Misc. Erotica Shreya Ke Raaz: Kab tak Chhupenge

[Celebrorn]

Chapter 14

Office mein lunch time ho raha tha aur zyadatar desk khaali pade they. Shreya ne ek baar phir boss ke cabin ki taraf dekha. 

Cabin ka darwaza halka sa khula tha. Pata nahi Manish andar they bhi ya nahi. Kal se uske dimaag mein un chocolates aur flowers ka khayal chakkar kaat raha tha. Usne ek gehri saans li aur apni saree ka pallu adjust karte hue cabin ka door dheere se khola.

Andar jhaanka toh Manish apne desk par kuch files mein uljhe hue they.

Shreya ne halke se door par knock kiya, "May I come in, Sir?"

Manish ka chehra dekh kar saaf lag raha tha ki unka mood kharaab hai. Unhone bina sar uthaye thodi sakhti se kaha, "Come in!"

Shreya andar aayi aur unke desk ke saamne khade hote hue thoda jhijhakte hue boli, "Sir... actually main kal ke liye... thank you bolna chahti thi."

Manish ne ek tez jhatke se apna pen neeche rakha aur sar uthakar Shreya ki taraf dekha. Manish ki bauhein upar chaddhi hui thi. "Thank you? Kis baat ka thank you?"

Unke is unexpected reaction se Shreya buri tarah chaunk gayi aur uski aawaz mein thodi si haklahat aa gayi, "Sir woh... kal... mere desk par... tulips aur... chocolates... aapne... valentine..."

"Tumhara dimaag kharaab ho gaya hai kya?" Manish ki kadak aawaz ne uski baat ko beech mein hi kaat diya, "Maine aaj tak apni biwi ko valentine gift nahi diya. Lagta hai kaam ke elawa tumhara dimaag baaki sab faltu jagah chalta hai."

Shreya ka chehra sharam aur insult se laal ho gaya tha, woh isi pal Manish ke cabin se bahar nikalna chahti thi, "I am sorry sir... mujhe galatfehmi ho gayi thi shayad... Main chalti..."

"Galatfehmi toh tumhe yeh hai ki tum ek achhi supervisor ho." Manish apni kursi se khada ho gaya aur apne dono haath desk par dhamm se rakhte hue aage ki aur jhuka. "Ya phir tumhe yeh lagta hai main toh tumhare husn ka deewana hoon aur tum jo marzi kar sakti ho, main sab ignore kar dunga."

Manish ke yeh tewar dekh kar Shreya ki saans gale mein atak gayi, "Sir... mujhse koi galti hui hai kya?"

"Galti hui hai?" Manish ne gusse mein dohraya aur apne saamne rakhi file ko Shreya ke aage patak di. "Zara yeh file dekho. Tumhari team ke us idiot Rishabh ne yeh paanch lakh ka claim bina proper documentation ke process kar diya. Seedha central audit team se mere paas notice aaya hai."

Yeh sunte hi Shreya ke pairon ke neeche se zameen khisak gayi aur woh saamne rakhi file ko ghoorne lagi.

Manish desk ki doosri taraf se chalta hua Shreya ke saamne aa kar khada ho gaya, "Tum flowers aur valentine day se bahar niklogi toh pata chalega na, ki tumhari team ke log kar kya rahe hain."

"Sir, main... main abhi check karti hoon," Shreya ne ghabrahat mein file uthaane ke liye haath badaya.


Manish ne Shreya ki kalai ko kas ke pakad liya. Uski pakad itni sakht thi ki Shreya ke muh se ek halki si aah nikal gayi. "Agar inquiry baithi na Shreya, toh yeh mat sochna ki main tumhe bacha lunga. Aur woh tumhara promotion ka sapna? Woh toh tum ab bhool hi jayo."

Shreya ka dil zor se dhadak raha tha. Manish jis tarah se use gusse mein ghoor kar dekh raha tha, shayad hi use yaad tha ki kabhi usne aisa kiya tha.

"Ab khadi kyun ho yahan par! Jayo, pichhle do dino mein usne jitni files process ki hai unhe check karo!" Manish ne zor se dahadte hue Shreya ko thoda sa peeche dhakela.

