Misc. Erotica Shreya Ke Raaz: Kab tak Chhupenge

[Celebrorn]

Chapter 36

Rohit apne liye kuch khane ke liye bana raha tha. Halanki Mom chaar din ka khana bana kar gayi thi, woh aaj raat ki video call mein Mom ko impress aur surprise karna chahta tha. Woh bhi toh jaane unka beta kitna responsible that ki sirf junk food par zinda nahi tha.

Pichhle do din usne apne dimaag ko bilkul shaant rakhne ki koshish kari thi. Na koi negative thoughts, na kisi par gussa. Bas ek list bana rakhi thi ki use kya kya karna tha.

1. Time par uthna
2. Time par college pahuchna
3. Studies mein dhyan dena
4. Kisi se ladayi nahi karna, uske baare mein sochna bhi nahi
5. Healthy Khana
6. Mom ko roz call karna aur I love you bolna

Pichhle do dino mein usne roz is list ko achieve kar liya tha. Par ek aur item bhi thi aakhir mein us list mein jo abhi adhoori thi.

7. Naina

Bas ek shabd, kya karna tha kaise karna tha use kuch samajh nahi aa raha tha. Woh kaise Naina ko samjhaye ki uski ab koi girlfriend sach mein nahi thi. Pichhle ded hafte mein agar Aanya agar use college mein dikh bhi gayi thi toh usne usse baat nahi ki thi. Aur na Aanya ne ab koi koshish kari thi.

Sab kuch theek chal raha tha par raat hote hi ek ajeeb sa khalipan sa lagta. Rohit ka dil use baar baar kehta ki woh Naina ko message kar de ya use call kar de. Par ab samajh nahi aa raha tha woh use kis tarah yeh sab samjhaye. Darr tha kahin woh kuch aisa na bol de jisse Naina usse aur door chali jaye.

Tabhi flat ki ghanti baji, aur Rohit ne kitchen se nikalte hue darwaze ki taraf badha. Woh is waqt kisi ko expect nahi kar raha tha. Darwaza kholte hi uske hosh udd gaye. Saamne Naina khadi thi.

Uske haath mein ek steel ka dabba tha, aur uska chehra dekh kar saaf pata chal raha tha ki woh yahan apni marzi se nahi aayi thi.

Rohit ne hairaan hote hue kaha - Naina?

Naina ne bina uski taraf dekha kaha - Mummy ne bheja hai. Tum akele ho toh Mummy ne socha ki...

Rohit ne uske haath se tiffin le liya aur thoda hesitate karte hue socha ki agar Mom hoti toh kya kehti - Andar aayo na... bahar kyun khadi ho?

Naina ne turant ek kadam peeche le liya - Nahi, mujhe jaana hai.

Rohit - Umm... paanch minute?

Naina - Nahi... mujhe darr lagta hai...

Rohit - Darr lagta hai? Mujhse?

Naina - Hmmm... aur waise bhi aunty bhi nahi hai...

Rohit - Mujhe tumhe woh Holi wali videos deni thi na, tumne maangi bhi nahi.

Naina ne muh banate hue kaha - Nahi... rehne do... main woh post karne bhi nahi wali...

Rohit - Kyun?

Naina - Bas... mera mann...

Rohit Naina ki taraf dekh raha tha, shayad uska ek aakhri mauka bhi haath se jaa raha tha. Tabhi kitchen se kuch jalne ki smell aur dhuaa bahar aane laga.

Rohit - SHIT!!!!

Rohit jaldi se andar bhaaga. Woh gas ko high flame par chhod gaya tha aur poori sabji jal chuki thi aur har taraf dhuaa ho raha tha. Usne jaldbazi mein gas par se bartan ko hatane ki koshish kari aur uska haath jal gaya.

Rohit - Ahhhh.... Shit!!!

Uski aawaz sunkar Naina bhi kitchen mein pahuch gayi thi - Yeh kya kar rahe they tum!

