Thriller BEHEN_CODE

[Greenwood]

Update 43




Agla Scene — Rahat | Planning Mode ON

Rahat apna laptop khol kar bed par baithi hoti hai.
Screen par ek hi headline baar-baar scroll ho rahi hoti hai:

“International Entrepreneur Conference 2025 — Grand Elite Gathering.”

Wo details open karti hai… venue… guest list… sponsors…
Aur phir ek line par uski nazar jaa kar tik jaati hai:

“Hospitality Partners: City ke Top Hotels & Restaurants.”

Rahat ki aankhon me ek chamak aa jaati hai.

Wo aur deep search karti hai.
Ek aur page open hota hai:

“Waiter & Service Staff Recruitment for Conference Parties.”
Temporary staff… night shifts… private lounges…

Rahat dheere se bolti hai:

Rahat (khud se):
“Matlab sirf VIPs hi nahi…
waiters bhi andar ja sakte hain…”

Wo samajh jaati hai —
andar ghusne ka rasta mil gaya hai.

Turant wo phone uthati hai aur Ishani ko call karti hai.

? Ring… Ring…

Koi response nahi.

Rahat fir se try karti hai.

? Ring… Ring…

Is baar bhi call cut ho jaata hai.

Rahat ka chehra thoda sa irritate ho jaata hai.

Rahat:
“Yaha itni badi baat ho rahi hai
aur madam kahin aur busy hain…”

Wo phone haath me ghumate hue
gehri saans leti hai.

Rahat (determined):
“Koi baat nahi…
yaan tak ka raasta to mil gaya.”

Camera uske focused chehre par freeze hota hai.

Scene Cut.

Agla Scene — Humera ki Colony | Dar ke Saaye Mein Sach


Ishani aur Humera pados ke ek purane se ghar me enter karti hain.
Andar ek choti si bachi floor par baithi khilone se khel rahi hoti hai,
aur ek budhi aurat kone me charpai par baithi hoti hai.

Ghar me ajeeb si khamoshi.

Ishani pyar bhare lehje me aage badh kar bolti hai—

Ishani:
“Amma… main aapse kuch pooch sakti hoon?”

Budhi aurat sir jhukaye baithi rehti hai, bas apni ungliyon ko aapas me ghumati rehti hai.

Ishani dheere se paas baith jaati hai.

Ishani:
“Amma, kya aapko yaad hai…
wo log kaun they jo yahan ghar khali karwane aaye they?
Jo aap sabko notice de gaye they?”

Budhi aurat ek pal ko Ishani ki taraf dekhti hai,
phir nazar jhuka leti hai…
uski aankhon me khauff saaf dikhai deta hai.

Wo kuch kehna chahti hai…
lekin honth kampkampa kar band ho jaate hain.

Choti bachi apni dadi ka haath pakad leti hai.

Ishani uski chuppi samajhne ki koshish karti hai,
aur apna tone aur bhi naram kar leti hai—

Ishani:
“Dekhiye amma… hum security officer wale nahi hain…
na hi kisi ko pareshan karne aaye hain…
bas sach jaan na chahte hain…”

Budhi aurat ka chehra aur bhi zyada sukh jaata hai.
Wo dheere se sir hila kar mana kar deti hai.

Ek shabd bhi nahi.

Is par Humera aage aati hai—

Humera (Ishani se dheere):
“Chhodo Ishani… yeh kuch nahi bolengi…
chalo kisi aur ghar me try karte hain.”

Ishani ek aakhri baar budhi aurat ko dekhti hai—
jaise keh rahi ho “agar himmat ho to…”
phir dono chupchaap ghar se bahar aa jaati hain.


---

Montage Scene — Colony Ki Diwaaren, Logon Ke Band Darwaaze

— Ishani aur Humera ek ke baad ek ghar ke darwaze khatkhata rahi hain.
— Har jagah wahi sawal, wahi khamoshi.
— Kahin se sirf “hum kuch nahi jaante” sunai deta hai…
— Kahin par auratein dar ke maare darwaza zor se band kar deti hain.
— Ek ghar se gusse me awaaz aati hai:
“Humein jeene do! Apna raasta dekho!”

Ab dono gali me khadi aurton se bhi pooch rahi hoti hain.

Ishani:
“Didiyon… kuch to pata hoga na…
kisne dhamki di, kisne notice thamaaya…”

Lekin sab apni nazrein chura leti hain.
Koi kaam me lag jaati hai,
koi bache ko utha kar wahan se hat jaati hai,
koi bas keh deti hai—

“Humein kuch nahi maloom.”

Gali ka mahaul bhari aur bojhal ho jaata hai.

Ishani ka chehra thak chuka hota hai.
Uski aankhon me nirasha saaf dikhai deti hai.

Wo dheere se bolti hai—

Ishani:
“Yahan sab jaante hain…
par koi bolne ko tayaar nahi…”

Humera uske paas aakar uske kandhe par haath rakhti hai.

