Misc. Erotica Shreya Ke Raaz: Kab tak Chhupenge

[Celebrorn]

Chapter 26


"Aur bata Poonam..." Shreya sofe par pair mod kar baithi, uske ek haath mein chai ka cup tha, aur kaan aur kandhe ke beech fasa hua phone, "Kitna time ho gaya hai hume mile hue."

"Haan... tu hi busy rehti hai Madam!" Doosri taraf se uski dost Poonam ki chhedne wali aawaz aayi.

"Kya karu yaar..." Shreya ne ek chai ki chuski li aur apni peeth sofe ke backrest par tika kar baith gayi, "Sorry na..."

"Kya hua? Itni thaki hui kyun sound kar rahi hai?" Poonam ki aawaz mein turant ek genuine fiqr ubhar aaya.

"Areee kuch nahi..." Shreya ne apni aawaz mein thodi energy laane ki koshish kari, "Bas Friday hai na aaj... poora week itna hectic gaya office mein."

"Office toh chalta rehta hai, mujhe pata hai kuch aur baat hai! Bol na, kya hua?"

"Hmmm..." Shreya ne chai ka cup saamne table par rakha aur phone ko acche se pakda aur ek gehri saans chhodte hue kaha, "Rohit..."

"Kuch hua kya Rohit ko? Theek toh hai na woh?"

"Haan... theek hi hai... par pata nahi..." Shreya kuch pal ruki, samajh nahi aa raha tha ki baat kaise shuru kare, "Kuch na kuch chalta hi rehta hai. Aajkal poora angry young man bana ghoomta rehta hai."

"Girlfriend?" Poonam ne has kar pucha.

"Haan... woh bhi chal raha hai." Poonam ke ek jhatke mein samajh jaane par Shreya ek pal ke liye muskura padi, par fir Aanya ke baare mein sochte hi uske chehre par wohi chiddh laut aayi. "Woh ladki seedha ghar hi aa tapki is week. Zara bhi sharm lihaaz nahi thi usme..."

"Oh wow!" Poonam ki aawaz mein shararat saaf jhalak rahi thi, "Mubarak ho Sasu-ma!"

"Shut up yaar!" Shreya ne muh banate hue kaha, "Woh ladki bilkul sahi nahi hai Rohit ke liye... I just know it."

"Hahaha, chal ab chill kar. Ab woh tere control mein nahi aane wala. Ek age hoti hai yeh, jitna rokegi tokegi utna hi woh aur jyada rebel karega." Poonam ne samjhate hue kaha.

"Hmmm... I know yaar." Is baare mein sochte hi Shreya ka stress badh raha tha, woh Rohit ki baat yahin rok dena chahti thi, "Accha yeh bata, Megha ab 25 ki ho gayi hai na?"

"Haan yaar..." Is baar Poonam ki aawaz ekdam se thandi padh gayi, "Kyun? Ab tu bhi mujhe lecture dene wali hai kya?"

"Nahi baba! Sun toh..." Shreya ki aawaz mein achanak excitement aa gayi. Aaj din se hi uske dimaag mein yeh khichdi pak rahi thi, "Tum log uske liye koi ladka dhoond rahe ho kya?"

"Ladka?" 

"Haannnnnn.... shaadi ke liye?" Shreya uske reaction par thoda sa irritated ho gayi.

"Oh ho! Tujhe Sasu-ma bola toh itna chiddh gayi ki meri beti ki shaadi ki baat karne lagi! Majak tha yaar!" Poonam baat ko lightly lete hue boli.

"Par main majak nahi kar rahi hoon." Shreya serious hote hue boli, "Mere office mein ek ladka hai. Bahut decent, seedha sa accha ladka hai."

"Shreya tu pagal hai kya!" Poonam ki zor ki hasi chhoot padi, "Tu Megha ko jaanti nahi kya? Tedhe se tedhe ladke ke bas mein nahi hai usse deal karna, aur tu kahan kisi masoom se seedhe se lakde ko fasa rahi hai."

"Isiliye toh bol rahi hoon." Shreya ne zor dete hue kaha.

Usi waqt ghar ka darwaza khula aur Rohit andar daakhil hua.

Shreya ne use andar aate dekha par ignore karte hue Poonam ke saath apni conversation par focus rakha, "Opposites attract! Dono ek doosre ko acche se balance kar lenge. Aur actually dono ka nature hi ekdam simple aur straightforward bhi hai. Waise bhi aajkal achhe ladke milte hi kahan hai. "

Shreya ki phone ki conversation sunte hi Rohit ke kaan khade ho gaye, pata nahi Mom kiske baare mein baat kar rahi thi. Woh apne shoes utaar kar Shreya ke paas pahuch gaya, aur apna muh sikodte hue unhe dekhne laga, jaise pooch raha ho ki kiske baare mein yeh planning chal rahi hai.

