Misc. Erotica Shreya Ke Raaz: Kab tak Chhupenge

[Celebrorn]

Chapter 30

Rishabh ne mall mein ghuste hue apni reflection ko glass door mein dekha. Usne ek check shirt aur jeans pehni hui thi, jisme woh apne hisaab se kafi smart lag raha tha. Aakhir aaj woh din tha jab use Shreya Ma'am wali ladki si milna tha. Chahe woh kaise bhi dikhe, use pata tha woh meeting toh achi nahi jaane wali thi. Ladkiyon ke saath woh jis tarah se hadbada jaata tha, hamesha se uski problem rahi thi.

Woh mall ke andar ghusa aur idhar udhar nazrein ghumayi toh use beech open space mein Shreya Ma'am khadi dikhayi di. Unhone aaj ek loose t-shirt aur tight fitted jeans pehni hui thi. Aaj woh pehli baar unko is tarah casual kapdon mein dekh raha tha. Office mein woh hamesha saree ya suit hi pehna karti thi.

Rishabh se nazrein milte hi unke chehre par ek badi si smile aa gayi aur woh poore confidence se uski taraf chalti hui aane lagi. Kitni amazing lag rahi thi woh aaj... unke khule hue baal hawa mein lehra rahe they, aur pair jis co-ordination se zameen par pad rahe they, jaise woh koi model hi hon. Uske liye toh woh kisi model se kam nahi thi.

"Rishabh!!!" Shreya ne thoda paas aate hue zor se use aawaz di, "Looking smart!"

Rishabh ke kadam wahin ruk gaye aur Shreya chalti hui uske paas pahunchi aur uski shirt ka collar theek karne lagi. Uski ungliyan halki si Rishabh ki gardan ko chhu gayi aur Rishabh ka dil ek second ke liye atak sa gaya. "Theek se iron nahi kiya... par koi nahi... chalo!"

"Haan woh... iron wale bhaiya apne gaav gaye hain toh aajkal mujhe khud hi karna padh raha hai, main seekh raha hoon youtube se sahi se iron karna," Rishabh hamesha ki tarah bina kisi filter ke Shreya ke saamne shuru ho gaya.

"It's ok!" Shreya haste hue boli, "Megha ke saamne itne detailed jawab mat dena. Point to point hi rakhna, woh thodi... pragmatic ladki hai."

"Pragmatic..." Rishabh ne dheere se dohraya.

"Haan matlab... practical... realistic... no nonsense..." Shreya explain karte hue boli.

"Mujhe pata hai pragmatic ka matlab, maine english medium mein hi padayi kari thi," Rishabh ek baar fir thoda defensive ho gaya.

"Aree baba..." Shreya ne apni kheej dabane ki koshish kari, "Aaj... please... ache se..."

Shreya ko achanak se lagne laga tha ki usne apni gardan is maamle mein kyun fasayi thi. Shayad Rohit theek hi keh raha tha ki use is tarah logon ki life mein dakhal nahi dena chahiye. Woh dono escalator lete hue do floor upar food court par aa gaye they.

Kuch door Shreya ko apni dost Poonam aur Megha khadi hui dikhayi di. Usne zor se wave karte hue unhe hi bola aur tez kadmon se unki taraf badhne lagi. Rishabh thoda sa peeche reh gaya tha. 

Shreya jakar Poonam ke gale lag gayi aur woh dono dost hasne lagi. Shayad unhe bhi lag raha tha ki yeh sab jaise kisi film ka scene ho aur woh apne 'bachhon' ko milane laaye hai.

Megha thoda sa peeche khadi thi aur uska poora dhyan apne phone par tha, chehre par expression saaf keh raha tha ki woh yahan apni marzi se nahi aayi thi. Rishabh ne Megha ki taraf ek quick nazar daali. Usne ek white color ki shirt pehni hui thi aur blue jeans, baal thode se messy lag rahe they jaise usne jyada parwah nahi ki ho ki woh kaisi lag rahi hai. Par uska chehra kafi aakarshak aur determined sa tha. 

