03-10-2025, 01:00 AM
FAISALA
friend_just_buddy
biwiyan(wives) bhi ajeeb hoti hain, jara si tond(tummy) kya dikh gayi unhe apane pati dev ki lag gayi unake aaram ko haraam karane me. bas yahi mere sath bhi ho raha hai aaj kal.makhmali thand me jab kambal me dubak kar sone ka maja aata hai tab meri sharik-e-hayat ne mujhe morning walk ka order suna diya. ab koi bataye jara is dhalati umar me mujhe six packs bana ke kya milega? magar.... khair chhodiye, ye kissa to humesha se halata hi rahega.
ghar ke paas hi ek joggers park hone ki vajah se mujhe koi jyada door nahi jana padata. 2-3 chakkar maar ke apane raam to aaram se gun-guni dhoop senkane lagate hain, tabatak ki jabtak office jaane ka time paas nahi aa jata. kuchh retired bujurg wahi par baith kar apana time pass karate the jinase ab meri bhi achchhi jaan pehchaan ho chuki hai. kamaal ka tarika nikala hai in logo ne bhi, akhbaar pakad ke baith jaate hain fir ek-ek khabar par ghanto bahasbaaji hoti hai. goya, unake bahas karane se mulk ke haalat fauran badal jayenge. par dekha jaaye to ab unake paas vakt ki kami to hai nahi jo unhe vakt ki barbaadi ka khyaal ho, so jo karate hain vo unhe karate hue mai roj dekhata tha aur gaahe-baGaahe unaki baato me apane vakt ke hisaab se shaamil bhi ho jata tha.
par aaj ki mehfil me kafi uttejana mehsoos ho rahi thi. jyadatar logo ke chehare tam-tamaaye hue the. ohhhh...ha! aaj to Nirbhaya ke mukadame ke faisale ki charcha chhidi thi yaha. sab ek swar me hatyaaro ko fansi milane ka samarthan kar rahe the par us bache hue "ek" ko lekar thode matbhed dikh rahe the. jyadatar log usako bhi fansi ki saja ki maang kar rahe the par kuchh tathakathit zaheen log usaki umar ka hawala dekar use mili kanuni chhut ka samarthan kar rahe the. yahi ek bahas us jagah ki garami badhaye ja rahi thi. abhi maine aap logo ko ye bataya hai kya ki meri is colony me law related logo ki bharmaar hai. bas yaha bhi usi hisse ka dab-daba tha jisaki vajah se bahas itani lambi khinchi ja rahi thi.
bhatiya ji:-(ye kafi aggressive hain)"ohhji sach keh raha hu main, us pencho ko to kaat ke taang bhi diya jaaye to bhi law ke basic usulo ki kadar bani rahegi. daya insaano par ki jaati hai, shaitaano par nahi. kal ka mare vo ssaala aaj mare, par mare jarur kutte ki maut...balki usase bhi ghatiya maut."
sharma ji:-(another bhatiya type) "shant ho ke bhi baat kar sakate hain bhatiya ji. hum sab sabhya samaj ka hissa hain. yaha jungle ka kanun nahi chalata. kuchh niyam kanoon har jagah ki shanti-vyavastha banaye rakhane ke liye awashyak hai, bas hume unhi niyamo ka palan karana chahiye."
bhatiya ji:-"ohhji mitti paao aise niyamo par. vakt aur haalaat bhi kuchh cheej hoti hai ji".........
un logo ki aawaje dhire-dhire tej hoti ja rahi thi jisame ab sirf shor ke alawa koi kaam ki baat nahi sunayi de rahi thi.
"ye log sirf bekaar ka shor macha rahe hain" mere paas baithe ek gambheer se dikhane wale shakhs ne dhimi magar asardaar aawaj me kaha. hum 3-4 log, un logo se 2-3 haath ke faasale par baithe the. ye aksar mujhe yaha dikhayi to dete the par kabhi inase baatcheet ka mauka nahi mila tha. suna tha ki ye bhi ek retired judge hain jo apane neutral aur sakht faisalo ke liye mash'hur rahe hain.
