అరణ్య {completed}

[Takulsajal]

55     

స్పృహలో లేనట్టు నటిస్తున్న అరణ్యకి ఉమ మరియు సుశాంత్ మాటలు వినిపిస్తున్నాయి.

సుశాంత్ : ఎందుకిలా అవుతుంది

ఉమ : ఏమో ఎన్నడూ లేనిది మొన్న KFC కి వెళ్ళింది, అక్కడ ఏమైనా తినిందేమో..

సుశాంత్ : లేదు అరణ్య ప్యూర్ వెజిటేరియన్, పొరపాటున కూడా నాన్ వెజ్ ముట్టుకోదు.. అస్సలు అక్కడికి ఎందుకు వెళ్ళింది..?

ఉమ : ఫ్రెండ్స్ కి పార్టీ ఇస్తానని వెళ్ళింది

సుశాంత్ : ఇంతకీ సంతకాలు చేసిందా ?

ఉమ : ఇంకా లేదు

సుశాంత్ : పేపర్లు చూసిందా.. ఏమైనా అడిగిందా

ఉమ : లేదు

సుశాంత్ : డాక్టర్స్ కి ఫోన్ చేసాను వస్తున్నారు.

వీళ్ళ మాటలు వింటున్న అరణ్యకి చిన్నగా తనకి ఎప్పుడు కలలోకి వచ్చే ఆ మాటలు వినపడుతుంటే వాటి మీద శ్రద్ద పెట్టింది. అమ్ములు తల్లీ అనగానే అప్పుడు తెలిసింది అది తన అత్తయ్య మీనాక్షి గొంతని.. ఎంతగా ఆనందపడిందో అంతే బాధ పడింది. ఉమ మరియు సుశాంత్ వెళ్ళిపోగానే లేచి వెంటనే తన వేణువు అందుకుని బైటికి పరిగెత్తింది.. ఎవ్వరి కంటా పడకుండా గార్డెన్ లోకి చేరుకుని చెట్టు కింద ఉన్న కృష్ణుడి ముందు మోకరిల్లి దణ్ణం పెట్టుకుంది.

అరణ్య : కృష్ణా ఇక నుంచి నేను నిన్ను పూజించబోయేది లేదు, ఇక నా మనసులో నుంచి నిన్ను తీసేస్తున్నాను.. ఇక నుంచి నేను పూజించేది నా బావని మాత్రమే.. నేను లేని ఈ చోట ఎలా ఉంటావో ఏమో.. జాగ్రత్త అని లేచి నిలుచుంది తన వేణువు తీసుకుని నడుము దెగ్గర ఉన్న బొందుకి వేణువుని కట్టి, ఒకసారి తన అరచేతిలోని మచ్చని తన కళ్ళకి అద్దుకుని కళ్ళు మూసుకుంది.

అరణ్య : బావా నువ్వు ఇంతవరకు చెప్పులు తొడగనేలేదు కదా ఇక నుంచి నేను కూడా వేసుకోను.. వస్తున్నాను బావ అని నవ్వుకుని.. నాకు దారి చూపించు అని కళ్ళు తెరిచి చిన్నపిల్లలా నవ్వుతూనే గార్డెన్ నుంచి బైటికి పరిగెత్తింది.. ఇంకేదో లోకంలోకి వెళ్లిపోతున్నానన్న ఆనందం ఆ మొహంలో కనిపిస్తుంది.

ఇంట్లోకి పరిగెడుతూ ఎవ్వరి కంటా పడకుండా పెద్ద పెద్ద పిల్లర్ల వెనక దాక్కుంటూ ఇంటి నుంచి బైటికి వచ్చేసింది.. చూస్తే అందరూ బైటే ఉన్నారు, తెల్లని గుర్రం ఎక్కడి నుంచి వచ్చిందో కానీ ఎవ్వరి మాట వినడంలేదు గార్డ్స్ ని ఎగిరి ఎగిరి తంతుంది.. అరణ్యకి అర్ధమయ్యి నవ్వుతూ పరిగెత్తింది.. అందరూ కంగారుగా చూస్తుండగానే వాళ్ళని దాటుకుని వెళ్లి గుర్రం ముందు నిలబడింది.. అంతే గుర్రం ఒక్కసారిగా శాంతించింది.. తెల్లని గుర్రం.. దాని వంటి మీద చిన్న మచ్చ కూడా లేదు.. బలమైన కాళ్లు.. రాజుల కాలం నాటి ఎత్తు.. తెల్లని జుట్టు.. అందాన్ని రాజసాన్ని పెంచుతూ ఉన్న తెల్లని పొడుగాటి తోక.

