05-10-2025, 09:25 AM
Yaaden aur barsaaten
Maahijaan Baarish rukte hi log barsaati keedon ki tarah sadkon par nikal aaye. May aur June ki chilchilaati dhoop aur aur bheeshan garmi ke baad ye pahli baarish thi jo raat se lagataar ho rahi thi. Aisa lagta tha jaise duniya ke sabhi kaarobar band ho gaye hon. Sadken sunsaan thin aur paani se bhari huyi galiyon me nangdhadang ladke nahaate shor machaate idhar udhar bhaag rahe the.
Magar ab baarish rukte hi log gharon, daftaron aur barish se bachne ke liye pedon aur chhapparon ke niche ruke huye log nikal kar sadkon par chal pade the.
Nilam ne khidki se baahar jhaanka. Campus ke sabhi hostels ki imaaraten dhuli dhulaayi bahut achhi lag rahi thin. Baahar har taraf hariyaali bikhri huyi thi. Har taraf taajagi ka ehsaas ho raha tha.
Nahar ke kinaare dhule dhulaaye hare bhare ped aankhon ko thandak de rahe the. Pedon ke niche baithi rang birange dress me ladkiyaan mausam ka aanand le rahi thin. Unke rangeen aanchal hawa se lahraate huye indra-dhanush ki chhata bikher rahe the.
Uska man ekdam se chaaha ki nahar ke kinaare kinaare door tak ghooma jaaye. Ye sochte hi wo apna kamra band kar ke baahar nikal aayi. Nahar ki or jaate huwe thandi hawa ke jaaduyi jhonke usay apne chehre ko pyar se thapthapaate hue mahsoos hue aur wo ek anjaane se nashe me mast si iss deewana bana dene waale mausam ke maze ka anubhav karte hue chalti rahi. Aur phir pata nahin kab Viren uske paas aa gaya.
"Hello Nilam."
"Hello." Nilam ne hairat se usay dekha. Kyon ki iss mastani rutt ko apne bhitar sanchit karne me badha usay ekdam se achha nahin laga. Wo akele ghoomne me adhik anand leti thi. Jab sochen aazad hotin aur koi bhi un me baadhan utpann nahin kar sakta.
Viren uska class-mate tha. bahut mehnati aur intelligent student tha. Dheele se t shairt aur pants me baal bikhraaye huye laparwaah sa jo har samay kuchh sochhta sa lagta tha.
"Aap akeli kahaan jaa rahi hain?" wo sath ho liya.
"Aaj ke mausam ki sundarta aur thandak ko enjoy karna chaahti hun."
"Akele hi?" us ne puchha.
"Haan, mujhe akele hi achha lagta hai."
"Magar....." wo atyant dheeth ki tarah sath chalta raha. "Mujhe bhi akela rahna pasand hai, magar aaj nahin."
"Wo kyon?"
"Aaj dil chaah raha hai ki in pedon tale(niche) baith kar kisi se dher saari baaten karun."
"Kya baaten karna chaahte hain aap?"
"Har topic par. Duniya ke har subject par."
"Achha."
"Aap bore to nahin ho rahin?"
"Agar haan kahun to aap chale jaayenge?"
"Nahin."
"Kyon?"
"Main padhte padhte thak gaya hun.....aur ab ghoomna aur baaten karna chaahta hun. Magar kisi achhe sathi ke sath."
"Ohh....to koi dost nahin mila?"
"Hain to bahut.....magar aaj main yahi soch kar nikla tha......"
"Kya.....?"
"ki aap mil jaayen."
"Wo kyon?"
"Pata nahin. Dil chahta tha."
"Aap ka dil jo bhi chaahe wo aap kar lete hain?"
"Haan.....jo mere wash me ho.....zaroor karta hun."
"Ab aap ka dil kya chaah raha hai?"
"Ab.....?" wo soch me doob gaya. "Ab dil chaahta hai ki zoron ki baarish ho.....aur ham donon aise hi door tak chalte rahen."
"Phir?"
"Phir ye ki khoob bheeg jaayen."
"Aap ki ye ichha to ab poori nahin ho sakti."
"Aisa kyon?"
"Isliye ki baadal chhant chhuke hain.....aur baarish ki koi sambhavana nahin hai."
"Arre....is par to mera dhyan gaya hi nahin." Viren ne kaha aur donon ek sath hans pade. Phir der tak dhuli dhulaayi saaf suthri kaali sadak par paani me chaand ki chhawi dekhte hue chalte rahe. Yahaan tak ki jhaadiyon me jugnuon ki aankh micholi shuru ho gayi aur wo apne apne hostel laut aaye.
