Fantasy Girls college (COPIED)

[liljohn]

Recording khatam hote hote Sneha ke aansuon ka dariya bhi sookh chuka tha. Apne ghutno ko mod kar unn par apna sir rakhe Sneha shunya ko ghoor rahi thi. Wah samajh hi nahi pa rahi thi ki ab kiski chhati par sir rakhkar roye. Uske armaan uski siskiyon mein dafan hote ja rahe the, pal bhar ko mili khushiyan umar bhar ke liye uske nadan aur tanha dil par kahar ban kar toot padi thi. Ab na kuchh sapno ka karwan sajane mein rakha tha, aur na hi na-ummedi ko darkinar kar nayi kiran dhoondhne mein. Chand minute pahle tak mohabbat ke noor se khila khila sa chehra ab apne wajood ko talash raha lagta tha.. Na wo Murari ki beti hai, Na wo Vicky ki mahbooba.. Mohan ka toh khud ka hi astitav nahi hai, uss'se ummeed kare bhi toh kya kare.....?
"ab ho gaya yakeen? Vicky ne shamsher bhai ke saamne apni mansha jahir kar di thi, isiliye maine ye baatein record kar li.. Par hamein iss baat ka guman tak nahi tha ki ye bhi ho sakta hai.. Shukra hai humein pahle hi pata lag gaya; tum bach gayi...." Tough ne uske kandhe par hath rakh diya.
"Sneha achanak hi fat padi," Kahan bach gayi main? Kya bach gayi? Kiske liye? .. Ye toh maine kabhi bhi nahi manga tha.. Bhagwan se... Aisa bhi hota hai kabhi..?" Sneha ki karah uski aawaj ke jariye tough ka kaleja cheer rahi thi..
"darasal... Vicky kaisa bhi hai.. Par dil ka utna bura nahi hai.. Ek baar uske sir se multiplex ka bhoot utar jane do.. Main khud bhi uss'se baat karunga.. Koshish karenge ki tum jindagi ke iss dorahe mein apna bhavishya nirdharit kar sako...."

