Misc. Erotica Shreya Ke Raaz: Kab tak Chhupenge

[Celebrorn]

Chapter 29

Cafeteria mein shor aur log dono hi thode kam ho chuke they. Shreya ke honthon par kal ki baatein yaad aate hi halki si muskaan tair gayi. Kal ka din aasan nahi tha, Khanna ke woh bhadde se jokes, uski nazrein jo uske kapdon ke aar paar dekhna chahti thi, aur woh baar baar uska anjaane mein Shreya ko chhoo lena. 

Yeh sab sochte hi Shreya ke rongte khade ho jaate they. Par chalo, ye sab bekar toh nahi gaya tha. Rohit aur Naina ko akele ek doosre ke saath kafi time mil gaya tha. Jab woh log wapas aaye they toh dono ke chehre par ek shy si muskaan thi, jaise woh ek doosre ki company behad enjoy karte hue aaye they. Mission shayad aadha successful ho chuka tha.

Bas ab doosra mission baaki tha, jo theek uske saamne baitha hua tha. Rishabh aur Megha ki meeting finalize karna. Par woh ab tak Rishabh se is baare mein baat bhi nahi kar paayi thi. Aur karti bhi kaise, Rishabh ka toh poora focus uske banaye hue khane par hi tha.

"Khana kaisa laga?" Shreya ne dheere se pucha.

Rishabh ne jhatke se sar uthate hue Shreya ki taraf dekha, uska muh abhi bhi bhara hua tha, "Bohot... Bohot achha hai... par aap kyun itna pareshan hui mere liye."

"Aree... isme pareshaani kya. Jahan do logo ke liye banta hai... wahan 3 ke liye ban gaya." Shreya ne muskurate hue kaha, "Waise bhi kharab khana khate hue bimar pad gaye toh tumhe kaun sambhalega, socha hai kabhi?"

"Ma'am aap pareshan mat ho... agar main bimar bhi pad gaya toh office ka kaam poora kar dunga." Rishabh ne fir se wohi apna logical practical dimaag lagate hue jawab diya.

"Offo... mera woh matlab nahi tha..." Shreya irritate ho hi rahi thi ki usne apne aap ko sambhala, "Aur weekend mein kya kiya?"

Shreya ke apni taraf is achanak se interest ko dekh kar Rishabh bhi thoda suprise ho raha tha, "Ummm.... kuch khaas nahi... bas room mein hi tha... kuch web series dekhi... aur... bas kapde dhoye aur baaki sab kaam."

"Oh... tum saara kaam akele hi karte ho?" 

"Haan... koi aur hai bhi toh nahi yahan."

Shreya ko aakhir ek baat mil hi gayi Megha ki baat chhedne ke liye. "Wohi toh main soch rahi thi. Tumhara yahan koi bhi nahi hai. Tumhe bahar nikal kar friends banane chahiye... logon se milna chahiye."

"Mujhe naye logon se milna kuch khaas pasand nahi hai, Ma'am," Rishabh ne thoda jhijhakte hue kaha. "Waise bhi, ab toh akele rehne ki aadat ho gayi hai."

"Akele rehne ki aadat daalna achha nahi hota Rishabh! Abhi tumhari umar hi kya hai."

"Par main ab yahan is shehar mein friends banayu bhi kaise? Mujhe log samajh bhi nahi aate... bas aap..." Yeh kehte hi ekdam se uska chehra laal ho gaya, "Matlab aap hi ho jisse meri thodi bohot baat ho jaati hai."

Shreya table par thoda sa aage jhuki, "Aur agar koi aisi ho jisse tumhari frequency match kar jaye? Simple, shaant, jise faltu ka dikhawa pasand na ho."

Rishabh ek pal ke liye jam sa gaya, kya Shreya yeh sab apne baare mein keh rahi thi. Kya woh bhi aajkal uske baare mein sochne lagi thi? Kya isiliye woh uske liye lunch bana kar laa rahi thi. Do se teen... kya woh sahi soch raha tha. "Aapka matlab?" Usne dheere se kaha.

