Misc. Erotica Shreya Ke Raaz: Kab tak Chhupenge

[Celebrorn]

Chapter 9

Agli subah hamesha ki tarah Rohit ko college drop karke Shreya apne office pahuchi. Aaj raste bhar car mein ek ajeeb si khamoshi thi. Rohit aaj kuch jyada hi chup tha. Shreya ne ek-do baar usse baat karne ki koshish ki, par usne bas halke 'haan' ya 'hmm' mein jawab diya.

Shreya ne dhyan diya ki Rohit aaj kuch zyada hi khoya-khoya sa tha, par phir usne socha ki uski umar hi aisi thi, kabhi toh itni energy, kabhi beinteha gussa aur kabhi bilkul down. Shreya khud bhi kafi tired feel kar rahi thi, isliye usne baat ko zyada kheecha nahi.

Shreya apni seat tak pahuchi bhi nahi thi ki uski nazar desk par rakhe ek khoobsurat vase par padi, jisme taaza tulips saje hue the. Unke saath hi ek chocolates ka box aur ek chhota sa card rakha tha. Yeh uska hi desk tha na? Mann mein khayal aaya.

Desk par pahuch kar Shreya ne hichkichate hue card ko uthaya aur padna shuru kiya.

"To the lady whose grace defines elegance, and whose beauty remains the quiet storm in my heart. Belated Happy Valentine Day!"

Shreya ke honthon par ek halki si muskaan aa gayi aur gaal achanak se hi surkh laal ho gaye. Itne saalon baad use aaj kisi ne Valentine's Day gift diya tha. Usne card ko ek baar aur pada aur apni muskaan chhupane ke liye apne honthon ko andar daba liya, par uski aankhon ki chamak sab bayaan kar rahi thi.



Shreya ne tulips ko halke se smell kiya, woh bilkul fresh they, bahut hi pyaari khushbu. Usne idhar udhar dekha, koi bhi toh nahi tha wahan. Bas saamne thodi door par hamesha ki tarah Rishabh baitha tha, chashma pehne apne kaam mein nervously busy.

Shreya card table par chhod kar, ek naye confidence aur style se chalti hui Rishabh ke desk par pahuchi.

"Rishabh!" Shreya ki aawaz un tulips ki tarah chehak rahi thi. "Rishabh!"

"Yes Ma'am," Rishabh ne jhat se apni screen se nazrein hatate hue upar dekha.

"Ummm... tumne abhi morning mein kisi ko mere desk par aate dekha kya?" Shreya ne uske monitor ke upar haath rakhte hue poocha.

"Kya hua Ma'am, kuch missing hai kya?"  Rishabh ne turant poocha, uski aawaz mein thodi si ghabrahat thi.

Shreya ne ek halki si hansi ke saath apna sar jhatka. Rishabh ki aadat hi aisi thi, bechara har baat mein koi na koi negative cheez dhoond hi leta tha.

"Nahi Rishabh, kuch khoya nahi hai... balki kuch mil gaya hai," Shreya ne apni aawaz ko thoda dheema karte hue kaha, par uski muskurahat aur badi hoti jaa rahi thi. Usne tirchi nazar se apne desk ki taraf ishara kiya. "Wahan tulips rakhe hain... kya tumne dekha ki wo kaun rakh kar gaya? Koi delivery boy ya... koi aur?"

Rishabh ne apna chashma thoda upar sarkaaya aur Shreya ke desk ki taraf dekha, aur phir wapas Shreya ki taraf. "Ma'am, main toh abhi aadhe ghante pehle hi aaya tha, tab se files clear karne mein hi laga hoon." 

"Woh theek hai, par jab tum aaye they, toh woh vase wahin tha kya?" Shreya ko Rishabh ke routine se jawab par thodi irritation honi shuru ho gayi thi. 

"Nahi pata Ma'am, maine dhyan nahi diya." Rishabh ne nervous hote hue kaha, jaise vase ka wahan hona koi badi galti ho. "Waise bhi aapko toh pata hi hai, guard sahab kisi bhi delivery wale ko andar desk tak aane dete hain. Maine kitni baar yeh raise bhi kiya hai par koi..." Rishabh ki toni thodi shikayati ho gayi thi.

"Offo..." Shreya ne uski baat beech mein kaati aur apna sar jhatakte hue thoda peeche ho gayi, "Rishabh... tum na bas... rehne do. Galti ho gayi tumse pooch kar! Tumhe toh na har cheez mein security risk hi dikhayi deta hai."

