22-11-2019, 10:35 AM
సాయంత్రం నేనూ, అమీర్ యేటికి స్నానానికి వెళుతూ వుండగా దోవకడ్డంగా యెర్రని కండువా అంచు పామువలె పడివుంది. అది మీరాది, దాన్ని చూడగానే కాళ్ళు వొణికాయి. మీరా చచ్చిపోయి కండువా ముక్కని అక్కడ పారేసినట్టయింది. కాని వెంటనే అది నా కోసమే వుందని గ్రహించి, ఆగాను. ఆ చుట్టుపక్కల పొదల్లోంచి 'నువ్వు వొక్కతెవూ వచ్చిందాకా యిక్కడే వుంటా'ననీ మీరా గొంతు వినపడ్డది? ఎంతకాలం నుంచి కాచుకొని వున్నాడో! ఎంత దొంగతనము వొచ్చింది. నా మీరాకి! అని ఏడుపొచ్చింది. తలవూయించి; అమీర్ వెంట నడిచాను.
చీకటిపడే సమయాన, పొయ్యిమంట దగ్గర అమీర్ని వొదిలి వొక్కెతను యేటి వొడ్డు వేపు నడిచాను మీరా వచ్చి చీకట్లో పక్కన నుంచున్నాడు.
"ఏమిటి మీరా?"
"రా! దూరంగా మాట్లాడదాం"
"వెంటనే వెళ్ళాలి, అమీర్ వెతుకుతాడు."
"వెతకనీ, అందుకనే దూరంగా వెడదాం."
"నన్నడుగుతాడు."
"భయపడుతున్నావుకదూ?"
"ఏమిటి?"