"Aree Rishabh!" Shreya ki aawaz ne usse uske khayalon se jagaya. "Wahan kyun ruk gaye, yahan aayo na."

Rishabh slowly unki taraf badha. Megha ne bhi apna phone apni pocket mein rakha aur ek baar sar se pair tak Rishabh ko scan kiya, shayad woh bhi Rishabh ke baare mein apna opinion bana chuki thi.

"Namaste Aunty!" Megha ki confident si aawaz bahar nikli, "Kaisi hain aap?"

"Main badiya, tum batayo, itna time ho gaya mile hue."

"Haan... Rohit theek hai?" Megha ne pucha.

"Badiya... yeh Rishabh hai..." Rishabh ke paas aate hi Shreya ne uske arm ko halke se touch karte hue kaha. "Aur Rishabh... ye Megha..."

Shreya ka haath us par padte hi Rishabh unki taraf dekhne laga, par fir wapas apni nighahen neeche kar li.

"Tum log baatein karo... hum thodi der mein aate hain." Shreya ne kaha.

"Megha..." Poonam ne Megha ko ghoor kar dekha jaise use koi warning de rahi ho, "Mujhe call kar liyo... jab free ho jayo."

"Hmmm...." Megha ne halke se jawab diya, aur Shreya aur Poonam jaldi se wahan se jaane lage.

Rishabh ne unhe jaate hue dekha, jaise soch raha ho ki woh kahan fas gaya tha. Par woh dono hasti hui aage chali jaa rahi thi.

"Ummm... so..." Megha ne uska dhyan kheencha, "Kahan chale?"

"Yahin food court mein baith jaate hai na?" Rishabh ne Megha ki taraf dekhte hue jaldi se jawab diya.

"Perfect! Main bhi yahi soch rahi thi." Megha ke chehre par jaise thodi si rahat aa gayi. Shayad woh bhi kisi fancy cafe mein baithkar formal meeting nahi chahti thi.

Food court abhi jyada bhara nahi hua tha aur woh dono ek khali table par baith gaye jahan aas paas koi nahi tha. Dono chup chaap baithe idhar udhar dekh rahe they, jaise unhe ek doosre se umeed ho baat shuru karne ki.

Aakhir Megha ne hi conversation ko shuru kiya, "Rishabh... tum job karte ho?"

"Haan... insurance claims processing... par main accounts department mein move hone ka soch raha hoon." Rishabh fir se apne aap ko poora explain karne se rok nahi paaya. Woh yeh bolkar fir idhar udhar dekhne laga.

"Accounts department? Uske liye... kahin transfer lena padega kya?" Megha ne curiosity se pucha.

"Nahi... usi branch mein hai. Par kyun?"

"Aise hi pucha. Aur tumhare parents? Parents ke saath rehte ho na tum?" Megha ne pucha.

"Nahi... main akele rehta hoon. Parents toh Kanpur rehte hain." Rishabh ki gardan par use paseene ki ek boond mehsoos hui. Megha usse kisi interview ki tarah sawaal kar rahi thi. Kya woh sach mein us mein interested thi.

"Akele... hmmm." Megha shayad soch rahi thi ki agla sawaal puche ya nahi, "Tab toh girlfriend waigera bhi hogi tumhari?"

"Nahi!" Rishabh pocket se rumaal nikal kar apna paseena pochte hue bola, "Meri koi girlfriend nahi hai."

Megha ne use ek baar fir gaur se dekha, uske chehre par jis tarah se paseena aane laga tha, saaf lag raha tha ki woh ladkiyon ke saath comfortable nahi tha.

"Tum bhi kuch pooch sakte ho." Megha yeh kehte hue chair par thoda relaxed hokar baith gayi.

"Emm... aapko khana banana aata hai kya?" Rishabh ke muh se ekdam se nikla.

"Kyun!!" Megha turant apni chair par seedhi ho kar baith gayi jaise use ladayi ka mudda mil gaya ho, "Sirf girls ki jimmedaari hoti hai khana banana? Tumhe khana banane wali chahiye? Main bhi toh pooch sakti hoon ki tumhe ghar ke kaam aate hai ya nahi?"

