Adultery AZTARAAB

[Greenwood]

UPDATE 05



Bengaluru | Tuesday | Subah 8:12 AM
Reyansh ke flat mein subah ki shuruaat alarm ki awaaz se nahi, balki alarm band karne ke baad dobara sone ki uski purani aadat se hui.
Phone takiye ke paas pada tha. Alarm band ho chuka tha, lekin janab ki aankhein abhi bhi band thi.
Tabhi doorbell baji.
Tring-tong!
Reyansh ne aankhein khole bina karwat badli.
Doosri baar bell baji.
Tring-tong!
Reyansh ne takiye se apna chehra bahar nikala.
Reyansh: "Aa gaya duniya ka sabse bada dukh..."
Doorbell teesri baar baji.
Reyansh uthkar baith gaya.
Reyansh: "Bhai, darwaza hi toh khol raha hoon. Shaadi ka mandap nahi saja raha!"
Woh baal theek karne ki nakaam koshish karta hua darwaze tak pahuncha aur kundi khol di.
Saamne Shalu khadi thi.
Haath mein apna bag, chehre par roz wali shaanti.
Shalu: "Good morning, sir."
Reyansh: "Good morning. Tumhare ghar mein ghadi nahi hai?"
Shalu: "Hai."
Reyansh: "Toh phir itni subah-subah?"
Shalu ne ek baar uske bikhre baalon ko dekha.
Shalu: "Aapke ghar mein bhi ghadi hai, sir. Shayad aapki ghadi aapse baat karna chhod chuki hai."
Reyansh ne do second use dekha.
Phir darwaza kholkar side ho gaya.
Reyansh: "Andar aao. Tumhari comedy ka subscription kisne liya hai, mujhe pata karna padega."
Shalu: "Free service hai, sir. Aap afford kar sakte hain."
Shalu andar chali gayi.
Reyansh darwaze par khada reh gaya.
Reyansh: "Yeh ladki mujhe ek din ghar se nikalwa kar rahegi."
Andar se Shalu ki awaaz aayi.
Shalu: "Pehle office ke liye nikal jaiye, sir. Der ho rahi hai."
Reyansh ne deewar par lagi ghadi dekhi.
8:15 AM.
"Shit!"
Ab ghar mein asli subah shuru hui.

