat nahi deti."
"Deti hoon. Bas limited edition mein."
Arshad hans pada.
Aaj dono ne ek chhote se cafe mein dinner karne ka plan banaya tha. Sakshi ko apne course ke baad bhook lagi thi aur Arshad ka din agency mein kaafi busy guzra tha.
Cafe mein baithte hi Sakshi ne menu khola.
"Mujhe pasta khana hai."
"Order kar lo."
"Aur garlic bread."
"Kar lo."
"Cold coffee."
Arshad ne menu se nazar uthayi.
"Main bhi kuch order kar sakta hoon?"
Sakshi ne bilkul masoom chehra banaya.
"Bilkul. Tum mere khane ka ek bite le lena."
Arshad ne waiter ko bulaya.
"Bhai, ek pasta, garlic bread, cold coffee aur mere liye sab gande bartan "
Waiter muskura kar order likhne laga.
Sakshi hans padi.
"Kabhi serious bhi ho jaaya karo."
"Main serious hi hoon. Tumhari food planning dekh kar mujhe financial nahi, emotional preparation karni padti hai."
"Drama king."
"Thank you."
Khaana aane tak Sakshi apne course ke baare mein batati rahi. Usne jo seekha tha, uska ek chhota sa example Arshad ko samjhaya.
Arshad dhyaan se sun raha tha.
"Toh ab aage kya plan hai?" usne poochha.
"Abhi toh course complete karungi. Phir dekhoongi ki jo seekha hai, use practical work mein kaise apply kar sakti hoon. Ho sakta hai apna kuch start karun, ya kisi achhe project ke saath kaam karun."
"Jo bhi karegi, achha karegi."
Sakshi ne uski taraf dekha.
"Bas? Itna hi?"
"Kya chahiye? Certificate de doon?"
"Ek achha sa motivational speech."
Arshad ne gala saaf kiya.
"Dear Sakshi, tum ek bahut talented, intelligent, hardworking aur—"
"Bas, bas. Itni tareef se nazar lag jayegi."
"Abhi toh introduction diya hai."
Dono hansne lage.
Kuch der baad Sakshi ne apna glass table par rakha.
"Arshad, tumne kabhi socha hai ki agle do-teen saal mein tum khud ko kahan dekhte ho?"
Arshad ne uski taraf dekha.
"Sofa par. AC ke neeche. Bina kisi deadline ke."
Sakshi ne aankhein ghumayi.
"Main serious hoon."
"Main bhi. Mere sapne bahut practical hain."
"Main tumhari baat kar rahi hoon. Career, life, future. Sab."
Arshad ne paani ka sip liya.
"Career mein toh aage badhna hai. Apni writing ko aur better karna hai. Bade campaigns karne hain. Shayad kabhi apni creative agency bhi..."
"Good. Aur personal life?"
Ek pal ke liye Arshad ki muskurahat halki pad gayi.
Phir usne table par rakha garlic bread uthaya.
"Personal life mein yeh ensure karna hai ki tum mujhe bhookha na rakho."
Sakshi ne use dekha.
"Arshad."
"Haan?"
"Tum har serious baat ko mazaak mein kyun badal dete ho?"
Arshad ne jawab dene se pehle kuch pal liye.
"Har baat ko nahi badalta."
"Jab baat tumhe uncomfortable karti hai, tab badal dete ho."
Uske paas jawab tha, lekin usne use kehne ke bajaye halka sa smile kar diya.
"Chalo, aaj tum jeet gayi. Agli baar main serious jawab dunga."
Sakshi ne use kuch der dekha.
Phir usne apni cold coffee uthayi.
"Promise?"
Arshad ne apna haath aage badhaya.
"Pinky promise."
Sakshi ne uski chhoti ungli pakad li.
"Yaad rakhna."
"Main copywriter hoon. Promises ko wording ke saath yaad rakhta hoon."
"Bas unka meaning bhi yaad rakhna."