"Main khana bana leta hoon... par bohot acha nahi," Rishabh apni robotic si aawaz mein question ka jawab bina kisi hostility ke dene laga, "Kapde dho leta hoon... Ironing seekh raha hoon. Baaki kuch cheezon ke liye maid aati hai."

Megha ek pal ke liye bilkul blank ho gayi. Uske andar ki bhadaas abhi poori tarah nikal bhi nahi paayi thi aur is jawab ne ab use bahar nikalne ka koi khaas karan nahi chhoda tha, "Ohhh... achhha... hmmm."

"Sorry aapko bura laga toh... woh bas... jo tv mein dekha hai logo ko puchte hue." Rishabh kisi tarah ek halki si smile apne chehre par laaya.

"Nahi... it's ok." Megha uski apology sunkar thoda aur naram padh gayi.

"Ma'am ne bola tha... point to point bolne ke liye... par..."

"Ma'am??" Megha ne hairaan hote hue pucha.

"Shreya Ma'am... jinke saath main aaya tha." Rishabh ne masoomiyat se kaha.

"Oh... woh aapki Ma'am hai? Matlab woh aapke... aapke office mein hain?" Megha ki aankhen thodi curious ho gayi thi.

"Haan... unhone hi mujhe yahan fasaya... I mean sorry." Rishabh apni galti realize karte hue ek pal ke liye seham gaya, "Unhone hi kaha tha is meeting ke liye. Aap please unhe nahi batana maine aise kaha tha."

Ek dam se Megha ke serious chehre par hasi chhoot gayi, "Hahaha... oh god... tum bhi fasaye gaye ho is meeting ke liye. Great! Yeh Shreya Aunty aur Mom bhi na..."

"Koi nahi... mere paas bhi plan hai inke liye." Megha dheere se budbudayi. "Tumhe pata hai Rishabh... pichhle 3 mahino mein main kitno ladko se mil chuki hoon?"

"Nahi... mujhe kaise pata hoga?" Rishabh ne sochte hue kaha, jaise yeh koi exam ka question ho.

Megha ne palke jhapkate hue uski taraf dekha jaise Rishabh koi alien ho, "Emm... paanch! Paanch ladko se mil chuki hoon. Aur ek se bad kar ek namune!" 

"Namune?" Rishabh ne hairani se pucha, chashma thoda upar sarkaate hue.

"Aur nahi toh kya!" Megha ne table par dono haath aage failaye, jaise aakhirkar use koi aisa sunne wala mil gaya ho jiske saamne show-off karne ki zaroorat nahi thi. "Pehla wala shaadi se pehle har tarah se compatability check karna chahta tha. Doosra wala chahta tha ki shaadi ke baad main apni job chhod du aur teesra... waise tum toh nahi soch rahe they ki meri job chhudwa doge?"

"Nahi... main kyun aisa karna chahunga?" Megha ke bebak roop ko dekh kar Rishabh aur bhi defensive ho gaya tha. "Woh toh aapki marzi hai."

Megha ne ek second ke liye use ghoora aur phir zor se hans padi. "You are hilarious, Rishabh! Matlab tum sach mein aise hi robotic ho ya meri leg-pulling kar rahe ho?"

"Main kyun leg pulling karunga? Main toh aapko ache se jaanta bhi nahi." Rishabh ne pareshaan hote hue kaha.

Kuch pal baad Megha ki hasi ruki aur usne Rishabh ki taraf dekha. Uske chehre par ab pehle wali chidchidahat nahi thi. "Maine Mom ko is meeting ke liye mana kar diya tha, par unhone mujhe Shreya aunty ka naam lekar force kiya. Mujhe laga tha fir se koi... namuna hi milega. Par tum... tum thode alag ho... innocent ho."

