[Babab96]

.......

Continue...

Nimrit ki maa/ mosi kaa naam Simranjeet Kaur hai...

Simranjeet Kaur, Age 38


Simranjeet Kaur_ Kyaa baat hai, Nimrit? Aaj padhai me man nhi lag rha?

Nimrit_ Aisi koi baat nhi hai, maa.

Nimrit apni mosi ko bachpan se “maa” hi kahti thi.

Mosi_ Fir kitab khuli hui hai aur tum pichle das minute se ak hi page ko dekh rhi ho?

Nimrit ne baat taal di, lekin uski mosi ne uske chehre per aayi halki muskan dekh li thi.

Udhar tumhare pita ne khud ko puri tarah kaam me laga diya tha. Usi samay Rajput Construction ko sahar ke bahar ak badi colony develop karne kaa kaam mila tha.

Iss project me tumhare pita ke sath Aftab Qureshi bhi barabar kaa partner tha.

Me_ Dadaji, Aftab Qureshi papa kaa kaisa dost tha?

Dadaji_ Dost kam aur bhai jyada tha. Dono ki dosti college ke time se thi. 
wese to Aftab senior tha, tumhare papa se lagbhag 3 saal, lakin wo bahut laparwah tha...2 baar fail bhi ho chuka tha..
Lakin jab wo pahli baar tumhare papa se mila, uski life kaa object badal gyaa..or wo man laga ke padne laga..wo itna badia padne laga ki usne accounting me post graduation kia...

Business me tumhare pita naye ideas late the aur Aftab accounts aur legal papers sambhalta tha.

Tumhare pita politics me busy rahte the, iss liye company kaa jyadatar daily work Aftab hi dekhta tha. Abhay usper aankh band karke bharosa karta tha.

Me_ Aur kyaa Aftab uncle ko maa wali baat pata thi?

Dadaji_ Sabse pahle usi ko pata chali thi.

Ak sham Aftab ne tumhare pita ko office me akela baithe dekha. Samne colony kaa map khula hua tha, lekin Abhay kaa dhyan kahi aur tha.

Aftab_ Pichle kai dino se dekh rha hu, janab map samne rakhte hai aur dekhte kisi aur ko hai.

Abhay_ Bekar ki bate mat kar, Aftab.

Aftab_ Baat bekar hoti to tum coaching wali sadak se jana band nhi karte.

Abhay ne uski taraf gusse bhari najro se dekha.

Abhay_ Maine usse kah diya tha ki me use pasand karta hu. Usne mana kar diya. Ab baat khatam.

Aftab_ Usne tumhe mana kiya tha ya tumhari galat image ko?

Abhay_ Dono me kyaa fark hai?

Aftab_ Bahut bada fark hai. Wo tumhe janti hi kitna thi?

Abhay_ Jitna janna chahti thi, utna jaan liya. Ab me uske piche jakar khud kaa aur uska insult nhi karunga.

Aftab samajh gya ki Abhay kaa decision badalna easy nhi tha..

Lekin kismat ne dono ko fir se milwane ki taiyari kar li thi.

......

Me_ Dadu, fir maa ki papa se dobara mulakat kese huyi?

Dadaji_ Ak sham Nimrit ki coaching thodi der se chhuti thi. Wo apni car se ghar ja rhi thi. Raste me achanak uski car band ho gyi.

Driver uss din uske sath nhi tha, kyunki Nimrit jyadatar khud hi car drive karna pasand karti thi.

Usne car ko dubara start karne ki kai baar koshish ki, lekin car start nhi huyi.

Uss samay shaam gahri ho chuki thi. Sadak per jyada log bhi nhi the. Nimrit car se bahar nikli aur bonnet kholkar dekhne lagi, jabki use car ke engine ke bare me kuch bhi nhi pata tha.

Kuch hi der me piche se do gadiya aakar ruki.

Pahli jeep me tumhare pita baithe the aur dusri gadi me unke kuch political karyakarta the.

Tumhare pita ne car ke paas Nimrit ko khada dekha to driver se jeep rukwane ko kaha.

Abhay jeep se niche utra.

Abhay_ Kyaa hua? Car start nhi ho rhi?

Nimrit ne Abhay ko dekha to kuch pal ke liye chup ho gyi.

Nimrit_ Haa, achanak band ho gyi. Maine kai baar try kia, lekin start nhi huyi.

