Misc. Erotica Kanika Ki Khoj Mein

[Celebrorn]

Chapter 1


Woh din mujhe aaj bhi achhi tarah se yaad hai. Bahar bahut jyada garmi ho rahi thi, aur main ghar pahunchte hi apne extra kapde utaar kar fekna chahti thi. Main kuch dino se kapdon ki ek extra layer pehen rahi thi taaki mere body mein ho rahe changes ko chhupa saku. Main soch rahi thi ki agar ghar par koi na hua toh main Riya ke diye hue naye kapde try karke dekh payungi. Sirf ek wohi toh thi jo ab mujhe acche se samajhti thi.

Jaise hi main ghar mein ghusi, kuch ajeeb sa lag raha tha. Sab log living room mein saath baithe hue they. Papa, Mummy aur mera bada bhai, Vishal. Main surprised ho gayi, yeh log kabhi is waqt ek saath ghar par nahi hote they. Anyway, unhe mujh se koi khaas matlab toh hota nahi tha, toh main seedha apne room mein jaane lagi.

Jab main sir neeche karke living room ke paas se guzar rahi thi, tabhi Papa ki kadak awaaz ne mujhe roka, "Kanak... I mean Kanika... Idhar aao..."

Main ruk gayi aur socha, aaj inhe kya ho gaya? Yeh mujhe is naam se toh kabhi nahi bulate hain.

Main waapis living room ki taraf khisak gayi aur mom ki taraf dekha, unke chehre par pareshaani saaf dikh rahi thi. Pata nahi aisa kya ho gaya tha aaj.

Papa ne kaha, "Suno, tumse kuch baat karni thi."

Maine unki taraf dekhe bina kaha, "Haan.. main sun rahi hoon..."

"Tumhe Raj Uncle yaad hai na?"

Mujhe samajh nahi aa raha tha ki woh yeh kyun pooch they. Raj Uncle dad ke close friend they jo Mumbai mein rehte they, aur yahan aksar aate rehte they. Unke sabhi doston mein mujhe bas woh isliye yaad they kyunki woh hamesha mujhse bahut achhe se baat karte they aur mere baare mein jaane mein genuinely interested lagte they. Unhe aaye hue kafi mahine ho chuke they, kya unhe kuch ho gaya tha?

Maine thaki hui aawaz mein kaha, "Haan... obviously..."

"Woh aaj shaam ko aa rahe hain."

Main apna sar peeche ki taraf jhatka aur meri tone thodi rude ho gayi, "Ughhhhh, isi liye bulaya tha kya?"

Dad ko mera ye reaction accha nahi laga, "Tumhe pata hai na ki mujhe tumhari ye tone bilkul pasand nahi!"

Vishal hansa aur dheere se bola, "Shayad iska woh wala time chal raha hai, jab emotions control mein nahi rehte... hehehe."

Main gusse se Vishal ki taraf dekha, mann kar raha tha uske daant tod du. Woh mujhse chaar saal bada tha, hamesha se ghar ka honhaar beta. Padhai aur sports dono mein awwal, kafi achha friends circle aur pichhle ek-do saalon se uski ek khoobsurat girlfriend bhi thi. Uski MBA ki padai ka bhi aakhri saal chal raha tha.

Maine usko dekh kar muh banaya, "Very funny Vishal... but lagta hai tumne biology ki ek-do class miss kar di thi..."

Vishal hamesha se mere ulta jawaab dene par jaldi se bura maan jaata tha. Woh mujhse ladne ke liye utha, par mom ne use rok liya. Usne chhidte hue kaha, "Tu hi hai jo biology ke baare mein kuch nahi jaanta, penis lekar paida hua aur sochta hai ki ladki hai!"

Dad beech mein chillaye, "Bas karo! Suno... Kanika... tumhe aaj shaam ke liye taiyar hona hoga. Mom tumhari help karengi. Raj ne bataya hai ki uski mummy bhi aa rahi hain saat mein. Uski mummy ko tumhare is sab ke baare mein na toh pata hai aur na hi samajh aayega. Toh hum chahte hain ki sab kuch... proper dikhe."

