Xossip Ultimate Story Contest 2015

[Expert]

Ek Maa Ki Kahani

maahi1986

Mere retirement ko 10 saal ho gaye hain. Ab kaafi buddhha ho gaya hu...lekin swachchh batavaran, taaza khaan-paan aur sharirik mehanat ki wajah se abhi bhi jism me kaafi jaan hai.
Retirement ke baad mene shahar se jude huye ek gaon me hi ek khet khareed liya tha. usi khet me rehane ke liye 2 kamre, rasoyi aur latrine/bathroom banwa kar ek farmhouse ka roop de diya tha.
Yahiin fal-fruit aur saag-sabji bagarah ugaakar maze ki jindagi gujaar raha tha.
Shahar nazdik hi tha to kisi bhi chij ki aavashyakta hoti, jaakar le aata tha.
Wo bhi rojana ki tarah ek sadharan si shaam thi. Me apne gujre huye waqt ko yaad kar raha tha. Meri security officer ki naukri me kayi case aise aaye the, jinko me aksar yaad kar liya karta tha.
Mujhe to aap jaante hi hain. Jo nahiin jaante hain, unko apna parichay de deta hu- Mera naam inspector prem sagar urf inspector Bhaalu hai [img]- -web/20151023115747im_/http://xossip.com/images/smilies/icon10.gif[/img]
Ye case waise to ek case bhi nahiin tha. Sirf ek bayaan yaa kehana chaahiye ek kahani thi...ek maa ki kahani, jo usne mujhe sunaayi thi ek ummeed me, ek jimmedari dene ke liye. us aurat ke bayaan me pata nahi kya dard tha...jo aksar mere zehan par haavi ho jaata tha. Mujhe ek aise uttradhikaari ki khoj karni thi, jo kuchh takleefdey paristhitiyon me gaayab ho gaya tha.
**************************

Aaj se lagbhag 15 saal pehale mujhe ek marti huyi aurat ne bulaaya tha. Wo sirf mujhse hi...akele me kuchh kehana chaahti thi.
"Sahab...me aapko ek behad mushkil kaam saupna chaahti hu. Is kaam ka aapki naukari se koi talluq nahiin hai. Meri gujaarish hai ki aap ise ek marti huyi maa ki aakhri ichchha samajhkar pura karen. Mene aapki imandari, nishthha aur dayaluta ke baare me bahut suna hai, Isiliye aapko in antim kshanon me yaad kiya. Meri antim ichchha aur vasiyat...joki mej par rakhi huyi hai, ke vaaris ko aap khoj nikaalen, ye meri aapse hath jodkar vinati hai.
Agar aap kaamyaab rahe to 5 crore rupye aapki fees ke rup me likhi huyi hai aur....bhagwan naa kare lekin agar aap kaamyaab nahiin bhi huye to bhi ek crore rupaye me aapko abhi de rahi hu. Aapki mrityu ke pashchaat ye saari vasiyat vridhaashram me
donate kar di jaayegi"

Mene mej par rakhi vasiyat ko ek sarsari taur pe dekha. Usme lagbhag wahi likha tha, jo us aurat ne bataaya tha.
Usne paas hi rakhe ek suitcase ki taraf ishara kiya, jisme ek crore rupaye the.
Usne vistar se uthhne me meri madad maangi, jisse vah aaram se baat kar sake...kyuki uski aawaj toot rahi thi.
Ye ek bahut badi virasat thi. Us aalishan haweli ki har mehangi chiz apni naajukmizazi aur keemat ko khud bayaan kar rahi thi.
Marti huyi aurat kehati gayi-"aap pehale insaan hai jo meri bhayanak kahani sunne jaa rahe hain. Mera maan'na hai ki aapko sabkuchh pata hona chaahiye, jisse aap jaise udaar aur vishwaniya vyakti apni puri taqat ke sath meri antim ichchha puri karne me meri madad kar saken" aur wo puraani yaado me khoti huyi boli-"Shaadi se pehale me ek garib naujawan se pyar karti thi. Garib hone ke karan mere parents ne ye rishta khaarij kar diya aur jald hi ek bahut ameer aadmi ke sath meri shaadi kar di gayi. Mene bhi tamaam virodh ke baad ek anjaan insaan se shaadi kar li. Usse mujhe ek beta huaa. Kuchh saal baad mere pati ki ek road accident me mrityu ho gayi.

