22-11-2019, 10:05 AM
ఎందుకంటే ఒక పురుషుడు అందులో అమీర్ వంటి రసికుడు, ప్రేమించిన తరవాత స్త్రీకి తన సౌందర్య మహిమ గోచరించకుండా వుండదు.
"అబ్బాయీ, ఇట్లా చూడు. నా బాబువి కాదూ! నాతో చెప్పవా?" అని మార్దవంగా అని, "చెప్పాలి. చెపుతావు, నాకు తెలుసు" అని చిన్న చిరునవ్వుతో పలికాను.
వెంటనే నాకు సిగ్గేసింది, నా ఆకర్షణని అట్లా వుపయోగించడం! కాని నా ఆనందమే భగ్నమౌతూ వుంటే! మీరా యెడల అన్యాయమనిపించింది. కాని నీళ్ళలో మునిగే మనిషి ఏం ఆలోచిస్తుంది? వశ్యుడైనాడు. కదలలేక నా వంక చూస్తూ నిలబడి చెప్పేశాడు. అమీర్ తో మాత్రం చెప్పవద్దని బతిమాలాడు.
"ఆ వూరి తోళ్ళసాయేబు కూతురిమీద అమీర్ కి మనసు కలిగింది. ఆ పిల్ల అతన్ని నిరాకరిస్తోంది. మీరా ఆ అమ్మాయి బంధువుడు. ఇద్దరికి రాయబారం నడుపుతున్నాడు. ఈ సంగతి చెప్పి మీరా నన్ను అక్కడే వొదిలేసి తప్పించుకొన్న లేడిపిల్లలా గంతేసి వెళ్ళిపోయాడు.
నేను యింటివేపు మళ్ళీ, మెల్లగా యోచిస్తూ నడుస్తున్నాను. భూమి దోవని చీకట్లో దాచుకుంది తాటిచెట్టు పూనిన దానివలె గాలిలో మెల్లిగా వూగుతోంది. కీచుకీచుమనే మైదానపు శబ్దాలతో తాటాకుల చప్పుడు కలిసింది. ఏదో రొద మొదలుపెట్టింది.