Abhay ne bonnet ke andar dekha. Fir apne driver ko bulaya.

Abhay_ Shankar, jara check karo.

Driver ne kuch der car dekhi aur bola—

Shankar_ Kunwar sahab, lagta hai fuel pump me problem hai. Yaha theek nhi hogi. Mechanic ko bulana padega.

Nimrit ne pahli baar tumhare pita ke liye kisi ko “Kunwar sahab” bolte suna tha.

Nimrit_ Kunwar sahab?

Abhay ne normal tarike se jawab diya—

Abhay_ Ghar ke log or mere janne wale purane log bachpan se isi naam se bulate hai. Mera pura naam Kunwar Abhay Pratap Singh Thakur hai.

Nimrit_ Aapne pahle nhi bataya. (Nimrit naam to pahle hi jaan chuki thi Abhay kaa) wo bas baat cheet aage badana chahti thi

Abhay_ Aapne pucha bhi nhi tha.

Nimrit ko uska jawab thoda kathor laga, lekin wo samajh gyi ki Abhay ab bhi uss din ki baat ko bhula nhi tha.

Abhay ne apne ak aadmi ko car ke paas rukne aur mechanic bulane ke liye kaha.

Fir usne Nimrit ki taraf dekha.

Abhay_ Aap meri jeep me baith jaiye. Me aapko ghar chhod deta hu. Car theek hone ke baad aapke ghar pahucha di jayegi.

Nimrit_ Aapko pareshani hogi.

Abhay_ Pareshani tab hoti, jab me aapko iss sunsan raste per akela chhodkar chala jata.

Nimrit kuch bole bina jeep me baith gyi.

Nimrit ko Abhay ne ak paper dia, pen dia or uska address likhne ke liye kaha...

Nimrit_ App mujhe address kyun likhwa rhe hai? 

Abhay_ Taki apki gaadi ghar pahucha sake?

Nimrit_ ohh okay..

fir wo address apne bande ko de dia, Abhay ne or khud chal dia, Nimrit ko lekar....

Pure raste Abhay ne usse koi personal baat nhi ki. Naa usne apne pyar kaa jikar kia aur naa hi Nimrit ko uski pahli baat yaad dilayi.

Wo bus samne sadak ki taraf dekhta rha, or gaadi chalate rha...

Ghar pahuchne ke baad Nimrit jeep se niche utri.

Nimrit_ Thank you.

Abhay_ Isme thank you ki koi baat nhi hai..

Abhay wapas jeep me baithne laga..

Nimrit ne use roka—

Nimrit_ Abhay ji…

Abhay ne palatkar uski taraf dekha.

Nimrit_ Uss din maine aapko jane bina hi bahut kuch kah diya tha. Mujhe laga tha ki aap bhi sadak per ladkiyo ko pareshan karne wale ladko jese hai.

Abhay_ Aapko jo laga, aapne kah diya. Aapko apni baat rakhne kaa pura haq tha.

Nimrit_ Lekin aapko bura laga hoga.

Abhay_ Laga tha..

Nimrit ko itne sidhe jawab ki ummid nhi thi.

Abhay_ Lekin mujhe iss baat kaa bura nhi laga ki aapne mujhe mana kar diya. Bura iss baat kaa laga ki aapne mujhe jane bina lafanga samajh liya.

Nimrit kuch nhi boli..

Abhay_ Khair, ab iss baat kaa koi matlab nhi hai. Aap ghar pahuch gyi hai, yahi kafi hai.

Itna kahkar Abhay waha se chala gya.

Nimrit kuch der tak uski jeep ko jate hue dekhti rhi.

Me_ Kyaa uss din ke baad maa ki soch badal gyi thi?

Dadaji_ Thodi bahut. Lekin tumhare pita ki asli takat aur pratibha kaa ahsas Nimrit ko uske baad hua.

Kuch hi samay baad Nimrit ke pitaji kaa ak bahut bada commercial project ruk gya..

Wo project sahar ke bahar ak industrial aur commercial township banane kaa tha. Usme bade godown, factories, shopping complex aur residential buildings banayi jani thi.

Nimrit ke pitaji ne us project me bahut paisa laga diya tha. Jamin kharidi ja chuki thi, private investors se agreement ho chuke the aur bank se loan bhi approve ho chuka tha.

Lekin project ko State Government ke Town and Country Planning Department aur Environment Department se final approval milna baki tha.

