Xossip Ultimate Story Contest 2013

[Expert]

Zindagi

Jay Singh

Phone par aa rahi awaaj ko sunte hi Nisha ne apna maatha peet liya. kisi tarah sambhalte hue usne jawab diya "Madam, do teen din aana mushkil hoga, delhi se mehmaan aa rahe hai, woh sunday tak rukenge ..... haan, mujhe bhi Muskaan ki chinta ho rahi hai lekin majboori hai madam ..... main koshish karungi nahin toh monday ko hi aana hoga ..... OK bye"

Nisha ne phone rakhke chain ki lambi saans li. "Didi tumne jhuth kyun kaha ki guests aa rahe hai" darwaze par khadi Ritu ne apni badi behen ko ghoor ke dekhte hue poocha.

"Aur kya kehti? roz roz Muskaan ke pass baithe bore ho gayi hoon. Kabhi toh lagta hai main khud apaahij na ban jau"
"lekin pehle toh tum khud utawli rehti thi wahan jaane ke liye"

"tu nahin samjhegi" Nisha ne darwaze ke kareeb aake Ritu ke baalon mei pyaar se haath ferte hue kaha "dekh agar madam ka dobara phone aaye toh keh dena main mehmaano ke saath 2 din ke liye bahar ghumne gayi hoon"

"kyun?"

"mujhe kaam se bahar jaana hai, aur main unka koi bhi call mobile pe receive nahin karna chahti"
"sab pata hai mujhe. zaroor us Rohit ke saath ghumne jaana hoga"

"dekh Ritu tu aajkal zyada bolne lagi hai. next week se tere exams hai. apni studies mei mann laga, samjhi" apni baat khatam karke Nisha room se bahar chali gayi.

Aaj subah hi Rohit ka phone aaya tha. dono ne weekend par shimla jaane ka plan banaya tha. thodi hi der mei Rohit aane wala tha. uske intezar mei baithi Nisha ke mann mei kai sawaal uthne lage, Ritu aajkal zyada bolne lagi hai, par kya uski baaton mei sachaai nahin hai?"

Mrs. Rathi se Nisha ki pehli mulaqat ek charity function mei hui thi. Ladies club dwara ayojit us function mei Mrs. Rathi apni beti Muskaan ke saath aayi thi. Function mei Nisha ke college ki kuch ladkiyon ko volunteer banaya gaya tha. B.A. final year ke exam dene ke baad ghar mei bekaar baithi Nisha ne bhi us function mei hissa liya tha. uski duty food court ke ek counter par lagi thi. Wheel chair par aayi Muskaan ko dekh pehli nazar mei hi Nisha ke dil mei daya ki bhavna ubhar aayi thi. Is umar mei toh ladkiya pankh laga kar udti hai aur yeh bechari ..... Nisha ne uske kareeb jaake pyaar se pucha "Aap kya lena pasand karengi Miss, chatpati chaat ya meethe rasgulle?"

Nisha ki oar badi badi aankhon se niharti Muskaan kuch nahin boli thi. Muskaan ne ek baar fir pyaar se pucha "bataiye Miss, kya khana pasand karengi aap"

Jawaab mei budbudane ki nakam koshish karti Muskaan ke hothon ke kinare se laar nikal aayi thi. us khoobsurat chehre wali ladki ki yeh haalat dekh Nisha ka dil paseej gaya. Tabhi uske pass aati Mrs. Rathi ne apni beti ke muh se nikal rahi laar ko rumal se saaf kiya aur Nisha se muskurake kaha "ek plate rasgulla"

Plate apne haathon mei leke Mrs Rathi ne rasgulle ke chhote chhote tukde kar chamach se Muskaan ko khilana shuru kiya. Is beech kai baar tukde Muskaan ke muh mei na jaake uske kapdo par gir jaate jise Mrs. Rathi turant saaf kar deti. Yeh sab dekhke Nisha ki aankhen namm ho gayi aur uska dil bhar aaya.

