Misc. Erotica Shreya Ke Raaz: Kab tak Chhupenge

[Celebrorn]

Chapter 37

Shreya office mein baithi apne kaam mein kafi busy thi. Use ghar wapas aaye hue ek hafte ho chuka tha par abhi bhi kafi backlog bacha hua tha. Wapas aakar aisa laga jaise use fir se ek badla hua Rohit mil gaya ho. Pehle se kahin jyada responsible aur khush. Usne abhi tak Shreya ko sorry toh nahi bola tha, par uske actions sorry se kahin jyada they.

Tarun ki soch bilkul sahi kaam kar gayi thi. Us ek hafte ki doori ne un dono ko hi ek breathing space de diya tha ki woh log soch paaye apni jindagi ke baare mein. Par jahan Rohit ab thoda sorted sa lag raha tha, Shreya ke mann mein ek ajeeb si uljhan chale jaa rahi thi.

Papa ji ne jo usse kaha tha woh abhi bhi use bhula nahi saki thi. Shayad woh apne jaane se pehle yeh sunishchit karna chahte they ki Tarun aur Shreya dono ke paas koi na sahara ban kar khada rahe. Shayad unki soch galat nahi thi, par sab kuch itna aasan bhi toh nahi thi. 

Shreya ne Tarun se iss baare mein koi baat nahi chhedi. Pata nahi Papa ji ne usse yeh baat kari thi ya nahi, pata nahi uske mann mein kya tha. Bas uski baahon mein simte hue kab poora hafta beet gaya, use pata bhi nahi chala tha. Aur ab... ab woh use behad miss kar rahi thi.

Shreya ne ek claim par stamp lagate hue stamp kiya. Usse thodi door Rishabh bhi apne kaam mein kafi busy tha.

Achanak se ek soft sa haath aakar Shreya ke kandhe par pada aur ek chehakti hui si jaani pehchaani aawaz - Hello Aunty!

Shreya ne peeche mud kar dekha toh Megha uske peeche khadi thi - Megha!

Shreya turant khadi ho gayi - Kaisi ho! Yahan kaise aana hua.

Megha - Paas mein se guzar rahi thi... yaad aaya ki aapka office yahin hai... socha aapse mil lu... kafi sarkari office type feel hai yahan.

Shreya - Haan... par sach batayo... Aaj tak toh kabhi mujhse milne nahi aayi. Mujhe pata hai kisse milne aayi ho.

Megha - Nahi nahi aunty... (fir haste hue) acha theek hai... admit karti hoon. Kahan baithta hai woh waise?

Shreya - Yahin toh....

Shreya ne dekha toh Rishabh apni seat par nahi tha - Abhi toh yahin tha. Cafeteria gaya hoga. Aage se right.

Megha - Main dhoond lungi... aap baitho... Main aati hoon.

Megha cafeteria ki taraf badh gayi aur Rishabh ko wahan akele lunch karte dekha. Woh muskurati hui uski taraf jaane lagi. Use wahan dekh kar Rishabh ekdam se hairaan reh gaya.

Megha - Hello... kaise ho?

Rishabh - Main badiya... aap yahan kaise?

Doosri table par woh ladkiyon ka group bhi Megha aur Rishabh ki taraf dekhne lag gaya tha. Unhone pehle kabhi is ladki ko nahi dekha tha aur unhe samajh nahi aa raha tha woh Rishabh se baat kyun kar rahi thi.

Megha - Tumhari khabar lene... tum toh kabhi message ya call karte nahi.

Rishabh ke gaal thode laal ho gaye - Woh toh bas... main samajh gaya... aap Ma'am ko dikhana chahti hai na ki hum log mil rahe hain.

Megha thoda sochte hue - Ummm... haan... aisa hi kuch samajh lo.

Megha ne Rishabh ke bina bole uske lunch se ek gassa todte hue kha liya - Uhhh... itna acha nahi hai... tumne banaya hai? 

Rishabh - Nahi nahi... woh PG mein... aunty ne.

Megha ne shararat bhari aawaz mein kaha - Acha... waise tumhe toh acha khana banana aata hai na.

Rishabh - Nahi... bas theek thaak. Aap meri taang kheench rahi hai kya?

Megha bilkul serious hote hue - Nahi toh! Maine toh pakdi bhi nahi hai tumhari taang.

Megha yeh bolte hi hasne lagi aur Rishabh ke gaal aur bhi laal ho gaye. Doosre group ki ladkiyon ka bhi interest unki conversation mein kafi badh gaya tha.

Megha - Waise hum log aise hi kabhi bhi mil sakte hai... mujhe message kar diya karo.

Rishabh - Mujhe laga... aap busy hongi.

Megha - Haan toh baat karke figure out kar lenge na.

Rishabh - Hmmm... aapka office theek chal raha hai?

Megha - Haan Badiya! Aaj leave li hui hai.

Rishabh - Woh... Singapore wali baat... kuch aage badi?

Megha - Nahi... abhi toh nahi... par... dekhte hain. Nahi bhi hua toh theek hai. Kya pata... kuch aur acha ho jaye life mein.

Rishabh - Haan yeh bhi hai. Waise... hamare baare mein... koi kuch keh toh nahi raha tha na aapko?

Megha - Mummy pooch rahi thi... par maine abhi gol mol jawab de diya. Isse yaad aaya... ek baar Shreya aunty se bhi baat karni hai. Kahin woh kuch ulta pulta soch kar baithi hon. Us din itna sab kuch ho gaya unse baat hi nahi ho paayi.