Naina dhue se khaasne lagi. Usne jaldi se gas ko band kiya aur exhaust fan on kar diya. Rohit apne jale hue haath ko pakde dard se aawazein nikaal raha tha. Uski ungliyaan aur hatheli poori laal padh chuki thi.

Naina - Pagal ho kya tum! Garam bartan ko bina kapde ke kaun pakadta hai?

Naina ne jaldi se fridge mein se barf nikaali aur ek bowl mein daalte hue Rohit ka haath usme daal diya.

Naina - Koi burnol type ki cream hai kya?

Rohit muh banata hua bola - Haan... woh andar... Mom ke kamre mein hogi... dressing table mein.

Naina jaldi se bhaagi hui andar gayi aur kuch der baad ek towel aur cream leti hui bahar aayi. Tab tak Rohit bhi barf ka bowl liye drawing room mein aa chuka tha.

Naina - Dikhayo... 

Naina ne uska haath pakadte hue bahar nikaala aur towel se halke se dab karte hue sukhaya. Aur fir us par cream lagane lagi. Uske chehre par Rohit ke liye fiqr saaf thi. Aur Rohit kuch pal ke liye apna dard bhool kar uski taraf dekh raha tha. Naina ke sparsh ne uska dard aadha kar diya tha.

Naina uski ungliyon ko apne muh ke paas laakar fook maar rahi thi. Tabhi uski nazrein Rohit se mili aur usne turant uska haath chhod diya.

Rohit ne haath chhodte hi dard mein awaaz nikali - Ahhh... Ouchhh...

Naina - Kyun kar rahe ho tum yeh sab Rohit!

Rohit - Kya kar raha hoon main?

Naina - Tumhe pata hai tum kya kar rahe ho... main jaa rahi hoon... bas padosi hone ke naate tumhari help kar di zara si...

Rohit - Sirf padosi hone ke naate? Matlab tum sabhi ki aise hi help karti... meri specially nahi.

Naina ki aawaz dagmaga rahi thi - Haan... aur kya...

Rohit ne uski aankhon mein dekha aur uski aankhon ke aage ek geeli si layer tairne lagi thi. Uske paas bas yehi ek mauka tha - I am sorry maine tumse jhooth bola. Aanya meri girlfriend thi. Par us din, Holi ke din hi maine usse break up kar liya tha. Main sirf tumse...

Naina ne use beech mein rok diya - Rohit nahi... please. Mujhe koi farak nahi padta ki tumne break up kiya ya nahi... Main us din bol chuki hoon ki hum bas society ke friends hain.

Rohit ne poori sincerity ke saath kaha - I am really sorry Naina... mujhe woh nahi kehna chahiye tha.

Naina ne apna sar naa mein hilate hue kaha - Main kya karu Rohit is sorry ka... it's fine...

Rohit - Theek hai... par please ek baar... main tumse sunna chahta hoon. Tumhe kaisa feel ho raha tha un do hafton mein jab hum log saath mein they. Bas itna bata do... 

Naina emotional hoti jaa rahi thi - Usse kuch change nahi hoga.

Rohit - Par kam se kam mujhe pata toh chal jayega ki maine kya kho diya.

Rohit jis filmy romantic tareeke se usse baat kar raha tha usse Naina apne aap ko aur nahi rok paa rahi thi - Pata nahi... ek ajeeb si feeling thi... jaise main itni khush pehle kabhi nahi hui hoon. Par Holi ke baad se... tumhe pata hai main sahi se so bhi nahi paa rahi hoon. Pata nahi kyun bas tumhare baare mein sochti rehti hoon.

Rohit ne kuch nahi kaha bas Naina ki taraf dekhta raha.

Naina - Tumne mujhe poori tarah mess up kar diya hai. I hate you... I hate you... kuch bologe bhi ya bas aise hi dekhte rahoge.

Rohit ne gehri saans lete hue kaha - Naina... I love you!

Naina ekdam se bauchakki si reh gayi, usne socha nahi tha ki Rohit usse yeh 3 shabd keh dega. Uske kaano mein abhi bhi Rohit ke shabd goonj rahe they.