Shreya aankhen jhukate hue jaldi se cabin se bahar nikal aayi. Uski aankhon mein aansu tairne lage, par saath hi andar ek zor ka gussa bhi ubalne laga.

Shreya tezi se wapas apne desk par aayi aur idhar udhar dekha. Rishabh apne desk par nahi tha, shayad lunch karne gaya tha.

Shreya bina ek pal bhi soche cafeteria ki taraf badh gayi. Uski kalai par Manish ki ungliyon ke nishaan chhap se gaye they aur haath halka sa jhanjhana raha tha, par filhaal use woh jaise mehsoos hi nahi ho raha tha. Dimaag mein bas ek hi cheez chal rahi thi - uski saalo ki mehnat par paani fir gaya tha, sab kuch us Rishabh ki wajah se.

Cafeteria bhi halki bheed thi, aur Rishabh ek kone ki table par akela baitha hua apne tiffin box se khaana kha raha tha. Uska masoom sa chehra neeche jhuka hua phone mein kuch dekh raha tha. Par usi masoom se unaware chehre ko dekhte hi Shreya ka gussa saatwa aasmaan chhoone laga.

Shreya lambe lambe kadam lete hue uske paas pahunchi aur zor se boli, "Rishabh!"

Uski aawaz ne ek pal ke liye cafeteria ke shor ko band kar diya.

Rishabh ne chaunkte hue upar Shreya ki taraf dekha, uske haath mein roti ka tukda wahi atak gaya tha "... Ma... Ma'amm...."

"Tumhara dimaag thikane par hai ya nahi!?" Shreya us par lagbhag chilla hi padi. "Paanch lakh ka claim.... aur bina proper documents ke process kar diya tumne? Samajhte kya ho tum apne aap ko?"


Rishabh ghabra kar apni chair se khada ho gaya, uski haath mein jo roti ka tukda tha woh bhi zameen par gir gaya. "Ma'am... woh... ek critical emergency case tha... maine aapko bataya..."

"Chup raho ekdam!" Shreya ne use aage bolne hi nahi diya. Uski aawaz itni tez thi ki aas paas ke table ke log un dono ki taraf hi dekh rahe they. "Pata bhi hai kya bawaal mach gaya hai iske chakkar mein. Waise toh bade rule follower bante ho! Tumhari job toh jayegi hi, saath mein meri job par bhi ban aayi hai!"

Paas hi ki table par do-teen young ladkiyaan baithi thi. Rishabh ko aise public mein daant khaate dekh unhone aapas mein kohni maari aur muh par haath rakh kar khikhiyane lagi.

Unme se ek dheere se boli, "Uski shakal toh dekh, aisa lag raha hai jaise apni mummy se daant kha raha ho."

Unki woh dabi hui hasi aur ab yeh zaleel karta hua comment, jaise kisi teer ki tarah aakar Rishabh ko chubh gaya. Uska chehra jo pehle darr se safed ho chuka tha, ab chukundar ki tarah laal ho gaya tha.

"Ma'am please..." Rishabh ki aankhen un ladkiyon par tiki thi jo palat ki uski taraf dekh rahi thi. "Yahan discuss nahi karte... main aapko explain karta hoon."

"Kya explain karoge tum?!" Shreya ne phir uski aawaz ko daba diya. Manish ki di hui humiliation abhi bhi uske dimaag par haavi thi, aur Rishabh ka aise issue ko taalna uske gusse ko aur bhadka raha tha. "Ki tumhe basic verification bhi karni nahi aati? Ya yeh ki tumhe bas meri life mushkil karne mein maza aata hai?"

"Aapko lagta hai main aapki life mushkil kar raha hoon?" Rishabh ka chehra buri tarah flushed ho chuka tha, aur aisa lag raha tha ki kisi bhi pal uske aansu nikal sakte they. Par uski aawaz kisi tarah se saaf bahar nikli.

"Agar aisa hai toh main abhi resign kar deta hoon. Manish sir ko bol dunga ki aapko is matter mein pareshaan na karein. Isse kam se kam aapki life toh aasan ho jayegi." 

