Xossip Ultimate Story Contest 2015

[Expert]

ADHURI TASVEER

Anoopsharma24

Uff kitni garmi hai yaha, tumhe yaha rukne ke liye kaha kisne tha lekin tum to sirf mujhe takleef dena hi jante ho.
( Rashmi ne rumal se apne maathe ka pasina ponchne ke baad usi rumal ko apne chehre par pankhe ki tarah jhalte huye mujhe tana mara aur mai jhunjhla gaya. pichle teen ghante se mai bina ruke driving kar raha tha badi mushkil se is sunsan highway par ye dhaba dikha to kuch sans lene ko ruk gaya.)

Mai- to maharani ji apko yaha baithne ko kisne kaha jayiye gadi me hi ac chala kar baithiye.
Rashmi- ha tum to chahte hi yahi ho ki mai bhukhi maru, agar itni hi nafrat hai to sath laye hi kyu the. mai to sirf is liye bardast kar rahi hu ki tumhare sath ye mera akhiri safar hai.
( uff kya batau mera man to apne baal nochne ka hone laga, mai Anoop sharma peshe se ek lekhak hu aur ye mohtarma meri durbhagyshali patni hain aur ye mujhe pyar itna karti hai ki agar bas chale to mujhe tanduri murga bana kar chaba jaye. waise bhavnaye meri bhi inke prati kuch aisi hi hain. ye apne dushman se bhale hi pyar se baat kar le lekin mere sath na ji na shayad koyi kasam le rakhi hai.

lekin hamesha se aisa nahi tha collage ke dino me ye meri likhi kavitao ki sabse badi prasansak thi, aur mai prasansak tha inki khubsurti ka. na jane kitni hi kavitaye maine inke chandraroop ko kendra bana ke likhi thi, aur puraskar ke roop me inhone bhi na jane kitne durlabh chumban mujh par kurbaan kar diye. vastvikta dekhi jaye to inhone mujhe prem hi meri kavitao ke karan kiya tha aur ye meri lekhni ki kayal thi. kahti thi Anoop jiske shabdo me itna prem bhaw ho itna dard ho wo apne jivan me kitna sanvedansil aur prem se bhara hoga, agar tum mere jivan sathi ban jao to mai dhanya ho jaaungi. aur mai ek mragnaini swapnsundari jo mujhe itna prem karti thi use pa kar foola nahi sama raha tha.
aur aaj hamari shadi ke sirf 18 mahine baad hi ham talak le rahe hain , lekin talak se pahle antim baar dosto ki jid par 10 din ki cchutiyo par nikle hain. shayad dosto ka ye maan na hoga ki yadi ham ghar se door ek sath kuch waqt bitaye to kuch baat ban jaaye, lekin wo nalayak nahi jante jo log dil se door ho jate hain unhe wapas paas nahi laya ja sakta.

lekin isme poori galti Rashmi ki bhi nahi hai chatra jivan( student life) atyant nischal aur doshrahit hota hai, chatra jivan ke prem me samaj ki burayiya nahi hoti kyuki us samay samaj ka hamare jivan me jyada dakhal nahi hota lekin chatra jivan ka ant yani samajik jivan ka aaramb . agar aap samaj ko apnaoge to us ki buraiya kuch to asar dalengi hi na aap par.
Rasmi- kya karu mai is inshan ka kya yaha isi dhabe par hi 10 din bitane ka irada hai? ya aage bhi chalna hai?
( mai ek lambi saans chodte huye uth khada hua, aur bill ada kiya tab ek baar fir safar arambh hua. mai Rashmi se ham dono ke bare me ek baar aur baat karna chahta tha.)

Mai- Rashmi! mai tumse kuch baat karna chahta hu.
Rashmi- kis bare me.
Mai- hamare bare me.
Rashmi- ab kisi baat ka kya matlab bacha hai, kya tum fir se wahi purani bahas suru karna chahte ho. tumne us samay mujhse baat kyu nahi ki jab mere office me meri promotion ki party me na akar tumne meri beizatti ki thi.
Mai- mai bhul gaya tha.
Rashmi- to us samay baat karni thi jab tumne meri bahen ki shadi me use do kaudi ki book gift karke meri hansi udwayi thi. log kitne beshkimti tohfe laye the aur tum.... tum...
Mai- mai lekhak hu mere liye books hi sabse adhik keemti hain.