Naina - Kya... kya kaha tumne?

Rohit - I love you! I really do.

Naina ne apne aap ko uski aankhon mein khone se roka - Nahi... tum bas aise hi bol rahe ho... Pata nahi kitni ladkiyon ko pehle bol chuke honge. Mere liye, woh words matter karte hai.

Rohit - Maine aaj tak yeh shabd kisi ko nahi bole hain.

Naina ka dil uska saath nahi de raha tha - Liar!

Rohit ne apne jale hue haath se Naina ka haath pakad liya - Sach!

Naina - Rohit please... tum nahi samajh sakte ki mere liye love ka matlab kya hai. Mere liye love koi casual cheez nahi hai.

Rohit - Pichle ded hafte se main roz tumhare baare mein sochta hua sota hoon aur jagta hoon. Maine kabhi pehle aisa mehsoos nahi kiya hai.

Naina - Sirf kisi ke baare mein sochna love nahi hota. Agar main kabhi kisi ko love karungi toh fir shayad kabhi kisi aur ko na kar sakungi. Tum toh pata nahi kitni baar love kar chuke honge.

Rohit - Sach... Aanya meri girlfriend thi, par mujhe kabhi uske saath waise nahi mehsoos hua jo tumhare saath hua hai.

Naina ki aawaz thodi dheemi ho gayi - Rohit... I want my love to be my first everything... my first crush... my first love... my first.... kiss...

Rohit - Main bhi... I know you love me! Please give me one more chance to prove how much I love you!

Naina aur Rohit ek doosre ko gehri saans lete hue dekh rahe they. Dono ko yakeen nahi aa raha tha ki unhone apna love ka confession kar diya tha. Un dono ke chehre ek doosre ke paas aa rahe they.

Tabhi ghar ki doorbell ek baar fir baji aur dono hadbadate hue khade ho gaye. 

Naina ne Rohit ki taraf dekha, uski aankhen pooch rahi thi ki kaun ho sakta hai. Rohit jaldi se darwaze ki taraf gaya, jo abhi bhi aadha khula hua tha.

Bahar jis insaan ko usne khada dekha woh use wahan dekh kar hairaan reh gaya - Rishabh!

Rohit ko uska naam bhi theek se yaad nahi aa raha tha - Tum?!

Rishabh - Ji... kya hua? Andar se kuch jalne ki smell aa rahi hai.

Naina tezi se andar se aati hui bina Rohit aur Rishabh ki taraf dekhe unke beech se hoti hui bahar nikal gayi.

Rishabh ne palat kar Naina ko jaate dekha - Yeh... aapki friend hain? Kafi acha dance kiya tha inhone us din.

Rohit ne muh banate hue uski taraf dekha - Tum yahan kya kar rahe ho?

Rishabh - Woh Ma'am ne bataya tha aap akele ho toh maine socha ek baar check kar lu.

Rohit - Mom ne tumhe bola mujhe check karne ke liye?

Rishabh - Nahi... unhone nahi kaha tha. Bas woh... us din... maine aise hi socha...

Rishabh ka ek haath kaanp sa raha tha. Woh kisi tarah apne aap ko yahan tak le toh aaya tha par ab realize ho raha tha ki shayad usne koi badi galti kar di thi.

Rohit ko samajh nahi aa raha the woh kya kare - Emmm... sab theek hai.

Rishabh ne ek dabba uske aage kar diya - Ye lijiye... kuch snacks hai. Maine yahin paas se khareede hain.

Rohit - Ohhkkk... andarrrr... aayoge kya? Ya?

Rishabh - Haan... main aa jaata hoon...

Rishabh hesitate karta hua ghar ke andar ghus gaya aur Rohit ne ek gehri saans lete hue darwaza band kiya. Rishabh kitchen mein jhaank kar dekh raha tha jahan se abhi bhi halka sa smoke bahar nikal raha tha.

Rishabh kitchen ki taraf badha - Kuch jal gaya shayad!

