బృందావనం

[SivaSai]

Part - 63

మీ అత్త వెళ్ళమంటే వెళ్లడమేనా... నాకుగాని.. మీ అమ్మకిగాని చెప్పడం తెలీదా అని కోపంగా అడుగుతాడు. మీరు ముందే చెప్పారు కదా నాన్న.

ఏది అయినా సరే అత్తయ్య చెప్పినట్టే చేయమని. అందుకే అలా చేసాము అని నిషా చెబుతుంది. ఆ మాటకి చాచిపెట్టి చంప మీద కొట్టినట్టుగా అనిపించి గట్టిగా కళ్ళ మూసుకుని తర్వాత ఏం జరిగింది అని అడుగుతాడు.

అప్పుడే ఆనంద్, విహారి మాకు పరిచయమయ్యారు
వాళ్లు కూడా బృందావనం ఫ్యామిలీ అంటే కోపం పగ అని చెప్పారు.

పగ అంటే ఎలాంటి పగ అన్నారు. అది చెప్పలేదు..పోనీ మిమ్మల్ని అడిగారా... అడిగారు అని బుర్ర ఊపుతారు. మీరేం చెప్పారు అంటే...  షార్ట్కట్లో చెప్పాము అంతే అంటారు.

తర్వాత రెండు మూడు సార్లు వాళ్ళ గెస్ట్ హౌస్ కి తీసుకువెళ్లారు. గెస్ట్ హౌస్ కి ఎందుకు వెళ్లారు అని కంగారుగా అడుగుతాడు.

వాళ్లతో పరిచయం పెంచుకుందామని అంతే... చేతులు కలిపితే బృందావనం ఫ్యామిలీని ఈజీగా నాశనం చేయవచ్చు అని చెప్పారు.

ఎలా ప్లాన్ చేసుకోవాలో అని మాట్లాడుకోవడానికి మాత్రమే గెస్ట్ హౌస్ కి వెళ్లే వాళ్ళము.  అలా మాటలు మధ్యన మ్యారేజ్ ప్రపోజల్ తీసుకువచ్చారు.

అప్పుడు కూడా మేము ఓకే అని చెప్పలేదు. వాళ్ళ ఫ్యామిలీ బ్యాక్ గ్రౌండ్ చూసిన తర్వాతే ఓకే అందాము. వాళ్లు మనతో చేతులు కలిపితే మన బలం పెరుగుతుంది. అత్తయ్య పగ తొందరగా తీరుతుంది అని అనుకున్నాను నాన్న అని నిషా అమాయకంగా చెబుతుంది.

ఆ మాటకి శేషాద్రి చెల్లెలు వైపు కోపంగా చూస్తాడు.  మయూరి మాత్రం నిషా,  ఆశ వైపు ఏ భావం లేకుండా చూస్తుంది.

ఒకరోజు మాట్లాడుతుంటే సడన్గా వాళ్ళ తాతగారు ఫోన్ చేసి మాట్లాడారు. కంగారుగా మా దగ్గరికి వచ్చి తాతగారికి చెప్పాము. మిమ్మల్ని తీసుకురమ్మన్నారు.

ఇంట్లో చెప్తాము అంటే..ముందే చెబితే మీరు ఒప్పుకోరు. వెళ్ళొచ్చాక చెబుదాం అని మమ్మల్ని కన్విన్స్ చేసి వాళ్ళ ఊరు తీసుకువెళ్లారు.

దారి మధ్యలో అంతా పడుకునేఉన్నాము. మెలకువ వచ్చేటప్పటికి  వాళ్ళ ప్యాలెస్ లో ఉన్నాము. అది చాలా పెద్ద ప్యాలస్ నాన్న.

ఇప్పటిదాకా మేము అలాంటి ప్యాలెస్ చూడలేదు. వాళ్ళ తాతగారు కూడా చాలా గంభీరంగా ఉన్నారు.  ఆయన మాట్లాడుతుంటే మాకు చాలా భయమేసింది.

ఆనంద్, విహారి కూడా నాలుగడుగుల దూరంలో చేతులు కట్టుకునే మాట్లాడారు. ఎందుకు మీరు అంత భయపడుతున్నారు అంటే.. తాత గారికి కోపం ఎక్కువ.