Rashmi- tum aur tumhari books, mujh ko dene ke liye to tumhare paas do minute nahi hote aur khud pen liye ghanto akele me na jane kya utpatang likha karte ho.
Mai- yahi utpatang kabhi tumhe swarg ke geet laga karte the.
Rashmi- tabhi to aaj pachta rahi hu, aur ab mai aur pachtana nahi chahti.
( mai samajh gaya ki rashmi se baat karne ka koyi fayda nahi niklega, ab baat bahut aage ja chuki hai shayad ab wapis nahi muda ja sakta. maine chuppi saadh li hamara safar aise hi chalta raha bina ek dusre se baat kiye. kabhi -2 to lagta ham sath ja hi kyu rahe hain.
khair ek thaka dene wale safar ke baad ham jaisalmer pahunche, aur ek hotel me ruk gaye. kahne ko to ham cchutiyon par aaye the par yaha bhi hamara jivan waisa hi tha dono chupchap ek dusare se anjane ekaki jivan ji rahe the, yaha tak ki ek hi kamre me ek sath rahne par bhi hame ekdusre ka ahsas tak nahi tha. aise hi teen din gujar gaye aur ham usi kamre me band rahe, hotel se bahar nahi nikle.

chauthe din mai kuch idhar udhar ghumne ke irade se hotel se bahar nikla, maine kisi se suna tha ki yahi kahi mahothi naam ka ek gaon hai waha aranya devi ka mandir hai aur kaha jata hai ki agar koyi premi joda athva dampati waha pahunch kar darshan kar leta hai to uske jivan ki sabhi samasyaen khatm ho jati hain. hotel se bahar akar maine ek sajjan se is baare me puchtach ki to pata chala ki wah jagah yaha se karib 210 km ke aaspaas hai aur rasta bhi kafi beehad hai. maine soncha agar 50km/ghante ke hisab se bhi chala gaya to panch ghante me waha pahunch jaunga, lekin mukhya samasya Rashmi ko sath le ja paane ki thi.

mai hotel wapis aaya aur taiyar hone laga, Rashmi bhi asani se chalne ko taiyar ho gayi ye baat alag thi ki maine use yah nahi bataya tha ki mai kaha ja raha hu, usne soncha ki kamre me wah bor ho rahi hai to kyu na kuch samay bahar hi bitaya jaye. laboluwab ye ki karib 12 baje ham apni gadi se nikal liye lagbhag 40 km tak to sabkuch sahi raha lekin uske baad jo rasta samne aaya us par 30 ya 35 ki speed me chalna bhi mushkil ho raha tha aur yahi wo samay tha jab Rashmi ke pravachan prarambh ho gaye the, lekin mai us par dhyan nahi de raha tha. aise hi lagbhag 5 ghante beet gaye aur ham abhi bhi apni manjil se 70 se 80 km door the aur Rashmi, jo ki apni zahrili baato se mujhe bhun chuki thi ab mujhe khane ki taiyari kar rahi thi. tabhi meri gadi ne ek do jhatke liye aur band pad gayi. sham ke lagbhag 6 baj chuke the aur is samay is beehad ilake me aisa hona kisi bure sapne se kam na tha.

idhar rashmi ne bakayda tandav karna shuru kar diya tha, mai gadi se niche utra aur apne charo or najar daudayi, lagbhag 500 meter dur mujhe kuch mitti ke bane ghar dikhai diye ' dubte ko tinke ka sahara' maine rashmi ko awaaj di aur un gharo ki or chal diya. akhir is beehad me sar chupane ko jagah aur gadi ke liye mistri ki jarurat jo thi. piche se rashmi ne kuch kaha par maine dhyan na diya, jarur gaali hi di hogi mujhe. ham kisi tarah kanto aur jhadiyo se bachte huye us jagah par ja pahunche sham ka samay tha surya chupne ja raha tha kuch vradh log ek jagah jama the baaki log apne-2 kaam me lage huye the maine gaur se sabhi ko dekha is beehad me har prakar ka abhav hote huye bhi sabke chehro par ek ullas dikh raha tha ek chamak thi. hame dekhte hi kayi log bhagte huye hamare paas chale aaye, dekhte hi dekhte ham anjan praniyo ke liye unhone apne dil aur gharo ke darwaze khol diye. ye ek naya hi samaj tha jhuti adhunikta se door parantu apnatva se bharpur, yaha mujhe apni sachi parampara aur sanskriti ka bodh hua. unke satkar se mai atmvibhor sa ho gaya. parantu Rashmi ka muh abhi tak bana hi hua tha.

