"శ్రీమతి మోహిత"

[mohan69]

ఎక్కడ మొదలుపెట్టాలో తెలియట్లేదు, కానీ ఎలా ముగిస్తానో తెలుసు. ఎలా మొదలుపెట్టినా నీకు చెప్పాల్సింది చెప్తానని, నీకు అర్ధం అవుతుంది అని మొదలుపెడుతున్నా.

నాకు చాలా ఇచ్చావు, కాదనను. దేనికీ లోటు లేదు, ఒప్పుకుంటాను. అడగక ముందే అన్నీ ఏర్పాటు చేసావు, నిజమే అంటాను.

కానీ నా మనసుకి ఏం కావాలో ఎప్పుడూ అడగలేదు. నాకు ఏవి ఇష్టమో కనుక్కోలేదు. అన్నీ నీకు నచ్చినవే, నీకు అనిపించినవే చేసావు.

వస్తువులు, సుఖాలే కాదు, మనసు కూడా ముఖ్యం, సంతోషం కూడా ముఖ్యం.

లక్ష రూపాయల మంచం మీద పడుకున్నా నిద్రపట్టదని, ఇష్టపడే మనిషి పక్కన చినిగిన చాప మీద పడుకున్నా నిద్రపోవచ్చని తెలుసుకున్నాను.

తినడానికి గిన్నెల నిండా ఎన్ని ఉన్నాయని కాదు, పంచుకునే మనిషి ఉంటే తినే ఒక్క ముద్ద కూడా శక్తినిస్తుందని తెలుసుకున్నాను.

కుదుపు తెలియని ఇంపోర్టెడ్ కారులో వెళ్ళడం కాదు, చెయ్యి పట్టుకుని నడిచేవాడు కావాలని తెలుసుకున్నాను.

ఏడువారాల నగలు కాదు, ప్రేమతో తెచ్చే చిన్న తిలకం ఆనందాన్ని ఇస్తుందని తెలుసుకున్నాను.

పొద్దున్నే బెడ్ కాఫీ తెచ్చే నౌకరు కాదు, ఇంకో రోజు నీతో గడిపే అవకాశం వచ్చిందంటూ ప్రేమతో ముద్దు ఇచ్చే మనిషి ఉండాలని తెలుసుకున్నాను.

పైకి నవ్వుతూ, వెనక గోతులు తీసే వందమంది ఫ్రెండ్స్ కంటే కలకాలం తోడుండే ఒక్కడుంటే చాలని తెలుసుకున్నాను.

అందరూ చూస్తున్నారని, ఫొటోస్ తీస్తున్నారని వాటేసుకుని హాయ్ అని, అవసరమున్నప్పుడు ఫోన్ చేస్తే నంబర్ చూసి ఫోన్ సైలెంట్ చేసే పార్టీ ఫ్రెండ్స్ వందమంది కన్నా, అర్ధరాత్రి రమ్మన్నా రెండు సిటీ బస్లు మారి వచ్చే మనిషి ఉండాలని తెలుసుకున్నాను.

పడవంత కారులో వెళ్ళి, లంకంత షాపులో కొనే ప్లాటినం కన్నా, డిస్కౌంట్ ఇస్తున్నారని కబుర్లు చెప్పుకుంటూ మూడు కిలోమీటర్లు నడిచెళ్ళి కొనుకున్న ప్లాస్టిక్ టేబుల్ కొనుక్కోవడంలో ఉన్న ఆనందం తెలుసుకున్నాను.

పెద్దింటి కోడలు పెద్దింటి కోడలు అంటూ లేనిపోని బాధ్యతలు నాకు అంటగట్టి, వాళ్ల తప్పులకి నన్ను బలి చేస్తూ, నా అస్తిత్వాన్ని సమాధి చేసే చేస్తున్న అయినవాళ్ళ కన్నా, నా కాలిలో ముల్లు గుచ్చుకుంటే తను విలవిలలాడే మనిషి ఉన్నాడని తెలిసుకున్నాను.

