తప్పు..

[ikka123]

ఆదివారం సాయంత్రం కావడంతో కావ్య బాబును తీసుకుని దగ్గర్లోని పార్క్‌కు వెళ్ళింది. 
‎బాబు పరుగుల పెడుతూ ఆట వస్తువుల వైపు వెళ్తుంటే, కావ్య నవ్వుతూ వాడి వెనకాలే నడిచింది.

‎అలా వెళ్తుండగా, అక్కడ బెంచ్‌పై కూర్చున్న ఒక జంట ఆమె కంట పడింది. అందులోని వ్యక్తి ముఖం పరిచయమున్నట్టు అనిపించడంతో కావ్య ఒక క్షణం ఆగి, ముఖంలో నవ్వుతో "హాయ్!" అంది ఫ్రెండ్లీగా.
‎ఆ వ్యక్తి కూడా తల తిప్పి చూసి, గుర్తుపట్టి, "అరేయ్.. నువ్వా కావ్యా!" అన్నాడు ఆశ్చర్యంగా.
‎
 వెంటనే వాడు తన పక్కన ఉన్న ఆవిడను చూపిస్తూ, "ఈమె నా భార్య.. సలీమా" అంటూ పరిచయం చేశాడు.
‎సలీమా కూడా నవ్వుతూ కావ్యను పలకరించింది. ముగ్గురూ అక్కడ నిలబడి కొద్దిసేపు ఎంతో ఆప్యాయంగా మాట్లాడుకున్నారు. 
‎
ఒకరి క్షేమ సమాచారాలు ఒకరు అడుగుతూ, చాలా రోజుల తర్వాత ఎంతో ఫ్రీగా ముచ్చటించుకున్నారు.
‎అయితే, వీరంతా పార్క్ లోపల మాట్లాడుకుంటుంటే... బయట రోడ్డు పక్కన ఉన్న ఫుట్‌పాత్ మీద లకన్ నిలబడి ఉన్నాడు.
‎
‎వాడు మార్కెట్ వైపు ఏదో పని మీద వెళ్తూ, పార్క్ వైపు చూశాడు. అక్కడ ఒక పరాయి మగాడితో, అతని భార్యతో ఎంతో చొరవగా, నవ్వుతూ మాట్లాడుతున్న కావ్య వానికి కనిపించింది. 
‎
ఇంట్లో తన ముందు అంత కఠినంగా, కోపంగా ఉండే కావ్య... అక్కడ అంత ఫ్రీగా మాట్లాడటం చూసి లకన్ చూపులు అటువైపే నిలిచిపోయాయి.
‎
‎వాడు పార్క్ ఇనుప గ్రిల్స్ అవతల ఫుట్‌పాత్ మీదే నిలబడిపోయి, తనదైన ఆ ప్రత్యేకమైన గాఢమైన చూపులతో కావ్యను, ఆమె నవ్వులను గమనించడం మొదలుపెట్టాడు.
‎
‎
‎సలీమా, కావ్య కొడుకుని తీసుకుని కొద్ది దూరంలో ఉన్న ఐస్‌క్రీమ్ బండి వైపు నడిచింది. ఆ సమయంలో జావేద్, కావ్య ఇద్దరే మిగిలారు.
‎
‎సలీమా వెళ్ళగానే జావేద్ ఒక్కసారిగా కావ్యకు మరింత దగ్గరగా వచ్చి, ఆమె భుజం మీద చెయ్యి వేశాడు. ఆ అనుకోని స్పర్శకు కావ్య ఒక్కసారిగా ఉలిక్కిపడి, వెనక్కి జరిగి, వాడి చేతిని భుజం మీద నుండి తీసేసింది.
‎
‎జావేద్ ఆమె వైపు చూస్తూ, పాత జ్ఞాపకాల్లోకి వెళ్ళిపోయినట్టుగా, "నిన్ను ఆ రోజుల్లో ఎంతగానో లవ్ చేశాను కావ్య.. కానీ నా ప్రేమ విషయం చెప్తే మీ నాన్న ఒప్పుకోలేదు, మా నాన్న ఒప్పుకోలేదు" అన్నాడు కాస్త బాధగా.
‎
‎కావ్య సర్దుకుంటూ, "అవును జావేద్, మా వాళ్ళకి, మీ వాళ్ళకి పట్టింపులు చాలా ఎక్కువ. అయినా అది నీ వైపు నుండి ఉన్న వన్ సైడ్ లవ్ మాత్రమే" అంది పరిస్థితిని తేలికపర్చడానికి ప్రయత్నిస్తూ.
‎
‎"నిజమే అనుకో.. ఇంటర్ అవ్వగానే నేను దుబాయ్ వెళ్ళిపోయాను. అక్కడ సెటిల్ అయ్యాక మా నాన్న చెప్పిన అమ్మాయి సలీమాను చేసుకున్నాను. ఈ ఊరిలో సలీమా బంధువుల పెళ్లి ఉంటే వచ్చాము. దుబాయ్ నుండి వచ్చి కొద్ది రోజులే అవుతోంది, మరో రెండు రోజుల్లో మళ్ళీ వెళ్ళిపోతాను" అంటూ, ఎమోషనల్ అయినట్టుగా మళ్ళీ కావ్య భుజం మీద చెయ్యి వేశాడు.
‎
‎కావ్యకు ఈసారి వాడి ప్రవర్తన నచ్చలేదు. ఆమె ఒక్కసారిగా వాడి కళ్ళలోకి చాలా సీరియస్‌గా చూస్తూ, వాడి చేతిని గట్టిగా పట్టుకుని భుజం మీది నుండి పక్కకు తీసేసింది.
‎
‎ఇదంతా పార్క్ బయట ఫుట్‌పాత్ మీద నిలబడిన లకన్ చాలా వింతగా, ఆసక్తిగా గమనించాడు. ఇంట్లో తనను తాకనివ్వకుండా అంతలా ఇబ్బంది పడే కావ్య, ఇక్కడ ఒక పరాయి మగాడితో అంత దగ్గరగా నిలబడటం, వాడు భుజం మీద చెయ్యి వేయడం, ఆమె దాన్ని తీసేయడం... ఈ మొత్తం డ్రామాను వాడు తన కళ్లతో చూశాడు. 
‎వాని ముఖంలో ఒక వింతైన ఆలోచన మెరిసింది. కాసేపు అలా చూసి, వాడు మెల్లిగా మార్కెట్ వైపు నడుచుకుంటూ వెళ్ళిపోయాడు.
‎
‎కొద్దిసేపటికి సలీమా, బాబు ఐస్‌క్రీమ్ తిని తిరిగి రావడంతో, అందరూ ఎప్పటిలాగే నవ్వుతూ ఫ్రెండ్లీగా సెలవు తీసుకుని విడిపోయారు.