kuch samanya parichay ke paschat maine unhe apni samasya batayi tab unhone agle din hamari madad ka vayda kiya aur hamare bhojan ki vyavastha me lag gaye. tabhi meri nazar ek vridh sajjan par padi jo yaha baithe huye kuch asahaj mahsus kar rahe the maine puncha
-- chacha ji kya baat hai aap kuch kast me dikhayi de rahe hain?
meri baat par waha upasthit sabhi log muskura diye kuch naujawan log to dabi juban hansne bhi lage, wo vridh to aise sharma gaye jaise chori karte pakde gaye ho. Rashmi bhi mera muh taakne lagi tabhi ek naujwan bola
-- are bhaishahb hari kaka ghar jane ki jaldi me hain, rukmani kaki ghar aa gayi hongi aur inka intejar kar rahi hongi.
Mai- to isme itna sankoch kaisa aap jayiye hari kaka.
Hari kaka- ha beta ab to hame jana hi padega varna agar rukmani naraj ho gayi to dubara mujhe chhond kar chali jayegi aur abki baar mai uska door jaana bardast nahi kar paunga.

( itna kahkar wo tej kadmo se chal diye fir ekaek rukkar ghume aur bole
-- Rukmani ko tumhare bare me bhi bataunga bete wo bahut khush hogi aur tumhari dulhan ke baare me bhi bataunga, itni hi khubsurat hai meri Rukmini bhi.
itna kahkar wo palatkar tezi se chale gaye aur unki is harkat par sabhi hans diye jabki mai aur Rashmi ek dusre ka muh taakte rehe.
tabhi hamare liye bhojan ki vyavastha ki gayi aur hamne bhojan kiya uske paschat un logo ne hamse baate karna shuru kiya, unki baate itni mithi aur dil ko chhu lene wali thi ki jald hi unhone hamare baare me sab jaan liya, aur hame alag na hone ki salah bhi de dali unki is salah par ham dono muskura kar rah gaye. tab tak sone ka samay ho gaya lekin pata nahi kyu Hari kaka ke liye mere man me ek utsukta ne janm le liya tha, aur shayad rashmi ke sath bhi kuch aisa hi tha. khair ham thake the to jaldi hi so gaye.

Agle din ham dono hi kaafi din dhale so kar uthe aur nityakarmo va desi naste se farig ho kar bahar nikal aaye. yaha aakar hame pata chala ki ek naujwan hamaari gadi sahi karne ke liye paas ke kasbe se kisi ko bulakar laya hai. tabhi meri najar paas me hi gumsum se baithe Hari kaka par padi, mai anayas hi unki or badh gaya, mujhe paas aaya dekh kar ek bojhil si muskuraht ke sath mujhe dekha, maine unuhe kandhe pakad kar uthaya aur ek charpayi par lakar bitha diya. yaha Rashmi pahle se hi virajman thi.
Mai- kya baat hai kaka aap kuch mayush lag rahe hain kya Rukmani kaki aapse naraz hain?
Hari kaka- nahi beta Rukmani mujhse kabhi naraz nahi hoti, ha kabhi-2 rooth jati hai par mai use mana leta hu.
( unki ye baat sunkar Rashmi ke chehre par ek muskurahat aa gayi.)
Mai- to kya baat hai kaka aap itne dukhi kyu hain ?

( fir hari kaka ne jo bhi bataya use mai apne shabdo me aapko batane ka prayash kar raha hu....)
kal jab hari kaka hamare paas se gaye to tezi se kadam badhate huye apne ghar ki or chal diye, unhe dar tha kahi unke pahunchne se pahle hi Rukmani ghar na pahunch jaaye, aaj se pahle hamesa jab bhi sham ko rukmani ghar par aati thi to ye pahle se hi uska intejar kar rahe hote the , aaj kahi wo naraz na ho jaaye. jaise-2 ghar paas aata ja raha tha hari kaka ki dil ki dhadkane badhti ja rahi thi. jab ghar pahunch kar inhone ghar ka darwaja khula dekha to inka dil ucchal kar bahar aane laga. kisi tarah darte-2 ghar me ghuse.
samne hi ek navyauvna rajsthani rajkumari ke libas me jiski umra lagbhag 20 se21 saal hogi, sundarta aisi jaise saundary ki devi svayam uska roop lekar prakat huyi ho, lekin uske hoto ki chir parichit muskan aaj gayab thi, halki si nukili naak kuch laal thi aur ankhe hari kaka ko dekhte huye gusse ka ijhaar kar rahi thi.

