ARJUN vs ZAHEER

[Greenwood]

Update 86




DJ ke dhol, nagade aur filmy bihari gaane beech campus ko hilaye ja rahe the. Juloos static department ke saamne rukta hai. Bhid ke beech se ek mic uthakar Arjun ne apne haath me pakad liya.
Mic jese hi uske honthon ke kareeb aaya, DJ ne volume dheere kar diya. Sab log ab bhi nachte, thirakte aur chilla rahe the, lekin sabke beech Arjun ki awaaz goonj uthi.
Arjun
Aaj se ek naye daur ki shuruaat ho rahi hai. Main, Arjun Singh, yeh ghoshna karta hoon ke main iss saal ke College Election ke liye apna form bharne aaya hoon. Aur sirf form bharne nahi, balki iss campus ko ek nayi soch, naya josh aur nayi pahchan dene ke liye aaya hoon.
Bhid ek dum se waah waah aur zindabad ke naroon me phat padti hai.
Arjun ne apna haath upar uthakar sabko shaant karaya.
Arjun
Aur sabse badi baat – main iss election me akela nahi hoon. Main unhi logon ka candidate hoon jinhone pichle saal bhi iss college ka election jeeta tha. Haan, wohi party, jisne yahan ke students ke liye apni jaan laga di thi. Aur is baar, unhone mujhe chuna hai – apna candidate banakar!
DJ ne is point par ek dhamakedar beat chala di. Sab log josh me naach uthe.
Arjun ka chehra ab ek neta ki tarah chamak raha tha, awaaz me bijli ka jhatka tha.
Arjun
Doston, mujhe pata hai tum sabko darr dikhaya jaa raha hai… kuch log apne muscles ke dum par is college ko kabza karna chahte hain. Kuch log humare sapne todna chahte hain. Lekin sun lo! Jab tak Arjun Singh zinda hai, koi bhi iss campus ki aazadi ko khatre me nahi daal sakta!
Nare goonj uthte hain – Arjun bhaiya zindabad! Humara neta kaisa ho, Arjun Singh jaisa ho!
Arjun apna josh bhara bhashan jari rakhta hai.
Arjun
Yeh ladai sirf ek kursi ki nahi hai. Yeh ladai humare haq ki hai. Yeh ladai hai iss campus ke izzat ki! Aur iss baar… yeh kursi hum jeetenge. Sirf jeetenge hi nahi, iss campus ka har ek student is fakhr se bolega ki haan, humne apna bhavishya Arjun Singh ko diya tha!
Arjun ne mic ko hawa me uchaal kar phir se pakda, aur DJ ne ek aur dhamaka kar diya. Bhid ka josh aasmaan chhoo gaya.
Zaheer, Ammu aur Shanu jo thodi door se yeh sab dekh rahe the, bas khamosh aur hairan khade rahe. Unke liye yeh sab ek nayi jung ki shuruaat thi.
Bhid ka josh apne shikhar par tha. DJ aur dhol nagade phir se ugra beats bajane lage. Arjun ko phir kandho par utha liya gaya aur poora juloos static department ke andar ki taraf badhne laga. Chaaron taraf rang, gulal aur naroon ka tufaan tha.

Montage shuru hota hai –
Arjun ke haathon me ek shining golden pen zoom shot me dikhaya jaata hai, jise wo dheere se kholta hai. Us waqt anwar madam aur baaki staff ek taraf khade hain, unke chehron par ek ajeeb sa excitement aur garv ki chhata hai.
Nikhat bhi us bheed ke ek kone me khadi hai. Uska nazar Arjun par jaa tikti hai. Arjun jab form ko samne kholta hai, tab ek pal ke liye uski aankhen seedhe Nikhat se milti hain. Us nazar me ek silent conversation chalti hai – jisme junoon bhi tha, vishwas bhi, aur ek anjana rishta bhi.
Camera close-up dikhata hai – Arjun apna pen form ke pehle khane par rakhta hai. Ek powerful pause. Phir Arjun apni khas confident style me sign kar deta hai.
Sign karte hi uske aas paas se phir se Arjun Singh Zindabad ke naare goonj uthte hain. Arjun sign ke baad bina dekhe pen ko hawa me uchhal deta hai. Pen seedha ghoomta hua ek staff ke paas girta hai aur sab taaliyon ke shor me phat padte hain.
Thodi der baad Arjun phir se kandho par uthaya jaata hai. Bhid ke chehre rang aur gulal se bhar jaate hain. DJ ka bass, dhol ka dhamaka aur gaane ek baar phir campus ko hilane lagte hain.
Bhid ka yeh karwaan, Arjun ko kandho par liye hue, naach-gana karte hue dheere dheere campus ke main gate ki taraf badhta hai. Har mod, har gali rang aur dhool ke tufaan me doob jaata hai.
Aur phir – jaise hi gate ke paar hota hai, wohi anonymous tagde log, wohi rang se sane hue chehre aur dholi, sab Arjun ke kafile ke saath hi campus se bahar nikal jaate hain.
Ek pal me jo college shaam jaisa lag raha tha – rang, gaane aur afra tafri se bhara hua – woh ekdam se khamosh ho jaata hai. Gate ke us paar Arjun aur uska juloos aage badh jaata hai, aur gate ke is paar sirf students, Ammu, Shanu aur Zaheer ek dusre ki taraf hairan aur sochte hue khade reh jaate hain.