Main abhi bhi confused thi, kya main kuch miss kar gayi, "Kya bol rahe ho aap? Mujhe unke liye kyun taiyar hona hai?"

Dad ne mom ki taraf dekha jaise unse keh rahe hon ki woh hi sab explain kar de. Mom ne pehli baar apna munh khola, unki aankhen pareshaan thi aur awaaz me halka sa kampan tha, “Beta… Raj Uncle ne tumhare liye rishta bheja hai..."

Maine unki aur ghoora jaise ye koi mazak ho, "Kiski shaadi ka rishta?"

Mom ne dheere se kaha, "Tumhari aur unki..." 

Main turant ek-do kadam peeche hat gayi aur meri awaaz tez ho gayi, "WHAT!! Mazaak kar rahe ho kya?! Meri aur unki shaadi?!"

Dad ka sabr ka ghada bhar gaya tha, "Nahi! Majak toh tum karte ho hamare saath! Hum tumhe bahut bardaasht kar chuke hain. Ab jab tumhare liye yeh rishta aa hi gaya hai, toh humne decide kar liya hai ki yehi tumhare aur humare dono ke liye best hai! Hum is rishte ke liye haan kar rahe hain."

Meri tez aawaz kaanp rahi thi, "Pata bhi hai aap kya keh rahe ho! Main sirf 20 saal ki hoon, college bhi khatam nahi hua, aur aap apne boodhe dost se meri shaadi ki baat kar rahe ho!"

Dad turant khade ho gaye taaki meri awaaz neeche daba sakein, "Suno meri baat! Tum mere ghar mein rehte ho, aur tumhara future main decide karunga! Toh chup chaap apna ye ladkiyon bhar ka shareer lekar apne kamre mein jao aur taiyar hona shuru karo. Sudha... ise... andar lekar jao..."

Par Mom ko aane ki zaroorat nahi padi kyunki main turant andar bhaag padi thi.

Mere emotions bilkul out of control ho gaye they. Aankhon se aansu tezi se behte hue gaalon par se neeche tapak rahe they. Yeh kya ho raha tha! Us waqt mujhe kya pata tha ki meri puri zindagi ab hamesha ke liye badalne wali thi.

[Rohan0064]

Great start keep it up

[Celebrorn]

Chapter 2


Bistar par girte hi mera chehra takiye mein dhans gaya. Par aansu abhi bhi behte rehe. Main itni thak gayi thi ki sochne ki himmat bhi nahi bachi thi. Bas aankhein band karte hi neend aa gayi.

Neend mein bhi mujhe apne Dad par behad gussa aa raha tha. Unka mujhe samajhne se inkaar aur har baat par rokna-tokna, iska gussa toh tha hi. Par isse bhi zyada sharm is baat ki thi ki Dad ki nazar mein main kya thi. Ek galti. Ek sharmindagi. Kuch jo "theek" karna zaroori tha par ho nahi raha tha. Isiliye unhone ab yeh nayi tarkeeb nikaali thi, mujhse hamesha ke liye chhutkara paane ke liye.

Pata nahi main kitni der soyi thi par jab main jaagi maine mehsoos kiya ki koi mere baalon mein apni ungliyaan ghuma raha tha. Ek naram awaaz ne mera naam pukara - "Kanika... Kanika... uth beta..."

Ek saal pehle, maine apne ghar walon se request ki thi ki woh mujhe ab ghar par Kanika bulayen. Mere bhai ne haste hue apna khaana thook diya tha aur mera majak udane laga. Jabki Dad ne hamesha ki tarah naraazgi se respond kiya. Sirf Mom samjhi thi ki mere liye is naam ka kya matlab tha.

Mom ko pata tha ki mujhe yeh naam kafi time se pasand tha. Unhone toh pyaar se mujhe us naam se pehle se hi bulana shuru kar diya tha, jab ghar mein sirf hum dono hote they. Kanika mere janam ke naam Kanak se kaafi close tha, aur isliye ek perfect choice tha. 