"Madam agar aap bura na maane toh ..... yeh sab?" Nisha ne Mrs. Rathi se poocha
"My bad luck beti"
"Kya iska koi ilaaj nahin"
"Bhagwan koi chamatkaar hi kar sakta hai. Doctors ke haath mein nahin iska ilaaj"
"Aisa na kahe Madam. sab theek ho jayega"
"Pata nahin, shayad Bhagwan mujhe koi punishment de raha hai. tum kaun ho beti"

"Ji mera naam Nisha hai. main bhi usi bhagwan ki di punishment bhog rahi hu. Mummy Papa ki ek accident mei maut ho gayi last year. ab hum 2 behne hain. B.A. pass kiya hai isi saal aur job talaash kar rahi hu"

"Oh my poor child" Mrs Rathi ne pyaar se Nisha ke sir pe haath fera "agar tumhe manjoor ho toh meri beti ko company dene ke liye ek job hai mere pass. Main tumhe achche paise de sakti hu. Tum jaisi achchi ladki ke saath meri Muskaan ka bhi time achcha beet jayega. waise iske baaki sab kaam dekhne ke liye ek maid (aaya) hai, mujhe sirf koi aisi ladki chahiye jo din bhar iske saath time spend kar sake, iska akelapan door kare"

"Yeh toh mera saubhagya hoga madam, agar main Muskaan ke saath time spend kar saku"

Dusre din subah Nisha Mrs.Rathi ke bunglow pahuch gayi. Bahut bada bunglow tha, kisi samay mei alishan mahal raha hoga, lekin samay ke saath dekh-rekh ke aabhav mei uski chamak feeki pad gayi thi.

"Aao Nisha, main soch rahi thi shayad tum na aao"
"Aisa kyun socha aapne madam"
"ek zinda laash ke saath time spend karna easy nahin hota beti"
"Aap yeh kya keh rahi hai madam" Nisha sihar uthi.

"Theek keh rahi hu beti. main Muskaan ki maa hoon, par uski maut ki aahat har pal sunti hoon. na jaane kis pal maut meri beti ko apni aagosh mei samet legi aur woh mujhse alag ho jayegi" Mrs. Rathi ki awaaj kaanp uthi.

"Muskaan ke saath kya hua tha madam? yeh sab ....."
"Duchenne Muscular Dystrophy kehte hai isko. Body ka har ek muscle dheere dheere apni maut paa raha hai, aur meri pari si udne wale beti maut ke panjo mei jakadti jaa rahi hai."

"hey bhagwan, itni pyari si ladki ko itni badi punishment?"
"Pata hai Nisha, jis din Muskaan ki taango ne kaam karna band kar diya tha, us din main bahut royi thi. tab Muskaan ne mujhe sahara diya tha. kaha tha" -

Mummy duniya mei kitne logo ke haath paon nahin hote. mere pass haath toh hai, main unka istemaal kar sakti hu na. Dekhna main kitni achchi achchi paintings banaungi, peoms likhungi. Mera din bhar time yu furr karke udd jaaya karega.

"Muskaan ki paintings mei aakash mei udti chidiya, phoolon pe mandraati rang birangi titliya hua karti thi. poems mei jeene ki chahat hoti thi, lekin pichle ek saal se uske haath bhi apni shakti kho chuke hai, ab toh muh se kuch bol bhi nahi sakti theek se. meri bachchi jo jhel rahi hai main nahin seh paati hu"

Rumaal aankhon se laga Mrs. Rathi sisak uthi. us samay dher saari mamta Nisha ke dil mei ubhar aayi thi, Muskaan ke liye . Mrs. Rathi ko tasalli dete hue usne mann mei faisla kar liya tha, woh pal pal maut ke kareeb jaa rahi us ladki ke jeevan ko khushiyon se bharne ki har mumkin koshish karegi.

Shuru shuru mei Muskaan ki baatein samajhne mei Nisha ko pareshani hoti thi, lekin samay ke saath woh Muskaan ki har ek baat isharon se hi samajhne lagi thi. Muskaan ke haath apni shakti kho chuke the lekin uski ungliyo mei ab bhi jaan baaki thi. Muskaan ke haath uthakar woh table pe rakh deti aur uski ungliyo mei pencil atka kar, safed kagaz par painting banaane mei uski help karti. dheere dheere Muskaan ki pencil se aadi tirchi lines ki jagah ab kuch pictures ubharne lagi thi. Saath hi usne Muskaan ko achchi achchi poems aur stories sunaani bhi shuru kar di.

Muskaan ke chehre par ab chamak aane lagi thi. Nisha ka zyadatar samay Muskaan ke pass guzarta tha. Nisha ki in chhoti chhoti koshisho ne Mrs. Rathi ko bhi ek nayi zindagi de di thi. beti ke chehre par halki si khushi ki jhalak dekhke unhe sukoon milta tha. halaki bade se bade doctors pehle hi bata chuke the ki Muskaan ke theek hone ki umeed karna bekaar hai.

Mrs. Rathi se hi Nisha ne jaana ki kuch saal pehle unke pati ki ek plane crash mei maut ho gayi thi. unki maut ke baad Mrs. Rathi ka eklauta maqsad apni beti ki achche se parvarish karna tha. Mr. Rathi apne peeche itni daulat chhoad gaye the ki zindagi bhar kisi cheez ki Mrs. Rathi aur unki beti ko kami nahin hone wali thi.

