Xossip Ultimate Story Contest 2014

[Expert]

Mujhe Neend Nahi Aati…

rajmohit

Mujhe neend nahi aati. Aur aati hai to bure sapne aate hain. aur main phir se uth jaata hun. saari raat main bistar par karvate le kar gujaarta hun. Aap soch rahe honge ki aisa kyon karta hun main. Kya main paagal hun. Ya phir mujhe koyi maansik bimari hai.

Paagal tha to nahi main aur na hi mujhe koyi maansik bimari thi. magar peechhle ek saal se mujhe aisa lagta hai ki main paagal bhi ho gaya hun aur maansik rogi bhi. Aap hans rahe honge meri baat par. Paagal aur maansik rogi, ek hi to baat huyi. darasal mujhe pata hi nahi hai ki main kya kah raha hun. Shayad neend na aane se aisa hi hota hai. aur mujhe to ek saal ho gaya hai. Mujhe bilkul neend nahi aati. Aur aati hai to bure sapne aate hain. aur main phir se jaag jaata hun. Ye yu hi chalta rahta hai. bina ruke.

Har vakt mera deemag chalta rahta hai. har vakt. Ek pal ko bhi man mein shaanti mahsus nahi hoti. Agar aisa hota to shayad main so paata. Kaash aisa ho pata. Magar man to rukta hi nahi. Sona hi nahi chaahta mera man. Baar-baar mujhe us car mein baitha deta hai, jisme main kabhi bhi khud ko baithe huve sochna nahi chaahta. Bahut koshis karta hun main ki rok lun in vicharo ko magar mere bas mein mera man nahi hai. ye man jab picture chala deta hai to mujhe dekhni hi padti hai aur main dara sahma, dil thaame sab dekhta rahta hun. Abhi bhi picture phir se start ho rahi hai. ek baar phir se. aur main ja raha hun phir se vahi jaha main jaana nahi chaahta.

Suraj dub raha tha dheere-dheere. Magar dubne se pahle vo akaash mein baadlo ko santri rang mein rang raha tha. Car daudi chal ja rahi thi sadak par. Main car mein baitha suraj ki chitrakari dekh raha tha. Main agli seat par vicky ke saath baitha tha. Peechhe tushar aur rohan baithe the. un teeno ne khub pee rakhi thi. main vaise nahi peeta magar kyonki aaj vicky ka birthday tha, uske kahne par ek gilas maine bhi chadhaya huva tha. Nasha sa ho raha tha mujhe bhi, halanki sirf ek hi gilas piya tha maine. vicky bhi jhum raha tha car chalaate vakt magar phir bhi bade achhe se car chala raha tha vo. pura expert driver tha vo.

Achanak tushar cheellaya peechhe se. “arey vicky gaadi slow kar. kya maal hai yaar. Jara jee bhar ke dekh lene de.”
Maine hairani se baahar dekha. Ek ladki footpath par chali ja rahi thi hamse opposite disha mein. Kaano mein earphone tha uske. Shayad koyi gaana sun rahi thi. kandhe par purse tanga huva tha. shayad 21 ya 22 saal ki hogi.
“by god badi sunder ladki hai yaar. Ise propose kare,” rohan ne kaha.

“chal main car rokta hun. Tu propose kar car se nikal kar,” vicky ne kaha.
“arey jaane do na yaar. Kyon paresaan karna bechari ko,” maine virodh kiya.
“abe chup saale. Teri to ladki dekhte hi phat jaati hai. lagta hai teri suhaagraat pe teri biwi ki bhi hami logo ko bajani padegi. Tu to sharmata rahega uske kamre mein jaane se,” tushar ne kaha. Sabhi hans pade uski baat par. Main chup ho gaya.

“arey lene de na maje yaar. Kya pata ladki maan hi jaaye,” vicky ne kaha aur car rok di.
Rohan car se baahar nikla aur baalo mein haath maarta huva bola, “excuse me, aapka naam jaan sakta hun.”
“go to hell,” ladki ne kaha. Vo aage badhne hi wali thi ki rohan ne uska haath pakad liya aur bola, “hell ka rasta to bata dijiye. Jarur chala jaaunga vahi. Aap na mili to ye duniya kis kaam ki.”

“haath chhodo mera,” ladki cheellayi.
Mujhe andesa ho raha tha us vakt ki kuchh bura hone wala hai. aisa jo nahi hona chaahiye. Rohan haath nahi chhod raha tha uska aur ladki aag babula ho rahi thi. baat sahi bhi thi. aise kaise koyi kisi ka haath pakad sakta hai bina jaan pahchaan. Aur phir vahi huva jiska dar tha. ladki ne thappad jad diya rohan ke gaal par us se haath chhuda kar kisi tarah aur boli, “bastard.”