Campus ka mahaul ekdum se thanda pad gaya tha. Dhoop se rang aur gulal abhi bhi hawa me tehr rahe the, par awaazon ka tufaan ek jhatke me khatam ho chuka tha. Gate ke uss paar Arjun ka juloos shor machata hua door jaa raha tha, aur is paar sab kuch ajeeb si khamoshi me dab gaya tha.
Zaheer ek pal tak gate ki taraf takta raha, uske chehre par uljhan bhi thi aur gussa bhi. Phir dheere se usne apni nazar Ammu aur Shanu ki taraf ghumayi.
Zaheer
Ye sab kya tha? Tum dono jaante the?
Ammu abhi bhi apni chaadar ko kas ke pakad kar khadi thi. Uska chehra rangon se bhar gaya tha, par uski aankhon me darr aur uljhan dono the. Usne nazar jhukai aur dheere se bola.
Ammu
Hume bhi nahi pata tha... bas itna samajh aa raha hai ki Arjun ne kuch bada plan kiya tha.
Shanu ne ek gehri saans li aur zaheer ki aankhon me dekh kar jawab diya.
Shanu
Aur ye anonymous log... tumne dekha na? Ye sirf college ke students nahi the. Bahar ke log the, bahut organized tareeke se aaye the. Yeh sab pehle se tayyar tha.
Zaheer ne zameen pe pair patka jaise uske andar ka gussa control se bahar nikal raha ho.
Zaheer
Mujhe samajh nahi aa raha... Arjun election me? Aur uss party ka candidate? Aur itna bada show? Ye sab bina kisi backing ke possible hi nahi hai.
Ammu ne aankhon me paani bharte hue zaheer ki taraf dekha, uski awaaz halki si kanp rahi thi.
Ammu
Zaheer... mujhe darr lag raha hai. Yeh sirf ek election ka chakkar nahi lag raha... lagta hai kuch aur hi khel ho raha hai.
Zaheer uske paas aaya, uske kandhe par haath rakha aur uski aankhon me dekh kar kaha.
Zaheer
pata nahi, lekin tum dono ko kuch dino tak safe rehna hoga
Shanu ne sir hila kar kaha.
Shanu
haan.. zaheer Sahi keh rahe ho
Zaheer ne aankhe tedi karke shanu ki taraf dekha jaise ki wo puch raha ho ki yeh sab kya tha shanu? Kya tujhe maloom tha pahle se?
Teeno ek jagah chup chaap khade rahe, jaise us khamoshi me apna apna faisla kar rahe ho. Gate ke uss paar se dhol nagade ki awaaz ab bhi kamzor si goonj rahi thi, par iss paar teeno ke dilon me ek naye toofan ka aahsaas jag raha tha.
Canteen ka mahaul abhi bhi rangon aur dhoop ki khushbu se bhara tha, lekin shor sharaba chala gaya tha. Students apne groups me chup-chup baatein kar rahe the, koi Arjun ke entry ko discuss kar raha tha, koi uske speech ke bare me. Lekin ek table ke paas achanak tanav bhar gaya.

