மீறாதே மீரா

[imstpd]

மீரா பேருந்து நிறுத்தத்தைப் நோக்கி நடந்துகொண்டிருந்தாள்..நான் நேற்று வாங்கித்தந்த மல்லிகை இன்னும் அவள் தலையில், லேசாக வாடி இருந்தது..
அப்போது அதே பைக்.. கறுப்பு ஹீரோ எக்ஸ்டிரீம்.. அவளருகில் வந்து நின்றது. அவர்கள் எதுவும் பேசவில்லை.. வண்டியில் ஏறிக்கொண்டாள்.. வண்டி விரைந்தது..

நான் ஸ்கூட்டரை எடுத்து யு டர்ன் போட்டு திரும்பி வருவதற்குள் அவர்கள் சென்றிருப்பார்களோ?

அலுவலகத்திலிருந்து வீட்டிற்குச் செல்லும் பாதையிலேயே சென்றேன்.. தூரத்தில் ஒரு ரெஸ்டாரண்ட் முன்பு வண்டி நிறுத்திவிட்டு இறங்கிக்கொண்டிருந்தார்கள்..

ஜெர்கினின் தலைமறைப்பை நன்கு மறைத்துக்கொண்டு அவர்களைக் கடந்தேன்..தள்ளியிருந்த ஒரு இளநீர்க்கடை குடைக்குக் கீழே மறைவாக நின்றுகொண்டேன்..

20 நிமிடத்தில் வெளிவந்தார்கள்.. வண்டி கிளம்பியது.. என்னைத் தாண்டும்போது அவள் கையில் ஒற்றை ரோஜா..


எதுவும் யோசிக்கத்தோன்றவில்லை.. வண்டியில் தொடர ஆரம்பித்தேன்..
மெயின்ரோட்டிலிருந்து எங்கள் வீடு இருக்கும் பாரதிநகர் செல்லும் சாலையில் அவர்கள் வண்டி திரும்பியது..
நான் இலக்கில்லாமல் சென்றுகொண்டிருந்தேன்..

மீரா இன்னொருவரின் வண்டியில் செல்கிறாள்…கையில் ஒற்றை ரோஜா..

— x—x—x—-x—-x—---x
மேகலாவின் வீட்டிற்குச் சென்றேன்..

வெளியில் நின்றே வண்டிச்சாவியைக் கொடுத்துவிட்டுச் செல்லலாம் என நினைத்தேன்..
நைட்டியில் இருந்தாள்..

அவள் அம்மாவிடம் ஹாலில் குழந்தைகள் டியூசன் படித்துக்கொண்டிருந்தன..

வணக்கம் வைத்தேன்..
தம்பியை உள்ள கூட்டிட்டுப் போம்மா..
இல்லை மேகலா நான் கிளம்பறேன்..
சார் எப்படிப் போவிங்க..
ஆட்டோ புடிச்சுக்கறேன்..
அதுக்கே மெயின்ரோடு போகனும்.. பொறுங்க நான் வர்றேன்..
என்னிடம் வாங்கிய ஜெர்கினை நைட்டிக்கு மேல் போட்டுக்கொண்டாள்..
சாவியை என்னிடமே கொடுத்தாள்..