மீறாதே மீரா

[imstpd]

மறுநாள் காலையே மீரா மேகலையை ஞாயிறு மதிய விருந்துக்கு அழைக்க நினைவுபடுத்தினாள். கிருஷ் மேகலையை அழைத்து மதிய விருந்துக்கு வீட்டுக்கு வரச்சொன்னான். மேகலைக்கு அது வித்தியாசமாகப்பட்டாலும் வருவதாக ஒத்துக்கொண்டாள்.

ஞாயிற்றுக்கிழமைக்கு முழுதாக நான்கு நாட்கள் இருந்தன.. அந்த நான்கு நாட்களும் மீரா அவனைத் தொட விடவில்லை. அப்படி இருந்தால் கூட பிரச்சினை இல்லை.. திருமணத்திற்கு முன் என்ன தினமுமா படுக்கை சுகம் இருந்தது? ஆனால், அவனை உச்சகட்டமாக வெறுப்பேற்றினாள் மீரா.. முதல் நாள், கொஞ்சம் தாமதமாக வந்தாள். நந்தகோபாலை வீட்டிற்குச் சென்று பார்த்துவிட்டு வருகிறேன் என்றாள்.

"பாவங்க, கால் வலி.. காய்ச்சல் கூட.. நான் இருந்து கஞ்சி வச்சுக்கொடுத்து மாத்திரை போட வச்சுட்டுத்தான் வந்தேன்" என்றாள்..

அடுத்த நாள், சரியாக குளிக்கப்போகும்முன் அரை நிர்வாண நிலையில், அவன் ஆபீஸ் வருகிறானா என போனில் விசாரித்துக்கொண்டிருந்தாள். அப்போதும் கிருஷ்சைத் தொடவிடவில்லை.

குட்நைட், குட்மார்னிங் மெசேஜ்களை நந்தகோபாலுக்கு அனுப்பினாள், சரியாக கிருஷ் பார்க்கும் போதுதான் அனுப்பினாள்.

இந்த ஞாயிறு கடந்தால், இது நின்றுவிடும் என்றுதான் கிருஷ்சுக்குத் தோன்றியது. மீரா மீது நம்பிக்கை இருந்தது. ஆனால் மீரா தன் விடாமுயற்சியை கைவிடவில்லை. அவனை வெறுப்பேற்றினால் மேகலை பக்கம் சரிந்துவிடுவான் என அவளுக்குத் தோன்றியிருக்கும் போல..

வெள்ளிக்கிழமை இரவு, மேகலைக்கு, கிருஷ் போனில் இருந்து குட்நைட் மெசேஜ் அனுப்பினாள் மீரா.

அடுத்தநாள் மாலை, "மேகலை, இந்த ஞாயிறு வரைக்கும் நேரமே போகாது போல.. உன்னை என் வீட்டில் வரவேற்க ஆசையாகக் காத்துக்கொண்டிருக்கிறேன்..தவறாது வந்துவிடு."  என்று ஆர்வத்தை  தூண்டுவது போலவும் ஆசையைக் காட்டியும் காட்டாத ஒரு மெசேஜ், கிருஷ் போனிலிருந்து அனுப்பினாள்..

மீரா உன் விளையாட்டுகளை எல்லாம் நாளையோடு நிறுத்திக்கொள்ள வேண்டும் என்றான் கிருஷ் நம்பிக்கையாக..

"பழம் கண்ட பின்னாலும் தின்னாத வெளவாலா"
"எக்குத் தப்பா நடந்தா ரெண்டு பேரும் பொறுப்பு" என்று பாடினாள் மீரா..

--0--0--0--0--0--0--0--0--0

ஞாயிறு அவர்கள் திருமண வாழ்வின் பெரும் சோதனையை நிகழ்த்திப் பார்க்க இருவரும் தயாராகவே இருந்தனர். கிருஷ், கொஞ்ச நேரம் மனதைக் கட்டுப்படுத்திக் கொண்டால் போதும். அமைதியான ஒடமாக திருமண வாழ்வு இருக்கும்.. அளவில்லா வெள்ளத்தை எதிர்கொள்ள அவன் தயாரில்லை.

கிருஷ் மார்க்கெட்டிலிருந்து வரும்முன், மீரா வெங்காயம் தக்காளி நறுக்கி, மசாலாக்களை தயாரித்திருந்தாள். வெயிலுக்கு லெமன் ஜூஸ்...வீடும் விருந்தாளியை வரவேற்க தயாராகவே இருந்தது. புது சோபா கவர், பளிச்சிடும் தரை, டைனிங் டேபிளில் புது கவர்.. பழங்கள், மலர்கள்.  

சமையல் ஏறக்குறைய முடிந்திருந்தது.. பன்னிரண்டு மணிக்கு ஓரிரு நிமிடங்கள் இருக்கையில் அழைப்பு மணி அடித்தது.. வாசலில் மேகலா நின்றுகொண்டிருந்தாள். ஒரு கையில் நாற்றுகள் இருந்த பை.. இன்னொரு கையில் ஒரு அழகிய நான்கு வயது சிறுமியின் கையைப் பிடித்திருந்தாள். அந்தக் குழந்தை கையில் ஒரு வெளிர்-ரோஜா நிற கரடி பொம்மை சிரித்துக் கொண்டிருந்தது.

--0--0--0--0--0--0--0--0--0