Rohan apna sa muh lekar car mein aa gaya. Gaal to uska laal tha hi ladki ke thappad se, uski aankhe bhi laal thi.
“chal vicky, jaldi nikal yaha se,” maine kaha.
“nahi vicky. Car ghuma. Saali ko sabak seekhana hai,” rohan ne kaha.

“kya baat kar rahe ho rohan…,” maine muh khola hi tha ki rohan ne haath deekhaya mujhe aur bola, “tu chup rah. Tu nahi samjhega ye.” Phir usne vicky ke kandhe par haath rakha aur bola, “Vicky yaar thappad maara hai usne. chal utha lete hain saali ko aur aisa sabak seekhayenge ki yaad rakhegi. Bolo kon-kon hai mere saath.”

“baat to sahi hai teri. Saali ko thappad nahi maarna chaahiye tha. mujhe bhi bahut gussa aa raha hai,” vicky ne kaha.
“to soch kya raha hai. ghuma car ko. Moka dekh kar kheench lenge car mein use,” rohan ne kaha.
“haan-haan ghumao car ko. Saali ko sabak milna hi chaahiye,” tushar ne kaha.
Vo teeno ek hi bhasa bol rahe the.

Mujhe nahi pata ki agar vo hosh mein hote to ye baate sochte bhi ki nahi. Aisi situation kabhi aayi nahi thi pahle. Haan itna jarur tha ki vo sharab ke nashe mein kuchh jyada hi aggressive ho gaye the.
Vicky ne car ghuma li aur laga di ladki ke peechhe. Andhera ghir aaya tha. mujhe bahut dar lag raha tha. kaise samjhaun unhe kuchh samajh nahi aa raha tha. Lekin phir bhi maine ek aur koshis ki. “yaar rohan jaane de na. usko uski galti ki saja khud ba khud mil jaayegi. Jyada sentimental mat ho.”

“abe chup phattu. Chupchap baitha rah,” rohan cheellaya aur phir vicky ke kandhe par haath rakh kar bola, “car bilkul uske paas rokna. Main use sorry bolne ka naatak karunga aur moka dekh kar ander kheench lunga. Tu bas tej bhaga lena gaadi ko uske baad. Jitna ho sake utna tej.”

Jaise koyi shaitan rohan ka saath de raha tha. jaisa usne socha tha bilkul vaisa hi huva. vo ladki ko sorry bolne ke liye baahar nikla aur phir moka dekh kar uska muh daboch liya. Tushar ne madak ki use ander kheechne mein. Ye sab itni jaldi huva ki kisi ko pata hi nahi chala ki kuchh ajeeb huva hai. vaise bhi andhera ho gaya tha aur vaha aas paas koyi dekhne wala nahi tha. tabhi to mujhe aisa lag raha tha ki shaitan saath hai rohan ke.

“chhodo mujhe…help!” ladki cheellayi. Magar tab tak vo ander aa chuki thi. darvaje band ho chuke the.
“vicky chal dauda jaldi yaar,” rohan cheellaya.
“hey car roko…roko abhi,” ladki cheellayi.
“chup kar…ye car nahi rukegi ab. mujhe thappad maara tha na tune. Ab dekh tera kya haal hota hai,” rohan ne kaha.

“ise lekar kaha jaana hai vo to batao. Koyi jagah to hai nahi apne paas,” vicky ne peechhe gardan ghuma kar kaha.
“jungle mein le chalte hain na. us se achhi jagah aur kaha milegi,” rohan ne kaha.
“haan-haan jungle theek rahega,” tushar ne kaha.
“bachao….help,” ladki cheellayi.

“tushar rumal de yaar tera. Iska muh band karna padega. Bahut cheella rahi hai saali,” rohan ne kaha.
“yaar ye kya ho gaya hai tum logo ko. Yaar jaane do ise. Ye sab theek nahi hai,” maine kaha.
“isne jo thappad mara tha vo theek tha kya,” rohan ne uske muh par rumaal baandhte huve kaha.

Meri nazre takrayi ladki ki nazro se. vo ummeed bhari nazro se meri taraf dekh rahi thi. nahi bhul pata hun main uski ye nazar. Mera dil ro padta hai. vo nazre mujhe abhi bhi puchhti hain ki maine kuchh kyon nahi kiya. Abhi bahut kuchh ho sakta tha. magar kuchh nahi kiya maine. Kya main dosti ke kaaran chup tha. pata nahi. Is baat ka jawab nahi hai mere paas. Javab hota to shayad main so pata chain se. yahi to problem hai meri. Mere ander se hi baar-baar aise sawal uthate hain jinka mere paas jawab nahi hota. Aur isi kaaran mujhe neend nahi aati. Aur aati hai to bure sapne aate hain. aur main phir se jaag jaata hun.

