ARJUN vs ZAHEER

[Greenwood]

Update 94




Scene – Campus Meeting Hall, Dophar ka waqt
Meeting hall me kursiyan ek circle me lagi thi. Arjun ka poster abhi bhi diwaron par chamak raha tha. Uske supporters ekdum excited, lekin andar se thode darr gaye the kyunki sabne Zaheer ka speech kal raat loudspeaker pe suna tha.
Arjun ne hall ke center me aakar ek chair pe khud ko casually bitha liya. Haath me ek marker uthaya aur saamne board par likha – “Dhamaka 2.0”.
Room me halki si fisa-fisi shuru ho gayi.
Arjun (smirk karte hue)
Darr kyu rahe ho? Zaheer ka speech sun kar lag raha hai game khatam ho gaya? Abhi to game shuru hua hai. Tum logon ne socha bhi nahi hoga… ki ab hum kya karne wale hain.
Uska ek supporter aage aaya.
Supporter
Arjun bhai, Zaheer ne public ko ekdum apni taraf kheench liya hai. Ab kya plan hai?
Arjun khada hua, marker ghoomata hua board pe 3 circles banaye.
Arjun
Plan simple hai… hamara message ek rally ya speech tak simit nahi rahega. Main chahta hoon ki har student, har classroom, har gali… bas ek hi cheez bole – Arjun.
Usne marker se likha – Flash Campaign.
Sab thoda confuse hue.
Arjun (muskaan ke sath)
Hum har jagah ek hi din, ek hi waqt par apna symbol flash karenge. Posters, flags, slogans… aur ek grand announcement jo Zaheer ke pure campaign ko overshadow kar dega.
Ek ladki supporter boli
Grand announcement? Kya hoga woh?
Arjun thoda ruk kar, apni aankhen tez karte hue bola.
Arjun
Woh… mera surprise card hai. Abhi time aane pe pata chalega.
Sab cheer karne lage, lekin Arjun ke chehre pe ek alag hi confidence tha – jaise ki usne apne dil me koi bada dhamaka plan chhupa rakha ho.

Scene – College Assembly Hall, Afternoon
Assembly hall me aaj unusual crowd tha. Har jagah Arjun ke posters, stage ke saamne ek spotlight aur center me mic laga hua tha. Students ki fisa-fisi chal rahi thi – sabko lag raha tha Arjun kuch bada karne wala hai.
Arjun dheere-dheere stage par chadha. White kurta aur uske chehre par ek confident muskaan. Hall ekdum chup ho gaya jaise sabko bas uske shabdon ka intezaar ho.
Arjun
Main maanta hu… mere kaabil dost mujhse jyada kaabil hai. Mera purana mitr Zaheer ek genius champion hai… aur meri behen Shanaya ek tez tarrar ladki. Lekin main bas yeh kehna chahta hu… ki un logon ne meri burai toh bahut ki… lekin unka vision kya hai?
Students bechain ho kar ek dusre ko dekhne lage. Arjun apni awaaz aur tez karta hai.
Arjun
Bhaiyo aur behno, sirf mujhe neecha dikhakar koi leader nahi ban jata. Agar sach mein inke paas motive hai… toh bas itna batayein. Is election ko ladne ka asli wajah kya hai?
Arjun ek pause leta hai, aur seedha camera ki tarah saamne baithhe crowd ki aankhon me dekh kar bolta hai.
Arjun
Main invite karta hu Zaheer aur Shanaya ko. Ek one on one debate ho jaye. Mere samne, aap sabke samne. Mujhe galat sabit karna hai toh khul kar kijiye. Arjun vs Zaheer.
Hall me tezz taliyon ki goonj gunj uthi. Posters hilne lage, slogans shuru ho gaye – Arjun! Arjun!
Arjun apne dono haath jod kar stage se neeche utar gaya, lekin uske chehre par woh smirk tha jo sirf ek asli challenger ka hota hai.
Scene – Zaheer ka Party Room, Shaam