Shreya jhujhulate hue wapas apne desk par chali gayi. Rishabh ne screen ki taraf dekhte hue ek gehri saans li, uski hatheliyan paseene se gili ho chuki thi.

Shreya tez kadmon se chalte hue apne desk par pahuchi aur irritate hote hue dhamm se apni chair par baithi, par phir card ko wahan dekh kar usne phir se use utha liya aur padne lagi. "Quiet storm..." Un do shabdon par uski nighaahen atak gayi.


Usne ek lambi saans li aur un shabdon ko apne dimaag mein dohrane lagi. Rishabh ki baaton ne thodi der ke liye uska mood kharab kar diya tha, par card par likhi woh ek line jaise kisi jaadu ki tarah asar kar rahi thi. Usne card ko apne honthon ke paas laya, us par abhi bhi ek halki si mehek baaki thi, shayad un tulips ki ya shayad koi perfume.

Usne socha, “Kaun ho sakta hai?”

Is office mein kayi log usse flirt karne ki koshish karte they. Par uski pehli aur aakhri soch Manish par hi ja kar ruki. Manish hamesha se hi use is tarah ke surprises dene mein mahir tha, par yeh poetry wala andaaz unke liye bhi naya tha. Shreya ko yaad aaya ki kaise Manish ne pichli baar use graceful kaha tha, aur card par likha "grace defines elegance" seedha unki taraf hi ishaara kar raha tha.

Shayad yeh unka tareeka tha us din ke liye sorry kahne ke liye. Woh bhi na kabhi kabhi itne direct aur rude ho jaate hai, shayad unhe yehi realize hua hoga baad mein.

Shreya ne apna phone uthaya aur Manish ko ek message likhne lagi. Phir turant hi us message ko delete karke phone neeche rakh diya. Unhe in person hi thank you karna behtar hoga.

Shreya ne vase ko apne desk par achhe se adjust kiya, aur chocolates aur card ko badi hifazat se apne bag ke andar chain khol kar rakh diya. Use achhe se pata tha ki agar chocolates desk par chhod di, toh aate-jaate log hi use prasad samajh kar khatam kar denge, aur woh is tohfe ka ek hissa Rohit ke siwa kisi se kisi ke saath baantna nahi chahti thi. Ek badi si muskaan liye usne finally apna computer on kiya.



Thodi der baad office mein chahal-pahal shuru ho gayi. Shreya ka desk raaste mein padta tha aur kaafi visible tha, aur aaj un taaza tulips ki wajah se toh jaise pura desk chamak raha tha.

Kuch der baad office ki ek-do females, Shreya ke desk par pahuch gayi.

"Shreya Ma'am, kya baat hai! Itne sundar flowers? Aaj aapka birthday hai kya?" Priya ne, jo usse 2-3 saal chhoti thi, bade utsah se poocha.

"Aree nahi Priya, birthday nahi hai... yeh toh bas aise hi," Shreya ne koshish toh ki woh professional lage, par uska blush uska saath nahi de raha tha.

"Bas aise hi? Ma'am, tulips aise hi koi nahi bhejta, kafi expensive hote hain." Megha ne shararat se aankh marte hue kaha. Megha office ki sabse junior ladki thi. "Kal Valentine's Day tha, lagta hai kisi ne belated gift bheja hai madam ko."

Shreya ne thoda ghabrate hue baalon ki ek lat ko kaan ke peeche kiya. "Valentine's Day! Nahi nahi Megha, woh toh tum jaise bacchon ke khel hain. Hum toh kabke purane ho chuke hain in sab cheezon ke liye..."

"Purane?" Megha ne halke se vase ko chhua. "Ma'am, tulips ka matlab hota hai perfect love. Aur jisne bhi bheja hai, uska taste bada classy hai. Bilkul aapki tarah. Kaash mera bhi aisa boyfriend hota!"

"Hah! Love aur main! Woh din toh kabke khatam ho chuke hain." Shreya ne haste hue kaha, par us hasi mein bhi ek halka sa dard tha. Agar uske husband aaj saath hote, toh shayad yeh din aaj bhi maayne rakhta.

"Aise mat kahiye Ma'am, aap toh abhi bhi tees se upar ki nahi lagti ho. Aap bhi second chance deserve karti ho, aakhir Rohit bhi toh ab bada ho gaya hoga." Priya bolte hue vase aur desk ko baareki se dekh rahi thi, jaise ek missing card ya sender ke naam ko dhoond rahi ho. 

