[Babab96]

To aate hai story per...

April 2008 ki woh subah thi. Aryavart mein suraj abhi poori tarah se nikla bhi nahi tha, lekin hawa me nami kam thi..

Thakur Villa ke pichhle hisse mein bana laal mitti ka kushti akhada roz ki tarah taiyaar tha. 

Ek taraf chhappar ke neeche gada, mugdar aur doosre pehalwani ke saamaan rakhe the, toh doosri taraf haveli ki cream rang ki oonchi deewaron par subah ki halki sunahri roshni pad rahi thi.

Akhade ke beech Mein apni rozana ki kasrat mein juta hua tha. 

Sirf pandrah saal ki umar me, Mein ek poori tarah se tarasha hua, anubhavi pehalwan ban chuka tha.

Mein ab tak pachchees se zyada kushti ke dangalon me jeet haasil kar chuka tha.

 Mere liye dand-baithak, mitti mein pakad banana, daav-pech ka abhyas aur apne pratidwandi ki chaal ko samajhna koi nayi baat nahi thi. 

Saalon ki mehnat ne mere shareer ko mazboot aur mere dimaag ko kushti ke liye tez bana diya tha.

Akhade ke ek kinare par sattar saal ke mere Dadaji Thakur Baldev Singh khade the. 

Umar bhale hi unke chehre par apni lakeerein chhod chuki thi, lekin unki kad-kathi, mazboot awaaz aur pehalwanon jaisi pakad aaj bhi unke purane naam ki gawahi deti thi. 

Unke paas hi Mohan, jo pichhle bees saalon se akhade ki dekhbhaal kar raha tha, Meri kasrat par nazar rakhe hue tha.


Dadaji_“Jay, kamar seedhi rakh! Dand lagate waqt sirf haath aur kandhon ka zor nahi, poore shareer ka santulan kaam aata hai” 



Dadaji ne gambhir awaaz mein kaha.

Mene bina ruke apni raftaar sambhali aur dand poore kiye. 

Phir mein mitti par baithkar baithakein lagane laga.

Mere maathe se paseena tapak raha tha aur saans tez chal rahi thi, lekin meri aankhon mein thakaan se zyada ekagrata thi.

Mohan ne paas aakar kaha..

Mohan_“Kunwar sa, aapki pakad toh ab pehle se bhi mazboot ho gayi hai. Pichhle dangal mein jis tarah aapne saamne wale pehalwan ka daav palta tha, woh dekhne layak tha.”

Mere chehre par halki si muskaan aayi, magar mene apni tareef ko zyada bhaav nahi diya. 

Me_ “Mohan kaka, kushti mein pichhli jeet ka ghamand karne se agli kushti nahi jeeti jaati. Dadaji kehte hain ki har pehalwan se kuch na kuch seekhne ko milta hai.”

Dadaji ne santushti se meri taraf dekha.

Dadaji_ “Bilkul sahi kaha. Jeetne wale bahut mil jaate hain, Jay, lekin apni jeet ke baad bhi seekhne ki bhookh zinda rakhne wale hi asli pehalwan bante hain.”

Iske baad Dadaji khud mitti mein utar aaye. Unhone mujhko saamne khada kiya aur dono ke beech pakad ka abhyas shuru hua. 

Mene apni pakad jamaane ki koshish ki, lekin Dadaji ne pal bhar mein meri kalai ki disha badal kar mujhe apna santulan sambhalne par majboor kar diya.

 Mene turant apni galti samjhi, pairon ki sthiti badli aur dobara daav lagaya. 

Is baar mene Dadaji ki pakad se nikalne ka sahi mauka pakad liya.

Dadaji_ “Achha!” 

Dadaji ne kaha.

Dadaji_ “Ab tum sirf taakat se nahi, dimaag se bhi kushti karne lage ho. 

Lekin yaad rakhna, dangal mein har pehalwan tumhari purani jeeton se prabhavit nahi hoga. Kuch aise bhi milenge jo tumhari har chaal ka jawaab jaante honge.”

Mene unki aankhon mein dekhte hue kaha..

Me_“Isi liye toh main roz aapke saath abhyas karta hoon, Dadaji. Mujhe apni kushti aur behtar karni hai.”

Subah badhne ke saath akhade ki laal mitti par humare pairon ke nishaan gehre hote gaye. 

April ki garmi ab saaf mehsoos hone lagi thi. 

