అమ్మమ్మ కథలు - బామ్మ -బద్ధకస్తుడికి బామ్మ పాఠం

[k3vv3]

దీపం ఉండగానే..

బామ్మ కథలు - 14  
రచన: వసుంధర రాణి మునిపల్లె 


పరీక్షలు దగ్గర పడుతున్నా చింటూలో మాత్రం మార్పు రాలేదు. ఇంకా వారం టైమ్ ఉందిలే, పరీక్ష ముందు రోజు చదువుకోవచ్చు అని ధీమాగా రోజూ ఆడుకుంటూనే ఉన్నాడు.


ఆ రోజు మధ్యాహ్నం కూడా కాలేజ్ నుంచి రాగానే బ్యాగ్ విసిరేసి, "బామ్మా! నేను క్రికెట్ ఆడుకోవడానికి వెళ్తున్నాను. స్నాక్స్ బాక్స్‌లో ఉన్నాయి కదా, తినేస్తాను. బై!" అని గడప దాటబోయాడు. బామ్మ వంటింట్లో నుంచి తొంగి చూస్తూ, "ఒరేయ్ చింటూ! ఆగు... వచ్చే వారం నుంచి పరీక్షలు కదా రా? కాస్త కూర్చుని చదువుకోవచ్చు కదా?" అంది.


చింటూ వెనక్కి తిరిగి, "అబ్బే.. ఇంకా చాలా టైమ్ ఉంది బామ్మా! పరీక్షల ముందు రోజు రాత్రి చదివితే సరిపోతుంది. ఇప్పుడు మా ఫ్రెండ్స్ అంతా వెయిట్ చేస్తున్నారు," అంటూ తుర్రున వెళ్ళిపోయాడు.


చింటూకి ఇలా చెపితే వినే అలవాటు లేదని బామ్మకు తెలుసు, అందుకే ఒక ఉపాయం ఆలోచించింది.


సాయంత్రం చింటూ ఆట ముగించుకుని రాగానే బామ్మ తన దగ్గరకు పిలిచి, "చింటూ, నీకు ఎప్పుడూ ఉపయోగపడే ఒక కథ చెప్తాను వింటావా?" అని అడుగుతూ చీమ-మిడత కథ చెప్పింది:


"ఒక అడవిలో ఒక చీమ, ఒక మిడత ఉండేవి. ఎండాకాలం అంతా చీమ కష్టపడి ఆహారాన్ని పోగుచేసుకునేది. కానీ మిడత మాత్రం ఇంకా వర్షాకాలం రావడానికి చాలా టైమ్ ఉంది కదా అని రోజూ పాడుకుంటూ, ఆడుకుంటూ గడిపేసేది. తీరా వర్షాలు మొదలయ్యాక, చీమ హాయిగా తన గూట్లో తింటూ కూర్చుంది. కానీ మిడతకి తినడానికి ఏమీ లేక ఆకలితో అలమటించింది. అప్పుడు చీమ 'సమయం ఉన్నప్పుడే పని పూర్తి చేసుకోవాలి' అని మిడతకి బుద్ధి చెప్పింది."


చింటూ ఆ కథ విని "బాగుంది బామ్మా" అని భోజనానికి కూర్చున్నాడు.


ఆ రోజు రాత్రి చింటూకి ఇష్టమైన మామిడికాయ పచ్చడి చేస్తానని బామ్మ ముందే చెప్పింది. చింటూ బాగా ఆకలి మీద వచ్చి కూర్చున్నాడు. బామ్మ వేడివేడి అన్నం వడ్డించింది కానీ పచ్చడి మాత్రం వడ్డించలేదు.


"బామ్మా, పచ్చడి ఏది? చేస్తానన్నావు కదా?" అని అడిగాడు చింటూ ఆత్రంగా.
బామ్మ చాలా కూల్‌గా, "అది... ఇంకా చేయలేదు రా చింటూ. రేపు నువ్వు కాలేజ్‌కి వెళ్లే ముందు గబగబా దంచి పెట్టేస్తానులే. ఇప్పుడు ఎందుకు తొందర? రేపు చూసుకుందాంలే," అంది.


చింటూ మొహం చిన్నబోయింది. "అదేంటి బామ్మా? పచ్చడి ముందే నూరి పెట్టి, ఊరితే కదా రుచిగా ఉండేది? గబగబా అప్పటికప్పుడు దంచితే ఏం బాగుంటుంది? మసాలాలన్నీ ముక్కలకి పట్టాలి కదా! నాకు ఇప్పుడే కావాలి," అన్నాడు మొండిగా.


అప్పుడు బామ్మ నవ్వుతూ చింటూ దగ్గరకు వచ్చి ఇలా అంది:
"మరి పచ్చడి ముందే నూరి పెట్టుకోవాలి, అప్పుడే రుచి వస్తుంది అని తెలిసినప్పుడు... పరీక్షలకు కూడా ఆ మిడత లాగా వాయిదా వేయకుండా ముందే చదువుకోవాలి కదా రా? పరీక్ష ముందు రోజు రాత్రి గబగబా దంచినట్టు చదివితే, బుర్రకి ఏం ఎక్కుతుంది? మార్కులకి రుచి ఏముంటుంది?"


చింటూ ఒక్కసారిగా ఆలోచనలో పడ్డాడు.


బామ్మ అంతటితో ఆగకుండా, "అంతేకాదు చింటూ, ఒకవేళ సరిగ్గా పరీక్షల సమయంలోనే నీకు ఏదైనా జ్వరం వచ్చిందనుకో? అప్పుడు నీకు చదివే ఓపిక ఉండదు, అటు పరీక్ష సరిగ్గా రాయలేవు. అందుకే పెద్దలు దీపం ఉండగానే ఇల్లు చక్కబెట్టుకోవాలి అని ఊరికే అనలేదు," అని వివరించింది.


బామ్మ చెప్పిన పచ్చడి లాజిక్, మిడత కథ చింటూ కళ్లు తెరిపించాయి. తన తప్పు తెలుసుకున్న చింటూ, ఆ రోజు నుంచి ఏ రోజు పాఠం ఆ రోజే చదివి నేర్చుకోవడం మొదలుపెట్టాడు. హోంవర్క్ లన్నీ పూర్తి చేసుకున్నాకే ఆడుకోవడానికి వెళ్లడం అలవాటు చేసుకున్నాడు.


సమాప్తం. 

5908