Hari kaka- are Rukmani tum aa gayi.
( Rukmani ne koyi jawab nahi diya)
Hari kaka- gussa na ho Rukmani meri priye, galti meri nahi hai. wo..wo.... aaj gaon me kuch mehman aa gaye the usi karan......
(Rukmani ne apna chehra dusri or ghuma liya)
Rukmani- aur aap mujhe bhul gaye. aap jante hain ki mai roj sham yaha sirf aapke liye aati hu, fir bhi aap...
(Rukmani ne jhut-muth ka gussa pradarshit kiya lekin sacche premi apni premika ke banawati gusse ya sthayi gusse me fark nahi kar paate unke liye to premika ka naraz hona unki mrityu ke saman hota hai. yahi isthiti hari kaka ki thi, unke netro se anshuo ki awiral dhara bahne lagi, sar jhuk gaya, hont kanpne lage. yah dekh kar Rukmani tadap uthi aur daud kar Hari kaka ko apne alingan me le liya, aur swayam uski ankho se bhi ansuo ki bunde tapkne lagi.

Rukmani- ye aap kya kar rahe hain, mai to aap se thitholi kar rahi thi. aapki ankho se nikalte ye anshu mere hriday ko tejaab ki bundo ki tarah jala rahe hain.
Hari kaka- le.....lekin..tum..mujhse naraz kyu hoti ho, tum sham ko aati ho par subah bina mujhe kuch bataye pata nahi kaha chali jaati ho.. mai to kabhi gussa nahi hota.
(Hari kaka ko is tarah baccho ke jaisa rota dekh Rukmani ka hriday chitkaar kar utha wah tadap uthi, aur hari kaka ko aur kas kar khud ke saath bhinch liya.)
Rukmani- dekhiye agar aap is tarah rote rahoge to mai hamesha ke liye chali jaungi.
(Rukmani ki ye baat sunte hi hari kaka ne baccho ki tarah apni ankhe ponchi aur jabran muskurane lage)
Hari kaka- aisi baat mat karo tumhare bina ji nahi paunga, ab tak tumhare liye hi to jinda hu mai.

(Rukmani ne muskurakar apne hari ke gaal par ek chumban ankit kiya, aur unhe wahi bichi ek charpayi par lakar bithaya.)
Rukmani- chaliye ab khana kha lijiye mai janti hu aap sirf mere sath hi khana khate hain. mai lekar aati hu.
hari kaka rukmani ka hath pakad lete hain.
Hari kaka- nahi tum kahi nahi jaogi, tum yahi baitho mai khana lekar aata hu.
(Hari kaka ek thali me bhojan parosh kar late hain, aur Rukmani unhe apne samne charpayi par bitha kar apne hatho se ek-2 niwala tod kar khilati hai. hari kaka ki nazre barabar Rukmani ke chehre par jami rahti hain. kabhi-2 dono ke netro se ansuo ki bunde tapak padti hain lekin dono ke hont muskurate rahte hain. bhojan samapt karke dono usi charpayi par ek dusare ke alingan me sama kar prem bhari baate karte huye neend me chale jaate hain.

agli subah jab Hari kaka ki neend khulti hai to Rukmani hamesha ki tarah ja chuki hoti hai. aur Hari kaka mayush ho jate hain aur agli sham ki pratiksha karne lagte hain bas yahi hari kaka ki roj ki kahani hai.)
jab maine hari kaka ki puri kahani suni to mera sar chakrane laga, aur yahi haal Rashmi ka bhi tha wah muh khole aur ankhe fade kabhi mujhe to kabhi hari kaka ko dekh rahi thi.
hari kaka apni kahani sunakar ja chuke the, lekin hamare liye ek ajab paheli ban gaye the. yah to nischit tha ki Rukmani or unme atyant gahra prem tha lekin umra ka itna antar meri samajh ke bahar tha. abhi ham inhi soncho me doobe huye the ki ek vridh mahasay hamare paas aaye unhone hame bataya ki hamari gaadi do se teen ghante me thik ho jayegi. maine unhe hari kaka ke baare me puncha to wo gambhir ho gaye. fir bole....
-- Anoop beta aapne abhi kewal adhuri kahani suni hai, aapne jo suna wo kahani ka dusra bhag hai. pahla bhag aapne nahi suna.
is baar mujhse pahle Rashmi bol padi.