Subah 9:05 AM | Bengaluru

Reyansh office pahunch chuka tha.
Laptop kholkar usne apna din shuru kiya. Kuch emails, ek chhoti si meeting aur agle hafte ke campaign par team ke saath discussion.
Office ki zindagi mein aaj kuch khaas nahi tha.
Kam se kam dopahar tak toh nahi.
Lunch break mein woh apni desk par baitha sandwich kha raha tha, jab phone screen par Arshad ka naam chamka.
Arshad Calling...
Reyansh ne call uthaya.
Reyansh: "Bol, berozgaar."
Arshad: "Teri awaaz sunke lag raha hai promotion mil gaya."
Reyansh: "Teri awaaz sunke lag raha hai kisi ne tera promotion rok diya."
Arshad: "Mere talent se jalne wale bahut hain is duniya mein."
Reyansh: "Aur tere talent ko samajhne wale kitne hain?"
Arshad: "Ek hai."
Reyansh: "Kaun?"
Arshad: "Meri girlfriend."
Reyansh ne sandwich neeche rakha.
Reyansh: "Achha! Toh aaj janab girlfriend ke naam par apni tareef karenge?"
Arshad: "Bhai, tareef toh main khud ki bhi kar sakta hoon. Girlfriend ka naam sirf credibility badhane ke liye liya."
Reyansh: "Samajh gaya. Chal ab asli baat bata."
Arshad kuch pal chup raha.
Arshad: "Aaj shaam free hai?"
Reyansh: "Kyun?"
Arshad: "Milna hai."
Reyansh: "Kisi ka birthday hai?"
Arshad: "Nahi."
Reyansh: "Kisi se udhaar liya hai?"
Arshad: "Nahi."
Reyansh: "Kisi ne tujhe udhaar dene se mana kar diya?"
Arshad (taunting): "Reyansh, teri zindagi mein pyaar ke alawa koi aur subject bhi hai?"
Reyansh: "Meri zindagi mein pyaar ke alawa bahut subjects hain. Bas tu unmein se kisi mein pass nahi hota."
Doosri taraf Arshad hans pada.
Arshad: "Shaam ko mil. Ek important insaan se milwana hai."
Reyansh ki aankhon mein shararat aa gayi.
Reyansh: "Oho! Rishta pakka karwa raha hai kya?"
Arshad: "Tere liye nahi, gadhe."
Reyansh: "Toh phir kaun hai?"
Arshad: "Sakshi."
Ek chhota sa pause.
Reyansh: "Achha! Toh aakhirkaar mujhe us insaan se milwayega jo teri bakwaas roz sunti hai?"
Arshad: "Haan. Aur woh tujhe dekhkar samajh jayegi ki main kitna achha insaan hoon."
Reyansh: "Ya phir woh mujhe dekhkar samajh jayegi ki tujhe aur achhe doston ki zaroorat hai."
Arshad: "Shaam ko mil. Aur haan, dhang ke kapde pehenna."
Reyansh: "Teri girlfriend se milne aa raha hoon, interview dene nahi."
Arshad: "Bas isi attitude se ek din tera interview bhi kharab hoga aur shaadi bhi."
Reyansh ki muskurahat ek pal ke liye halki padi.
Lekin usne turant baat badal di.
Reyansh: "Tu apni shaadi ki tension le. Meri chhod."
Arshad: "Main toh le hi raha hoon."
Is baar uski awaaz mein mazaak kam tha.
Reyansh kuch bolta, usse pehle Arshad ne kaha, "Chal, meeting hai. Shaam ko milte hain."
Call kat gaya.
Reyansh kuch seconds phone ko dekhta raha.
Phir sandwich uthaya aur apna lunch khatam karne laga.
Har baat par sochna zaroori nahi hota.
Kabhi-kabhi woh khud ko yahi samjhata tha.

Shaam 5:40 PM | Advertising Agency, Bengaluru

Arshad apni desk par baitha ek campaign ka final draft check kar raha tha.
Screen par teen taglines khuli hui thi. Chauthi likhne ka mann nahi tha, lekin client ko chaar options chahiye the.
Uske bagal mein Kabir coffee lekar aaya.
Kabir: "Ho gaya?"
Arshad: "Haan."
Kabir ne screen dekhi.
Kabir: "Teen hi hain."
Arshad: "Chauthi invisible hai."
Kabir: "Client ko kaise dikhegi?"
Arshad: "Uske loda hilana padega,usme se Jo ink niklegi whight, usse dikhega"
Kabir hans pada aur saamne wali chair par baith gaya.
Kabir: "Aaj jaldi ja raha hai?"
Arshad: "Haan."
Kabir: "Date?"
Arshad: "Nahi, operation."
Kabir: "Kiska?"
Arshad: "boss ki bwali gand ka."
Dono haste hai jor se...
Arshad ne laptop band kiya aur bag uthaya.
Uska phone vibrate hua.
Sakshi: Kahan ho?
Arshad ne message dekha aur turant reply kiya.
Arshad: Office mein. Kaam kar raha hoon. Kuch logon ki tarah sirf khoobsurat nahi hoon, talented bhi hoon.
Reply turant aa gaya.
Sakshi: Achha? Toh talent se aaj dinner bhi bana dena.
Arshad: Main bahar se order kar dunga.
Sakshi: Wah. Chef Arshad.
Arshad: Thank you. Autograph chahiye toh appointment lena.
Sakshi: Pehle kaam karna seekh lo, phir autograph dena.
Arshad muskuraya.
Kabir ne uske chehre ko dekha.
Kabir: "Sakshi?"
Arshad: "Haan."
Kabir: "Bhai, teri smile dekhkar lagta hai salary badh gayi."
Arshad: "Salary badhne par EMI yaad aati hai. Iski message aane par main EMI bhool jaata hoon."
Kabir: "Kya baat hai. Pyaar mein aadmi kitna bewakoof ho jaata hai."
Arshad: "Tu bhi ho ja. Phir samajh aayega."
Arshad ne bag kandhe par dala aur office se nikal gaya.
Uske chehre par wahi purani, befikr muskurahat thi.
Aaj shaam woh Reyansh ko Sakshi se milwane wala tha.
Aur use yakeen tha ki dono ki pehli mulaqat yaadgaar hogi.
Use bas ek baat ka andaza nahi tha.
Reyansh aur Sakshi dono ki zubaan tez thi.
Aur jab do aise log ek table par baithte hain, toh khana thanda hone ka khatra badh jaata hai.