ఆ బృందావనం ఫ్యామిలీ పతనం అయ్యేదాకా ఆయన అలాగే ఉంటారు అని మాకు చెప్పారు. అదంతా మేము నిజమే అనుకున్నాము.

సడన్గా ఆయన పిలిచి మీ నలుగురికి పెళ్లి అని చెప్పారు.  ఏం మాట్లాడాలో కూడా మాకు అర్థం కాలేదు.  మేము తేరుకునేలోపే.. సర్వెంట్స్ మమ్మల్ని రెడీ చేసి పెళ్లి పీటల మీద కూర్చోబెట్టి పెళ్లిళ్లు చేసేసి రిజిస్ట్రేషన్ చేయించేశారు అని భయంగా చెబుతారు.

అదంతా విన్న మయూరికి అయితే మొత్తం సినిమా అర్థం అవుతుంది.  ఇదంతా రుద్రా ప్లాన్. చాలా పకడ్బందీగా ప్లాన్ చేసి ఇరికించేసాడు.  దీనివల్ల ఇప్పుడు రుద్రకు వచ్చే ఉపయోగం ఏమిటి అని ఆలోచిస్తూ ఉంటుంది.

శేషాద్రి మాత్రం కూతురుతో ఆ గెస్ట్ హౌస్ ఎక్కడో మీకు తెలుసా.. నాకు చూపిస్తారా అంటే హా నాన్న అంటుంది. ముందు మీరిద్దరూ వెళ్లి ఫ్రెష్ అయ్యిరండి.

గదిలోనికి పంపించి తండ్రి, చెల్లి వైపు చూసి.. దయచేసి మీరిద్దరూ ఇంకా పిల్లలు ఇద్దరు జీవితంలోకి రాకండి. బావ గారికి ఏం చెప్పుకుంటారో చెప్పుకోండి మీరు. విసురుగా లోపలికి వెళ్ళిపోతాడు.

గదిలో ఏడుస్తున్న జ్యోతిని చూసి బాధగా పక్కకు వెళ్లి కూర్చుని జ్యోతి అని పిలుస్తాడు. ఆ పిలుపుకి జ్యోతి చాలా కోపంగా చూస్తుంది. తలదించుకుంటాడు.

ఇప్పుడు తలదించుకుని ఏమి ఉపయోగం. ముందు నుంచి చెబుతూనే ఉన్నాను.  మీ పగల మధ్యలోకి పిల్లలని లాగకండి.  వాళ్ళకి ఏమీ తెలియదు.

నా మాట ఎప్పుడూ వినలేదు.  నా చెల్లి చెప్పింది రైట్ అన్నారు. ఇప్పుడు ఏం జరిగింది.  నేను ఇంటిలో ఇంకొక నిమిషం కూడా ఉండను.

నా కూతుర్ని తీసుకుని నేను వెళ్ళిపోతాను అని ఏడుస్తుంది. ప్లీజ్ జ్యోతి ఇప్పుడు దాకా నావల్ల జరిగిన తప్పులు చాలు. ఇప్పుడైనా నా కూతురి జీవితాన్ని నేను చెక్కబెడతాను.

నువ్వు కంగారు పడకు. మీరు ఇప్పటినుంచి మీ చెల్లి, నాన్న చెప్పింది వినడం మానేస్తాను అంటేనే ఇక్కడ ఉంటాను. లేకపోతే నేను వెళ్ళిపోతాను అని కరాకండిగా చెప్పేస్తుంది.

లేదు..  లేదు...  నీకు మాటిస్తున్నాను.  వాళ్ళిద్దరి మాట ఇంక నేను వినను అని చేతులు పట్టుకుంటాడు. హాల్లో కూర్చున్న నాగేంద్ర తల పట్టుకుంటాడు.

ఏంటి మయూరి ఇలా జరిగింది. పిల్లలను అడ్డుపెట్టుకుని అయినా వాడిని సాధించాలి అనుకున్నాము కానీ.ఇలా రివర్స్ అవుతుందనుకోలేదు.

ఇప్పుడు ఏం చేయాలి అని అడుగుతాడు. మయూరి ఏమీ మాట్లాడకుండా మౌనంగా ఉండిపోతుంది. వాళ్ళ అన్నయ్య, వదిన అన్నమాటలు గుర్తుకు వస్తూఉంటాయి.