"ji... mujhe bhi yahi lag raha hai. saja to saja hoti hai, kisi ko fansi ho ya kisi ko umarkaid. badi baat ye hai ki kasurwaar ko saja mili hai aur vo bhi bahut kam samay me."
maine nape-tule shabdo me unhe impress karane ki koshish karate hue bola.
"saja vo hoti hai barkhurdaar jo aparadhi ko usake gunaaho ka ahsaas karwaate hue us par mukammal ki jaaye. saja ki kathinaayi ya usaki lambaayi se usaki value nahi naapi ja sakati." unhone apani gambheerata banaye rakhate hue kaha.
"aisa kaise ho sakata hai sir? bina kathin saja ke mile kisi aparadhi ko ye ehsaas dilana kitnaa mushkil hoga ki usaka gunaah kis darje ka hai?" maine pratiwaad kiya.
vo pahali baar muskuraaye par aawaj ki gambheerata ko banaaye rakhate hue bola.."kisi ek hadd tak tumhari baat sahi hai par mai ye baat apane zaati tajurbe se bata raha hu. mai khud bhi 18 saal tak judge raha hu. isliye mai janata hu ki kisi judge par faisala dete samay kitana dabaaw rahata hai."
"isaka matlab aapane bhi kabhi na kabhi koi faisala dabaw me aakar diya hoga(unaki saaf image ko jaanate hue bhi ye baat bolate hue mai kafi aanand mehsoos kar raha tha), to bataaiye aap par kisaka dabaaw tha, kisi politician ka ya kisi beurocrate ka.... ya(thoda sa muskurate hue) kisi paisewale ka?"
"apane zameer ka." unhone bina chidhe hue jawaab diya jisase mai thoda jhenp gaya.
"to kya aapane apane zameer ko kanuni niyamo se upar rakhate hue faisale sunaaye hain?"
"saare nahi... bas ek faisala."
"aisa kya tha us faisale me jo aapaka zameer aapke upar hawi ho gaya, kya aap mujhase share karenge?"
"aaj tak nahi kiya hai maine par aaj na jaane kyo mann kar raha hai tumase ye case share karane ka..... theek hai... tum suno.....ye kahaani hai...haa..(muskuraate hue) ise kahani hi kahunga kyonki tab ye case nahi bana tha...."
******************************
mere ghar ke paas hi 2 family rahati thi jiname aapas me bahut pyaar tha. un dono family ke ladaka-ladaki ka rishta bachpan se tay ho gaya tha. ladake ka naam Mridul aur ladaki ka naam Padmini tha. yathaa naam tatha gun wali baat un dono par sarthak hoti thi. ladaka apane naam ke anusaar hi behad mridul swabhaaw ka tha aur ladaki apane naam yaani rani padmini ki tarah hi atyant sundar thi. dono me behad pyar tha. shayad dono ne hi man se apane ghar walo ka faisala sweekar karake us par apane gahare pyar ki muhar laga rakhi thi. Mridul Padmini se takriban 2-3 saal bada hoga, isliye vo padmini ko kafi jyada pamper karata tha.bachpan se hi usaki har farmaish ko pura karana Mridul ki praathmikata hoti thi.Padmini ko apane roop-rang ka ehsaas tha aur ho bhi kyo na jab usako pamper karane ke liye Mridul jaisa chahane wala usake aas-paas har vakt maujud ho. ek baar maine dekha ki Mridul ek ped(tree) ke niche khada tha aur usake upar cheel(eagle) ka jhund hamala kar raha tha. usake shareer me kayi jagah zakhm dikh rahe the jaha se khoon nikal raha tha par vo tha ki apani jagah se tas se mas nahi to raha tha aur cheelo ka mukabala karane ki bharpoor koshish kar raha tha. mai jaldi se usake paas gaya aur use waha se kisi tarah
nikaal laaya.
