Romance SHIDDAT [COMPLETED]

[Herotic]

EPISODE 6

Uski dua mein Siddharth ka naam sabse pehle aata tha. Usne apne chehre par haath phera aur ek gehri saans li. Tabhi nurse ne aakar suchna di ki emergency mein ek naya case aaya hai. Hina ne apna dupatta sambhala aur phir se Doctor ki bhoomika mein laut gayi.
 
Din bhar Siddharth filon ke beech Hina ka bheja hua ek chhota sa message dekhta, "Paani pi lena aur meal skip nhi karna, Sid." Aur Hina, operations ke beech Siddharth ka bheja hua photo dekhti, "Aaj ka sunset tum jaisa hi khoobsurat hai." Dono apne ***** aur apni duty mein poori tarah range hue the, lekin unki roohein ek-dusre ki prayer mein basi thi. Siddharth ki ***** ki goonj aur Hina ki ***** ki pukaar, dono hi ek hi Khuda ki taraf ja rahi thi, jahan ***** ki deewarein dhundhli pad jati thi.
 
Dopehar ka waqt tha aur City Civil Hospital mein roz ki tarah gehma-gehmi thi. Achanak hospital ke mukhya dwar par teen safed gaadiyan aakar ruki, jinmein se sabse aage wali gaadi par garv se Collector ki nameplate aur neeli batti chamak rahi thi.
 
Siddharth gaadi se neeche utra. Usne gehre neele rang ka fitted Jodhpuri suit pehna tha, saleeke se sanware hue baal aur aankhon par laga black aviator chashma uske handsome aur prabhavshali vyaktitva mein chaar chaand laga raha tha. Uske utarte hi hospital ke Dean aur senior doctoron ki kataar uske swagat mein jhuk gayi. Siddharth ke peeche uske do mustaid bodyguards aur PA chal rahe the, jo mahaul ko aur bhi gambhir bana rahe the.
 
Siddharth ek-ek ward ka muayna kar raha tha. Woh mareezon ke paas jaakar unki sehat ka haal poochta aur doctoron se suvidhaon ki jaankari leta. Uska andaaz itna saleekedar aur sakht tha ki bade-bade senior doctor bhi paseene chhod rahe the. Tabhi uski nazar Cardiology vibhag ki aur mudi. Wahan Dr. Hina apni team ke saath round par thi.
 
Siddharth ko is andaaz mein, itni taaqat aur garima ke saath apne saamne dekhkar Hina ka dil zor se dhadakne laga. Woh andar hi andar behad khush thi apne 'Sid' ko is mukaam par aur itne raub mein dekhkar uska seena garv se chauda ho gaya tha. Lekin ek professional doctor hone ke naate, usne apne chehre par koi bhaav nahi aane diya.
 
Siddharth Hina ke paas pahuncha. Dono ki nazrein ek pal ke liye mili. Siddharth ki aankhon mein wahi purani chamak thi, lekin zubaan par aadhikarik gambhirta. Usne Hina ki filon ko dekha aur phir Dean ki ore muda. "Doctor Mehta," Siddharth ne buland aawaz mein kaha, "Maine poore hospital ka record dekha hai, lekin Cardiology vibhag ki efficiency aur Dr. Hina ki mehnat waqayi kaabil-e-tareef hai. Jis tarah se inhone haal hi mein complex surgeries ko anjaam diya hai, woh zile ke liye ek misaal hai."
 
Siddharth phir Hina ki ore muda aur bina kisi ko shak hone diye, ek official lehje mein bola, "Dr. Hina, aapka kaam bolta hai. Shasan ko aap jaise dedicated doctoron ki zaroorat hai. Keep it up!", Hospital ke galiyare mein sannata chha gaya. Dean aur baaki senior doctor ek-dusre ka muh taakne lage. Har koi hairaan tha ki zile ka sabse sakht aur reserve rehne wala Collector ek junior doctor ki itni khulkar tareef kaise kar raha hai. Kisi ko kaano-kaan khabar nahi thi ki is formal tareef ke peeche barson ka gehra pyaar hai.
 
Hina ne dheere se sar jhukaya aur bahut hi shaaleenta se kaha, "Shukriya, Sir. Yeh mera farz hai." Jab Siddharth aage badha, toh uski peeth Hina ki ore thi, lekin uske chehre par ek chhoti si jeet wali muskaan thi. Hina ne use jaate hue dekha aur apne stethoscope ko kaskar pakad liya. Use pata tha ki aaj shaam uske phone par ek message zaroor aayega, "Aaj doctor sahiba safed coat mein bahut zaalim lag rahi thin."
 