Is bich...jisse me pyar karti thi, usne bhi shaadi kar li. Jab use
pata chala ki me vidhwa ho gayi hu to use is baat ka dukh hua ki ab wah mujhse shaadi nahiin kar sakta. Vah mujhse milne aaya aur is qadar tadap-tadap ke roya ki mera kaleja muh ko aa gaya. Shaadi ke baad pehali baar wo mujhse milne aaya tha. Kaash....me us din usse milne se
manaa kar deti. lekin fir me kya karti?? me akeli thi, bahut udaas,
ekaangi aur bilkul niraash. Sabse badi baat...me ab bhi usse pyar
karti thi.
Mere maa-baap gujar chuke the. Unki bhi puri sampatti ki me eklauti vaaris thi. Mere paas apna kehane ke liye duniya me sirf wahi bacha tha.
Vah aksar aane laga aur mere sath shaame bitaane laga.

Ye jaante huye ki wo shaadishuda hai aur me jo kar rahi hu wo anaitik hai...mujhe use aise nahiin aane dena chahiye tha lekin...mere paas use rokne ki paryaapt ichchhashakti nahiin thi. wo meri kamjori aur bahut badi galati thi.
Me kaise bataau ki wo fir se mera premi ban gaya? yah sab kaise aur kab ho gaya...mujhe pata hi nahiin chala. me kya...shayad koi bhi aisi
baato ko nahiin samjha sakta.
Me maanti hu ki....aise halaat me kisi ko nakaar dena hamaare bas me hota to hai, lekin uske liye jitni ichchha-shakti aur saahas chaahiye tha, wo us waqt mujhme nahiin tha.
Apni hi khushiyon ko samaaj ke dar se nakaar dena kis kism ki naitikta hai? Us waqt mujhe sirf apni dabi-kuchli jindagi aur
ichchhaaon ki poorti karna hi sabse badi naitikta lagi. Wo
naktikta...jo mere sharir ki...apni vaasna ki purti ko sarvopari
maankar khud mere dimaag ne hi sahi samjhi thi.
Sankshep me kahu to saahab...me uski daasi ho gayi.
Aap bataaiye, ek aisi dhanwan aurat, jiski 7 pushten bina kuchh kare khaa sakti thi, wo kis dawab me aa sakti thi. wo chaahe to rojaana ek alag mard ke sath raat gujaar sakti thi aur koi naitikta use nahiin rok sakti thi. Iske bawajud mene sirf ek mard...wo bhi mere purv premi se hi sambandh rakhe. Kya galati thi sagar sahab meri??

Itni lambi jindagi bina kisi sahaare ke, apni ichchhaon ko maar ke nahiin jeena tha mujhe...aur me nahiin jee saki. Mene use apna sabkuchh saunp diya. meri har shaam uske sath mere bedroom me gujarti thi.
Saath hi use apne vyapaar ki puri vaagdor bhi saup di thi. uske pichhe teen kaaran the:
pehala- wo tab bhi gareeb hi tha aur ek chhoti si naukari karta tha. meri ichchha thi ki uski aarthik stithi sudhare.
dusra- mere dwara naukari dene par wo har pal mere sath reh sakta tha aur humaare sambandhon par sahsaa hi koi shak nahiin kar sakta tha.
teesra- usse jyaada vishwas-paatra koi vyakti meri najaro me tha bhi nahi.
mera kaam ab sirf signature karne tak seemit tha.
Uski dekhrekh me meri poonji din dooni raat chaugni raftaar se badhh rahi thi.
Hum dono ne mere bete ki achchhi tarah parvarish ki. Ab vah 18 saal ka naujawan ban chuka tha.
Mera beta, mere premi ki bahut izzat karta tha. Uski najar me vah apni maa ka puraana wafadar dost aur ek mehanati, imandaar karmchaari tha.