Mere kandhon aur chehre par paseena chamak raha tha, phir bhi mene abhyas mein koi dheel nahi di. Dadaji har daav ko dhyaan se dekhte, zaroorat padne par use rokte aur uski chhoti se chhoti galti sudharte rahe.

Akhir mein Dadaji ne haath uthakar abhyas rokne ka ishara kiya.

 Dadaji_“Bas, aaj ke liye itna kaafi hai. Shareer ko mazboot banana zaroori hai, lekin use aaraam dena aur sahi samay par sahi faisla lena bhi pehalwani ka hissa hai.”

Mene dono haath jodkar Dadaji ka aashirwad liya.

Mere liye yeh akhada sirf kasrat karne ki jagah nahi tha; yahin mene anushasan, sabr, himmat aur haar ke baad dobara khade hone ka matlab seekha tha. 

Aur in sabke beech, mere liye Dadaji hi mere sabse bade guru the.

Mujhko abhi andaaza nahi tha ki aane wala dangal mere liye sirf ek aur muqabla nahi, balki ek aisa din banne wala tha jise me lambe samay tak yaad rakhne wala tha.

..........................

Akhade se jaane se pehle Dadaji ne mujhe ek zaroori baat batayi. Unhone kaha ki aaj se theek chhe din baad mujhe paas ke ek gaanv mein unke saath ek bade khule kushti mukable mein hissa lene jaana hai.

Dadaji ne mujhe samjhaya ki mujhe abhi se apni taiyari usi hisaab se rakhni hogi, kyunki wahan muqabla aasaan nahi hone wala tha. Us dangal mein sirf Madhyanchal ke hi nahi, balki doosre rajyon se bhi kai damdar aur naamcheen pehalwan aane wale the. Unmein alag-alag umar, wazan aur pehalwani ki shreniyon ke pehalwan honge, jinmein se kai apni taakat aur daav-pechon ke liye mashhoor the.

Lekin us mukable ki sabse khaas baat yeh thi ki woh ek khula mukabla tha. Aise mukable mein pehalwanon ke liye apni tay shreni tak seemit rehna zaroori nahi hota tha. Jo bhi pehalwan himmat rakhta ho, woh apni marzi se kisi bhi category ke pehalwan ko chunauti de sakta tha.

Wahan na naam ka zyada maayne tha, na umar ka aur na hi wazan ki shreni ka—akhade mein aakhirkaar maayne rakhti thi toh sirf taakat, hunar, himmat aur jeet.

Dadaji ki baat sunkar main samajh gaya ki aane wale chhe din mere liye bahut maayne rakhne wale the.

Main pehle hi pachchees se zyada kushti mukable jeet chuka tha, lekin Dadaji mujhe hamesha yaad dilate the ki har naya dangal apne saath ek nayi chunauti lekar aata hai.

Ab mujhe apni taiyari aur bhi gambhirta se karni thi, kyunki is baar main sirf apni jeet ka silsila aage badhane nahi ja raha tha—main un pehalwanon ke beech utarne wala tha, jinki taakat aur hunar ki charcha door-door tak thi.

........................

Toh doston, akhade mein achhi-khaasi mehnat karne ke baad ab me Dadaji ke saath haveli ki taraf badh raha tha..

April ka mahina tha. Suraj ab dheere-dheere upar chadh raha tha aur haveli ki cream rang ki nakkashidaar deewaron par dhoop chamakne lagi thi. Thakur Villa ka bada aangan apni roz ki raunak mein laut raha tha.

Kahin naukar safai kar rahe the, toh kahin rasoi se bartan khatakne aur nashta taiyaar hone ki awaazein aa rahi thi.

Jaise hi hum aangan mein pahunche, Dadaji ne mujhse kaha..

Dadaji_“Jay, tu naha-dhokar taiyaar ho ja. Nashta kar lena. Aur haan, aaj apni kitaabein bhi dekh lena, mene tere kamre me kakchha aanth ki Kitaabein rakh di hai”

Maine hairaani se unki taraf dekha.

Me_“Dadaji, abhi toh chhuttiyaan chal rahi hain!”

Dadaji ne apni moochhon par haath pherte hue kaha..

Dadaji_“Chhutti ka matlab yeh nahi ki padhai se rishta hi tod le. Pahalwani apni jagah hai aur padhai apni jagah.”

Me_“Ji, Dadaji,” 

maine dheere se kaha.

Andar hi andar main soch raha tha ki Dadaji ko har baat ka jawaab mil hi jaata hai.

Dadaji apne kamre ki taraf chale gaye aur main apne kamre mein nahaane ke liye chala gaya.

........................