"Meri ek friend hai... uski beti hai... Megha... tumhari hi age ki hogi. Gurgaon mein job karti hai. Bohot hi achhi ladki hai." Shreya ek jhatke mein jitna ho sake sab bol dena chahti thi.

Rishabh ko samajh nahi aa raha tha ki Shreya yeh sab kya keh rahi thi.

"Maine apni friend se tumhare baare mein baat ki hai... hum chahte hai tum aur Megha ek baar milo." 

Rishabh ka chehra ek jhatke mein utar gaya. Woh kya soch raha tha aur kya nikla. "Aapne... mere baare mein baat kari? Par kyun?"

"Haan... tum itne ache ladke ho... main chahti thi ki tumhe bhi koi achi si ladki mil jaye." Shreya ki aankhon mein ek chamak si thi. "Main chahti hoon tum aur woh agle weekend milo... matlab koi pressure nahi hai. Bas ek simple meeting hai, tum dono apas mein baatein kar lena."

Rishabh ne Shreya ki taraf dekha. Shayad unhe zara bhi andaza nahi tha ki woh unke baare mein kya sochta tha. Usko kisi aur ki company nahi chahiye thi, woh toh bas shayad Shreya se hi ghanto baat kar sakta tha. 

"Ma'am... actually mujhe na... ladkiyon mein koi interest nahi hai." Rishabh ne bina soche samjhe yeh keh diya.

Shreya ki muskaan ekdam se gayab ho gayi, aur chehre par ek confusion si aa gayi, "Kya? Oh... tumhara matlab... matlab ki... oh god! Tumhe ladke pasand hai?"

"Nahi nahi! Hey bhagwan!" Rishabh ka chehra poora laal padh gaya tha aur use apni galti ka realization ho gaya, "Mera woh bilkul matlab nahi tha!"

"Nahi... it's fine... main kaun hoon tumhe judge karne wali." Shreya abhi bhi use us badli hui nazar se dekh rahi thi.

"Nahi Ma'am. Please meri baat suniye... mera yakeen kariye... main bilkul theek hoon us maamle mein." Rishabh ki aawaz thodi tez ho gayi thi.

"Toh fir ladkiyon mein interest kyun nahi hai tumhe?" Shreya ne shak bhari nighahon se pucha.

"M... mera matlab tha ki..." Rishabh ne apna rumaal nikaal kar apne maathe ka paseena poonchha, uski aawaz lagbhag gidgidaane jaisi ho gayi thi. "Aajkal ki ladkiyan bohot hi... immature hoti hain. Unka drama... aur baaki sab... sehne ki himmat nahi hai meri."

Shreya ne use do second tak dekha, aur phir usne ek gehri, sukoon bhari saans chodi. "Uff... tumne toh sach mein meri jaan hi nikaal di thi ek pal ke liye! Main toh sochne lagi thi ki hey bhagwan, do saal mein maine yeh baat miss kar di!"

"Aapne achanak se woh sab bol kar mujhe dara diya tha... isiliye darr ke maare... munh se ulti-pulti line nikal gayi." Rishabh ne jhepte hue kaha.

"Offo Rishabh, tum bhi na!" Shreya ne haste hue hue table par apni dono kohniyan rakhi aur apne chehre ko apne haathon se sahara diya. "Megha bilkul bhi immature nahi hai. Bohot hi sensible aur independent ladki hai. Tum jaisa soch rahe ho, bilkul waisi ladki nahi hai."

"Par Ma'am... main unse kya baat karunga." Rishabh ne bechare si shakal banate hue kaha.

"Jaise mujhse abhi baat kar rahe ho. Waise hi usse baat kar lena."

"Par Ma'am aapke saath... mujhe kaam karte hue time bhi toh ho gaya. Aur aapka... nature bhi itna acha hai." Shreya ki tareef karte hue Rishabh ka dil zor zor se dhadak raha tha, "Waise bhi yeh sab shaadi waadi ka maamla... main bina apne parents ke... kaise?"

"Main shaadi ke liye nahi bol rahi hoon buddhu!" Shreya has padi. "Bas ek simple si meeting hai... agar sahi nahi lage toh main fir milne ke liye bolungi bhi nahi."