"chhod dijiye mujhe, mujhe un cheelo ke ande utaarane hain ghosalo se taki un ando ki zardi se meri padmini ke chehare par aaye pimples theek ho jaaye. vo kab se ro rahi hai aur dukhi ho rahi hai ki ab vo bad-surat ho jaayegi. chhod dijiye mujhe, mai use dukhi nahi dekh sakata." mujhe usaki is bachpane par narajagi ki jagah hansi aa gayi... ki abhi ye aalam hai mohabbat ka to aage chal kar kya hoga jab ye aur inaki mohabbat, dono hi jawan ho jaayengi. khair...din beetate gaye aur dono ka pyaar aur bhi nikharata gaya. par ek baat jo sabako aasani se samajh me aati thi vo ye ki Padmini ki samajh me usaka roop hi usaka sabase bada gun hai jo Mridul ko usaki taraf aakarshit karata hai, use usaka dewana banaaye rakhata hai. aur Mridul bhi usaki khubsurati ko har vakt saraahate hue usaki is samajh ko bal pradaan karata tha. dono me aur bhi tamaam gun the par vo apani niji duniya me hi magan rahate the. ghar walo ne bhi tay shuda vakt par dono ki shadi karwaa di. ab to un dono ki mohabbat har haddo se aage jaane lagi thi. dono ki jodi dekh kar har koi rushk kar baithata tha. par dono ko is baat ki kabhi koi fikar hi nahi rahi. Mridul ab bhi apani Padmini ko chhote bachche ki tarah hi pamper karata tha balki ab aur jyada karane laga tha. ye Mridul hi tha jisane Padmini ko ye yakeen dila rakha tha ki vo is duniya ki sabase khubsurat ladaki hai. baaki koi bhi kuchh kahe na kahe, par Mridul ki aaknho me har samay apane husn ki taareef dekhane ki Padmini ko aadat bhi thi aur chahat bhi.
fir aaya vo din jisaki vajah se mai tumako ye sab suna raha hu(lambi saans lete hue)
Padmini ke chachere bhai ki shadi thi jisako attend karane ke liye dono dusare shahar jaa rahe the. us din baarish pure joro par thi aur hawaaye bhi pure raftaar se chal rahi thi.gaadi Mridul khud chala raha tha aur jaisa ki aksar hota hai, Padmini ke upar se apana dhyaan naa hata paane ki vajah se usaka dhyaan sadak par se hat gaya. naa jaane kaha se ek sariyo se ladaa huaa truck jo beech sadak par kharaab hua khada tha, unaki gaadi ke saamane aa gaya. bachaane ki tamaam koshisho ke baawjood bhi unaki gaadi us truck se puri raftaar se ja takaraayi.
Mridul ki aankh jab khuli tab usane khud ko ek hospital me paaya. usake left hand ki haddi toot chuki thi aur pure shareer par ghaawo ko dhakane ke liye pattiya bandhi huyi thi.hosh me aate hi usane sabase pahale Padmini ke baare me puchhaa. usako pata laga ki Padmini ko kafi jyada chote aayi hain par vo jinda bachane me kaamyab rahi hai. usane jab Padmini se milane ki baat boli to use bola gaya ki vo abhi coma me hai. hosh me aate hi aur khud
Mridul ke haalat me kuchh sudhaar aate hi un dono ko milawa diya jayega. Padmini ke jinda bachane ki khushi se hi Mridul ne apane dil ko tasalli di aur shant ho gaya. takreeban 15dino tak aise hi chala. un dono ke pariwar wale dono ko dekhane aate par hospital ke rules ki vajah se koi waha jyada der ruk nahi pata. Padmini ka haal puchhane par use tasalli di jaati ki vo bhi theek hai. par 15 din bhi beet jaane par jab usako Padmini se milwane ki koi koshish hote use nahi dikhi tab usane shor machana shuru kiya. kuchh der tak to hospital staff ne koshish kari ki vo shant ho jaaye par jab vo nahi mana tab majbur hokar un logo ne Mridul ko usaki Padmini se milaane ka arrangement kar diya. pairo me chot lagane ki vajah se Mridul langdaate hue Padmini ke ward ki taraf badha. use aseem dard ho raha tha par vo apane ek tute hue hath ko bhi Padmini se milane ki khushi me jhulate hue hi chal raha tha. Padmini ke ward ke bahar Padmini ki maa khadi thi. vo Mridul ko waha dekh kar sakapaa si gayi. unhone Mridul ko hausala rakhane ko kaha aur rote hue chali gayi. Mridul ne yahi samajha ki dono ke sath hue accident ki vajah se huyi takleefo ke liye aisa bola hoga mata ji ne. khair vo ye sab khyaal apane zehan se jhatak kar ward me dakhil huaa.
