தற்போதைய செய்திகள்

[johnypowas]

இந்தியா - ஆஸ்திரேலியா கிரிக்கெட்: பாக்சிங் டே டெஸ்ட் போட்டியில் கோலியின் படை சரித்திரம் படைக்குமா?

பாக்சிங் டே டெஸ்ட் போட்டியொன்றில் இந்தியாவும் ஆஸ்திரேலியாவும் விளையாடி வருகின்றன. முதல் டெஸ்ட் போட்டியில் இந்தியாவும், இரண்டாவது டெஸ்ட் போட்டியில் ஆஸ்திரேலியாவும் வெற்றி நிலையில் மூன்றாவது டெஸ்ட் போட்டி மெல்பர்ன் மைதானத்தில் நடந்து வருகிறது.

பொதுவாக பாக்சிங் டே டெஸ்ட் போட்டியில் ரசிகர்களின் எண்ணிக்கை வழக்கத்தை விட அதிகமாக இருக்கும். உள்ளூர் ரசிகர்களின் ஆதரவுடன் விளையாடும் ஆஸ்திரேலிய அணியை வெல்வது எந்த ஒரு அணிக்கும் பெருஞ் சவால்.

கிறிஸ்துமஸ் தினத்துக்கு அடுத்த வேலை தினத்தை பாக்சிங் டே என்கிறார்கள். ஆஸ்திரேலியாவில் பொதுவாக டிசம்பர் 26-ம் தேதி ஒரு டெஸ்ட் போட்டி நடக்கும். இந்த டெஸ்ட் போட்டியை பாக்சிங் டே டெஸ்ட் என்கிறார்கள்.

இம்முறை பாக்சிங் டே டெஸ்டில் ஆறு அணிகள் விளையாடுகின்றன. சென்சூரியனில் நடக்கும் பாக்சிங் டே டெஸ்ட் போட்டியில் தென்னாப்ரிக்காவும் பாகிஸ்தானும் மோதுகின்றன. நியூசிலாந்து நாட்டில் கிரைஸ்ட்சர்ச் மைதானத்தில் நடக்கும் பாக்சிங் டே டெஸ்ட் போட்டியில் இலங்கையும் நியூசிலாந்தும் மோதுகின்றன.

ஆஸ்திரேலிய அணிக்கு எதிரான டெஸ்ட் போட்டியில் விளையாடும் இந்திய அணியில் முதன்முறையாக மயங்க் அகர்வால் மற்றும் ஹனுமா விஹாரி தொடக்க வீரர்களாக களமிறங்குகின்றனர். கடந்த டெஸ்ட் போட்டியில் ஒரு சுழற்பந்து வீச்சாளர் கூட இல்லாமல் களமிறங்கிய இந்திய அணி இம்முறை இடது கை சுழற்பந்து வீச்சாளரான ரவீந்திர ஜடேஜாவை களமிறக்கியுள்ளது. நடுவரிசையில் புஜாரா, விராட் கோலி, ரஹானே வலுசேர்ப்பார்கள்.
ரோஹித் ஷர்மா, ரிஷப் பன்ட் ஆகியோரும் அணியில் இடம்பெற்றுள்ளதால் அணியில் ஏழு பேட்ஸ்மேன்கள் இருக்கின்றனர். கடந்த டெஸ்ட் போட்டியில் அணியில் இருந்த உமேஷ் யாதவ் இப்போட்டியில் நீக்கப்பட்டிருக்கிறார்.