Megha ke muh se yeh innocent shabd sunkar Rishabh ko ajeeb sa laga, samajh nahi aa raha tha yeh uski tareef thi ya burai. Par shayad ab Megha us par gussa nahi thi. Par agle hi pal uske mann mein wohi khauf jaaga, agar woh Megha ko pasand aa gaya aur usne shaadi ke liye haan kar di toh. Megha mein koi burai nahi thi shayad, par woh Shreya Ma'am nahi thi. Use samajh nahi aa raha tha ki woh kis tarah is poori baat ko khatam kar de.

"Rishabh..." Megha ki aawaz thodi si gehri ho gayi, "Tum agar... umm..."

Rishabh Megha ke agle shabdon ka intezaar karta hua buri tarah ghabra raha tha.

"Actually mere paas ek plan hai, yeh sab meetings rokne ka, agar tum meri thodi help kar sako toh?" Megha ne direct hote hue kaha, "I know it's asking a lot, but please ek baar sun lo."

"Hhh... haan... jaise aap kahe." Yeh sun kar Rishabh ka dimaag thoda sa shaant hua. Shayad waise nahi tha jaise woh soch raha tha.

"Toh hum un dono ko bolenge ki meeting achi gayi," Megha ne apni ungliyon se table par ek circle banate hue kaha, "Ki hum dono ek doosre ko like karte hain, matlab ekdam se nahi, par thodi aur meetings chahiye shayad. Isse woh dono khush ho jayengi aur filhaal ke liye thoda peeche hatt jayengi."

"Aur fir?" Rishabh ne pucha, uske mann mein yeh sawaal tha ki use yeh sab natak kab tak karna padega.

"Fir kya... bas kuch mahine beech beech mein milte rahenge. Unko kuch kuch batate rahenge, taaki woh log khush rahe. Fir baad mein sab end kar denge."

"Toh mujhe jhooth bolna hoga?" Rishabh ka chehra kafi serious sa ho gaya tha, "Aur agar unhone mere parents se baat karne ke liye bola?"

"Jhooth nahi bol rahe... bas thoda time le rahe hai." Megha ko yakeen nahi aa raha tha ki Rishabh itna seedha kaise ho sakta tha, "Aur parents ki baat... koi na koi bahana laga denge... jyada ho toh main unse apne kisi friend ko tumhari Mummy bana kar baat kara dungi."

Rishabh ko sab kuch kafi complicated sa lag raha tha. Itne saare mahine aise jhooth bolna aur doosre logon ko bhi involve karna. Kuch gadbad ho gayi toh. Aur fir woh kya bol kar yeh sab khatam karenge, tab Shreya kya sochegi uske baare mein. "Megha ji... par..."

"Megha... tum mujhe bas Megha bula sakte ho." Megha ne use correct kiya, "Sirf 6 months ki baat hai... meri company mujhe Singapore transfer wali hai. Maine abhi Mom ko nahi bataya hai. Tum bhi please Shreya aunty ko mat batana. Jaise hi Singapore ka confirm hoga, main unko bol dungi ki main career ko priority de rahi hoon. Tumhe kuch nahi kehna padega."

Megha ne jaldi jaldi bolte hue Rishabh ke darr ko door karne ki koshish kari. Is pehli meeting mein hi shayad woh samajh gayi thi ki Rishabh is sab ke liye bilkul trustworthy tha.

"Singapore... woh toh kafi achi jagah hai." Rishabh ne impress hote hue kaha, "Agar aisa hai toh mujhe koi problem hai... par... ummm... par aap Shreya Ma'am ke saamne baad mein mujhe is sab ke liye dosh mat de dena."

"Tum befiqr raho... main Shreya aunty ke saamne tumhari bohot tareef karungi." Megha ne excited hote hue kaha.

Use toh pata bhi nahi thi ki usne Rishabh ko badle mein kya de diya tha.

"Oh god..." Megha ne ek gehri saans li, "I think I need a coffee now... tumhe chahiye kuch?"

"Haan... main bhi coffee le lunga." Rishabh ne dheere se kaha.

"Tum baitho... main lekar aati hoon!" Megha jaldi se khadi hui aur paas hi ek kiosk se 2 coffee lekar aane lagi.