Shaam 6:25 PM | cafe place, Bengaluru
Sakshi ek cafe ke bahar khadi apne phone par kuch dekh rahi thi.
Usne simple blue jeans, white top aur halka sa silver pendant pehna tha. Baalon ko khula chhoda hua tha. Uske chehre par ek aaram se rehne wali, apne aap mein comfortable ladki wali expression thi.
Woh baar-baar phone nahi dekh rahi thi.
Na hi Arshad ke late hone par pareshan ho rahi thi.
Usne apni coffee khatam ki, phir bag se lip balm nikala.
Tabhi Arshad ki call aayi.
Sakshi: "Haan, kahan ho?"
Arshad: "Bas pahunch gaya."
Sakshi: "Tumhare bas aur mere bas mein bahut farq hai."
Arshad: "Matlab?"
Sakshi: "Mere bas mein coffee khatam ho gayi. Tumhare bas mein abhi traffic hai."
Arshad hans diya.
Arshad: "Do minute."
Sakshi: "Theek hai. Main andar ja rahi hoon."
Arshad: "Ruko, main aa raha hoon."
Sakshi: "Arshad, main tumhari girlfriend hoon, parcel nahi. Tum aaoge toh hi cafe mein enter karungi, aisa koi rule nahi hai."
Arshad: "Mujhe pata hai. Bas saath mein aana tha."
Sakshi ki awaaz thodi naram hui.
Sakshi: "Achha, aa jao. Main andar hoon."
Call kat gaya.
Sakshi ne cafe mein jaakar corner wali table choose ki.
Woh un ladkiyon mein se nahi thi jo apni har khushi ka faisla kisi aur ke mood par chhod deti hain.
Use Arshad pasand tha. Uske saath waqt bitana achha lagta tha. Uski bakwaas par hansna, usse ladna, kabhi uske liye coffee order kar dena, kabhi jaan-boojhkar uski favourite fries kha lena.
Lekin Sakshi ki apni pasand bhi thi.
Use apne kaam se pyaar tha. Apne doston ke saath waqt bitana pasand tha. Kabhi akele shopping karna, kabhi bina kisi plan ke movie dekh lena, kabhi poora Sunday ghar par aaram karna.
Woh relationship mein thi, lekin uski poori zindagi relationship nahi thi.
Arshad ko uski yahi baat pasand thi.
Aur kabhi-kabhi isi baat se use darr bhi lagta tha.
Kyunki Sakshi apni zindagi mein aage badhne se nahi darti thi.
Arshad ko bas yeh samajhna tha ki woh khud kitna aage badhne ke liye taiyaar hai.
Filhaal, in sawaalon ko unki shaam mein jagah nahi mili thi.
Aaj toh bas dinner tha.
Aur ek purane dost se mulaqat.