Rashmi- to chacha ham pahla bhag bhi sun lena chahte hain.
wo vridh jinka naam jagmohan tha wahi hamare paas baith gaye.
Jagmohan- beta aaj ke Hari kaka aaj se 40 saal pahle harivansh bahadur hua karte the, inse sajila aur budhiman yuvak dusra koyi nahi tha. hamare ilake ke ye pahle vyakti the jisne 12hi ki pariksha paas ki huyi thi. hamare gaon ke uttar disha me kareeb das kos door ek nahar thi jiske dusari or ek gaon tha raghuvarpur aur uske purane jamidaar the thakur raghuvir singh. hamare harivansh bahadur ne unhi ke yaha naukari ki thi. aur samay ka fer dekhiye ki harivansh ko thakur raghuvir singh ki vidhva bahu Rukmani se prem ho gaya, sabhi jante the ki Rukmani ki shadi bacpan me hi kar di gayi thi aur thik do din baad hi wo vidhva ho gayi thi. lekin wo samay jab kisi ko kisi se prem hota hai use koyi bhi nirdharit nahi kar sakta. jawani ke prem ne bachpan ke vivah or vidhwapan ko bhula diya tha Rukmani ko bhi harivansh se gahra prem ho gaya tha. aur ye prem din ba din apne rang dikhane laga aur ye khabar thakur raghuvir singh ke paas pahunchi. 

thakur ke liye ye baat aisi hi thi ki jaise use hajaro logo ke beech nanga kar diya gaya ho, wo tilmila gaya. udhar harivansh aur Rukmani ke prem ke charche poore gaon me ho rahe the. us samay aaj ke jaisi adhunikta nahi thi. aaj prem ya prem vivah ek samanya ghatna hai parantu us samay harivansh aur Rukmani ka prem thakur Raghuvir ke liye ek kalank ban gaya aur unhone is kalank ko in dono ke khoon se dhone ka faisla kiya, wah raat ke gahrane ka intejar karne laga. yah tay ho chuka tha ki wah raat Rukmani aur harivansh ki antim raat hone wali thi. lekin bhagywash is baat ki khabar Rukmani ko mil gayi, Rukmani kisi tarah apni naukrani ki madad se harivansh se mili aur use puri baat bataye bina is baat par raazi kar liya ki wo usi samay apne gaon wapis chala jaaye. pahle to harivansh is baat par taiyar na hua par jab Rukmani ne use apni kasam dilayi aur khud uski kasam khakar ye vayda kiya ki wah bhi jaldi hi uske paas uske ghar pahunch jayegi to harivansh Rukmani ki ek tashvir aur uske vaade ke sath raato raat apne gaon wapis aa gaya.

lekin agle hi din ye khabar pure ilake me aag ki tarah faily ki thakur Raghuvir singh ne apni bahu ko maar kar khud ko bhi goli maar li. yah khabar sunte hi harivansh jaise pagal ho gaya aur hamesha yahi chillaya karta ki Rukmani mari nahi hai wo aayegi usne mujhse aane ka vaada kiya tha wo jarur aayegi. aur uski baat sach nikli theek ek saal baad Rukmani ki atma laut aayi apne harivansh ke liye, wo roj sham ko harivansh ke ghar aati hai aur subah hone se pahle hi wapis chali jati hai.
jagmohan ki is kahani ko sun kar man me ej jigyasha uth khadi huyi, ye bhut pret ki baate maan lena mere bas me nahi tha aur hari kaka kisi bhi surat se pagal to nahi hi lagte the. to fir kya raaj tha in sab ke piche.