Rishabh wahin baitha raha, uska dimaag poori meeting ko process kar raha tha. Jo nateeza nikal kar aaya tha woh iss baare mein soch bhi nahi sakta tha. Yahan aane se pehle use darr tha ki kahin us ladki ne use buri tarah reject kar diya toh uska impression Shreya Ma'am par kaisa jayega. Aur agar us ladki ne haan kar diya toh... toh woh kya karega. Par, yeh toh jaise best case scenario tha.

Tabhi uske dimaag mein kaundha ki shayad use uth kar coffee lene jaana chahiye tha, na ki Megha ko. Aise hi toh hota hai filmo aur tv mein aur real life mein bhi. Agar Shreya Ma'am ko pata chala toh woh kitna naraaz hongi. Uski nazrein Megha ko dhoondne lagi.

Tab tak saamne se Megha do paper cups haath mein liye table ki taraf wapas aa rahi thi, aur usne paas pahunch kar ek cup Rishabh ke aage sarka diya. "Cappuccino. Cheeni thodi kam rakhi hai, I hope chalega?"

"Haan... chalega. Par... main paise de deta hoon," Rishabh ne jhijhakte hue apna wallet nikaalna chaha.

"Aree... ek coffee hi toh hai." Megha ne wapas chair par baithte hue usko wallet andar rakhne ka ishaara kiya, "Agli baar tum pila dena, theek hai?"

Rishabh ne coffee ke cup ko pakadte hue ek halki si smile di aur apna sar haan mein hilaya.

Dono agle 20-25 minute aaram se coffee peete hue baatein karte rahe. Megha use apne office ke baare mein bata rahi thi, aur Rishabh chup chaap sunta raha. Beech beech mein woh bhi koi sawaal pooch leta. Uske maathe ka paseena ab poori tarah sookh chuka tha, aur dimaag se tension gayab.

Tabhi, food court ke entrance se aati hui do aawazein unke kaano mein padi.

"Arrey dekho Poonam! Wahan baithe hain dono! Abhi bhi baatein chal rahi hain!" Shreya ki aawaz mein aisi excitement thi jaise usne koi lottery jeet li ho.

Rishabh aur Megha dono ne ek saath palat kar dekha. Shreya aur Poonam haath mein shopping bags liye tezi se unki table ki taraf badh rahi thi. Dono tables ke paas aakar ruki. Shreya ne ek nazar table par rakhe do coffee cups par daali aur phir Megha aur Rishabh ke relaxed chehron ko dekha.

"Tum logon ka toh call aaya nahi, toh humne socha ki hum hi check kar le kya hua," Shreya ne Megha ke kandhe par jhukte hue use hug kar liya aur shararat bhari nazar se Rishabh ki taraf dekha. "Disturb toh nahi kar diya? Hum thodi aur der ke liye tumhe yahan chhod kar jaa sakte hain. Par jyada der nahi denge."

Rishabh ka chehra jhepte hue poori tarah laal padh gaya, aur uski aawaz hi bahar nahi nikal rahi thi.

Par Megha ne turant Shreya ke haath pakadte hue thoda aur neeche kheencha jisse uske gaal Shreya ke gaal se sat gaye. "Nahi nahi... aapne bilkul disturb nahi kiya. Ummmm... baaki conversation phone par ho jayegi." Yeh bolte hi Megha ne bhi thoda sa sharmane ka natak kiya.

"Oh ho!" Shreya ke muh se turant nikla aur usne Megha ke gaal par halka sa kiss kar diya. "Haan bilkul!"

Rishabh ki nazrein Shreya ke us halke se kiss par jakar atak gayi. Kaise unke gulabi naram honth, Megha ke gaalon se takra kar wahan apni chhaap chhod gaye they. Uske dil mein ek ajeeb si halchal ho rahi thi.

"Arey waah!" Poonam ne dono haath jodkar upar dekha, jaise mandir mein koi mannat poori ho gayi ho. "Sach mein Megha? Mujhe toh yakeen hi nahi ho raha! Mujhe toh laga tha ki tu is bechare par apni poori bhadaas nikal degi."

