꧁༺ అనుమానాల నీడలో … దాగిన నిజాలెన్నో ༻꧂

[12345677889]

మాధవి గది నుంచి బయటకు వచ్చింది. నిర్మల వంటగదిలో ఉండటంతో, “మాధవీ, టిఫిన్ తినమ్మా” అంది.

మాధవి, “టైమ్ లేదని తొందరపెట్టావు, ఇప్పుడు టిఫిన్ తినమంటావా అమ్మా?” అంది.

నిర్మల లంచ్ బాక్స్ తీసుకొచ్చి ఇచ్చింది. మాధవి దాన్ని తీసుకుని బ్యాగ్‌లో పెట్టుకుంది.

“నాన్నా, వెళ్లి వస్తాను” అని శ్రీనుతో చెప్పింది.

“సరేనమ్మా, జాగ్రత్తగా వెళ్లు” అన్నాడు శ్రీను.

మాధవి స్కూటీ తీసుకుని కాలేజీకి బయలుదేరింది.

శ్రీను నిర్మలతో, “మన మాధవి చదువుల తల్లి. ఎప్పుడూ అన్ని సబ్జెక్టుల్లో ఫస్ట్ క్లాస్‌లో పాసవుతుంది” అన్నాడు.

శ్రీనుకు నిర్మల మీద కోపం ఎందుకు వచ్చిందో అర్థం కాకపోయినా, నిర్మలకు మాత్రం అతనిపై కోపం తగ్గలేదు.

శ్రీను, “నిర్మలా, నాకు టిఫిన్ పెట్టు” అన్నాడు.

నిర్మల కోపంగా ప్లేటును డైనింగ్ టేబుల్ మీద గట్టిగా శబ్దం వచ్చేలా పెట్టింది.

ఇంతలో శ్రీనివాస్ కూడా అక్కడికి వచ్చాడు. నిర్మల ముఖం చూసి, “ఏంటత్తయ్యా, ఏమైంది? కోపంగా ఉన్నట్టున్నారు” అన్నాడు.

“లేదుబాబు, అదేం లేదు” అంటూ నిర్మల మామూలుగా ఉన్నట్టు నటించింది. ఇద్దరికీ టిఫిన్ పెట్టింది.

శ్రీనివాస్ కొంచెం టిఫిన్ తిని లేచి వెళ్లబోతుండగా నిర్మల, “టిఫిన్ బాలేదా బాబు?” అని అడిగింది.

“కాదు అత్తయ్యా, డ్యూటీకి టైమ్ అయింది” అన్నాడు శ్రీనివాస్.

“సరే బాబు” అంది నిర్మల.

శ్రీనివాస్ వెళ్లిపోయాక శ్రీను, “ఏంటి నిర్మలా, ఎందుకంత కోపం? చిరాకు వస్తోంది నీకు నా మీద?” అని అడిగాడు.

నిర్మల, “గురివింద గింజకి గుద్ద కింద నలుపు కనిపించదన్నట్టు ఉంది మీ వ్యవహారం” అంది.

శ్రీను, “ఎందుకు డబుల్ మీనింగ్‌లో మాట్లాడుతున్నావో నాకు అర్థం కావడం లేదు” అన్నాడు.

“ఇప్పుడు మీరు అర్థం చేసుకున్నా చేసేదేమీ లేదు” అంది నిర్మల.

శ్రీను టిఫిన్ తినడం ముగించి, షాపుకి వెళ్లడానికి లేచాడు.

“మధ్యాహ్నం రా” అని నిర్మలతో చెప్పి వెళ్లిపోయాడు.

నిర్మల తలకి కట్టుకున్న టవల్ తీసేసింది. అప్పటికీ ఆమె జుట్టు తడిగానే ఉంది. జుట్టు నుంచి నీళ్లు చుక్కలుగా కారుతున్నాయి.

ఇంతలో శ్రీను ఫోన్ రింగ్‌టోన్ వినిపించింది.

“ఏంటి, ఇంకా వెళ్లలేదా?” అనుకుంటూ నిర్మల బయటకు వచ్చి చూసింది. కానీ శ్రీను ఇంట్లో లేడు.

ఫోన్ శబ్దం ఎక్కడి నుంచి వస్తుందా అని చూసుకుంటూ బెడ్‌రూమ్‌లోకి వెళ్లింది. అక్కడ శ్రీను ఫోన్ కనిపించింది.

“ఈ మాలోకపు మనిషి ఫోన్ కూడా మర్చిపోయాడు” అని నిర్మల మనసులో అనుకుంది.

నిర్మల ఫోన్ ఎవరిదా అని చూడబోయేలోపే కాల్ కట్ అయిపోయింది. ఇంతలో మళ్లీ ఫోన్ రింగ్ అయింది. నిర్మల ఫోన్ ఎత్తి, “హలో, ఎవరు?” అని అడిగింది.

అవతలి వ్యక్తి, “మేడమ్, మీ షాపులో షాంపూలు ఏమైనా ఆర్డర్ ఇస్తారా?” అని అడిగాడు.

నిర్మల, “లేదు, ఫోన్ ఇంట్లో మర్చిపోయారు” అంది.

“ఓకే మేడమ్, సార్‌కి చెప్పండి” అని అవతలి వ్యక్తి ఫోన్ కట్ చేశాడు.

నిర్మల, “సరే” అని ఫోన్ పెట్టేసింది. శ్రీను ఫోన్ తన చేతిలోనే ఉండటంతో, గ్యాలరీ ఓపెన్ చేసి చూద్దామని అనుకుంది. జానకి వాళ్ల అమ్మాయి వీడియోలు ఏమైనా ఉన్నాయేమోనని గ్యాలరీ తెరిచింది.

అంతే, స్క్రీన్ మీద కనిపించిన కొన్ని ఫోటోలు చూసి నిర్మల ఒక్కసారిగా ఆశ్చర్యపోయింది. ఆమె కళ్లలో ఆశ్చర్యంతో పాటు ఒక రకమైన భయం కనిపించింది. ఏం చేయాలో అర్థంకాక అలాగే స్క్రీన్ వైపు చూస్తూ నిలబడిపోయింది.

“ఇవేంటి?” అని మనసులో అనుకుంటూ, కనిపించిన ఫోటోలను నమ్మలేనట్టు మళ్లీ చూసింది. అప్పటివరకు శ్రీను ఫోన్‌లో ఇలాంటివి ఉంటాయని ఆమె ఊహించలేదు.