Mere bete ne kabhi bhi uske baare me sawal isliye nahiin puchha...kyuki wo hosh sambhaalne se lekar abtak use dekhta aa raha tha. Meri najar me vah uska pita tha.
Ek shaam darwaja khula aur mera premi usme se andar aaya. Mene baahen kholkar use gale lagaaya aur uske hothhon par ek lamba aur meethha sa chumban liya. wo mujhe pichhe hataakar thoda sa virodh kar raha tha, lekin mene swachchhandta aur kaam mad me doobi hone ke karan use aur taaqat se bheench liya.
Achanak ek halki si aawaj ne mere kaam mad me doobe mastiskk ko bataaya ki koi teesra shakhs bhi wahaan maujood hai. Dekha to behad naarazagi ke sath wahaan khada mera beta hume ghoor raha tha.
Vah meri zindagi ka ek nirmam aur bhayankar pal tha. wo pal isliye aaya kyuki mera premi, mujhe surprise dene ke liye mere bete ko hostel se laaya tha. Kaash...mujhe zara saa bhi pata hota ki wo bhi sath hai to aaj ye naubat nahiin aati.
Us nirmam pal ke dauraan jab mene dost se alag hote huye bete ki taraf yaachna ki mudra me hath aage badhhaya to wo...wo najar hi nahiin aaya. Vah jaa chuka tha.
Hum dono awaak...ek doosre ka muh taakte reh gaye.

Me sofa kursi me dhans gayi...chetna-shoonya see. Meri ichchha huyi ki me udkar hamesha ke liye kahiin door chali jaau.
Mere gale me subkiyaan uthhiin, mera dil tootne laga. Ek maa ki tamaam granthiyaan mujhe ek sharmnaak aur daraawane bhavishya ki aahat sunaane lagi.
Buri tarah darte huye mere premi ne meri or dekha aur mujhe
sambhaalne, chhune ki koshish kiye bina vah sakpakaata huaa bola-"me use dekhne, usse baat karne aur sab chije samjhaane jaata hu" aur vah teji se chala gaya.
Kayii kism ke khayaalon me mene uska intezaar kiya.
Kisi bhi aahat se me kaampne lagti thi. Mene 1 ghante...2 ghante intezaar kiya. Us ek pal ke me arbo rupye de sakti thi, jis pal wo mere bete ko sath laane ki khawar deta.

Kahaan gaya mera beta? kya kar raha hoga wo? ufff....wo pal sochkar hi me kaanp uthhti hu.
Karib aadhi raat ke waqt mere premi ne naukraani ke hath ek patra pahuchaya-"me use nahiin khoj paaya. me niche hu. is dukh ki ghadi me me tumhara saamna nahiin kar sakta, isliye is waqt upar nahiin aana chahta"
Mene usi kagaz par likh bheja-"kyo nahiin khoj paaye? tumhe wapas laana hi chahiye tha...tumhe use wapas laana hi hoga"
aur me puri raat us sofa kursi par dhansi rahi.
Mujhe laga me pagal hone wali hu. Meri ichchha ho rahi thi ki me
jungaliyo ki tarah daudu, zamin me lot lagaau. Lekin mene kuchh nahiin kiya....bass intezaar karti rahi.
Kya hone waala hai? mene sochne ki koshish ki lekin kuchh bhi aatma ko kasht dene laayak nahiin soch paayi.
Doosri taraf ye darr bhi sata raha tha ki agar wo dono mil gaye to kya hoga? mera beta kya karega? mera dimag darawani aashankaaon se fatne laga.

Aap samajh sakte hain naa sahab meri us waqt ki bhavnaayen? Meri naukaraani, jise kuchh bhi nahiin pata tha, wo baar baar aati aur me use ishaare se wapas bhej deti.
Wo pareshan hokar doctor ko bula laayi. Doctor ne bataaya ki mujhpar nervous breakdown ka attack aaya hai. Dimagi bukhaar bhi hai.
Lambi bimari ke baad jab meri chetna lauti to mene apne bistar ke paas akele baithhe apne premi ko dekha.
Me chillayi-"mera beta....kahaan
hai mera beta?"
Usne koi jawab nahiin diya. me fir cheekhi-"jinda hai ya khudkhushi kar li?"
"Aisa mat kaho pls. nahiin, kasam se aisa kuchh nahiin huaa. Lekin me apni tamaam koshisho ke bawajud use nahiin talash kar paaya"