Rashmi- Anoop kya sach me prem me itni shakti hoti hai ki wo mare huye inshan ko wapis le aaye?
Rashmi ke is sawal ka mere paas abhi koyi jawab nahi tha. maine apni ghadi ki or deka sham ke 8 baj chuke the, pura gaon andhkar me doob chuka tha, bhojan ki taiyari ho rahi thi. maine Rashmi ko apne piche aane ka ishara kiya aur us mitti ke makan se bahar nikal aaya.
Rashmi- tum kya karne ki sonch rahe ho?
Mai-hame is baat ki sachayi ka pata karna chahiye.
Rashmi- tum pagal huye ho kya? aisa karna thik na hoga.
Mai- kya tum atmao se darti ho?
Rashmi-nahi aisi baat nahi hai, mai ek padhi-likhi ladki hu mujhe in sab baato par yakeen nahi.
Mai- to fir aao mere sath.

itna kah kar mai aage badh gaya, raat ke andhere me pendo ki akriti badi darawani lag rahi thi. hawa ka jhonka jab hamare paas se hokar gujarta to aisa lagta ki wo hame wapis chale jane ko kah raha ho. achanak Rashmi ne apne dono hatho se meri baah pakad li aur mujhse sat kar chalne lagi. shayad ye mahul ki bhayanakta ke karan hi tha lekin kaafi dino ke baad ham dono ekdusare ke liye kuch ahsaso ko mahsus kar rahe the aur in ahsaso ke piche kahi na kahi Hari kaka aur Rukmani ki kahani ka prabhav avashya tha.
ham dono jaldi hi hari kaka ke ghar ke najdik pahunch gaye mitti ke bane us makan ki ek matra khidki se kuch prakash bahar aa raha tha, ham dono ne ek dusare ki or dekha fir ham us khidki ki or badh gaye. meri dhadkane badh gayi thi aur sanse tez ho chuki thi. aur Rashmi ka bhi yahi haal tha wo to kisi asanka ke karan mujhse buri tarah chipki huyi thi. ham khidki par pahunche hamari nazre hari kaka par padi, unki aanko se ansuo ki dhara bah rahi thi aur wo kah rahe the.

--Rukmani meri rukmani tum mujhe itna kyu satati ho, kyu tum roj subah mujhe chond kar chali jaati ho.
hari kaka rote ja rahe the aur bolte ja rahe the aur unki baaho me thi Rukmani, wo Rukmani jise hari kaka ki jindagi kahna jyada munasib hoga usi Rukmani ki wo 40 saal purani tasveer ko dono hatho se apne seene se chipkayehye the. wo kabhi us tasveer se baate karte, kabhi usse shikayat karte kabhi us tasveer se maafi mangte. ek aisa drishya hamari ankho ke samne tha jisko dekhte huye bhi us par yakeen kar paana muskil ho raha tha. Hari kaka ke liye Rukmani ki wo tasveer ek tasveer na hokar khud Rukmani thi, unka us tasveer se wo prem alingan. wo drshya uff kaise vardan karu mai shabd nahi hai mere paas, prem ki charam parakastha. yahi drishya is mitti ke kamre me pichle 40 saalo se har roj dohraya jata hai, jiya jata hai. dhanya ho hari kaka tumhara prem dhanya hai. tabhi hamari najre us tsveer par padi kitni saundaryabodhak aur shant thi wo, uski nazre hame ghur rahi thi jaise kah rahi ho uske in niji palo ko dekhna apradh hai mere liye, mai samana na kar paya un nazro ka aur geele netro ke saath Rashmi ki or muda Rashmi ka bura haal tha wah us drishya ko taktaki lagaye dekhe ja rahi thi aur uski aanko se ansuo ki dhara nikalti ja rahi thi. mai use lekar wapis chal diya aur wo mujhse chpti huyi bas roye hi ja rahi thi. wapis aakar ham bina khana khaye hi let gaye aur rashmi raat bhar mere seene par sar rakh kar aansu bahati rahi. kuch kaha nahi ham dono ne ek dusre se bas raat bhar jagte rahe yu hi shant gambheer. hame hamari bhulo ka ahsash ho chuka tha or ye shanti isi baat ka praman thi.

subah ham wapis apne ghar ja rahe the Rashmi shant si mere kandhe par apna sar rakhe huye thi, ham dono hi ahsaso se bhare huye the ek dusare ke prem ke ahsaso se. Rukmani ki us adhuri tasveer ne hamare jeevan ko purn kar diya tha. ab aur kya kahu bas ab vida dijiye mujh Anoop ko.... Dhanyawad
______________________________
ADHURI TASVEER
Prem ki devi
A killer or a lover
read my thriller stories
Kaanto ke beech ( running.....)
VIKRANT ( ek deshbhakt aatankwadi)
also read.....
kavita sangrah and funny shayries written by Anoop sharma