Zaheer sidha andar aaya, uski chaal tez aur chehra tensed tha. Bina rukke wo seedha uss kone ki table tak pohcha jaha Taz apna cold drink sip kar raha tha jaise kuch hua hi na ho. Zaheer ne turant uski gardan pakad li aur uske kareeb jakar teeth ke beech se bola.
Zaheer
Yeh sab kya tha, saale?
Taz pehle toh jhatke me aaya, phir ek dum apni kursi pe aram se pichhe tik gaya, jaise usse koi farq hi na padta ho. Usne apni awaaz badal kar ek dum Bollywood hero jaise andaaz me mimicry ki.
Taz
Mujhe nahi maloom mere bhai... main toh bas ek aam admi hoon jo canteen me samosa khata hai. Arjun ke rang-gulal ke khel se mera kya lena dena?
Zaheer ki pakad aur tight ho gayi, uski aankhen gusse se bhari thi.
Zaheer
Bakwas band kar, Taz. Sach bol, saale. Tujhe uski har baat maloom hoti hai aajkal.
Taz ne halki si hansi chhodi, phir neck chhuda kar thoda style me baitha jaise koi filmy gangster dialogue bolne wala ho. Uski aankhon me ek mischievous sparkle tha.
Taz
Arre bhai... Arjun bhaiya ki planning samajhna koi aam baat nahi hai. Tum soch rahe ho main sab jaanta hoon? Main toh sirf itna jaanta hoon ki jab entry karni hoti hai, toh dhamaka hona chahiye. Aur aaj wahi hua.
Canteen me aas paas baithe kuch students chup ho gaye, unki curiosity aur badh gayi. Zaheer ne table par haath patka, uski awaaz kadak thi.
Zaheer
Main majak nahi kar raha,
Taz ek pal ke liye serious hua, usne cold drink ka glass uthaya aur dheere se sip le kar bola.
Taz
Bas itna samajh lo bhai... aaj ke baad Arjun bhaiya sirf ek player nahi rahe. Ab wo khel ke board par khud ek bada mohra ban gaye hain. Aur mohre ke moves... tumhare jaise opponents ke samajhne se pehle hi chal diye jaate hain.
Zaheer ki jaw tight ho gayi. Ammu aur Shanu, jo kuch door se ye sab dekh rahe the, ek dusre ki taraf uljhan bhari nazar se dekhte hain. Ye pakka tha
College ka purana classroom… jisme kabhi bench ki lakdiya khatakti thi, ab sirf khamoshi aur dhool ka bojh tha. Khidkiyon se dhoop ke patle patle tukde ander gir rahe the, aur hawa se udh kar purane notes ke kataray idhar udhar hil rahe the.

Isi sannate me, ek bench par Zaheer aur Shanu baithe the. Dono ke beech ki khamoshi itni gehri thi ki lag raha tha jaise purani deewar bhi unki baaton ka intezar kar rahi ho.
Zaheer ke chehre par wo rough, intense sa expression tha. Uske dono haath ghutnon par kas ke bandhe hue the, aur wo sidha Shanu ki taraf ghur raha tha.
Zaheer
Tumhe sach me kuch bhi maloom nahi tha, Shanu?
Tum Arjun ki itni close ho… aur aaj ka tamasha tumhare saamne ho gaya. Tumhe pehle se andaza bhi nahi tha?
Shanu thoda ghabra ke uski taraf dekhti hai. Uske chehre pe uljhan, aankhon me pareshani thi. Usne apna dupatta samet kar dheere se kaha.
Shanu
Zaheer… main tumhe yakeen dilati hoon… mujhe bilkul bhi nahi pata tha.
Zaheer ki jaw tight ho gayi. Usne apni ungli bench ki lakdi par chalayee jaise andar ka gussa nikal raha ho.
Shanu ki awaaz me thoda guilt tha, lekin wo apni baat par tik gayi.
Shanu
Haan, mujhe kuch bhi nahi pata. Main khud shock me hoon… mujhe laga tha wo bas tournament aur apni personal cheezon me busy hai. Tum soch bhi kaise sakte ho ki main tumse kuch chhupati?
Zaheer ne uski aankhon me ghur ke dekha, jaise uske dil ke andar tak dekhna chahta ho. Uski awaaz dheemi lekin bharay hue gusse se nikalti hai.
Zaheer
Main tum par bharosa karna chahta hoon, Shanu… lekin
Ye sunte hi Shanu ki aankhen bhar aayi, usne sir jhuka liya. Usne halki si rone wali awaaz me kaha.
Shanu
Main tumse jhoot kyu bolungi, Zaheer? Main toh khud confuse hoon
Classroom me phir ek bhari khamoshi chha gayi. Bahar corridor me students ki halke shor ki goonj aa rahi thi, lekin andar sirf un dono ki saanson ka bojh tha.
Zaheer ne apne haath ki muthi khol di aur thoda dheere se kaha.
Zaheer
waha kuch bhi ho sakta tha shanu, waha meri behen thi ammu... Tumne dekha kaise wo mota saand jaisa aadmi uski taraf aage aaya tha
Shanu ne uski taraf dekha, aankhon me abhi bhi pareshani or aansu they,
Shanu
waha main bhi thi zaheer... Or main bhi wahi expect kar rahi thi waha tumse jo ammu kar rahi thi, wo aadmi meri taraf bhi aaya tha,usne mujhe bhi ganda ishra kiya tha, bas fark itna hai ki Ammu ne tumhe bhai samajh kar bharosa kiya or maine tumhe apna pyaar
Zaheer ne ek lambi saans li, aur uska chehra sukh gaya murjha gaya, usne aage badh kar shanu ka hath pakada or uske aansu ponchhe...
Zaheer
Sorry shanu, maine tumse aise baat ki... Par tum khud dekho ki yeh sab kya tha... Or yeh arjun kin logo ka sath de raha hai... Aaj waha tum dono they kal koi or masoom bechari hogi... Tum dono ke sath to main tha, lekin har ladki ka bhai or pyaar nahi hota unhe bachane ke liye
Shanu ko uski baat samajh aati hai or uske mann me ab arjun ke liye kai sawal khade ho gaye they or ek anjana gussa bhi
Purane seminar hall ko ab Arjun aur uske supporters ne apna “strategy room” bana liya tha. Bade bade banners folded padhe the, whiteboard par slogans likhe hue the, aur kuch jagah par rang aur brush ke dabbe. Room ke beech ek lambi table thi jisme sab members baithe the.