Shreya ki muskurahat achanak gayab ho gayi. Aur uski jagah guilt ki ek halki lakeer ne le li. Aise laga jaise un tulips ke khushbu mein kho kar woh Rohit ko dhoka de rahi ho. Usne turant apni nazrein un phoolon se hata kar apne computer screen par tika di. Shreya ko ab un dono ka is tarah vase ko chhoona aur uske desk par nazar daalna achha nahi lag raha tha.

Shreya ne apne pair se apna bag table ke neeche thoda aur sarka diya, jaise woh dono abhi wahan se card nikal lengi. "Card-ward kuch nahi hai, bas phool hain. Chalo ab, kaam par lago sab, ye dekho Rishabh bhi aa gaya apne questions lekar."

Dono ne Rishabh ko dekh apna muh sadaya aur Shreya ko "Bye Ma'am" bolkar wahan se khisak gayi. Shreya ne ek gehri saans li aur wapas apni screen ki taraf dekhne lagi, par uska dimaag ab bhi un phoolon aur us card par hi atka tha.

Rishabh wahan khada raha, jaise kuch bolna chah raha ho par shabd dhoond nahi pa raha tha. Woh bhi un tulips ki taraf dekhne laga. Shreya toh ek second ke liye bhool hi gayi thi ki woh wahin khada tha.

Shreya ne ek gehri saans lete hue khud ko refocus kiya. Usne apni kohni desk par tikayi aur gaal ko haath ka sahara dete hue Rishabh ki taraf dekha. Phir halki si sarcastic muskurahat ke saath boli, "Jee... aap bhi kahiye kuch flowers ke baare mein. Itna ghoor rahe hain, koi security threat toh nahi lag raha aapko inme?"

"Nahi Ma'am... woh... flowers toh achhe hain," Rishabh ne dabi hui aawaz mein kaha. "Kaafi... kaafi fresh hain. Par... flowers jaldi murjha jaate hain. Inhe maintenance ki zaroorat hoti hai. Aap ghar le jaakar roz paani change karte rehna."

Shreya ne ek zor ki hansi chhodi. "Tum na Rishabh, sach mein romance ke dushman ho! Murjha jaate hain? Maintenance? Hadd hai! Koi aur hota toh inki khoobsurti ki tareef karta, par tumne toh yahan bhi ek process bana di."

Rishabh ne ek feeki muskurahat di. "Ma'am, main toh bas... reality bata raha tha. Waise... pata chala kya? Kisne bheje hain?"

"Pata chalne jaisa kya hai isme, Rishabh? Flowers hi toh hain," Shreya ne muskurate hue baat khatam kar di. "Tum batayo, tumne kuch kiya ya nahi Valentine Day par?"

"Nahi Ma'am..." Rishabh ne jhepte hue neeche dekha, "Main toh ghar par hi tha."

"Oh god Rishabh, yehi toh umar hai tumhari..." Shreya ne dekha ki Rishabh aur uncomfortable hota jaa raha tha. Uske haath mein pakdi file yaad dila rahi thi ki woh kisi kaam se Shreya ke paas aaya tha, na ki apni khichayi karwane. "Acha... batayo kya kaam tha?"


Rishabh ne turant woh file Shreya ki taraf bada di. "Haan Ma'am woh... Head Office se ek email aaya tha... woh keh rahe hai ki is policy mein kuch gadbad hai."

Shreya ne apni chair seedhi ki, ab woh wapas apne Manager mode mein thi. "Hmm, dikhayo mujhe. Mujhe pata hai kuch gadbad nahi hogi, bewakoof log bitha rakhe hai unhone headoffice mein. Tumhara transfer karwa du headoffice? Kam se kam ek toh kaam ka insaan hoga wahan."

Shreya ki yeh aakhri baat sun kar Rishabh ke chehre par ek dabi hui muskaan aa gayi, jaise woh is halki si tareef si hi behad khush ho gaya ho.

“Nahi… main kahin nahi jaana chahta, yahin theek hai.” Rishabh ne dheere se kaha.

“Mendek ko bhi kue se bahar nikalna padta hai,” Shreya ne yeh bolte hue uske haath se file kheech li aur apne desk par rakh kar use dhyaan se padne lagi.

Rishabh sarak kar Shreya ke thoda paas aakar khada ho gaya. Wahan khade hue use ek tez khushbu aa rahi thi. Par use samajh nahi aa raha tha ki ye khushbu un tulips ki thi ya Shreya ki.