Khair abhi main kyon phir vahi baat kar raha hun. Ye to maine pahle hi bata diya tha ki mujhe neend nahi aati aur aati hai to bure sapne aate hain. please meri kisi baat ka bura mat maanana. Neend ki kami se main kayi baar bahak jaata hun. Muddo se bhatak jaata hun. Please try to understand me. Chaliye vaapis car mein chalte hain.

Rohan aur tushar aisi-aisi harkate kar rahe the bechari ladki ke saath ki main bata nahi sakta. Vo chhatpata rahi thi. aankho hi aankho mein unse request kar rahi thi rukne ki kyonki muh se vo bol nahi sakti thi kuchh.
“vicky yaar samjha na tu inhe,” maine vicky se kaha. Ek aur koshis thi meri taraf se ye.
“chup kar na yaar. Mood khraab mat kar. achha maal haath laga hai. vaise bhi mera birthday hai aaj. Thoda enjoy karna to banta hai.”

Car kab jungle pahuch gayi pata hi nahi chala. Bas aage nahi bata paaunga. Bahut muskil kaam hai aage ka varnan mere liye. Shabd bhi nahi milenge mujhe vo sab batane ke liye. Vaise bhi main koyi writer to hun nahi. Aur na hi mera deemag theek se kaam kar raha hai is vakt. Aap yakin kijiye. Ek saal ho gaya hai aisa hote huve. Mujhe neend nahi aati. Aur aati hai to bure sapne aate hain. kya aapke saath huva hai kabhi aisa. Mere saath to ye roj ho raha hai.

Chaliye ek baat to aapko bata hi deta hun. Vo ladki mar gayi vahi jungle mein. Dusri baar apni hawas ki pyas bhuja raha tha rohan uske saath aur is baar uska gala dabaye huve tha vo. jab tak vo apni hawas shaant karke uske upar se hata, tab tak vo dam taud chuki thi.

Us vakt main vahi khada tha. ped ke paas. Sab dekh raha tha main. Bas dekh raha tha. kaash na dekha hota ye sab. Kyonki ab mera deemag baar-baar deekha raha hai mujhe ye sab. Roj deekha raha hai. main dekhna nahi chaahta, phir bhi deekha raha hai. yahi kaaran hai ki mujhe neend nahi aati. Aur aati hai to bure sapne aate hain. aur main phir se jaag jaata hun.

Agle din jungle mein laash mili ladki ki. Magar abhi tak uska bang karne wale aur uski jaan lene wale pakde nahi gaye hain. uske ma baap nyay ki aash mein bhatak rahe hain. aksar unki tasvir mere man mein aa jaati hai. dono tv par haath jod kar nyay ki fariyaad kar rahe hain. jab bhi ye tasvir man mein aati hai to ro padta hun. Aur main puchhta hun khud se ki kya main abhi bhi kuchh kar sakta hun. Javab dhundhla sa aata hai. haan hai ya na hai samajh nahi aata. Aap soch rahe honge ki aisa kaise. Aap samajhne ki koshis nahi kar rahe shaayad. Ek saal ho gaya hai. mujhe neend nahi aati. Aur aati hai to bure sapne aate hain.

Lekin aaj main ye sab yahi khatam karne ja raha hun. Ab dekhta hun ki neend kaise nahi aati. Jahar pee liya hai maine. Ab dekhte hain ki neend kaise nahi aati. Hahahaha. Maine hara diya apne deemag ko. Saala tham hi nahi raha tha. ab maut ke baad to thamega na.

Lekin aapse ek request hai. maine ye jo kuchh likha hai vo security officer ko de dena. Saja milni chaahiye vicky, rohan aur tushar ko. Aur neha ko insaaf milna chaahiye. Aap soch rahe honge ye neha kon? Neha hi to naam tha us ladki ka. kya mujhe pahle batana chaahiye tha ye naam? Sorry galti ho gayi. Main bhi kya karun. Ek saal ho gaya hai. mujhe neend nahi aati. Aur aati hai to bure sapne aate hain.

Lekin ab aisa nahi hoga. Jahar kaam kar raha hai. meri aankhe band hone ko hain. main sone ja raha hun. Aisa lag raha hai ki kayi saal ho gaye soye huve. Maine apna naam bataya ki nahi aapko. Pata nahi bataya hai ki nahi. Mera naam gagan hai. mujhe bilkul achha nahi lagta ye naam. Lekin ab kya farak padta hai. ab sab khatam hone ja raha hai. ab main sone ja raha hun. Hamesa hamesa ke liye sone ja raha hun. Aah badi pyari neend aati ja rahi hai. finally main sone ja raha hun. Good night.

______________________________
LAAL HAWELI story is closed for time bieng as I am not able to write further updates due to some personal engagements. Sorry Friends