పెళ్లి, పిల్లలు ఏ పాసం లేని దానివి అని అన్న మాటలే తిరుగుతూ ఉంటే గట్టిగా కళ్ళు మూసుకుంటుంది. వీళ్ళిద్దరూ డిస్కషన్ విన్న  లక్ష్మీ గారు ఇంత జరిగినా మీకు ఇంకా సిగ్గు రాలేదా...

ఇంకా వాళ్ళ పతనం చూస్తున్నారు కానీ..  మన ఇంటిలో పతనం మొదలైంది. ముందు దాన్ని ఎలా సరిదిద్దాలో ఆలోచించండి సిగ్గులేని జన్మ అని తిట్టి వెళ్ళిపోతారు.

ఎప్పుడు నోరు ఎత్తని పెళ్ళాం అలా మాట్లాడేటప్పుటికీ నాగేంద్రకి  బుర్ర గిర్రుని తిరుగుతుంది. వామ్మో నా పెళ్ళామే ఇంత ఎత్తును లెగిస్తే... ఇప్పుడు అల్లుడుగారు వచ్చారు అంటే ఇక నా పని ఏమిటో అని టెన్షన్ తో చెమటలు తుడుచుకుంటాడు.

వీటితో ఏ సంబంధం లేకుండా మయూరి మౌనంగా ఉండి పోతుంది.   ఆశ, నిషా ఇద్దరూ రెడీ అయ్యి వస్తారు. వాళ్ళిద్దర్నీ తీసుకుని శేషాద్రి బయటకి వెళ్ళిపోతాడు.

అక్కడే కూర్చున్న తండ్రి కూతుర్లని మాత్రం పట్టించుకోడు. అది నాగేంద్రకి చాలా కోపం వస్తుంది.కానీ ఏమీ చేయలేక చూస్తూ ఉంటాడు.

కొడుకు చేయి జారిపోతున్నాడా అని మొదటిసారి కొడుకు వైపు నుంచి ఆలోచిస్తాడు.

ఎప్పుడూ కలిసే గెస్ట్ హౌస్ కి తీసుకువెళతారు. ఇదేనా అని అడిగితే అవును మావయ్య అని ఆశ చెబుతుంది. ఇద్దరు వైపు చూసి గేటు దగ్గరకు వెళ్లి వాచ్మెన్ ని పిలుస్తాడు.

అతను బయటికి వచ్చి ఏం కావాలి సార్ అంటే.. ఆనంద్, విహారి లను కలవాలి. అలాంటి వాళ్ళు ఇక్కడ ఎవరూ లేరు అని చెబుతాడు.

ఆశ, నిషా స్పీడ్ గా వచ్చి అదేంటి మేము ఇక్కడ చాలా  సార్లు కలిసాము కదా.. అయినా నువ్వు వున్నావ్ ఏంటి.. ఇక్కడ వేరే వాచ్మెన్ కదా ఉండాల్సింది..

మేడమ్ మీరు ఎవర్ని చూసి ఎవరు అనుకుంటున్నారు. ఎప్పుడు నుంచో నేను ఇక్కడే పని చేస్తున్నాను.  మిమ్మల్ని నేను ఎప్పుడూ చూడలేదు వెళ్ళండి వెళ్ళండి అని కసురుకుంటాడు.

శేషాద్రి కి పూర్తిగా సినిమా అర్థం అయిపోతుంది.వాళ్ళని పట్టుకోవాలి అంటే రుద్ర చెప్పినట్టు వినాలి.రుద్ర ఏదో ఆలోచన చేసే ఇరికించాడు.

అదేంటో తెలుసుకోవాలి అని వెంటనే నేను రుద్రుని కలవాలి అనే అంటాడు. రుద్రను కలవడం అంటే మనకు అపాయింట్మెంట్ ఇస్తాడా అని ఇద్దరు అనుమానంగా చూసుకుంటారు.

ఆశ నిషా ఏమనుకుంటున్నారో అర్థమయ్యి.. పర్వాలేదు.. వాళ్ళ ఆఫీస్ దగ్గరికి వెళ్లి నేను ట్రై చేస్తాను. మీరిద్దరూ ఇంటికి వెళ్ళిపోండి అని పిల్లలు ఇద్దరినీ పంపించి శేషాద్రి జి. బి. సొల్యూషన్స్ దగ్గరికి వెళతాడు.

