Fantasy Girls college (COPIED)

[liljohn]

wahan pahunchte hi Vijender sara maajra samajh gaya.. Murari rah rah kar uski aur kuchh ishara sa karne ki koshish kar raha thha.. par vijender ne uski aur dekha hi nahi..
poori baat sunn'ne ke baad Vijender bola..," tab toh aaj aapko iski custody hamein deni hogi.. hum dono ko lejakar ladki ke bayan likhwa lete hain.. agar jarurat padi toh isko subah court mein pesh kar denge.. aap wahan se inki custody le lena..
"OK Sir.. Hum kal milte hain....!" kahkar Tough ne vijender se hath milane ke liye aage badhaya hi thha ki ab tak chup chap khadi Shalini cheekh uthhi...," nahi.. main inke sath nahi jaaungi.. ye toh yahi pade rahte hain hamesha.. iss kutte ke paas...!"
sharam ke maare vijender ki aankhein jhuk gayi..," aisi baat nahi hai madam.. duty is duty.." usne shalini ko aaswast karne ki koshish ki...
" Nahi pls.. mujhe inke bharose chhod kar mat jaayiye.. mere bayan yahin likh lijiye aur mujhe jaane dijiye...
" dekho beti. aisa ho nahi sakta hai.. aapko thhane chalna hi padega...!" Vijender ne apne gale ka thhook gatka..
Tough ab tak sthiti ko samajh gaya thha," Kyun nahi ho sakte sir..? yahan bayan kyun nahi ho sakte..? kya main jaan sakta hoon..?"
"idhar toh aao yaar ek baar.." vijender ne tough ka hath pakad kar ek taraf le jane ki koshish ki..
"nahi.. main idhar udhar nahi jata... aap yahin ladki ke bayan likhye aur isko jaane dijiye.. aaj Muraari aap ka mehmaan hai.. ji bhar kar khatirdari karna.. kal iski saari doodh dahi main bahar nikal doonga..." Tough ne apni security officer cap sir par rakhte huye apne iraadon ka parichay diya...
Vijender kuchh na bola.. aur munshi ko Jeep se kaagjaat uthhakar laane ko kaha..," haan boliye madam.. kya shikayat hai..." uske bol mein rukhapan saaf jhalak raha thha...
Shalini ke bayan likhwane ke baad Tough uski aur mukhatib huaa..," toh shalinii ji.. aap ghar ja sakti hain.. ya hum aapko chhod kar aayein..."
Shalini subakne lagi... kuchh der baad sambhal kar boli..," mera ghar nahi hai.. main toh mahila aasharam mein rahti hoon.."
"yaar ye saare kismat ke maare rohtak mein hi rahte hain kya.." tough mann hi mann budbudaya.. fir pratyaksh mein bola," ohh.. i mean.. wahan chhod dete hain.. ya koyi aur problem hai..?"
" wahan se inke liye ladkiyan aur aurtein bheji jaati hain.. wahan toh ye kuchh bhi kara sakte hain.." Shalini ne najrein jhukaaye huye hi jawaab diya..
Tough ke ji main aaya.. wahin par Murari ka raam naam kar de.. par aajkal wo kaanoon se kuchh jyada hi bandh gaya thha.. seema ne usko kitna badak diya," sala kutta!" kahte huye tough ne fone nikala aur Seema ke paas fone milaya..,"
" mil gayi fursat tumhe.. subah se fone laga rahi hoon.. uthha kyun nahi rahe.." Seema ke bol mein pyar aur gussa.. donon mehak aa rahi thhi.. aur dono badi laajwaab thhi...
" tumhari ek saheli ghar aa rahi hai.. apni taiyaari kar lena.. baad mein mat kahna bataya nahi.." tough ka inspectory lehja gayab hokar 'myaaun' ho gaya
" kya.. koun.. kab?" Seema ne chahakti huyi aawaj mein jaane kitne sawaal daag diye...
" abhi rohtak main hoon.. kareeb 2 ghante lagenge.. aane mein.. baki baad mein..."
"suno.. suno.. suno.." Seema bolti rah gayi aur tough ne fone kaat diya...
" mere sath mere ghar chalne mein toh koyi problem nahi hai na.. meri patni bhi yahin se hain.. rohtak se..
Shalini ne najrein uthhakar tough ko kritagyata ki dristi se dekha.. kismat ke maare chehre par khushi ki sahmati ki hulki si muskaan ubhar aayi...
tough ne Vijender se complaint ki receiving li, kuchh aur khana poorti ki aur ,"Achchha toh janaab.. hum chalte hain.. Jaihind!" kahkar Gadi ki aur chal pada..... Shalini uske pichhe pichhe chal di aur gadi mein baith gayi..... "yaar... Tujhse ek madad chahiye thhi..." Vicky ne Sneha se alag hote huye tough ko fone kiya...
"Bol mere yaar... Jaan de doon???" Tough Shalini ko lekar ghar ki aur chala hi thha...
"wo tune news toh dekhi hi hogi.. Murari kaand!" Vicky ne apna sir khujlaya... Wo samajh nahi pa raha thha baat kahan se shuru karey!
"sach mein yaar.. Murari jaise ghatiya log kaise rajniti mein baney rahte hain.. Itna bakwas aadmi maine aaj tak nahi dekha.. Kal saale ki akal thhikane laga doonga..!" Tough ne kahte huye kankhiyon se Shalini ki aur dekha.. Halanki kapde change karne ke baad wo kafi had tak normal mahsoos kar rahi thhi par uski aankhein ab bhi sahmi huyi thhi.. Doodh ka jala chhachh ko bhi foonk foonk kar peeta hai..
"akal thhikane laga dega matlab...??? Tum usko personally jaante ho kya?" Vicky ko uski baat kuchh atpati si lagi...
"main aise kutton se ittifak nahi rakhta.... Darasal uska case mujhe hi handover kiya huaa hai....." Aur vicky ne tough ko beech mein hi rok diya," Kyaaa????"
"Haan.. Uski chamdi ka maap mujhe hi lena hai... Khair chhod.. Tu bata.. Kisliye fone kiya..?" Tough ne kaam ki baat par aate huye kaha...
"nahi.. Kuchh nahi.. Bus aise hi yaad kar liya thha... Achchha ab rakhta hoon... Baar koyi hai shayad..." kahkar vicky ne turant fone kaat diya...
"Ajeeb aadmi hai.. Ab toh kah raha thha ki kuchh kaam hai.." Mann hi mann badbadaate huye tough ne Gadi apne ghar ki parking mein ghusa di... Wahan Seema unka beshabri se intzaar kar rahi thhi...