Shaam 6:42 PM |

Arshad cafe mein enter hua toh Sakshi phone par koi reel dekh rahi thi.
Woh uske saamne aakar khada ho gaya.
Arshad: "Madam, hum bhi yahan maujood hain."
Sakshi ne screen se nazar uthayi.
Sakshi: "Dekh liya."
Arshad: "Bas?"
Sakshi: "Haan. Ab baith jao. Log dekh rahe hain."
Arshad chair kheenchkar baith gaya.
Arshad: "Kabhi pyaar se bhi baat kar liya karo."
Sakshi: "Karti hoon. Tum sunte nahi ho."
Arshad: "Main tumhari har baat sunta hoon."
Sakshi: "Pichhle hafte maine kya kaha tha?"
Arshad ruk gaya.
Arshad: "Pichhle hafte?"
Sakshi: "Haan."
Arshad: "Kaunsi date ko?"
Sakshi ne use ghoora.
Arshad: "Achha, theek hai. Main haar gaya. Ab batao, kya kaha tha?"
Sakshi: "Kuch nahi. Bas check kar rahi thi ki tum kitne sincere ho."
Arshad: "Aur result?"
Sakshi: "Supplementary."
Arshad ne seene par haath rakha.
Arshad: "Ya malik, itni mehnat ke baad bhi?"
Sakshi hans padi.
Dono menu dekhne lage.
Sakshi: "Tumhara dost kitni der mein aayega?"
Arshad: "Bas aa raha hoga."
Sakshi: "Naam kya bataya tha?"
Arshad: "Reyansh."
Sakshi: "Wahi jo tumhare college ke time se dost hai?"
Arshad: "Haan. Kaafi saalon se."
Sakshi: "Tumne uske baare mein bahut bataya hai."
Arshad: "Achha?"
Sakshi: "Haan. Kabhi tareef, kabhi uski burai, kabhi tum dono ki purani harkatein."
Arshad: "Main sirf uski achhaiyan batata hoon."
Sakshi: "Haan, aur duniya mein jhooth naam ki cheez hoti hi nahi."
Arshad ne menu band kar diya.
Arshad: "Tum dono miloge na, toh mujhe beech mein bolne ka mauka dena."
Sakshi: "Kyun?"
Arshad: "Kyunki tum dono milkar meri izzat ka funeral nikaal doge."
Sakshi: "Tumhari izzat hai kahan?"
Arshad ne waiter ko bulane ke liye haath uthaya.
Arshad: "Bhai, ek extra plate izzat ki bhi le aana. Ghar le jaunga."
Sakshi phir hans padi.
Tabhi uske phone par message aaya.
Reyansh: Parking mil gayi. Do minute mein aa raha hoon.
Sakshi ne message Arshad ko dikhaya.
Sakshi: "Tumhara dost punctual hai?"
Arshad: "Bilkul."
Sakshi: "Kitna?"
Arshad: "Mere hisaab se kaafi."
Sakshi: "Tumhare hisaab se toh tum do minute mein pahunch gaye the."
Arshad ne aankhein band kar li.

Kuch hi der baad Reyansh cafe ke andar aaya.

Usne Arshad ko dekhte hi haath uthaya.
Reyansh: "Oye!"
Arshad: "Aa gaya, nalayak!"
Dono khade hue aur gale mile.
Yeh woh dosti thi jismein har mulaqat par formal hello ki zaroorat nahi hoti. Kabhi ek gaali hi poora welcome hoti hai, kabhi ek thappad jaisa dostana dhakka.
Reyansh ne Sakshi ki taraf dekha.
Arshad ne introduce karaya.
Arshad: "Sakshi, yeh hai Reyansh. Mera college ka dost, mera raazdaar aur meri zindagi ki kai galtiyon ka gawah."
Reyansh: "Aur yeh hai Sakshi. Woh ladki jisne abhi tak isse chhoda nahi hai. Iske patience ko national award milna chahiye."
Sakshi khadi hui aur muskurakar haath aage badhaya.
Sakshi: "Hi, Reyansh. Finally milna hua."
Reyansh: "Hi. Arshad ke kisse sun-sun kar mujhe lagne laga tha ki tum imaginary character ho."
Sakshi ne Arshad ki taraf dekha.
Sakshi: "Achha? Mujhe bhi kabhi-kabhi aisa hi lagta hai."
Reyansh hans pada.
Arshad: "Dekha? Pehli mulaqat mein hi tum dono ne mere khilaaf alliance bana liya."
Reyansh: "Bhai, kuch alliances naturally bante hain."
Teeno baith gaye.
Waiter ne menu diya. Reyansh ne menu khola, do dishes dekhin aur band kar diya.
Sakshi: "Itni jaldi decide kar liya?"
Reyansh or arshad ek dusre ki taraf dekhte hai or ek smile or fir cafe me alag alag table par jo log kha rahe hote hai use dekh kar waiter ko batate rehte hai
Dekh Bhai!! Wo jo topi wala kha raha hai na wo le
Dekh yeh moti madam ke paas Jo hai wo bhi le
Dekh Arshad kya cheese burst ho raha us plate ,
Bhai tu wo bhi le aa warna yeh yahi table ko apne muh ke Pani se dho dega...