Kabhi kabhi main sochti hoon... kya mera naam Kanak isliye rakha gaya tha, taaki ek din main Kanika ban saku?

Mom ne fir se kaha, "Kanikaaaa... uth jao... late ho raha hai. Raj Uncle aur unki mummy ek ghante mein aa rahe hain."

Maine ek aankh kholi, ekdam se sab yaad aa gaya ki main kyun ro rahi thi, "Mom... yeh kya bakwaas hai... aur aap Dad ko aisa kaise karne de sakti ho!"

Maine kambal ko apne chehre ke upar kheech liya taaki unhe dekhna na pade.

Mom mere paas aakar baith gayi, "Kanika, meri baat suno... please..."

"Sunne ko hai hi kya?"

Mom ne dheere se kaha, "Pata nahi tumne bahar kya suna, par aaj tumhari shaadi nahi ho rahi. Bas samajh lo ek family meeting hai, aur tum us meeting mein kisi se milogi."

Main kambal ke andar se zor se boli, "Par main kisi se milna nahi chahti."
Mom ki awaaz serious ho gayi, "Yeh toh galat baat hai. Tumne kaha tha tum ladkiyon jaisa mehsoos karti ho aur ek ladki banna chahti ho. Maine tumhe us sab mein support kiya. Shaadi ke liye ladkon se milna bhi ladkiyon ki zindagi ka ek hissa hota hai."

Maine finally apne sar kambal se bahar nikaala, "Par woh koi LADKA nahi hai... woh ek aadmi hai... ek BOODHA aadmi."

Mom ko laga jaise maine kuch nonsense bola ho, "Areee, woh koi boodha aadmi nahi hai! Woh toh humari...”

Maine unki taraf dekha. Haan, exactly. Woh aapki age ka hai. 

Mom ne jaldi se baat badal di, “Dekho... main jaanti hoon ki tumhe kafi shock laga hoga. Par abhi please bas yeh meeting kar lo. Tumhare dad kaafi gusse mein hain. Uske baad hum sab baith kar is baare mein baat karenge."

Mom ne mera kambal kheechne ki koshish kari aur main use kas ke pakde rahi. Hum dono ke beech ye kheecha-taani chal rahi thi. Mom ne achanak se apni pakad dheeli kar di aur halke se muskurayi.

"Pata hai iss sab mein sabse achhi baat kya hai?"

Maine muh banaya, "Kya?"

"Aaj tum meri ek nayi saree pehen sakti ho. Mujhe pata hai tumhara kitna mann karta hai meri sarees pehenne ka, par main hamesha mana kar deti hoon. Par aaj nahi karungi. Balki tumhara acche se makeup bhi karungi. Tum saree aur makeup pehen kar aaram se ghar mein yahan-wahan ghoom sakogi."

Maine kambal ko kas ke pakde rakha, par Mom ki baat mere kaano mein goonj rahi thi. Saree? Makeup? Ghar mein khule aam? Yeh sab mujhe chahiye tha... par iss tarah nahi. Yeh koi deal nahi thi jo main karna chahti thi.

Mom ne apni awaaz naram rakhi, "Bas ek baar mil lo, yeh saree pehen kar. Uske baad tum decide kar lena ki tumhe kya karna hai."

"Tum jhooth bol rahi ho. Dad ne already decide kar liya hai."

Mom ne kaha, "Kanika... sach mein... abhi kuch decide nahi hua hai. Par agar tum is meeting ke liye tayyar nahi hui, toh dad aur gussa ho jayenge. Fir main kuch nahi kar paungi."

Main chup ho gayi. Mom shayad sahi keh rahi thi - agar maine dad ko aur gussa dilaya toh woh mera internet aur pocket allowance band kar sakte they.

