Romance 8th SEMESTER.... By SGP bro xossip (Completed)

[Samrock19797]

Update 29
gaye the bade aashiq bankar, socha tha kisi na kisi bahane usse baat kar hee lunga , phhir uska haal chal 
bhi puchh lunga, lekin aisa kuch bhi nahi hua aur na hee iske aas-pass kuch hua.... Jis room me Esha 
admit thi , hum teeno us room ke bahar chup chap khade andar jhak rahe the kyunki andar jhakk maar 
ke jhankane ke siwa hum teeno ya phhir kahe ki main kuch kar bhi nahi sakta tha, kyunki jo kaam mujhe 
karna tha wo room. No. 125 me koyi aur kar raha tha, jin armano ki gathari banakar main yaha aaya tha 
wo khul kar jis room me Esha admit thi uske bahar bikhar chuki thi , kano me ek baar phhir wahi aawaz 
gunji jise main sunna nahi chahta tha, jise main bardasht nahi kar sakta tha....."pyar ,mohabbat ka 
chakkar hai bhai, tu use bhool ja...." us waqt Arun bhi chup tha aur Naveen bhi chup chap khada 
tha.....room ke andar Esha ek ladke se baat kar rahi thi, Esha ki aankh me aansu the aur us ladke ki aankh 
bhi halki nam thi, dono sale meri love story ki dhajjiya uda kar apne liye family planning kar rahe 
the.....jis ladke ne Esha ka hath pakad rakkha tha use maine college me shayad kayi baar dekha tha, aur 
yadi mera andaza sahi tha to wo yakinan mera senior hai......
"iska naam Gautam hai aur ye second year me hai...."Naveen ne dheere se kaha, lekin yadi wo jor se bhi 
kahta to koyi farak nahi padta kyunki waha hume sunne wala koyi nahi tha, jo beemar the wo to allot 
hue room me hee pade the aur jo unke karibi the wo ya to apne karibi ke sath room me the ya phhir 
bahar ki hawa khane ke liye bahar gaya hue the...us waqt hum teeno room no. 125 ki khidki se andar 
dekh rahe the, hum teeno ne dekha ki us ladke ne Esha ka hath apne dono hatho se tham liya aur kuch 
bolne laga...jise sunkar Esha ki aankhe khushi se chhalak uthi....
us waqt aankho me aansu uske bhi the ,us waqt dil mera bhi roya tha.....us waqt apne pyar ke samne wo 
bhi chup thi ,us waqt apne pyar ke samne chup main bhi tha....uske bagair jeene ki adat na to use thi aur 
uske bagair jeena mera bhi mushkil tha......
dheere-dheere mere kadam khud ba khud bahar ke liye chal pade, ab situation bilkul alag thi, jaha kuch 
der pahle tak main yaha aane ke liye mara ja raha tha wahi ab main jald se jald yaha se door jana chahta 
tha,jaha kuch der pahle mera dil uske didar ke liye uchhal-uchhal kar betahasha hua ja raha tha wahi ab 
mera dil hatash hokar shant baith gaya tha....hospital se bahar aate waqt maine kayi logo ko dekha, lekin 
phhir bhi na jaane kyun aisa lag raha tha ki main waha ,us bade se alishan hospital me bilkul akela hoon....koyi yadi waha dheere se bhi kuch bolta to uski aawaz joro se mere kano me chubhati....mujhe 
us waqt aisa lagne laga tha jaise ki main barso se us jagah kaid hoon aur waha se nikalne ki koshish kar 
raha hoon.......
"Arman....."mere kandhe ko peechhe se pakad kar Arun ne mujhe jor se hilaya...."kaha ja raha hai...."
"bahar...."apne charo taraf dekhte hue maine Arun se kaha,"kyun kuch hua kya..."
"ye bahar ka rasta nahi hai...samne dekh tu us room ki taraf ja raha hai jaha anath death bodies ko 
rakkha jata hai...."
Arun sach kah raha tha, mere samne kuch doori par wahi room tha, mera sar ghoomane laga aur uske 
baad aankho ke taar sust padne lage main us waqt sona chahta tha aur mere man me na jaane kya 
soojha jo main usi room ki taraf chal pada jaha mare hue logo ke sharir ko rakkha jata tha....mera dimag 
mere kabu me nahi tha....main bas sona chahta tha....
"abey rook,..."Naveen aur Arun ne mujhe pakda lekin main unhe ghaseetate hue aage badhne laga.....
"WTF, BC marwayega hume..."Arun mere kaan pass chilla kar bola aur achanak hee main hosh me 
aaya.....
"mujhe kyun pakad ke rakkha hai be..."un dono ko ghoorate hue maine kaha,....
Naveen kuch kahna chahta tha, lekin Arun ne use ishara karke shant kar diya aur khud bola...."kuch nahi 
chal yaha se...."
jaha ek taraf Esha ne suicide karne ki koshish ki thi wahi mere aur Esha ke pyar ne bhi, jo ki shuru tak 
nahi hua tha, suicide karne ki koshish ki.....wo din mujhe aaj bhi yaad hai jab main bahak kar us kale 
room ki taraf ja raha tha....engineer tha isliye chhod diya warna yadi doctor hota to dimag nikalkar usme 
mere us din ke behaviour ka reason dhoondhata........