Rishabh bina Shreya ki taraf dekhe tezi se cafeteria se bahar nikal gaya. 

Shreya wahin dang khadi reh gayi thi, Rishabh ne aaj tak usse is tarah unchi aawaz mein baat nahi ki thi. Aur paas baithi woh ladkiyaan jo abhi tak hass rahi thi, unka muh bhi hairani khula ka khula reh gaya tha.

Kuch hi palo mein cafeteria mein fir se wohi normal shor chalu ho gaya tha aur wohi shor Shreya ko ekdam se hosh mein laaya. Uska dil zor se dhadakne laga. Kahin Rishabh sach mein resignation dene toh nahi chala gaya tha?

Uske andar ek zor ki guilt ki lehar daudi, aur woh bina ek pal gawaye cafeteria se bahar nikli aur Manish ki cabin ki taraf jaane lagi. Par hallway mein pahuchte hi uske kadam ek dam ruk gaye.

Thode hi faasle par Rishabh khada tha aur uske saamne Manish. Rishabh Manish ke saamne sar jhukaye khada tha aur meekly kuch samjhane ki koshish kar raha tha. Manish ke chehre par gusse ke saath hi ek annoyed look bhi thi.

Shreya tezi se unki taraf badi, aur paas pahuchte hi Manish ki zehrili aawaz uske kaano mein padi.

"Resign?! Sir ab aap resign nahi kar sakte." Manish ne use taana maarte hue kaha. "Kal central audit team yahan aa rahi hai. Woh tumse aur tumhari Shreya madam ko achhi tarah interrogate karegi."

Rishabh ne ekdam se sar utha kar Manish ki taraf dekha, "S... Sir... isme... Ma'am ki koi galti nahi hai...  Unhe nahi pata tha... maine bas emergency mein..."

"Mujhe koi safai nahi sunni." Manish ne haath uthate hue use chup kara diya, "Kal time par office mein hone chahiye tum, warna tumhara woh haal hoga na ki kahin muh dikhane layak nahi rahoge."

Usi waqt Manish ki nazar paas aati Shreya par padi. Usne ek jhalak Shreya ki taraf dekha, aur jaan gaya ki Shreya ne bhi uski baat sun li thi. Uski yeh aakhri warning un dono ke liye thi.

"Shreya..." Manish ne thandi aawaz mein kaha, "Tum dono abhi ke abhi ghar jayo. You are on administrative leave till this matter is sorted."

Yeh sunte hi Shreya ka chehra ek dam latak gaya. Administrative leave... office ke baaki log kya sochenge uske baare mein? Uski saalo ki kamai izzat mitti mein milne wali thi.

Manish un dono ko wahin chhod kar cafeteria ki taraf badh gaya. Hallway mein bas woh dono khade reh gaya they aur unke beech ek sannata. Rishabh tez saansein le raha tha aur uski poori body kaanp si rahi thi. 

Shreya ne phir se gusse se Rishabh ki taraf dekha. Woh kuch aur bolne hi wali thi ki uski nazar Rishabh ke chehre par padi. Rishabh ne apna sar jhuka rakha tha. Uske chashme ke sheeshe ke peeche, uske aankhon se aansu tapak rahe they. Usne unhe chhupane ke liye apni shirt ke collar se unhe pochne ki koshish ki. Aisa lag raha tha jaise Shreya ka use is haal mein dekhna use aur bhi humiliate kar raha tha.

Shreya ko use is haal mein dekh kar samajh nahi aa raha tha woh kya kare. Ek tarak is ladke ne uske poore career ka bhatta bitha diya tha, doosri taraf use is haal mein dekh kar uske andar ki mom ko us par kaafi daya si aa rahi thi.

Frustration mein bhari hui Shreya ne ek gehri chidchidi saansi bhari, aur uske saamne se nikalte hue apne desk ki taraf badh gayi. Woh tezi se apne desk par pahunchi, apna bag uthaya, aur bina kisi se nazar milaye office se bahar nikal gayi.

Pata nahi, par use aisa lag raha tha ki shayad yeh uska aakhri din tha yahan job ka.