Andar jaane par Seema ne muskurakar Shalini ka swagat kiya.. Uski aankhein ateet mein jakar Saamne khadi uss hamumra ladki ko pahchan'ne ki koshish karti rahi.. Dusri aur Shalini darwaje se andar jakar najrein jhukakar khadi ho gayi....
"arey aao na.. Andar aao.. Yahan baithho.. Aaram se...
Shalini chupchap sofe par baith gayi...
"kya tum mujhe jaanti ho?" pani ka glass Shalini ki aur karte huye Seema ne poochha.. Tough kapde change karne andar chala gaya thha....
Shalini ne 'na' mein apna sir hila diya.. Aur sir jhukaye hi rahi...
Seema asamanjhas mein pad gayi.. Kuchh der baithhe rahne ke baad wo 'ek minute' kah kar andar chali gayi," Haan ji.. Mujhe toh ye aapki saheli lagti hai koyi.. Kya chakkar hai? Na main isko jaanti hoon.. Aur na ye mujhe!" Seema apne kulhon par hath rakhkar shararati andaj mein muskurati huyi kapde badal rahe tough ke saamne khadi ho gayi...
" batata hoon..." kahkar tough ne apni pant upar ki aur Rohtak mein jo kuchh ghata sab Seema ko bata diya...
"oh my God..! Aapne bahut achchha kiya jo isko yahan le aaye.. Kahkar Seema Tough ke gale lag gayi...
"aaha.. Aaram se.. Aaditya ka kuchh khayal hai ki nahi.." Tough ne usko bahon mein bhar liya...
"aaditya nahi.. Vaishali hogi.. Maa ko jyada pata hota hai.. Haan!" kahkar Seema alag hat kar neeche jhuk kar apne hulke se ubhre huye pate ko sahlane lagi.. Aur ekdum palatkar bahar chali gayi...
"aa andar bedroom mein baithhte hain.." Seema ne Shalini ka hath pakda aur bedroom mein le gayi...... Vicky ne fone kaat-te hi Shamsher ko fone lagaya," Kahan ho bhai? Kitne din se aapka fone nahi lag raha..." Vicky ki aawaj mein bechaini si thhi...
"main out of state hoon yaar.. aur mera cell gum ho gaya tha.. Aaj hi no. chalu karwaya hai.. Dusra cell lekar.. Kya baat hai..?"
"Mujhe tujhse milna thha yaar.. Kab tak aa rahe ho wapas..?"
"Mujhe toh abhi kum se kum 8-10 din aur lag jayenge.. Tu baat toh bata..!" Shamsher ne Kaha..
"baat aise batane ki nahi hai.. Milkar hi batani thhi.. Bahut time lag jayega... Tu bata na.. Kahan hai? Main wahin aa jata hoon..."
"ooty!... aaja!" Shamsher ne muskurate huye kaha....
"bhabhi ji sath hi hain kya?"
"na.. Wo toh gaanv mein hai.. !"
"chal chhod.. Main kuchh aur dekhta hoon... Achchha!"
"arey tu bata toh sahi.. main filhal bilkul free hoon..." Shamsher ne Gadi sadak kinare rok li... Uss waqt wo akela hi thha..
"achchha sun.. Par lecture mat dena.. Bus kuchh madad kar sako toh..."
"Abey tu bol na yaar.. Bol!"

Vicky ne shuru se aakhir tak ki sari Ramayan suna di.. Iss douran shamsher kayi baar chounka.. Kayi baar muskuraya aur kayi baar kahin aur hi kho jata.. Jab vicky ki baat band ho gayi toh Shamsher bola," Tu bhi na yaar.. Poora ghamchakkar hai.. Wo toh teri kismat sath deti chali gayi.. Warna.. Khair ab problem kya hai?"
"problem ye hai ki usko mujhse pyar ho gaya hai.. Mujhse alag hone ko taiyaar hi nahi hai.. Kah rahi hai mar jayegi..." Vicky ne bechara sa munh banaya..
Vicky ki iss baat par Shamsher jor se hansa.. ," Aakhir fans hi gaya tu bhi..!"
"tujhe pata hai yaar.. Ye 'pyar vyar' meri samajh se bahar ki baat hai.. Par jab tak Murari se souda nahi hota.. Tab tak toh isko dhhona hi padega...." vicky ne apne dil ki baat kahi..
"Toh uske baad kya karega?" Shamsher ne lumbi saans li..
"uske baad maine kya karna hai.. Wo mujhe Mohan ke naam se jaanti hai.. Ek baar Multiplex mil gaya toh dono baap beti kitna hi ro lein.. Meri sehat par koyi asar nahi padega.. Mere paas iss baat ka solid proof hai ki uss douran mein out of country thha....."

shamsher ne usko beech mein hi tok diya..," wo sab toh sahi hai.. Main poochh raha hoon Sneha ka... Uska kya karega?"