Arjun ke aane se sab ka attention us par chala gaya. Uski aankhon me abhi bhi wo confidence tha jo thodi der pehle puri campus ko electrify kar gaya tha.
Tabhi ek aadmi uth kar uske paas aaya – party head. Aged tha, chhati thodi jhuki hui, aankhen tez aur awaaz me wo khurdura pan jo tajurbe se aata hai. Usne Arjun ki pith par zor se haath rakha.
Party Head
Shabash, ladke. Aaj tune wo kar dikhaya jo yeh naya khoon aksar karne se darta hai.
Speech nahi thi wo… jung ka nara tha. Mujhe to laga tha students bas tamasha dekhne aayenge, par tune unke khoon ko garam kar diya.
Arjun ke chehre par halka sa muskaan tha, usne sir jhuka kar respect se kaha.
Arjun
Sir, maqsad yahi tha… unhe jagana tha.
Party Head ki aankhen chamki, usne apni ungli Arjun ke seene par thokte hue kaha.
Party Head
Jaga toh diya hai tu ne… ab ise zinda rakhna teri zimmedari hai. Yeh bheed jo tere saath nikalti hai na… yeh utni hi jaldi bikhar bhi sakti hai. Yeh log jazbaat se chalte hain, aur jazbaat ek hi chhoti si ghalti pe ulta bhi padh jata hai.
Arjun ne gehri saans le kar sir hila diya.
Arjun
Mujhe samajh hai sir. Main ready hoon unke liye aur aage ka har kadam soch samajh kar loonga.
Party Head ne ek chhoti hansi chhodi, jaise usse naya soldier mil gaya ho.
Party Head
Mujhe teri aankhon me wo junoon dikh raha hai jo ek neta ko chahiye. Yaad rakh… neta ban’na ek din ka kaam nahi, aur kursi ka jadoo sab se khatarnak nasha hai. Agar tu apne aap par kabu rakh gaya… toh koi tujhe rok nahi paayega.
Room me baaki members bhi taaliyan bajane lage, ek naya energy ka daur aa gaya. Arjun khamoshi se sab dekh raha tha, uski soch ab ek kadam aage nikal chuki thi.
Party Head ne table par haath patka aur awaaz thodi aur rough kar ke bola.
Party Head
Kal se hum campaign aur strong karenge. Posters, rallies, aur har department me tere bande hone chahiye. Jo bhi Arjun ke khilaf bole… uska jawab jazbaat se nahi, strategy se dena. Yeh samajh le, ab tere khilaf keval dushman nahi… toofan bhi khada hoga.
Arjun ne uski aankhon me dekh kar bas ek hi lafz kaha.
Arjun
Main tayyar hoon.
Room me ek bar phir claps aur slogans gungune lage.