Par Rohit ne use rok liya - Haan... woh... thoda... cooking accident. Tum baitho andar... paani piyoge?

Rishabh - Haan... agar hai toh... matlab...

Rohit - Haan paani toh hai hi!

Rohit ne kitchen mein ghuste hue apna sar pakad liya. Uski life ka sabse amazing moment that abhi Naina ke saath, aur pata nahi kahan se yeh gadha yahan aa gaya tha. Matlab yeh yahan aaya bhi kyun tha? Itna awkward sa ajeeb sa ladka. Shit!

Rohit ne kisi tarah fridge se ek paani ki bottle nikaali. Thandi bottle pakadne mein achi lag rahi thi. Woh use lekar andar aa gaya. Rishabh idhar udhar dekh raha tha. Aur Rohit ne use paani ki bottle pakda di.

Rohit - Sorry woh glass... laata hoon.

Rishabh - Aree nahi... aise hi theek hai... upar se pee lunga. Glass kyun karna.

Rishabh bottle se paani peene laga.

Rohit sofe par baith gaya, use samajh nahi aa raha tha woh kya kare ya kya bole.

Rishabh ne baithte hue bola - Ma'am ke bina toh thoda ajeeb sa lagta hoga na.

Rohit - Ma'am matlab Mom na? Haan... I guess... pehli baar hi hai.

Rishabh - Haan exactly... office mein bhi kuch aisa hi hai.

Rohit - Mom ne tumhe sach mein nahi bheja?

Rishabh nervously bola - Nahi unhone nahi bola... actually bhaiya aap unhe nahi bolenge please ki main aaya tha.

Rohit ko ajeeb sa lag raha tha ki usse badi umar ka ladka use aap aap karke aur bhaiya bula raha tha.

Rohit - Ummm... theek hai... aap bhi... unhe yeh kitchen accident ka kuch mention nahi karna.

Rishabh - Haan! Nahi karunga. Main aaya hi nahi toh... mujhe kaisa pata hoga kisi bhi baare mein.

Rohit - Exactly! Kuch khayoge?

Rishabh - Woh patties thi us box mein... woh kha sakte hain.

Rohit jaldi se Rishabh ka laaya hua box le aaya aur 2 plates bhi. Dono aamne saamne baithe bohot hi awkwardly chup chaap patties kha rahe they. Beech beech mein unki nazar milti par woh idhar udhar dekhne lagte.

Rishabh patties khatam karte hi khada ho gaya - Toh main... chalta hoon... lagta hai sab theek hi hai.

Rohit - Haan... ummm... thanks for... the patties I guess.

Rishabh - Aap apna number de do, main miss call kar deta hoon. Agar koi emergency ho toh mujhe call kar lena.

Rohit sochne laga ki woh kaunsi emergency mein is ladke ko call karne ka kabhi sochega par woh use mana nahi kar paaya - Ummm.... haan likho...

Rishabh ne apne phone mein Rohit ka contact save kiya aur uske phone par ek missed call di - Theek hai bhaiya... main chalta hoon... aap apna dhyan rakhna.

Rohit - Haan... sure... bye!

Rishabh ke jaate hi Rohit ne ek badi si saans chhodi. Oh god! Aaj ki poori shaam itni crazy rahi thi. Rishabh ke aane se uska poori thought process hi jaise hil gayi thi. Uske aane se theek pehle woh... Naina ke paas tha. Woh dono shayad aur bhi paas aane wale they. Shit! 

Par shayad uske paas ek aur mauka tha abhi. Woh jaldi se apne kamre mein ghusa aur ek pen drive mein Holi ki saari videos daalne laga. Yehi sahi bahana tha Naina ke ghar jaane ka.

Kuch der baad woh pen drive liye Naina ke ghar ke bahar tha. Knock karne par Khanna ne darwaza khola aur muskurate hue use welcome kiya. Par Rohit ki nazar andar Naina par gayi, jiske chehre par ab ek behad shy si muskaan thi.