ఇంట్లో వాళ్లంతా బెదిరిపోయి వద్దని అరణ్య వైపు అరుస్తుంటే అరణ్య పట్టించుకోకుండా గుర్రపు నుదిటి మీద చెయ్యి వేసింది.. అదేంటో తనని ముట్టుకోగానే అరణ్యకి గుర్రం ఏం చెప్పాలనుకుంటుందో అర్ధమవసాగింది, గుర్రం ఒక్క క్షణంలో కిందకి ఒంగగానే అరణ్య బలాన్ని ఉపయోగించి వెంటనే ఎక్కేసింది.. గుర్రం అదే ఊపులో పైకి ఎగిరి రెండు కాళ్లు గాల్లోకి ఎత్తింది.. ఆ ఎగురుడుకి అరణ్య జుట్టు మొత్తం చెదిరి విరబూసుకుంది.. రెండో అంగలో గుర్రం ముందుకు దూకి అందరూ చూస్తుండగానే అక్కడనుంచి వెళ్ళిపోయింది.. అందరూ ఆశ్చర్యపోయారు.

చీకటిలో రోడ్డు మీద తెల్లని గుర్రం, దాని మీద ఒంటి నిండా తెల్లని దుస్తుల్లో గుర్రం వెళుతున్న వేగానికి విచ్చుకున్న అరణ్య పొడుగాటి జుట్టు గాల్లో అలలా ఎగురుతుంటే దేవతే భూమ్మీదకి వచ్చిందా అన్నట్టుంది..

గుర్రం పరిగెడుతున్న వేగానికి ఒక చెయ్యి గుర్రం జుట్టు మీద, కుడి చేత్తో గుర్రం మెడని గట్టిగా పట్టుకుని కూర్చుంది.. చాలా మంది ఫోన్లో వీడియో కూడా తీసుకున్నారు.. ఇంతలో వెనక నుంచి సెక్యూరిటీ కార్లలో తరుముతుంటే అరణ్య భయంగా గుర్రాన్ని గట్టిగా పట్టుకుంది. గుర్రం కూడా అర్ధంచేసుకున్నట్టే పావుగంటకి రోడ్డు దాటి కార్లకి అందకుండా అడవి మార్గం పట్టింది.. సెక్యూరిటీ మాత్రం కారు అడవిలోకి వెళ్లే అవకాశం లేక బైటే ఆగిపోయారు.

హలో సర్

సుశాంత్ : అస్సలు ఏం జరుగుతుంది, అరణ్య ఎక్కడా  ?

మేడం గుర్రంతో పాటు అడవిలోకి వెళ్ళిపోయింది సర్, మేము ఇక్కడ ఆగిపోయాము. ఏం చెయ్యాలో అర్ధం కావట్లేదు

సుశాంత్ : అర్ధం కాకపోవడానికి ఏముందిరా ఫూల్.. వెతకండి ఇలా కాదు చాప్పర్స్ తీసుకెళ్లండి అని ఫోన్ పెట్టేసి వెంటనే ప్రదీప్ కి ఫోన్ చేసి మాట్లాడుతూ తన రూంలోకెళ్ళి డోర్ వేసుకున్నాడు.

చీకటిలో అరణ్య గుర్రం మీద దూసుకెళుతుంది, భయపడుతున్నా కానీ గుర్రం వేగానికి కళ్ళకి ఎదురొచ్చే ఆకులకి, కొమ్మలకి తట్టుకోలేక కళ్ళు మూసుకుంది. ఒక అరగంట తరువాత గుర్రం వేగం తగ్గించి వెళుతుంటే అరణ్య కళ్ళు తెరిచి చూసింది. చిన్నగా లేచి సరిగ్గా కూర్చుంది కొంచెం భయం వదిలేసినట్టు.. కొంతసేపటికి గుర్రం తనంత తానే ఆగిపోగా అరణ్య కిందకి దిగి పక్కనే ఉన్న చిన్న నీళ్ల కుంట చూస్తూ గుర్రం ముందుకు వెళ్లి ముఖం పట్టుకుని చూసింది.