"Mom please, itna bhi gussa nahi karti main!" Megha ne thoda sa irritate hote hue apni mom ka haath pakad liya. "Waise bhi Rishabh kafi sensible hain."

"Mujhe pata tha!" Shreya chehak uthi, "Tum dono ek doosre ko bohot pasand aayoge. Ab aage? Rishabh apni Mummy ka number mujhe de dena, main unse..."

Rishabh ye sunte hi thoda seham gaya aur usne Megha ki taraf dekha.

"Aunty... actually abhi... yeh toh bas pehli meeting thi." Megha ne gently Shreya ka haath pakadte hue use saath wali chair ki taraf direct kar diya, aur Shreya wahan baith gayi. "Shaadi... kafi bada decision hota hai. Agar aap ok hain toh... hum kuch aur meeting karke finally decide karna chahenge."

Megha ne bohot hi skillfully Shreya ki aankhon mein aankhen daal kar bola. 

"Haan haan... main samajh sakti hoon. Poonam?" Shreya ne Poonam ki taraf dekhte hue uski rai maangi.

"Hamare time mein toh aisa kuch nahi hota tha!" Poonam ko shayad Megha par itna bharosa nahi tha.

"Yaar... time badal gaya hai. Shaadi sach mein ek kaafi bada decision hai." Shreya ne kaha, "Aur tu fiqr mat kar na, main in dono par poori nazar rakhungi. Waise mujhe in dono par hi poora bharosa hai."

"Thanks Aunty!" Megha ne Shreya ko baithe baithe hug kar liya.

Rishabh table ki doosri taraf baitha yeh sab sun raha tha, woh log aise baatein kar rahe they jaise woh wahan ho hi nahi.

Kuch der baad, sab wahan se chalne ko nikalne ko tayyar ho gaye they. Rishabh aur Megha ne ek doosre ko bye bola aur jaise woh log aaye they, waise hi wapas jaane lage.

Shreya Rishabh ke saath chalte chalte kafi khush aur excited lag rahi thi, uske mann mein hazaron sawaal they jinhe woh poochna chahti thi. Use laga tha ki woh dono ek doosre ke liye perfect honge, par use laga nahi tha ki pehli meeting itni achi chali jayegi.

Megha aur Poonam se thoda door pahunch kar usne aakhir pucha, "Rishabh! Shuru se sab batayo... kya baat kari tumne aur Megha ne aapas mein."

"Ma'am woh..." Rishabh ko samajh nahi aa raha tha woh kya bole.

Par itne mein Mall ke exit tak pahunchte pahunchte unhe realize hua ki bahar kaafi tez baarish shuru ho chuki thi. Aasmaan poora kaala ho chuka tha aur moti moti boondein poore zor se sadak aur parking area par gir rahi thi.

Dono entrance ke glass door ke paas khade ho gaye jahan pehle se kafi log khade they.

"Ufff... meri gaadi mein ek umbrella hai, par gaadi tak pahunchte pahunchte toh poora bheeg jayungi." Shreya ne muh banate hue kaha.

"Aap yahin ruk jaiye na mall mein thodi der, tab tak shayad baarish kam ho jayegi." Rishabh ne tez padti baarish ki taraf dekhte hue kaha.

"Nahi... forecast dikha raha hai ki agle 2 ghante baarish hi hoti rahegi. Ghar bhi pahuchna hi haina." 

Tabhi baarish tez hawa se thodi si tirchi hui aur glass door ki taraf tezi se aate hue un dono par aa kar giri.

"Ouchhh!" Shreya chillate hue thoda sa andar ho gayi.

Rishabh bhi thoda sa andar hua, par uski shirt ab thodi si bheeg chuki thi. "Ma'am... aap mujhe apni gaadi ki chaabi dijiye... main chhaata le aata hoon."

"Pagal ho kya! Itni baarish mein buri tarah bheeg jayoge. Nahi ruk hi jaate hain." Shreya ne kaha.