Achanak kuch technical objections laga diye gye.

File department me rok di gyi.

Me_ Technical objections matlab?


Dadaji_ Sarkari department ne kaha ki project ke paas ki jamin kaa kuch hissa green zone me aata hai. Sath hi waha tak jane wali main road ki width ko lekar bhi objection tha.

Nimrit ke pitaji kaa kahna tha ki unke paas sare documents complete the aur unhone sare rules follow kiye the.

Lekin file ak table se dusri table per ghumti rhi.

Har din kaa delay unhe lakhon kaa nuksan de rha tha. Investors pressure bana rhe the aur bank kaa interest alag bad rha tha.

Nimrit ke pitaji sahar ke bade businessman the. Unki pahchan bade-bade officers aur netao se thi. Unhone kai logo se baat ki, lekin koi bhi final approval nhi dilwa paya.

Tab kisi ne unhe salah di ki wo MLA Dharmchand Patel se mile.
Kisi ne unhen bataya ki MLA ke sath ak banda kaam karta hai Abhay wo unka kaam Kara sakta hai...

Pahle to wo vishwas nhi kar paa rhe the, lakin unke pass koi option nhi bacha tha. wo sab dur apne hath pair maar chuke the ..

Me_ Lekin MLA to local level kaa neta hota hai naa? State Government se approval kese lata?

Dadaji_ Yahi baat Nimrit ke pitaji bhi jante the. Unhe Dharmchand se jyada tumhare pita ki jarurat thi.

Sahar me sabko pata tha ki Dharmchand MLA jarur tha, lekin uski political strategy, bade netao se sambandh aur sarkari files ko samajhne kaa dimag Abhay kaa tha.

Ak tarah se Dharmchand sarkar ke samne chehra tha aur Abhay uske piche kaa dimag.

Nimrit ke pitaji ne pahle Dharmchand Patel se meeting kaa samay manga.

Meeting Dharmchand ke political office me rakhi gyi.

Nimrit ke pitaji project ki puri file lekar waha pahuche. 

Nimrit bhi unke sath thi, kyunki uske pitaji chahte the ki wo bhi samjhe ki bade business aur government ke bich kaam kese hota hai.

Office me Dharmchand Patel kursi per baitha tha.

Uske ak taraf do party workers baithe the aur dusri taraf tumhare pita normal safed kurta-pajama pahne project ki kisi dusri file ko dekh rhe the.

Nimrit ne Abhay ko dekha to chauk gyi.

Abhay ne bhi use dekha, lekin apne chehre per koi khas reaction nhi diya.

Dharmchand_ Aaiye Sandhu sahab, baithiye. Aapke project ke bare me thodi jankari mili hai.

Amarjeet Singh Sandhu, Nimrit ke pitaji...

Amarjeet Singh Sandhu, Age 56

Me_ Apke sasur ji kaa naam bhi amarjeet singh hi tha naa dadu

Dadaji_ Haa wo Amarjeet Singh Randhawa the, ye Sandhu hai..

Chalo ab aage suno...

Nimrit ke pitaji ne project ki file table per rakhi..

Nimrit ke Pitaji_ Dharmchand ji, ye project mere liye bahut important hai. Sirf meri company kaa hi sawal nhi hai. Kai investors kaa paisa laga hai aur project start hone ke baad hajaro logo ko rojgar milega.

Dharmchand ne file kholi aur kuch papers dekhne laga.

Lekin kuch hi minutes baad usne file Abhay ki taraf badha di.

Dharmchand_ Abhay, ak baar tum dekho.

Abhay ne file apne samne rakhi aur har document ko dhyan se padhna shuru kia.

Room me kuch der shanti rhi.

Nimrit ye sab dekh rhi thi. Use laga tha ki meeting me Dharmchand decision lega aur Abhay bus uska political assistant hoga.

Lekin yaha Dharmchand bhi chupchap Abhay ke file padhne kaa intejar kar rha tha.

Lagbhag pandrah minute baad Abhay ne file band ki.

Abhay_ Aapke documents pure hai, lekin project ki planning me do jagah galti huyi hai.

Nimrit ke pitaji thoda uncomfortable ho gye.

Nimrit ke Pitaji_ Kesi galti?

Abhay ne map kholkar ak jagah ungli rakhi.

Abhay_ Ye jo project ki entry road hai, government record me iski width sixty feet hai. Aapke architect ne future master plan ke according ise eighty feet maan kar project design kar diya.