Arshad hans diya.
Sakshi bhi muskurayi, lekin uski baat hawa mein kahin reh gayi.
Dinner ke baad dono cafe se bahar nikle. Arshad ne use ghar chhodne ki peshkash ki, aur Sakshi maan gayi.
Gaadi mein music chal raha tha.
Sakshi uske saath gaana gunguna rahi thi. Arshad beech-beech mein galat lyrics bolkar use chidhata raha.
Us pal dono khush the.
Unke beech pyaar tha, apnapan tha, aur ek-doosre ki aadaton ki pehchaan bhi.


Bas kuch sawaal the, jinhe Arshad abhi apni zindagi ke kisi aur din ke liye chhod dena chahta tha.
Aur Sakshi?
Woh filhaal uske saath bitaaye hue waqt mein khush thi. Apni zindagi ke sapne bhi uske paas the aur Arshad ke liye jagah bhi.
Lekin woh apni poori zindagi ko kisi anjaane jawab ke intezaar mein rokne wali ladki nahi thi..


Raat ke kareeb aath baje Reyansh building mein lauta.
Parking mein gaadi lagate waqt uski nazar ek car par padi jo apni parking line ke thoda kareeb tirchhi khadi thi.
Usne gaadi band ki.
Tabhi security guard ki awaaz aayi.
"Madam, bas gaadi thodi seedhi kar dijiye."
"Thodi seedhi? Gaadi hai, geometry ka practical nahi!"
Reyansh ne steering par haath rakhte hue aankhein band kar li.
Lo ji. Aaj ka episode shuru.
Gungun car ke paas khadi thi. Stylish outfit, haath mein phone aur chehre par wahi mashhoor narazgi.
Security guard ne shaant rehne ki koshish ki.
"Madam, doosri gaadi ko nikalne mein dikkat hogi."
"Toh woh apni gaadi sambhaal kar nikale. Meri gaadi apni jagah par hai."
Reyansh ne ek nazar parking line par daali.
Gaadi apni jagah par thi, lekin itni tedhi ki paas wali car ko nikalne mein dikkat ho sakti thi.
Woh apni gaadi se bahar nikla aur lift ki taraf chalne laga.
Gungun ne use dekh liya.
"Mr. 303!"
Reyansh ruk gaya.
"Ji, Flat 404?"
Gungun ki aankhein sikud gayin.
"Yeh tamasha dekhne ke liye khade ho?"
"Nahi. Main ghar ja raha tha. Lekin aapne itni zor se bulaya ki laga society meeting ka invitation hai."
"Toh apna kaam karo."
"Kar hi raha tha."
"Phir ruke kyun?"
Reyansh ne parking ki taraf dekha.
"Bas yahi soch raha tha ki aapki gaadi se zyada aapka mood tedha kaise ho gaya."
Security guard ne turant apna chehra doosri taraf kar liya. Uski hansi nikalte-nikalte bachi.
Gungun ne Reyansh ko ghoora.
"Excuse me?"
"Excuse accepted."
"You're impossible!"
"Yeh baat mujhe kai log bata chuke hain. Aap late hain."
Reyansh lift ki taraf badh gaya.
Gungun ne peeche se awaaz lagayi.
"Ek din tumhe apni is aadat ka nuksaan hoga!"
Reyansh ne bina mude haath hila diya.
"Us din ka appointment le lena. Calendar dekh kar bata dunga."
Lift ka darwaza band ho gaya.
Andar khade Reyansh ke chehre par halki muskurahat thi.
Usne khud se kaha, "Flat 404 mein rehne wali aurat hai ya daily breaking news?"
Lekin usse yeh bhi pata tha ki Gungun ki baat yahin khatam nahi hone wali.
Building mein kuch logon ki awaaz door tak jaati thi.
Aur Gungun unmein se ek thi.

Teesri manzil par lift khuli toh Reyansh bahar nikla.