Sakshi unhe ghoor ke dekhne lagi or menu apni taraf kheench liya.
Sakshi: "Theek hai. Main order karungi. Tum dono sirf baitho."
Arshad: "Yeh toh ghar par bhi yahi karti hai."
Sakshi: "Kyunki tum menu dekhne mein utna waqt lagate ho jitne mein main khana bana sakti hoon."
Reyansh: "Bhai, tu khana banata bhi hai?"
Arshad: "Haan."
Sakshi: "Maggi."
Arshad: "Woh bhi khana hi hai."
Reyansh: "Technically sahi hai."
Sakshi: "Tum dono ek hi college mein kaise survive kar gaye?"
Reyansh: "Hum intelligent the."
Arshad: "Aur professors humse darte the."
Sakshi: "Yaad-dasht kamzor hai meri, lekin itni bhi nahi."
Order place ho gaya.
Aur agle aadhe ghante tak table par college ke kisse, office ki bakwaas, Arshad ki aadatein aur Reyansh ke purane kaand ghoomte rahe.
Sakshi ko dheere-dheere samajh aaya ki Reyansh aur Arshad ki dosti kitni purani hai.
Unke beech aisi familiarity thi jismein har baat samjhaani nahi padti thi.
Arshad Reyansh ke chehre se samajh jaata tha ki woh kab mazaak kar raha hai aur kab kisi baat ko chhod dena chahta hai.
Reyansh bhi Arshad ko utna hi achhi tarah jaanta tha.
Lekin aaj usne apne dost ka ek doosra roop bhi dekha.
Arshad Sakshi ki baat dhyaan se sun raha tha.
Jab woh apne kaam ke kisi naye project ke baare mein batati, toh Arshad usse beech mein nahi tokta tha. Jab woh kisi colleague ki funny harkat sunati, toh Arshad sach mein hasta tha.
Aur jab Sakshi ne bataya ki usne apne liye ek naya course dekhna shuru kiya hai, toh Arshad ne poochha:
Arshad: "Kaunsa course?"
Sakshi ne usse bataya.
Arshad ne do sawaal poochhe, phir kaha:
Arshad: "Achha hai. Agar karna chahti ho toh kar lo. Main toh kehta hoon, try karo."
Sakshi ne use dekha.
Sakshi: "Tum mazaak nahi udaoge ki main har mahine koi naya plan bana leti hoon?"
Arshad: "Plan banana buri baat nahi hai. Bas poora bhi kar liya karo."
Sakshi: "Tum apne plans poore karte ho?"
Arshad: "Maine kab kaha main perfect hoon?"
Sakshi ki muskurahat mein apnapan tha.
Reyansh chupchaap dono ko dekh raha tha.
Phir usne Arshad ki taraf jhukkar kaha:
Reyansh: "Bhai, tu toh sach mein pyaar mein pad gaya."
Arshad: "Chup kar."
Reyansh: "Nahi, seriously. Tu kisi ki baat itne dhyaan se kab sunta hai?"
Sakshi: "Jab usse pata ho ki baad mein mujhse daant bhi khani pad sakti hai."
Arshad: "Dekha? Isliye main dhyaan se sunta hoon."
Teeno hans pade.
Shaam aaram se guzar rahi thi.
Aur filhaal, kisi ko bhi ise complicated banane ki jaldi nahi thi.