Nimrit ke Pitaji_ Lekin master plan approve hone wala hai.

Abhay_ Hone wala hai aur ho gya hai, dono me bahut fark hota hai, Sandhu sahab. Department present record ke basis per approval deta hai.

Fir Abhay ne map per dusri jagah ungli rakhi.

Abhay_ Dusri problem ye green zone wali land hai. Ye land technically aapke project me construction ke liye use nhi ho sakti. Lekin iska solution hai.

Dharmchand_ Kyaa solution hai?

Abhay_ Project kaa layout revise karna hoga. Green zone wali land ko public garden aur water harvesting area dikhaya jayega. Usper koi commercial construction nhi hoga.

Main entry road ke liye project owner ko apni jamin me se additional twenty feet road ke liye chhodni padegi.

Nimrit ke Pitaji_ Isse to meri kafi valuable land chali jayegi.

Abhay_ Land jayegi, lekin project bach jayega. Aur wide road ki wajah se baki commercial plots ki value bhi bad jayegi.

Nimrit ke pitaji chup ho gye.

Unhone project ko iss nazariye se pahle kabhi nhi dekha tha.

Nimrit ke Pitaji_ Agar hum layout revise kar dete hai to approval mil jayega?

Abhay_ Sirf layout revise karne se nhi. Department ko purani file withdraw karke revised proposal dena hoga. Lekin agar ye normal process se gya to chhe mahine aur lag sakte hai.

Nimrit ke Pitaji_ Mere paas chhe mahine nhi hai.

Abhay ne Dharmchand ki taraf dekha.

Abhay_ Kal State Capital me Urban Development Minister ki meeting hai. Dharmchand ji ko waha jana tha.

Dharmchand_ Haa.

Abhay_ Hum revised layout aaj raat tak ready karwa lete hai. Kal Minister sahab ke samne project ko investment aur employment proposal ke roop me rakhenge.

Sath me request karenge ki departments ki joint technical committee saat din ke andar project kaa inspection kare.

Dharmchand_ Ye ho sakta hai?

Abhay_ Ho sakta hai. Lekin sirf political recommendation se nhi. Hume sare objections kaa legal aur technical jawab dena hoga.

Abhay ne Nimrit ke pitaji ki taraf dekha.

Abhay_ Aapko apne architect, legal advisor aur senior project manager ko aaj shaam Rajput Construction ke office bhejna hoga. Hamari technical team unke sath baithkar revised proposal ready karegi.

Nimrit ke Pitaji_ Rajput Construction aapki company hai?

Abhay_ Firm meri aur Aftab Qureshi ki hai. Daily operations Aftab sambhalta hai.

Nimrit ke pitaji ne Dharmchand ki taraf dekha.

Nimrit ke Pitaji_ Dharmchand ji, aapko lagta hai ki ye kaam ho jayega?

Dharmchand halka sa muskuraya.

Dharmchand_ Sandhu sahab, agar Abhay ne kah diya hai ki rasta hai, to rasta hai. Ab hume bus uske bataye tarike se kaam karna hoga.

Nimrit chupchap Abhay ko dekh rhi thi.

Ye wahi ladka tha, jise usne bina jane lafanga samajh liya tha.

Lekin iss samay sahar kaa sabse bada businessman apne sabse important project ko bachane ke liye uski baat dhyan se sun rha tha.

Ak MLA uski permission kaa intejar kar rha tha.

Senior architects aur legal advisors ko uske office bhejne ki taiyari ho rhi thi.

Fir bhi Abhay ke chehre per naa ghamand tha aur naa hi apni takat dikhane ki koshish.

Wo bus file ki problems aur unke solutions per baat kar rha tha.

Meeting khatam hone ke baad Nimrit apne pita ke sath car me baithi.

Kuch der tak Nimrit ke pitaji chup rhe.

Fir unhone kaha—

Nimrit ke Pitaji_ Ye ladka aam nhi hai.

Nimrit_ Kon? Dharmchand Patel?

Nimrit ke pitaji ne uski taraf dekha.

Nimrit ke Pitaji_ Me MLA ki baat nhi kar rha. Me Kunwar Abhay Pratap Singh Thakur ki baat kar rha hu.

Nimrit chup ho gyi.

Nimrit ke Pitaji_ Dharmchand kursi per baitha tha, lekin puri meeting Abhay chala rha tha. Use business, law, construction aur politics sabki samajh hai.

