Misc. Erotica Shreya Ke Raaz: Kab tak Chhupenge

[Celebrorn]

Chapter 22

Subah jab Rohit ki aankh khuli toh uska sar thoda bhaari bhaari sa lag raha tha, jaise woh kaafi gehri neend so gaya ho raat ko. Bahar roshni dekh kar woh hadbada kar uth baitha aur bahar ki taraf dekha. Uske kamre ka darwaza poori tarah khula hua tha. Use yaad hi nahi aa raha tha ki woh kal raat kab so gaya tha. Usne toh poora iraada kiya hua tha ki woh raat bhar jag kar Mom par nazar rakhega.

Woh apni aankhen masalta hua khada hua aur bahar ki taraf aaya toh dekha ki Mom toh already tayyar khadi bahar ki taraf dekh rahi thi. Unke chehre par ek sukoon dikh raha tha jo usne kafi time se nahi dekha tha.




"Mom...." Rohit ne aawaz lagayi.

"Uth gaya... kab se aawaz laga rahi thi main!" Shreya ne palat kar Rohit ki taraf dekha.

"Haan... woh... pata nahi... kaise main..." Tarun ne kuch yaad aate hi jaldi se bahar ke kamre ki taraf dekha, "Chachu kahan hai? Abhi gaye toh nahi!"

"Nahi nahi... bas tayyar ho kar aa rahe hain..." 

"Ek din aur nahi ruk sakte woh?" Tarun ke chehre par ek maayusi si aa gayi, use kitni saari aur baatein karni thi Chachu se.

"Tum apne chachu se hi pooch lo na!" Shreya ne aankhon se kamre ki taraf ishaara kiya jahan se Tarun apna duffel bag liye bahar nikal raha tha.

"Sorry yaar... Tarun ne paas aate hue Rohit ke baal halke se masalte hue bikher diye. "Par mujhe aaj nikalna hi hoga. Papa se ab wahan akele cheezen sambhalti nahi hai."

"Par Chachu... kitne saalon baad toh aap aaye they!" Rohit ki aawaz mein ek zidd thi unhe rokne ke liye.

Tarun ne Shreya ki taraf dekha, jiski aankhen khud yeh keh rahi thi ki kaash woh ek aur raat wahan ruk paata.

Tarun ne Rohit ke kandhe par haath rakha, "Ek kaam kar.... tu Chal mere saath. Kuch din wahan reh kar aa... tujhe bhi achha lagega. Tere papa ke saare adde dikhayunga tujhe."

Rohit ne ek pal ke liye socha aur fir wahan khadi Shreya ki taraf dekha, jo ek halki si muskaan liye un dono ko dekh rahi thi. 

Rohit se sar hilaya, "Wahan? Main... Mom ko akele chhod kar kaise jaa sakta hoon."

Shreya uski baat sun kar emotional hote hue muskurane lagi.

Tarun ne mood halka karte hue kaha, "Haha... teri Mom bohot Strong hai... sambhal sakti hain apne aap ko."

"Hmmm... woh toh hai... par..." Rohit sochte hue bola.

"Pareshaan mat ho..." Tarun ne Rohit ko dilaasa dete hue kaha, "Is baar main bahut jaldi wapas aayunga... pakka." Ye kehte hue Tarun ki aankhen Shreya se mili, jaise woh yeh vaada Rohit se kam Shreya se jyada kar raha tha.

Shreya ne turant nazrein churate hue ghadi ki taraf dekha, "Chalo... main tumhe station drop kar deti hoon, fir mujhe bhi office pahuchna hai."

"Nahi!", Rohit beech mein bol pada, aur Shreya and Tarun dono use ghoorne lage. "Nahi mera matlab hai... mujhe Chachu ke saath thodi aur baatein karni hai. Main drop kar dunga unhe."

"Par meri train hai bachha... late ho jayega." Tarun ne samjhaya.

"Kisi ko late nahi hoga. Main aapko station tak chhod dunga, and Mom aapko Metro station par." 