Siddharth ke jaane ke baad, hospital ke us safed galiyare mein Hina kisi kudrati karishme ki tarah khamosh khadi thi. Halanki woh ek doctor thi, lekin uski saadgi aur khoobsurti ka mel kuchh aisa tha ki use dekhne wala har shakhs ek pal ke liye apni bimaari bhool jata.
 
Hina ki khoobsurti kisi banawati saajo-shringar ki mohtaj nahi thi. Uska rang doodhiya tha, jis par halki gulaabi rangat hamesha chhayi rehti thi, jaise subah ki pehli kiran ne barf ko chhua ho. Hospital ke safed lab coat ke bheetar usne ek pastel hare rang ka chikankari suit pehna tha, jiska dupatta uske gale mein garima ke saath lipta hua tha. Woh safed coat, jo dusron ke liye keval ek uniform thi, Hina ke upar kisi makhmali libaas jaisa janch raha tha.
 
Uski sabse badi taaqat uski aankhein thin, gehri bhoori aur baadami. Un aankhon mein ek ajeeb sa thehraav tha, jaise kisi gehri jheel ka shaant paani. Jab woh baat karti, toh uski palkein bahut dheere se jhukti thin, jo uski sharmeeli fitrat aur tehzeeb ko bayan karti thin. Uski ***** wali woh roohani chamak uske chehre par saaf dikhti thi, jisne uski skin ko ek anokha Noor bakhsha tha.
 
Hina ki naak teekhi aur seedhi thi, jis par paseene ki ek nanhi si boond kabhi-kabhi uski mehnat ki gawahi deti. Uske honth kudrati taur par surkh the, jinhe kisi lipstick ki zaroorat nahi thi. Jab woh muskurati, toh uske gaalon par padne wale halke se dimples Siddharth jaise sakht officer ke dil ki dhadkanein badhane ke liye kaafi the. Uske kaale, reshmi baal kaskar ek joode mein bandhe rehte the, lekin kuchh aawara zulfein aksar uske kaan ke paas se fisalkar uske gaalon ko chhoone ki gustakhi kar baithti thin. Hina ke chalne ke andaaz mein ek nazakat thi, jaise woh zameen par pair nahi, balki dil par rakh rahi ho.
 
Siddharth ki tareef ne uske chehre par jo laali bikheri thi, usne uski khoobsurti mein ek Haya ka tadka laga diya tha. Hospital ke karmchari dabi zubaan mein aksar kehte the ki Dr. Hina sirf dilon ka ilaaj nahi kartin, balki apni ek nazar se unhe jeet bhi leti hain.
 
Off Day ki woh subah behad khushnuma thi. Siddharth ne raat mein hi Hina ko message kar diya tha, "Kal ka din sirf humara hai. Taiyaar rehna, main tumhein pickup karunga." Hina subah se hi is mulaqat ke liye excited thi. Usne apne wardrobe se woh khaas libaas nikala jo usne aise hi kisi din ke liye bachakar rakha tha.
 
Jab Siddharth ki car Hina ke ghar ke paas ruki, toh woh bahar aayi. Use dekhte hi Siddharth ki aankhein khuli ki khuli reh gayi. Hina ne gehre hare rang (Bottle Green) ki ek lambi reshmi kurti pehni thi, jis par sunahre dhaagon (Zari work) ki itni bareek aur shahi kadhai thi ki woh kisi Shehzaadi jaisi lag rahi thi. Matching cigarette pant aur sunahri lace wala dupatta uske vyaktitva mein chaar chaand laga rahe the.
 
Uske khule baal, beech se nikli maang aur kaanon mein jhoolte bade traditional jhumke uski khoobsurti ko ek alag hi star par le ja rahe the. Jab woh apni golden heels ke saath chalkar car ki ore aayi, toh Siddharth bas use dekhta reh gaya.
 
[Authors note: Are yaaaaaarr…. Ye Hina jaan nikaal degi apni in khubsurat adaaon se… ufff]
 
"Aaj toh zile ka Collector apni sudh-budh khone wala hai," Siddharth ne car ka darwaza kholte hue mazaak mein kaha. Hina ne sharmate hue apni nazron ko jhukaya aur car mein baithte hue boli, "Aur aaj ye doctor apne mareez ka koi ilaaj nahi karne wali."
 