"Ma'am..."

"Rishabh... main apni friend ko bol chuki hoon... aur usne badi mushkil se Megha ko bhi mana liya hai... please mere khatir... usse ek baar mil lo na?"

Shreya jis tarah usse request kar rahi thi, Rishabh ke paas haan karne ke elawa aur koi option hi nahi bacha tha.

"Theek hai Ma'am... aap itna force kar rahi hain... toh..."

"Yayyyy!" Shreya ne excitement ke saath halke se taali bajayi, "Main tumhe time aur jagah message mein bhej dungi. Ache se kapde pehen kar aana. Aur koi help chahiye toh mujhe bata dena. Theek hai?"

"Ji..." Rishabh ne dheere se kehte hue apna lunch pack kiya.

"Acha... ek baat batayo..." Shreya ko subah ki ek baat yaad aate hi usne pucha, "Subah... Manish sir ne tumhe apne cabin mein kyun bulaya tha? Sab theek hai na?"

"Unhone mujhe kuch nayi responsibilities assign kari hai." Rishabh ne bilkul laparwah tareeke se kaha.

"Kaisi responsibilities?" Shreya ki aawaz mein ab thoda interest aa gaya tha.

"Ummm... unhone mana kiya tha logon ko batane ke liye." Rishabh ki aawaz thodi dheere ho gayi, "Par aapko toh bata hi sakta hoon. Bas kuch vendor payments aur cash management ka kaam hai."

"Vendor payments?" Shreya ki bauhein sikud gayi, "Par yeh toh accounts department ka kaam hai. Tumhe kyun involve kar rahe hai isme?"

"Mere paas commerce ki degree hai!" Rishabh thoda sa offended lag raha tha Shreya ki baat par.

"Mera woh matlab nahi tha, main toh bas..." Shreya ne clarify karte hue kaha.

"Mere mann mein bhi yahi sawaal aaya tha," Rishabh ki chehre par ek alag hi confidence jhalak raha tha, "Actually accounts department mein kisi ne resign kar diya tha na, toh yeh bas unki help ke liye hai. Sir ne kaha hai ki abhi part time karo, fir full time usi role mein move kar denge. Aur promotion bhi! Actually shayad woh job mere liye behtar rahegi!"

Shreya ko kuch khatak sa raha tha. Manish kabhi kisi ke ache ke liye kuch nahi karta tha, jaroor isme uska koi na koi matlab chhupa tha. "Kyun? Tumhe mere saath kaam karna acha nahi lagta?" Shreya ne taana maarte hue pucha.

"Nahi Ma'am!" Rishabh ke chehre ka rang ek dam se udd gaya, "Aapke saath kaam karna hi..." Woh beech mein hi chhup ho gaya.

"Acha theek hai... makhan mat lagayo mujhe." Shreya has padi, "Bas main itna kahungi ki apni aankh aur kaan khule rakhna, aur kuch bhi galat lage toh mujhse discuss karne se jhijhakna nahi, promise?"

"Ji Ma'am... Promise..." Rishabh ne halke se muskurate hue kaha. Par uski aankhon mein ab bhi woh excitement thi jo Manish ki promotion ki baat se aayi thi, na ki Shreya ki chetavni se koi dar.

Shreya ne ek lambi saans li aur apna tiffin sametna shuru kiya. Use pata tha ki usne jitna keh sakti thi, keh diya tha. Ab aage jo hoga, dekha jayega. Shayad woh kuch jyada hi soch rahi thi, shayad Rishabh ke liye sab kuch acha hi hone wala tha.

"Achha chalo," usne khade hote hue kaha, "Bohot der ho gayi. Aur Rishabh... Saturday ke liye tension mat lena, sab theek hoga."

Rishabh ne ek jhijhakti si muskaan di, "Try karunga Ma'am."

Par andar hi andar uska mann nahi maan raha tha is meeting ke liye. Jisse insaan ki taraf uska dil khincha chala jaa raha tha wohi uski date kisi ladki se set kara rahi thi. Kitna ajeeb sa lag raha tha use. Woh yeh sochte hue cafeteria se bahar nikal gaya.