"Par Rohit tum..." Shreya ne tokna chaha par Rohit bina ruke jaldi se andar bhaag gaya aur bathroom ka darwaza band karne ki zor ki aawaz aayi.

Tarun aur Shreya wahan akele khade reh gaye aur ek doosre ko dekhne lage. Tarun ne apna duffel bag apne kandhe se neeche fisalne diya, aur bina der kiye apne kadam Shreya ki taraf badaye.

"Tarun... kya kar rahe ho... Rohit kabhi bhi bahar aa jayega." Shreya ne phusphusate hue kaha. Par uski aawaz mein bhi ek tadap si thi jise Tarun mehsoos kar sakta tha.

"Do minute hai hamare paas..." Tarun ki aawaz gehri hui aur usne jhukte hue Shreya ko apni baahon mein utha liya.



Shreya Tarun ke kandhe par jhoolti hui ek pal ke liye khilkhila uthi, par turant apne hosh mein aate hue "Kya kar rahe ho... neeche utaaro na mujhe."

"Utaar dunga... bas aapko aise yahan... khule mein... uthane ki khwaish thi meri." Tarun muskurata hua bola.

Shreya ne aage jhuk kar uske honthon par halka sa kiss kiya aur uske haathon se slide hoti hui neeche aa gayi. 

"Jaldi wapas aayoge na..." Shreya ki kaanpti hui aawaz bahar nikli.

Isse pehle Tarun jawab deta andar se bathroom khulne ki aawaz aa gayi aur Shreya turant Tarun se thodi door jakar khadi ho gayi, usse nazrein churati hui.

Kuch hi pal baad Rohit apni socks pehente hue jaldi se bahar nikla, "Gaadi ki chaabi kahan hai Mom?"

"Wahan... slab par hain... shayad." Shreya ne apni aawaz normal karne ki koshish kari par uska gala bhar sa aaya tha.

Rohit jaldi se shoes pehenne laga aur Tarun ne apna bag fir se utha kar Shreya ki taraf dekha. Kitni khoobsurat lag rahi thi Shreya... kaash... yeh uska ghar hota... aur woh uski hoti.

Neeche pahuch kar Gaadi ke paas aate hi Rohit ne chabi ghumayi aur jhat se driver seat par baith gaya. Tarun aage wali passenger seat par baitha, aur Shreya peeche wali seat par.

Tarun ne seatbelt lagate hue peeche mud kar Shreya ki taraf dekha, "Waise... pakka chala lega na yeh gaadi? Pata nahi kab seekh li isne?"

"Areee Chachu... kya baat kar rahe ho. Mom se bhi achha driver hoon main." Rohit ne confidently muskurate hue Chachu ko dekha aur gaadi ko start kar diya.

Shreya ne peeche se Rohit ke kandhe par halka sa tap kiya, "Bas bas... aapni tareef baad mein kar lena, pehle saamne focus karo."

Rohit ne rearview mirror mein Shreya ko dekhte hue muh banaya aur fir shikayat bhari aawaz mein Tarun se kaha, "Dekha Chachu! Mom bas har cheez mein rok tok karti rehti hain. Main kab se Mom se keh raha hoon ki Car na sahi mujhe ek Bike hi dila do... mere saare college friends bike ya car se hi college aate hain. Main hi bas Metro se aata jaata hoon."

"Motorcycle? Isme kya badi baat hai! Main arrange karwa dunga tere liye bike."

"Tarun! Bilkul nahi!" Shreya turant hi beech mein bol padi, "Tum faltu mein ise encourage mat karo in sab cheezon ke liye. Bike nahi aayegi ghar par kabhi."

Shreya ka pareshaan chehra bilkul satark ho kar aage road ki taraf dekh raha tha.

"Par kyun Mom! Papa bhi toh bike chalate they." Rohit irritate hote hue bola.

