"పార్ట్నర్"

[earthman]

డ్రైవర్ కార్ నడుపుతుంటే వెనక కూర్చుని సిగరెట్ తాగుతూ, సుజాత గురించి ఆలోచించసాగాడు మధు.

పరాయి ఆడవాళ్ళతో గడపడం అమెరికాలో కొత్త కానప్పటికి, ఇలా ఒక వ్యక్తి భార్యతో గడపాలి అని మెదటిసారిగా అనిపించింది మధుకి.

వద్దు, తప్పు అనిపిస్తున్నప్పటికి, సుజాత ముగ్ధ రూపం అతని మనసుని ఆక్రమించుకోవడంతో, సుజాతని ఎలా పొందాలి అనే ప్లాన్ వేయసాగాడు.

అమెరికాలో మనుషుల మనస్తత్వాల గురించి తెలుసుకోవడం వృత్తిలో భాగంగా ఉన్న మధు, సుజాత ఏం చెప్తే వింటుంది, ఏది ఎలా చెప్పాలి, ఏ పాయింట్ మీద ఫోకస్ ఉంచాలి, ఎలాంటి మాటలు, ఎలాంటి వాక్యాలు ఉపయోగించాలి, ఇంగ్లిష్ ఎంత వాడాలి, ఇలా ఒక బిజినెస్ డీల్ ఎలా చేస్తూ ఉంటాడో, అలా ప్రిసైజ్ క్యాల్క్యులేషన్ వేయసాగాడు.

"సార్, వచ్చేసాం"... డ్రైవర్ పిలుపుతో ఆలోచనల నించి బయటపడ్దాడు.

"హోటల్ వచ్చేసింది సార్. లగేజ్ ఏమీ లేదు కదా సార్. పైకి రమ్మంటారా, వెళ్లమంటారా"

"లగేజ్ లేదు, పైకి వద్దు. రేపు పొద్దున్నే 8 కి రా"

"అలాగే సార్"... అంటూ వెళ్ళిపోయాడు డ్రైవర్.

లిఫ్ట్ ఎక్కిన మధు, లోపల కనిపిస్తున్న అద్దంలో తన ముఖాన్ని చూసుకుంటూ, సుజాతని పొందే ప్లాన్ మొత్తం వచ్చేసినట్టుగా అనిపిస్తూ ఉండి, తన ప్లాన్ తనకే బాగుండటంతో, చిన్నగా నవ్వుకుంటూ, జేబులో ఉన్న మొబైల్ తీసి, సుజాత ఫోటో చూస్తూ... "ఫ్యూ మోర్ అవర్స్ బ్యూటిఫుల్, అండ్ యూ విల్ బి మైన్" అనుకున్నాడు.

రూంకి రాగానే అలార్మ్ పెట్టుకుని పడుకున్నాడు.

* * * * * *

ఎవరో తలుపు కొడుతున్నట్టుగా అనిపిస్తుంటే లేచాడు. టైం చూసాడు, తొమ్మిదయింది.

తలుపు తీసాడు, ఎదురుగా డ్రైవర్.

"మూడుసార్లు ఫోన్ చేసాను సార్, ఫోన్ ఎత్తకపోయేసరికి పైకి వచ్చాను"

"ఓకే. కింద ఉండు, రెడి అయ్యి గంటలో వస్తాను"... అని రెడీ అవ్వసాగాడు.

మిస్డ్ కాల్స్ శీను నంబర్ నించి కూడా ఉన్నాయి. రెడీ అయ్యాక కార్లో నించి మాట్లాడదాం అనుకున్నాడు. ఇంతలోనే శీను నంబర్ నించి మళ్ళీ కాల్ వచ్చింది. ఎత్తకుండా రెడీ అవ్వడానికి బాత్రూం లోకెళ్ళాడు.

* * * * * *

"ఏంటన్నయ్యా"... ఫోన్ పెట్టేస్తున్న శీను వైపే చూస్తూ అడిగింది సుజాత.

"ఎత్తలేదు"... బదులిచ్చాడు శీను.

"నిజంగానే వస్తాడా, ఊరికే నీతో వస్తా అన్నాడా"... అనుమానంగా అడిగాడు మురళి.

"వస్తాడులేరా, నువ్వు కంగారుపడకు. మనలా కాదు వాడు, ఎన్నో పనులుంటాయి" అన్నాడు శీను.

"ఏమో అసలు ఇక్కడున్నాడో అమెరికా విమానం ఎక్కేసాడో"

"అబ్బా మురళి ఆపరా, వస్తాడు. మళ్ళీ చేస్తా ఉండు"...అంటూ మళ్ళీ కాల్ నొక్కబోయాడు శీను.

"వద్దన్నయ్యా. నువ్వే అన్నావు కదా ఎన్నో పనులుంటాయి అని. ఇన్నిసార్లు చేస్తే చిరాకుపడతారేమో, అరగంటాగి చేద్దాం. మళ్ళీ కాఫీ తెస్తాను, తాగండి"... అంటూ వంటింట్లోకెళ్ళింది సుజాత.

మళ్ళీ తన లోకంలోకి తనెళ్ళిపోయాడు మురళి.