Main jhunjhlakar uth kar baith gayi. Mom ne jaldi se bistar par kuch sarees mere saamne bichha di. Sab bahut sundar lag rahi thi aur unme se ek chunna bahut mushkil tha.

Mujhe sarees ke baare mein zyada kuch pata nahi tha. Maine ek saree ko haath mein lete hue poocha, "Yeh mujhe fit bhi aayengi?"

Mom ne meri taraf dekha - shayad woh yehi soch rahi thi ki kitna kuch tha jo main abhi nahi jaanti thi, "Haan... sarees ek hi fit ki aati hain. Blouse aur petticoat har kisi ko apne naap se silwana padta hai."

"Okay... aur kya aapka blouse mujhe fit aa jayega?"

Ek pal ke liye mera saara dhyaan saree pehenne par lag gaya tha, aur main bhool gayi thi ki yeh sab kis liye ho raha hai.

Mom ne kaha, "Hmmm... mera size toh bada hoga but try kar sakte hain. Khadi ho jao..."

Main dheere se bistar se uthi aur apne kamre ke sheeshe ke saamne khadi ho gayi. Mom mere bagal mein aa khadi hui.

Mom ne meri t-shirt ki sleeve ko halke se khincha, ishara karte hue ki main use utaar doon, "Utaaro ise..."

Maine jhijhakte hue apni long-sleeved shirt ko upar kheencha, aur uske saath hi andar ki half-sleeved t-shirt bhi khichkar nikal aayi. Main sirf ek patle se tank top mein khadi reh gayi thi, jisme mere boobs ka aakar saaf dikh raha tha. Picchle ek-do saalo se main Mom ke saamne aise nahi aayi thi. Mujhe sharm mehsoos ho rahi thi.

Mera seena dekh kar Mom ne ek halki si saans li. "Ohhhh... mujhe pata nahi tha ki ye... tum... itni badi ho gayi ho."

Maine khud ko sheeshe mein dekha. Mere seene ke ubhaar tank top mein se clearly dikh rahe they. Jab pichli baar measure kiya tha toh main A cup se B cup ki taraf jaa rahi thi. Do saal pehle jab se maine hormones pills lena shuru kiya tha, meri body tezi se badalne lagi thi. Meri kamar beech se patli ho gayi thi aur hips thode chhaude. Flat pet hone ki wajah se mere curves aur prominent lag rahe they.

Mom abhi bhi mere seene ki taraf dekh rahi thi, aur maine sharmake kaha, "Mom... aap size ka bol rahi thi na..."

Mom halke se hasi, "Haan... sorry.” Phir thoda sochte hue, “Agar mujhe guess karna ho, toh tum abhi 30B aur 32B ke beech mein ho... bilkul wahi size jab meri shaadi hui thi.” 

Unke dimaag mein ekdam se lightbulb jala. “Mere paas kuch purane blouses rakhe hue hain. Woh shayad tumhe fit aa jayenge."

Mom tez kadmo se kamre se nikal gayi, darwaza halke se kholti hui aur phir use peeche se kas ke band karti hui. Bilkul waise hi jaise koi karta jab unki beti kapde badal rahi ho.

Maine sheeshe mein fir se apne aap ko dekha. Apne safar mein kitni door aa gayi thi main. Maine apne seene par halke se haath fera - bahut halke se baal mehsoos hue jo mujhe khud sheeshe mein nahi dikh rahe they. Main regularly hair removal cream lagati thi, aur jab se maine hormones lena shuru kiya tha tab se baalon ki growth slow ho gayi thi.

Main abhi bhi apna haath wahan rakhe hue thi ki mujhe darwaza khulne ki aawaz aayi. Mera haath jhatke se neeche aa gaya aur main sheeshe se nazar hatakar Mom ki taraf dekhne lagi.

Mom excited lag rahi thi, "Dekho... mujhe apni shaadi wala ek blouse mil gaya! Yeh is blue wali saree ke saath perfect rahega."

Mom ne blouse mere saamne latkaya. Kapda dekh kar lag raha tha ki itne saalon baad bhi bahut achhi halat mein rakha gaya tha.