Aur fir gusse aur narazgi me, jaisa ki auraten aise halaat me akaran fat padti hain, mene use keh diya-"jab tak use talash karke nahiin laate, tum mere paas bhi mat aana" aur wo chala gaya.
Aur tabse....mene un dono me se kisi ko bhi nahiin dekha....aaj tak.
Aur is tarah me pichhle 20 saalo se reh rahi hu.
Kya aap soch sakte hain....is daanavi sazaa ko....yuun dheere dheere ek maa ke dil ke fatne ki yaatna ko aur is kroor antheen intezaar ko aap samajh sakte hain???
Antheen.....nahiin..... ab to me marne wali hu aur mere marne ke sath hi ye intezaar bhi khatm hone wala hai. Me un dono me se kisi ko bhi dekhe bina marne waali hu.
Mera premi...pichhle 20 saalo se rojaana mujhe patra likh raha hai
lekin...mene aajtak ek baar to kya, 2 second ke liye bhi milne ki
izazat nahiin di. Kyuki mujhe ek ajib sa khayaal aata hai sahab.....khayaal ki mera beta thhik usi kshan wapas aa gaya aur usne fir se mujhe mere premi ke saath dekh liya to kya hoga?
Ohhh!! ohhh mera beta. Kya wo
mar gaya...yaa jinda hai?

Wo kahaan chhupa huaa hai? Kya wo kabhi mere baare me sochta hoga? Kya usne kabhi jaana ki usne mujhe kitni bhayaanak yaatnaayen di hain?
Kitni gehari yaatnaao aur nirashaao ke gehare kuye me dhhakel diya hai?
usne mujhe tab chhoda, jab me zindagi ke bicho bich khadi thi aur chhoda bhi to aaj 20 saal tak peeda bhogne ke liye....aaj jab me marne wali hu tab tak. Me uski maa, jisne use itni geharaayi se pyar kiya.
Haay...kya ye krurta nahiin hai sahab? Aap ye sab use bataayenge naa sahab? aap mere aakhri lafz use doharaayenge na sahab..."
Wo saans lene ke liye ruki, uski deh kaampne lagi...jaise aakhri ke shabd usne apne bete ke liye hi kahe ho aur wo jaise uske sirhaane hi khada ho.
Fir usne apni baat me jodte huye kaha-"aap bataana use sahab ki me fir us dusre aadmi...apne premi se kabhi nahiin mili. Mene meri galati ka...anaitikta ka, 20 saal prayashchit kar liya hai"
Ek baar fir wo ruki aur toot'ti aawaj me boli-"ab aap mujhe akela chhod dijiye sahab. me akele hi marna chaahti hu, kyuki mera beta mere sath nahiin hai"
************************

Aur fir me moorkho ki tarah me us haweli se baahar aaya. Sach keh raha hu...meri aankho me aansu aa gaye the. Dil bahut bhaari tha. Lag raha tha ki marti huyi aurat ne mere kandho pe 100 kilo ke patthar jitni jimmedari rakh di ho.
Me man hi man ye dradh-nishchay kar chuka tha ki mujhe is dukhiyaari maa ka beta khojna hi hai.
Pichhe se naukaraani bhaagte huye aayi aur wo ek crore rupye se bhara suitcase meri jeep me rakh gayi.
Lekin dosto......aaj us bete ko apni maa se bichhde 35 saal ho chuke hain....aur mere paas ye jimmedari aaye 15 saal ho chuke hain. Lekin Me uske bete ko......us apradhi bete ko kabhi nahiin khoj paaya.
Wo ek crore rupye mene kabhi kaam me nahiin liye. darasal kabhi unko hath lagaane ki himmat hi nahiin huyi. retirement ke baad wo rupye mene vraddhaashram ko donate kar diye.
Badaa dard hota hai dil me us maa ki kahani ko yaad karke.

Dosto...bahut khush-kismat hote hain wo bachche, jinko maa-baap ka saaya milta hai. ye aisi poonji hai, jise aap paiso se nahiin khareed sakte. isko bahut sahej ke rakho.
Galatiyaan sabse hoti hain. jab maa baap humaari hazaar galatiho ko maaf kar dete hain to kya hum unki 2-4 galatiho ko maaf nahiin kar sakte?
Me maanta hu ki kisi bhi bete ke liye apni maa ke is tarah ke sambandh sweekar karna mushkil hi nahi...bahut jyada mushkil hai. Lekin kya us bete ne jo kiya wo thhik tha?? Kya use apni maa ko kamse kam ek baar maaf nahiin kar dena chaahiye tha?
Mere khayaal se us bete ne sarasar galat kiya. Use kisi halat me aisa nahi karna chaahiye tha. Aapki kya raay hai....jarur bataayen [img]- -web/20151023115747im_/http://xossip.com/images/smilies/love.gif[/img]

THE END