Dinner khatam hone ke baad Sakshi washroom ki taraf chali gayi.

Reyansh aur Arshad table par akele reh gaye.
Reyansh ne glass se paani piya aur apne dost ko dekha.
Reyansh: "Achhi hai."
Arshad: "Pata hai."
Reyansh: "Tere liye achhi hai."
Arshad ne is baar mazaak nahi kiya.
Arshad: "Haan."
Reyansh ne table par ungli se halki si tapping ki.
Reyansh: "Khush hai tere saath?"
Arshad ne use dekha.
Arshad: "Haan, bhai. Khush hai."
Reyansh: "Aur tu?"
Arshad ne bina der kiye jawab diya.
Arshad: "Main bhi."
Reyansh ne sir hilaya.
Reyansh: "Bas phir. Aur kya chahiye?"
Arshad ne ek chhoti si hansi ke saath kaha:
Arshad: "Kabhi-kabhi lagta hai, bas yahi kaafi ho."
Reyansh: "Toh phir problem kya hai?"
Arshad ne nazar table par kar li.
Kuch pal woh chup raha.
Phir bola:
Arshad: "Kuch nahi. Aise hi."
Reyansh ne uske chehre ko dekha. Woh apne dost ko jaanta tha. Arshad har baat par bolta tha, lekin jab koi baat uske andar sach mein atak jaati, toh woh use mazaak ke peeche chhupa deta tha.
Reyansh ne filhaal us baat ko wahin chhod diya.
Reyansh: "Theek hai. Jab batana ho, bata dena."
Arshad ne uski taraf dekha aur muskuraya.
Arshad: "Tu kabhi-kabhi achha dost ban jaata hai."
Reyansh: "Kabhi-kabhi? Teri dosti ki EMI bharte-bharte meri aadhi zindagi nikal gayi."
Arshad: "Achha, chal. Bill bhar de."
Reyansh: "Yeh hui na dosti ki asli aukaat."
Dono hans pade.
Tabhi Sakshi wapas aa gayi.
Sakshi: "Kya hua? Mere peeche meri burai ho rahi thi?"
Arshad: "Nahi."
Reyansh: "Haan."
Sakshi ne chair kheenchkar baithte hue kaha:
Sakshi: "Good. Kam se kam tum dono mein se ek toh sach bolta hai."
Arshad ne Reyansh ko ghoora.
Reyansh ne masoom chehra bana liya.
Aur baat phir se badal gayi.
Lekin Arshad ke andar jo sawaal tha, woh abhi bhi wahin tha.
Kuch sawaal aise hote hain jinhe aadmi apne sabse kareebi dost se bhi poori tarah nahi keh pata.
Isliye nahi ki dost samjhega nahi.
Balki isliye ki shayad khud ke paas hi unka jawab nahi hota.