Maine blouse ki taraf haath badhaya, par Mom ne use thoda peeche kheench liya. 

"Tum pehle apni... woh pehenna chahogi?"

Jab unhone yeh kaha toh mere gaal laal ho gaye. Mujhe pata hi nahi tha ki unhe maloom hai mere paas bra bhi hain. Meri saari bras ya toh sports bra thi ya training bra. Woh sab mujhe Riya ne hi laakar di thi, mere andar kahan himmat thi unhe khareedne ki. Bas ek cups aur hooks waali thi jo usne pichle hafte di thi, jise maine abhi tak try bhi nahi kiya tha.

Mom ne meri neeche ki drawer ki taraf ishara kiya, "Jao... jaldi... nikalo use."

Mujhe ehsaas hua ki unhe pata tha main apni bras kahan rakhti thi.
Maine drawer se saari bras nikaalte hue unhe bistar par rakh diya. Mom ne unki taraf jaldi se dekha aur halke se muskurate hue woh nayi waali uthayi jis par phoolon ka design tha.

Mom ne uska price tag phaad diya aur use mere haath mein dete hue kaha, “Yeh waali.” 

Main bra ko pakde khadi rahi. Maine Mom ki taraf dekha, phir apne tank top ki taraf. Mom turant samajh gayi aur unhone doosri taraf muh kar liya.
Maine jaldi se tank top utaarte hue nayi waali bra pakdi aur straps apne kandho par daale. Cups ko seene par thoda sa adjust kiya. Ab bas peeche ke hooks lagane they.

Maine peeche haath le jakar dono ends ko dhoondhne ki koshish ki. Sports bras toh bas upar se pehen leti thi, par yeh... yeh bilkul alag thi. Ek haath se ek end pakad liya, doosre haath se doosra end dhoondhti rahi. Jab dono pakad liye toh unhe paas laane ki koshish ki par hooks line up nahi ho rahe they. Do-teen baar try karne ke baad bhi kuch nahi hua.

Mujhe aise struggle karte dekh Mom ne peeche se dono ends ko pakad liya aur paas kheencha. Unhone dheere se mera haath guide kiya, "Yahan... haan... ab aise hook kar do."

Jaise hi clips hook mein fas gaye, mere seene ko ek alag sa ehsaas hua. Pehli baar mere seene ko ek acchi si shape mil rahi thi, jabki sports bra toh bas unhe flat kar deti thi.

Maine Mom ki taraf dekha jaise unhone koi karishma kar diya ho. Mom halke se muskurayi, “Abhi sikhane ka time nahi hai beta... baad mein achhe se sikhati hoon.”

Bra ke cups mere seene par bilkul sahi fit ho gaye, mere boobs ko acche se dhakte hue. Main bra ke fit ko nihaar hi rahi thi ki achanak se Mom ne sab control mein le liya. “Jaldi karo, time kam hai,” kehte hue unhone mujhe blouse pehnaya aur jaldi se hooks fasten karne lagi. Thoda loose tha par phir bhi bura fit nahi tha.

Mom ne kaha, “Jeans bhi utaaro,” aur petticoat ko zameen par circle mein bicha diya. Maine jhijhakte hue jeans utaari. Mom ke saamne sirf underwear mein khadi hona kafi ajeeb sa lag raha tha aur mere haath naturally aage ki taraf aa gaye. Maine jaldi se petticoat mein step kiya aur Mom ne use upar kheenchte hue meri kamar par baandh diya.

Maine gehri saans li. Ab bas saree hi bachi thi.

Mom jaldi se mere pairo ke upar saree wrap kar chuki thi aur ab dhyaan se pleats bana rahi thi. Unke haathon ko itni aasani se chalte dekh kar, main soch rahi thi ki woh itni complicated cheez ko kaise itna effortless bana deti thi. Maine khud ek ya do baar akele mein saree pehenne ki koshish ki thi, par har baar gadbad hi hui thi. Aur fir saree ko wapas fold karna bhi itna frustrating aur mushkil kaam tha. Pichli baar ke baad maine dobara try hi nahi kiya tha.