Itni kam umar me itna saaf dimag maine bahut kam logo me dekha hai.

Nimrit ne car ki khidki se bahar dekhna shuru kar diya.

Lekin uske dimag me bhi bus Abhay hi chal rha tha.

Uss raat Rajput Construction ke office me Nimrit ke pita ki puri technical team pahuch gyi.

Aftab Qureshi ne sare architects aur legal advisors ko alag-alag kaam bata diya.

Abhay khud project kaa revised presentation banwa rha tha.

Wo raat ke lagbhag teen baje tak office me baitha rha.

Agle din subah Dharmchand aur Abhay State Capital ke liye nikle.

Meeting me pahle department ke officers ne wahi purane objections uthaye.

Lekin Abhay ne har objection kaa jawab documents, master plan aur naye layout ke sath diya..

Usne Minister ke samne project ko kewal ak private business project ki tarah present nhi kia.

Usne bataya ki project se kitni factories aa sakti hai, kitne logo ko rojgar milega, State Government ko kitna tax milega aur aas-paas ke area kaa development kese hoga.

Minister ne officers ko saat din ke andar joint inspection karne kaa order de diya.

Das din baad project ko conditional approval mil gya.

Nimrit ke pitaji kaa ruka hua project bach gya.

Jab approval kaa letter unke office pahucha to pure staff me khushi kaa mahaul tha.

Nimrit ke pitaji ne sabse pahle Dharmchand Patel ko phone kia.

Nimrit ke Pitaji_ Dharmchand ji, approval aa gya. Aapne meri bahut badi problem solve kar di.

Dharmchand hansne laga.

Dharmchand_ Sandhu sahab, dhanyawad mujhe nhi, Abhay ko dijiye. Me to bus Minister ke samne baitha tha. Puri file usne taiyar ki aur officers ke objections kaa jawab bhi usi ne diya.

Phone rakhne ke baad Nimrit ke pitaji ne Nimrit ki taraf dekha.

Nimrit ke Pitaji_ Tum coaching jati ho naa uss taraf?

Nimrit_ Haa.

Nimrit ke Pitaji_ Wapas aate samay Abhay ke office chali jana. Meri taraf se use project ke inauguration kaa invitation de dena.

Nimrit thoda chauk gyi.

Nimrit_ Me?

Nimrit ke Pitaji_ Haa, tum. Isme itna hairan hone wali kyaa baat hai?

Nimrit ne koi jawab nhi diya.

Lekin uske andar kahi ak halki si khushi jarur huyi.

Sham ko Nimrit pahli baar apni marji se Abhay se milne Rajput Construction ke office gyi..

Office me Aftab Qureshi baitha accounts dekh rha tha.

Nimrit_ Mujhe Abhay ji se milna hai.

Aftab ne Nimrit ko dekha aur turant pahchan gya.

Uske chehre per shararti muskan aa gyi.

Aftab_ Kunwar sahab meeting room me hai. Aap baithiye, me unhe bula deta hu.

Kuch der baad Abhay room se bahar aaya.

Nimrit ko dekhkar wo ak pal ke liye ruka.

Abhay_ Aap yaha?

Nimrit ne invitation card uski taraf badhaya.

Nimrit_ Papa ke project ko approval mil gya hai. Agle hafte uska inauguration hai. Papa ne aapko invite kia hai.

Abhay ne card le liya.

Abhay_ Congratulations. Aapke pitaji kaa project achcha hai. Sahar ke development me iska bada contribution hoga.

Nimrit_ Papa ne kaha hai ki project aapki wajah se approve hua hai.

Abhay_ Maine bus file ki galtiya theek karwayi thi. Approval rules ke according mila hai.

Nimrit_ Aap har baar apne kiye hue kaam ko itna chhota kyun bata dete hai?

Abhay ne Nimrit ki taraf dekha.

Abhay_ Kyunki kaam kaa result important hota hai, kisne kia ye nhi.

Nimrit kuch pal uski aankho me dekhti rhi.

Nimrit_ Shayad maine aapko samajhne me bahut badi galti kar di thi.

Abhay_ Galti samajhne wale ki hoti hai, lekin apni galti maan lene ke liye bhi himmat chahiye hoti hai.

Nimrit_ To kyaa aapne mujhe maaf kar diya?

Abhay ke chehre per halki si muskan aa gyi.