Raat 9:35 PM | Bengaluru

Sakshi apne flat pahunchkar shoes utaar rahi thi, jab Arshad ka message aaya.
Arshad: Ghar pahunch gayi?
Sakshi: Haan.
Arshad: Aaj achha laga?
Sakshi ne message padhkar muskurate hue reply kiya.
Sakshi: Haan. Tumhara dost achha hai.
Arshad: Mujhse bhi achha?
Sakshi: Usne kam bakwaas ki.
Arshad: Kal se main bhi kam bolunga.
Sakshi: Tumse nahi hoga.
Arshad: Tumhe mujh par bharosa nahi hai?
Sakshi: Is maamle mein bilkul nahi.
Arshad hans pada.
Phir usne phone side mein rakha, lekin kuch seconds baad dobara utha liya.
Usne Sakshi ka chat khola.
Kuch likha.
Phir mita diya.
Dobara likha.
Arshad: Sakshi, ek baat poochhun?
Sakshi ka reply aaya.
Sakshi: Poochho.
Arshad ki ungliyan keyboard par ruki rahin.
Uske paas kehne ke liye bahut kuch tha.
Lekin usne aakhir mein sirf itna likha:
Arshad: Kuch nahi. Bas aise hi.
Sakshi ne message dekha.
Sakshi: Pagal ho.
Arshad: Thoda sa.
Sakshi: Thoda?
Arshad: Achha, zyada. Khush?
Sakshi: Bahut.
Sakshi ne phone side mein rakh diya.
Uske chehre par muskurahat thi.
Woh Arshad ke saath khush thi.
Uske liye apne rishte ko lekar har raat chinta karna zaroori nahi tha. Woh apni zindagi jeena chahti thi, apne plans banana chahti thi, aur Arshad ke saath achhe pal bitaana chahti thi.
Aage kya hoga, woh waqt ke saath dekha ja sakta tha.
Filhaal, uski zindagi mein aaj ki shaam ek achhi shaam thi.
Arshad ke liye bhi.
Bas uske dimaag mein ek baat thi jise woh abhi apni zubaan tak nahi laana chahta tha.
Shaadi.
Woh Sakshi se pyaar karta tha.
Lekin jab bhi woh dono kabhi future ki baat karte, Arshad ke mann mein ek darr ubhar aata.
Dono ke dharm alag the.
Use nahi pata tha ki unka rishta aage jaakar kis mod par pahunchega. Woh yeh bhi nahi jaanta tha ki jis din shaadi ka faisla saamne aayega, us din woh kya karega.
Isliye woh us din ko abhi door rakhna chahta tha.
Aaj ki khushi ko kal ke sawaal se bachakar rakhna chahta tha.
Lekin waqt ko rokna kisi ke bas mein nahi hota.
Aur kuch sawaal aise hote hain jo jitni der taal diye jaayein, utni hi khamoshi se bade hote jaate hain.
8. Ek Dost, Do Zindagiyan
Raat 10:20 PM | Reyansh Ka Flat
Reyansh ghar laut chuka tha.
Usne shirt badli, paani piya aur sofa par baith gaya.
Phone par Arshad ka message tha.
Arshad: Aaj milkar achha laga?
Reyansh ne reply kiya.
Reyansh: Haan. Sakshi achhi hai.
Arshad: Pata hai.
Reyansh: Tu lucky hai.
Is baar Arshad ne kuch der baad reply kiya.
Arshad: Haan, shayad.
Reyansh ne screen dekhi.
Usne socha ki Arshad ne shayad kyun likha.
Phir usne phone lock kar diya.
Har dost ki zindagi mein kuch aise panne hote hain jo woh khud likhta hai. Doosra dost un pannon ko padhne mein madad kar sakta hai, lekin likh nahi sakta.
Reyansh ko Arshad ki khushi achhi lagi thi.
Usne Sakshi ko bhi pasand kiya tha.
Woh chahta tha ki uska dost khush rahe.
Lekin aaj ki shaam ne use ek chhoti si baat yaad dila di.
Kisi aur ki zindagi mein chal rahi mohabbat ko dekhna aasan hota hai.
Apni zindagi ke sawaalon ka saamna karna utna aasan nahi.
Reyansh ne TV chala diya.
Kuch der channel badalta raha, phir ek comedy show par ruk gaya.
Woh hans bhi raha tha.
Uski zindagi mein koi badi tragedy chalti hui nahi dikh rahi thi. Office tha, dost the, ghar tha, roz ki chhoti pareshaniyan thi aur apni marzi se jeene ki azaadi bhi.
Phir bhi, raat ke aakhri hisse mein jab usne TV band kiya aur kamre ki light bujha di, toh flat mein ek baar phir wahi khamoshi phail gayi.
Woh bistar par let gaya.
Phone bedside table par rakh diya.
Kal phir subah hogi.
Phir alarm bajega.
Phir Shalu ki bell.
Phir office.
Phir zindagi apni raftaar se chalti rahegi.
Reyansh ne aankhein band kar li.
Aur Bengaluru ki raat apne saath ek aur din lekar aage badh gayi.