dhire-dhire vo Padmini ke bed ke kareeb ja raha tha. usaki uttejana badhati ja rahi thi.dil jis speed se dhadak sakata tha, us speed se bhi tej dhadakane laga tha. 'meri padmini ko aaj mai kitane dino baad dekhunga' yahi sochata hua vo aage badhata ja raha tha. door se jo dikh raha tha use vo ye ki bed ke paas khadi nurse Padmini ko koi cream laga rahi.'aap rahane dijiye sister.....ab mai aa gaya hu meri Padmini ka khyaal rakhane ko...laaiye mujhe dijiye ye cream, mai lagata hu ise'... bolate-bolate jaise hi Mridul ki najar Padmini ke chehare par padi usaki cheekh nikal gayi. usaki cheekh se jo Padmini aaknhe band kiye leti huyi thi vo bhi jaag gayi aur saamane apane Mridul ko paakar rone lagi. par Mridul to abhi bhi jaise sadme ki si haalat me thaa. usake muh se ek shabd bhi nahi nikal raha tha ab. nikalata bhi kaise, usake saamane jo Padmini thi usaki aisi surat to kabhi usake darwane se darawane sapane me bhi nahi dikhi thi.
gaadi ke sheeshe Padmini ke sar ke aadhe hisse ke andar gahare tak ghus gaye the jinhe nikalane me Padmini ki nagin si balkhaati julfe gayab ho gayi thi aur dikh rahi thi to usaki ghayal khopadi jaha se ab kabhi baal aane ki ummeed hi nahi bachi. usaki dhanush jaisi bhawe(eyebrows) aur usake gaal par bhi sheeshe ke tukado ne apana asar chhoda tha.right side ki aankh apani roshani kho chuki thi. jin gaalo ko sahalaate hue Mridul apani puri jindagi bita sakata tha, un gaalo ko to jaise kisi ne bhaari pattharo se kuchal diya ho. bataate hain ki usake gaalo me sariya ek gaal se dusare gaal tak faadata hua nikal gaya tha jisase usake dahina(right) gaal kuchala huaa lag raha tha. usake upari honth kat ke jhool gaye the jinhe doctors ne ab kaat kar alag hi kar diya tha. to ab usake daant masudo samet dikh rahe the, kal tak jo moti ke daano jaise mehsoos hote the vo ab behad darwane lag rahe the. aur bhi bura haal hua tha Padmini ka par mai unhe shabdo me bayaan
nahi kar sakata. doctors ke mutabik ab kabhi bhi padmini ki shakal puraane roop me vapas nahi aa payegi. kal tak jo roop ki pratimurti thi vo ab kurupata ki charam sima ko paar kar gayi thi.