Poora din unke liye kisi khwaab jaisa tha. Ve shehar ki bheed-bhaad se door ek shaant lakeside resort par pahunche. Wahan hariyali aur paani ke beech unhone ghanton baatein ki. Siddharth ne Hina ka haath thaamkar use ehsaas karaya ki filon aur laal batti ki duniya se pare uski asli duniya bas yehi hai. Unhone saath mein khana khaya, purani yaadein taaza ki aur aane wale kal ke haseen sapne bune.
 
Hina ka woh hara libaas aur uski khilkhilahat us poore din ki sabse khoobsurat yaad ban gayi. Suraj dhalne tak ve bas ek-dusre ke wajood mein khoye rahe, yeh bhoolkar ki kal phir unhe apni-apni zimmedariyon ki duniya mein lautna hai. Shaam dhal chuki thi aur aasman par naarangi rang ki chaadar bichh gayi thi. Resort ke garden mein makhmali ghaas par Siddharth aur Hina ek-dusre ke kareeb baithe the. Phoolon ki bheeni-bheeni khushbu aur chidiyon ki chahchahahat ke beech mahaul poori tarah roomani ho gaya tha.
 
Siddharth ne Hina ke haathon ko apne haathon mein lekar sahlaya. "Hina, kabhi-kabhi sochta hoon ki agar tum meri zindagi mein na hoti, toh ye laal batti aur ye ohda mere liye mehaz ek bojh bankar reh jata. Tum ho, toh is Collector ki duniya mein rang hain.", Hina ne uski aankhon mein gehrai se jhaanka. Uske jhumke hawa ke saath dheere se hil rahe the. "Sid, tum jaante ho na ki tum mere liye kya ho? Jab main hospital mein kisi ka dil theek karti hoon, toh dil hi dil mein dua karti hoon ki tumhara dil hamesha mere liye aise hi dhadakta rahe."
 
Achanak Hina ke chehre par wahi purani bachpan wali shararat laut aayi. Usne Siddharth ka haath jhatak diya aur apni bhaunhein sikodkar use chhedne lagi. "Waise Collector sahab, apni tareefein toh sun li maine. Par sach batao, jab tum inspection par aaye the, toh us sundar si nurse ki taraf dekh kyun rahe the? Kya zile ke maalik ko ab naye mareezon ki talaash hai?", Siddharth hakka-bakka reh gaya. "Kya? Kaun si nurse? Hina, main toh sirf apni Doctor ko dekh raha tha!"
 
Hina ne munh banakar apna dupatta hawa mein lehraya. "Are rehne do..huh! Mujhe sab pata hai. Aap IAS log hote hi bade chaalu hain. Zubaan par protocol aur dil mein..." Usne baat adhoori chhod di aur Siddharth ke kandhe par ek halka sa mukka maara. Siddharth use manane ki koshish karne laga, "Are baba, suno toh...", Lekin Hina kahan rukne wali thi. Woh apni aankhon se use chidhaate hue boli, "Ab toh main aap se tabhi baat karungi jab aap mujhe pakadkar dikhayenge! Dekhte hain aapke PT ke dinon ki daud aaj kaam aati hai ya nahi."
 
Itna kehte hi Hina ne apni heels utaarkar haath mein leen aur apne hare reshmi libaas ko thoda upar uthaakar ghaas par nange paanv daud laga di. Uske khule baal hawa mein peeche ki ore udd rahe the aur uski khilkhilahat poore bageeche mein goonj rahi thi. "Hina! Ruko, ye protocol ke khilaaf hai!" Siddharth chillaya aur uske peeche bhaga.
 
Hina bahut furteeli thi, woh pedon ke peeche chhipti aur phir achanak nikal kar bhaagti. Lekin Siddharth bhi haar maanne wala nahi tha. Kuchh hi palon mein usne ek tez daud lagayi aur Hina ke kareeb pahunch gaya. Jaise hi Hina mudi, Siddharth ne furti se use peeche se apni mazboot baahon mein jakad liya.
 
"Pakad liyaaaa!" Siddharth ne haanfte hue kaha. Hina ne chhootne ki koshish ki, "Chhodo Sid! Koi dekh lega!" Lekin Siddharth ne ek jhatke mein Hina ko apni god mein utha liya aur gol-gol ghoomne laga. Hina ka reshmi dupatta hawa mein ek ghera banane laga aur uski hansi bekaabu ho gayi. Usne darr aur khushi ke maare Siddharth ki gardan ko kaskar pakad liya.