Shreya ne use haath se andar jaane ka ishaara kiya, "Toh bas ek baar coffee date set karwate hai dono ki. Agar baat aage nahi badhi toh theek hai, par kam se kam Megha ko apni life mein ek different option toh nazar aayega."

"Theek hai baba..." Poonam ne haar maante hue kaha, "Main Megha se baat karke dekhti hoon. Par yeh bata, tu us ladke ko kitna jaanti hai?"

"Trust me... mera intuition kabhi galat nahi hota. Aur tu tension mat le, hum dono bhi saath chalenge. Jab tak woh log baatein karenge, hum log mall mein shopping kar lenge."

"Haan... yeh last wala shopping ka idea mujhe pasand aaya!"

"Chal... baad mein baat karti hoon... Rohit ghar aa gaya hai. Kal baat karte hain." Shreya ne call cut kiya aur phone ko sofe par faink diya.

Uske chehre par ek badi si smile thi, jaise uska socha hua idea poora hi ho gaya ho. Par abhi toh bas step one tha. 

"Kiske baare mein baat kar rahi thi?" Rohit ke sawaal ne achanak Shreya ko uske khayalon se jagaya.

Aawaz sunkar Shreya ne apna sar doosri taraf ghumaya. Rohit apne college ke kapde change karke comfortable tshirt aur shorts mein sofe ke side mein khada tha. 

Shreya muskurate hue khadi hui aur pyaar se Rohit ke gaalon ko halke se kheench kar boli, "Tumhare baare mein toh bilkul bhi nahi!"

Woh kitchen ki taraf badh gayi aur Rohit thoda annoyed hota hua uske peeche peeche aaya.

"Mujhe itna toh pata hai ki aap Poonam aunty se baat kar rahi thi," Rohit ne kitchen ke darwaze par haath rakhte hue kaha, "Aur kisi ki setting karwane ke chakker mein ho."

"Hmmm... Mr. Sherlock Holmes... setting nahi Arranged Date kehte hai ise" Shreya ne bina palte apna kaam karte hue kaha.

"Aree... kiski baat kar rahi thi aap?" Rohit ki curiosity badhti jaa rahi thi, "Megha Didi ki?"

Shreya ne ek-do pal jawab nahi diya, "Haan... Megha ke liye hi baat kar rahi thi..."

"Kiske saath?" Rohit kitchen mein thoda aur andar ghus gaya.

"Achaa yeh lo... pehle yeh chawal wash karo." Shreya ne use ek bartan mein chawal thamate hue kaha. Par Rohit Shreya ki taraf hi dekhe jaa raha tha. "Mere office mein ek ladka hai..."

"Mommmm!!" Rohit chawal dho toh raha tha par uski shakal par ek naraazgi saaf thi, "Aap kyun is sab mein ghus rahi ho. Aapko kyun matchmaker banna hai. Woh log khud yeh sab kar lenge na."

"Arey, matchmaking kya hai isme... main toh bas ek meeting hi karwa rahi hoon na. Koi jabardasti toh nahi ki maine." Shreya Rohit ke paas aakar khadi ho gayi, "Acche se wash karo."

"Aapka na... sach mein kuch bhi nahi ho sakta. Aur koi nahi mila aapko... Megha Didi ki bhi life mein bhi..." Woh bolte bolte chup ho gaya.

Shreya ko uski baat thodi si buri toh lagi, par woh unke beech aaj koi tension nahi chahti thi. "Tumhe kya lagta hai, main bas tumhare hi peeche padi rehti hoon?" Shreya ne use chiddhate hue kaha, "Duniya mein aur bhi log hai main jinki life mushkil kar sakti hoon."

"Mommmm... mera woh matlab..." Rohit safai dene ko hua par Shreya ne use rok liya.

Shreya ne uske baah mein apna haath daalte hue kaha, "Bas chalo... aaj tum mere saath dinner banayoge."

Shreya ki baat sunte hi Rohit ke kandhe ekdam se neeche jhuk gaye aur chehra latak gaya jaise woh kitna thaka hua ho. "As punishment?"

Par agle hi pal Shreya ne uske gaal par ek halki si kiss karte hue pucha, "Mere saath dinner banana punishment hai kya?" 

Shreya ka sawaal sunte hi Rohit ke chehre par ek muskaan wapis aa gayi. Mom ki kiss se jaise uski saari thakawat jaise door ho gayi. Woh khud ko sambhalta hua, muskurate hue kitchen mein Shreya ka saath dene laga.

Shreya mann hi mann soch rahi thi ki abhi toh ek aur matchmaking thi jo usne soch rakhi thi - Naina, who shayad Rohit ko behad like karti thi. Usne 2-3 din pehle Naina ko Saturday shaam ko ghar aane ke liye bola tha. Kal woh use subah remind kara degi, aur fir koshish karegi ki... shayad woh aur Rohit... achhe dost ban paaye.