Shreya ka mann andar se keh raha tha ki woh chilla kar keh de ki isiliye Bike nahi aayegi, par usne apne aap ko sambhalte hue kaha, "Dekha hai na log kaise pagalo ki tarah chalate hai bike! Aur doosra ham abhi bike par kharcha nahi kar sakte. Tumhari further studies ke liye save kar rahi hoon."

"Shreya... Bhabhi..." Tarun ek pal ke liye slip up kar gaya tha aur uska chehra laal pad gaya. Usne Rohit ki taraf dekha jisne shayad dhyan nahi diya tha, "Kharche ki kya baat hai... sab kuch Rohit aur aapka hi toh hai. Rohit ke liye itna toh main kar hi sakta hoon na."

"Yes! Thank you Chachu! You are the best!" Rohit khushi se uchhal pada aur steering ko excitement mein tap karne laga, "Mom, ab aap beech mein kuch mat bolna... pleaseeeee."

"Achha sochenge... tum abhi driving par toh focus karo." Shreya abhi bhi pareshaan hote hue bas traffic ko hi dekh rahi thi.

Tarun ne halka sa palat kar Shreya ki taraf dekha toh usne usse bhi nazrein nahi milayi.

Kuch hi der mein gaadi Metro station ke paas pahuch gayi thi. Office ka waqt tha aur traffic kafi jyada tha. Rohit ne indicator de kar kisi tarah gaadi ko side mein roka tha par peeche se horn pad rahe they.

"Mom... utro na jaldi se... isliye kehta hoon ki Car se accha Bike hai..." Rohit ne Shreya ki taraf dekhte hue kaha.


"Yeh sab baat karne ka time nahi hai," Shreya ne turant apna bag sambhala aur neeche utarne lagi. Woh aage aakar ek baar fir se Tarun ki aankhon mein dekhna chahti thi, usse baat karna chahti thi, par uske darwaza band karte hi Rohit jaldi se car ko nikaal kar le gaya.

Shreya metro station ke neeche khadi gaadi ko jaata dekh rahi thi, aur fir woh ek gehri saans lete hue Metro ki seediyon se upar chal padi.

Udhar gaadi mein Shreya ke utarne ke baad kuch pal ka sannata chhaa gaya tha. Tarun ne Rohit ki taraf dekha toh woh abhi bhi thoda naraaz sa lag raha tha.

"Kya hua? Apni Mom ki baat ka bura maan gaya kya?" Tarun ne uske kandhe par halke se haath maarte hue kaha.

Rohit ne aage dekhte hue apne kandhe uchka diye, "Nahi... ab toh aadat padh gayi hai. Unhe toh har baat mein Naa hi karna hai."

"Achhaaa... tujhe lagta hai unhe maza aata hai tujhe Na bolne mein?" Tarun ne mahaul ko thoda light karne ke liye has ke poocha.

"Lagta toh hai... yahan mat jaayo... wahan mat jaayo... yeh mat karo... woh mat karo... bas darr ke jeete raho." Rohit thoda irritated hote hue bola.

"Aur tujhe kya lagta hai, woh aisa kyun karti hain?" Tarun ne direct jawab dene se achha sawal poochna samjha.

Rohit ek pal ke liye chhup ho gaya, shayad usne khud se bhi yeh sawaal nahi poocha tha, "Ummm... bas unka nature hai aisa hai shayad."

Tarun thoda sochte hue bola, "Aisi nahi hain teri Mom... bohot himmat hain un mein. Aur aisa nahi sirf tere papa ke jaane ke baad yeh himmat aayi thi." Tarun purani yaadon mein khota hua halke se muskuraya, "Shaadi ke baad ek chhote bacche ko sambhalte hue unhone apni padhai poori kari, sab kuch seekha. Aur fir jab tere papa chale gaye... tab toh..."

Rohit ko yeh sab sunkar achha nahi lag raha tha, par shayad Chachu se jyada khud par, "Itni himmat hai toh bahar ke logon se sahi se deal karna kyun nahi aata unhe. Mujhe gussa aata hai sab soch kar."