Flat 304 ke saamne Jheel ek chhota sa parcel pakde khadi thi. Shayad delivery wale ne abhi diya tha.
Reyansh ko dekhkar usne halka sa smile kiya.
"Hi."
"Hi. Parcel aa gaya?"
"Haan. Kuch household items mangwaye the."
Reyansh ne parcel ki taraf dekha.
"Online shopping ka sabse achha part?"
Jheel ne socha.
"Jab delivery time par aa jaaye."
"Galat. Jab delivery time par aa jaaye aur andar wohi cheez nikle jo order ki thi."
Jheel hans padi.
"Yeh bhi sahi hai."
Usne parcel kholne ki koshish ki, lekin tape kaafi mazboot thi. Uske haath mein keys bhi thi aur parcel bhi.
Reyansh ne poochha, "Help chahiye?"
"Bas yeh tape khul nahi rahi."
"Ek minute."
Usne apni pocket se keys nikali aur parcel ka tape sambhal kar kaat diya.
"Lo ji."
"Thank you."
"Welcome. Waise parcel mein kya hai? Koi secret treasure?"
Jheel ne box ke andar dekha.
"Kitchen ke containers."
Reyansh ne do pal use dekha.
"Main apni zindagi mein pehli baar kisi ko itni excitement ke saath containers receive karte dekh raha hoon."
"Excitement nahi hai. Zaroorat hai."
"Achha hai. Mujhe laga containers ke liye koi celebration miss kar diya."
Jheel muskurayi.
"Aapko cooking pasand hai?"
Reyansh ne ek gehri saans li.
"Pasand aur zaroorat mein farq hota hai. Main doosri category mein aata hoon."
"Phir toh practice karni chahiye."
"Main practice karta hoon. Bas khaana kabhi-kabhi mere khilaaf ho jaata hai."
Jheel hans di.
"Main bhi abhi seekh rahi hoon."
"Toh phir hum dono ek hi boat mein hain."
"Bas aap boat mein omelette mat banana."
Reyansh ek pal ke liye chup raha.
Phir hans pada.
"Ek baar bana diya tha. Abhi tak uski yaad se ubhar nahi paaya."
Jheel ne hansi rokne ki koshish ki, lekin uske chehre par muskurahat phail gayi.
"Good night, Reyansh."
"Good night, Jheel."
Woh apne flat ki taraf chali gayi.
Reyansh ne apne darwaze ka lock khola.
Uski zindagi mein Jheel ki jagah abhi bas ek padosi ki thi. Ek aisi padosi jisse baat karna aasaan tha aur jiske saath chhoti-si baat bhi awkward nahi lagti thi.
Filhaal itna hi kaafi tha.
Har jaan-pehchaan ko kisi naam ki zaroorat nahi hoti.
Kabhi-kabhi woh bas ek achhi mulaqat hoti hai.


Udhar Arshad Sakshi ko chhodkar apne ghar ki taraf ja raha tha.
Phone par Reyansh ka message aaya.
Reyansh: Kahan hai, Romeo?
Arshad: Apni Juliet ko chhod kar aa raha hoon.
Reyansh: Zinda bach gaya?
Arshad: Mushkil se. Aaj future ke baare mein sawaal pooch liya tha.
Reyansh: Phir tune kya bola?
Arshad: Ki garlic bread achhi thi.
Reyansh ne message padhkar zor se hansi chhod di.
Reyansh: Tu ek din apni hi baaton mein phansne wala hai.
Arshad: Main copywriter hoon. Apni baaton se nikalne ka tareeka bhi likh lunga.
Reyansh: Haan, lekin Sakshi proofreader hai.
Arshad: Yeh point tune personal le liya.
Arshad ne phone side mein rakha.
Ghar pahunchkar usne apni maa ke liye kuch phal aur dawaai li, phir kitchen mein paani peene gaya.