Rishabh - Haan woh... ekdam se pata nahi kya hua... woh Rohit bhaiya itna gussa dikh rahe they!

Megha thoda hairaan hote hue - Rohit bhaiya kyun bula rahe ho use!! Tumse kafi chhota hai. Idiot hai ek number ka, faltu ki heropanti aa rahi hai use aajkal. Cool rahe... calm rahe... jaise tum ho.

Rishabh thoda sharmate hue - Mere jaise?! Nahi nahi... woh toh kafi cool hain waise hi... mere jaise nahi.

Megha thoda serious hote hue - Tum apne aap ko itna under estimate kyun karte ho?

Rishabh thoda nervous ho kar un ladkiyon ke group ko dekhne laga - Pata nahi... 

Megha ne palat kar unki taraf dekha aur fir Rishabh ki taraf - Kya hua? Un mein se... kisi ko... like karte ho?

Rishabh - Nahi nahi! Woh ladkiyan toh mujhe bilkul achi nahi lagti!

Megha ek shararat bhari muskaan ke saath - Toh kaun achi lagti hai?

Rishabh ne aankhen jhuka li - Ummm... pata nahi...

Dono hasne lage aur apas mein baatein karte rahe.

Shreya apne desk par abhi bhi baithi files clear kar rahi thi. Tabhi uske email box mein ek email aaya.

Please Send Education Documents

Shreya ne email khola toh usme likha tha ki HR ne uske education documents ki attested copy aur originals maange they.

Shreya email dekh kar thoda hadbada sa gayi. Kuch samajh nahi aa raha tha ki yeh email kyun bheja gaya tha. Uski nazar Manish ke cabin ki taraf gayi. Kya is sab mein Manish ka koi haath tha? Pata nahi, par filhaal uske paas jaane ke elawa koi option bhi nahi tha.

Shreya khadi hui aur uske cabin tak pahuch gayi.

Shreya knock karke halka sa darwaza khola - Sir...

Manish - Come in...

Shreya ne andar aate hue darwaza band kiya - Sir... ek urgent baat karni thi.

Manish - Haan haan... bolo na.

Shreya - Mere paas abhi ek email aaya hai HR se. Unhone mere original education documents maange hai.

Manish - Kyun? Education documents ka kya karenge woh?

Shreya - Mujhe nahi pata! 

Manish - Acha... toh de do unhe documents.

Shreya pareshaan hote hue - Manish... I mean Sir aapko pata hai na...

Manish - Kya pata hai? Oh... acha... haan... main toh bool hi gaya tha.

Shreya Manish ke expression padne ki koshish kar rahi thi. Kya woh koi natak kar raha tha ya sach mein bhool gaya tha - Ab? Itne saalon baad documents maangne ka tuk kya hai?

Manish apni seat se khada ho gaya - Ruko, pareshaan at ho. Main abhi pata lagata hoon.

Manish ne turant apna phone uthaya aur ek number dial kiya - Bishnoi ji... kaise hai aap... Ek kaam tha aapse...

Manish phone par HR mein kisi se baat kar raha tha aur Shreya apni purani memories mein kho gayi. Uske husband Ravi ki death ke baad woh uski job le sakti thi, par uske liye graduate hona zaroori tha. Par usne toh kabhi apni graduation poori nahi ki thi. Uski shaadi hi 2nd year ke beech mein ho gayi thi.

Halanki usne apni graduation poori nahi ki thi par Ravi ka poora kaam use aata tha. Har shaam Ravi use baith kar padata, apna kaam samjhata aur English ki books padwata. Itne saal Ravi ke saath rehte rehte woh kitna kuch seekh gayi thi. Par fir bhi uski job paane ke liye graduation ka thappa hona zaroori tha. Tab Manish ne hi uski madad ki thi, aur nakli certificates lagwa kar uski job lagwayi thi. Kitni shukr guzaar thi woh Manish ki.

Jaise hi Manish ne phone neeche rakha, Shreya wapas apne hosh mein aayi.

Manish kafi serious lag raha tha - Gadbad ho gayi hai Shreya!

Shreya - Kya hua?

Manish - Dwarka wali branch mein ek employee ki nakli marksheet ittefaq se pakdi gayi. Jab maamla thoda khula toh woh link ho gaya hamare purane HR wale babu se. Ab headoffice purani khulwa raha hai, aur kafi saare logon ko documents dene ke liye bola gaya hai. Tum akeli nahi ho.

Shreya - Par... Par Manish... mujhe toh yeh job karte hue 12 saal ho chuke hain! Mere documents kyun?

Manish - Ab woh main kaise keh sakta hoon? Par kuch gadbad hui toh baat mujh tak bhi pahuch sakti hai. Aakhir maine hi toh tumhari madad kari thi tab.

Shreya - Haan... ab kya kare hum aage?

Manish - Waise... tumhara woh Zaheer Khan... yaad hai na... central audit wala... wohi investigate kar raha hai. Kya pata list mein tumhara naam dekh kar usne... tumhe bhi lapete mein lene ka socha ho.

Shreya - Manish... aap kuch kariye na please... main originals kahan se laayungi HR ko dene ke liye?

Manish - Main dekhta hoon main kya kar sakta hoon Shreya. Jo mujh se ban sakega main woh karunga. Musibat ke time apne hi kaam aate hain.

Shreya bilkul pareshaan khadi thi, use samajh nahi aa raha tha ki aage kya hone wala tha. Job toh ek alag cheez thi, woh is chakkar mein jail tak jaa sakti thi. Na chahte hue bhi use is sab mein Manish ki madad leni padh rahi thi.