Abhay_ Naraj hota to maaf karta. Me aapse kabhi naraj tha hi nhi.

Nimrit_ Fir aapne dobara mujhse baat karne ki koshish kyun nhi ki?

Abhay kuch pal chup rha.

Fir usne shant awaj me kaha—

Abhay_ Kyunki pyar me kisi kaa picha kia ja sakta hai, uski marji kaa nhi.

Nimrit pahli baar Abhay ke samne bilkul chup ho gyi.

Uske paas iss baat kaa koi jawab nhi tha.

Me_ To kyaa maa ko uss samay papa se pyar ho gya tha?

Dadaji halki si muskan ke sath bole—

Dadaji_ Pyar hua tha ya nhi, ye shayad Nimrit bhi uss samay nhi janti thi.

Lekin pahli baar usne tumhare pita ko bus ak ladke ki tarah nhi dekha tha..

Uss din usne Kunwar Abhay Pratap Singh Thakur ko ak aise aadmi ke roop me dekha, jiske paas umar se kahi jyada samajh, takat aur pratibha thi.

Aur sabse badi baat…

Itni takat hone ke baad bhi usne kabhi Nimrit ko hasil karne ke liye apni power kaa istemal nhi kia.

Yahi baat dheere-dheere Nimrit ke dil me tumhare pita ke liye respect paida kar rhi thi.

Aur bete…

Kai baar pyar ki shuruaat attraction se nhi hoti, kisi ke sath samay bitane or use samjhane se hoti hai..

Ab aage suno...

Nimrit_ Aur agar mera jawab badal rha ho to?

Abhay pahli baar Nimrit ki baat sunkar bilkul chup ho gya.
Dono kuch pal tak ak dusre ko dekhte rhe.

Nimrit ko khud bhi yakeen nhi hua ki usne itni sidhi baat keh di thi.

Usne turant apni najar niche kar li.

Nimrit_ Mera matlab hai… agar me aapko dobara samajhna chahu to?

Abhay_ Maine fir kahunga, uss din bhi kaha tha aur aaj bhi wahi kahunga.
Me friendship kaa natak karke apne pyar ko chhupa nhi sakta.

Aap mujhe janna chahti hai to jarur janiye.
Lekin meri feelings aaj bhi wahi hai.
Nimrit ne dheere se Abhay ki taraf dekha.

Nimrit_ Kam se kam aap apni baat ko lekar honest to hai.

Abhay_ Pyar me jhooth bolkar kisi ko hasil karna, pyar nhi hota.

Nimrit ke chehre per halki si muskan aa gyi.

Usne Abhay ko project ke inauguration kaa time bataya aur waha se jane lagi.

Door tak pahuchne ke baad wo ruki.

Usne piche mudkar Abhay ki taraf dekha.

Nimrit_ Abhay ji…

Abhay_ Ji?

Nimrit_ Inauguration per jarur aaiyega.

Abhay_ Koshish karunga.

Nimrit_ Koshish nhi… aapko aana hoga.

Itna kahkar Nimrit office se bahar chali gyi.
Abhay wahi khada use jate hue dekhta rha.
Tabhi side wale room se Aftab bahar nikla.

Aftab_ Wah Kunwar sahab… lagta hai ruki hui file ke sath-sath ak aur mamla bhi approval ki taraf badh rha hai.
Abhay ne use gusse se dekha.

Abhay_ Apna kaam kar.

Aftab_ Kaam hi to kar rha hu. Partner hu tumhara, business aur personal dono progress per najar rakhna meri responsibility hai.

Abhay ne table se ak file uthayi aur Aftab ki taraf fek di.
Aftab haste hue waha se bachkar nikal gya.

.......


Me_ Fir project ke inauguration per kyaa hua?

Dadaji ne halki si muskan ke sath meri taraf dekha.

Dadaji_ Wahi hua, jiska tumhare pita ko intejar tha… aur jiske liye Nimrit ab khud bhi taiyar hone lagi thi.

Project kaa inauguration sirf ak business function nhi tha, bete.

Wahi pahli jagah thi jaha Nimrit ne sabke samne tumhare pita ko apne parivar ke kareeb aate hue dekha.

Lekin uss function me ak aisa aadmi bhi aane wala tha, jise Kunwar Abhay Pratap Singh Thakur kaa badhta hua naam bilkul pasand nhi tha.

.....