Humera:
“Chalo Ishani…
yahan kisi me itni himmat nahi hai…”

Dono wahan se chalne lagti hain.

Ishani ek baar piche mudh kar poori gali ko dekhti hai—
jaise har deewar koi raaz chhupa rahi ho.

Tabhi…

Peeche se ek tez, ghabraayi hui awaaz aati hai—

Aurat ki awaaz:
“Rukoooo…!”

Ishani aur Humera achanak ruk jaati hain.
Dono ek saath piche mudhti hain—

Camera freeze hota hai.

Scene Cut.

Agla Scene — Anisha ka College | Shaam ka Waqt


Bell zor se bajti hai— Trinnnnnggg!

Class end hoti hai aur saare students ek saath corridor aur stairs ki taraf nikal padte hain.
Poora mahaul shor, haste-bolte chehron aur bheed se bhar jaata hai.

Usi bheed me Anisha bhi dikhti hai—
denim jacket, fitting blue jeans, aankhon par spectacles, baal thode messy.
Wo dheere-dheere bheed se nikalte hue college ki stairs ki taraf badhne lagti hai.

Tabhi piche se ek awaaz—

“O hello!”

Anisha ruk kar mudh kar dekhti hai— Kabeer.
Wo muskurate hue uski taraf aata hai.

Kabeer:
“Kya madam… itni jaldi me kahaan ja rahi ho?”

Anisha nazar jhukaye hue chalti rehti hai.
Kabeer halka sa daud kar uske barabar aa jaata hai aur dono saath-saath chalne lagte hain.

Kuch pal ki khamoshi ke baad Kabeer poochta hai—

Kabeer:
“Kya hua? Aaj aise chup-chup aur pareshan kyun ho?”

Anisha kuch der chup rehti hai,
phir dheere se bolti hai—

Anisha:
“Kuch nahi yaar…
bas yahi soch rahi thi ki…
kya hamesha sab kuch aise hi chalta rahega is desh me?”

Kabeer uski taraf dekhta rehta hai.

Anisha (thoda teekhe dard ke saath):
“Jo innocent hota hai use hamesha keemat chukaani padti hai…
jo bahadur hota hai use hamesha dara ke rakha jaata hai…”

Kabeer kuch nahi bolta.
Wo bas uska chehra dekhta rehta hai.

Anisha ruk kar kehti hai—

Anisha:
“Forget it…”

Aur phir wo aage badh jaati hai.

Kabeer do kadam rukta hai,
phir fir se uske paas aata hai—

Kabeer:
“Achha… sach batao…
itna sab kyun soch rahi ho?”

Anisha thoda hesitate karti hai,
phir bol deti hai—

Anisha:
“Pata chala hai ki ek farmhouse me koi party hone wali hai…
aur humein shak hai ki Avantika ko wahi rakha gaya hai…
lekin problem yeh hai ki us party me entry ka koi raasta nahi mil raha…”

Kabeer kuch kadam chal kar ruk jaata hai.
Uske chehre par soch ka shadow aa jaata hai.

Anisha usse aage nikal kar chalne lagti hai.

Tabhi piche se Kabeer ki awaaz aati hai—

Kabeer:
“Ek raasta ho sakta hai…”

Anisha ke kadamm achanak ruk jaate hain.
Wo dheere se piche mudhne lagti hai…

Camera uske ruke hue footsteps par freeze hota hai.

Scene Cut.

Agla Scene — Arti ki Library | Dopahar ka Waqt


Library me halki si shaanti thi.
Sirf panno ke palatne ki awaaz aur bahar se aati halki traffic ki gungunahat.

Arti apni table par baithi thi—
pen kaan ke upar atka hua, baal thode bikhre, aankhen sharp, jaise kisi gehri calculation me ho.
Wo register ke page par kuch lines kheenchti, phir unhe kaat deti…
phir khud se hi halki awaaz me bolti—

Arti (mann hi mann):
“Security… entry… disguise… timing…”

Tabhi library ka darwaza khulta hai.

Rahat enter hoti hai.
Wo door se hi Arti ko dekhti hai—
jo khud se baatein kar rahi hoti hai, aur duniya se totally cut off lag rahi hoti hai.

Rahat ko yeh scene thoda strange lagta hai.
Wo dheere se chal kar Arti ke paas jaati hai.
Arti use dekhti tak nahi… apni soch me doobi rehti hai.

Rahat table par ek packet rakhti hai,
phir Arti ke saamne wali kursi par baitth jaati hai.

Packet se kachori nikal kar, ek plate me Arti ko serve karti hai.
Arti tab bhi react nahi karti.

Rahat apni plate set karti hai—
kachori + chutney—
aur bina kuch kahe khana shuru kar deti hai.

Pehla bite le kar wo Arti ko dekhti hai…

Koi response nahi.