ward me sirf Padmini ke siskiya hi goonj rahi thi. jin aankho me use humesha apane liye dewanagi dikhayi deti thi aaj waha use viraaniya hi najar aa rahi thi. apani vartmaan haalat se vo anjaan nahi thi par aaj un aaknho me use apani shakal ki kadawi, behad kadwi sachchaayi dikh rahi thi jo use puri tarah se tod gayi. usake pure shareer me sariye ghusane ki vajah se chot lagi huyi thi. haddiya ya to tuti huyi thi ya buri tarah ghayal
thi. vo apane dono haatho ko jaise taise uthaa ke khud ke gale tak le aayi aur apana hi gala dabaalne ki koshish karane lagi. nurse ne ye dekhate hi jor se daant kar usake hath ko hataane lagi. tabhi Mridul ne nurse ke haatho ko hataa diya aur padmini ke hatho par apana haath rakh ke use muskuraate hue dekhane laga. padmini ab ro nahi rahi thi par usaki aankhe abhi bhari huyi thi. Mridul ne pyar se usake chehare ki taraf dekha fir usake maathe ko chuma fir usake gaalo ko sahlaya. sahlaate hue usake hath jiname padmini ka hath thamaa huaa tha usake gale tak le aaya. waha bhi usane dheere se sahlaya par ab usake hath waha se hat nahi rahe the. gale par usaki pakad sakht ho chuki thi. Padmini ko dard mehsoos hua par usake hotho par muskurahat tairane lagi thi. nurse ne ye dekhate hi Mridul ka haath hatane ki koshish kari par jab vo nahi hata tab vo chillati huyi ward se bahar madad mangane ke liye daudi. Mridul ke cahare par pura itminaan tha, waha koi aur bhaaw nahi the.par Padmini ke chahare par muskurahat failati ja rahi thi jo usake nichale honth se samajh aa rahi thi. vo chilla sakati thi par vo chilla nahi rahi thi. jaise usane apane Mridul ko apani sahmati de di ho. padmini ki aankh me ab jaan nahi dikh rahi thi. usake muh se khoon chhalak aaya tha par Mridul ne apani pakad dhili nahi ki thi. jab tak hospital staff aata waha sab kissa khatam ho chuka tha.padmini mar chuki thi,apane hi Mridul ke haatho. par usake chehare par tamaam ghaawo ke sath ab ek sukoon dikh traha tha jo is baar bhi usake Mridul ki badaulat hi sambhaw ho saka.
******************************
"fir kya huaa sir" unaki gahan khamoshi ko bhang karata hua mai behad utsukata se bola.
"fir......fir kya....kismat ka khel kahiye ki kya kahiye, vo case meri hi adaalat me aaya. maine to un dono ki mohabbat ko apani aankho se parwaan chadhate dekha tha. isiliye jab bhi meri najare Mridul ki najaro se milati mai usaki najaro ka sandesh padhane ki koshish karata. finally jab case ki sari hearings khatam ho gayi aur dono taraf ke vakeelo ne apani daleele tamaam sabuto ke sath pesh karke khatam kari tab maine apani jindagi me pahali baar kanuni niyamo se upar apane dil, apane zameer ki suni aur faisala suna diya."
vo uth ke jaane lage, der to mujhe bhi kaafi ho chuki thi roj kr mukabale par apani utsukata ka kya karu jisane mujhe pins n needles par rakh diya tha. maine unhe rokate hue bola...
"aapane.....aapane use maaf karake riha karwa diya naa.....sach-sach bataiyega...jhooth mat boliyega."
apani aankh par chadhe chashme ko utaar kar use saaf karate hue unhone bola.. " ji nahi..... maine use fansi dene ka faisala sunaya. usaki liye yahi usaki sachchi rihaayi thi aur mere carrier ka bhi vo aakhiri faisala tha."
vo chale gaye aur mai awaak khada rah gaya.
______________________________
Wo roye to bahut, par mujhse
muh mod kar roye,
Koi majburi hogi jo dil tod kar
roye,
Mere samne kar diye mere tasveer
ke tukde,
Pata chala mere piche, wo unhe jod
kar roye
My storyIllusion......Ek Bhram???
(Completed)
![[+]](https://xossipy.com/themes/sharepoint/collapse_collapsed.png)