22-11-2019, 09:49 AM
"సరే నువ్విక్కణ్ణించి కదిలి రావన్నమాట. నాకు ముందే తెలుసు నీ మతం. కానీ, వాళ్ళందరూ పోరి యింకా సంగతులు బయటికి రాకముందే నిన్ను తీసుకొచ్చి దిగబెట్టమని పంపారు."
"మరి నేనేమయినా ననుకుంటున్నారు?"
"పుట్టింటికి వెళ్ళావని చెప్పుకు చస్తున్నారు."
"నమ్మేరూ?"
"అందరికీ తెలుసులే. కాని మాతో అనడానికి ధైర్యమేదీ? మా మాట నమ్మినట్టే నటిస్తున్నారు. ఆ గతికి తెచ్చావు మమ్మల్ని నిన్ను పెంచి పెద్దదాన్ని చేసినందుకు."
"పాపం. మర్యాదస్థులకి యెన్ని బాధలు! మీ దొంగ మర్యాదలూ, అబద్ధాలూ కాపాడ్డానికి నేను మళ్ళీ ఆ నరకంలోకి వొచ్చి వుండాలా? ఎందుకు రావాలి?"
"ఎందుకేమిటి? ఏదో ఓసారి తెలివితక్కువ పనిచేస్తే, పెద్దవాళ్ళ మాట విని అన్నా సర్దుకోవాలి. ఏదో యిట్లాంటివి ప్రతివారూ చేస్తారు. కాని అదే బావుందని, భ్రష్టయై నాశనమౌతానని పట్టుపట్టేదాన్ని నిన్నొకదాన్ని చూసా నీనాటికీ."
"అవును. నేను రాను, రాను."
"ఈనాడిట్టానే అంటావు. ఎన్నాళ్ళులే వీడి మోజు! తరవాత నీకు దిక్కెవరు!"