Maine khud ko sheeshe mein dekha. Mujhe apni Mom ki gori skin mili thi, aur dark blouse aur petticoat pehne hue, meri gardan aur kamar aur bhi zyada gori dikh rahi thi. Jab main thoda mudi apni side profile dekhne ke liye, Mom ne mujhe dheere se daanta.

"Kanikaaa... seedhi khadi raho aur hilo mat. Kisi aur ke upar saree bandhna waise hi itna mushkil kaam hai."

Main muskurayi aur fir se seedhi khadi ho gayi. Apne aap ko dekhte dekhte main poori tarah se bhool gayi thi ki yeh sab kis liye ho raha tha.
Mom ne saree ke pleats ko apne haath mein majbooti se pakda aur unhe petticoat ke andar securely tuck kiya. Unka haath petticoat ke andar ja raha tha. Main thoda embarrassed mehsoos karne lagi, aakhir neeche toh... agar Mom ka haath galti se... Sochte hi mere gaal sharm se laal ho gaye.

Par thank god, aisa kuch nahi hua. Mom ne pallu pakda aur use mere seene aur kandhe par se le jaate hue achhe se dbang kar diya. Phir woh peeche hati, mujhe upar se neeche tak dekhte hue.

"Kaisa lag raha hai?" Mom ne kaha, par lag raha tha jaise woh khud se hi pooch rahi thi.

Maine mirror mein dekha toh kuch kami lag rahi thi, "Ummm... ek badi problem hai..."

"Kya problem??? Saree toh mujhe sahi lag rahi hai..."
Main thoda frustrated hui, "Saree perfect hai... par mere baalon ko toh dekho. Main abhi bhi apne chote baalon mein ladki toh kahin se nahi lag rahi hoon."

"Oh! Main toh almost bhool gayi thi. Aise hi khadi raho."

Main wahin khadi rahi, darwaza ab thoda khula tha. Mom jaldi se ek polybag ke saath andar aayi. Unhone bag se ek wig nikala. "Lo... tumhare dad ne online mangwayi thi."

"Oh!" Maine ek choti si saans li.

Main surprised thi ki Dad ne yeh mere liye mangwayi thi-unhone toh kabhi is sab ko encourage nahi kiya tha. Aisa lag raha tha jaise yeh shaam kaafi pehle se hi planned thi.

Mom ne wig ko bag se nikala aur use dhyaan se straighten kiya. "Pehle apne baalon ko peeche karo," unhone kaha.

Maine apne chote baal peeche kiye aur Mom ne ek hairnet nikala - woh mesh jaisi cheez jo baalon ko flat rakhti hai. Unhone use mere sir par dhyaan se stretch karke pehnaaya, mere saare natural baal andar tuck karte hue. Mesh tight tha aur mera sir thoda ajeeb mehsoos kar raha tha, par Mom ne use adjust kiya taaki woh comfortable ho.

Phir unhone wig ko dono haathon mein pakda aur mere sar par rakha. 

"Seedhe dekho," unhone kaha. Maine apni nazar sheeshe par rakhi jab 

Mom ne wig ko peeche se aage ki taraf carefully slide kiya, hairline ke saath properly align karte hue. Unhone edges ko adjust kiya, meri kaan ke paas se baalon ko theek se set karte hue.

"Thoda aur peeche," Mom ne apne aap se kaha, wig ko halka sa adjust karti hui. Unhone hairline check ki aur satisfied hokar kaha, "Perfect."
Maine khud ko sheeshe mein dekha. Lambe baal mere kandhe se neeche beh rahe they, mere gaalon ko frame karte hue aur seene tak pahunch rahe they. Main bilkul waisi lag rahi thi jaisi main hamesha dikhna chahti thi. 

Main ek ladki lag rahi thi.