తాపం తీర్చుకోవడానికి కాదు శరీరమున్నది, ముందు మనసులు మమేకమవ్వాలన్న సత్యం బోధించిన మనిషున్నాడని తెలుసుకున్నాను.

పనివాళ్ళు చూపించే అభిమానం కన్నా భర్త నించి లభించే అభిమానం తక్కువయినప్పుడు, మొగుడి ఫోన్ కోసం వసంతం కోసం ఎదురుచూసే కోయిల లాగా ఎంత ఎదురుచూసినా ఆ కాల్ రానప్పుడు, ఏడ్చి ఏడ్చి ఇక ఏడవటానికి కన్నీరు లేక, తడారిపోయిన అ కళ్ళతో ఏ అర్ధరాత్రో పడుకుని నిద్రలో ఉలిక్కిపడి లేచి, పక్కన ఎవరూ లేక, ఓదార్పునిచ్చే కన్నీరు రాక, నరకం చూసిన రోజులని మర్చిపోయేలా, ఎడారిలోకి వచ్చిన ఓ పక్షి విసిరిన విత్తనం, ఊహించని వాన పడి, చిగుర్లు తొడిగి, ఇంతింతై అన్నట్టు పచ్చని చెట్టులా మారినట్టు, అడవిగాచిన వెన్నెల్లా మారి, నిశీధిలోకి నెట్టబడిన నా జీవితాన్ని, మళ్ళీ నందనవనంలా చేసిన ఆ మనిషి కోసం వెళ్తున్నాను.

నీ అంత:పురాన్ని వదిలి, పేరుకి కాదు, నిజంగా ప్రేమతో, తన గుండె గదిలో కొలువుంచుకునేలా, తన రెండు గదుల ఇంటికి, తన యాభై గజాల సామ్ర్యాజ్యానికి నన్ను మహరాణిని చేసే ఆ మనిషి కోసం, ఆ చల్లని నీడ కోసం నిన్ను వదిలి వెళ్తున్నాను.

నీ అంత:పుర దాస్యం కన్నా అతని ఇంట్లో దొరికే స్వచ్ఛమైన ఆనందం కోసం, నువ్వు ఏర్పరిచిన కృత్రిమ స్వర్గం కన్నా, అతను పెట్టే రెండు మెతుకుల అన్నాన్ని కళ్ళకద్దుకోవడం కోసం, నువ్వు ఇచ్చిన నకిలీ జీవితం కన్నా, అతని నామమాత్రపు జీతమే గొప్ప అని తెలిసి వెళ్తున్నాను.

చీకటిలో కుంగిపోతున్న నా జీవితానికి ఆలంబనగా నిలిచి స్నేహహస్తాన్నిచ్చిన ఆ చల్లని మనిషి నీడలోకి వెళ్తున్నాను.

వాన నీటిలో మట్టిలా కరిగిపోతున్న నా జీవితాన్ని, తన చేతుల్లోకి తీసుకుని, ఆ మట్టికి మళ్ళీ ప్రాణం పోసిన ఆ శిల్పి కోసం వెళ్తున్నాను.

మీ ఇంద్రభవనంలో మీ అందరి కోసం కొవ్వొత్తిలా కాలిపోతూ, ఏ క్షణమైనా ఆరిపోయేలా ఉన్న నా జీవితానికి మళ్ళీ ఊపిరులూదిన ఆ మనిషి దగ్గరికి వెళ్తున్నాను.

నేను నేనని, నా లాంటి ఆడది నేనొక్కదాన్నేనని, నా బాగోగులు చూసే మనిషి లేనప్పుడు, నా కోసం తపించే మనసు లేనప్పుడు ఎన్ని ఉన్నా, ఏమీ లేనట్టేనని, సంతోషాన్ని, బాధని పంచుకోవటంలో ఉన్న జీవన మాధుర్యాన్ని చవిచూపించిన ఆ మనిషి కోసం వెళ్తున్నాను.

ఇట్లు మోహిత.

చాలా బాగుంది మీరు వ్రాసినది ,, carryon