"Kis baat par?"

Rohit sahi shabdon ko dhoondte hue thoda sa hichkichaya. "Bas... yehi ki... society ke log ya bahar ke log... unse aakar faltu mein meethi meethi baatein karte hain... ajeeb tarah se ghoorte hain. Mom toh jaise sab kuch bas ignore kar deti hain. Main un sabko acche se seedha kar sakta hoon... par woh mujhe abhi bhi bachha samajh kar chhup kara deti hain."

Tarun samajh raha tha ki Rohit kya mehsoos kar raha tha. Shreya aaj bhi behad jawan aur khoobsurat lagti thi. Ek akeli, khoobsurat aurat ki taraf mardon ki nazar khud ba khud khich hi jaati thi, is ghatiya umeed se ki kya pata unka bhi mauka lag jaye. Par woh Rohit ko kaise samjhata ki unse ladna ya gussa karna toh koi solution nahi tha. Shreya toh shayad bas use kisi bhi tamashe ya jhagde se bacha kar rakhna chahti thi.

"Unke liye toh tu hamesha bachha hi rahega na..." Tarun ne baat ko ghumane ki koshish kari.

"Par woh mujh par toh trust toh kar sakti hai na... mujhe aisa lagta hai... lagta hai... jaise woh mujhse kuch chhupa rahi hain."

Tarun ki dil ki dhadkan ek pal ke liye tez ho gayi, kahin Rohit kal raat ke baare mein toh baat nahi kar raha tha. Kahin woh uske baare mein toh nahi keh raha tha. "Chhupa rahi hain! Kya chhupa rahi hain?"

"Pata nahi..." Rohit chhup ho kar sadak par aage dekhta raha, "Bas kabhi kabhi kafi ajeeb sa behave karti hain.

"Shayad... office ka thoda stress ho?"

Office ka naam sunte hi Rohit ke dimaag mein Manish ka chehra aa gaya aur uska gussa aur bhi bhadak utha, "Jo bhi ho... main bas yeh jaanta hoon ki hamare ghar mein Dad ki jagah kabhi koi nahi le sakta. Main ab bada ho gaya hoon, aur ghar ki saari problems main solve kar sakta hoon. Agar woh mujhse cheezen chhupayenge toh main unhe kaise protect karunga."

Dad ki jagah koi nahi le sakta

Uski yeh aakhri baat Tarun ke seene mein jaakar lagi. Us ek pal mein use samajh aa gaya tha ki uske aur Shreya ke beech mein sabse badi deewar Shreya ya zamana nahi tha, balki Rohit tha, jo apni maa ko sabki buri nazar se bachakar chalna chahta tha. Woh ab bada ho gaya tha aur sab samajhne laga tha.

"Tu sahi keh raha hai... Bhaiya ko tujh par bohot garv hota. Tarun ne ek gehri saans li aur dheere se kaha. Par turant hi apne andar ke bojh ko dabate hue woh apni aawaz mein ek chehak si le aaya, "Lekin mere bhai... abhi se itna serious mat ho life mein... enjoy kar. Aur waise maine suna teri girlfriend bhi ban gayi hai ab. Tabhi Bike ki demand ho rahi hai, huh!"

Rohit ke gaal ekdum se laal ho gaye aur uske chehre ka saara gussa ek sharmeeli muskaan mein badal gaya, "Kya Chachu aap bhi... kisne kaha aapse?"

"Haha! Mujhe sab khabar rehti hai..."

Car traffic ke beech se nikalte hue station ki taraf badh rahi thi. Rohit has-has kar apni college life aur doston ke kisse sunane laga tha, jabki Tarun bas muskurate hue haan mein sar hila raha tha. Rohit ka kayi dino ka gussa aur tanaav dheere dheere kam sa ho raha tha. Shayad yehi toh missing tha... ki woh kisi se baat karke apna dil halka kar sake.