Sneha bahut kuchh bolna chahti thi..Kahan hai doraha..? Wo toh ek aise gol ghere mein lakar khadi kar di gayi hai jiske charon aur aag hai.. Ab uske liye ek hi rasta bacha hai.. Uss aag mein koodkar khud ko swaha kar dena.. Haan.. Yahi ek rasta hai..
Par jaise uski juban par tala lag gaya ho... Bina kuchh bole hi hajaron sawalon mein ulajhi Baithi Sneha sivay subakne ke aur kar hi kya sakt thi..
Na.. Kuchh nahi! "Jab tak koyi rasta nahi nikal jata, tum yahin rahna.. kisi baat ki chinta mat karo.. hum sab tumhare sath hain.. ye lo.. mera aur Shamsher bhai ka no. ! koyi bhi jarurat pade toh fone kar lena.. theek hai?" Kahkar tough wahan se uth gaya.. aur wo kar bhi kya sakta tha.. iss'se jyada!
Bahar nikal kar tough Virender ke paas ja baitha aur baki teeno ko apne paas bulaya.. Raj aakar viru ke sath hi baith gaya jabki dono ladkiyan khadi thi... kisi ko bhi ab tak Sneha par pahad toot padne ki bhanak nahi thi..
Tough Priya aur Riya se mukhatib hua," tum dono Sneha ke paas kaise aayi?"
"w..wo hum uski saheliyan hain.. uss'se milne aayi thi.." Riya ne tapak se jhooth bola...
"mil li?" Tough ka agla sawaal tha...
"Haan.. magar..!" Riya ne kuchh bolna chaha..
"Magar kya? kya tumhare ghar walon ko khabar hai ki tum iss waqt kahan ho..?" Tough ne dono se sawaal kiya..
Iss baat par Priya chintit hokar bagle jhankne lagi.. par Riya ne himmat na hari..," haan.. pata hai unko.. sab pata hai.. aur kya hum bhag kar aaye hain..?" Riya ne batteesi nikal kar tough ki baat ka jawaab diya..
" Lao.. mujhe unka no. do.. main unse baat kar loon jara.. agar unko koyi aitraaj na ho toh tum kuchh din aur Sneha ke paas ruk jana.." Tough ne apna mobile nikalte huye kaha..
" Nahi.. wo.. humne baat kar li thi.. unko koyi aitraaj nahi hai.. chahe hum kitne bhi din rukein.. Sneha ke sath.." Riya ne viru ki aur munh chidhate huye kaha.. Viru kafi der se usi ko ghoor raha tha...
" Mujhe no. toh de do! main baat kar leta hoon.. kya harz hai.." Tough ne fir uss'se contact no. manga..
" par ghar ka no. toh hai hi nahi.. mummy ne toh STD se baat kari thi.. Sham ko.." Riya tab tak sambhal chuki thi...
"tum chalne ki taiyari karo.. main tumhe bhiwani se bus main baitha deta hoon.." tough ne Raj aur viru se kaha," yahan sabke Rahne mein dikkat aayegi... sorry!"
Raj aur viru ek dusre ka munh taakne lage.. ab dusre ke ghar par jabardasti rahte bhi toh kaise.. Raj ne apna chehra ghumakar Priya ki aur dekha.. wo aankhon hi aankhon mein uss'se wahin ruk jane ki prarthna kar rahi thi.. Par Raj bhi kya karta bechara...
Viru ne Stick ke sahare khada hote huye kaha," theek hai.. main jara Sneha se baat kar loon.. kahan hai wo..?"
" andar hai.. thahro.. main yahin bulakar lata hoon.. " kahkar Tough andar chala gaya...
Sneha yunhi baithi thi.. jaisa tough usko bahar nikalte huye chhodkar gaya tha.. shunya ko niharte huye..," Dekho Sneha.. yahan kisi ke saamne kuchh bhi jahir mat karna.. baat pata nahi kahan ki kahan nikal jati hai.. tumhari saheliyan abhi wapas jane se mana kar rahi hain.. unhe yahin rahne doon.. ek aadh din..? tumhara mann bhi lag jayega..!"
Sneha ne koyi jawab nahi diya.. bus palkein uthakar ek baar tough ko dekha aur fir se neeche dekhne lagi...
" dono ladke ja rahe hain.. aaj hi.. apna munh dho lo aur ek baar bahar aakar unse baat kar lo.. aise munh kyun latkaye baithi ho.. main kah raha hoon na.. tumhe kuchh nahi hoga.. aao.. utho" kahte huye tough ne usko khadi kar diya.. wah aise bathroom ki aur chal di jaise uske pairon mein jaan bachi hi na ho...
Sneha apna chehra dhokar bahar aayi.. gaalon par aasuon ke nishan mit gaye par dil par lage ghavon ki parchhayi aur gadhi ho gayi.. wah yun hi chalte chalte bedroom se bahar nikli.. aur Viru aur Raj ko dekhte hi fir se foot foot kar rone lagi.. kya ye bhi kuchh 'pal' ke hi bhai the?
"kya hua Sneha?" Viru ka aisa bolna tha ki Sneha ka karun krandan aur tej ho gaya.. sabhi bechaini se uski aur dekhne lage... tough ne usko aisa kya bata diya?
Sneha roti huyi viru ke saamne jakar khadi huyi.. ek pal ke liye uski nigahon mein jhanaka.. aur fir uski chhati se ja lipti," bhaiyaaa!"
Viru ki nigahon mein uske liye ab bhi waisa hi lawanya tha.. waisa hi Prem! wo badal ki tarah pal pal roop badalne walon mein se nahi tha..
"Pagli.. ro kyun rahi hai..? hum fir aa jayenge milne.. milte rahenge.. Mohan ko bol dena.. har hafte humse milane laya kare.. chup ho ja.. pagal!" Viru ne uske gaalon se aansoo pounchhte huye kaha...
Mohan ka naam Viru ki juban par aate hi Sneha yun bilakh padi jaise kisi ne uski vina ke taaron ko bedardi de tod diya ho..," Tum mat jao bhaiya.. main mar jaaungi.. pls.. tum toh mat jao chhodkar...!" Sneha ne najrein uthakar Viru se guhar lagayi..
"Hum Sneha ko apne sath hi le jayenge.. isko kuchh nahi hoga.. mera wada hai aapse..." Viru ne tough ki aur dekhte huye kaha...
Tough bina kuchh bole bahar nikal gaya.. uski samajh mein kuchh nahi aa raha tha.. usne Shamsher ka no. milaya..
"haan.. tough.. bolo..!" Shamsher ne fone uthate hi kaha..
"bhai.. yahan toh.. meri samajh mein kuchh nahi aa raha.. na toh wo ladkiyan jane ko taiyaar hain.. aur na Sneha unn ladkon ko jane dena chahti.. batao main kya karoon.. mujhse Sneha ka rona bhi dekha nahi ja raha.. kaho toh main inn sabko bhiwani le jaaun? wahi kar deta hoon.. sabaka rahne ka...." Tough wakai mein pareshan lag raha tha...
"hummm.. ek minute.. Anjali kahan hai..?" Shamsher ne poochha...
"kitchen mein hogi..!" Tough ne andar ki aur jhankte huye kaha..
"baat karana ek baar..." Shamsher ne tough se kaha...
"Ek minute.." kahkar tough andar gaya...," bhabhi ji.. ek minute bahar aana.."
Anjali bahar aa gayi..
"lo baat karo.. Shamsher bhai se.." kahkar tough ne fone Anjali ko de diya..
"Haan Sham...." anjali naam lete lete beech mein hi ruk gayi...
"tum aaj kal mein koyi college ka tour arrange nahi kar sakti; 5-7 din ke liye...?" Shamsher ne anjali se poochha..
" aaj-kal mein? par agle mahine se bachchon ke term exam hain.. aise mein koun jayega...? par ye tour ka vichar kaise aaya..?" Anjali ne safayi dete huye sawaal poochha...
" koyi jaye.. na jaye.. par bahut jaroori hai.. inn bachchon ke liye.. Sneha ka mann bhi lag jayega.. bechari bahut pareshan hai.. Disha aur vani ho jayengi.. Gouri hai.. bachche toh ho jayenge.. tum kisi bhi tarah se ye kaam kar lo.. pls!" Shamsher ne vinaypoorn arthon mein Anjali se kaha...
" kyun Sharminda kar rahe ho..? ho jayega.. aur bolo..!" Anjali ne Shamsher se kaha...
" Thanx Anjali.. ab sab theek ho jayega...! Really thanx.." Shamsher ne anjali ka dhanyawad kiya...