అరణ్య : నిన్ను మా బావే పంపించాడా అని నవ్వుతూ అడిగింది.. దానికి గుర్రం కేరింతలు కొడుతుంటే అరణ్య కూడా నవ్వి పక్కనే ఉన్న చెట్టుకి ఆనుకుని కూర్చుంది.. గుర్రం నీళ్లు తాగడానికి వెళుతూ అరణ్యని చూసింది.. దానికి అరణ్య నవ్వుతూ నీ దాహం తీర్చుకో అని పంపి తన అరచేతిలో ఉన్న మచ్చని కళ్ళకి అద్దుకుని బావా నా మాటలు నీకు వినిపిస్తున్నాయా, నేను అరణ్య.. కాదు కాదు నాకు కూడా పేరుంది, అత్తయ్య పెట్టింది కదా.. అమ్ములు.. అని మాట్లాడుతుండగానే పైనుంచి హెలికాప్టర్ సౌండ్ వినిపిస్తూ లైట్ పడేసరికి గుర్రం పరిగెత్తుకుంటూ వచ్చింది, అరణ్య ఎక్కి కూర్చోగానే వేగం పుంజుకుని ముందుకు కదిలింది.

తెల్లతెల్లారి నాలుగు అవుతుందేమో గుర్రం అడవిని దాటి మళ్ళీ రోడ్డు ఎక్కింది, వెనకాల ఎవరైనా పడుతున్నారేమో అన్న భయంతో అరణ్య దిక్కులు చూస్తుంటే, గుర్రం తన పని తాను చేసుకుపోతుంది, ఉన్నట్టుండి గుర్రానికి ఎటు వెళ్లాలో తెలియక ఆగిపోగా అరణ్యకి అర్ధమయ్యి, దారి చూపించమని చేతిలో ఉన్న మచ్చని కోరుకోగా తన కళ్ళేదురున్న ఆకాశంలో నక్షత్రం ప్రకాశంగా వెలిగింది అంతే గుర్రం ఇకిలిస్తూ ముందుకు కదలగా ఎక్కడి నుంచి వచ్చాయో నాలుగు కుక్కలు గుర్రానికి నాలుగు వైపులా పరిగెడుతూ గుర్రానికి దారి చూపిస్తూ ఇలా రోడ్డు మీద కాదని రోడ్డు నుంచి దూరంగా తీసుకెళతూ రైలు పట్టాల  మార్గాన తీసుకెళ్లి వదిలి అక్కడితో ఆగగా గుర్రం వేగం పెంచింది.

అరణ్య వెనక్కి చూస్తూ వాటికి ధన్యవాదాలు తెలిపి మళ్ళీ గుర్రాన్ని గట్టిగా పట్టుకుంది.. తెల్లారుతుంటే వెనక నుంచి ట్రైన్ కూత వినిపించగా అరణ్య తిరిగి చూసింది.. ట్రైన్ వేగంగా అరణ్యని దాటుకుంటూ వెళుతుంటే గుర్రం ట్రైన్ కి పోటీగా ఇంకా వేగం పెంచింది..

ఇటు రాత్రికి రాత్రి రోడ్డు మీద గుర్రంతో వెళుతున్న అరణ్యని ఎవడో ఫోటో తీసి ట్విట్టర్ లో ఫోటో పోస్ట్ చేసాడు #Angelonthehorse అన్న హ్యాష్టాగ్ తో.. పొద్దున్న కల్లా ఒక ప్రముఖ సెలబ్రిటీ రిట్వీట్ తో అది కాస్తా వైరల్ అయ్యి కూర్చుంది.. ఇప్పుడు ట్రైన్ లో వెళుతున్న ఒకడు ట్రైన్ తో పోటీగా పరిగెడుతున్న గుర్రాన్ని దాని మీదున్న అరణ్యని చూడగానే చిన్న వీడియో బైట్ ఒకటి తీసి దానికి హ్యాష్టాగ్ పెట్టేసి వదిలాడు.. సూర్యుడు వచ్చేలోపు ట్విట్టర్లో, న్యూస్ చానెల్స్ లో ఇదే మెయిన్ న్యూస్ అయ్యింది.. ఫోటో తీసిన లొకేషన్ వీడియో పోస్ట్ చేసిన లొకేషన్ వేరు వేరు అని ఎవడో గుర్తులు చెప్పాడు దానతో ఇప్పుడు అందరికీ ఆ గుర్రం మీద ఉన్న అమ్మాయి ఎక్కడికి వెళుతుందో తెలుసుకోవాలన్న కుతూహలం మొదలయ్యింది. ఎక్కడ అరణ్య కనిపిస్తే అక్కడ ఫోటోలు వీడియోలు తీస్తూ ట్విట్టర్లో పెట్టేస్తున్నారు. కానీ ఇక్కడ అరణ్య మనసు మాత్రం తన బావని చూడాలన్న తన కోరిక మరియు ఆలోచనలు గుర్రం కంటే వేగంగా పరిగెడుతున్నాయి.