Uski maa drawing room mein baithi TV dekh rahi thi.
"Aa gaya?"
"Haan, Ammi."
"Khaana kha liya?"
"Ji."
"Achha tha?"
Arshad ne bag table par rakha.
"Ammi, aapko mere khaane se zyada uske taste ki chinta rehti hai."
Maa hans padi.
"Jis din tu khud khaana banana seekh jayega, us din chinta karna band kar dungi."
"Toh phir aapko zindagi bhar chinta karni padegi."
"Wo bachaye."
Arshad unke paas baith gaya.
Kuch der dono ne TV dekha aur ghar ki chhoti-moti baatein ki.
Phir Arshad apne kamre mein aaya, laptop khola aur agency ka pending draft complete karne laga.
Uski zindagi mein bhi sab kuch aasaan nahi tha.
Career mein aage badhne ki khwahish thi. Apni pehchaan banani thi. Maa ki khushi thi. Sakshi ke saath bitaye hue pal the.
Aur kuch aise sawaal bhi the jinse woh aksar bach nikalta tha.
Lekin filhaal usne screen par likhi line ko select kiya aur dobara padhna shuru kiya.
Deadline subah ki thi.
Aur deadline ko uski emotional complications se koi matlab nahi tha.


Raat ke kareeb das baje Reyansh dinner ke liye kitchen mein gaya.
Fridge khola.
Ek dabba, thodi sabzi, eggs aur aadhi bottle juice.
Usne fridge ko dekha.
"Tu bhi meri tarah akela reh gaya hai."
Fridge ne koi jawab nahi diya.
Reyansh ne eggs nikaale aur omelette banane laga.
Usi waqt phone vibrate hua.
Neha ka message tha.
Neha: Presentation ke liye thanks. Aaj tumhare bina client ko samjhana mushkil hota.
Reyansh: Welcome. Kal coffee tumhari taraf se.
Neha: Tumhe har achhe kaam ke badle kuch chahiye hota hai?
Reyansh: Nahi. Kabhi-kabhi appreciation bhi chalega.
Neha: Good job, Reyansh.
Reyansh: Screenshot le raha hoon. Aise moments baar-baar nahi aate.
Neha ne laughing emoji bheja.
Phir ek aur message aaya.
Neha: Waise aaj ka din achha tha. Kaafi time baad office mein kaam karne mein maza aaya.
Reyansh ne reply kiya.
Reyansh: Good. Kal bhi aisa hi din banane ki koshish karenge.
Neha: Deal.
Usne phone rakh diya.
Omelette ban chuka tha.
Reyansh plate lekar living room mein aaya. TV par ek purana comedy show chal raha tha. Woh sofa par baith gaya aur khaana khane laga.
Kuch der baad Arshad ka call aaya.
"Bol, berozgaar aadmi."
Arshad ki awaaz aayi, "Berozgaar tera dimaag hai. Main kaam kar raha hoon."
"Raat ke das baje?"
"Talent ka koi time nahi hota."
"Deadline ka hota hai."
"Dost, tu mujhe support karne ke liye phone karta hai ya meri beizzati karne ke liye?"
"Dono services ek hi plan mein aati hain."
Arshad hans pada.
Phir usne poochha, "Tera din kaisa tha?"
Reyansh ne TV ki volume kam ki.
"Normal."
"Yeh normal kya hota hai?
"Gungun se parking mein behas ho gayi.?
"Tu usse irritate hota hai?"
"Bahut."
"Phir bhi usse jawab dene ka mauka nahi chhodta."
"Uski baatein aisi hoti hain ki chup rehna mushkil ho jaata hai."
Arshad ne hansi dabayi.
"Matlab madam tumhare dimaag mein jagah bana chuki hain."
"Ek aur shabd bola na, toh phone kaat dunga."
Reyansh ne phone kaat diya.
Arshad ki hansi call khatam hone ke baad bhi uske dimaag mein goonjti rahi.