Lekin Mrs. Rathi ki zindagi mei tab mod aaya, jab college ki running champion unki beti ne ek din taango mei halke dard ki shikayat ki. Ghar mei maalish se lekar doctors ki dawai tak ka koi faayda na hota dekh Muskaan ka checkup jab specialist se karwaya gaya toh report sunke Mrs. Rathi sunn reh gayi thi. apni jaan se pyari beti ko kaise bataati ki til til karke marna hi ab uski kismat thi. 2 din tak behosh rahi Mrs. Rathi ko doctors ne badi mushkil se is sadme se bahar nikaala. isi beech 12th class ki student Muskaan ne apni beemari ke baare mei doctors se jaan liya tha.

Us samay bhi Muskaan ne hi apni maa ko tasalli di thi "Mummy un logo ke baare mei socho, jinhe yeh beemari hogi lekin mehenge ilaaj ke liye paise nahin hote. unse toh humari situation kitni behtar hai."

Muskaan ki baat par Mrs. Rathi shocked reh gayi thi. apni beti ko itni himmat se mushkil ka samna karta dekh unhone faisla kar liya tha ki aaj ke baad woh kabhi nahin royegi. Aksar apni maa ko udaas dekh Muskaan kehti thi "mummy jo sach hai usse kya muh modna. usko sweekar kar, himmat ke saath uska muqabla karna chahiye. main maut se nahin darti. yeh dekho maine kal yeh kavita likhi hai."
Anjaani maut ke prati koi darr nahin, aisi lalak? lekin kavita ke beech mei kahin jeene ki chahat jhalak uthti thi.

"Ae Maut main teri goad mei sone wali hu,
tujhe dekha nahi pehchana nahin
par mummy ki aankhon mei , jhaakte paaya hai

kab saamne aakar, aagosh mei le legi
nahi jaanti, bus kuch din aur
jeene ki mohlat de de,

mummy bahut akeli ho jayegi
unhe yu choadke jaana
achcha nahin lagta"

jab woh poem Nisha ne padhi toh uski aankhen bhar aayi thi. Sabke samne zindadili ki misaal dikhne wali Muskaan, akele mei raaton ko na jaane kitna jaagti hogi, kya chalta hoga uske mann mei, yeh koi nahin jaanta tha.Ab roz subah 10 baje Nisha aa jaati thi, aur uske intezar mei baithi Muskaan khil uthti thi apni Nisha didi ko dekhkar.

isi beech Nisha ki nazdikiya Rohit se badne lagi. Mr. Rathi ke Vakil aur khaas dost Advocate Sharma ka assistant Rohit, apne boss ke kehne par Muskaan ka haal chaal jaanne ke liye bunglow pe aata rehta tha. isi beech Nisha aur Rohit ki mulaqat hui aur dono kareeb aane lage. Rohit ka saath Nisha ki aankhon mei kai sapne jaga deta tha. ab Nisha kabhi kabhi bahana kar, Muskaan ke pass jaana taal deti thi. Mrs. Rathi is baat ka bura nahin maanti, lekin Nisha ke mann mei ab Muskaan ke liye pyaar aur hamdardi ki bhaavna kamm hoti jaa rahi thi. Aksar apni chhutiyo ke baad jab woh Muskaan ke pass laut kar aati toh usko udaas dekhkar bhi andekha kar deti. sirf apni duty nibhane ke lihaaz se jaldi jaldi koi kahani ya poem sunaake tabiyat kharab hone ka bahana karke ghar chali jaati.

Aaj subah bhi yehi hua. 2 din se Nisha Muskaan ke pass nahin gayi thi. Phone karke jab Mrs. Rathi ne usse kaha "na jaane kyun aaj Muskaan ki tabiyat theek nahin lag rahi, agar tum aa jaati toh shayad usko achcha lagta" toh usne mehmaano ke ghar aane ka bahana bana diya.
pichle kuch dino se Ritu bhi usko tokne lagi thi "tumhe Muskaan ke pass jaana chahiye didi. tum yeh achcha nahin kar rahi"

Lekin is sab se Nisha jhunjhla uthti. "tu apne kaam se kaam rakh ritu. meri apni bhi koi life hai. mujhe nahin pasand us apaahij ke pass din bhar baithe rehna"

Ritu ko chup kara kar, woh Rohit ke saath ghumne nikal gayi 2 din ke liye. Kabhi agar uske mann mei Muskaan ka khayaal aata bhi toh yeh sochke khud ko justify karti ki, jitna maine aajtak kiya, koi aur itna bhi na kare aaj ke zamane mei. Kya ek maut ke sirahne khadi ladki ke liye main jeena chhoad du, apne armaano ka gala ghotkar din bhar uske pass baithi rahu. 2 din mei kya aafat aa jayegi. Monday ko wapis jaake mil lungi Muskaan se.