Jyada door tak sochna bekar tha Shreya ne socha. "Rohit... kal ka tumhara kya plan hai?"

"Ummm... kuch khaas nahi... bas doston ke saath thoda..." Rohit sochta hua bola.

"Nahi nahi... kal kahin nahi jaana." Shreya ne strict aawaz mein kaha, "Kal tum meri ghar clean karne mein help karoge."

Rohit ne disappointment mein apna sar peeche jhatka, "Oh mom! Abhi khana, kal cleaning. Matlab... aap chahte kya ho... lagta hai aap mujhe hi..."

Woh beech mein chhup ho gaya aur uske gaal laal ho gaye. Shreya uski baat samajhte hue zor se hasne lagi. Sach mein itne dino baad un dono ke beech sab kuch pehle jaisa lag raha tha. Uske dil ka khoya hua sukoon wapas aane laga tha.

Raat ke dinner ke baad tak dono ek doosre se baatein karte rahe. Pehle Tarun ke baare mein, fir Rohit use apne aaj ke apne driving ke experience ke baare mein bata raha tha, aur kaise woh college mein late ho gaya tha. Shreya ko aisa laga usne beech mein kuch baatein nahi bhi batayi par usne Rohit ko toka nahi. 

Shreya bhi use apne office ke boring din ke baare mein bata rahi thi, aur khaskaar Rishabh ke baare mein jisse woh Megha ki meeting fix kara rahi thi. Woh bhi toh kuch baatein use nahi bata sakti thi, khaskaar jo kuch Manish ke saath hua woh sab.

Aakhir raat ko dono apne kamre mein sone ke liye chale gaye. Shreya ko neend nahi aa rahi thi, woh abhi bhi Megha aur Rishabh wale plan ko lekar kafi excited si feel kar rahi thi. Usne apna facebook kholte hue Megha ki profile kholi. Woh ek kafi confident smart si ladki thi... aur Rishabh... woh toh Rishabh hi tha. Sochte hi Shreya ko apne poore plan par thoda sa doubt hone laga.

Tabhi uske phone par ek message aaya.

Tarun: Abhi se miss kar raha hoon aapko aur Rohit ko.

Message dekhte hi Shreya ke chehre par halki si muskaan aa gayi, par saath hi aankhon mein ek sankoch bhi. Aakhir ke teen shabd - "aur Rohit ko", woh jaanti thi Tarun ne kyun jode they. Wahan baithe use kya pata ki Shreya ka phone is waqt uske haath mein tha ya Rohit ke.

Shreya ne chaar paanch baar kuch type karke message delete kar diya. Use sahi shabd nahi mil rahe they reply karne ke liye. Woh kuch aisa nahi likhna chahti thi jisse Tarun ko koi galat umeed de. Uska bhi toh poora haq tha apni life mein aage badhne ka. Aakhir Shreya ne kuch type karte hue send click kiya.

Shreya: Hum log bhi tumhe hi yaad kar rahe they aaj, dinner ke time par.

Tarun ke reply aane mein bhi kuch der lag gayi. Shayad woh Shreya ke jawab se samajh nahi paaya ho ki woh akeli thi ya Rohit ke saath.


Tarun: Waise ek baat batani thi. Maine apne dost se baat kar li hai, Sunday ko bike aapke ghar par deliver ho jayegi.

Shreya ki bauhein sikud gayi. Usne jaldi se wapas jawab diya.

Shreya: Bike??? Itni hadbadi kya thi ismein? Aaj subah hi toh mana kiya tha... use abhi bike ki jaroorat nahi hai.

Tarun: Ab toh order place kar diya. Rohit ke liye Sunday tak surprise rakhna.

Shreya: Kitne ki padi hai yeh Bike?

Tarun: Aap kyun tension le rahi hain. Yeh Rohit aur mere beech ki baat hai. Itne saalon se gift nahi diya use, ek bada surprise toh banta hi tha.

Shreya kuch pal phone ko ghoorti rahi. Tarun ka Rohit ko yun itna bada aur mehnga gift dena use ek duvidha mein daal raha tha. Par woh sach ko jhutla bhi toh nahi sakti thi, Tarun ka bhi toh haq tha Rohit par. 

Shayad mujhe Rohit ko wahan lekar wahan jaana chahiye... Papa ji se milwane... apne Dad ka ghar ek baar fir use acche se dikhane. Shreya leti hui sochne lagi.

Shreya ne ek gusse wale smiley ke saath "Good night" likhte hue apna phone side mein rakh diya. 

Sone se pehle usne apne aap ko fir se remind karaya ki kal subah use Naina ko remind karana tha ki woh shaam ko dance steps ke liye unke yahan aa jaye. Aur fir Poonam ko bhi phone karke Megha ka reaction poochna tha. 

Shreya ne ek lambi saans lete hue apni aankhen band ki. Itno dino baad, aaj use chain ki neend aane wali thi.