Room ke andar hawa mein tension chipak gayi thi. Posters, charts aur strategy notes har jagah bikhre hue the. Zaheer ek kursi par baitha tha, dono haath jor kar apne knees par rakhe hue. Uske chehre par ek ajeeb si khamoshi thi, jaise dimaag ghoom raha ho.
Shanu saamne khadi thi, dupatta shoulder se phisal kar ek taraf latak raha tha. Usne abhi hall se aakar Zaheer ko sab bataya tha.
Zaheer (dheere se, halki si hansi ke saath)
Toh… Arjun ne finally khud hi raasta khol diya. Mujhe laga tha woh bachke nikal jayega, lekin usne apne pair se khud hi phanda kas liya.
Shanu (gusse aur focus ke beech)
Haan… lekin Zaheer, tum underestimate mat karna usse. Tum jante ho uski style… wo sirf bolta nahi, crowd ko feel karata hai. Aur debate mein crowd ka dil jeetna hi asli jeet hai.
Zaheer uski taraf dekhta hai, aankhon mein ek ajeeb si intensity ke saath.
Zaheer
Aur tumhari wajah se hi toh main jeetunga, Shanaya. Tum strategy banao… main usse shabdon se dhool chata dunga.
Shanu ek kadam aage badhti hai, uski awaaz aur narmi aur sakhti dono mila kar.
Shanu
Strategy tab kaam karegi jab tum shabd control kar paoge. Debate mein woh tumhe personal level par attack karega, tumhe provoke karega. Agar tum gusse mein aaye… toh uske haath khel jaayega.
Zaheer thoda rukta hai, aur fir apni kursi ki back par jhuk kar muskurata hai.
Zaheer
Tum mujhe bachpan se jaanti ho, Shanu. Main Zaheer hoon… aur debate meri jaan hai. Is baar… Arjun samajh lega ki game sirf slogans ya popularity se nahi jeeta jaata.
Shanu ka chehra abhi bhi serious tha. Usne apni diary uthayi aur ek page khola.
Shanu
Theek hai. Agar tumhe Arjun ko haraana hai… toh tumhe uske shabdon ka jawab shabd se dena hoga. Har point ke liye tum ready rahoge. Main tumhe prepare karungi… tum bas mere har step follow karna.
Zaheer (thoda smirk ke saath)
Tum ho na mere saath… toh mujhe Arjun se dar nahi.
Camera dheere-dheere Shanu ke chehre par zoom hota hai, jahan uski aankhon mein ek alag si chamak thi — jaise usne apna ultimate challenge accept kar liya ho.

Scene – Ammu ka Room, Raat ka Waqt
Hawa bilkul suni si thi. Pankhe ki halki ghumti hui aawaaz ke alawa kamre mein koi saaz nahi tha. Ammu apne bistar ke kone par guthamuthi ho kar baithi thi, dono haathon se apna dupatta pakad kar jaise apne dil ko daba rahi ho.
Uske saamne study table par khuli diary padi thi… lekin uske panne khud uski uljhanon jaise bekaar lag rahe the. Kal ke debate ka khayal uske dimaag mein baar-baar bijli ki tarah ghoom raha tha. Arjun ka confident challenge, Zaheer ki taiyaari, aur ab Shanu ka unke saath khade hona… sab ek saath uske dil par bojh ban gaye the.
Ammu (apne aap se, halki si aawaaz mein)
Ye sab mere saamne kyu ho raha hai… Baba ka naam, Zaheer ki izzat, Shanu ki himmat… aur Arjun… uski wo aankhein… mujhe kyu confuse kar deti hain?
Uski aankhon mein aansu bhar aaye, aur usne turant dupatte se poch liye. Lekin dil ka darr nahi ja raha tha. Kal agar Zaheer hara toh… uska confidence tut jayega. Agar Arjun jeeta toh… aur bhi kathin ho jaayega, kyunki fir uska har kadam Ammu ki zindagi ko directly chhoo lega.
Usne diary bandh ki aur bistar par let gayi, chhat ki taraf takti hui.
Flashback ki tarah uske dimaag mein Arjun ka wo muskurata hua chehra ubhar aaya, jab usne campus mein usse sidhe aankhon mein dekh kar kaha tha — Main tumse haar nahi maanunga. Ammu ne apni aankhen band kar li aur haath se kan dhak diye, jaise uske shabd abhi bhi uske kaan mein ghoonj rahe ho.
Ammu (andar hi andar)
Main kya karu mere maalik… main kiske liye dua karu… aur kiske khilaaf?
Camera dheere-dheere zoom hota hai uske chehre par, jo ghabrahat aur dare hue aansuon ka mila jula manzar tha. Us raat Ammu ko neend nahi aayi, bas har pal ek nayi uljhan uske dil mein badhti gayi.
Scene – College Assembly Hall, “Arjun vs Zaheer Debate”