Reyansh ne plate side mein rakhi aur sofa par aaram se baith gaya.
Din sach mein normal tha.
Lekin us normal din mein kitne log the.
Office mein Neha.
Cafe mein Arshad aur Sakshi.
Building mein Gungun.
Lift mein Jheel.
Phone par Shivani ka missed call.
.
Reyansh ne TV ki volume kam ki aur Shivani ko call back kiya.
Shivani: "Janab ko yaad aa gaya ki unki ek behen bhi hai?"
Reyansh: "Meeting thi, didi."
Shivani: "Raat ke das baje?"
Reyansh: "Meeting lambi thi."
Shivani: "Jhooth bolne ka tareeka improve kar. Kam se kam koi believable bahana toh bana."
Reyansh hans pada.
Reyansh: "Achha, batao. Kya hua?"
Shivani: "Kuch nahi. Bas aise hi phone kiya tha. Tu bata, khaana kha liya?"
Reyansh: "Haan."
Shivani: "Khud banaya?"
Reyansh: shalu
Shivani: "Khaya bhi ya sirf...
Reyansh: "Didi! Aapko apne bhai par bilkul bharosa nahi hai?"
Shivani: "Bharosa hai. Teri cooking par nahi."
Reyansh: "Ek din main aapko apne haath ka khaana khilaunga. Phir dekhna."
Shivani: "Theek hai. Bas us din ghar mein emergency number ready rakhungi."
Reyansh: "Very funny!"
Dono hansne lage.
Kuch pal baad Shivani ki awaaz thodi naram ho gayi.
Shivani: "Achha, ek baat bata. Sab theek chal raha hai na?"
Reyansh ne saamne rakhi plate uthakar kitchen ki taraf jaate hue jawab diya.
Reyansh: "Haan, didi. Sab theek hai. Office, ghar, dost. Sab normal."
Shivani: "Aur tu?"
Reyansh ke kadam ek pal ke liye ruk gaye.
Reyansh: "Main bhi theek hoon."
Shivani: "Achha. Bas apna khayal rakha kar. Har cheez khud hi sambhalne ki aadat achhi nahi hoti."
Reyansh: "Ji, madam. Aapka aadesh sar aankhon par."
Shivani: "Zyada nautanki mat kar."
Reyansh: "Aapka chhota bhai hoon. Kuch toh asar hoga hi."
Shivani: "Chhota? Tees saal ka ho gaya hai, lekin harkatein abhi bhi wahi hain."
Reyansh: "Age is just a number, didi."
Shivani: "Aur akal?"
Reyansh: "Network issue. Baad mein baat karte hain."
Shivani hans padi.
Shivani: "Achha chal, so ja. Kal kaam bhi hoga."
Reyansh: "Good night, didi. Love you."
Shivani: "Love you too."
Call khatam hua.
Reyansh ne phone table par rakha aur TV ki taraf dekhne laga.
Uske chehre par muskurahat thi.


Usne TV band kiya aur bedroom ki taraf badh gaya.
Sone se pehle phone par ek nazar daali.
Arshad ka message aaya tha.
Arshad: Kal mil raha hai na?
Reyansh: Kahan?
Arshad: Jahan tu chai pilaye.
Reyansh: Toh phir kabhi nahi.
Arshad: Dosti khatam.
Reyansh muskuraya aur phone side mein rakh diya.
Kamre mein khamoshi thi.
Lekin aaj us khamoshi ke beech din bhar ki awaazein abhi baaki thi.
Neha ki hansi.
Arshad ke jokes.
Shivani ki daant.
Jheel ki muskurahat.
Aur Gungun ka gusse se bhara hua, "You're impossible!"
Reyansh ke hothon par phir se halki si muskurahat aa gayi.
"Pagal building hai," usne khud se kaha.
Phir light band kar di.
Bahar Bengaluru ki sadkein ab bhi chal rahi thi.