"Ab bheeg toh chuka hi hoon." Rishabh ne kandhe uchkate hue kaha. "Aap hi toh kehti hai ki paani se kya darna."

"Hmmm..." Shreya ne kuch pal socha aur fir kaha, "Tumhe pata hai meri gaadi kaun si hai?"

"Black WagonR....DL 3C RU 4567..." Rishabh ke muh se ekdam se nikal gaya, par bolte hi use realize hua ki shayad use yeh nahi bolna chahiye tha.

Shreya ne ek pal ke liye uski taraf dekha aur fir use chaabi thamate hue kah, "Teesri row mein hai... bilkul beeche mein... umbrella back seat ke neeche rakha hai... tum chala kar hi le aana yahan tak?"

Rishabh ne chaabi pakdi, "Mujhe gaadi chalani nahi aati!" Yeh kehte hue woh turant baarish mein bhaag pada.

"Rishabh, ruko! Pagal ho gaye ho kya!" Shreya peeche se chillayi, par tab tak Rishabh mall ke entrance se nikal kar parking ki taraf bhaag chuka tha.

February ke mahine mein, Baarish ka tez thanda paani Rishabh ke sar par kaanton ki tarah gir raha tha. Kuch hi second mein uski shirt poori bheeg chuki thi, aur uska chashma poori tarah dhundla padh chuka tha. Usne apna chashma utaarte hue apne haath mein pakad liya. 

Uske joote paani mein chhap chhap karte hue poori tarah bheeg chuke they, bas woh aankhen meenchta hua 4567, is number ko dhoond raha tha.

Aakhir use teesri row ke theek beech mein Shreya ki kaali wagonR dikh hi gayi. Usne gaadi ko turant unlock kiya, aur pichle seat se umbrella nikaalte hue use khol liya. Woh umbrella pakde wapas mall ki entrance ki taraf aane laga.

Mall ke glass door ke paas khadi Shreya bechaini se idhar udhar dekh rahi thi. Jaise hi usne Rishabh ko chhaata liye apni taraf aate dekha, uske chehre par thoda sa gussa aur hairani ubhar aayi.

"M...Ma'am... chhaata," Rishabh ne haanfte hue kaha, uske chehre se paani ki dhaar beh kar uske collar mein jaa rahi thi. Usne chashma wapas pehanne ki koshish ki, par geele shishe se kuch saaf nahi dikh raha tha.

Shreya ke saamne yeh 26 saal ka ladka khada tha, thand se halka sa thithurta hua, haanfta hua, poori tarah bheege hue kapdon mein... sirf isiliye taaki woh uske liye ek chhaata laa sake.

"Tum sach mein pagal ho Rishabh!" Shreya ne dheere se kaha, uski aawaz mein daant kam aur fiqr jyada thi, "Chalo ab!"

Shreya ne ek gehri saans chodi aur aage badhkar chhaate ka handle Rishabh ke haath ke theek upar se pakad liya. Dono chhate ke neeche ek doosre se neeche behad paas gaye.

Dono ne dheere dheere gaadi ki taraf chalna shuru kiya. Baarish aur hawa tez thi aur halanki chhata bada tha, fir bhi side se Shreya ki tshirt aur jeans bhi bheegne lagi thi. Shreya ne chhate ke thoda andar hone ki koshish kari jisse uska kandha Rishabh se poori tarah satt gaya. Sirf ek hi tareek tha shayad baarish se bachne ka, agar Rishabh uske kandhe par haath rakh kar use theek apne se sata leta toh. Par woh... kitna ajeeb sa lagta.

Dono chalte hue aakhirkaar gaadi tak pahunche. Shreya ne Rishabh ko passenger side ki taraf moda, "Pehle tum andar baitho!"

Rishabh andar ghusa aur Shreya jaldi se driver side par aa gayi. Usne chhaata band kiya aur peeche ki seat par daala, aur fir darwaza khol kar baith gayi. Par itni si hi der mein uski tshirt bhi kaafi bheeg chuki thi, aur uski andar ki bra ki lines saaf nazar aa rahi thi.