Assembly hall pin drop silence mein tha, har seat bhari hui thi. Students ke chehre par excitement aur tension dono likhi thi. Moderator ne mic sambhala.
Moderator
Aaj ke is special session mein humare beech honge ek face-to-face debate, jisme candidates apne apne visions rakhenge. Ek taraf hain Arjun Singh, aur doosri taraf Zaheer qureshi. Shuru karte hain opening statement se.
Zaheer ka Opening Statement
Zaheer confident hote hue khada hota hai.
Zaheer
Doston, main election isliye lad raha hu kyunki mujhe lagta hai hamare college mein ek gap hai… ek disconnect. Hamesha kuch selected students ke liye opportunities banti hain, aur baaki sab ignore kar diye jate hain. Mera vision simple hai – inclusivity. Main chahata hu ki har student ki awaaz suni jaye, chaahe wo sports mein ho, academics mein ya arts mein. Main propose karta hu ek Open Forum Committee jisme har department ka representative ho, taki kisi bhi student ki problem direct administration tak jaye.
Zaheer ne apna point samjhaya, students kuch haan mein sir hilate hain.
Arjun ka Opening Statement
Arjun relaxed tone mein khada hota hai.
Arjun
Zaheer ne ek accha point uthaya… lekin mera sawal hai, kya bas committee banana hi solution hai? Aaj tak kitni committees bani aur dhool kha rahi hain files mein? Mera plan hai execution. Main propose karta hu ek Digital Grievance System – ek app jahan har student apni problem daale aur uska tracking ID ho. Problem solve ho ya pending, sab transparent hoga. Isse accountability aayegi, aur faaltu politics khatam hogi.
Students ke beech se loud cheer nikalti hai.
Cross Questioning Round – Zaheer → Arjun
Zaheer
Arjun, tum keh rahe ho app banaoge. Lekin ground reality ye hai ki hamare college ke majority students ke paas basic digital facilities hi nahi hain. Jo offline struggle kar rahe hain unka kya? Tumhara system unhe aur isolate karega.
Arjun
(slight smile)
Zaheer, tumne ek valid concern uthaya. Lekin ground reality ye bhi hai ki 80% students ke paas smartphones already hain. Jahan nahi hain, wahaan computer labs provide karna meri zimmedari hogi. Tumhara solution committee banane tak limited hai… mera solution execution tak jaata hai.
Audience se ek zor ki taali.
Cross Questioning Round – Arjun → Zaheer
Arjun
Zaheer, tum keh rahe ho inclusivity. Lekin tumne kabhi openly students ko yeh bataya ki tumhari priority kya hogi? Infrastructure? Scholarships? Or cultural fests? Har candidate ka vision specific hona chahiye. Tumhara kya hai?
Zaheer thoda ruka, phir bola.
Zaheer
Meri first priority hogi fee transparency aur financial aid. Bahut saare students chhup kar struggle karte hain kyunki unke ghar ke halat theek nahi. Main chahata hu ki ek fund ho jahan needy students ko bina sharminda kiye help mil sake.
Hall mein kuch students emotional ho jate hain.
Arjun
(pointing)
Zaheer, main tumse poochta hu – ye fund kahan se aayega? College ki already fixed budget hai. Agar tum naye fund laoge to kahin aur cut hoga. Kaunsa sector sacrifice karega? Sports? Library? Ya cultural fests?
Zaheer thoda defensive hota hai.
Zaheer
Main industrial sponsorships aur alumni donations involve karunga. Fund ka source students ki basic facilities se cut karke nahi hoga.
Arjun sir hila ke note leta hai, phir calmly bolta hai.
Arjun
Good point. Lekin sponsorships aur donations ke bharose students ke future ko risk pe rakhna… kya ye practical hai?
Hall ekdam se murmur karta hai.
Closing Statements
Zaheer
Main perfect nahi hu, lekin main dil se koshish karna chahta hu ki har student ko equal opportunity mile.
Arjun
Main bhi perfect nahi hu… lekin main bas ye kehna chahta hu, main aapka dost ban kar aapke saath khada rahunga, boss ban kar upar se rule nahi karunga. Mere solutions shayad tough ho, lekin practical hain. Aur practical hi college ko badlega.
Moderator ne debate khatam hone ka signal diya. Hall ghoonj utha taaliyon aur cheers se – aur ye clear tha ki crowd Arjun ke favour mein tha. Zaheer aur Shanu dono apas mein khamosh baith gaye… pehli baar unke chehre par defeat ka asar dikh raha tha.