Phir ye roz ki routine ban gaya. Jab bhi sham ko Nilam ghoomne nikalti Viren raaste me mil jaata.....aur donon der tak chalte raht ka-pade. mwb5ctopic par baaten kart kaLiterature, tourism, religion, art jaise topicska-abhi kabhi kisi vishay par donon me jhadap bhi ho jaati. Jab kabhi chalte chalte thak jaate to nahar ke kinaare canteen me baith kar garm garm chai ka anand lete.
Aise hi bahut se din beet gaye. Viren se milna. Nahar par ghoomna aur bahas karna hobby sa ban gaya tha. Kyon ki wo thoda alag tarah ka ladka tha. Ladki ko dekh kar shayari karne waale logon me se nahin tha. Us ne baaton ke bich kabhi bhi Nilam ke vyaktitva me ruchi nahin prakat ki thi. Yahi kaaran tha ki us ke nikat rah kar wo khud ko surakshit samajhti thi.
Ek din hamesha ki tarah wo donon chalte hue door nikal gaye. Na jaane achanak kahan se baadal uthe aur aur aakash me har taraf chhaa gaye. Badi zordaar baarish shuru ho gayi. Ye barsaat ka mausam bhi vichitr hota hai. Abhi dhoop abhi chhaon. Aur kabhi kabhi to dhoop mr bhi baarish hone lagti hai.
Bachpan me suna tha jab kisi geedad ki shadi hoti hai tab dhoop me baarish hoti hai. Pata nahin is baat me kahan tak sachayi hai. Anyway ye khoobsurat mausam jisay barsat kahte hain kabhi kabhi kasht-dayak bhi ban jaata hai. Nilam achanak baarish ke iss hamle se ghabra gayi. Door door tak kahin bhi panaah ki jagah nahin thi. Wo hostel se bahut door nikal aaye the. Isliye bheegna to tha hi......aur donon achhi tarah bheeng gaye.
Jab mittee se sondhi sondhi baas uth kar hawa me phailne lagi to sardi se kaanpte huwe Nilam ne Viren ki taraf dekha......jo dhyan magn sa usi ki taraf dekh raha tha. Uske chehre par alag si swapnil sa bhaav chhaya hua tha. Us ne kareeb aate huwe kaha "Tum bohot haseen ho."
Nilam ghabra gayi.
"Ye tumhen kya ho gaya hai Viren?"
Wo kuchh na bola magar uske hathon ki garmi se Nilam jaise mad-hosh si ho gayi......lekin phir ekdam usne khud par kaabu paa liya.
"Nahin nahin.......aisa nahin ho sakta. Main ne tumhare baare me aisa nahin socha tha."
Ye kah kar us ne bhaagna shuru kar diya. Viren ki garam garam saansen usay apne kandhe par mahsoos ho rahi thin.....aur wo sarpat daud rahi thi. Viren chakid evam lajjit sa wahin khada raha.
Nilam apne kamre me pahunch kar bed par gir gayi. Wo sardi aur bhay se der tak kaanpti rahi.
Us din ke baad us ne sham ko baahar jaana bilkul chhod diya. Viren se department me mulakat hoti aur khamosh nigaahon se usay dekhta rahata. Magar Nilam ko us se nafrat ho chuki thi. Culture, art aur literature ki baaten karne waala Viren bhi bilkul aam sa mard hi nikla. Jo lakh badi badi baaten kare magar unka maksad ek hi hota hai.......jo har ladki ko kewal ek hi tarah se dekhte hain.....jo aurat ko ek khilauna samajhte hain.
Iss collage me uska antim saal tha. Exam ke baad wo ghar chali gayi. Jaldi hi uski shadi ho gayi. Jeevan ek nayi dagar par chal nikli. Jis me koyi halchal nahin thi.....kuchh bhi aakarshan nahin tha.....kuchh husn nahin tha. Sab kitaaben aur degreeyan almariyon me band ho kar rah gayin. Ghar ke kaam kaaj karna.....desh ki aabadi badhana.....aur chaahte ya na chaahte huye bhi pati ke bagal me so jaana.
Sardi garmi ya barsaat......sab mausam aate aur apna apna rang dikha kar chale jaate. Jab kabhi usay ghar ke kaamon se fursat milti to balcony me chair par baith kar aankhen band karti aur har baar jaane kahan se Viren chala aata.
Us pal uske dil me bahut tez ichha paida hoti ki bahut zoron ki baarish ho.......aur wo donon ek baar phir usi tarah bheeng jaayen. Viren phir se wahi icchha zaahir kare......aur wo bhaagne ke bajaaye us ke seene se lipat jaaye. Yahan tak ki unke jismon se uthti huyi mahak ek dusre me ghul mil jaaye................usi pal uske sasur ki aawaz aati "Bahuu......ek cup chai dena....." aur sapna phir se toot jaata aur wo bhaari kadmon se kitchen ki or badh jaati.