Doosra bite… phir bhi kuch nahi.

Aakhir wo kachori chabate hue Arti ke shoulder ko zor se hila deti hai—

Rahat:
“Artttiiiii…!”

Arti poori tarah se chonk jaati hai,
jaise kisi nind se jagi ho.
Wo ghoom kar Rahat ko dekhti hai—

Arti:
“Kya hai kameeni!”

Rahat aankhen sikod kar bolti hai—

Rahat:
“Tujhe kya ho gaya hai?
Itni der se aa gayi hoon…
tere liye kachori laayi, plate serve ki…
aur madam kis duniya me khoi hui hai!”

Arti seedhi baithte hue bolti hai—

Arti:
“Haan, mujhe pata hai tu aa gayi thi…”

Wo shant andaaz me kachori ka ek bite leti hai.

Rahat use ghoor kar dekhti hai…
phir khud bhi chupchaap khane lagti hai.

Room me takreeban do minute ka complete silence.
Sirf kachori ke bite aur chutney ki halki si awaaz.

Phir Rahat,
ab bhi khate hue, casually bolti hai—

Rahat:
“Raasta mil gaya…”

Arti ki nazrein wahi ruk jaati hain.
Wo turant poochti hai—

Arti:
“Kaunsa raasta?”

Rahat ek halki si mischievous smile ke saath apna phone uske saamne rakhti hai—

Rahat:
“Yeh dekh…”

Screen par article open hota hai—
International Entrepreneur Conference ke liye party staff aur waiters appoint ho rahe hain.

Arti phone haath me le kar dhyaan se article padhti hai.
Phir bolti hai—

Arti:
“Hmm… haan yaar… yahaan saaf likha hai ki waiters hire ho rahe hain…”

Rahat turant uski baat kaat kar bolti hai—

Rahat (teekhi smile ke saath):
“Aur ek sundar, sexy waiter to apne paas pehle se hi hai…
Ishani.”

Arti ke chehre par devilish smile aa jaati hai.

Rahat sigh karte hue bolti hai—

Rahat:
“Bas us waiter se baat hi nahi ho pa rahi…
Subah se kam se kam paanch baar call try kar chuki hoon…
madam call pick hi nahi kar rahi hai.”

Arti shant andaaz me bolti hai—

Arti:
“Maybe wo aaj bahut busy hai…”

Rahat eyebrows utha kar—

Rahat:
“Itna busy?”

Tabhi Arti ka phone zor se ring karta hai.

Wo phone uthati hai—
Screen par naam flash hota hai: “ISHANI”

Arti aur Rahat ek dusre ko ek saath dekhte hain.

Phone abhi bhi ring ho raha hota hai…

Camera slowly Arti ke phone screen par zoom karta hai.

Scene Freeze.

Agla Scene — Anushka ka Bank | Afternoon Shift


Bank ka floor usual tarah se busy tha —
keyboard ki tapping, printer ki awaaz, aur customers ki halki-halki baatein.

Anushka apni chair par baithi thi,
computer screen par kisi client ka data check karte hue
aur saath-hi-saath phone ko shoulder aur kaan ke beech daba kar baat kar rahi thi.

Uski awaaz professional thi, lekin tone me samajh aur empathy bhi—

Anushka:
“Yeahh… yeahh, Mrs. Singh…
Haan, main jaanti hoon ki aapki shaadi kin circumstances me hui hai…
pehle woh saare incidents… aur upar se interfaith marriage…
I understand ki aapko kya-kya jhelna pada hoga…”

Wo screen par details scroll karti ja rahi thi.

Anushka:
“Of course, we care about our customers…
lekin aap bhi samajhiye, hum itni jaldi policy end nahi kar sakte…
yeah… yeah…”

Wo thoda ruk kar file me ek entry check karti hai.

Anushka:
“Mr. Singh se meri baat ho chuki hai…
yes, yes…”

Phir halki si thakaan ke saath—

Anushka:
“Theek hai, main check karungi
agar kuch ho paata hai to main aapko update kar dungi…”

Phone cut ho jata hai.

Anushka chair par thoda peeche hoti hai,
ek gehri saans leti hai aur halke gusse me badbadati hai—

Anushka (khud se):
“Kya ho gaya hai in logon ko…
agar interfaith marriage ki to samaj ka kaunsa bhala-bigaar diya hai?
Surname Qureshi se Singh hi to lagaya hai…”

Wo keyboard par phir se ungliyan chalane lagti hai.

Anushka (mann hi mann, thoda sarcastic):
“Ab in logon ke lafde suljhaun…
ya kisi killer se apni zindagi bachaun…”

Wo halka sa muskurati hai,
jaise apni hi kismat par hasti ho,
aur phir se poori tarah apne kaam me doob jaati hai.

Computer screen par data scroll hota rehta hai…
bank ki awaazon ke beech Anushka apni duniya me kaam karti rehti hai.

Scene End.