Mom ne apna sir peeche se mere kandhe par rakha aur sheeshe mein mujhe dekha.

Unhone dheere se kaha, "Pata hai... main hamesha doosri baar ek ladki chahti thi. Mujhe yeh kehna toh nahi chahiye, par main kaafi disappointed thi jab tum ladke ke roop mein..."

Maine sheeshe ke zariye Mom ki aankhon mein dekha, nahi jaanti thi woh aage kya kehne waali thi.

Mom ne kaha, "Par aaj... mujhe lagta hai mujhe woh beti mil gayi jiska main hamesha se sapna dekhti thi."

Hum dono ki aankhein geeli ho gayi. Maine Mom ke kandhe par apna sar halka sa jhuka kar rakh diya. Yeh pal bahut special lag raha tha. Pehli baar Mom ne mujhe apni beti bulaya tha.

Tabhi uss pal ko kharaab karne ke liye, doorbell baji aur kuch seconds baad darwaza khulne ki awaaz aayi. Ghar mein mehmaano ki awaazein goonj uthi.

Mom hadbada gayi aur mujhe sheeshe ki taraf kheencha, unke haath unki soch se zyada tezi se chal rahe they. Unhone jaldi se mera chehra saaf kiya, foundation lagaya, gaalon par halka sa blush, aankhon ko dhyaan se trace kiya, aur lipstick se finish kiya. Yeh sab karte hue woh instructions de rahi thi jo mujhe bilkul samajh nahi aa rahi thi. Main sach mein apni Mom ko yeh sab itni achhi tarah karte dekh kar hairaan thi.

Aakhri touch ke roop mein, unhone ek choti si bindi mere mathe par lagayi. Jab Mom peeche hati, main sheeshe mein dekhti reh gayi. Woh ladki kaun thi? Maine halka-fulka makeup pehle bhi lagaya tha, par yeh chehra, yeh insaan... yeh main thi kya? Sharmayi hui. Sundar. Aur ek aisi zindagi ke liye ready jo main chahti nahi thi.

Dad ne kamre ka darwaza khol kar jhaanka aur mujhe ek quick glance di. Unki aankhein mujh par kuch seconds se zyada ruk gayi.

Dad ne phir Mom ki taraf dekhte hue kaha, "Sudha... jaldi karo. Unhe aaye hue 10-15 minute ho gaye hain."

Mom ne unhe ek teekhi nazar se dekha, "Ek ladki ko ready hone mein time toh lagta hai. Tumhe pata hai yeh. Aur unhe bhi samajh aa jaayega. Woh wait kar sakte hain. Jab yeh taiyar ho jaayegi tab le aaungi."

Dad frustrated lage par woh Mom ko aur upset nahi karna chahte they. Unhone darwaza band kiya aur chale gaye. Meri nazar darwaze par hi tiki rahi, jaise Dad abhi fir se gusse mein wapis andar aa jayenge.

Mom ne dheere se mere kandhe pakde, " Pareshan mat ho, mard hamesha humein jaldi karate hain. Par ek ladki ko achha dikhne ke liye time zaroor lena chahiye."

Mom ne ek patli soni ki chain mere gale mein pehna di, mere haathon mein kangan aur ungliyon mein angoothi. Unhone mujhe aakhri baar dekha aur muskurayi.

“Tum bahut pyaari lag rahi ho.” Mom ne mere mathe par halka sa kiss kiya.

Unhone meri gardan ke peeche kajal ka ek chota sa teeka lagaya, "Nazar se bachane ke liye!"

"Ab tum yahi rukna. Main thodi der mein aati hoon tumhe lene."

Mom ke jaate hi kamra achanak khaali aur thanda sa lagne laga. Bahar baithe logo ke baare mein sochte hi meri saansein tez ho gayi aur poora shareer kaanpne laga.

Main bas yahi sochti rahi—jab woh log mujhe dekhenge toh unhe kya nazar aayega? Ladkiyon ke kapde pehne ek ladka, ya phir sach mein ek ladki?