Andar baithte hi usne apne kapdon ki taraf dekha aur zor zor saanson se uski chhaati foolti hui upar neeche hone lagi. Use behad sharam aa rahi thi is halat mein kisi aadmi ke saath gaadi mein baithe hue. Usne ek nazar Rishabh ki taraf daali jiski nighahen poori tarah neeche jhuki hui thi. Use is tarah sehma sa baithe dekh Shreya ki sharam gayab si ho gayi.

"Kya zaroorat thi aise baarish mein bhaag kar jaane ki. Thodi der ruk hi jaate!" Shreya ki kaanpti hui aawaz mein ek daba hua gussa tha.

"Par aapne hi toh kaha tha ki aapko late ho raha hai!" Rishabh ne seedha sa jawab diya.

Shreya ke paas uski baat ka koi jawab nahi tha, usne hi toh chaabi Rishabh ke haath mein di thi, par tab shayad use nahi pata tha ki woh iss tarah poora bheeg jayega. Rishabh ke bheege hue kapdon se gaadi ki seat bhi poori geeli ho chuki thi.

Shreya ne gaadi ko start karte hue gaadi ka heater on kiya, "Chalo... mera ghar yahin 5 minute ki doori par hai."

"Nahi Ma'am... mujhe metro station par chhod dijiye!" Rishabh ne aankhen uthate hue Shreya ki taraf dekha, par fir turant apni aankhen jhuka li.

"Aisi halat mein tumhe metro mein toh bilkul nahi chhodne wali." Shreya ne poore adhikar se kaha, "Wahan machine mein tumhare kapde sukha denge, aur tumhe toh mere bete Rohit ke kapde bhi fit aa jayenge waise."

Shreya ke muh se apne bete ke baare mein sunna Rishabh ko kafi ajeeb sa laga. Use pata tha ki Shreya Ma'am ka ek beta hai, unhe uski padhai ke baare mein bhi baat karte suna tha. Par kabhi uske baare mein jyada socha nahi tha. Kya woh sach mein itna bada tha ki uske kapde use fit aa jayenge? 

Jahan tak use pata tha, Shreya sirf 37 years ki thi. Kitne saal ka tha unka beta? Uske dimaag ko achanak se ek ajeeb si uljhan ne gher liya tha. Shreya Ma'am use kahin apne... bete ki tarah toh nahi dekhti thi. Tabhi unhone uski shaadi ki baat bhi chhed di thi. 

Nahi... unke bete ke kapde pehenne se toh achha tha woh kisi tarah apne ghar hi chala jaye, "Ma'am aap please kyun pareshaan ho rahi hai, aapne already itna time laga diya mere liye aaj."

"Maine tumse pucha nahi tha Rishabh, bataya tha ki hum mere ghar jaa rahe hain!" Shreya ne ek kadak aawaz mein kaha, aur fir turant aawaz ko naram karte hue, "Waise bhi abhi mujhe bohot kuch poochna bhi hai tumhari aur Megha ki meeting ke baare mein!"

Rishabh ko pata tha ki gaadi se bahar koodne ke elawa aur koi raasta nahi bacha tha Shreya ke ghar ko avoid karne ka. Woh uncomfortably chup chap baith gaya. Mann mein kaafi bechaini si ho rahi thi, aakhir woh aaj Shreya ka ghar dekhne wala tha.

"Waise yeh batayo... tumhe meri gaadi ka number kaise yaad tha?" Shreya ne achanak se ek direct sawal karte hue Rishabh ko poori tarah off guard kar diya tha.

"Woh... Ma'am... maine..." Rishabh haklate hue koi sensible sa jawaab dhoondne laga.

Shreya muskurayi, "Aise bohot se sawal hai jo aaj tumse karne hain!"

Rishabh ka dil zor zor se dhadakne laga. Kya aaj uska raaz Shreya ke saamne bahar aane hi wala tha. Gaadi ekdam se ek building ke paas thodi dheemi hui aur andar ki taraf turn liya. Shayad yehi thi Shreya Ma'am ke apartment ki building.