ఈ ఇన్ఫర్మేషన్ అంతా ఎప్పటికప్పుడు రుద్రాకీ చేరిపోతూనే ఉంటుంది.  రా... శేషాద్రి.. నీకు ఇప్పుడు చుక్కలు చూపించకపోతే నేను రుద్ర దేవాన్ష్ గజపతినే కాదు...
మా అత్త కార్చిన కన్నీటి బొట్టుకు నీ కుటుంబం మొత్తంతో రక్త కన్నీరు కార్పించకపోతే... మా చిన్న మామ కన్నీటికి అర్థమే ఉండదు అని కోపంగా అనుకుంటాడు.

శేషాద్రి మెయిన్ గేటు దగ్గరికి రాగానే సెక్యూరిటీ ఆపేస్తారు. నేనెవరో తెలుసా అని శేషాద్రి కోపంగా అంటే... మీరు ఎవరైనా సరే పర్మిషన్ లేకుండా లోపలికి వెళ్లడానికి లేదు.

మీరు ఇందులో స్టాఫ్ అయినా ఉండాలి లేదు అంటే పర్మిషన్ అయినా ఉండాలి అని క్లియర్ గా చెప్పి లోపలికి వెళ్ళనివ్వరు.  ఎలా వెళ్లాలో అర్థం కాక అక్కడే వెయిట్ చేస్తూ ఉంటాడు.

రుద్ర ఎప్పుడు బయటకు వస్తాడో అప్పుడే క్యాచ్ చేయాలి అని గేటు దగ్గరే పడిగాపులు కాస్తూ ఉంటాడు. ఈ పెళ్లితో మాకు ఎటువంటి సంబంధం లేదు అని చెబుదామా అంటే.. వాళ్ల దగ్గర పక్కా సాక్షాదారాలు ఉన్నాయి.

అవి పట్టుకుని వాళ్ళు ఎక్కడైనా కేసు ఫైల్ చేసిన.. లేకపోతే సోషల్ చానల్స్ లో రిలీజ్ చేసిన పరువుపోతుంది.

పిల్లలు ఇంకా ముందుకు వెళ్లారా అంటే అది తెలియడం లేదు.  ఎలా అని బుర్ర బద్దలుకొట్టుకుంటూ ఉంటాడు.
ఇదంతా లైవ్ చూస్తున్న రుద్రకి మాత్రం మహదానందంగా ఉంటుంది.

వెలిగిపోతున్న రుద్ర ముఖాన్ని చూసి బావ మరదలు ముగ్గురు ఏమైంది బావ అంత ఉత్సాహంగా ఉన్నావు...
మెయిన్ గేట్ కనిపిస్తున్న సిసివైపు చూపిస్తాడు.

అక్కడ శేషాద్రిని చూసి వీడేంటి ఇక్కడ ఉన్నాడు అని అనుమానంగా అడుగుతారు.  ఏదో చాలా టెన్షన్ పడుతున్నాడు.

నన్ను కలవడానికి అని కూల్ గా చెబుతాడు. నిన్ను కలవాల్సిన అవసరం ఏముంది. కూతురు,మేనకోడలు భవిష్యత్తు ఏమిటో అర్థం కాక అని చైర్ లో తిరుగుతూ చెబుతాడు.

నువ్వు ముక్కలు ముక్కలుగా చెబితే మాకు ఒక్క ముక్క కూడా అర్థం కావడం లేదు.  అసలు ఏం జరిగిందో చెప్పు బావా అని ధీరజ్ ఒళ్లో కూర్చుని అడుగుతాడు.

ఒక తోపు తోస్తాడు. కింద పడి బావ నువ్వు నన్ను తోసావు. తోయక ముద్దు పెట్టుకోవాలా.. లవర్ లాగా వచ్చి ఓళ్లో కూర్చుంటున్నావు.

మా చెల్లి లేక నీకు అలకలు ఎక్కువైనాయి... అబ్బో తీర్చడానికి ఆరుగురు బావమరుదులు ఉన్నారుగా అందుకే అలుగుతున్నాను అంటాడు.

ఇంతకీ వాడు గేటు దగ్గర  కాపలా ఎందుకు కాస్తున్నాడు అది చెప్పలేదు అంటాడు.

రుద్ర సమాధానం ఏమిటి..

కథ కొనసాగుతుంది..