2 din baad khile chehre ke saath jab usne ghar mei kadam rakha toh uski chhoti behen ne udaas chehre ke saath uska swagat kiya "badhaai ho didi, tumhe hamesha ke liye azadi mil gayi"

"kya matlab" Nisha ke pucha

Ritu ne bheegi palkon ke beech mei se apni didi ko nafrat se dekhte hue kaha "woh chali gayi is duniya se hamesha ke liye. uske aakhri samay mei Mrs. Rathi tumhe khoj rahi thi. aur tum apne mehmaano ke saath busy thi. apna mobile bhi switch off kar rakha tha"

Ritu ki baaton mei chhupe vyang ko jhel pana ab Nisha ke bus mei nahin tha. Muskaan ka pyara sa chehra uski aankhon ke samne aa gaya. uski masoom si muskurati nazron ka tasavvur karte hi Nisha ki aankhen chhalak uthi. Mushkil se himmat karke Nisha, Mrs. Rathi ke ghar pahuchi. Muskaan ke room mei white saree pehenkar baithi Mrs. Rathi ko pehchaan paana mushkil ho raha tha. 2 din mei unki age 10 saal badi lagne lagi thi. Nisha ki aahat par aankhen uthakar dekhti Mrs. Rathi ke chehre par udaasi aur gehri ho gayi.

"Apne aakhri samay mei tumhe apne pass na paakar woh bahut udaas hui thi" Mrs. Rathi ne rote hue kaha "itna udaas maine apni beti ko kabhi nahin dekha tha Nisha. uski aakhri ek tamanna thi, ek chhoti si guzaarish thi ki marne se pehle ek baar woh tumhe dekhna chahti thi, tumse milna chahta thi, lekin main kitni badkismat maa hu ki apni beti ki yeh guzaarish puri nahi kar saki." kehke Mrs. Rathi phoot phoot ke rone lagi.

Nisha bhari kadmo se chalti hui unke kareeb aayi aur apne seene se lagaate hue boli "i am sorry madam. mujhe nahin pata tha ....."
Mrs. Rathi ne subakte hue kaha "i know beti, tumhari galati nahin hai. tumne usko bahut kuch diya. woh toh na jaane kab ki marr jaati, agar tumhara saath na milta in dino usko. woh tumse bahut pyaar karti thi, jaate time tumhare liye ek special card chhoad gayi hai. kuch likhkar gayi hai tumhare liye"

Apni jagah se uthke Mrs. Rathi ne table se ek card uthaya aur Nisha ko thama diya.
ek blue colour ke card par aadi tirchi lines ke saath likha hua tha

mere marne ke baad, phoolon ke guldaste mat laana,
kyuki ..... muskurate phoolon ko rulaana mujhe achcha nahin lagta
Wish you all the best for your Life Nisha didi.
Card ko padhne ke baad Nisha apne aansuon ka sailaab rok nahin payi.

Apni zindagi ke is anubhav se Nisha ne kya seekha? pata nahin.
Muskaan jaise lakho log jo kisi na kisi jaanleva beemari ke shikaar hai aur jaante hai ki aaj nahin toh kal maut unhe apne aagosh mei le legi, woh Muskaan ki kahani padke zindadili se jeena seekhenge ya nahin? pata nahin.

Lekin is kahani se do baatein maine seekh li.
zindagi mei insaan ko aisi galati bhool ke bhi nahin karni chahiye jiska pachtaava usko zindagi bhar ho. kabhi kabhi zindagi dusra mauka nahin deti galati sudhaarne ka. ek pal mei toofan aake guzar jaata hai, aur peeche reh jaati hai toh sirf yaadein, kuch aisi yaadein jo zindagi bhar peecha nahin chhoadti.
aur dusri baat yeh ki zindagi badi anmol hai, isko yuhi bekaar na jaane dena chahiye. kabhi naumeed nahin hona chahiye zindagi se. kabhi thak ke , haar ke na baith jaaye, marne se pehle kya marna. jab tak zindagi ki ek bhi saans chal rahi hai zindadili se jeena chahiye. maut ek sachaai hai jisne ek na ek din aana hi hai, koi usko taal nahin sakta. lekin jab tak zinda hai, tab tak toh jee le, maut se pehle kya marna.