Scene – Evening, Zaheer’s room
Room andhera tha, sirf ek table lamp ki halki roshni jal rahi thi. Zaheer sofa par baitha hua tha, dono haath maatha pe rakh kar chhup se stare kar raha tha. Shanu opposite chair par thi, notebook kholi hui, lekin pen uske haath mein idle pada tha. Dono ke chehre par ek hi cheez likhi thi – haar ka bojh.
Shanu
Zaheer, honestly bolu… aaj hum log badly outsmart hue. Tumhare points strong the, emotional bhi the, lekin Arjun ne har angle ko practical bana diya.
Zaheer
(heavy voice)
Mujhe pata hai. Crowd bhi clearly uske saath tha. Usne mujhe ek aise trap mein dala jahan mere answers hollow lagne lage.
Shanu ne notebook bandh kar di.
Shanu
Usne ek strategy use ki – har baar tumhare point ke baad ek counter-question. Tumhare paas vision tha lekin detailed plan nahi… aur usne wahi pakad liya.
Zaheer sir hila kar lean hua, aankhon mein thoda gussa.
Zaheer
Arjun ko underestimate karna sabse badi galti thi. Mujhe laga wo bas baseless promises karega jaise har candidate karta hai… lekin usne data aur practicality ke saath bola.
Shanu ne calmly jawab diya.
Shanu
Aur crowd psychology usne masterfully handle ki. Har baat mein dosti, loyalty aur transparency ke emotional cards kheele. Students relate kar gaye.
Ek lambi khamoshi chhayi. Dono ek dusre ki taraf dekhe bina soch rahe the.
Zaheer
(to himself)
Agar yeh pattern chala, election uske favour mein slip ho jayega. Mujhe apne agenda ko aur concrete karna hoga. Aur mujhe Arjun ko uske hi field mein beat karna hoga – execution.
Shanu
(slightly leaning forward)
Exactly. Humein ek detailed manifesto banana hoga – point by point, har department ke liye. Sirf emotional connect se kaam nahi chalega, humein usse zyada crisp aur structured plan dena hoga. Aur ek aur baat Zaheer…
Zaheer uski taraf dekhta hai.
Shanu
Tumhe apni image control karni hogi. Aaj students ne tumhe thoda defensive dekha. Next round mein tumhe aggressive aur confident dikhna hoga, warna momentum poora uske side chala jayega.
Zaheer ne gehri saans li aur finally Shanu ki aankhon mein dekha.
Zaheer
Arjun ne pehla round jeet liya hai, lekin game abhi khatam nahi hua. Main usse harane ke liye apni puri strategy badalunga.
Shanu ne thoda muskaan di, lekin uske chehre pe bhi ek halki tension bani rahi.
Shanu
Toh phir prepare ho jao… ab hamara next step decide karega ki yeh election kis taraf jaayega.
Room mein lamp ki light aur dono ke serious chehre hi bas dikh rahe the – ek war room jaisa mahaul tha, jahan defeat ko analyse karke next move tayyar kiya ja raha tha.
Scene – Same Room, Thodi Der Baad

Lamp ki roshni ab aur bhi mellow lag rahi thi. Zaheer ab bhi sofa par aage jhuka hua tha, haath ki ungliyon ko jod kar gahan soch mein. Shanu usse dekhti rahi, fir dheere se boli.
Shanu
Tumhe maloom hai Arjun aaj kyu jeeta?
Zaheer ne sar uthaya, thoda thaka hua sa lekin confident tone mein bola.
Zaheer
Haan… kyunki usne mujhe meri hi language mein beat kiya. Facts ke saath, vision ke saath, aur har cheez ka ek ready jawab tha uske paas.
Shanu ne chhoti si halki muskaan ke saath sir hilaaya.
Shanu
Bilkul. Tum sahi keh rahe ho… lekin ek wajah aur bhi hai.
Zaheer curious ho kar uski taraf dekhta hai.
Shanu
Uske paas ek management team hai. 40-50 log jo uske har kaam ko handle karte hain – slogans, posters, crowd mobilisation, data, speech polish karna. Tumne notice kiya hoga, stage pe uske answers crisp the kyunki pichhle do din se uski team unhe sharpen kar rahi thi. Aur humare paas?
Zaheer ne ek bitter sa smile diya.
Zaheer
Sirf hum do. Main aur tum.
Shanu ne uski aankhon mein seedha dekhte hue kaha.
Shanu
Toh sabse pehla kaam yehi hai, Zaheer. Agar humein usse takkar leni hai toh ek team banani hogi. Dedicated log jo sirf humare liye kaam karein, har front sambhalein. Ek strong core group. Tabhi hum uske level pe compete kar sakenge.
Zaheer ne thoda relax hote hue peeche sir tikaya aur uski taraf dekha. Kuch seconds ke liye dono ke beech silence raha, sirf ek doosre ki aankhon mein ek silent agreement tha.
Phir dono ke lips par ek saath ek chhoti si confident muskaan aayi – ek understand wali smile.
Zaheer
(softly)
Team banayenge. Aur iss baar… har move calculated hoga.
Shanu ne haan mein sir hilaaya.
Room ke mahaul mein ab pehle jaisa defeat ka bojh nahi tha, balki ek nayi tayyari ki aahat thi – jaise do soldiers apni army banane ka faisla kar rahe ho.