శీనుకి విషయం అర్థమయింది. మధు రాకపోతే, తమకి డబ్బులు ఇవ్వకపోతే, ఏదన్నా చేసుకునేలా ఉన్నాడు మురళి. ఆలోచిస్తుంటే బుర్ర వేడెక్కసాగింది శీనుకి.

ఇంతలో జ్ జ్ అని ఫోన్ వైబ్రేట్ అయింది. స్క్రీన్ మీద మధు పేరు. వెంటనే ఎత్తాడు శీను.

"మధూ, నీ ఫోన్ కోసమే చూస్తున్నాం. బాగా బిజీగా ఉన్నట్టున్నావు. నీ పనులయ్యాకే రా. మేము ఇంట్లోనే ఉంటాం"... టకటక అన్నాడు శీను.

"నిన్న స్కాచ్ తాగాక నువ్వక్కడే కాసేపు పడుకున్నావు, గుర్తుందా" అడిగాడు మధు.

"ఏమో మధు, గుర్తులేదు"

"కాసేపు పడుకున్నావు నువ్వు, నేను అప్పుడు పడుకోలేదు. హోటల్కి వచ్చాక నా టైంకి నేను నిద్రపోయాను, కాని నిన్న ఆలోచనలు ఎక్కువుండటంతో, పొద్దున లేవడం లేట్ అయింది. మీ ఇంటికే బయలుదేరాను. అడ్రస్ పంపు"

"అడ్రస్ వెంటనే పంపుతా"

అప్పుడే కాఫీ తెస్తూ అడ్రస్ మాట విన్న సుజాత... "డైరెక్ట్ మ్యాప్ పంపచ్చన్నయ్యా, నేను పంపిస్తాను, ఫోనివ్వు" అంటూ మొబైల్ చేతిలోకి తీసుకుంది.

"హల్లో"

"మధుగారు"

కోయిల స్వరం పలుకుతున్నట్టుగా సుజాత గొంతు తీయగా వినిపించడంతో మైమరచిపోయాడు మధు.

"మధుగారు, హల్లో"

"ఏంటి లైన్ కట్ అయిందా" అడిగాడు శీను.

"లేదన్నాయ్యా కాల్ జరుగుతోంది, నాకేమీ వినిపించట్లేదు.. హల్లో మధుగారు"

'నాకు వినిపిస్తోంది బ్యూటీ, నీ రూపానికి సరిపోయే గొంతు, పర్ఫెక్ట్, లవింగ్ ఇట్' అనుకుంటూ... "హల్లో" అన్నాడు.

"వినిపిస్తోందాండి"

'చెవుల్లో అమృతం పోసినట్టుగా ఉంది బ్యూటీ, కీప్ టాకింగ్' అనుకుంటూ.. "చెప్పండి" అన్నాడు.

"అడ్రస్ మ్యాప్ పంపిస్తాను, ఎవరిని అడిగే పని లేకుండా మా ఇంటి ముందే దిగుతారు"

'గుమ్మంలో నువ్వు ఎదురుంటే ఇంకా బాగుంటుంది బ్యూటీ, నా చెయ్యి పట్టుకుని లోపలికి తీసుకెళ్తే ఇంకా బాగుంటుంది' అనుకుంటూ... "అలాగే పంపించండి" అని ఫోన్ పెట్టేసాడు.

రెండు నిమిషాల్లో మ్యాప్ మెసేజ్ వచ్చింది.

ఆ అడ్రస్ డ్రైవర్కి చెప్పి కళ్ళు మూసుకుని మళ్ళీ తన స్ట్రాటజి మొత్తం స్టెప్ బై స్టెప్ నెమరువేసుకున్నాడు.

ఈ ఆలోచనల్లో ఉండగానే నిద్రపట్టేసింది మధుకి.

"సార్ ఇంటిదగ్గరున్నాం. సార్"... డ్రైవర్ పిలుపుతో కళ్ళు తెరిచాడు.

ఇంటి దగ్గర నించి శీను, పక్కనే మురళి కార్ వైపే వస్తూ కనిపించారు.

కార్ దిగాడు మధు.

"మధు మా బావ మురళి. మురళి మా చిన్నప్పట్టి ఫ్రెండ్ మధు"... పరిచయం చేసాడు శీను.

"నమస్తే సార్" దండం పెట్టాడు మురళి.

"నమస్తే"

"గ్రౌండ్ ఫ్లోర్ ఫ్లాట్ మధూ, రా. పాత అపార్ట్మెంట్ అందుకే తక్కువ అద్దెకి దొరికింది" అంటూ లోపలికి తీసుకెళ్ళాడు శీను.

ఇద్దరి మగాళ్ల వెనక నడుస్తూ ఫ్లాట్ దగ్గరికొచ్చాడు మధు.

షూస్ తీయబోతుండగా... "షూస్ ఉన్నా పరవాలేదు, లోపలికి రండి" అంటూ కోయిల స్వరం ఈసారి డైరెక్ట్ వినిపించింది.

తలెత్తి చూసాడు మధు.

లైట్ బ్లూ కలర్ చీరలో, మెరిసిపోతున్న రూపంతో, ముగ్ధమనోహరమైన నవ్వుతో, చేతులు జోడించి లోపలికి ఆహ్వానిస్తున్న సుజాత.